Read Jueces 1

Jueces1

Tzyet Adonisedek kyu'n kyyajajil Juda ex Simeon

¹Tkyimlenxi' Joswe, xikyqani'n aj Israel te Qman Dyos tu'n kyb'inte alkye kyyajajil b'a'n tu'n tq'ojin nejtl kyi'ju' aj Kanaan.²Tzaj ttzaq'we'n Qman Dyos qa a Juda b'a'n tu'n tq'ojin tnejel, ex te Juda tu'n t-xa' q'ona'ju' tx'otx' lu.³E' ttxoktzun tyajajil Juda tyajajil Simeon, tu'n kymujb'ante kyib' kyuk'i'l ex tu'n tkub'ti'ju' tx'otx' kyu'nju' tetoq Juda, ex tu'n kyxi' junx q'ojil tuk'i'l Simeon tu'n tkub'ti'ju' tx'otx'ju' tetoq Simeon. Kub' toj kywitzju' tyajajil Simeon tu'n kymujb'antekyib' kyuk'i'lju' tyajajil Juda,⁴Iktzu'n kub'a' ti'ju' kytx'otx' aj Kanaan ex kytx'otx' peresey kyu'n tyajajil Juda, ju' exi' tq'o'n Qman Dyos toj kyq'ob'. Atzu' kub'a'kyi'j junmutx' jo'k'al (10,000) kyu'n toj B'esek, kyxoltzun ja'lu ta'toq Adonisedek.⁶Tuk'i'lxi'petzunj kub' oq Adonisedek, kub'nelti'j kyu'n, el kyjonju' tman twi'tq'ob' kykab'il exqe'ju' tman twi'tqan.⁷Tmatzun Adonisedek kjalu: El njone' tman twi'kyq'ob' ex tman twi' kyqan oxnaq lajoj (70) nimaqkawil ojtxi', ex e'kub' nq'o'ne' walteju' nwab'e'ne' intoq kub' tz'aq tjaq' nmese'. Atzu'n ja'lo matxi' tb'incha Dyos weye' kse'n nb'inchaye' kye, chij. Xi'tzun kyiq'i'ntz Jerusalen, atzuntzu' kyima'. Kub'ti'j Eb'ron ex Jerusalen kyu'n tyajajil Juda

⁸E'q'ojinju' tyajajil Juda ex kub'ti'j Jerusalen kyu'n, kyb'aj kub'lenxi'tzun kyb'yo'n kykyaqilju' xjal najlqe' atzu' tu'n k'uẍtx'e'nb'il, kub' kytz'e'ysa'n nintnam.⁹E xi'tzuntz q'ojil kyi'ju' aj Kanaan najlqe'toq kyoj nimaq k'ul, toju' tx'otx' Nekeb' ex toju' plan tx'otx'.¹⁰Ex exi' q'ojil kyi'ju' aj Kanaan toju' nintnam Eb'ron, ju' Kyiryat-arab'a toq tb'i nejtl, ex kub'kyi'ju' Sesay, Ayman ex Talmay kyu'n. Kub'ti'ju' tnam Deb'ir tu'n Otonyel ex ok Aksa te t-xu'jil (Jos 15.15-19)

¹¹Exi'tzuntz q'ojil ti'ju' nintnam Deb'ir ju' Kyiryat-seper toq tb'i nejtl.¹²Ttziyatzun Kaleb' qa alkye makub'ti'ju' tnam Deb'ir tu'n, oktoq kxe'l tq'o'n Aksa ju' tmyal te t-xu'jil.¹³A Otonyel tk'wal Senas ju' titz'in Kaleb' kub'ti'ju' tnam tu'n; xitq'o'ntzun Kaleb'tz Aksa ju' tmyal te t-xu'jil Otonyel.¹⁴Atzunj tponju' Aksa tk'etz Otonyel, kub'ti'j tu'n Otonyel tu'n t-xi' tqani'n ttx'otx' te tman. Tetzunj tka'yinte Kaleb' intoq ku'tzju' Aksa tib'aj tb'ur, xitqani'n te: ¿Ti'tzu'n in b'ajteya? Chij.

¹⁵—Wajb'ile' tu'n ttzaj tq'o'na jun ti'xti' weye', matxina' tzaj tq'o'na ntx'otx'e' toj Nekeb', ex ikx q'onqe'tza t-xiklil a' weye', chi tij xittzaq'we'n.
Ku, chi Kaleb', exi' tq'o'n t-xiklil a' te jawtl exqe'ju' te kub'l te. Kub'ti'j kytx'otx' tnej kyyajajil Juda ex B'enjamin

¹⁶E' b'je'tzju' tyajajil Ob'ab', tyajajil tji Moyses, aj Kyenitqe', toju' nintnam Tqan Tut tb'i kyuk'i'lju' tnej tyajajil Juda, exi'tzuntz toj chq'ajlaj te Juda toj tnayajkya'j te Arad, jae'kyaja'ten najal kyuk'i'lju' najlqe' atzu'.¹⁷E'xi'tzu'n tyajajil Juda kyuk'i'l tyajajil Simeon, kse'nx ojetoq kyej b'entti'j kyu'n, ex e'q'ojin kyi'ju' aj Kanaan najlqe'toq Sepat, majxkub' xitju' nintnam lu kyu'n. Qu'mtzun oka' q'on tb'i Orma.¹⁸Aye'tzunju' tnam Kasa, Askalon ex Ekron, minti' kub'kyi'j kyu'n, exqe'ju' tx'otx' kytx'u'kyile.¹⁹Tuk'i'lxipetzunj atitoq Qman Dyos kyuk'i'lju' tyajajil Juda, ex kub'kyi'ju' tx'otx' kywi' nimaq witz kyu'n, minti' b'ent kyexju' najlqe'toq toj chq'ajlaj kyu'n, qu'n ate'toq kykarwaj k'uxb'ilqe'.²⁰Te Kaleb' xa' q'o'na' Eb'ron, kse'nxju' ojetoq ttziya Moyses te, atzunte Kaleb' eb'jik' t-xla'ja'nju' oxe' tk'wal Anak.²¹Aye'tzunju' tyajajil B'enjamin min b'ant kyexju' jeb'usey najlqe'toq toj Jerusalen kyu'n. Qu'mtzun majx e'kyaj najan jeb'us junx kyuk'i'lju' tyajajil B'enjamin toj Jerusalen. Kub'ti'ju' tnam B'etel kyu'n tnej tyajajil Jse

²²B'entti'j kyu'nju' tyajajil Jse tu'n kyxi' q'ojil ti'j B'etel, ju' Lus toq tb'i, exi' kychq'o'n jte' ichan ka'yilteju' nintnam lu. Oni'n qe'toq tu'n Qman Dyos.²⁴Kyiltzu'n nenul jun ichan ntoq etz toju' nintnam, ex xikyma'n te kjalu: Qama tzaj tma'na qeye' se'ntaq'wi tu'n qokx toju' nintnam, qo okyele' b'a'n xjal teya, chechij.²⁵B'a'natzun, chiju' ichan, xitma'n kye kse'n tu'n kyokxa' toju' nintnam, eb'ajkub' kyb'yo'ntzuntz kykyaqilju' najlqe'toq atzu' tu'n k'uẍtx'e'nb'il, atzunju' xiyek'unte kyokex exqe'ju' toj tja min e'kub' kyb'yo'n.²⁶Atzunju' ichan lu xi' toju' kytx'otx' tyajajil Et ex tb'incha jun ak'a'j nintnam, ex oktq'o'n tb'i Lus, ex majx kyej tenju' b'iyj lu. Min kub'kyi'j txqantl nimaqtnam kyu'n kyyajajil Manases ex Eprayin

²⁷Mixti' b'ent kyexju' xjal najlqe'toq kyoj B'et-sean, Taanak, Dor, Ib'leam, ex Mewido kyu'nju' tyajajil Manases, exqe'ju' najlqe'toq kyoju' kojb'il nqayin kyk'etzu' nimaqtnam lu, qu'mtzun e'kyajx najantlju' aj Kanaan kyxol.²⁸Tetzunj ttenxi'x kyipumal aj Israel, e'okkyq'o'n aj Kanaan toj kuw aq'untl, ex min b'ent tu'n kyex kyxla'ja'n.

