Josué1

Txkonjtz Joswe tu'n Qman Dyos

1Tkyimlenxi' Moyses, ju' tmajin Qman Dyos, yolin Qman Dyos tuk'i'l Joswe, tk'wal Nun ex tonil Moyses, kjalu:
2Matxina' kyimju' nmajine' Moyses, ja'lo aya k'ik'ex q'inkye ntaname' Israel jlajxi' nin a' Jordan, tu'ntzun kypone' toju' tx'otx' kxe'l nq'o'ne' kyeye'.3Kxe'l nq'o'nwe' tkyaqilju' tx'otx' kyeye' jakb'ela' kyq'o'n kyqane', kse'nx oje ntziyaye' te Moyses.4Tzajx jata' chq'ajlaj toj tnayajkya'j ex ponx jata' witz Lib'ano toj tb'a'nq'ob'kya'j, ex tzajx ttzi nin a' Ewprates toj tjawetzq'ij, tkyaqilju' kytx'otx' itit ex ponx ttzi ninnjab' Mediteraney toj tkub'exq'ij.5Mix-a'lo' jun kb'elsante ti'ja toj tkyaqilju' tchwinqlala, ex chin tenb'ile' tuk'i'la kse'n ntene' tuk'i'l Moyses, lay kyej nq'o'na ex milo kjela' ntzaqpi'na.6Tenx tipumala ex kuwx tk'u'ja, qu'n aya kxel pa'nteju' tx'otx' kyeju' tnam lu, qu'n a kyetzb'ilju' oje ntziyaye' kye ojtxi' kyyajilb'ene'.7O'kxwe' nxinqani'n teya tu'n ttenxi'x tipumala ex tu'n lalun tzaj numja, ex tu'n kyjapun kykyaqilju' kawb'il tu'na, ju' xitq'o'n nmajine' Moyses. Che japunx tu'na kse'nxju' nkyma'n tu'ntzun telb'a'n tkyaqilju' ktb'incha'ya.8Na'nqe'tza yol ntma'n toju' tu'jil nkawb'ile' kukxju' ex ximana kyi'j q'ijtl ex qonik'an, tu'ntzun tb'inchanteya kukxju'. Tkyaqiltzunju' ktb'incha'ya k'elelb'a'n.9Ayine' nchin q'mante teya tu'n tten tipumala ex tu'n tkuwsante tk'u'ja. Lalun xob'a ex lalun kub' numja qu'n ayine' Dyos Manb'aj, chin tenb'ile' tuk'i'la jaxjaku' matxa'ya, chi Qman Dyos te. B'ajtnk'u'nti'j Joswe tu'n t-xi' toj q'oj
10Xi'tzun tq'o'n Joswe chaq'b'il kyeju' nejenel te tnam:11Kukyxi'ye' toj tkyaqilju' kyxmuj aj Israel ex kymanxe' kye kykyaqil tu'n kyb'inchante kywa, qu'n kqo ik'ex toju' nin a' Jordan toj oxe' q'ijtl ja'lo tu'ntzun qtzyunteju' tx'otx' ktzajel tq'o'n Qman Dyos qe, chij kye.
12Ex yolin Joswe kyeju' kyyajajil Rub'en ex Kad exju' nik'jan tyajajil Manases, xitma'n kye:
13Kyna'ntzju'ye' b'ajtma'n Moyses tmajin Qman Dyos qe, tej tmante qa ktzajel tq'o'n Qman Dyos tx'otx' qe tu'n qojlan toj.14Che kyq'onqe'kje' kyxu'jile', kyk'wale' ex kyalu'ne' tzalu, toju' tx'otx' xitq'o'n Moyses kyeye' toju' plaj te Jordan lu. Kykyaqiltzunju' ichan b'a'nqe' tu'n kyxi' q'ojil, kyiq'inx kyq'ojb'il ex kukyxi' nej kywitzju' kyitz'in tu'n kyonin kyi'j,15tzmaxi'j ajttzaj tq'o'n Qman Dyos jun kynajb'il jatu'n kyojlana', kse'n saj tq'o'n kyeye', ex tzmaxi'j ajkyok te tajawju' tx'otx' ktzajel tq'o'n kye. B'a'ntzun tanjtz kyi'jtze' toju' kytx'otx'e' lu ati toj tjawetzq'ij te nin a' Jordan, tu'ntzun tkub' kytzyu'ne' tx'otx' xitq'o'n Moyses kyeye', ju' tmajin Qman Dyos kyeye', chij kye.
16Aye'tzunkye xikytzaq'we'n:
Kqb'incha'qe' tkyaqilju' matxi' tchaq'a qeye', qo xe'le' jaqoxe'la' tchq'o'na.17Qo nimale' teya kukxju', kse'n o nimane' te Moyses. O'kxqe' qqanb'e'tz tu'n tten Qman Dyos tuk'i'la kse'nxju' xten tuk'i'l Moyses.18Kykyaqiltzu'n majaw kyiq'i'n kyib' ex min xib'i'na kyu'n, che kyimel. Noq o'kxte' kuwxa ex lalun tzaj numja, chechij te. E'xitchq'o'n Joswe nenulte Jeriko toj ewaj
1E'xitchq'o'n Joswe kab'e' xjal tu'n kyxi' nenulteju' nintnam Jeriko toj ewaj, e'tzajx Sitim.
E'xi'tzu'n nenul, ex e'pon tja Raab', jun qya ajpajil toj Jeriko, jaekyeja'ten te qonik'an.2Atitzun jun pon q'malte teju' nimaqkawil toj Jeriko qa ate' junjun aj Israel e'pon nenulteju' kytanam tu'n tkub'ti'j kyu'n.
3E'tzajtzun tchq'o'n nimaqkawil toj Jeriko jte' xjal te q'oj tzyulkyeju' kab'e' nenul toj ewaj lu, atzunte Raab' lwiyxi'x e'jax tiq'i'n tu'n kyewan twi'ju' ja, kyjaq' junjun pchoj lino ntoq tzqijset. Tetzunj kyponju' ichan tjaju' qya, xikyma'n tu'n kyetz tiq'i'nju' kab'e' ichan ate'qe' tja, qu'n nenulteju' tnam ẍe' ula' toj ewaj. Atzunju' qya xitma'n kye:
—B'ayte' ax mache ul junjun ichan nk'etze', mixtzunti' b'i'nwe' wu'n jaẍe tzaja'. Na'mtoq qok yupj tej ẍe' ex, qu'n a kmuju' njpetju' nintnam, ex min b'i'n wu'ne' jaẍe'xa'. Qatzun mache exe' jyolkye, kb'elte' kyi'j kyu'ne', chij kye. Jawtzun kyjqo'ntl xq'uqil ttzi nintnam tu'n kyexju' xjal e'xitchq'o'n nimaqkawil, ex kub' kyjpu'ntl, e'xilpetzuntz kyi'j tu'me'l nin a' Jordan janche ik'xa' xjal tu'n kyjlajin.8Tetzunj na'mxtoq kyxi'ju' nenul wtal, jax Raab' twi' ja ex xitma'n kye:
9—B'i'n wu'ne' qa oje txitq'o'n Qman Dyos tx'otx' lu kyeye', qu'n matxi'xi'x tz'ok kychiye' qi'je'. Kykyaqilju' najliqe' tza'lu matxi' kyna'ju' xob'il b'a'nxi'x tu'n kpaje'.10B'i'n qu'ne' qa tej kyetze' toj Ejipt, kub' tzqiju' Ninnjab' Kyeq tb'i tu'n Dyos tu'n tb'ant kyik'tze' toj. Ex ikx b'i'n qu'ne' qa majx b'aj toj kywi' Seon ex Ok nimaqkawil kye amorey kyu'ne', ju' ate'toq jlajxi' nin a' Jordan.11Nimxi'xju' xob'il matxi' tzaj qi'je' atxi'xj qb'inteye', ex mix-a'lo'te ntq'o'ntib' tu'n tq'ojin kyuk'i'le'. Qu'n aku' Dyos Manb'aj te toj kya'j ex twitz tx'otx' ati kyuk'i'le'.12Qu'mtzun nchin kub'sane' kyeye' tu'n ttzaj kyma'n jun kyole' ax weye' ja'lo, qa kkyb'incha'ye' b'a'n kyeju' toj njaye', kse'nxju' b'a'n matxi' nb'inchaye' kyeye'. Kyq'ontze' jun techlal qa kjapumel kyu'ne',13lalun che kub' kyb'yo'ne' nmane', ntxuye', nxib'ene' ex e'witz'ine' qya, ex tkyaqilju' ati kye. ¡Lalun qokub' kyb'yo'ne'!, chij kye.
14Aye'tzunkye xikytzaq'we'n:
—Ayo'ku'qe' qoklolkyeye', naq o'kx qa min xxityoli'na lu. Ajttzaj tq'o'n Qman Dyos tx'otx' lu qeye', kqb'incha'ye' b'a'n teya, chechij te.
15Tu'ntzunju' najlitoq Raab' toj jun ja b'incha'n tib'ajxi' nintapi ti'ju' nintnam, eku'tz tq'o'n ti'j aqwil toj jun tokexspik'un.16Ex xitma'n kye:
—Kukyxi'ye' toj nimaq k'ul, tu'ntzun lalun che knete' kyu'nju' nche jyonkyeye'. Che ewanqe' oxe' q'ije' atzu', tzmaxi'j ajtanjtzkyi'j toju' nintnam. B'a'ntzun t-xikyljo'n kyb'etze', chij kye.
17Aye'tzunkye xikytzaq'we'n te:
—Kjapumelqe' qyol saj tkub'sa'na tu'n t-xiqtziya'ne' teya.18Naqtzun aju', ajqokxe' toju' tnam, ati tu'n tex tyob'i'na nin aqwil kyeq ttzi tokexspik'un teju' tjaya sajb'en tu'n qku'tze'. Che tzajel tb'u'yi'nju'ya, tmana, ttxuya, e'titz'ina ex kykyaqilju' toj tja tmana.19Qatzun ati jun matz'ex ti'jxi' tjaya, axi'xtzuntz qama kub' b'yo'n; ex mya'yo'tzuntze' ati qpaje'. Qatzun ati junqe' matzaq'pon tq'ob' ti'j jun ati tuk'i'la toj tjaya, ayo'tzuntze' ati qpaje'.20Qatzun matxi'ya ẍtaq'ilqeye', myatzun ilti'jtz tu'n tjapu'n qyole' xxiqma'ne' teya tu'n qb'inchanteye', chechij.21Atzunte xittzaq'we'n: B'a'natzun ikju', chij.
Exitq'olb'e'ntzuntz tej kyanj, exi'tzuntz. Yajxi'tzuntel etz tyob'i'n qya aqwil kyeq ttzi tokexspik'un te tja.
22Exi'tzu'n kab'e' nenul toj ewaj kyoju' nimaq k'ul, e'ewan oxe' q'ij atzu', aye'tzu'n xjal te q'oj inxi'xtoq che jyon kyi'j ex mixti'x e'knet kyu'n, o'kx kyanjtz jumajtl toj Jeriko.23Eku'tztzu'n nenul toj ewaj kywi' nimaq k'ul, e'jlajin toju' nin a' ex e'ul jumajtl jatoq ta' Joswe, xikyma'ntzuntz te tkyaqilju' matxi'toq b'aj.24Xikyma'n te: Matxi' kub' tq'o'nte Qman Dyos tkyaqilju' tx'otx' toj qq'ob'. Matxi'xi'x tz'ok tchi kyi'j kykyaqilju' najlqe' toju' tnam lu, chechij te. E'jlajin aj Israel toju' nin a' Jordan
1Tojtzun juntl q'ij, b'a'n prim, e'etz Joswe kyuk'i'l kykyaqil aj Israel toj Sitim ex e'pon ttzi nin a' Jordan; e'kub'tenpun atzu' ex min e'jlajinaj.2Tik'lenxi'tzun oxe' q'ij, exi' nejenel toj tkyaqilju' kyxmuj3ex xikyq'o'n chaq'b'il lu kye aj Israel: Naq ajkyka'yinteye' ajkyik'ju' pale aj Leb'i tuk'i'lju' kax te Qman Dyos, kukyetze' jata'qe'ye' ex che lpexe' kyi'j.4K'eleltzun kynik'tze' jatu'n kyxa'ye', qu'n mix-a'lo' junkye' oje tzik'x toju' b'e lu. Naq o'kx mixti' tu'n kyoklq'eye' tk'etzju' kax, qapelo kab'naqlajoj ky'jaj (1 Km.) che kxe'la' lpeye' ti'jxi', chechij kye.
5Ex xitma'n Joswe kye: Kyẍtilsam kyib'e', qu'n kkyla'ye' Qman Dyos najchi'j tuk'i'l b'a'nq'ob'aj, chij.6Atzu'n kyeju' pale xitma'n: Kyiq'i'nktze' tkaxilju' yol kyejni b'entti'j kyuky'i'le', ex kukyik'xe' toju' nin a' kywitzu' xjal, chij kye.
Xi'tzun kyiq'i'n pale tkaxilju' yol ex e'kub'nej kywitzju' xjal.7Xitzun tma'n Qman Dyos te Joswe: Kxe'l qex ja'lo, k'okyela wu'ne' nimxi'x toklena atl junjun toj kywitz aj Israel. Kkaneb'eltzuntz toj kywitz qa atinqine' tuk'i'la kse'n ẍin tene' tuk'i'l Moyses.8Qu'mtzun, q'manxa kyeju' pale iqilte tkaxilju' yol kyejni b'entti'j, ajkypon ttzi nin a' Jordan, tu'n kywe' toju' nin a', chij te.
9Atzunte Joswe xitma'n kye aj Israel: Kukytzaje' ex kyb'inxe' ntma'n Qman Dyos.10A techlal ja'lu qa ati Qman Dyos itz' kyuk'i'le', exqa che eleltiq'i'n aj Kanaan kywitze', e'itit, eb'ey, peresey, kyerkesey, amorey exqe' jeb'usey.11Kyka'yintzpe'ye', k'ik'exju' tkaxil tyol Qman Dyos tajaw tkyaqil twitz tx'otx' kywitze' toju' nin a'.12Qu'mtzun, kysk'ome' kab'lajoj (12) ichan ja'lo, junjun ti'j junjun tneju' kab'lajoj (12) tnej tyajajil Israel.13Aye'tzu'n pale iq'ilte kax te Qman Dyos tajaw tkyaqil twitz tx'otx', ajtku'x kyq'o'n kyqan toju' nin a', kb'el taq'pu'ntib'ju' a' toj kab'e', kweb'elju' a' ntzaj jawl, kb'el tb'u'yi'ntib' junx naku'j makub' mqet, chij kye.
14E'etzju' aj Israel toj kypach xb'alun tu'n kyik'x jlajin toju' nin a', ex nejlqe' pale kywitz iq'i'n tkaxilju' yol kyejni b'entti'j kyu'n. Naqtzun nb'ent tku'x kyq'o'n pale kyqan toju' a' ttzixi' (majxtoq nex piq'chaju' nin a' Jordan ti'ju' tkb'el toju' tq'ijlalil tu'n tjaw b'uyit awal) min b'etlju' a' ntzaj jawl ex naq kyej tb'u'yi'ntib', najchaq kyeja' ten toju' nintnam Adam, tk'etzju' tnam Saretan kuwsa'n. Atzu'n a' npon toju' Kyimni Ninnjab' xitljo'n tb'e tzmax tku'x b'aj. Iktzu'n kub'a' taq'pu'ntib'ju' nin a', aye'tzu'n aj Israel e'jlajin toju' nin a', tu'me'lju' nintnam Jeriko.17Tkyaqilju' tnam b'jik'x jlajin toj tzqij toju' nin a' Jordan, aye'tzu'n pale iq'ilteju' tkaxil tyol Qman Dyos e'kyaj we' toj nky'ajchaq a' Jordan toj tx'otx' tzqij tzmax kyik'xb'aju' aj Israel. Kab'lajoj (12) ab'j e'jatzq'i'n toj Jordan
1Kyik'xlenxi'tzun kykyaqil toju' nin a' Jordan, tzaj tma'n Qman Dyos te Joswe:
2Sk'oma kab'lajoj (12) ichan toju' tnam, junjun ti'j junjun tnej kyyajajil,3ex q'manxa kye tu'n tjatz kyiq'i'n kab'lajoj (12) ab'j toj nky'ajchaqju' nin a', jawa'la'qe' pale, ex tu'n kyxi' kyiq'i'n ja che b'ela'ten teju' qonik'an ja'lo, chij te.
4Atzunte Joswe e'tzaj ttxko'n kab'lajoj (12) ichan sk'o'nqe'tltoq tu'n,5ex xitma'n kye: Kukyokxe' tzmax toj nky'ajchaqju' a' Jordan, twitzju' kax te Qman Dyos, ex kyq'o'nktze' jun ab'j ti'j kyqule' teyile junjun, jun ab'j tu'n junjun tnej tyajajil Israel, kab'lajoj (12) tu'n tkyaqil.6Che ajb'elu' ab'j lu te yek'b'il ti'ju' xtb'incha Qman Dyos ja'lu. Qama txi' qani'n kyeye' kyu'n kyk'wale' toj tq'ijlalil tzul: ¿Titi' kyoklenju' ab'j lu?, qa che'chi,7a kxe'l kytzaq'we'nju'ye' kye: Nab'ab'l qekye' kye aj Israel ti'ju' tb'incha Qman Dyos tzalu toju' nin a' Jordan, tej tkub' tpa'ntib'ju' a' tej tik'x iq'i'n kax te Qman Dyos toj, chechiku'ye' kye, chij.
8Xitzun kyb'incha'n ichanju' xitma'n Joswe kye. Jawkyiq'i'n kab'lajoj (12) ab'j toj Jordan, jun tu'n junjun tnej tyajajil Israel, ex xikyiq'i'n tzmax ja tkub'a' xmuj ex atzuntzu' ekub'a' kynk'u'na', kse'nx tzaj tma'n Qman Dyos te Joswe.9Ex ikx e'kub' tq'o'n Joswe kab'lajojtl (12) ab'j ja e'kub'a'we' pale iq'iltoqte tkaxilju' yol kyejni b'entti'j. Axtzuntzu' e'kyaja'tenju' ab'j lu.
10Aye'tzu'n pale iq'ilte tkaxilju' yol kyejni b'entti'j e'kub' we' toj nky'ajchaqju' a' Jordan, tu'n kyb'inchante aj Israel tkyaqilju' ojetoq tchaq' Qman Dyos te Joswe. B'inchet tkyaqil kse'nxju' tchaq' Moyses te Joswe. Ojqel kyb'ajik'xju' xjal,11tetzunj kyjlajin kykyaqil, e ik'xju' pale tuk'i'lju' kax te Qman Dyos, ex e'kub'nej kywitz kykyaqilju' tnam.12Ex e ik'xju' q'ojil tyajajil Rub'en ex tyajajil Gad exju' nik'jan tyajajil Manases. Iq'imile kyq'ojb'il, ex nejliqe' kywitzju' txqantl aj Israel, kse'nxju' ojetoq tchaq' Moyses kye.13Noq ch'inxtl mitz'aqla' jo'mutx' (40,000) ichan iq'i'mele kyq'ojb'il tu'n kyq'ojin eb'et twitz Qman Dyos, ex exi' toju' plan tx'otx' te Jeriko.14Tb'incha Qman Dyos tu'n kyniman aj Israel te Joswe toju' q'ij lu ex tu'n kylab'ti ti'ju' intb'incha'n, tu'n kyniman kse'nxju' intoq kyb'incha'n te Moyses toj tkyaqilju' tchwinqlal.
15Xitzun tma'n Qman Dyostz te Joswe:16Q'manxa kyeju' pale iq'ilte kax teju' yol kyejni b'entti'j, tu'n kyetz toj Jordan, chij te.
17Xitzun tma'n Joswe kye tu'n kyetz,18naqtzun inb'ent kyetzju' pale toju' nin a' Jordan ex tej kyetz ti'jxi', tzajtzun tzaqpaj jumajtl a'tz exb'et jumajtl in piq'chaj.
19Toj tlajoji'n tajlalju' tnejel xjaw tej kyetz aj Israel toju' nin a' Jordan, ex atzu' ekub'a' tena' toj Kyilkal, toj tjawetzq'ij te Jeriko.20Atzuntzu' ekub'a' tq'o'n Joswe kab'lajoj (12) ab'j jatzkyiq'i'n toj Jordan,21ex xitma'n kye aj Israel: Ajt-xi qani'n kyeye' kyu'n kyk'wale' toju' tq'ijlalil tzul: ¿Titi' kyoklenju' ab'j lu?, qa che'chi,22kymanxe' kye se'ntu'me'l eik'xa' aj Israel toju' nin a' Jordan,23ex se'ntaq'wi kub' tzqiju' nin a' Jordan tu'n Qman Dyos tu'n kyik'xe', kse'n kub'a' tzqiju' Kyeq Ninnjab' ojtxi' tej qik'tz.24Tu'ntzun telkynik' kykyaqilju' tnam twitz tx'otx' ti'ju' tipumal Qman Dyos, aye'tzunkye' kche nimale' te Qman Dyos kukxju', chij kye. Kub' kyq'o'n aj Israel kyxmuj Kilkal
1Kykyaqilju' nimaqkawil amorey ate'toq toj tkub'exq'ij teju' nin a' Jordan, exqe' nimaqkawil aj Kanaan najlqe'toq nqaku' tk'etz ninnjab' Mediteraney, kyb'i qa tzqiju' nin a' Jordan tu'n Qman Dyos tu'n kyjlajin aj Israel, tzaj xob'il kyi'j b'a'nxi'x; ex mixtoqti' kyajb'il tu'n kyq'ojin kyi'j aj Israel.
2Tzaj tma'ntzun Qman Dyostz te Joswe: B'inchanku'ya jte' kchil ab'jqe', ex q'onka kyechel aj Israel na'mx tok kyechel ti'j kychib'jil, chij te.
3Ku, chi Joswe e'kub' tb'incha'nju' kuchil, ex oktq'o'n kyechel ichan aj Israel ti'j kychib'jil twi'ju' witz Aralot.4Oktq'o'n kyechel ti'j kychib'jil, qu'n kykyaqilju' ichan b'a'nqe'toq tu'n kyxi' q'ojil tej kyetz Ejipt ojetoq che b'ajkyim toj b'e toj chq'ajlaj.5Maskye toktoq kyechel kykyaqilju' e'etz toj Ejipt, aye'tzu'n e'itz'ji yajxi'tl toj b'e toj chq'ajlaj, na'mxtoq tok kyechel ti'j kychib'jil.6Tu'nju' kab'naq (40) ab'q'i eb'et aj Israel toj chq'ajlaj, ojetoq che kyim kykyaqilju' ichan e'etz toj Ejipt b'a'nqe'toq tu'n kyq'ojin. Mixti'x e nimanju' ichan lu te Qman Dyos, qu'mtzun tzaj tma'n kye qa laytoq kyilju' tx'otx' ojetoq tzaj ttziya'n kyeju' ojtxi' kyyajilb'en tu'n ttzaj tq'o'n jun tx'otx' tb'anilxi'x kye.7Qu'mtzun oktq'o'n Joswe kyechel kyk'walju' ichan lu, aye' e'oktq'o'n Qman Dyos te kyxel, na'mtoq tok kyechel ti'j kychib'jil, qu'n intoqna' che b'et.8Tetzunj tok kyechel ti'j kychib'jil kykyaqil, axtzu' e'kub'a' ten toju' kynajb'il tzmaxi'j kyb'aj b'anix.9Tzaj tma'ntzun Qman Dyostz te Joswe: Tu'ntzu'n kyechele' ti'j kychib'jile' lu, lay che xmayinjtztle' kyu'n aj Ejipt, chij te. Atxi'xtzunj kyejten tb'iju' najb'il lu, Kyilkal.
10Kub' kyq'o'n aj Israel kyxmuj toj Kilkal, kub'kyik'sa'n Q'ij te Tzaqpib'l te qale toj kyajlajoj (14) tajlal xjaw toju' chq'ajlaj te Jeriko.11E'wan wab'j mixti' ttx'amal toju' q'ij lu ex wab'j triy tzuk'in, atzu'n toj juntl q'ij e'wan ti'ju' wab'j njaw toju' tx'otx'.12Atxi'xtzunj min tzaj q'o'ntl mana, qu'mtzun e'wan aj Israel ti'ju' awal intq'o'nju' tx'otx' Kanaan toju' ab'q'i lu. Okyalju' kynejel t-xjal Qman Dyos te q'oj twitz Joswe
13Atitoq Joswe junmaj nqaku' tk'etz Jeriko, xitka'yi'n jun ichan iq'i'n jun k'uẍtx'e'nb'il toj tq'ob'. Xi'tzun lq'e tk'etz ex xitqani'n te:
—¿Ma quk'i'le' ta'ya mujqa kyuk'i'l qajq'oje'?, chij.14Mya kyuk'i'le' ex mya q'ojil kyi'je'. Machin tzaje' te kynejel t-xjal Qman Dyos te q'oj, chiju' ichan tzaj ttzaq'we'n.
Atzunte Joswe kub' meje majx ku'punju' tplaj twitz tx'otx', ex xitqani'n te:
—¿Ti'tzu'n saj tma'n Qman Dyos teju' tmajin lu?, chij.
15Tzajtzun ttzaq'we'n kynejel t-xjal Qman Dyos te q'oj te:
—Iq'imilju'ya t-xajab'a, qu'n xjanju' ja wa'la'ya, chij.
Ku, chi Joswe eltiq'i'n. Xim tu'n tok q'oj ti'j Jeriko
1Mix-a'lo'toqte tu'n tb'ent tokx ex tu'n tb'ent tetz toj Jeriko, qu'n matxi'toq che jpunjtzu' tjpel nintnam tu'n tklet kye aj Israel.2Tzajtzun tma'n Qman Dyos te Joswe: Matxi' txinq'o'ne' Jeriko toj tq'ob'a, tuk'i'lxi' tnimaqkawil exqe' t-xjal te q'oj.3Aye'tzunkye' aj Israel te q'oj, kyq'om jun welte' junjun q'ij ti'jileju' nintnam toj wuq q'ij.4Wuq pale che b'elnej twitz tkaxilju' yol kyejni b'entti'j, teyile junjun tuk'i'l jun chun tuk'a rit, atzu'n toj twuqi'n q'ij, wuq maj che q'olweltele' ti'ju' nintnam, aye'tzu'n pale kxe'l kyq'ajtza'n chun.5Ajtzun kyb'inteye' tb'anilxi'x tq'ojq'ojelju' chun, che ẍch'inqe'ye' tuk'i'l tkyaqil kyipumale', ex ktzajel tx'uyju' nimaqtapi ti'jileju' nintnam. Teyiletzun junjun ati tu'n tokx toju' nintnam, chi Qman Dyos te.
6E'tzajtzun ttxko'n Joswe pale ex xitma'n kye: Kyiq'inxju'ye' kax teju' tyol Qman Dyos kyejni b'entti'j, ex che kb'el nej wuq pale kyxole' twitzju' kax, iq'i'mile kychun tuk'a rit, chij.7Atzu'n kyeju' tnam xitma'n: Kukxi'ye' ex kyq'om welte' ti'jileju' nintnam. Che b'elneju' xjal te q'oj twitzju' kax te Qman Dyos, chij.
8Kykyaqil kyb'incha kse'n xitma'n Joswe kye. Nejlqe' wuq pale twitzju' kax k'ub'lteju' yol kyejni b'entti'j tu'n Qman Dyos, in kyq'ajtza'nju' wuq chun.9Nejliqe'ju' xjal te q'oj kywitzju' pale, atzun jun tnejtl lepchqe'x ti'ju' kax, aye'tzunju' pale mixtoqti' nche qen tu'n kyq'ajtzanteju' chun.10Atzu'n kyeju' tnam xitma'n Joswe tu'n kyb'et numliqe', tzmaxi'j aj t-xitma'n kye tu'n kyjaw ẍch'in tu'n tkyaqil kyipumal. Kub'ti'ju' tnam Jeriko
11Tchaq' Joswe tu'n t-xiq'i'n jun wetlju' kax te Qman Dyos ti'jile nintnam. Anjtztzun kyi'jtz ja tkub'a'ju' kynajb'il, atzuntzu' exa' qonik'an kyu'n.12Tetzu'n juntl q'ij, b'a'n prim, jawe' Joswe, aye'tzunju' pale xikyiq'i'nju' kax te Qman Dyos.13Nejliqe'toq wuq pale twitzju' kax te Qman Dyos, ljo'ntoqju' kyb'e ex intoq kyq'ajtza'nju' chun. Kywitztzuntlju' pale nejliqe'ju' xjal te q'oj, atzun txqantl lepchqe'x ti'ju' kax. Kukxtoq kyq'ajtzanjtz chunju'14Exi' jumajtl toj tkab' q'ij q'ol welt ti'jeleju' nintnam ex anjtzkyi'j jatkub'a' kynajb'il. Ayiletzun kyb'inchaju' toj waqaq q'ij.
15Tojtzu'n twuqi'n q'ij, e'jawe' b'a'n prim, exi'tzuntz q'onweltil ti'jileju' nintnam, kse'nxju' matxi'toq kyb'incha nejtl, naqtzun aju' q'ij lu wuq maj eq'on weltin ti'j.16Tetzunj t-xi' kyq'ajtza'n paleju' chun twuqi'n maj, tchaq' Joswe kyeju' xjal: ¡Che' ẍch'inqe'ye'! Matxi' tzaj tq'o'nte Qman Dyos nintnam kyeye'.17Majx kb'el xitetju' nintnam kyuk'i'lxi' ate' toj, qu'n ikymatxi' tchaq' Qman Dyosju'. Noq okxju' qya Raab' ajpajil, lay kub' b'yet exqe' klo'n kyib' toj tja, qu'n e'kub' tewa'n nenul toj ewaj e'tzaj qchq'o'n.18Aye'tzunkye', kyka'yinxe' tu'me'l tu'n lalun tzaj kyi'ne' ex lalun txikytzyu'ne' jun ti'xti' ati toju' nintnam matxi' tchaq' Qman Dyos tu'n tkub' xitit, qu'n qatzun min jaku' tzaj kyiq'i'ne' jun taq'wixil kyib'aj aj Israel.19O'kxju' q'anpwaq ex saqpwaq, ex tkyaqilju' ti'xti' q'ank'uxb'ilqe' ex k'uxb'il, ati tu'n kykub' q'et twitz Qman Dyos, ex che kxe'l k'u'yit toju' k'uwenj, chij.
20E'jaw ẍch'inju' xjal ex e'jaw q'ajtiju' chun. Tetzunj kyb'inte aj Israel kyq'ojq'ojel chun, e'aq'wi ẍch'il kuwxi'x, aye'tzu'n nimaqtapi ti'jileju' nintnam eb'ajkub' niq'j. E'okxtzuntz toju' nintnam ex kub' kytzyu'n.21E aq'witzuntz b'yolkye ichan, qya, ku'xun ex tijwnaq, exqepe'ju' wakx, rit ex b'ur tu'n k'uẍtx'e'nb'il. E'kub' kynajsa'n kykyaqil.22Atzunte Joswe xitma'n kyeju' kab'e' exi' nenulteju' tx'otx' toj ewaj: Kukxi'ye' tjaju' qya ajpajil ex kyiq'imitze' kyuk'i'lju' e'tojtja, kse'nxju' xikytziya'ne' te, chij.23Aye'tzunkye e'okx ex etzkyiq'i'n Raab', exqe' tman, ttxu, e'titz'in ex kykyaqilju' twitze'l, exi' kyiq'i'ntzuntz ti'jxi' kyxmuj aj Israel jatu'n kykleta'.24Oktzun kyq'o'n aj Israel tq'aq'alju' nintnam ex tkyaqilju' atitoq toj. O'kxku' saqpwaq ex q'anpwaq, exqe' ti'xti' q'ank'uxb'il ex k'uxb'il, etzkyiq'i'n ex okx kyk'u'n toju' k'uwenj te Qman Dyos.25Mixtzunti' kub' tb'yo'n Joswe Raab' exqe' toj tja, qu'n exi' tewa'n Raab' kab'e' nenul e'xitchq'o'n Joswe toj Jeriko. Atxi'xtzunj nche najanju' tyajajil Raab' kyxol aj Israel.
26Tmatzun Joswetz jun tyol tu'n tjapun: Tzajxwit tq'o'n Qman Dyos taq'wix tib'aju' xjal makub' t-xima'n tu'n tjaw tb'incha'ntlju' nintnam Jeriko. Kyejxwitju' tnejel tk'wal tjaq'ju' tq'uqlil, ex kyimxwitju' mankb'il tk'wal ajkyoku' tjpel, chij.27Onin Qman Dyos ti'j Joswe, qu'mtzun ximlenju' b'a'n tyolinjtz Joswe toj tkyaqilju' tx'otx'. Til Akan
1Juntzun xjal kyxol tyajajil Juda, Akan tb'i, tk'wal Karmi, tchman Sab'di ex tk'wal tchman Sera, tzaj tiq'i'n b'a'npun ti'xti' ojetoq tma Qman Dyos tu'n kykub'najset, ex tu'n ja'lu kykyaqil aj Israel e'ok ati kypaj twitz Qman Dyos. Qu'mtzun tzaj ttx'u'jil Qman Dyos b'a'nxi'x kyi'j.
2E'xitchq'o'n Joswe jte' ichan toj Jeriko, tu'n kyxi' nenulteju' tnam Ay toj ewaj, atitoq toj tjawetzq'ij te B'etel, nqayin tk'etz B'et-ab'en. E'xi'tzun ex b'aj kyka'yi'nju' tnam Ay,3tetzunj kymiltz'uj xikyma'n te Joswe: Min nojqelan tu'n kyxi' kykyaqilju' tnam q'ojil ti'j Ay, kab'alx qama che'x jo'k'al mujqa wuqk'al lajnaq (2,000 o 3,000) ichan tu'n ttzyetju' nintnam. Lalun che'x tchq'o'na tkyaqilju' tnam, qu'n naqjte'xte' nche klonteju' nintnam, chechij.
4Qu'mtzun, naq wuqk'al lajnaq (3,000) ichan exi' q'ojil ti'ju' tnam Ay. Kub'tzun kyi'j kyu'n aj Ay ex e'kub' oq kywitz;5e'kyim junaq qaqlajoj (36) aj Israel kyu'n, aye'tzu'n txqantl eb'jik'lpe kyi'j, txi'x ttzi nintnam ex e'pon wab'alkye tzmax Seb'arim, ex e'kub' kyb'yo'n kxi'toq kyb'aj ku'x. Tu'ntzun tpaj ja'lu e'kub'numju' xjal ex tzaj xob'il kyi'j.
6Atzunte Joswe exqe' tijwnaq aj Israel b'ajkub' kylaqu'n kyxb'alun ex jaxkyq'o'n quq toj kywi' te techlal k'ixk'oj; e'kub' mejetzuntz twitzju' kax te Qman Dyos majx ku'pun kyplaj twitz tx'otx', tzmax tok qale.7Ex tma Joswe:
—Nman Dyos, ¿tiqu'n xtb'inchaya tu'n tik'tzju' tnam lu jlajxi' a' Jordan? ¿Ma naq tu'n qxitq'o'na toj kyq'ob' amorey, ex tu'n qkub' kyb'yo'ne'? ¡Axwitlotzu' o'kyeja' tenqe' jlajxi' nin a' Jordan!8Nman Dyos, ¿ti'tzun kb'entel wu'ne' ja'lo, matxi'na' che kub' oqu' aj Israel kywitzju' ajq'oj?9Kkyb'i' aj Kanaan ex kykyaqilju' najliqe' toju' tx'otx' lu ti'ju' matxi' b'aj, che ultzulotz kykyaqil q'ojil qi'je' ex majxlo kb'ajel toj qwi'ye' kyu'n. ¿Ti'tzunloti' k'okyela' tb'iya nimxi'x toklen?, chij.
10Atzunte Qman Dyos tzaj tzaq'we'n te:
—We'ktza ¿Ti'ti' ntb'incha'na tza'lu twitz tx'otx'?11Matxi' che b'inchan il aj Israel, matxi' kub' kysaqchb'e'n nyole' xkyej b'entti'j kyuk'i'l. Makyej kyklo'nju' ti'xti' atitoq tu'n tkub' xitet; matzaj kyelq'a'n extzun kanli kywitz qa myab'a'n ex matxi' txikyewa'n kyxolju' ti'xti' ati kye.12Qu'mtzun lay che xkye aj Israel kyi'ju' kyajq'oj. Che b'el oq kywitz, qu'mtzun ja'lo kyilxkye' aj Israel tu'n kykub'yo'n. Qatzun min ẍekub' kyxitu'ne' oje txinma'ne' tu'n kykub' xitet lwiy, lay chin tentle' kyuk'i'le'.13We'ktza, ex b'uyintzju'ya tnam. Q'manxa kye tu'n kyb'inchante kyib' tu'nkyul nwitze' najchi'j, qu'n ayine' Dyos Manb'aj nchin q'mante kjalu: Aj Israel, makyej kyklo'ne' atitoq tu'n tkub' xitet tejumajx, exqa mixti'x nkub' kyxitu'ne', lay che'xkyeye' kyi'ju' kyajq'oje', chiku'ya kye.14Kyb'uyim kyib'e' kykyaqile' najchi'j nwitze' toj tneji'n, kse'nxju' junjun tnej kyyajajile', atzunju' tnej kyyajajile' kxe'l nyek'u'ne' che tzajel tyek'u'n junjun k'loj kywitze'lilex kyib'; atzunju' jun k'loj kywitze'lilex kyib' kxel nyek'u'ne' che tzajel tyek'u'n junjun ja xjal, atzunju' jun ja xjal kxe'l nyek'u'ne' che tzajel tyek'u'nju' kyb'aj toj kyja.15Atzunju' matz'el knetju' atitoq tu'n tkub' xitet ti'j, kb'el tz'e'yset kyuk'i'lju' toj tja ex tuk'i'lxi' ati te, tu'ntpaj matb'incha jun ti'xti' myab'a'n kyxol aj Israel ex tu'n min xjapun nyole' kyej b'entti'j kyu'ne', chi Qman Dyos. Tz'e'ysb'il twitz Akan
16Tetzu'n juntl q'ij, jawe' Joswe b'a'n prim ex tchaq' tu'n kyb'uyinte kyib'ju' xjal pa'mile kyib' toj tneji'n kse'nxju' kyyajajil. Atzunte Qman Dyos xityek'u'nju' tyajajil Juda.17Tzajtzun Joswetz xitma'n kyeju' tyajajil Juda tu'n kyxi' tyek'u'nju' junjun k'loj kywitze'lilex kyib', ex xi'yek'u'nju' k'loj te Sara kywitze'lilex kyib'. Kxoltzunju' te Sara xiyek'u'nju' toj tja Sab'di.18Tetzunj kyxi' lq'eju' ichan junjunchaq kyb'aj te toj tja Sab'di, xiyek'u'n Akan tk'wal Karmi, tchman Sab'di ex tk'wal tchman Sara, kyxol tyajajil Juda.
19Xitzun tma'n Joswetz te Akan:
Nk'wal, ajwali'nktza ex nimanktza Qman Dyos, tu'n ttzaj tma'na weye' titi' matxi' tb'inchaya. ¡Lalun kub' tewa'na!, chij te.
20Atzunte Akan xittzaq'we'n:
Axxi'x, matxi' chin b'inchan ile' twitz Qman Dyos. Ex luju' xnb'inchaye':21Wile' jun tb'anil xb'alun te B'ab'ilon, lajnaq (200) saqpwaq ex jun tloj q'anpwaq masch'i'n jun lib'r talal kyxolju' ti'xti' e'etzqi'ne' toj Jeriko. Pon nk'u'je' kyi'ju' ti'xti' lu, ex mache kyajwi'ne', mache ku'x nmqu'ne' tjaq'ju' npach xb'alune', ex ma ku'x nq'o'ne' medi tjaq'xi', chij.