²⁹Ex mixti' b'ent kyexju' aj Kanaan najlqe'toq Kyeser kyu'nju' tyajajil Eprayin, qu'mtzun e'kyajx najantl kyxol. Kub'kyi'j txqantl tnam

³⁰Ex ikx mixti' b'ent kyexju' aj Kanaan najlqe' Kyitron ex Naalal kyu'nju' tyajajil Sab'ulon, qu'mtzun axtzu' e'kyaja' najanju' aj Kanaan kyxol, naq o'kx e'ok kyu'n toj kuw aq'untl.

³¹Ex mixti' b'ant kyexju' aj Kanaan najlqe'toq kyoj Ako, Sidon, Alab', Aksib', Elb'a, Apek ex Reob' kyu'nju' tyajajil Aser; axtzu' ekyaja'ten najal kyxol, qu'n mixnati' b'ant kyex kyu'n kyoju' nimaqtnam lu.

³³Ex mixti' b'ant kyexju' aj Kanaan najlqe'toq kyoj B'et-semes ex B'et-anat kyu'nju' tyajajil Neptali; e'oktzun kyq'o'n toj kuw aq'untl, ex e'kyajten najal kyxol.

³⁴Ex mixti' kyaju' amorey tu'n kyku'tzju' tyajajil Dan kyoju' plan tx'otx', axtzu' ekyaja'ten twi' witz.³⁵Qu'mtzun axtzu' e'najana' amorey t-xe witz Eres kyoju' tnam Ayalon ex Saalb'im. Tetzunj kykuwixju' tyajajil Jse, e'kub' kyq'o'nju' amorey toj kuw aq'untl.

³⁶Xi' xana' kynaqachju' aj Edom tzmax tk'u'ju' witz te Akrab'im ex pomnix Sela, ex xinitzuntz twitz jawl. Ponju' tanjl Qman Dyos B'okyim

¹Etzju' tanjl Qman Dyos Wilwal ex pon B'okyim, tzaj tma'n kye aj Israel kjalu: Ayine' inetz q'inkyeye' Ejipt, ex mache tzaj wiq'i'ne' toju' tx'otx' lu xintziya'ne' kyeju' ojtxi' kychmane' tej t-xinma'ne' kye: Lalun kub' nxitu'nwe' nyol kyej b'antti'j kyuk'i'le',²lantzun kyej b'antti'j jun kyyole' kyuk'i'lju' xjal najliqe' toju' tx'otx' lu, che kyxitunqeku'ye' kyq'olb'eb'l, nchije' kye. Aye'tzunkye' minti' xikyb'i'ne', ¡Axi'xtzun xkyb'inchaju'ye' lu!

³Qu'mtzun kxe'l nma'ne' kyeye' ja'lo: Lalun che ex nq'o'ne' tnam lu kywitze', kche okyel te xpatxab' kyeye' kyuk'i'lju' kydyos, chiju' tanjl Dyos.

⁴Tetzunj tb'aj yolinju' tanjl Qman Dyos, kykyaqil aj Israel e'aq'wi oq'el b'a'nxi'x.⁵Qu'mtzun okkyq'o'n tb'iju' najb'il lu B'okyim, ex kub' kyq'o'n chojb'il twitz Qman Dyos atzu'. Kyim Joswe (Jos 24.29-31)

⁶Tej kykyaj tq'olb'e'n Joswe aj Israel, teyile junjun xi' tzyulteju' ttx'otx' ojetoq txiq'o'n kye.⁷Intoq che k'ulun aj Israel te Qman Dyos tej itz'xtoq Joswe; ex ikxtej i'tz'qe'xtoqju' tijwnaq e'kyajten tkyimlenxi' Joswe, ju' ojetoq che kyilju' nimaq ti'xti' tb'incha Qman Dyos kye aj Israel.⁸Tetzunj tkyim Joswe, tetoq jo'naq lajoj (110) ab'q'i.⁹Ku'x mqu'ntzuntz tojxju' ttx'otx' toj Timnat-sera, ju' ati toj tb'anq'ob'ju' witz Gaas, kywi' witz te Eprayin.¹⁰Ex e'kyim kykyaqilju' aj Israel e'ten junx tuk'i'l Joswe. Aye'tzunju' e'itz'ji yajxi'tl mixtoqti' b'i'n kyu'n ti'j Qman Dyos ex kyi'ju' taq'unb'en b'a'n tb'incha kye aj Israel. Kyej kykolb'e'n aj Israel Qman Dyos

¹¹Taq'wixtzun ela' kyb'inchb'en aj Israel toj twitz Qman Dyos, qu'n e'aq'wi k'ulul kyeju' chukchaq tilb'ilal B'aal.¹²Kyej kykolb'e'n Qman Dyos etzq'inkye ojtxi' kyyajilb'en Ejipt ex okten kywitz tu'n kyk'ulun kyeju' kydyos xjal najlqe'toq kyi'jile, tu'ntzu'n lu okkyq'o'n ttx'u'jil Qman Dyos.¹³Kyej kyq'o'n Qman Dyos naqx tu'n kyk'ulun te B'aal ex kyeju' chukchaq tilb'ilal Astarte,¹⁴tu'ntzun tpaju' lu tzaj ttx'u'jil Qman Dyos kyi'ju' aj Israel ex taj tu'n t-xi' elq'an tkyaqilju' ati kye kyu'n eleq', ex taj tu'n tkub'kyi'j kyu'nju' kyajq'oj najliqe' kyi'jile ex mixti' b'ent kywe' kywitz.¹⁵Atltoq junjun maj ajkyxi' toj q'oj, in ok Qman Dyos ajq'oj kyi'j ex min nche kanb'an kse'nxju' ojetoq txi' q'ma'n kye.
Maskyepetzun ojetoq che kub' tq'o'n Qman Dyos aj Israel toj tch'uẍal,¹⁶e'jaw t-sk'o'n nejenel kyxol te klol kye toj kyq'ob'ju' intoq che elq'an kyi'j.¹⁷Aye'tzu'n aj Israel min e'okslan kyeju' nejenel lu, kyej kyq'o'n Qman Dyos ex ek'ulun kye junxi'tl dyos. Xikynima'n kyyajilb'en tchaq'b'il Qman Dyos; aye'tzunkye min exilpe ti'ju' b'a'n yek'b'il kyu'n kyyajilb'en.¹⁸Atl junjun maj ajtjaw t-sk'o'n Qman Dyos jun nejenel kyxol, in onin ti'j, ex intoq che tklo'n aj Israel toj kyq'ob'ju' kyajq'oj toj tq'ijlalilju' nejenel kyxol, qu'n intoq tzaj laqj tk'u'j kyi'j ajtka'yinte inche oq' toju' yajb'ilkye.¹⁹Ajtoqtzun tkyimju' nejenel, nche eltxalpuj junmajtl, majx taq'wixi'xtlju' kyb'inchb'aj kyekywitzju' kyman, intoq che k'ulun ex inche ajb'en kye junxi'tl dyos. Mixtoqti' in kyej kytzaqpi'nju' kychwinqlal taq'wix ex kypi'sal.²⁰Qu'mtzun tzaj ttx'u'jil Qman Dyos kyi'j aj Israel, ex tma kjalu: Aye'kye' xjal lu matxi' kub' kysaqchb'e'nju' nyole' kyej b'entti'j kyuk'i'lju' ojtxi' kychman, ex min kyajb'il tu'n kyniman weye'.²¹Qu'mtzun, lay che exwiq'i'ne' tnam kywitz, aye' min e'ex tu'n Joswe tej na'mxtoq tkyim, chi Dyos.²²Tu'ntzun ja'lu tajb'iltoq Qman Dyos tu'n tka'yinte qatoq che kxe'l lpe aj Israel toj tb'eyil Qman Dyos, kse'nqe' ojtxi' kyyajilb'en mujqa lay.²³Qu'mtzun min e' exnaj tiq'i'n Qman Dyos tnam lu, ju' na'mxtoq kyxitq'o'n toj tq'ob' Joswe, ape' tb'inchaju' taq' anb'il tu'n kykyajten axtzu'. Aye' tnam e'kyajten Kanaan

¹Aye' tnam ja'lu e'kyaj tq'o'n Qman Dyos toju' tx'otx' naqx tu'n tik' kywitzlalilu' aj Israel na'mxtoq kyitz'ji tej tok q'oj tu'n tkub'ti'j Kanaan.²E' kyej tq'o'n Qman Dyos kyxol tu'ntzun tb'ant kyq'ojin aj Israel b'ajxtoq che q'ojina'.³Aye' e'kyajten ja'lu: Jwe' nejenel kye pilistey, kykyaqilju' aj Kanaan, aj Sidon exqe' aj eb'ey najlqe'toq twi' witz Lib'ano, tzajx twi' witz B'aal-ermon ex pomnix Amat.⁴Kyuk'i'ltzun ja'lu ekub'a' tq'o'n Qman Dyos aj Israel tu'n tik'kywitzlalil qama che'x kyb'i'n chaq'b'il taq' kyeju' ojtxi' kyyajilb'en tu'nel Moyses.⁵Iktzu'n tzyeta' kyanq'in aj Israel kyxol aj Kanaan, tyajajil Et, amorey, aj Perisya, eb'ey ex jeb'us,⁶aye'tzu'n kyk'wal ex kymyal aj Israel eb'aj mje kyuk'i'l kyk'wal ex kymyalju' tnam lu, ex ek'ulun kyeju' kydyos. E'tkol Otonyel aj Israel toj tq'ob' Kusan-risataym

⁷Myab'a'n ela'ju' kyb'inchb'aj aj Israel toj twitz Qman Dyos, qu'n ik'tna'l Qman Dyos kyu'n, ex ek'ulun kye chukchaq tilb'ilal B'aal ex Astarte.⁸Tu'ntzun tpaj ja'lu tzaj ttx'u'jil Qman Dyos kyi'j ex eb'ajx tq'o'n toj tq'ob' Kusan-risataym, nimaqkawil toj Mesopotamya. Wajxaq ab'q'i e'ajb'en aj Israel te Kusan-risataym,⁹tzmaxi'j t-xi' kykub'sa'n te Qman Dyos, atzunte Qman Dyos jaw t-sk'o'n jun klol kye. A Otonyel tk'wal Senas, titz'in Kaleb', klonkye:¹⁰ten tipumal Otonyel tu'n t-xew Qman Dyos, ok te nejenel kye aj Israel; extzuntz toj q'oj ex kanb'an tu'n Qman Dyos tib'aj Kusan-risataym.¹¹Tb'ajlenxi'tzun ja'lu ten kab'naq (40) ab'q'i nak'b'il toju' tx'otx'. E'tkol Eud aj Israel toj kyq'ob' aj Moab'
Tkyimlexi'tzun Otonyel,¹²e'aq'wi jumajtl aj Israel b'inchal taq'wix twitz Qman Dyos, tu'ntzun tpaju' xitq'o'n Qman Dyos nimxi'x tipumal Eklon, nimaqkawil toj Moab', kyekywitz aj Israel.¹³Tmujb'atib' Eklon kyuk'i'l aj Amon ex aj Amalek, e'q'ojintzuntz kyi'j aj Israel, ex tzyetju' nintnam toj tqan tut kyu'n.¹⁴Wajxaqlajoj (18) ab'q'i e'ajb'en aj Israel te Eklon.¹⁵E'kub'santzuntz te Qman Dyos, atzunte Qman Dyos jaw t-sk'o'n jun klol kye. A Eud tk'wal Kera kyxol tyajajil B'enjamin ok te klol kye. Xitzun kyma'n aj Israel te Eud tu'n t-xi' q'olte chojb'il te nimaqkawil Eklon, na'mxtoqtzun t-xi', kub' tb'incha'n jun tk'uẍtx'e'nb'il te kab'e' plaj twitzte, nik'jan metr twe'. Tnayajtoq Eud najb'en tu'n tq'ojin, qu'mtzun okx tk'lo'n tk'uẍtx'e'nb'il tjaq'u' tk'alb'il tojxi' t-xb'alun ku'j toj tb'a'nq'ob';¹⁷xi'tzuntz q'olteju' chojb'il te Eklon, ju' etznitoq twitz b'a'nxi'x.¹⁸T-xilenxi'tzun tq'o'n Eud chojb'il te Eklon, etz kyuk'i'lju' e'tzaj tuk'i'l,¹⁹tetzunj kypon ja ta'qe' witzleb' nqayin tk'etz Kilkal, anjti'j Eud tk'etz Eklon ex xitma'n te kjalu:
Ati jun tqanil wu'ne' teya, naq a ati tu'n t-xinma'ne' teya tjunala, chij.
Xi'tzun tma'n nimaqkawil te tu'n lalun txi'pun tma'n, xitma'ntzuntz kyeju' intoq che ajb'en te tu'n kyetz tk'etz, ex eb'je'tz.²⁰Naqtzun nkyajten Eud tjunal tuk'i'l Eklon q'uqlitoq toju' tja te tojlab'l toj q'ijal, xi' lq'e tk'etz ex xitma'n te:
—Ate' tqanil saj wiq'i'ne' teya nimaqkawil, tu'n Dyos te', chij.
Atzunj tb'inte Eklon ja'lu, jaw we' toju' tq'uqb'il,²¹atzunte Eud qu'n ana' tnayaj najb'en tu'n, jatztiq'i'n tk'uẍtx'e'nb'il toj tb'a'nq'ob' tu'nju' tnayaj, okt-xyu'ntzuntz toj tk'u'j Eklon.²²Kuwxi'x okx t-xyu'n toj tk'u'j Eklon, majx okxb'aju' k'uẍtx'e'nb'il tuk'i'lxi' tqan toj tchib'jil Eklon, majx kyej naj toj tk'u'j tu'nju' etznitwitz b'a'nxi'x, qu'n min etzti'ntl Eud.²³Eb'je'tztzun tjpu'n Eud tjpel ja kyuk'i'l jupb'ilkye, atzunte xi'etza' toj tokexspik'un.

²⁴Tej matxitoq txi', e'ulju' intoq che ajb'en te nimaqkawil, tetzunj kyka'yinte jpu'ntoqte' ja, kub' kyxima'n qa okxtjpu'ntib' nimaqkawil toju' tja janojlana'.²⁵Tetzunj matxitoq che ayon nimtoj, eb'jaw lab'titzuntz tej kyka'yinte min q'o'n tu'n tetzju' nimaqkawil. Tzaj kyiq'i'ntzun taljatz, tetzunj tjqetju' ja kyu'n xikyka'yi'n kyajaw woqli twitz tx'otx'.

²⁶Tej naqtoq ate'qe' xjal lu, oq Eud, ex texlenxi' jate'qe' witzleb' toj Kilkal, xi'kloltib' Seyirat.²⁷Tetzunj tkanun toj kytx'otx' aj Israel, xitq'ajtza'n chun kywi'witz te Eprayin tu'n kytxketu' aj Israel, ex kykyaqilx eb'ajku'tz twi' witz nejli Eud kywitz.²⁸Xitma'n Eud kye tu'n kyxilpe ti'j, qu'n oktoq che kanb'al tu'n Qman Dyos kyi'j aj Moab'ju' kyajq'oj. Exi'tzun lpetz ti'j ex e'kub'ten janaqch'i'n t-xe nin a' Jordan ex min kyaj tu'n tik'x jun xjal.²⁹Junmutx' jo'k'al (10,000) aj Moab' e'kub' kyb'yo'n toju' tq'ijlalil lu, kykyaqil kuw xjalqe' te q'oj ex min nche xob', mixti' jun tzaqpaj tu'n tkyaj anq'in.³⁰Iktzu'n kub'a'kyi'j aj Moab' kyu'n aj Israel. Tb'ajlenxi'tzun ja'lu ten kyajnaq (80) ab'q'i nak'b'il toju' tx'otx' Israel. E'tkol Samkar aj Israel toj kyq'ob' pilistey

³¹Aju' juntl nejenel a Samkar, tk'wal Anat, e'kub' tb'yo'n junk'al lajnaq (600) pilistey tu'n jun tb'aqil txpetx wakx. Ex e'klet aj Israel tu'n. Kub'ti'j Sisara kyu'n Deb'ora ex B'arak

¹Tkyimlenxi' Eud, e'aq'wi jumajtl aj Israel b'inchal taq'wix twitz Qman Dyos,²qu'mtzun e'xitq'o'n Qman Dyos toj tq'ob' Jab'in, jun nimaqkawil aj Kanaan intoq kawin toju' nintnam Asor. Atoq Sisara nejenel kyeju' t-xjal te q'oj, najlitoq Aroset-koyim.³Atitoq kab'k'al jo'naq (900) tkarwaj Jab'in k'uxb'ilqe', ex winqi'n ab'q'i e'kub' tyaju'n aj Israel kuwxi'x, tzmaxi'j kykub'san twitz Qman Dyos tu'n tonin kyi'j.