22Exi'tzun tchq'o'n Joswetz jte' ichan tja Akan, ex e'elyal kyu'n tkyaqilju' e'wa'ntoq, atku'xju' medi saqpwaq tjaq'xi'.23Jatzkyiq'i'n ex pon kyi'n te Joswe ex kye aj Israel, aye'tzunkye kub' kyq'o'n twitz Qman Dyos.24Xi'tzun kyiq'i'n Akan toj b'ya' Akor tuk'i'lxi' saqpwaq, exju' xb'alun, ex tal plaj q'anpwaq, e'tk'wal q'a ex e'tmyal, e'twakyix, tb'ur ex trit, exju' tja ex tkyaqilju' ati te.
25Xitzun tma'n Joswe te:
¿Tiqu'n saja' tiq'i'na taq'wix lu qib'aje'? Ja'lotzun, awt Qman Dyos tzaj q'inte taq'wixil tib'aja ju' saj ti'na qib'aje', chij. Naqtzun nb'aj tma'n Joswe ja'lu, kykyaqil aj Israel kub' kyb'yo'n Akan toj ab'j ex kykyaqilju' toj tja, e'kub' kytz'e'ysa'ntzuntz.26Ex kub' kyq'o'n jun ch'uq ab'j tib'aj, ex majx kyejten. Qu'mtzun majx kyejten tb'iju' najb'il lu, b'ya' te Akor. Iktzu'n ela' ttx'u'jil Qman Dyos kyi'j aj Israel. Kub'ti'ju' nintnam Ay kyu'n aj Israel
1Tzaj tma'n Qman Dyos te Joswe:
Lalun xob'a ex lalun jawje tk'u'ja. Iq'inxa kykyaqilju' t-xjala te q'oj ex kutxi'ya q'ojil ti'ju' nintnam Ay, qu'n kkanb'ala wu'ne' ti'ju' nimaqkawil te Ay ex kyi'ju' t-xjal. K'okyelju' ninttanam exju' ttx'otx' te teya,2ex ax ktb'incha'ju'ya ti'ju' tnam Ay ex ti'ju' tnimaqkawil kse'nx tb'inchaya ti'j Jeriko ex ti'ju' tnimaqkawil, tojtzu'n maj lu kb'el kytzyu'ne' kyti'xti' exqe' kyalu'nju' kb'elkyi'j. Nk'uma jun q'oj naq myanim ajtok tzaqpaja kyi'j, ttze'lti'ju' nintnam, chij te.
3Tb'inchatib' Joswe kyuk'i'lju' t-xjal te q'oj tu'n kyxi' q'ojil ti'j Ay. E'jaw t-sk'o'n oxmutx' o'lajk'al (30,000) xjal te q'oj b'a'n che q'ojin, ex exi' tchq'o'n te qonik'an4ex xitma'n chaq'b'il lu kye: Kyb'intzpe'ye' b'a'nxi'x: kukyxi'ye' ti'jxi' nintnam, ex che ewane' nqayin tk'etz ex b'a'nqe'xe' ajkyok tzaqpaje' q'ojil ti'j.5Aye'tzu'n txqantl xjal che kxe'l lq'e wuk'i'le' tk'etzju' nintnam, ajtzun kyetz q'ojil qi'je', qob'el oqe' kywitz, kse'nxju' junmaj.6Che tzajel lpe qi'je' ajqkub' oqe' tk'etzju' nintnam, qu'n kb'el kyxima'n qama qoxob' jumajtle' kye.7Aye'tzunkye' che eletze' ja nche ewanaye' ex kb'el kytzyu'ne' nintnam, qu'n ktzajel tq'o'n Qman Dyos kyeye'.8Ajtzun ttzyet kyu'ne', kyq'onke' tq'aq'al, kse'nxju' oje tma Qman Dyos. Jun chaq'b'ilte' lu, chij kye.
9Xitma'ntzun Joswetz kye tu'n kyxi', exi'tzuntz ex e'kub' ewan kyxolju' tnam B'etel tuk'i'l Ay, toj tkub'exq'ij te Ay, atzunte Joswe axtzu' exa' qonik'an tu'n ja tkub'a'ju' kynajb'il.10Tojtzu'n juntl q'ij, jaw we' Joswe b'a'n prim ex ik'twitz kyi'ju' t-xjal qa ate'yileqe'. Kub'nej kywitz, junx kyuk'i'lju' tijwnaq kyxol aj Israel, xi'tzuntz q'ojil ti'ju' tnam Ay.11Kykyaqilju' t-xjal e'pon lq'e twitzju' nintnam, ex e'kub'ten toj tb'a'nq'ob'kya'j te, kyej tenju' b'ya' kyxol tuk'i'lu' nintnam.12E'kub' tewa'n Joswe kab'lajk'al lajnaq (5,000) ichan kyxolu' tnam B'etel tuk'i'l Ay, toj tkub'exq'ij te nintnam,13qu'mtzun kab'e' tnej e ela'ju' xjal te q'oj, jun tnej kub' ewan toj tkub'exq'ij teju' nintnam, atzu'n jun tnejtl toj tb'a'nq'ob'kya'j ja tkub'a' kynajb'il. E'pon Joswe tzmax toj nky'ajchaqju' b'ya' toju' qonik'an lu.
14Tetzunj tka'yinte nimaqkawil te Ay ti'ju' nb'aj, oktilil tu'n tu'nkyetz kyuk'i'lju' t-xjal te q'oj tu'n kyq'ojin kyi'ju' aj Israel toju' b'ya' Jordan, ex mixtoqti' b'i'n kyu'n qa ate'tltoq txqantl aj Israel ntoq che ewan ttze'lti'ju' nintnam.15Atzunte Joswe naq tak'a'n kub' oq kyuk'i'lju' t-xjal, e'kub' oq kywitzju' xjal aj Ay toju' b'e nxi' toju' chq'ajlaj.16Kykyaqiltzu'n xjal te q'oj aj Ay xikynima'n chaq'b'il tu'n kyxilpe kyi'j, tetzunj kyxi'lpe ti'j Joswe, kyej kytzaqpi'nju' nintnam.17Mixti' jun ichan aj Ay ex aj B'etel miwtjun xilpe kyi'ju' aj Israel; tu'ntzunju' nxi'xtoq b'ajx kyk'u'j tu'n kxilpe kyi'j, kyej kytzaqpi'n nintnam mixti'x klolte.18Tzajtzun tma'n Qman Dyos te Joswe: Q'onxa techlal tu'n kyok tzaqpaj q'ojil ti'ju' nintnam Ay, kxe'l nq'o'nwe' toj kyq'ob'e', chij te.
Xitq'o'n Joswe techlal tu'n kyq'ojin.19Aye'tzu'n e'wa'ntoq kyib' lwiyxi'x e'etz, ex e'oktzaqpaj ti'ju' nintnam ex kub' kytzyu'n, oktzun kyq'o'n tq'aq'altz.
20Tetzunj tanjtz ka'yin kyi'ju' xjal aj Ay, kyilju' ninkytanam inxi'xtoq b'uqchaj tu'n sib' majx njapun twitz kya'j. Mixtoqtzun jalojax tu'n kyoqa', qu'n aye'tlju' aj Israel ntoq che oq kwitz tu'me'lju' b'ya', e'anj miltz'uj q'ojil kyi'j.21Ex ikxte Joswe kyuk'i'l kykyaqil aj Israel tej kyka'yinte matxi'toq tzyetju' nintnam kyu'n aj Israel e'kub' ewan ex matxi'toq tz'ok kyq'o'n tq'aq'al, anjmiltz'ujkyi'j ex e'q'ojin kyi'ju' xjal aj Ay.22Aye'tzuntlju' matxi'toq kub'ti'ju' nintnam kyu'n, e'etztl toj, qu'mtzun ekyajtenju' xjal aj Ay kyxolju' kab'e' tnej xjal aj Israel te q'oj, e'oktentzuntz kyi'ju' aj Ay tzmaxi'j kykyim kykyaqil kyu'n.23Naq o'kxju' nimaqkawil toj Ay min kub' kyb'yo'n, tzyet kyu'n ex xikyiq'i'n te Joswe.
24Kykub'lenxi'tzun kyb'yo'n kykyaqilju' exi' lpe kyi'j, anjkyi'ju' aj Israel toj Ay ex eb'ajkub' kyb'yo'nju' itz'qe'xtoq.25E'kyimu' junmutx' lajk'al (12,000) xjal aj Ay toju' q'ij lu, ichan ex qya,26Kub' tq'o'n Joswe chaq'b'il kye aj Israel tu'n kyq'ojin tzmaxi'j kymankun kyu'n kykyaqilx.27Kyej kyiq'i'n aj Israel alu'mj exqe' ti'xti' ate'toq toju' nintnam, kse'nx tzaj tma'n Qman Dyos te Joswe,28kub'tzun ttz'e'ysa'n Joswe nintnam Ay, ex majx kyej tenju' tik'len tu'n.29Atzu'n nimaqkawil toj Ay jaw yob'i'n tu'n Joswe ti'j jun tze ex kyej tq'o'n tzmax tok qale, tetzunj tex q'ij, xitma'n tu'ntku'tz q'i'n ex tu'n tku'x mqu'n ttziju' nintnam, ex tu'n tjax ch'uqb'a'n txqan ab'j tib'aj. Ex majx kyej tenju' ab'j lu. Jawt-ẍch'i'n Joswe kawb'il twi' witz Eb'al
30Jawtzun tb'incha'n Joswe jun q'olb'eb'l te Qman Dyos twi' witz Eb'al,31kse'nx ojetoq tchaq' Moyses tmajin Qman Dyos kye aj Israel, ex kse'nx tz'ib'a'n toju' tu'jil tkawb'il Moyses: Jun q'olb'eb'l, ab'j mya jso'n kywitz. Kub'tzun kyq'o'n aj Israel chojb'il k'ok'sb'il tib'aju' q'olb'eb'l, ex kub' kyq'o'n chojb'il te b'inchjtib'il.32Ex okttz'ib'a'n Joswe kawb'il ojetoq taq' Moyses kye, kyi'ju' tab'jil q'olb'eb'l kywitzku' aj Israel.33Tkyaqiltzu'n tnam, tyajajil Israel exqe' najchaq xjal, ex kykyaqilju' tijwnaq, e'nejenel kye xjal te q'oj ex ajkawil, e'kub'ten ttxlaj tkaxilju' yol kyejni b'entti'j tu'n Qman Dyos, kywitzju' pale aj Leb'i iqalte. Tu'ntzun tkub' kyky'i'wla'n pale aj Leb'i tnam, nik'jan te'toq toj jun plaj teju' witz Kerisim, atzu'n nik'jantl toju' plaj te' witz Eb'al, kse'nxju' ojetoq tma Moyses tnejel, ju' tmajin Qman Dyos.34Yajxi'tzuntl jawt-ẍch'i'n Joswe junjunal chaqju' yol ntma'n toju' tu'jil kawb'il, e'jaw t-ẍch'i'n ky'i'wb'il ex qanb'en taq'wix.35Jawt-ẍch'i'n Joswe tkyaqilju' yol tchaq' Moyses, ex mixti' jun miwtjunti' jawt-ẍch'i'n kywitzju' tnam Israel, e'qya ex k'wal, exqepe' najchaq xjal najlqe'toq kyxol. Kyej b'entti'j jun yol kyuk'i'l aj Kab'aon
1Kyb'iju' nimaqkawil aj Et, amorey, aj Kanaan, aj Perisya, eb'ey ex jeb'usey, ti'ju' b'aj. (Najliqe'toqju' nimaqkawil lu toj tkub'exq'ij te nin a' Jordan, kywi' nimaq witz, ex toju' plan tx'otx' ex toj tkyaqilju' mlaj teju' Ninnjab' Mediteraney ex pon kanunx tzmax kyoju' tx'otx' Lib'ano.)2Kykyaqiltzu'n nimaqkawil lu kyej b'entti'j jun kyol ex kymujb'a kyib' tu'n kyq'ojin ti'j Joswe ex kyi'j aj Israel3Aye'tzu'n eb'ey najlqe'toq toj Kab'aon kyb'i ti'ju' tb'incha Joswe kyi'ju' nintnam Jeriko ex Ay,4qu'mtzun kub' kyxima'n tu'n tkub' kysb'u'n. Xikyljo'ntzun kyb'etz, ex jaxkyq'o'n kykostal kyib'aju' kyb'ur exqe' tz'u'n tkb'el b'in b'ajniqe'tl, exni kyxe ex xk'oji'nqe';5okkyq'o'n kyi'j ex kyxajab' b'ajniqe'tl ex xk'oji'nqe', ex xikyiq'i'n kywa ch'uẍtl ex psu'q'tl te kyb'e.6Tetzunj kypon ja tkub'a' kynajb'il aj Israel Kilkal, xikyma'n te Joswe ex kye aj Israel:
—Najchaq xqo tzaja'ye'. Qnk'ukj ti'j jun qyol, chechij.
7Aye'tzu'n aj Israel xikytzaq'we'n kye eb'ey:
—Yajtzunqa axtzu' najlqe'ku'ye' nqaku' qk'etze'; ¡Mixti' tu'me'l tu'n tkyejb'ent ti'j jun qyol! chechij.
8Aye'tzunkye xikytzaq'we'n te Joswe:
Luqo'ye' tu'n qajb'ene' teya, chechij.
Xitzun tqani'n kye:
—¿Alkyeqe'tzune'? ¿Ja tu'me'l ẍetzaja'ye'? chij.9Aye'tzunkye xikytzaq'we'n:
Najchaq xqotzaja'ye', naq tu'n b'a'n tyolinjtzju' Dyos Manb'aj. Oje qb'iye' tkyaqilju' tb'incha toj Ejipt,10exju' tb'incha kyi'ju' kab'e' nimaqkawil amorey toj jun plajtl te nin a Jordan, ti'j Seon nimaqkawil te Esb'on ex ti'j Ok nimaqkawil te B'asan najlitoq Astarot.11Qu'mtzun tzaj kyma'n nejenel qeye' exqe' qwnaqile' kjalu: Kyiq'inx kywaye' te kyb'eye' ex kukyxi'ye' jata'qe'ju' xjal lu. Ex kymanxe' kye qa qo ajb'el kye ex tu'n tkyejb'ent ti'j jun qyol kyuk'i'l, chechiku'ye' kye, chechij.12Moq'mojtoqju' wab'j lu tej qtzaje' jyolkyeye', atzun ja'lo matxi' kub' psuq'ix ex ch'uẍtl.13Exqe'ju' tz'u'n lu ak'a'jqe'toq tej kyku'x qnojsa'ne' tu'n ta'l ub'a, atzu'n ja'lo matxi' che b'ajlaqj. Ex ikxqe' qxb'alune' ex qxajab'e' matxi' che b'aj, qu'n nim matxi' qb'etiye', chechij.
14Aye'tzu'n aj Israel min e'xjelun te Qman Dyos, xikywan kywaju' aj Kab'aon.15Kyej b'enttzun jun yoltz tu'n Joswe kyuk'i'l tu'n lalun che q'ojin, xittziya'n tu'n lalun che Kub' tb'yo'n; exqe' txqantl nejenel kye aj Israel xikytziya'n tu'n kyb'inchante ikxju'.16Tb'ajlenxi'tzun oxe' q'ij, kyb'i aj Israel qa nqaku' najlqe' aj Kab'aon kyk'etz.17E'extzuntz jyolkye aj Kab'aon, ex e'pon toj toxi'n q'ij kyoju' nimaqkytanam, aye' Kab'aon, Kyepira, B'eerot ex Kyiryat-jearim.18Mixtzunti' e'kub' kyb'yo'n aj Israel, qu'n ojetoq txikytziya'n nejenel toj tb'i Qman Dyos qa laytoq che kub' kyb'yo'n.
Tu'ntzun tpaj ja'lu intoq che yolinju' tnam kyi'ju' kynejel,19aye'tzunju' nejenel xikytzaq'we'n kye:
—Xiqtziyane' kye toj tb'i Qman Dyos qa laytoq che kub' qb'yo'ne'. Qu'mtzun ja'lo, mixti' tu'me'l tu'n qb'inchante jun ti'xti'ye' kyi'j.20Lay che kub' qb'yo'ne', qu'n qa minti' xjapunju' qyole' qu'ne', ktzajel tq'oj Qman Dyos qi'je', chechij.21Qu'mtzun, kychaq'ju' nejenel kye aj Israel tu'n lalun che kub' b'yet, pero tu'n kyok te si'wil ex iqal a' te kykyaqilju' tnam. Ikytzu'n japuna' kyolju' nejenel.
22Atzuntlte Joswe e'tzaj ttxko'nju' kab'aon ex xi' t-xjelun kye:
—¿Tiqu'n xqo' kub'a' kysb'u'ne' tu'nju' saj kyma'ne' qa najchaq ẍetzaja'ye', extzun axtzu' najlqe'ye' tza'lu?
23Tu'ntzun tpaj ja'lu txko'n taq'wix toj kywi'ye' ex che okyele' te ajb'el tejumajx. Che okyele' te pa'l si ex iqal a' jni'ju' nnojqelan te tja Ndyose', chij.
24Aye'tzunkye xikytzaq'we'n te Joswe:
—Qb'inchaye' ikju' qu'n inxi'xtoq qo xob'e' qa oktoq qo' b'el tb'yo'na, qu'n qb'iye' qa ojetoq tchaq' Dyos Manb'aj te Moyses tmajen, qatoq kxe'l tq'o'n tkyaqilju' tx'otx' lu kyeye', ex tu'n tkub' kynajsa'ne' kykyaqilju' najlqe' tza'lu.25Qu'mtzun ato'qo'ye' toj tq'ob'a; sema qi'je' kse'n b'a'n toj twitza, chechij.
26Mixtzunti' taj Joswe tu'n kykub' kyb'yo'n aj Israel aj Kab'aon;27te si'wil e oka' tq'o'n ex b'alil a' kye kykyaqilju' tnam ex tu'n kyb'alin a' teju' q'olb'eb'l te Qman Dyos toju' najb'il jaw t-sk'o'n Qman Dyos. Ex majx kyejten kyaq'un kab'aonju' lu. Kub'kyi'j amorey
1Tzaj xob'il b'a'nxi'x ti'ju' nimaqkawil Adonisedek toj Jerusalen, tej tb'inte qa matxi'toq tzyetju' tnam Ay tu'n Joswe exqa matxi'toq kub' t-xitu'n, exqa ikx tb'inchaju' ti'j ex ti'ju' tnimaqkawil kse'n tb'incha ti'j Jeriko ex ti'ju' tnimaqkawil, exqa matxi'toq kyej b'entti'j kyu'n aj Kab'aon tu'n lalun che q'ojin kyuk'i'l aj Israel exqa najlqe'tltoq kyxol. Tu'ntzunju' b'ajsb'il lu, tzaj tchi ti'j b'a'nxi'x, qu'n ate Kab'aon juntoq nintnam nimxi'x toklen, nimxi'xtoq twitz Ay ex najlqe'toq nimaqkawil toj, ex majxtoq kuwqe' tu'n kyq'ojin.3Qu'mtzun xitma'n Adonisedek tqanil kyeju' nimaqkawil Oam aj Eb'ron, Piream te Jarmut, Japiya te Lakyis, ex Deb'ir aj Eklon:4Kukytzaje' tza'lu, chin kyoniye' tu'n qq'ojin ti'ju' tnam Kab'aon, qu'n matxi' kyej b'entti'j kyol tuk'i'l Joswe ex kyuk'i'l aj Israel, chij xitma'n kye.5B'ajtzun kyb'u'yi'n kyib'ju' jwe' nimaqkawil amorey, aye' nimaqkawil te Jerusalen, te Eb'ron, te Jarmut, te Lakyis ex te Eklon, e'tzajtzuntz kyuk'i'lju' kyxjal te q'oj ex e'kub'ten twitz Kab'aon tu'n kyok tzaqpaj q'ojil ti'j.