⁴Atoq Deb'ora t-sanjelal Dyos, t-xu'jil Lapidot, nkawin kyib'aj aj Israel toju' tq'ijlalil lu.⁵Naq'litoq Deb'ora nkub' qe tjaq' jun tut (ju' ojtzqi'ntoq ttut Deb'ora), kywi'witz te Eprayin, kyxol Rama ex B'etel, aye'tzu'n aj Israel intoq che pon tuk'i'l tu'n tnk'etju' kyq'oj.

⁶Jun q'ij, tchaq' Deb'ora tu'n t-xi' txokb'aj jun ichan B'arak tb'i, tk'wal Ab'inoam, najlitoq Sedes, jun kytanam tyajajil Neptali, ex xitma'n te:
—In chq'onjtza tu'n Qman Dyos tu'n t-xi'ya twi' witz Tab'or, ex chmonqe'ma junmutx' jo'k'al (10,000) ichan atzu' kyxol kyyajajil Neptali ex Sab'ulon.⁷Knb'incha'ye' tu'n tul Sisara, nejenel kye t-xjal Jab'in te q'oj, ttzi a' Kyison q'ojil ti'ja kyuk'i'l tkarwaj exqe' t-xjal te q'oj, atzunte Qman Dyos che kb'eltq'o'n toj tq'ob'a, chij.

⁸Atzunte B'arak xittzaq'we'n: chin xe'le' qama txi'ya wuk'i'le', qatzun min xxi'ya wuk'i'le' lay chinxe', chij.

⁹Atzunte Deb'ora xittzaq'we'n: Chin xe'lwe' tuk'i'la, naq o'kx myaya kjawel nimet toju' q'oj ktb'incha'ya lu, qu'n toj tq'ob' jun qya kb'el tz'aqa' Sisara tu'n Qman Dyos, chij.
Xi'tzun Deb'ora tuk'i'l B'arak atzu' Kyedes.¹⁰Atzuntzu' e'ttxoka' B'arak kyyajajil Sab'ulon ex Neptali, ex eb'aj tb'u'yi'n jun tnej xjal te q'oj te junmutx' jo'k'al (10,000) ichan tjaq' tchaq'b'il. Intoq xi' Deb'ora tuk'i'l.

¹¹Atitoq jun ichan aj kyenit, Eb'er tb'i, ojetoq tz'el tpa'ntib' kyi'j txqantl twitze'l, tyajajil Ob'ab'qe', ju' tji Moyses, tkub'toqu' t-xmuj nqayin tk'etz tnam Sedes, tk'etzju' tze b'ansi toj Saanaym.¹²Tetzunj tb'inte Sisara qa matxitoq jax B'arak twi' witz Tab'or,¹³e'tzaj tb'uyi'n kab'k'al jo'naq (900) tkarwaj k'uxb'il ex kykyaqilju' t-xjal te q'oj, xi'tzuntz kyuk'i'l tzajx Aroset-koyim tu'n kypon tzmax ttzi a' Kyison.¹⁴Xi'tzun tma'n Deb'ora te B'arak kjalu:
—¡Qo'tzuna, qu'n matxi' ponju' kmoj tu'n tkub' tz'aq Sisara toj tq'ob'a tu'n Qman Dyos! ¡Nejlite Qman Dyos kywitzju' t-xjala te q'oj! chij.
Ku'tz B'arak twi' witz Tab'or kyuk'i'lju' junmutx' jo'k'al (10,000) t-xjal te q'oj,¹⁵atzunte Qman Dyos tzaj tq'o'n xob'ajil kyxolju' tkarwaj ex kyi'ju' t-xjal Sisara te q'oj toju' kmoj tu'ntoq kyq'ojin tuk'i'l tk'uẍtx'e'nb'il B'arak; aku'pena' Sisara ku'tz tib'aju' tkarwaj ex xi' oq tu'n tqan.¹⁶Atzunte B'arak xilpe kyi'ju' xjal te q'oj ex kyi'ju' karwaj tzmax Aroset-koyim. Mixti' jun t-xjal Sisara te q'oj kyej anq'in toju' q'ij lu: kykyaqil eb'aj kyim.

¹⁷Atzunte Sisara xi' oq ewal tja Jael, t-xu'jil Eb'er, qu'n b'a'n toqna' kyten Jab'in, nimaqkawil toj Asor, kyuk'i'lju' toj tja Eb'er aj Kyenit,¹⁸etzju' qya Jael k'molte ex xitma'n te:
—Atzu' tzalu, atzu' tzalu taye, lalun xob'a, chij.
Okxtzu'n Sisara tuja ex kub' e'wa'n tu'n Jael tjaq' jun xb'alun;¹⁹xitzun tqani'n Sisara ch'i'n tk'wa' a', qu'n inxi'xtoq k'ok'on. Jawtjqo'n Jael jun tz'u'n tkb'el k'wab'j jak'u'na' lech tu'n ex xitq'o'n tk'wa'; ex jaxtktxu'n jumajtl.²⁰Xitzun tma'n Sisara te Jael: tenku'ya ttzija, qa ati jun matzul exqa matzaj tqani'n teya qa ati jun xjal tuja, mix-a'lo', chiku'ya, chij.²¹Siktnixi'xtoqtzun Sisara, majx ik'wtan b'a'nxi'x. Atzunte Jael tzaj tiq'i'n jun pojb'il ex jun stak, aye' nche ajb'en te tu'n tjk'etju' pach xb'alun, xilq'etzuntz chab'a ja ta'toq Sisara, kux tpoji'ntzuntz ttx'u'k twi' twitz tx'otx'. Iktzu'n kyima' Sisara.²²Tetzunj tkanun B'arak jyolte Sisara, etz Jael k'molte ex xitma'n te: kuttzaja, luju' ntjyo'na kxel nyek'u'ne' teya, chij.
Okx B'arak tuja ex xitka'yi'n woqli Sisara twitz tx'otx', kyimnitl pjo'nku'x stak toj twi'.

²³Ikytzu'n kub'a' ti'j Jab'in, nimaqkawil aj Kanaan, tu'n Qman Dyos kywitz aj Israel toju' q'ij lu.

²⁴Atxi'xtzu'n e'okten aj Israel yajulte Jab'in atl junjun maj kuwxi'x, tzmaxi'j tb'aj kyu'n. Kyb'itz Deb'ora ex B'arak

¹E' b'itzan Deb'ora tuk'i'l B'arak tk'wal Ab'inoam toju' q'ij lu ikjalu:

²Che b'itzan qe'ye' kykyaqile' te Qman Dyos qu'n ate'x ichan kyxol aj Israel atix tb'is kyk'u'j tu'n kyq'ojin qu'n ate'x ichan toju' tnam nkyq'o'n kyib' tu'n kyxi' q'ojil.³¡Chin kyb'intze' nimaqkawil ¡Kyb'intze' aye'ye' kawil! ¡Chin b'itzale' te Qman Dyos! ¡Chin b'itzale' teju' Dyos janche k'uluna' aj Israel!⁴Tej tetza, Nman Dyos, toj Seyir, tej tetza kyoju' kojb'il Edom, lu'lunju' tx'otx', ojexi'x tinunju' kya'j, tzaj jb'al kyu'n muj.⁵E'lu'lunju' witz, twitza Nman Dyos, Twitza Taye, lu'luna' witz Sinayi.⁶Toj tq'ijlalil Samkar, tk'wal Anat, ex toj tq'ijlalil Joel, e'kyaj tzaqpi'n b'e kyu'n xjal nche b'et najchaq, ex eb'et toj b'e myab'a'n;⁷Eb'ajkyaj tzaqpi'n kynajb'il aj Israel. Atzuntzu' jawa' wiq'i'n wib'e', ¡Ayine' Deb'ora, jun txub'aj kye aj Israel!⁸Tej intoq ok q'oj ttziju' nintnam ate'toq junjun ntzaj kyiq'i'n jujuntl kydyos, ex mixtoqti' jun kolb'il mujqa jun ch'ut kyxolju' jo'mutx' (40,000) aj Israel!⁹¡Inxi'x chin tzalaje' kyi'ju' nejenel nimaq kyoklen toj Israel, kyi'ju' xjal toj ntaname' tu'nju' makyaq'kyib' tu'n kyxi' toj q'oj! ¡Che b'itzan qe'ye' kykyaqile' te Qman Dyos!¹⁰Kymanxe' aye'ye' nche jaxe' kyib'aj b'ur saqinin kyi'j; exqe'ye' nche kub' qeye' tib'aj tb'anil xb'alun pin; exqe'ye' nche b'ete':¹¹¡Kymanxe' tkanb'ab'l Qman Dyos, kykanb'ab'lju' najb'il toj Israel, tuk'i'l kyq'ojq'ojel txijtxij, ja ta'qe' kyk'wab'l alu'mj!¹²¡Na'ntztib'a, Deb'ora na'ntztib'a, na'ntztib'a ex b'itzanx jun tb'itza! ¡Ex ikxta B'arak, tk'wal Ab'inoam lwixa ex q'inqe'xa jpu'nqe' e'tzyet tu'na toj q'oj!¹³Eku'tztzun aj Israeltz q'ojil kyi'ju' nimaqxjal kuwqe'; e'ku'tzju' t-xjal Qman Dyos te q'oj wuk'i'le', q'ojil kyi'ju' xjal te q'oj.¹⁴Eku'tz junjun ichan tyajajil Eprayin toju' b'ya', ex e'etzlpeju' xjal te q'oj tyajajil B'enjamin kyi'j. Ex eku'tzju' nejenel kye tyajajil Makyir, ex eku'tzju' kawil kyxol tyajajil Sab'ulon.¹⁵Ex ikx exi'ju' nejenel kye tyajajil Isakar tuk'i'l Deb'ora aye' exi' onilte B'arak, qu'n e'ik'lpe ti'j toj b'ya'.
Qa ate' nimaqxjal kuw Kyxolju' tyajajil Rub'en¹⁶¿Tiqu'n ẍe kyeja' ten kyxolju' rit b'il kyi'ju' k'ik'lel inche kytxko'nju' kyrit? ¡Ate'qe' nimaqxjal mya'l che xob' Kyxolju' xjal te q'oj tyajajil Rub'en!¹⁷E'kyajtenju' aj Kalaad jlajxi' nin a' Jordan; ex axtzu' e'kyaja'ten tyajajil Dan ja ta'qe' b'ark, ikxqe'tlju' tyajajil Aser e'kyajten mlaj ttzi ninnjab', ex min e'etz toju' kynajb'il;¹⁸Aye'tzunkye' kyyajajil Sab'ulon ex Neptali, kyaq'ju' kychwinqlal tej kyxi' toj q'oj twi' witz.¹⁹E' ultzun nimaqkawiltz toj tnam Taanak, tk'etzju' a' te mewido; e'ulju' nimaqkawil aj Kanaan q'ojil, ex mixti'te saqpwaq ex q'inumal kanb'et kyu'n.²⁰E' q'ojinju' che'w ti'j Sisara tzmax toj kya'j, tzmax japomna' b'aj twitz kya'j;²¹eb'ajkub' b'ajsa'n kykyaqil, tu'nju' ojtxi' a', tu'nju' a' Sison, ¡Aya kb'el yq'onte kyqulju' nim kyipumal!²²¡Inxi'x che q'ajtiju' k'uxb'il toj kyqan chej! ¡Ojqel kyel, ojqel kyelju' sq'ib'un chej!²³Atzunju' tanjl Qman Dyos intma'n kjalu: ¡Tzajxwit jun taq'wixil tib'aj Meros ex kyib'aju' najliqe' toj! qu'n min xkyqani onb'il te Qman Dyos ẍe tzaj kyuk'i'lju' kuwqe'.²⁴¡Ky'i'wla'nxwit Jael kyxol qya, t-xu'jil Eb'er ju' aj Kyenit! ¡Ky'i'wla'nxwit kyxolju' qya ate' toju' xmuj!²⁵Xitqani'n Sisara a'; lech xitq'o'n Jael te. ¡Ttzotzal lech xitq'o'n te toj jun ninlaq tb'anilxi'x!²⁶Tzajtzun tiq'i'n jun tze juch'sa'n twi' tu'n tnayaj atzunju' pojb'il tu'n tb'anq'ob', ku'x tpoji'ntzuntz toj twi' Sisara majx ex jlajinju' stak tu'n tojxi'x tnab'l.²⁷Atzunte Sisara intoq tk'o'yi'n tib' t-xe tqan Jael, tej tjaw tk'o'yi'n tib' tu'n k'ixk'oj, kub' tz'aq twitz tx'otx', atzuntzu' kyaja' kyim ja kub'a' tz'aq.²⁸Etz ka'yin ttxu Sisara in b'isun toju' tokexspik'un ex tma: ¿Tiqu'n na'mx tulju' tkarwaj? ¿Tiqu'n min q'o'n tu'n tulju' tkarwaj te q'oj? chij.²⁹Xitzun kytzaq'we'n jte' qya, okkyq'o'n kyib' qa b'i'n kyu'n, expe' ax intoq tma'n ttxu Sisaraju' ikjalu:³⁰Inlo b'ajx kypa'nju' xkykanb'a toj q'oj kyxol. Junlo txin lq'o'n mujqa kab'e' te junjun xjal te q'oj; te Sisara qekye' xb'alun chukchaq che ka'yin; jun xb'alun mujqa kab'e', B'incha'nqe' tilb'ilal toj chukchaq che ka'yin, te ti'j tqulju' xkanb'an, chechij.³¹¡Che b'ajxwit kykyaqilju' tajq'oja ikju', Nman Dyos, aye'tzunju' inche k'u'jlanteya che qoptz'ajxwit, kse'n q'ij toj tipumal t-spik'umal! chechi Deb'ora ex B'arak.
Tb'ajlenxi'tzun ja'lu, kab'naq (40) ab'q'i ten nak'b'il toju' tx'otx'. Txokli Jedeon tu'n Qman Dyos

¹Aye'tzu'n aj Israel myab'a'n kyb'inchb'aj twitz Qman Dyos, ex exi' q'o'n wuq ab'q'i tu'n Qman Dyos toj kyq'ob' aj Madyan.

²Tu'ntzunju' ljo'ntoq kyokxi'xtl aj Madyan kuwxi'xtl yajlalkye aj Israel, e'xi' aj Israel b'inchal kyewb'il kywi'witz, kyoj jul toj pik ex ja lay che kneta', tu'n kyxob'el kye aj Madyan.³Kukxtoqju' qa atitoq kyawal aj Israel awa'n, inche tzaju' aj Madyan, aj Amalek exqe'ju' xjal te tjawetzq'ij q'ojil kyi'j.⁴Intoq che kub'ten toju' kytx'otx' aj Israel, nche oktentzuntz yajulte kyawal, nche ponx tzmax toju' tx'otx' Kasa, ex mixti'x kywa aj Israel nkyaj kyq'o'n, majx nche mankunju' rit, wakx, ex b'ur kyu'n.⁵Intoq b'aj pon kyiq'i'n kypach xb'alun exqe' kywakyix, inche kub'tentzuntz toj kytx'otx' aj Israel ex inb'aj kyyaju'n tkyaqil. Intoq che b'ajpon kyuk'i'l kychej kamey nim txqan kyb'aj, kse'n jun yajb'il kyu'n ẍt'ikt'u'l.⁶Intoq che kyej prowixxi'xju' aj Israel tu'n kpaju' aj Madyan, xikyqani'ntzun o'nb'iltz te Qman Dyos.

⁷Tej t-xi' kyqani'n aj Israel te Qman Dyos tu'n kyklet kyeju' aj Madyan,⁸tzaj tchq'o'n Qman Dyos jun t-sanjelal ex xitma'n kye qa intma'n Qman Dyos ikjalu: Ayine' ẍin etzq'inkyeye' Ejipt, janajlqe'toqe' k'ayi'nkyib'e',⁹ex mya o'kx e'nkole' kye aj Ejipt, ikxkye kykyaqilju' inche yajun kyib'aje'. E' b'je'x wiq'i'ne' kywitze', ex xinq'o'ne' kytx'otx' kyeye'.

¹⁰Ex xinma'ne' kyeye' qa ayine' Dyos Manb'aj, ex tu'n lalun che xob'e' kye kydyos amorey, ju' toj kytx'otx' najlqe'ye' ja'lo; aye'tzunkye' min ẍinxkyb'i'ne', chi Dyos.