6Aye'tzuntlju' najlqe'toq Kab'aon xikyma'n tq'umli te Joswe atitoq ja tkub'a' kynajb'il aj Israel toj Kilkal: Lalun kub' t-xk'a'yi'n tib'a tu'n ttzaja klolkyeju' ajb'el teya lu. Lwix kuttzaja onilqeye' ex klol qeye', qu'n matxi' b'aj kyb'u'yi'n kyib' kykyaqilju' nimaqkawil amorey najlqe' kywi' witz tu'n kyul q'ojil qi'je', chechij te.7Etztzun Joswetz Kilkal kyuk'i'l kykyaqilju' t-xjal te q'oj min nche xob',8tzajtzun tma'n Qman Dyos te: Lalun xob'a kye, qu'n che kxe'l nq'o'ne' toj tq'ob'a, ex mix-a'lo' junkye kxkyeb'il ti'ja, chij te.
9Etz Joswe toj Kilkal, ex eb'et b'aj qonik'an tu'n kypon ja ta'qe' amorey ex naq minab'en kyok tzaqpaj q'ojil kyi'j.10Tb'inchatzun Qman Dyos tu'n kyxob' b'a'nxi'x kywitz aj Israel, qu'mtzun nim txqan kyb'aj e'kub' tb'yo'n Joswe toj Kab'aon. Ex xilpe kyi'j toju' b'e nxi' B'et-oron ex eb'aj Kub' tb'yo'n txqantl amorey tzmax tpon toj Aseka ex Maseda.11Tetzunj ljo'ntoq kyku'x amorey tk'u'ju' twitz B'et-oron, tej intoq che oq kywitz aj Israel, tzaj tq'o'n Qman Dyos nimaqplaj saqb'aqun kyib'aj ex nimxi'xpe' amorey eb'aj kyetwitz tu'n kyk'uẍtx'e'nb'il aj Israel.
12Tej kykub' tq'o'n Qman Dyos amorey toj kyq'ob' aj Israel, yolin Joswe tuk'i'l Qman Dyos kywitzju' tnam ex tma: We'kuya, q'ij, toj Kab'aon; we'ku'ya, xjaw, toju' b'ya' te Ayalon, chij.13Ewe'tzu'n q'ij exju' xjaw tzmax tkub'kyi'ju' ajq'oj tu'nju' tnam.
Atzun ntma'nju' toju' u'j tz'ib'a'n tu'n Tnik'alti'j. Kyej we'ju' q'ij toj tnky'ajchaqil kya'j, ex ch'intlmi exa' jun q'ij tu'n min b'et.14B'ajxtoq tzik'a' junmaj kse'nju' q'ij lu ex b'ajx tzik'a'tl yajxi'tl tej ttzaj tb'i'n Qman Dyos tq'ojq'ojel twi' jun ichan, qu'n intoq q'ojin Qman Dyos klol kye aj Israel.
15Anjtztzun ti'j Joswetz kyuk'i'l aj Israel ja tkub'a' kyxmuj toj Kilkal,16aye'tzu'n jwe' nimaqkawil e'kub' oq ex e'okx ewan toj jun jul toj Makeda.17Tetzunj tik' jte' q'ij e'knet toju' jul lu, xiq'ma'ntzuntz te Joswe.18E'xi'tzun tq'o'n Joswe chaq'b'il lu: Che kytolinxe' ab'j ttziju' jul ex majx kyjpunkje', ex che kyq'onkje' xq'uqil ttziju' jul.19Aye'tzunkye' lalun che kyej weye' tzalu. Che lpexe' kyi'ju' ajq'oj ex che q'ojine' kyi'j kyi'jxi'. Lalun kyaje' tu'n tanjkyi'j kyoj nimaqkytanam, qu'n matxi' che tzaj tq'o'n Qman Dyos toj qq'ob', chij.
20Kub'kyi'j kykyaqilju' amorey tu'n Joswe ex kyu'n aj Israel. Nim txqan amorey e'kyim kyu'n, aye'tzu'n e'kyaj anq'in exi' klolkyib' kyoj nimaqkytanam.21Aye'tzunkye' aj Israel b'a'nqe' tej tanjtzkyi'j ja tkub'a' kyxmuj toj Makeda, jatoq ta' Joswe. Ex mix-a'lotoqte njaw ti'ntib' yolil taq'wix kyi'j aj Israel.
22Tmatzun Joswe: Kyjqomju'ye' ttzi jul ex kyiq'inqe'mitze' jwe' nimaqkawil, chij.23Ku, chiqe' aj Israel, e'etz kyiq'i'n jwe' nimaqkawil aj Jerusalen, aj Eb'ron, aj Jarmut, aj Lakyis ex aj Eklon toju' jul.24Tetzunj kyul iq'i'n twitz Joswe, e'tzaj ttxko'n Joswe kykyaqilju' ichan aj Israel, ex xitma'n kyeju' nejenel kye xjal te q'oj ate'toq tuk'i'l, kjalu: Che lq'eqe'tze' ex kywab'enku'ye' kyqulju' nimaqkawil lu, chij kye. Aye'tzunkye kyb'incha ikju',25xitzun tma'n Joswe kye: Lalun che xob'e' ex lalun tz'anjtzti'j kyk'u'je'; kuwqe'x pekye' ex lalun che tzaj numje', qu'n ikx ktb'incha' Qman Dyosju' kyi'j kykyaqilju' kyajq'oje', chij kye.
26Yajxi'tzuntel e'kub' tb'yo'n Joswe nimaqkawil lu ex tchaq' tu'n tjaw jtz'o'n kyqul junjun ti'j junjun tze, axtzuntzu' e'kyaja' q'o'na' tzmax tok qale.27Tetzunj ch'inxtoq tex q'ij, tchaq' Joswe tu'n kyku'tz iq'i'n kyi'ju' tze ex tu'n kyokx q'o'n tojxju' jul ja e'okxa' ewana', kub'tzun kyjpu'n ttziju' jul kyu'n nimaq ab'j, majx e'kyajten atzu'. Kub'kyi'j junjuntl tnam
28Tojxju' q'ij lu tzyetju' nintnam Makeda tu'n Joswe, ex majxkub' t-xitu'n; e'kub'tb'yo'n kykyaqilju' najlqe'toq toj tu'n k'uẍtx'e'nb'il, ex mixti' jun kyej anq'in tu'n. Ax tb'inchaju' ti'j nimaqkawil aj Makeda kse'n tb'incha ti'ju' nimaqkawil aj Jeriko.
29Kyik'lenxi'tzun atzu', exi' Joswe kyuk'i'l aj Israel toju' nintnam Lib'na ex e'q'ojin ti'j.30Ex xitq'o'n Qman Dyos nintnam lu tuk'i'l tnimaqkawil toj kyq'ob'. Mix-a'lo' kyej anq'in, ax tb'inchaju' ti'ju' nimaqkawil aj Lib'na kse'nx tb'incha ti'ju' nimaqkawil aj Jeriko.
31Yajxi'tzuntel e'etz Joswe kyuk'i'l aj Israel toj Lib'na ex exi' Lakyis, ex e'kub'ten twitzju' nintnam ex e'q'ojin ti'j.32Tetzun juntl q'ij, xitq'o'n Qman Dyos tnam Lakyis toj kyq'ob', aye'tzu'n aj Israel e'kub' kyb'yo'n kykyaqilju' xjal exqe' alu'mj najlqe'toq atzu', ikxju' kse'n kyb'incha ti'j Lib'na.33Atzu'n nimaqkawil Oram aj Keser, etz kyuk'i'lju' t-xjal te q'oj tu'n tkolon ti'j Lakyis, ex mixti' jun kyej anq'in tu'n Joswe.
34Tkub'lenxi'tzun ti'ju' tnam Lakyis, exi' Joswe kyuk'i'l aj Israel toju' nintnam Eklon, e'kub'ten twitzju' tnam ex e'q'ojin ti'j.35Axtzun q'iju' tzyeta' kyu'n, ex e'kub' kyb'yo'n kykyaqilju' najlqe'toq atzu' tu'n k'uẍtx'e'nb'il, majx e'kub' kyxitu'n kse'n kyb'incha ti'j Lakyis.
36Tej kyetz Eklon exi' toj nintnam Eb'ron ex e'q'ojin ti'j.37Tetzunj ttzyet kyu'n, majx e'kub' kynajsa'n, kub' kyb'yo'n nimaqkawil tu'n k'uẍtx'e'nb'il ex kykyaqilju' xjal exqe' alu'mj najlqe'toq atzu', exqe' najlqe'toq kyoju' tnam nqaku' ta'qe', kse'nx kyb'incha ti'j Eklon.
38Kyetzlenxi'tzun atzu', exi' Joswe kyuk'i'l aj Israel toj nintnam Deb'ir ex eq'ojin ti'j,39ex kub' kyb'yo'n nimaqkawil atzu' tu'n k'uẍtx'e'nb'il exqe' xjal najlqe'toq kyoju' tnam nqaku' ta'qe'. Mix-a'lo' jun xjal aj Deb'ir kyej anq'in; kykyaqil eb'aj kub' kyb'yo'n, kse'nx kyb'incha ti'j Eb'ron, ti'j Lib'na ex kyi'ju' kynimaqkawil.
40Ikytzu'n kub'a' ti'j tkyaqilju' tx'otx' lu tu'n Joswe. Kub'kyi'ju' nimaqkawil najlqe'toq kywi' witz, toj Nekeb', toj plan ex tk'u'j witz. E'kub' t-xitu'n tkyaqil ex e'kub' tb'yo'n kykyaqilx; mixti'te kyejten ex mix-a'lo' kyej anq'in, kse'nxju' ojetoq tchaq' Qman Dyos.41Majx e'kub' tnajsa'n nimaqkawil ex kub' ttzyu'n kytx'otx', tzajx Kades-b'arnea ex Kasa, ex tkyaqilju' tx'otx' Kosen ex ponx tzmax toju' nintnam Kab'aon, qu'n intoq q'ojin Qman Dyos tu'n kykanb'an aj Israel.43Anjtztzun ti'j Joswe kyuk'i'l kykyaqil aj Israel ja tkub'a' kyxmuj toj Kilkal. Kub'ti'j Jab'in kyuk'i'lxi' mujb'a'nkyib' tuk'i'l tu'n Joswe
1Tej tb'inte Jab'in, nimaqkawil te Asor tkyaqil ja'lu, exi' tchq'o'n t-sanjelal tk'etz nimaqkawil Job'ab' te Madon ex kyk'etzju' nimaqkawil te Simron ex te Aksap tu'n kymujb'ante kyib' tuk'i'l,2ex kyuk'i'l kykyaqilju' nimaqkawil najlqe' twi' witz te toj tb'a'nq'ob'kya'j, ex toju' b'ya' ttzi nin a' Jordan toj tnayajkya'j teju' Najab' Sineret, ex toju' plan tx'otx' ex toju' tx'otx' te Dor toj tkub'exq'ij,3ex kyuk'i'lju' aj Kanaan toj tjawetzq'ij ex toj tkub'exq'ij, kyuk'i'l amorey, kyuk'i'l itit, kyuk'i'l peresey, kyuk'i'l jeb'usey najlqe' twi' witz ex kyuk'i'l eb'ey najlqe' twi' witz Ermon toju' tx'otx' Mispa.4Kykyaqiltzunju' nimaqkawil lu eb'je'tz kyuk'i'lju' kyxjal te q'oj ex nim txqan kychej ex kykarwaj te q'oj. Nimxi'xtoq kyb'aju' kyxjal te q'oj ex layxtoq b'ent kyajlet, kse'n twitz tz'awun ttzi ninnjab'.5Kykyaqil ja'lu kymujb'a kyib', ex atzu' e'kub'a'ten tk'etzju' a' Merom, tu'n kyq'ojin kyi'j aj Israel.
6Atzunte' Qman Dyos tzaj tma'n te Joswe: Lalun xob'a kye, qu'n kloqx ja'lu najchi'j che kyimel kykyaqilx wu'ne' kywitze'. Atzunta, toqinku'ya kyqanju' chej ex q'onk kyq'aq'alju'ya kykarwaj te q'oj, chij te.
7Xi'tzun Joswetz kyuk'i'lju' t-xjal te q'oj q'ojil kyi'j ttziju' a' Merom ex naq myanim kyok tzaqpaj kyi'j,8ex e'kanb'an aj Israel tu'n Qman Dyos, eb'ajxlpe kyi'j tzmax kypon toju' nintnam Sidon ex Misrepot-maym, ex tzmax toju' plan tx'otx' te Mispa toj tjawetzq'ij. Mix-a'lo' jun kyxol kyej anq'in.9Tb'incha Joswe tkyaqilju' tzaj tma'n Qman Dyos te, b'aj ttoqi'n kyqanu' chej ex oktq'o'n kyq'aq'alju' kykarwaj ajq'oj.
10Anjtzun ti'jtz ex kub' ttzyu'n nintnam Asor, qu'n atoq nejenelju' kyeju' txqantl tnam mujb'a'nkyib' tuk'i'l, ex kub' tb'yo'nju' tnimaqkawil,11ex kykyaqilju' najlqe'toq atzu'. Majxkub' kyxitu'n tkyaqil, ex okkyq'o'n tq'aq'alju' nintnam.12Ex ax tb'inchaju' kyi'ju' txqantl nimaqtnam mujb'a'ntoqkyib' tuk'i'l tu'n kyq'ojin: e'kub' ttzyu'n ex e'kub' tb'yo'n kynimaqkawil, ex majx e'mankun tu'n, kse'nx ojetoq tchaq' Moyses te, ju' tmajin Qman Dyos.13Naq o'kx Asor okkyq'o'n aj Israel tq'aq'al kyxol kykyaqilju' nimaqtnam twi' witz.14E'b'aj kub' kyb'yo'n kykyaqilju' najlqe'toq kyoju' nimaqtnam lu tu'n k'uẍtx'e'nb'il, ex mixti' jun kyej anq'in kyu'n, ex b'ajkub' kyetza'n tkyaqilju' alu'mj exju' ti'xti' atitoq toj. E'japun tchaq'b'il Moyses tu'n Joswe
15Eb'ajx tq'o'n Qman Dyos chaq'b'il te Moyses, atzunte Moyses eb'ajx tma'ntl te Joswe, atzunte Joswe eb'aj japun tu'n tkyaqil, ex mixti' jun miwtjun xitb'incha'n.16Tzyet tkyaqilju' tx'otx' lu tu'n Joswe, tkyaqilju' tx'otx' nimaqk'ulile, tkyaqil Nekeb', tkyaqilju' tx'otx' Kosen, tkyaqilu' plan tx'otx' exju' b'ya' ttzi nin a' Jordan, ex tkyaqilju' nimaq k'ul ex plan tx'otx' Israel.17Tzajx jata' witz Alak, tu'me'lju' witz Seyir, ex pomnix B'aal-kad, toju' plan tx'otx' te Lib'ano, t-xeju' witz Ermon, e'tzyet kykyaqilju' nimaqkawil toju' tx'otx' lu tu'n Joswe ex eb'aj Kub' tb'yo'n.18Nimtoj q'ojin Joswe kyuk'i'lju' nimaqkawil lu.19Noq o'kxju' nintnam Kab'aon kye eb'ey kyej b'entti'j jun kyol kyuk'i'l aj Israel. Aye'tzu'n txqantl kub'kyi'j toj q'oj,20qu'n tb'incha Qman Dyos tu'n tkub' kypi'sa'n kyib'ju' ajq'oj ex tu'n kyq'ojin kyi'j aj Israel, naqxwitlo tu'n kykub'najsa'n kykyaqil kyu'n aj Israel ex mixti' tu'n ttzaj laqj kyk'u'j kyi'j, kse'nx ojetoq tchaq' Qman Dyos te Moyses.
21Ex toju' tq'ijlalil lu, kub'kyi'j kykyaqil nimaqkytanam tyajajil Anak najlqe'toq twi' witz Eb'ron, toj Deb'ir, toj Anab' ex kyoj kykyaqilju' k'ul toj Juda ex toj Israel tu'n Moyses ex majx e'kub' t-xitu'n.22Qu'mtzun mixti' juntl tyajajil Anak kyejten toj tkyaqilju' tx'otx' toj Israel. O'kxtzu' e'kyaja'tenju' tyajajil toj Kasa, toj Kat ex toj Asdod.
23Ikytzu'n kub'a' ti'j tkyaqilju' tx'otx' tu'n Joswe, kse'nx ojetoq tchaq' Qman Dyos te Moyses. B'ajx tpa'ntzuntz kyeju' tnej tyajajil Israel, tu'n tok te kyetzb'il. Tb'ajlenxi'tzun ja'lu ten nak'b'il toju' tx'otx'. B'o's chik'b'ab'l kyi'ju' kub'kyi'j tu'n Moyses
1Tej na'mxtoq tkyim Moyses, kub'kyi'j kab'e' nimaqkawil tu'n kyuk'i'l aj Israel toj tjawetzq'ij teju' nin a' Jordan. Aye'ju' nimaqkawil ojetoq che kawin tib'aju' tx'otx' tzajx tk'etzju' nin a' Arnon ex ponx tk'etzju' witz Ermon toj tnayajkya'j, ex tkyaqilju' tx'otx' toj tjawetzq'ij teju' b'ya' te Jordan:
2Kub'ti'j Seon kyu'n, nimaqkawil kye amorey, najlqe'toq Esb'on. Tzajnix tkawb'il toju' tnam Aroer, ttziyile nin a' Arnon, ex xinix toj nik'janju' b'ya' ex pomnix ttzi nin a' Jab'ok. Janxa' qetlju' kytx'otx' aj Amon (nik'janloju' tx'otx' Kalaad),3ex intoq kawin tib'aj jun tneju' b'ya' ttzi nin a' Jordan toj tjawetzq'ij, tzajx ttziju' njab' Sineret ex ponx tk'etzju' Kyimni Ninnjab', tu'me'lju' tnam B'et-jesimot, ex ponx t-xeju' witz Piska toj tnayajkya'j.
4Yajxi'tzuntl kub'ti'j Ok kyu'n, ju' nimaqkawil te B'asan, naqtaq o'kxtlte kyyajajil repayit, najlitoq Astarot ex Edrey.5Tzajxju' tkawb'il twi' witz Ermon, ex tzajx toju' tnam Salka, ex tzajx toj tkyaqilju' tx'otx' B'asan, ex pomnix tk'etzju' nqach te Kesur ex te Maaka, ex pomnix toju' nik'jantl tx'otx' te Kalaad, ju' tetoq Seon, nimaqkawil te Esb'on.
6Kub'kyi'ju' nimaqkawil lu tu'n Moyses ex kyu'n aj Israel, ex exi' tq'o'n Moyses tx'otx' lu kyeju' tnej kyyajajil Rub'en, Gad ex kye nik'jan tyajajil Manases. B'o's chik'b'ab'l kyi'ju' tx'otx' kub'ti'j tu'n Joswe
7Aye' nimaqkawil ja'lu kub'kyi'j tu'n Joswe kyuk'i'l aj Israel toj tkub'exq'ij teju' nin a' Jordan, tzajx toju' tnam B'aal-kad, toju' b'ya' Lib'ano, ex twi' witz Alak, ju' nponx Seyir. Exi'tpa'n Joswe tx'otx' lu kyeju' tnej tyajajil Israel, ex xitq'o'n8tx'otx' nimaqk'ulile te kyetzb'il tejumajx, ex jni'ju' plan tx'otx', exju' b'ya' ttzi nin a' Jordan, exju' tx'otx' tk'u'j witz, exju' tx'otx' toj chq'ajlaj exju' tx'otx' Nekeb'. Aju' tx'otx' lu kyetoq aj Et, amorey, aj Kanaan, aj Perisya, eb'ey ex jeb'usey.