¹¹Ultzun tanjl Qman Dyostz, kub' qe tjaq'ju' b'ansi toj tnam Opra, te Joas, kyxolju' k'loj tyajajil Ab'yeser. Intoq xq'iq'in triy Jedeon tk'wal Joas toj ewaj, jatoq nkub'a' wab'etju' lob'j ub'a tu'n tb'inchet b'in, tu'n lalun che ilwi kyu'n aj Madyan.

¹²Kub' tyek'u'ntib' tanjl Qman Dyos twitz ex tzaj tma'n te ikjalu:
—¡Ichan, kuwa ex min nxob'a, ati te Qman Dyos tuk'i'la! chij.

¹³Xi'tzun ttzaq'we'n Jedeon te:
—Najsama taye, qa ati Qman Dyos quk'i'le', ¿Tiqu'ntzun inik'a' tkyaqilju' lu qi'je'? ¿Jatzun ta'qe' kykyaqilju' b'a'nq'ob'aj inkyma'n ojtxi' qyajilb'ene', tu'nju' inkyma'n qa a Qman Dyos setz q'inqeye' Ejipt? Matxi' qokyaj ttzaqpi'ne' Qman Dyos, ex matxi' qo'x tq'o'ne' toj kyq'ob' aj Madyan, chij.

¹⁴Atzunte Qman Dyos tzaj ka'yin te ex tzaj tma'n te ikjalu:
—Kutxi'ya klol kye aj Israel toj kyq'ob'u' aj Madyan tu'nju' tipumala ati. Ayine' nchinx chq'onteya, chi Dyos.

¹⁵Atzunte Jedeon xittzaq'we'n junmajtl te:
—Najsamxi'xa taye, ¿se'n taq'wi tu'ntkletu' tnam Israel wu'ne'? aye' na'we' k'loj nwitze'l prowqe'xi'x kyxol kykyaqil tyajajil Manases, ex naq ch'i'nxi'xwe' woklen kyxolju' toj njaye', chij.

¹⁶Atzunte Qman Dyos tzaj ttzaq'we'ntl te:
—Kb'entelte' tu'na qu'n chin tenb'ile' tuk'i'la. Kb'elkyi'ju' aj Madyan tu'na, kse'n nkub'ti'j jun tal ichan, chij.

¹⁷Xitzun tma'n Jedeon kjalu:
—Qama chin elb'a'ne' twitza, q'ontz jun techlala weye', qa axxi'x aya in yolina wuk'i'le'.¹⁸B'incham xtalb'ila, lalun tzik'naj b'eta tza'lu, machinxe' q'el jun woyaje' tu'n tkub' nq'o'ne' twitza, chij.
B'a'natzun, knyo'ya ajtanjtz ti'ja, chi Qman Dyos te.

¹⁹Xi'tzun Jedeon, kub' tb'incha'n jun tal chib' ex kub' tb'incha'n jte' wab'j mixti' ttx'amal tu'n winqi'n litr arin; ku'x tq'o'ntzun chib'jtz toj jun chi'l, atzu'n ta'l toj jun k'wil, xitiq'i'ntzuntz tk'etzju' tze b'ansi.²⁰Tzaj tma'n tanjl Qman Dyos te tu'n kykub' tq'o'n chib'j ex wab'j mixti' kytx'amal tib'aj jun pik ex tu'n tkub'tqo'nju' ta'l. Tb'ajlenxi'tzun tb'incha'n Jedeon xiq'ma'n te,²¹oktmko'n anjlju' chib'j kyuk'i'lju' wab'j tu'n ttze iq'i'ntoq tu'n, ex etz q'aq' toju' pik, eb'aju' chib'j ex wab'j tu'n; kub'tzun naj tanjl Qman Dyos twitz.²²Tetzunj teltnik' Jedeon qa tanjltoq Qman Dyos, tma ikjalu:
—¡Taye, Taye! ¡matz'okku' nka'yi'ne' tanjla Nman Dyos! chij.

²³Atzunte Qman Dyos tzaj ttzaq'we'n te:
—Lalun xob'a, lay kyimta. Qex tk'u'ja, chij.

²⁴Jawtzun tb'incha'n Jedeon jun q'olb'eb'l te ninb'ilte Qman Dyos atzu', ex oktq'o'n tb'i: Ate Qman Dyos nak'b'il. Majx kyej tenju' q'olb'eb'l lu toju' nintnam Opra, kytanam tyajajil Ab'yeser.

²⁵Texju' qonik'an lu tzaj tma'n Qman Dyos te Jedeon kjalu:
—Q'intza jun tman wakx kyi'ju' talu'n tmana, aju' tkab' tman wakx te wuq ab'q'i, ex xitunku'ju'ya q'olb'eb'l te B'aal ati tu'n tmana. Ex ik'sanku'ju'ya tze xjansa'n kyu'n tk'etzju' q'olb'eb'l te B'aal,²⁶kjawel tb'incha'ntzuntza jun q'olb'eb'l weye' ayine' Dyos Manb'aj twi' witz kuwsa'n lu. Ktzajel tiq'i'ntzuntza tkab' tman wakx, kb'el tq'o'na nwitze' te jun chojb'il k'ok'sb'il, ex k'okyex tq'o'na xjan tzeju' kb'el tik'sa'na te t-siyil, chij.

²⁷E'tzajtzun tiq'i'n Jedeon lajoj (10) tmajin ex tb'incha tkyaqilju' matxitoq tzaj tma'n Qman Dyos te; qonik'an tokten b'inchalte ex mya q'ijtl, qu'n xob' kyeju' twitze'l tman ex kyeju' xjal aj nintnam.²⁸Tetzunj kyjawe'ju' xjal najlqe' toj nintnam te prim, xikyka'yi'n q'olb'eb'l te B'aal matxitoq kub' xitu'n, ex matxitoq kub' tx'e'mu'nju' tze xjan tk'etzu' q'olb'eb'l, expe' matxitoq kub' q'o'n jun tman wakx te chojb'il k'ok'sb'il tib'aju' ak'a'j q'olb'eb'l.²⁹Intoq che xjelun kyxolilex: ¿Alokye xb'inchante ja'lu? chechij.
Tu'ntzunju' inxi'xtoq che jyon ex inxi'xtoq che xjelun, kyb'i qa a Jedeon tk'wal Joas b'inchante, exi'tzuntz tk'etz Joas ex xikyma'n te:

³⁰—Iq'imitzju'ya tk'wala qu'n kb'el qb'yo'ne'. ¡Matxi' kub' t-xitu'nju' q'olb'eb'l te B'aal exju' tze xjansa'n tk'etz! chechij.

³¹Atzunte Joas xittzaq'we'n kye ikjalu:
—¿Ma kche okyeltene' klolte B'aal ex q'ojil tu'n tpaj? ¡Na'mtoqwit qsqix ajtkyim alkyexku' makolon ti'j B'aal! Qana'tzun dyos te' B'aal, xtkolku'tib'j tjunalx, qu'n tena'ju' q'olb'eb'l matxi' kub' xitu'n, chij.

³²Atxi'xtzunj okkyq'o'n tb'i Jedeon te Jerob'aal, ex nkyma'n: klomtib' B'aal te, chechij, qu'n ana'te Jedeon kub' xitunte q'olb'eb'l te B'aal.

³³Kykyaqilxtzunju' aj Madyan ex aj Amalek exqe' xjal te tjawetzq'ij, b'aj kyb'u'yi'n kyib' ex e'jlajin tib'aju' nin a' Jordan, e'kub'tentzuntz toju' b'ya' Jesreel.³⁴Tentzun tipumal Jedeon tu'n t-xew Qman Dyos, ex xitq'ajtza'n jun tuk'a rit tu'n kymujb'ante kyib' tyajajil Ab'yeser tuk'i'l;³⁵expe' exi tchq'o'n sanjelal txkolkye kykyaqil tyajajil Manases tu'n kymujb'ante kyib' tuk'i'l. Ex exi' tchq'o'n sanjelal txkolkye kyyajajil Aser, Sab'ulon ex Neptali, ex ikx e'etz tu'n kymujb'ante kyib' tuk'i'l.