9Aye' nimaqkawilju' kub'kyi'j aye': aj Jeriko, aj Ay, ju' nintnam nqaku' ta' tk'etz B'etel, exju' aj Jerusalen, aj Eb'ron, aj Jarmut, aj Lakyis, aj Eklon, aj Keser, aj Deb'ir, aj Keder, aj Orma, aj Arad, aj Lib'na, aj Adulam, aj Makeda, aj B'etel, aj Tapuwa, aj Eper, aj Apek, aj Saron, aj Madon, aj Asor, aj Simron-meron, aj Aksap, aj Taanak, aj Mekido, aj Kedes, aj Jokneam te Karmelo, aj Dor toju' tx'otx' Dor, aj Koyim toj Kilkal, ex nimaqkawil aj Tirsa. Junaq junlajoj (31) nimaqkawil tu'n kykyaqil. Aju' tx'otx' na'mtoq tkub'ti'j
1Tej matxi'toq tijinxi'x Joswe, tzaj tma'n Qman Dyos te:
Matxi' tzajta twinqil, extzun atix txqantlju' tx'otx' tu'n tkub'ti'j.2Atix kytx'otx' pilistey ex jeb'usey,3tzajx ttzi nin a' Syor, toj tjawetzq'ij te Ejipt, pomnix toju' nqach te Ekron, toj tb'a'nq'ob'kya'j, ju' kytx'otx' aj Kanaan; atzu' ate'toq jwe' nejenel pilistey, aye': aj Gasa, aj Asdod, aj Askalon, aj Kat ex aj Ekron. Ex atixju' kytx'otx' eb'ey,4toj tnayajkya'j, ex tkyaqilju' kytx'otx' aj Kanaan, tzajx kyoj nimaqkytanam aj Sidon ponx toju' tnam Apek, jata' kynaqachju' amorey.5Ex atixju' kytx'otx' kyib'lita, ex tkyaqilju' Lib'ano toj tjawetzq'ij, ex tzajx toju' tnam B'aalkad, t-xeju' witz Ermon, ex ponx ttziju' tnam Amat.6Che elelwiq'i'ne' aj Sidon kywitz aj Israel ex kykyaqilju' najlqe' kywi' nimaq k'ul, tzajx Lib'ano ex ponx Misrepot-maym. Atzunta pa'nxa tx'otx' te kyetzb'il aj Israel, kse'nx oje nchaq'e' teya.7Pa'nxju'ya tx'otx' lu kyxolju' b'eljoj tnej tyajajil Israel ex nik'jantl tyajajil Manases, chij te. Kytx'otx' kyyajajil Manases, Rub'en Ex Kad
8Ojetoq kyk'amju' kyyajajil Rub'en, Gad exju' nik'jan tyajajil Manases kytx'otx' tej t-xi' tq'o'n Moyses tx'otx' kye toj tjawetzq'ij te Jordan.9Xiq'o'nju' tx'otx' kye, tzajx Aroer, ttzi nin a' Arnon, exju' nintnam toj nky'ajchaqu' b'ya', ex tkyaqilju' plan tx'otx' Medeb'a, pomnix Dib'on,10Kyuk'i'lxi' nimaqttanam Seon, nimaqkawil kye amorey te Esb'on, ex pomnix jata' kynaqach aj Amon.11Ex xiq'o'n Kalaad kye, exju' kytx'otx' aj Kesur ex aj Maaka, extzunju' witz Ermon ex tkyaqilju' tx'otx' B'asan ex pomnix Salka,12Exju' jankawina'toq Ok, nimaqkawil te B'asan, ntoq kawin Astarot ex Edrey, ex atoq mankb'il xjalju' kyyajajil aj Repayim, ju' matxi'toq kub'kyi'j tu'n Moyses ex ojetoq che ex t-xlaja'n toju' tx'otx'.13Aye'tzu'n aj Kesur ex aj Maaka min e'ex xla'ja'n atzu', e'kyajx najan kyxol aj Israel.
14Aye'tzu'n tyajajil Leb'i mixti' xitq'o'n Moyses kytx'otx', qu'n a kyeju' aye' oyaj inche tz'e'yset te ninb'ilte Qman Dyos kse'nxju' ojetoq tzaj tma'n.
15Xitpa'n Moyses kytx'otx'ju' tyajajil Rub'en kse'nxju' kyajlal junjun k'loj xjal kywitze'lilex kyib',16tzajxju' kytx'otx' toju' tnam Aroer, ttziyile nin a' Arnon, exju' nintnam toj nky'ajchaq b'ya', ex tkyaqilju' plan te Medeb'a,17ex ponx toj Esb'on ex kykyaqilju' nimaqtnam toj plan: Dib'on, B'amot-b'aal, B'et-b'aal-meon,18Jaas, Kademot, Mepaat,19Kyiryataym, Sib'ma, Saret-saar, ju' ati twi' witz toju' b'ya',20B'et-peor, B'et-jesimot exju' tx'otx' tk'u'ju' twitz Piska,21kykyaqilju' nimaqtnam toj plan ex tkyaqilju' tkawb'il Seon, nimaqkawil kye amorey te Esb'on. Ojetoq kub' Seon tu'n Moyses exqe' nejenel te Madyan intoq che ajb'en te, aye': Eb'i, Rekyem Sur, Ur ex Reb'a.22Ex kub' kyb'yo'n aj Israel ajnab'lil B'alaam, tk'wal B'eor, ex nim txqantl xjal.23Ayiletzun nimaqtnamju' kyuk'i'lju' kynajb'il, xiq'o'n te kytx'otx' tyajajil Rub'en kse'nxju' kyajlal junjun k'loj xjal kywitze'lx kyib', ntoq ponx ttzi nin a' Jordan.
24Ex ikx xitq'o'n Moyses kytx'otx'ju' tyajajil Gad, kse'nxju' kyajlal junjun k'loj kywitze'lilex kyib'.25Xiq'o'nju' tnam Jaser kye, ex kykyaqilju' nimaqtnam Kalaad, ex nik'janju' kytx'otx' aj Amon, ponx toju' nintnam Aroer, ju' ati twitz Rab'a,26exju' tx'otx' ati kyxol Esb'on, tuk'i'l Ramat-mispa ex B'etonim, ex kyxol Maanaim tuk'i'lju' nqach te Deb'ir.27Ex exi q'o'nju' tnam B'et-nimra, Sukot ex Sapon kye, ju' ati toju' b'ya', ex o'qe'kxtltoq tnamju' te tkawb'il Seon nimaqkawil te Esb'on. Aju' ttx'otx' intoq tzajx ttziju' nin a' Jordan toj tjawetzq'ij ex pomnix ttziju' njab' Sineret toj tnayajkya'j.28Aye'tzun nimaqtnam ja'lu, kyuk'i'lxi'ju' kynajb'il, xiq'o'n kye tyajajil Gad, kse'nxju' kyajlal junjun k'loj xjal kywitze'lilex kyib'.
29Ex xitq'o'n Moyses kytx'otx'ju' nik'jan tyajajil Manases, kse'nxju' kyajlal junjun k'loj xjal kywitze'lilex kyib'.30Xiq'o'n kye tkyaqilju' tetoq Ow, ju' nimaqkawil te B'asan, tkyaqilju' tx'otx' B'asan, tzajx toj Maanaym, kyuk'i'lu' oxnaq (60) tnam toj Jayr,31nik'janju' tx'otx' Kalaad, exqe' nimaqtnam Astarot ex Edrey. Tkyaqilju' lu xi' te nik'jan tyajajil Mekyir, ju' tk'wal Manases, kse'nxju' kyajlal junjun k'loj xjal kywitze'lilex kyib'.
32Aye'tzun tx'otx' ja'lu exi' tq'o'n Moyses te kyetzb'il toju' plan tx'otx' te Moab' toj tjawetzq'ij te nin a' Jordan, jlaj Jeriko.33Atzu'n kyeju' tyajajil Leb'i mixti' xitq'o'n kytx'otx', o'kxte xitma'nju' kye: Aku'te Qman Dyos kyetzb'ile', chij kye. Xitpa'n Joswe tx'otx' Kanaan
1Aye'tzun tx'otx' ja'lu te Kanaan xiq'o'n te kyetzb'il aj Israel, tu'n pale Eleasar, tu'n Joswe ex kyu'n nejenel kye junjun tnej tyajajil Israel.2Xikysipa'nju' tx'otx' kyxolju' b'eljoj tk'i' nik'janju' tnej kyyajajil, kse'nxju' kub' tz'aq te junjun tej kyjyonte ti'j, ex kse'nxju' ojetoq tchaq' Qman Dyos te Moyses tu'n tb'inchet.3Matxi'toqtzun txitq'o'n Moyses kytx'otx'ju' kyyajajil Rub'en ex Gad, ex kye nik'jan tyajajil Manases toju' jun plajtl teju' nin a' Jordan; aye'tzu'n tyajajil Lb'i mixti' xitq'o'n kytx'otx'.4Kab'e' tnej e'ela' tyajajil Jse, aju' tyajajil Manases ex tyajajil Eprayin, atzu'n kye aj Leb'i mixti' jun piẍ kytx'otx' xiq'o'n, noq o'qe'kx nimaqtnam jatu'n kynajana', tuk'i'l kojb'il jatu'n kyk'ik'lena'.5B'aj kysipa'n aj Israel tx'otx' kse'nx ojetoq tchaq' Qman Dyos te Moyses. Tnej ttx'otx' Kaleb'
6Exi'ju' tyajajil Juda toj Kyilkal tu'n kyolin tuk'i'l Joswe, atzunte Kaleb' ju' kyenesey, tk'wal Jepone, xitma'n te Joswe: Na'ntzju'ya xitma'n Qman Dyos wi'je' ex ti'ja teju' tmajin Moyses toj Kades-b'arnea.7Tetoq kab'naq (40) ab'q'i qine' tej wex tchq'o'ne' Moyses toj kades-b'arnea tu'n nxi'ye' ka'yilteju' tx'otx' toj ewaj, atzunj tanjtzwi'je' b'aj nma'nju'ye' ax.8Aye'tzunju' exi' wuk'i'le' e'okten xob'salkyeju' xjal, ayintzunwe' xinnimane' Qman Dyos Wajawe'.9Tzaj ttziya'ntzun Moysestz weye': Teya kxe'la'ju' tx'otx' ja xkub'a' tq'o'na tqana ex kyeju' tyajajila tejumajx, qu'n matxi tnima'na tyolju' Qman Dyos, chij.10Matxi' tzik' kab'naq jwe' (45) ab'q'i tej t-xi' tma'n Qman Dyos ja'lu te Moyses, tej inxtoq che b'et aj Israel toj chq'ajlaj, ex naq tu'nju' tyol Qman Dyos tma itz'qinxe'. Atzu'n ja'lo matxi' chin japune' toj junmutx'jwe' (85) ab'q'i,11extzun kuwqinxe' kse'nxju' tej nxi' chq'o'ne' tu'n Moyses ka'yilteju' tx'otx', ex kb'entel nq'ojine' kse'nxju' ojtxi'.12Qu'mtzun inxi' nqanine' teya ja'lo tu'n ttzaj tq'o'nju'ya tx'otx' nimaqk'ulile ju' tzaj ttziya'n Qman Dyos weye'. Atxi'xtzunj b'i'n tu'na qa atzu' najlqe' tyajajil Anak ju' nimaq kywe', exqa nimaqqe' nimaqkytanam ex kuwsa'nqe' tu'n nimaqtapi. Atzunwe' q'uqliwe' nk'u'j ti'j Qman Dyos qa ktenb'el exqa k'onil wuk'i'le' tu'n kyex iq'et atzu', kse'nxju' oje tma, chij.13Kub'tzun tk'i'wla'n Joswe Kaleb', ex xitq'o'nju' tx'otx' Eb'ron te ex kyeju' tyajajil.14Iktzu'n kyaja'ju' tx'otx' Eb'ron te Kaleb' ex kyeju' tyajajil, ex majx kyejten kye, qu'n xi' tnima te Kaleb' tyol Qman Dyos.15Kyiryat-arb'a toq tb'i Eb'ron ojtxi', qu'n ate Arb'a nima'nxi'x kyu'n xjal kyxolju' tyajajil Anak ju' nimaq kywe'.
Tik'lenxi'tzun ja'lu ten nak'b'il toju' tx'otx' lu. Tnej ttx'otx' Juda
1Aju' kytx'otx' junjun k'loj xjal kywitze'lilex kyib' kyxolju' tyajajil Juda xiq'o'n kse'nxju' kub' tz'aq kye tej tjyonjtz ti'j in ponx ttziju' nqach te Edom, ex in ponx toju' chq'ajlaj Sin toj tnayajkya'j,2Tojtzunju' plaj lu, xi' intzaja' qeju' nqach ttxa'nxi' Kyimni Ninnjab' toj tnayajkya'j,3xinitzuntz toj tnayajkya'j, twitz jawl te Akrab'im, ex inik' toju' chq'ajlaj Sin ex toj tnayaj Kades-b'arnea; xi'nitzuntz tzmax Esron, ex njax tzmax Adar ex in q'onwelt tu'n tpon Karka,4ex xi'nix tzmax, Asmon tu'n telpun kanun toju' a' te Ejipt ex pomni kanun toju' Ninnjab' Mediteraney. Atzun nqachju' toj tnayajkya'j.5Atzu'n nqach toj tjawetzq'ij, toqu' Kyimni Ninnjab', ex ponx tzma janpon b'aja' nin a' Jordan. Axtzuntzu' nxa' qetlju' nqach toj tb'a'nq'ob'kya'j,6njaxtzuntz toj B'et-okla ex nnik' toj tb'a'nq'ob' B'et-arab'a, axtzuntzu' inxa'tl tk'etz Pik B'oan B'en-Rub'en;7njaxtzuntz toju' b'ya' Akor tu'n tpon Deb'ir ex ntzajtzuntz toj Kyikal, ju' ati twitz Adumin, toj tnayaju' a'; ex nik'ju' nqach toj t-xiklilju' a' te En-semes ex xi'ni tzmax toj En-rokel;8ex inik' toju' b'ya' B'en-inom, toj tnayaj tk'u'ju' witz Jeb'us, ju' Jerusalen; in jaxtzuntz twi'yileju' witz ati toj tkub'exq'ij teju' b'ya' Inom, ex toj tb'a'nq'ob'kya'j teju' b'ya' Repaym,9tu'n tq'o'n welt twi' witz ex in nul toj t-xiklil a' Neptoa, ex nnulkanun kyoju' nimaqtnam twi' witz Epron, inik' toj B'aala, ju' ax juntl tb'iju' Kyiryat-jearim.10Atzuntz B'aala in tzaja'ju' nqach toj tkub'exq'ij, in pon twi'ju' witz Seyir, ex inik' toj Kyesalon, toj tb'a'nq'ob'ju' witz Jearim, nku'tztzuntz tzmax B'et-semes ex nnik' toj Timna,11ex nnik' tk'u'j twitz toj tb'a'nq'ob'kya'j te Ekron, nxi' tzmax Sikron, ex nnik' twi' witz B'aala, nnelpun toj Jab'neel tu'n tpon b'aj toju' Ninnjab' Mediteraney.12Atzu'n mankb'il nqach toj tkub'exq'ij ju' Ninnjab' Mediteraney. Aye'tzun nqachju' te kytx'otx'ju' tyajajil Juda, ju' xisipa'n kyxolju' junjun tnej kywitze'lilex kyib'. Kub'ti'j Eb'ron ex Deb'ir tu'n Kaleb' (Jue 1.10-15)
13Xitq'o'n Joswe jun tnej tx'otx' ti'j kytx'otx'ju' tyajajil Juda, te Kaleb' tk'wal Jepone, kse'nx tchaq' Qman Dyos, xitq'o'n Kyiryat-arb'a te, aju' Eb'ron, nintnam nimxi'x toklen kye tyajajil Anak nimaqxi'x kywe'.14Oxe' tyajajil Anak e'ex tu'n Kaleb' atzu', a kyb'iju' Sesay, Ayman ex Talmay.15Yajxi'tzuntel xi' q'ojil kyi'ju' najlqe' toj Deb'ir, ju' Kyiryat-seper toq tb'i nejtl,16ex tma: Alkyete maq'ojin ex makub' ti'ju' nintnam lu tu'n, kxe'l nq'o'ne' nmyale' Aksa te t-xu'jil, chij.
17A Otonyel tk'wal Kyenas ju' titz'in, kub'ti'ju' nintnam tu'n, xi'tzun tq'o'n Kaleb' Aksa ju' tmyal te t-xu'jil.18Tetzunj kxi'toq kytzaj kyja, kub'ti'j Aksa tu'n Otonyel tu'n t-xi' tqani'n tx'otx' te awb'il te tman. Atzunte Aksa ku'tz ti'ju' tb'ur, atzunju' tman xitqani'n te:
¿Ti'tzu'n kxe'l teya?, chij.
19—Wajb'ile' tu'n t-xi' nqani'n jun xtalb'ile' teya, chij xittzaq'we'n. Q'onqe'tza t-xiklil a' weye', qu'n mana' tzaj tq'o'na ntx'otx'e' toju' chq'ajlaj Nekeb', chij.
Exi'tzun q'o'nju' t-xiklil a' toju' plaj jawl ex toju' plaj kub'l te tu'n tman. Nimaqtnam exiq'o'n kye tnej tyajajil Juda
20Aye' kyetzb'il tk'wal Juda ja'lu, exi' pa'n kse'nxju' kyajlal junjun k'loj xjal kywitze'lilex kyib'.21Junaq b'eljoj (29) nimaqtnam tu'n kykyaqil kyuk'i'lxi'ju' kykojb'il xiq'o'n kye toju' tx'otx' toj tnayajkya'j, tu'me'lju' nqach te Edom. Aye': Kab'seel, Edar, Jakur, Sina, Dimona, Adada, Sedes, Asor, Itnan, Sip, Telem, B'ealot, Asor-adata, Kyiryot, Esron (ax juntl tb'iju' Asor), Amam, Sema, Molada, Asar-kada, Esmon, B'et-pelet, Asar-swal, B'eerseb'a, B'isotya, B'aala, Iym, Esem, Eltolad, Kyesil, Orma, Siklaj, Madmana, Sansana, Leb'aot, Silim ex En-rimon.
33Atzu'n toju' plan tx'otx', kyajlajoj (14) nimaqtnam tu'n kykyaqil kyuk'i'lxi' kykojb'il xiq'o'n kye, aye': Estaol, Sora, Asena, Sonoa, En-kanim, Tapuwa, Enam, Jarmut, Adulam, Soko, Aseka, Saaraym, Aditaym, Gedera ex Gederotaym.
37Exqe'ju' qaqlajoj (16) nimaqtnam kyuk'i'lxi'ju' kykojb'il, aye' Senan, Adasa, Mikdal-kad, Dilean, Mispa, Jokteel, Lakyis, B'oskat, Eklon, Kab'on Lamam, Kyitlis, Kederot, B'et-dakon, Naama ex Maseda.
42Exqe' b'eljoj nimaqtnam kyuk'i'lxi' kykojb'il, aye': Lib'na, Eter, Asan, Ipta, Asena, Nesib', Kyeyla, Aksib' ex Maresa.
45Exju' tnam Ekron kyuk'i'lju' ttanam ex tnajb'il, tzajx Ekron ex ponx ttzi ninnjab', tkyaqilju' tx'otx' ati tk'etz Asdod, kyuk'i'lxi'ju' tnajb'il. Exju' nintnam Asdod kyuk'i'lju' ttanam ex tnajb'il, exju' nintnam Gasa kyuk'i'lju' ttanam ex tnajb'il, ponx tzmax toju' t-xiklil a' te Ejipt ex ttziyileju' Ninnjab' Mediteraney.
48Atzu'n toju' tx'otx' nimaqk'ulile, e'xiq'o'n junlajoj (11) nimaqtnam lu kyuk'i'lxi' kykojb'il kyeju' tyajajil Juda, aye': Samir, Jatir, Soko, Dana, Kyiryat-sana (ax juntl tb'iju' Deb'ir), Anab', Estemoa, Anim, Kosen, Olon ex Kilo.
52Exqe' b'eljoj nimaqtnam kyuk'i'lju' kykojb'il, aye' Arab', Duma, Esan, Janum, B'et-tapuwa, Apeka, Umta, Kyiryat-arb'a (ax juntl tb'iju' Eb'ron), ex Syor.
55Exqe'ju' lajoj nimaqtnam kyuk'i'lju' kynajb'il, aye': Maon, Karmel, Sip, Juta, Jesreel, Jokdeam, Sanoa, Kayin, Gab'aa ex Timna.
58Exqe' qaq nimaqtnam lu kyuk'i'lxi' kykojb'il: Alul, B'et-sur, Gedor, Maarat, B'et-anot ex Eltekon.