³⁶Xitzun tma'n Jedeon te Qman Dyos ikjalu: Qa ax qa chin ajb'ele' tu'na tu'n kyklet aj Israel kse'nxju' matxi' tmaya,³⁷kb'el nq'o'ne' jun ttz'umal rit nimaq tlanil toju' er ja inela' triy, qa ak'ju' lan lu te prim tu'n ta'l che'w, extzun tzqiju' tx'otx' ja tkub'a', oktzun k'elel nnik'tze' qa chin ajb'ele' tu'na tu'n kykletju' aj Israel, kse'nxju' oje tmaya, chij.

³⁸Ex ikx b'aj ju'. Tej tjawe' Jedeon te prim el tytz'o'nju' tzmal tz'u'n ex noj jun b'as tu'n ta'l che'w el toj.³⁹Tu'npetzunju', tma Jedeon kjalu: Lalun tzaj ttx'u'jila wi'je' qa matxinma'n junmajtle' teya. Naq aju' wajb'ile' tu'n nb'inchanteye' juntl twitzlalil. Toju' maj lu ktb'incha'ya tu'n tkyaju' lan tzqij, atzunju' tx'otx' ak' tu'n ta'l che'w, chij.

⁴⁰Ex tb'incha Qman Dyos ikju' toju' qonik'an lu. Tetzun juntl prim, tzqij toqju' tlanil alu'mj, atzu'n tx'otx' ak'toq tib'aj tu'n ta'l che'w. Kub'kyi'j aj Madyan tu'n Jedeon

¹Jawe' Jedeon b'a'n prim, ex kykyaqilju' ate'toq tuk'i'l, exi'tzuntz tu'n kykub'ten tk'etzju' t-xiklil a' Arod. Aye'tzu'n aj Madyan xi'toq ta'qe' toj tb'anq'ob'kya'j, toju' b'ya' t-xeju' witz More.

²Tzaj tma'n Qman Dyos te Jedeon kjalu: Nimxi'xte' xjal saj tiq'i'na tuk'i'la, qatzun mache kanb'an aj Israel wu'ne' kyib'aju' aj Madyan, jaku' jaw kynima'n kyib' nwitze' qu'n kkyma' qa kyu'nx ẍe kleta'.³Qu'mtzun q'manxa kyeju' xjal qa ati jun nxob' b'a'n tanj tja, chij.
Ikytzu'n ik'a'twitz Jedeon kyi'j, anjkyi'j kab'mutx' o'lajk'al (22,000) ichan, noq junmutx' jo'k'al (10,000) e'kyajten.⁴Atzunte Qman Dyos xitma'ntl: nimxte' kyb'aj. Q'inqe'xa k'wal a', atzuntzu' k'ik'ela' nwitze' kyi'j, kxel nma'ntzuntze' teya alkyeqe' b'a'n tu'n kyxi' tuk'i'la ex alkye lay che'x, chij.

⁵E'xi'tzun tiq'i'n Jedeonju' xjal k'wal a', ex tzaj tma'n Qman Dyos te: Pa'nqe'mila inche k'wan a' toj kyq'ob', kse'n injaw kyleq'u'n tx'yan, kyi'ju' mejlqe' inche k'wan, chij.

⁶Naq o'lajnaq (300) e'k'wan a' toj kyq'ob', xi' kyleq'u'n kse'nkye tx'yan. Kykyaqilxkye' txqantl eb'ajkub' meje tu'n kyk'wan a'.⁷Tzajtzun tma'n Qman Dyos te Jedeon kjalu: Tu'ntzunte' o'lajnaq (300) ichan lu kche nkla'ye', kb'elkyi'ju' aj Madyan wu'ne'. B'a'n tu'n tanjkyi'ju' txqantl kykyaqil, chij.

⁸Tchaq'tzun Gedeontz tu'n tanjkyi'ju' txqantl kyja; na'mtoqtzun kyanj eb'aj tb'u'yi'n kyxar ex kyxux tuk'a rit. O'qe'kxu' o'lajnaq (300) ichan sk'o'nqe' e'kyaj tuk'i'l, e'kub'tentzuntz tzmax jawtl tib'ajxi' b'ya' jata'qe'toq aj Madyan.

⁹Tchaq' Qman Dyos teju' qonik'an lu te Jedeon kjalu: Iq'i'nktz tib'a ex kutku'xa q'ojil kyi'ju' aj Madyan, qu'n che kxe'l nq'o'ne' toj tq'ob'a.¹⁰Qatzun in xob'a tu'n tq'ojina kyuk'i'l, kutku'xa nej jata' kyxmuj tuk'i'l Pura ju' tmajina,¹¹ex b'inxa titi' inkyma'n. Ktenb'eltzun tipumaltza tu'n tq'ojina kyi'j, chij.
Ku'xtzun Jedeon tuk'i'l Pura ju' tmajin, tzmax ja ulna' kytxa'n kyxmuju' ajq'oj.¹²Matxitoq b'ajx kysputi'nkyib' aj Madyan ex aj Amalek, exqe' xjal te tjawetzq'ij toju' b'ya', naku'j txqan ẍt'ikt'u'l yajul. Nimtoq txqan kykamey kse'n tz'awun ttzi ninnjab'.¹³Tetzunj tpon lq'e Jedeon tk'etz kyxmuju' ajq'oj, xitb'i'n jun xjal te q'oj intoq xitma'n jun twitzik' te juntl tuk'i'l. Chij kjalu:
—Makub' nwitzk'ane', chitzun qama tzaj tololon jun wab'j Seb'ad ex matzul tzmax tib'aju' qxmuj, extzun ajtul tz'aq ti'j jun pach xb'alun majx in kub' tz'aq tu'n, chij.

¹⁴Atzunju' tuk'i'l xittzaq'we'n te:
—Ate tk'uẍtx'e'nb'il Jedeonju' tk'wal Joas aj Israel, ex mya juntl ti'xti'. Che kb'eltq'o'n Dyos aj Madyan ex kykyaqilju' kyxmuj xjal te q'oj toj tq'ob' Jedeon, chij.

¹⁵Tetzunj tb'inte Jedeon tb'aj q'ma'n witzik' exju' pujb'ente, k'ulun Jedeon te Qman Dyos. Anjtztzuntz kyk'etzju' t-xjal te q'oj ex tchaq':
—¡Che we'ktze', qu'n che tzajel tq'o'nte' Qman Dyos xjal aj Madyan toj qq'ob'!, chij.

¹⁶E'kub'tzun taq'pu'n o'lajnaq (300) t-xjal toj oxe' tnej, ex xitq'o'n tuk'a rit kye kykyaqil ex junjun xar mixti' toj, intoq che k'ant q'aq' kyoj.¹⁷Ex xitma'n kye kjalu:
—Ajnpone' jun plajtl kyi'jxi' ajq'oj, kxe'l kyka'yi'ne' titi' nb'incha'ne', axtzun kxel kyb'incha'nju'ye'.¹⁸Ajqq'ajtzanteye' tuk'a rit kyuk'i'lju' ate' wuk'i'le', ex ikxkye' kyq'ajtzanxe' kyi'jile ajq'oj ex kymanktze' kuw:
¡Tu'n Qman Dyos ex tu'n Jedeon! chechiku'ye', chij.

¹⁹Epontzun Jedeon kyuk'i'lju' jo'naq (100) ichan kyi'jxi'ju' ajq'oj tej tponju' kmoj tu'n kych'exb'ente kyib'ju' xq'uqil te tk'u'j aq'b'il. Xikyq'ajtza'ntzun tuk'a rittz ex eb'ajkub' kypa'nju' xar iq'i'ntoq kyu'n.²⁰Junx xi' kyq'ajtza'n oxe' tnej xjalju' tuk'a rit ex eb'ajkub' kypa'nju' xar. Iq'i'ntoqju' q'aq' in k'enti kyu'n tu'n kynayajkyq'ob', atzunju' tuk'a rit tu'n kyb'anq'ob', ex intoq jawkyma'n kuw: ¡Q'oj! ¡Tu'n Qman Dyos ex tu'n Jedeon! chechij.

²¹Tetzunj numli qe'toqu' aj Israel jatoq ta'qe' kyi'jileju' kyajq'oj, kykyaqilxju' xjal aj Madyan te q'oj intoq che ẍch'in ex intoq che etz oq,²²aye'tzunju' o'lajnaq (300) aj Israel kukxtoq kyq'ajtzante tuk'a ritju', tb'incha Qman Dyos tu'n kyq'ojinju' aj Madyan kyib'xkyib', ex tu'n kyxi' oq tzmax B'et-sita, toju' b'e inxi' Serera, ex tu'n kypon jata' nqach te Ab'el-meola, tk'etz Tab'at.