60Exqe' nimaqtnam Kyiryat-b'aal, ex ax tb'iju' Kyiryat-jearim ex Rab'a, kyuk'i'lju' kykojb'il.61Atzu'n toj chq'ajlaj qaq nimaqtnam xi' kye kyuk'i'lxi' kykojb'il, aye': B'et-arab'a, Midin, Sekaka, Nib'san, nimaqtnam te atz'an, ex En-kadi.
63Mixti' e' xkyeju' tyajajil Juda tu'n kyetzju' jeb'usey kyu'n, ju' najlqe'toq toj Jerusalen, qu'mtzun e'kyajx najantlju' jeb'usey toj Jerusalen junx kyuk'i'lju' tyajajil Juda. Kytx'otx' Eprayin ex Manases tyajajil Jse
1Aju' kytx'otx' tyajajil Jse xiq'o'n kse'nxju' kub' tz'aq kye tej tjyonjtz ti'j, tzyet toj tjawetzq'ij toju' nin a' Jordan, ja ta'qe' t-xiklil a' te Jeriko, xi'nitzuntz toj chq'ajlaj, kywi'yile witz, tzajx Jeriko tu'n tpon B'etel.2Txi'xtzuntl B'etel, aju' tnam Lus, inik' toj kytx'otx'ju' arkyit ex pomnix Atarot;3inxi'tzuntz tkub'exq'ij toj kytx'otx' japletit, ex ponx toj B'et-oron toj Kub'l, pomnix Keser. Nxi'tzuntz toju' ninnjab' Mediteraney. Kytx'otx' tnej tyajajil Eprayin
4Aju' kyetzb'il kyyajajil Manases ex Eprayin, tk'wal Jse, xiq'o'n aye' ja'lu:5Aye' tnaqachil kytx'otx' tyajajil Eprayin, tzajnix toj tjawetzq'ij te Atarot-adar ex pomnix B'et-oron Jawl.6Txi'xtzuntl atzu', nxi' ttziyile Ninnjab' Mediteraney. Atzu'n nqach toj tb'a'nq'ob'kya'j teju' kytx'otx' atoq Mikmetat, xi'nitzuntz tu'me'l tjawetzq'ij tzmax toj Taanat-silo, nnik' Janoa7ex in ku'tz Atarot ex Naorat, in pon ch'i'n Jeriko ex in nelpun kanun toj nin a' Jordan.8Intzaj qeju' nqach Tapuwa, xi'nitzuntz toj tkub'exq'ij tu'n tpon tzmax ttzi t-xiklil a' Kana ex ttzi ninnjab' Mediteraney. Atzun tx'otx'ju' xiq'o'n kyeju' tyajajil Eprayin, ex xi' sipa'n kyxolju' junjun k'loj kywitze'lilex kyib'.9Ex ate' junjuntl nimaqtnam kyuk'i'lju' kykojb'il toj kytx'otx' tyajajil Manases, xiq'o'n kye tyajajil Eprayin.10Aye'tzu'n tyajajil Eprayin mixti' e ex kyxla'ja'n aj Kanaan najlqe'toq toj Keser, xipe' kyq'o'n anb'il kye tu'n kynajan kyxol, naqtzun o'kx e'okkychq'o'n tu'n kychojon kye. Atxi'xtzunj najlqe' aj Kanaan atzu'. Kytx'otx' tnej tyajajil Manases1A tx'otx' ja'lu xiq'o'n kyeju' tyajajil Manases, ju' tnejel tk'wal Jse. Xiq'o'nju' tx'otx' Galaad ex B'asan toj tjawetzq'ij te nin a' Jordan te Makyir, jun nimaq q'ojil, tnejel tk'wal Manases ex manb'aj te Kalaad.2Ex kub' jyo'n ti'ju' tx'otx' kse'nxju' makub' tz'aq tu'n t-xi' kyeju' tk'wal Manases, kse'nxju' kyajlaj junjun k'loj kywitze'lilex kyib', kyyajajil tk'wal Manases ex tchman Jse, aye': Ab'yeser, Elek, Asryel, Sikyem, Eper ex Semida.3Atzunte Selopad, tk'wal Eper ex tchman Kalaad, ju' tk'wal Makyir ex tchman Manases, mixti' jun tk'wal tzaj q'o'n, naq txinileqe' ex aye': Maala, Noa, Okla, Milka ex Tirsa.4Exi'ju' qya lu tk'etzu' pale Eleasar ex Joswe exqe'ju' nejenel te tnam, ex xikyma'n kye: Tchaq'te' Qman Dyos te Moyses tu'n ttzaj tq'o'n qtx'otx'e', kse'nxju' kyeqwitze'le', chechij. Ex tzajte Joswe xitq'o'n kytx'otx' kse'nx kyeju' tywitze'l kyman, kse'nx ojetoq tchaq' Qman Dyos te.5Iktzun kyk'ama' tyajajil Manases lajoj tnejtl, ti'jxi'ju' tx'otx' Kalaad ex B'asan, ju' ate' toj tjawetzq'ij te Jordan,6qu'n xiq'o'n kytx'otx'ju' tmyal Manases kse'nxju' kye k'walb'aj q'a. Xi' q'o'nju' tx'otx' Kalaad kyeju' txqantl tyajajil Manases.7Xi'nixju' kytx'otx' tyajajil Manases toj Aser tu'n tpon toj Mikmetat, ju' ati tu'me'l Sikyem, ex xi'nitl toj tnayajkya'j, tu'n tpon tzmax jata' t-xiklil a' Tapuwa.8Maskye kyetoq tyajajil Manases tx'otx' Tapuwa, axju' nintnam Tapuwa, atitoq tk'etz kynaqach kyetoqju' tyajajil Eprayin.9Nxi'tzun nqachtz twitz kub'l toj tnayajkya'j tu'n tpon tzmax toju' a' te Kana, qu'mtzun aye'ju' nimaqtnam lu te Eprayin ate'toq kyxolju' nimaqkytanam Manases, extzun aju' nqach toj tb'a'nq'ob'kya'j teju' a', te Manases, ex in pon b'aj toj ninnjab'.10Toj tnayajkya'j kyeja' Eprayin teju' a', atzunte Manases toj tb'a'nq'ob'kya'j, aju' Ninnjab' Mediteraney kyej te kynaqach, atzunju' kytx'otx' tyajajil Aser kyej toj tb'a'nq'ob'kya'j, atzun kye Isakar toj tjawetzq'ij.11Ex e'xiq'o'n nimaqtnam lu kyuk'i'lxi' kykojb'il ti'jile junjunkye tyajajil Manases toju' kytx'otx' Isakar ex Aser, aye': B'et-sean, Ib'leam, Dor, Endor, Taanak ex Mewido, exqe'ju' oxe' twi' ttxa'nwitz.12Aye'tzu'n tyajajil Manases min b'ant tkub' kytzyu'n nintnam lu, qu'n kub' kywab'a'n kyib'ju' aj Kanaan b'a'nxi'x ex axtzu' e'kyeja'ten.13Tetzunj kykuwix aj Israel b'a'nxi'x e'okkychq'o'n aj Kanaan tu'n kychojon kye, naqtzun aju' minti' e'exkyiq'i'n atzu'. Kub' kytzyu'n tyajajil Jse k'ul
14Xikyma'n tyajajil Jse te Joswe:
—¿Tiqu'n naq jun tal tnej tx'otx' saj tq'o'na qeye', matxina qoky'i'wlanjtze' tu'n Qman Dyos, qu'mtzun nim txqan qb'aje' matxi' chmet, extzun naqch'i'n qkub'ele'?, chechij te.
15Xi'tzun ttzaq'we'n Joswe kye:
—Nimpe' txqankye' kyb'aj ex min nche b'ajxtle' kyoju' k'ul te Eprayin. Kukyxi'ye' kyoju' k'ul ex kyik'sanqe'ktzju'ye' tze toj kytx'otx' peresey ex aj Repayim, chij.
16Aye'tzunkye xikytzaq'we'n:
Axte' qa min nche kanunju' k'ul lu qeye': Noqtzun aye'kye' aj Kanaan najlqe' toju' plan tx'otx' ati kykarwaj k'uxb'ilqe', ex ikqe'xju' najlqe' toj B'et-sean ex kyoju' tnajb'il ti'jile, exqe' najlqe' toju' b'ya' Jesreel, chechij.17Xi'tzun ttzaq'we'n Joswetz kyeju' tyajajil Jse, aye' tyajajil Eprayin ex Manases, kjalu:
—Nimna' txqankye' kyb'aj ex ati nim kyipumale', qu'mtzun myanaq jni'xju' kytx'otx'e' kxe'l,18qu'n ikxju' k'ul lu jupli kyu'n tze, kxe'l kyeye', expe' che ajb'elju' tze kyu'ne'. Aye'tzu'n aj Kanaan, kche elexkye' kyu'ne', maskye kuwqe' ex ati kykarwaj k'uxb'ilqe', chij kye. Kytx'otx' txqantl tnejtl tyajajil Israel
1Kykyaqilju' aj Israel b'aj kyb'u'yi'n kyib' toj Silo, tu'n tkub' kyq'o'nju' Ja te mujb'ab'ltib'il tuk'i'l Dyos atzu'. Toju' tq'ijlalil matxi'toq kub'ti'ju' tx'otx',2maskye atixtoq wuq tnejtl tyajajil Israel na'mxtoq t-xi' q'et kytx'otx'.
3Xitzun tma'n Joswe kye aj Israel: ¿ti'ti' in kyo'ne' tu'nju' na'mx tkub' kytzyu'nju'ye' tx'otx' oje tzaj tq'o'n Qman Dyos kyeye'?4Kysk'o'nktze' oxox ichan toj junjun tnej qyajajil, tu'n kyxi' nchq'o'ne' ka'yilte tkyaqilju' tx'otx' ex tu'n ttzaj kyiq'i'n jun tqanil weye' tu'nwtzunlo t-xi' pa'yit.5Aye' ichan lu kb'el kyaq'pu'n tx'otx' toj wuq tnej, kjel kyq'o'n ttx'otx' Juda toj tnayajkya'j, atzu'n kye tyajajil Jse toj tb'a'nq'ob'kya'j.6Tb'ajlenxi'tzun kyaq'pu'nju' tx'otx' toj wuq tnej, ktzajel kyiq'in chik'b'ab'l weye', ayintzunwe' kxel nse'ne' ti'j twitz Qman Dyos kse'nxju' makub' tz'aq te junjun.7Mixti'kye tyajajil Leb'i kytx'otx' kxe'l, qu'n aye'kye che okyel te pale twitz Qman Dyos. Aye'tzunju' kyyajajil Gad, Rub'en exju' nik'jan tyajajil Manases, oje txi'kye kyetzb'il toj tjawetzq'ij te Jordan, aju' xitq'o'n Moyses kyeju' tmajin Qman Dyos, chij kye.8Kyb'inchatzun kyib'ju' che tzajel q'inte tqanilju' tx'otx' tu'n kyxi', ex xitma'n Joswe kye: Kukxi'ye' toj tkyaqilu' tx'otx' ex kyaq'punku'ye', lwixtzun che tzaje' ajtb'aj b'ent kyu'ne', tu'ntzun tkub' njyo'ne' ti'j tza'lu toj Silo twitz Qman Dyos, chij kye.9Exi'ju' ichan lu ex b'aj kyb'eti'n tkyaqilju' tx'otx', eb'aj kyaq'pu'n nimaqtnam toj wuq tnej ex b'ajkub' kytz'ib'a'n tkyaqil. Anjtzun kyi'jtz toju' kyxmuj aj Israel toj Silo jatoq ta' Joswe.10Xi'tzun tpa'n Joswe tx'otx' kyxol aj Israel, toj Silo, ex xit-se'n kse'nx makub' tz'aq te junjun twitz Qman Dyos. Kytx'otx' tnej tyajajil B'enjamin
11Tb'ajlenxi'tzun jyo'nti'j alkyeju' tx'otx' makub' tz'aq te junjun, aju' tx'otx' ati kyxolju' kytx'otx' tyajajil Juda ex tyajajil Jse, xiq'o'n kyeju' junjun k'loj kywitze'lilex kyib' kyxol tyajajil B'enjamin.12A nqachu' teju' tx'otx' lu, intzyet toj tb'a'nq'ob'kya'j te nin a' Jordan, xi'nitzuntz tzmax toj tb'a'nq'ob'kya'j te Jeriko, ex xi'nitl kywi' witz tu'me'l tkub'exq'ij, ex nnelpun toju' chq'ajlaj B'et-ab'en.13Txi'xtzun atzu', in xi'tl tu'me'l Lus (toj B'etel) toj tnayajkya'j, in ku'xtzuntz Atarot-adar twi'ju' witz ati toj tnayajkya'j te B'et-oron te Kub'l;14in anjtztlti'ju' nqach tu'me'l Ninnjab' Mediteraney toj tnayajkya'j teju' witz ati twitz B'et-oron, ex in ponx Kyiryat-b'aal, ax tb'iju' Kyiryat-jearim, ju' kyetzb'il tyajajil Juda. Atzun nqachju' toj tkub'exq'ij.
15Atzunju' nqach toj tnayajkya'j inxi' qe toju' plaj te Kyiryat-jearim, tu'me'l tkub'exq'ij tu'n tpon toj t-xiklil a' Neptoa,16in ku'xtzuntz tzmax ttxa'nwitz ati twitzju' b'ya' B'en-inom, toj tb'a'nq'ob'kya'j teju' b'ya' Repaym. In ku'xtzuntz toju' b'ya' Inom, inik' toj tnayajkya'j tk'u'ju' twitz Jeb'us, inxi'tzuntz tzmax toj t-xiklil a' En-rokel.17In nanjtzun ti'jtz tu'me'l tb'a'nq'ob' kya'j tu'n telpun toj En-semes, txi'xtzuntl atzu' tu'n tpon tzmax Gelilot, ju' ati tu'me'lju' witz Adumin, ex tu'n tku'pun tzmax Tk'etzju' Pik te B'oan B'en-Rub'en;18Ex in nik'tl toj tb'a'nq'ob'kya'j teju' tk'u'j witz, tu'me'lju' b'ya' ttzi Jordan, ex in ku'pun kanun toj nin a' Jordan,19inik' toj tb'a'nq'ob'kya'j te B'et-okla, tu'n tpon b'aj ttxa'nju' Kyimni Ninnjab', ja in pon b'aja' nin a' Jordan. A nqach ja'lu toj tnayajkya'j.
20Aju' nin a' Jordan nqach toj tjawetzq'ij. Aye'tzun nqach ja'lu teju' tx'otx' xi' aq'pet kyxol junjun k'loj xjal kwitze'lilexkyib' kyxol tyajajil B'enjamin.21Aye' kab'lajoj nimaqtnam ja'lu kyuk'i'lxi' kykojb'il exi' q'o'n kye junjun k'loj xjal kywitze'lx kyib' kyxol tyajajil B'enjamin: Jeriko, B'et-okla, Emek-kasis, B'et-arab'a, Semaraym, B'etel, Ab'im, Para, Opra, Kyepar-aamoni, Opni ex Geb'a.25Ex ikx kyajlajojtl nimaqtnam kyuk'i'lxi' kykojb'il, aye' Gab'aon, Rama, B'eerot, Mispa, Kapira, Mosa, Rekyem, Irpeel Tarala, Sela, Elep, Jeb'us (aju' Jerusalen), Gab'aa ex Kyiryat. Atzun tx'otx'ju' xiq'o'n kye junjun k'loj xjal kywitze'lilex kyib' kyxol tyajajil B'enjamin. Kytx'otx' tnej tyajajil Simeon
1Aju' tkab' tx'otx' jyonjtz ti'j alqe makub' tz'aqa' xiq'o'n kye tyajajil Simeon. Xi'toq ta'ju' tx'otx' lu toj kytx'otx' tyajajil Juda,2ex aye' oxlajoj (13) nimaqtnam ja'lu kyuk'i'lxi' kykojb'il: B'eerseb'a, Seb'a, Molada, Asar-swal, B'ala, Esem, Eltolad, B'etul, Orma, Siklaj, B'et-markab'ot, Asar-susa, B'et-leb'aot ex Sarwen.7Ex exi' q'o'nju' nimaqtnam lu kye: En-rimon, Eter ex Asan, kyuk'i'lju' kynajb'il,8Exqe'tzu'n najb'il ate'toq tzmax B'aalat-b'eer, aju' nintnam Ramat, toj Nekeb'. Aye'tzun tx'otx'ju' xi' kyeju' junjun k'loj kywitze'lilex kyib' kyxol tyajajil Simeon.9Atoqtzu' ta'ju' kytx'otx' tyajajil Simeon toju' kytx'otx' tyajajil Juda, qu'n nimtoqkye Juda kytx'otx', qu'mtzun xiq'o'n kytx'otx' tyajajil Simeon ti'ju' kytx'otx' Juda. Kytx'otx' tnej tyajajil Sab'ulon
10Aju' toxi'n tx'otx' jyonjtz ti'j alqe makub' tz'aqa', xiq'o'n kye junjun k'loj xjal kywitze'lilex kyib' kyxol tyajajil Sab'ulon. Pomnixju' nqach toj Sarid, xi'nixtzuntz toj tkub'exq'ij tzmax Marala ex ponx toj Dab'eset, tu'n tpon b'aj toju' a' ati tk'etz Jokneam. Tzajxtzuntl Sarid, xi'niju' nqach tu'me'l tjawetzq'ij tzmax Kyislot-tab'or, ex txi'xtl atzu', inik' toj Dab'erat tu'n tjapun tzmax Japiya.13Txi'xtl atzu', xi'niju' nqach toj tjawetzq'ij tu'me'l Gat-eper, inik' toj Ita-kasin ex in pon tzmax Rimon, tu'n tq'on welt Nea.14Toj tb'a'nq'ob'kya'j, inq'on weltju' nqach tzmax Anaton ex intoq nelpun toju' b'ya' Jepte-el.15Ate'toq kab'lajoj (12) nimaqtnam kyuk'i'lxi' kynajb'il toju' tx'otx' lu, aye' junjunju': Katat, Naalal, Simron, Idala ex B'elen.16Atzun tx'otx'ju' xi' kye junjun k'loj xjal kywitze'lilex kyib' kyxol tyajajil Sab'ulon, kyuk'i'lxi' nimaqtnam ex kojb'il. Kytx'otx' tnej tyajajil Isakar
17Aju' tkyaji'n tx'otx' jyonjtzti'j alqe makub'a' tz'aq, xiq'o'n kye junjun k'loj xjal kywitze'lilex kyib' kyxol tyajajil Isakar. Ate'toq qaqlajoj nimaqtnam kyuk'i'lxi' kykojb'il toju' kytx'otx', aye' ja'lu: Jesreel, Kyesulot, Sunem, Aparaym, Syon, Anaarat, Rab'it, Kyisyon, Eb'es, Remet, En-wanim, En-ada ex B'et-pases. Pomnixju' nqach toj Tab'or, Saasima ex B'et-semes, ex in pon b'aj toj nin a' Jordan. Atzun tx'otx'ju' xi' kye junjun k'loj xjal kwitze'lilexkyib' kyxol tyajajil Isakar, kyuk'i'lxi'ju' nimaqtnam ex kojb'il kyoj. Kytx'otx' tnej tyajajil Aser
24Aju' tjwe'yi'n tx'otx' jyonjtzjti'j alqe makub' tz'aqa', xiq'o'n kye junjun k'loj xjal kywitze'lilex kyib' kyxol tyajajil Aser, ate'toqju' nimaqtnam lu toj: Elkat, Ali, B'eten, Aksap, Alamelek, Amad ex Miseal, intoq ponx tzmax twi'ju' witz Karmelo ex Syor-lib'nat toj tkub'exq'ij.27Aju' nqach toj tjawetzq'ij inxi' tu'me'l tb'a'nq'ob'kya'j tzmax toj B'et-dakon, tu'n tmuje tuk'i'l kytx'otx' tyajajil Sab'ulon, exju' b'ya' Jepte-el, ex B'et-emek, ex Neyel, expe' xi'nix ti'jimix Kab'ul,28qu'mtzun ayilextoqju' Ab'don, Reob', Amon ex Kana, pomnix toju' nin nintnam Sidon.29Nq'on welttzuntz tu'me'l Rama, ex ponx toju' nintnam Tiro kuwsa'n, nxi'tzuntz toj Osa, tu'n telpun kanun toj Ninnjab' Mediteraney. Kyuk'i'l Maaleb', Aksib', Uma, Apek ex Reob', junaq kab'e' (22) nimaqtnam tu'n kykyaqil kyuk'i'lxi' kykojb'il. Atzun tx'otx'ju' xi' kyeju' junjun k'loj xjal kywitze'lilex kyib' kyxol tyajajil Aser. Kytx'otx' tnej tyajajil Neptali
32Aju' twaqaqi'n tx'otx' jyonjtz ti'j alqe makub'a' tz'aq, xi' kyeju' junjun k'loj xjal kywitze'lilex kyib' kyxol tyajajil Neptali.33Xi'nixju' kytx'otx' kyoju' tnam Elep, Elon-saananim, Adami-nekyeb' ex Jab'neel, tzmax toj Lakum, tu'n tpon toj Jordan.34Xi'niju' nqach toj tkub'exq'ij tu'me'l Asnot-tab'or, ex Ukok, qu'mtzun tnaqachtoqtib' tuk'i'lju' kytx'otx' tyajajil Sab'ulon toj tnayajkya'j, atzu'n toj tkub'exq'ij tuk'i'lju' kytx'otx' tyajajil Aser. Atzu'n toj tjawetzq'ij, intoq ponju' kytx'otx' tyajajil Neptali tzmax toj nin a' Jordan.35Aye' b'eljlajoj nimaqtnam ja'lu kuwsa'nqe' kyuk'i'lxi' kynajb'il xiq'o'n kye, aye': Sidim, Ser, Amat, Rakat, Sineret, Adama, Rama, Asor, Sedes, Edrey, En-asor, Iron, Mikdal-el, Orem, B'et-anat ex B'et-semes. Atzun tx'otx'ju' xiq'o'n kye junjun k'loj xjal kywitze'lilex kyib' kyxol tyajajil Neptali, kyuk'i'lxi' nimaqtnam ex kykojb'il. Kytx'otx' tnej tyajajil Dan
40Aju' twuqi'n tx'otx' jyonjtz ti'j alqe makub' tz'aqa', xiq'o'n kye junjun k'loj xjal kwitze'lilexkyib' kyxol tyajajil Dan. Ate'qe'ju' tnam toju' tx'otx' lu, aye': Sora, Estaol, Ir-semes, Saalab'in, Ayalon, Jetla, Elon, Timnat, Ekron, Eltekye, Kib'eton, B'aalat, Jewud, B'ene-b'erak, Gat-rimon, Mejarkon ex Rakon, tuk'i'lju' tx'otx' ati tu'me'l Jope.47Mixtzunti' kanunju' tx'otx' lu, qu'mtzun exi' tyajajil Dan q'ojil ti'ju' nintnam Lesem, kykub'lenxitzun kyb'yo'n kykyaqilju' najlqe' atzu', kub' kytzyu'nju' tx'otx'. Iktzu'n e'kub'a' ten najal toju' tnam lu, ex el kych'exb'e'n tb'i, okkyq'o'n tb'i Dan te ninb'ilteju' ojtxi' kyyajilb'en. Atzun tx'otx'ju' xiq'o'n kye junjun k'loj xjal kywitze'lilex kyib' kyxol tyajajil Dan, kyuk'i'lu' nimaqtnam ex najb'il. Tnej ttx'otx' Joswe
49Tb'ajlenxi' kysipa'n aj Israel tx'otx' kye junjun tnej kyyajajil, xikyq'o'n tetzb'il Joswe toju' tx'otx' xiq'o'n kye txqantl.50Kse'nxju' ojetoq tchaq' Qman Dyos, xiq'o'nju' nintnam Timnat-sera te, toju' tx'otx' nimaqk'ulile te Eprayin, qu'n a tqaniju'. Jawtzun tb'incha'n jumajtl Joswe nintnam ex najan toj.51Ayiletzun tx'otx'ju' lu xikyse'n Eleasar, Joswe exqe' nejenel toj tnam, kse'nxju' makub' tz'aq te junjun tnej kyyajajil aj Israel twitz Qman Dyos, ttziju' Ja te Mujb'ab'ltib'il, toj Silo. Ikytzu'n b'aj pa'yita' tkyaqilju' tx'otx'. Kyej kyq'o'n aj Israel nimaqtnam te kolb'il (Nm 35.6-34; Dt 4.41-43; 19.1-13)
1Tzaj tma'n Qman Dyos te Joswe ikjalu:
2Yolina kyuk'i'l aj Israel ex q'manxa kye tu'n kyjaw kysk'o'n nimaqtnam te kolb'il, kse'nx oje txinma'ne' te Moyses.3Qatzun ati jun xjal naq myanim makyim jun tu'n, ex myate xima'nju' tu'n, b'a'n tu'n t-xi' oq kloltetib' toj junju' nimaqtnam lu te jun twitze'lju' xkyim nqaku' ta', tu'n tq'onte tu'me'l t-xel.4Alkyete matxi' kloltib' toj junju' nimaqtnam lu, kpomel ttziju' nintnam ex kxe'l tchik'b'a'n kyeju' tijwnaq te nintnam. Aye'tzunkye kkyq'a' anb'il tu'n tokx ex kxel kyq'o'n jun najb'il te jatu'n tnajana'.5Qatzun matxi lpe twitze'lju' xkyim nqaku' ta' ti'j, lay tz'etz kyiq'i'n tijwnaqju' xjal ntklo'ntib' te, qu'n myate t-ximju' tu'ntoq tkub' tb'yo'n ex mya tu'nwt ti tq'oj tuk'i'l.6Kb'eltenju' xjal ntklo'ntib' toju' nintnam tzmax ajtok toj xjel kyu'n tnam, ex tzmax ajtkyimju' kynejel pale naq'unan toju' tq'ijlalil lu. B'a'ntzun tanjtz tja ex toju' ninttanam, chij.
7E'jawtzun kysk'o'n aj Israel nimaqtnam Kedes toj Kaliley, kywi' nimaq k'ul te Neptali, ex Sikyem kywi' witz te Eprayin, ex Kyiryat-arb'a, ax tb'iju' Eb'ron, kywi' witz te Juda, tu'n kyajb'en te kolb'il.8Atzu'n toj jun plajtl te Jordan, toj tjawetzq'ij te Jeriko, jaw kysk'o'n B'eser, kye tyajajil Rub'en; jaw kysk'o'n Ramot kye tyajajil Kad toj tx'otx' Kalaad; atzu'n toju' tx'otx' B'asan jaw ksk'o'n Kolan, kye tyajajil Manases.9Aye'tzun nimaqtnam ja'lu te kolb'il jaw kysk'o'n te kykyaqil aj Israel ex kye najchaq xjal najlqe' kyxol. Jatu'n tewana' xjal naq myanim makyim juntl tu'n, tu'n lalun tz'ok tu'me'l t-xel tu'n jun twitze'lju' xjal xkyim nqaku' ta', tu'n mikub'a' tb'yo'n qa na'mxtoq tok toj xjel kyu'n tnam. Nimaqkytanam aj Leb'i (1 Cr 6.54-81)
1Exi'ju' nejenel te junjun ja xjal aj Leb'i toj Silo, toju' tx'otx' te Kanaan, yolil tuk'i'lju' pale Eleasar, tuk'i'l Joswe ex kyuk'i'lju' nejenel kye tnej kyyajajil aj Israel. Atzuntzu' xa' kyma'na' kye: Tzaj tma'n Qman Dyos te Moyses, tu'n kytzaj q'o'n nimaqtnam qeye' jatu'n qnajane', kyuk'i'l tx'otx' te k'ik'leb'l kye qwakyixe', chechij.3E'xi'tzun kyq'o'n aj Israel junjun nimaqkytanam kye aj Leb'i kyuk'i'lxi' tx'otx' te k'ik'leb'l, kse'nxju' tzaj tma'n Qman Dyos.
4Tnejelxi'x jyetti'ju' alkye makub' tz'aq kye junjun tnej xjal kywitze'lilex kyib' tyajajil Koat. Xiq'o'n oxlajoj (13) nimaqtnam kye aj kyeat tyajajil pale Aaron, ju' kyetoq tnej kyyajajil Juda, Simeon ex B'enjamin.5Atzu'n kye txqantl aj kyeat xiq'o'n lajoj nimaqtnam kye, ju' kyetoq kyyajajil Eprayin, Dan ex kye nik'jan tyajajil Manases.6Ti'jxi'tzuntl ja'lu, xiq'o'n oxlajoj (13) nimaqtnam kye junjun k'loj aj Leb'i kywitze'lilex kyib' tyajajil Kerson, kse'nxju' kub' tz'aq tej tjyonjtz ti'j, ju' kyetoq kyyajajil Isakar, Aser, Neptali ex kye nik'jan tyajajil Manases ju' ati toj B'asan.7Atzu'n kye junjun k'loj aj Leb'i kywitze'lilex kyib' tyajajil Merari e'xiq'o'n kab'lajoj (12) nimaqtnam kye, ju' kyetoq kyyajajil Rub'en, Gad ex Sab'ulon.
8Xikypa'n aj Israel nimaqtnam ex tx'otx' te k'ik'leb'l, kse'nxtoq makub'a' tz'aq, kyxol aj Leb'i, kse'nx ojetoq tchaq' Qman Dyos te Moyses.9Aye' nimaqtnam ja'lu, xikyq'o'n kyyajajil Juda ex Simeon,10kyeju' junjun k'loj aj Leb'i kywitze'lilex kyib' tyajajil Koat, tzajniqe' ti'j Aaron, qu'n kye kub'a' tz'aq tnejilxi'x tej t-xise'n.11Xikyq'o'n Kyiryat-arb'a, axju' Eb'ron, toju' tx'otx' nimaqk'ulile te Juda, aju' nintnam nim toklen kye xjal nimaq kywe' tyajajil Anak, kyuk'i'lxi' tx'otx' te k'ik'leb'l.12Atzunju' txqantl tx'otx' ex najb'il teju' nintnam lu xiq'o'n te tetzb'il Kaleb', tk'wal Jepone.
13Tib'ajxi'tzuntl Eb'ron, ju' nintnam te kolb'il kyeju' makub' kyb'yo'n jun xjal, exi' q'o'ntlju' nimaqtnam lu kye tyajajilju' pale Aaron, aye': Lib'na,14Jatir, Estemoa,15Olon, Deb'ir,16Ayin, Juta ex B'et-semes. B'eljoj nimaqtnam kyuk'i'lxi' tx'otx' te k'ik'leb'l.17Aye'tzu'n tyajajil B'enjamin xikyq'o'n Gab'aon, Geb'a,18Anatot ex Almon, kyaje' nimaqtnam kyuk'i'lxi' kytx'otx' te k'ik'leb'l,19oxlajoj (13) nimaqtnam xiq'o'n kyeju' pale tyajajil Aaron tu'n tkyaqil, teyile junjun tuk'i'lxi' ttx'otx' te k'ik'leb'l.
20Atzu'n kyeju' junjun k'lojtl aj Leb'i kywitze'lilex kyib' tyajajil Kyeatqe', xiq'o'n nimaqkytanam ti'ju' kye tyajajil Eprayin.21Xiq'o'n Sikyem kywi' witz te Eprayin kye, te nintnam kolb'ilteju' makub' tb'yo'n jun xjal, exju' nintnam Keser,22Kyib'saym ex B'et-oron, kyaje' nimaqtnam kyuk'i'lxi'ju' kytx'otx' te k'ik'leb'l.23Aye' kyk'amju' kye tyajajil Dan: Eltekye, Kib'eton,24Ayalon ex Gat-rimon, kyaje' nimaqtnam kyuk'i'lxi' kytx'otx' te k'ik'leb'l;25atzu'n kyeju' nik'jan tyajajil Manases kyk'am kab'e' nimaqtnam, Taanak ex Gat-rimon, kyuk'i'lju' kytx'otx' te k'ik'leb'l;
26Lajoj nimaqkytanamju' txqantl k'loj xjal kywitze'lilex kyib' tzajniqe' ti'j Koat, kyuk'i'lxi' kytx'otx' te k'ik'leb'l.
27Atzu'n kye aj Leb'i tyajajil Kerson kab'e' nimaqkytanam xiq'o'n, ju' kyetoq nik'jan tyajajil Manases, kyuk'i'lxi'ju' kytx'otx' te k'ik'leb'l: Kolan, toj tx'otx' B'asan, tu'n tajb'en te nimaqtnam te kolb'il, ex B'eestera.28Atzu'n ti'ju' kye Isakar xiq'o'n Sison, Dab'erat,29Jarmut ex Enkanim, kyaje' nimaqtnam kyuk'i'lxi'ju' kytx'otx' te k'ik'leb'l.30Atzu'n ti'ju' kye Aser xiq'o'n Misael, Ab'don,31Elkat ex Reob', kyaje' nimaqtnam kyuk'i'lxi'ju' kytx'otx' te k'ik'leb'l.32Ti'ju' kye Neptali xiq'o'n oxe' nimaqtnam kye kyuk'i'lxi'ju' kytx'otx' te k'ik'leb'l: Sedes, toj Galilea, tu'n tajb'en te nimaqtnam te kolb'il, Amot-dor ex Kartan;33oxlajoj (13) nimaqtnam tuk'i'lile kytx'otx' te k'ik'leb'l xiq'o'n kye junjun k'loj aj Kerson kywitze'lilex kyib'.
34Atzu'n kye aj Leb'i na'mxtoq t-xi' q'o'n kytx'otx', aye' tyajajil Merari: xiq'o'n kytx'otx' ti'ju' kye tyajajil Sab'ulon: aye' Jokneam, Karta,35Dimna ex Naalal, kyaje' nimaqtnam kyuk'i'lxi' kykojb'il te k'ik'leb'l.36Ti'ju' kye Rub'en xiq'o'n B'eser, Jaas,37Kademot ex Mepaat, kyaje' nimaqtnam kyuk'i'lxi'ju' kytx'otx' te k'ik'leb'l.38Ti'ju' kye Gad xiq'o'n Ramot te Kalaad, tu'n tajb'en te nintnam te kolb'il, Maanaym,39Esb'on ex Jaser, kyaje' nimaqtnam kyuk'i'lxi' kytx'otx' te k'ik'leb'l,40kab'lajoj (12) nimaqtnam xiq'o'n kye junjun k'loj aj Leb'i kywitze'lilex kyib' na'mxtoq t-xiq'o'n kytx'otx', aye' tyajajil Merari.
41Kab'naq wajxaq (48) nimaqkytanam aj Leb'i xiq'o'n toju' kytx'otx' aj Israel, teyile junjun kyuk'i'lju' kytx'otx' te k'ik'leb'l,42ju' ati ti'jile junjun nimaqtnam. Ayiletzu'n ti'j junjunju' nimaqtnam lu. Njapunte Qman Dyos tyol
43Iktzu'n xa'tq'o'na Qman Dyos tx'otx' kye aj Israel ojetoq ttziya kye ojtxi' kyyajilb'en, e'kub'tentzuntz ex e'kub'najan atzu'.44Japunte Qman Dyos tyol tu'n, ex tzaj tq'o'n nak'b'il toj tkyaqilju' tx'otx'. Mixti' e'xkyeju' kyajq'oj kyi'j, qu'n e'kanb'an tu'n Qman Dyos.45Mixti' jun yol miwtjunti' japun ti'j tkyaqilju' yol ojetoq tma Qman Dyos tu'n tb'inchante kye aj Israel. Anjkyi'j kyyajajil Rub'en, Kad ex nik'jan tyajajil Manases
1E'tzajtzun ttxko'n Joswe kyyajajil Rub'en, Gad exqe'ju' nik'jan tyajajil Manases,2ex xitma'n kye: Matxi' japun tkyaqilju' kyejtma'n Moyses tmajin Qman Dyos kyu'ne', ex matxi kyb'incha'nju'ye' xnchaq'e' kyeye'.3Mixpena'ti' ẍe kyej kytzaqpi'ne' kyitz'ine' toj tkyaqilju' matxi' tzajxi' tzmax ja'lo, ex matxi' che japun tchaq'b'il Qman Dyos kyu'ne'.4Matxina' japunju' tyol ja'lo, ex matxi' che tenju' kyitz'ine' toj nak'b'il, qu'mtzun kukyanje' kyjaye' toju' kytx'otx'e' xitq'o'n Moyses, ju' tmajin Qman Dyos, toj tjawetzq'ij te nin a' Jordan.5O'kxwe' kxe'l nma'n kyeye', japunxju' chaq'b'il ex kawb'il xitma'n Moyses kyeye', ju' tmajin Qman Dyos, kyk'u'jlame' Qman Dyos, che b'ete' kukxju' toju' tb'e ex kynimanxju'ye' tchaq'b'il, che lpeke' ti'j ex che ajb'ene' te tu'n tkyaqil kyk'u'je' ex tu'n tkyaqil kyanmiye', chi Moyses kye.
6Tb'ajlenxi'tzun ja'lu, xitqani'n Joswe ky'i'wb'il kyib'aj ex exi tchq'o'n, exi'tzuntz kyja.
7Ojetoq txi' tq'o'n Moyses kytx'otx'ju' nik'jan tyajajil Manases, toju' tx'otx' B'asan. Aye'tzu'n nik'jantl, xitq'o'n Joswe kytx'otx' kyxol aj Israel toj tkub'exq'ij te nin a' Jordan, aye'tzunju' nik'jan tnejel e'kub' tky'i'wla'n ex exi' tchq'o'n tu'n tanjkyi'j.8Ex xitma'n kye: Kutanj kyi'je' ja'lo toju' kytx'otx'e' tuk'i'l txqan kyq'inumale' ex txqan kyalune', q'anpwaq, saqpwaq, q'ank'uxb'il ex k'uxb'il, ex nim txqan kyi'je'. Kyaq'punku'ye' selkyiq'i'ne' kyeju' ajq'oj kyxole', chij kye.
9Iktzu'n ela' kypa'n kyib'ju' kyyajajil Rub'en, Kad ex nik'jan tyajajil Manases kyi'j aj Israel toj Silo, toj tx'otx' Kanaan, tu'n tanjtzkyi'j toju' kytx'otx' toj Kalaad, kse'nx ojetoq tma Qman Dyos te Moyses. Q'olb'eb'l tk'etz nin a' Jordan
10Tej kyponju' tnej kyyajajil Rub'en ex Kad, exju' nik'jan tyajajil Manases, ttzi nin a' Jordan, jaw kyb'incha'n jun nin q'olb'eb'l ttzi nin a' toj kytx'otx'toqx aj Kanaan.11Pon tqanil kye txqantl aj Israel qa matxitoq jaw kyb'incha'n kyyajajil Rub'en, Kad ex nik'jan tyajajil Manases jun q'olb'eb'l toju' nqach te Kanaan, ttzi Jordan, toj kytx'otx' aj Israel;12Naqtzun inb'aj kyb'i'n aj Israel, b'aj kyb'u'yi'n kyib' toj Silo tu'n kyxi' q'ojil kyi'j.13Xikychq'o'npun Pinees, tk'walju' pale Eleasar, tu'n t-xi' Kalaad, jatoq ta'qe' kyyajajil Rub'en, Kad ex nik'jan tyajajil Manases.14Ex exi' lajoj nejenel tuk'i'l aye' nimaq kyoklen kyxol aj Israel, teyile junjun chq'o'n kyu'n twitze'l ex ja tzajna' tyajajil.15Eb'ajx kykyaqil toj Kalaad, jatoq ta'qe' kyyajajil Rub'en, Kad ex nik'jan tyajajil Manases, ex xikyma'n kye:
16—Maqo tzaje' yolil toj tb'i ttanam Qman Dyos. ¿Titiqu'n xjawa' kyiq'ina'kyib'e' ti'j Qman Dyos? ¿Tiqu'n xkyaja' kytzaqpi'ne', ex majaw kyi'nkyib'e' ti'j tu'nju' majaw kyb'incha'ne' jun q'olb'eb'l?,17¿Ma myatzun nin ilju' tb'incha Peor, extzun atixpena' qil tu'n ja'lo ex ma myatzun nim e'kyim tu'ntpaj?18¿Ma mitzunya nimju' il matxi' b'inchet, extzun kyajb'iltlkye' tu'n tel kypa'n kyib'e' ti'j Qman Dyos? Qatzun matz'elkypa'n kyib'e' ja'lo ti'j Qman Dyos, ktzajel ttx'u'jil Qman Dyos najchi'j kyi'j tkyaqilju' tnam Israel.19Qatzun tz'ilju' tx'otx' xxiq'o'n kyeye' lu toj kwitze', kukytzaje' toju' ttx'otx' Qman Dyos, jata' ja xjan. Kytzyume' jun tnej tx'otx' ti'ju' qe'. Naqtzun a lalun jaw kyiq'i'n kyib'e' ti'j Qman Dyos ex qi'je', tu'nwt tjaw kyb'incha'n juntl q'olb'eb'le' ti'jxi' q'olb'eb'l te Qman Dyos.20Kyna'ntzpe'ye' ti'ju' tb'incha Akan, tk'wal Sara, b'inchan il tu'nju' kyej tpa'n junjun q'ma'ntoq tu'n tkub' xitet, tu'ntzun tpaj tzaj ttx'u'jil Qman Dyos kyi'j tkyaqilju' tnam. ¡Ex myanoq o'kxte kyim tu'n tpaju' til!, chechij kye.
21Aye'tzunkye kyyajajil Rub'en, Kad ex nik'jan tyajajil Manases xikytzaq'we'n kyeju' nejenel kye aj Israel:
22—B'i'nxi'x tu'nte' Qman Dyos nim toklen kyib'aj txqan dyos qa min xjaw qb'incha'ne' q'olb'eb'l lu tu'nwt qpi'sale' mujqa tu'nwt tel qpa'nqib'e' ti'j. B'i'nte' tu'n ex kxe'l tma'n kyeye'; qatzun tu'n qpi'sale' ¡qo' tb'yonku'ya!23Qatzun naq tu'n tel qpa'nqib'e' ti'j Qman Dyos xjawa' qb'incha'ne' q'olb'eb'l lu, mujqa tu'n tkub' qq'o'ne' chojb'il k'ok'j, oyaj twitz awal k'ok'e'kywitz mujqa chojb'il te b'inchjtib'il, axwit Qman Dyos kub' tz'e'ysante qwitze'.24Majaw qb'incha'ne' qu'n min qajb'ile' tu'n tpon jun q'ij tu'n ttzaj kyma'n kyk'wale' kye qk'wale': ¿Ti'kye' kyoklen ti'j Qman Dyos?25Makub' tq'o'n Qman Dyos Jordan qxol, aye'ye' kyyajajil Rub'en ex Kad. Mixti'kye kyoklen ti'j Qman Dyos, chechiwt. Jakutzun kyb'inchaju' kyk'wale' tu'n lalun che nimantlju' qk'wale' te Qman Dyos.26Qu'mtzun makub' qxima'ne' tu'n tjaw qb'incha'ne' jun q'olb'eb'l, mya tu'n tkub' q'et chojb'il k'ok'sb'il twitz Qman Dyos mujqa junjuntl chojb'il,27te jun tziyb'ilte' qxol, ex kyxol qyajajil, qa b'a'n tu'n qajb'enqe' te Qman Dyos ex tu'n qpone' twitz kyuk'i'l chojb'il k'ok'sb'il, ex chojb'il tu'n tpaj il ex te b'inchjtib'il. Tu'ntzun lalun txikyma'n kyyajajile' kyeju' qyajajile': Mixti'kye' kyoklen ti'j Qman Dyos, chechiwt.28Kub' qxima'ne' qa a'lo' jun matzaj q'mante ja'lu qeye' mujqa kye qyajajile', b'a'n tu'n t-xi' qtzaq'we'ne' kye: ¡Kyka'yinxe'! Jaw kyb'incha'n ojtxi' qyajilb'enju'ye' q'olb'eb'l lu te Qman Dyos, te jun tziyb'il kyxolju' qyajajile' kyuk'i'lju' kyyajajile' ex mya tu'n tkub' q'et chojb'il tib'aj, qo chiku'ye'.29Awt Qman Dyos klonqe'ye' tu'n mijawa' qi'nqib'e', mujqa tu'n tel qpa'nqib'e' ti'j, tu'nwt tjaw qb'incha'ne' juntl q'olb'eb'l tu'n tkub' q'et chojb'il mujqa oyaj twitz awal k'ok'e'kywitz, mujqa junjuntl chojb'il, ti'jxi'ju' q'olb'eb'l ati twitzju' ja xjan, chechij kye.
30Tetzunj kyb'inteju' pale Pinees, exqe' nejenel toj tnam exqe' nejenel kye junjun k'loj kywitze'lilex kyib' lepchqe'toq ti'j, ti'ju' kyma kyyajajil Rub'en, Kad ex nik'jan tyajajil Manases, b'a'n ela' toj kywitz.31Xi'tzun tma'n Pinees, tk'walju' pale Eleasar kye:
—Q'uqli qk'u'je' ja'lo qa ati Qman Dyos quk'i'l, qu'n minti' xkub' kyximane' tu'n tjaw kyi'nkyib'e' ti'j, ex tu'nju' lu maqoklete' kyu'ne' teju' tz'e'ysb'il witzb'aj tu'n Qman Dyos, chechij.32Tb'ajlenxi'tzun ja'lu, e'anj Pinees kyuk'i'lju' exi' tuk'i'l, e'etz toju' tx'otx' Kalaad tu'n kyxi' Kanaan, jatoq ta'qe' txqantl aj Israel. Tetzunj t-xikyma'n kyeju' ate'toq Kanaan ti'ju' kyma junjun tnejtl kyyajajil,33b'a'n ela'ju' tzaq'web'l toj kywitz, ex jawkynima'n Qman Dyos. Atxi'xtzunj mixti' e'yolintl tu'n kyq'ojin kyi'j kyyajajil Rub'en ex Kad, mujqa tu'nwt tkub' kyxitu'nju' kytx'otx'.34Aye'tzu'n kyyajajil Rub'en ex Kad okkyq'o'n tb'iju' q'olb'eb'l Tziyb'il, qu'n kyma: Aju' q'olb'eb'l lu k'okyel te jun tziyb'il qxole' qa ate Dyos Manb'aju' Dyos, chechij. Yolin Joswe teju' tnam
1Matxi'toqtzun b'et ab'q'i ttzajlen tq'o'n Qman Dyos nak'b'il kye aj Israel kyuk'i'l kyajq'oj, ex tej matxi'toq tijin Joswe,2e'ttxok Joswe kykyaqilju' aj Israel kyuk'i'l tijwnaq, e'nejenel, e'ajkawil exqe' nejenel kye xjal te q'oj, ex xitma'n kye:
Matxi' chin tijinwe', ex matxi' chin kub'e' tu'nju' wab'q'iye'.3Matxi' kyilxi'ye' tkyaqilju' matxi' tb'incha Qman Dyos kyi'ju' tnam intoq che q'ojin kyi'je', ate matxi' q'ojin te kyxele'.4Ayine' ẍinx pa'nte tkyaqilju' tx'otx' lu kse'nxju' makub' tz'aq teyile junjun kyyajajile'. Exi' npa'nju'ye' tnam na'mxtoq tkub'kyi'j ex myanoq o'qe'kxju' tnam matxi'toq kub'kyi'j, tzajx tk'etzju' nin a' Jordan toj tjawetzq'ij ex ponx ttziju' Mediteraney toj tkub'exq'ij.5Che elix t-xla'ja'nte Qman Dyosu' najlqe' toju' tx'otx', aye'tzunkye' che tzyulte, kse'nxju' oje tma Qman Dyos.
6Kyq'onk tilile' tu'n tjapun tkyaqilju' ntma'n toj tu'jil tkawb'il Moyses; japunx kyu'ne' kse'nxju' tz'ib'a'n.7Lalun txi' kysmo'n kyib'e' kyuk'i'lju' txqantl xjal najlqe'x kyxole'. Lalun che k'ulune' kyeju' kydyos, ex lalun che'x kyb'i'ne'; expe' lalun tzaj kyna'ne' kyb'iju' kydyos, kse'n matxi' kyb'inchaxi'ye', ex lalun kyma jun kyole' toj kyb'i.8Che lpeke' ti'j Qman Dyos kukxju', kse'nxju' matxi' kyb'inchaxi'ye'.9Matxi' che ex t-xla'ja'nte Qman Dyos nimaq ex kuw tnam lu kywitze', expe' mix-a'lo'te matxi' xkye kyi'je' toju' tq'ijlalil matxi' tzajxi'.10Naqpe' tu'n junkye' che b'el oq kab'k'al lajnaq (1,000) twitz, qu'n aku'te Qman Dyos inq'ojin te t-xel, kse'nxju' oje ttziya.11Qu'mtzun, kyka'yinx kyib'e' ex kyk'u'jlame' Qman Dyos.12Qu'n wajb'ile' tu'n kyb'inteju'ye' lu: qama tz'el kypa'n kyib'e' ti'j Dyos exqa matxi kysmo'n kyib'e' kyuk'i'lju' xjal lu ate'x kyxole', exqa mache mjeye', lay che el t-xla'ja'n te Qman Dyos tnam lu kywitze', okpe' che ajb'el tu'n te xpatxab' tu'n kykub' tz'aqe', ex che ajb'el te asyal kytze'lkyi'je', naku'j ch'i'x toj kywitze', tzmax ajkyb'aje' kykyaqile' tu'n lalun kyejten jun toju' tb'anil tx'otx' lu matxi' tzaj tq'o'n Qman Dyos kyeye'.
14Awe' naqch'inxtl nkyime', naq o'kx wajb'ile' tu'n kyokslanteye' tu'n tkyaqil kyk'u'je' qa matxi' che japun tkyaqilju' ti'xti' tb'anilqexi'x kyej ttziya'n Qman Dyos kyeye'. Mixti' jun miwtjunti' xjapun.15Ikxi'xtzu'n kse'n ẍe japuna' tkyaqilju' b'a'n kyej ttziya'n Qman Dyos, tzula' chukchaq yajb'ilkyeye', tzmaxi'j aj kyb'aje' kykyaqile' tu'n mikyaja' jun toju' tb'anil tx'otx' tzaj tq'o'n kyeye',16qa min xjapunju' tyol kyu'ne' ju' kyej b'entti'j. Qama che k'ulune' kye junjuntl dyos, exqa mache kub' mejeye' kywitz, ktzajelte Qman Dyos ttx'u'jil kyi'je', ex lwiyxi'xtzun che najele' tu'n toju' tb'anil tx'otx' tzaj tq'o'n kyeye', chij kye. Mankb'il tyol Joswe
1E' b'aj tb'u'yi'n Joswe kykyaqilju' tnej tyajajil Israel toj Sikyem. E tzaj ttxko'nju' tijwnaq, nejenel, ajkawil ex nejenel kye xjal te q'oj, xitma'ntzuntz te tkyaqilju' tnam twitz Qman Dyos kjalu:
—Chi Qman Dyos intma'n:
Intoq che k'ulun Tare ojtxi' kyuk'i'lju' tk'wal, aye' Ab'raam ex Nakor, ju' ojtxi' kyyajilb'ene', kye junxi'tl dyos, tej najlqe'toq ttziju' nin a' Ewprates.3Ttzitzunju' nin a' Ewprates tzaja' wiq'i'ne' Ab'raam, ex b'aj b'et wu'ne' toj tkyaqilju' tx'otx' Kanaan. Chmet kyb'aj wu'ne', ex a tnejel tk'walju' tzaj nq'o'ne' Isaak,4atzunte Isaak tzaj nq'o'ne' kab'e' tk'wal, Jakob' ex Esawu. Xinq'o'ne' tx'otx' nimaqk'ulile te Seyir te Esawu, atzunte Jakob' exi' toj Ejipt.5Xinchq'o'ntzun Moysestze' ex Aaron, ex e'nk'ixb'saye' aj Ejipt tu'n kamik, tzmax kyb'je'tze' wu'ne' atzu'.6Tetzunj kyb'je'tzju' ojtxi' kyyajilb'ene' Ejipt, e'tzalpe aj Ejipt kyuk'i'l kykarwaj te q'oj ex e'chej, e'ponx ttziju' Kyeq Ninnjab'.7E'txokon weye', kub'tzun nq'o'ne' jun nim qlolj kyxol kyuk'i'l aj Ejipt, ex nb'inchaye' tu'n ttzajniq'ju' a' kyib'aj aj Ejipt ex tu'n kykyaj naj tjaq'. Aye'ku'ye' tziyal ti'ju' nb'inchaye' toj Ejipt.
Yajxi'tzuntel nimtoj tq'ijlalil e'tene' toj chq'ajlaj,8tzmax kyule' wu'ne' toj kytx'otx' amorey, toj tjawetzq'ij te nin a' Jordan. E'q'ojin kyi'je', e'kub'tzun nq'o'ne' toj kyq'ob'e', ex kub'kyi'j kyu'ne' ex kub' kytzyu'ne' kytx'otx'.9Yajxi'tzuntel ul B'alak, tk'wal Sipor, nimaqkawil kye moab' q'ojil kyi'je'. Xi'tchq'o'n B'alak tjoyli B'alaam, ju' tk'wal B'eor, tu'n tul qanil taq'wixil kyib'aje'.10Ayintzunwe' mixti' waje' tu'n tqaninte B'alaam taq'wix kyib'aje', ape' tb'inchaju' e k'iwlanjtze' tu'n. Iktzu'n e' kleta'ye' wu'ne'.11E' jlajintzuntze' toj nin a' Jordan ex e'pone' tzmax Jeriko. Aye'tzunju' najlqe'toq Jeriko (amorey, peresey, aj Kanaan, itit, jerjesey, eb'ey ex jeb'usey) e'q'ojin kyi'je', ayintzunwe' nb'inchaye' tu'n tkub'kyi'j kyu'ne'.12Aye'tzunju' kab'e' nimaqkawil amorey mixti' kub'kyi'j kyu'ne' tu'n k'uẍtx'e'nb'il mujqa tu'n smaj, ayinku'we' ẍin okq'onte xob'il kyi'j, qu'mtzun e'kub' oq kywitze' na'mxtoq kypone'.13Xinq'o'ne' kytx'otx'e' ju' myaye'ye' e'kub' aq'unante ex nimaqkytaname' ju' myaye'ye' e'jaw b'inchante. Atzu'n ja'lo najlqe'ye' toj, ex inche lo'n ub'aye' ex twitz olib'o ju' mya'ye'ye' eku'x awante, chij, chi Dyos, chij.
Ex tmatl Joswe:
14—Qu'mtzun, tu'n tkyaqil ja'lu, che nimane' te Qman Dyos ex che ajb'ene' te tu'n tkyaqil kyk'u'je'. Kypa'mil kyib'e' kyi'ju' dyos jae'k'uluna' ojtxi' qyajilb'en ttziju' nin a' te Ewprates ex toj Ejipt.15Qatzun min kyajb'ile' tu'n kyajb'ene' te Qman Dyos, kyximanku'ye' ja'lo alqe che ajb'ela'ye': qa kyeju' dyos ja e'ajb'ena' ojtxi' qyajilb'en ttzi nin a' Ewprates, mujqa kye kydyosju' amorey najlqe' toju' tx'otx' lu. Ayinwe' kyuk'i'lju' toj njaye' qo ajb'elqe' te Qman Dyos, chij.
16Kymatzun tnamtz: ¡Miwt taja' Qman Dyos tu'n tkyaj qtzaqpi'ne' tu'n qajb'ene' kye junxi'tl dyos!17Ana'te' Qman Dyos setz q'inqe exqe' ojtxi' qchman toj Ejipt, jata'qotoq te k'a'yi'nmajin. Ate b'inchante nim b'a'nq'ob'aj qwitz, ex ate klonqe ex xq'uqinqe toju' qb'e tej qik' kyxol txqan tnam.18Ate el q'inkye kykyaqilju' tnam ate'toq toj qb'e, exqe' amorey najlqe'toq tzalu. Qu'mtzun, ikxqe' qo ajb'ele' te Qman Dyos tu'n tkyaqil ja'lu, qu'n ana'te Qdyos, chechij.
19Atzunte Joswe xitma'n kye:
—Lay b'antkye' kyajb'en te Qman Dyos, qu'n xjan te toklen ex xky'aqlil, lalun naq ka'yin ti'ju' kypi'sale' ex kyile'.20Qama kyej kytzaqpi'ne' exqa mache ajb'ene' kye junxi'tl dyos, ktzajel tq'o'n taq'wixil kyib'aje', ex che kb'el najsa'ne' tu'n maskye nim b'a'n matxi' tb'incha kyeye', chij.
21Xi'tzun kytzaq'we'nju' tnam te:
—Lalun b'ajte' ikju'. Qo' ajb'elqe' te Qman Dyos, chechij.
22Tmatzun Joswetz:
—Aye'xe' tziyal kyi'je' qa matxi' jawkysk'o'ne' tu'n kyajb'ene' te Qman Dyos, chij.
—Ayo'ye', chechij xikytzaq'we'n.
23Xitma'ntl Joswe kye: —Kyiq'imilna'ju'ye' txqantl dyos ate' kyxole', ex kutanjtz kyi'je' tu'n tkyaqil kyk'u'je' tk'etz Qman Dyos, chij.
24Atzunju' tnam xittzaq'we'n:
—Kqo ajb'elqe' te Qman Dyos, ex kqb'incha'qe' ti' matma, chechij.
25Tojxju' q'ij lu, kyej b'entti'j jun yol tu'n Joswe tuk'i'lju' tnam toj Sikyem, ex eb'ajx tq'o'n kawb'il ex nuk'b'il kye,26ex eku'x ttz'ib'a'n toju' tu'jil tkawb'il Qman Dyos. Yajxi'tzuntel tzaj tiq'i'n jun nin ab'j ex kub' tq'o'n tjaq'ju' k'ol atitoq toju' ja xjan te Qman Dyos,27ex xitma'n kye tkyaqilju' tnam:
—Aju' ab'j lu k'ajb'el te jun tziyb'il qe, ti'j tkyaqilju' matxi' tma Qman Dyos qe. K'okyel te jun tziyal kyi'je', tu'ntzun lalun che oke' xmletz' twitz Qman Dyos, chij.
28Exi' tchq'o'ntzun Joswetz teyile junjun toju' kytx'otx'. Kyim Joswe (Jue 2.6-10)
29Tb'ajlenxi'tzun jte' q'ij o'kx tkyim Joswe tk'wal Num, ju' tmajin Qman Dyos, tetoq jo'naq lajoj (110) ab'q'i.30Ku'x mqu'n toju' ttx'otx' toj Timnat-sera, ju' ati kywi'ju' witz te Eprayin, toj tb'a'nq'ob'kya'j teju' witz Gaas.31E'ajb'en aj Israel te Qman Dyos tej itz'toq Joswe, ex ikx itz'qe'xtoqju' tijwnaq kanlitoq kywitz titi' tb'incha Qman Dyos kyu'nel aj Israel. Ku'x kymqu'n aj Israel tb'aqil Jse
32Ku'x kymuqu'n aj Israel tb'aqil Jse toj Sikyem, ju' tzajni kyiq'i'n Ejipt, toju' tx'otx' tloq' Jakob' tu'n jo'naq (100) medi saqpwaq kye tk'wal Amor, tman Sikyem, aju' tx'otx' xiq'o'n te kyetzb'il tyajajil Jse yajxi'tl. Kyim Eleasar
33Tej tkyim Eleasar, tk'wal Aaron, ku'x mqu'n twi' ttxa'nwitz te Pinees ju' tk'wal, ju' xiq'o'n te kywi' witz te Eprayin.

Bible Society in Guatemala

https://app.library.bible/content/aea9d9099feb3a24

expand_more
chevron_left前の章
chevron_right次の章