²³E'txkonjtztzu'n aj Israel, kyyajajil Neptali, Aser ex kykyaqilju' tyajajil Manases, tu'n kyxi'lpe q'ojil kyi'ju' aj Madyan.²⁴Exi' tchq'o'n Jedeon sanjelal twi'ju' witz ja ta'qe' tyajajil Eprayin, q'malte tu'n kytzaju' ichan q'ojil kyi'ju' aj Madyan ex tu'n kykub'ten maqul ja tu'me'l tu'n kyik'xa' xjal toju' nin a' B'etb'ara ex toj a' Jordan, na'mxku'toq kypon aj Madyan atzu'. Xikyb'incha'n tyajajil Eprayin chaq'b'il lu,²⁵expe' tzyet kab'e' nejenel kye aj Madyan kyu'n, aye' Oreb' ex Seeb'. Kub' kyb'yo'n Oreb' tib'aju' pik okq'o'n tb'i Pik te Oreb'. Atzunte Seeb' kub' kyb'yo'n toju' najb'il kyej q'o'n tb'i ti'j, janb'incheta' ub'a te b'in. Tkub'lenxi'tzun kyi'j aj Madyan, xikyiq'i'n twi' Oreb' ex twi' Seeb' te Jedeon, atitoq jlajxi'tl nin a' Jordan. E'tzyet nimaqkawil aj Madyan tu'n Jedeon

¹Tzaj kytx'u'jil tyajajil Eprayin ti'j Jedeon ex e'aq'wi wulil tuk'i'l qu'n min xitchq'o'n kytxokli tej tex q'ojil kyi'ju' aj Madyan.²Atzunte Jedeon xittzaq'we'n kye kjalu:
—¿Ma mixtzunti' inel kynik'e' ti'j qa nimkye' xkyb'incha kyetwitzwe' xnb'incha? Nimnate' toklenju' ch'i'nkye' xkyb'incha kyetwitz txqanqe' xqb'incha.³Mache kub' tq'o'n Qman Dyos Oreb' ex Seeb' nejenel kye aj Madyan toj kyq'ob'e'. ¿Titi'tzunwe' xb'ent wu'n kse'nju' xb'ent kyu'ne'? chij.
Kub'tzun kyk'u'j tyajajil Eprayin tej kyb'inte tyol Jedeon.

⁴E'pon Jedeon kyuk'i'lju' o'lajnaq (300) t-xjal ttzi nin a' Jordan, ex ilti'j e'jlajin, b'a'ntzun qa matxitoq che sikti b'a'nxi'x tu'n tpaj e'xilpe kyi'ju' ajq'oj.⁵Xitqani'n Jedeon kyeju' najliqe' Sukot ikjalu:
—Kyb'inchame' xtalb'il kyq'ontz junqe' qwa, qu'n matxi' qo siktiye' b'a'nxi'x. Lepchqo'xe' knolkyeju' nimaqkawil Seb'a ex Salmuna, aj Madyan qe', chij.

⁶Aye'tzu'n nejenel te Sukot tzaj kytzaq'we'n:
—¿Ma matxitzun che tzyet Seb'a ex Salmuna kyu'ne', qa txi' qq'o'ne' kywaye'? chechij te.

⁷Xitzun ttzaq'we'n Gedeon kye:
—¡Tenkuna'j nej, naqa ẍe kub' tq'o'n Qman Dyos Seb'a ex Salmuna toj qq'ob'e', k'anjetztzun qi'jtze' ẍlat'u'lkyeye' tu'n ch'i'x intzaj ch'iy toj chq'ajlaj! chij.

⁸Exi'tzuntz Penwel, ex xikyqani'n kywa atzu', ex axte yolju' tzaj q'ma'n kye kse'nxju' Sukot. Tu'ntzun tpaju',⁹xitma'n Gedeon kye: ¡Tenkuna'j nej, aj qkanb'ane', k'anjetz qi'je' xitulteju' ja nimin twe' lu! chij.

¹⁰Ate'toq Seb'a ex Salmuna Karkor kyuk'i'l junmutx' wuqlajk'al lajnaq (15,000) ichan, ju' o'qe'kxtoqtl xjalju' te q'oj te tjawetzq'ij ate'x, qu'n matxitoq che kyimxi' o'lajmutx' (120,000).¹¹Xitzun kyljo'n Jedeon kyb'e kyuk'i'lu' t-xjal toju' b'e inxi' ti'jileju' chq'ajlaj toj tjawetzq'ij te tnam Nob'a ex Jojb'ea, ex mixti' kynab'en tej toktzaqpaj q'ojil kyi'j.¹²E' oq Seb'a ex Salmuna kywitz, aye'tzunkye Jedeon exilpe kyi'j ex e'tzyet kyu'n, ex majx tzaj tchewal kyi'ju' kyxjal te q'oj.

¹³Tej kxi'toq tanjtzkyi'j Jedeon toj q'oj toju' b'e inxi' Eres,¹⁴kytzuy jun ku'xun aj Sukot ex ok toj xjel tu'n Jedeon; atzunte' ku'xun xi' ttz'ib'a'n kyb'iju' oxnaq wuqlajoj (77) nejenel ex tijwnaq te Sukot te Jedeon.¹⁵E'xi'tzun Jedeon Sukot ex xitma'n kyeju' xjal toju' tnam lu:
—¿Ma na'n kyu'ne' tej qb'aj kyxmayine' tu'n kpaj Seb'a ex Salmuna? ¿Na'n kyu'ne' qa kub' kyxk'a'yi'ne' wab'j qeye', siktniqo'toqe' b'a'nxi'x, ex majx tzaj kychitpu'ne' qplaje' qa na'mxtoq kytzyet qu'ne'? ¡Luqe'tzun lu ja'lu! chij.

¹⁶Tzajtzun kyiq'i'n Jedeon txqan ch'i'x toj chq'ajlaj, kyu'ntzun ja'lu kub' kytz'e'ysa'n kywitzu' tijwnaq te Sukot.¹⁷Ex kub' kyxitu'n ja nimin twe' te Penwel, ex e'kub' kyb'yo'n xjal toju' nintnam lu.¹⁸Xitzun t-xjelu'n Jedeon kye Seb'a ex Salmuna:
—¿Se'n qetzunju' xjal ẍekub' kyb'yo'ne' toj Tab'or? chij.
Aye'tzunkye xikytzaqwe'n:
—Ikxi'x che ka'yinju' kse'n aya. Naku'j tk'wal nimaqkawilqe', chechij.

¹⁹Jaw t-ẍch'i'ntzun Jedeontz kjalu:
—¡Aye' witz'ine'! ¡Witz'in qeku'xi'x weju'ye' ẍekub' kyb'yo'ne'! Axxi'x twitz Qman Dyos, noqwit minti' ẍekub' kyb'yo'ne', mixti'wtlo ẍekub' qb'yo'ne' ja'lo, chij kye.

²⁰Xitma'ntzuntz te Jeter ju' tnejel tk'wal:
—¡B'yonqe'ku'ya! chij.
Atzunte Jeter ku'xunxtoq, mixtaq'a'tib' tu'n tjawtz tiq'i'n tk'uẍtx'e'nb'il.²¹Aye'tzunkye Seb'a ex Salmuna xikyma'n te Jedeon:
¡Aku'ta qo tb'yonku'ya! ¡Qu'n xi'nnela'te' ichan tnik'tzil qa minti' nxob'! chechij.
Jawtzun we' Gedeontz ex e'kub'tb'yo'n, ex eltiq'i'n kyu kykamey Seb'a ex Salmuna.²²Xi'tzun kyma'n aj Israel te Jedeon kjalu:
—Matxina' qo tkola toj kyq'ob' aj Madyan, ja'lo qajb'ile' aya tu'n tkawina qib'aje' kyuk'i'lju' tyajajila, chechij te.

²³Atzunte Jedeon xittzaq'we'n kye:
—Myayinwe' ex myaye'ju' nk'wale' kqo kawile' kyib'aje'. Ate Qman Dyos kkawil kyib'aje'.²⁴Naq o'kx wajb'ile' tu'n ttzaj kyq'o'ne' xmilq'ob'j selkyiq'i'ne' kye ajq'oj, chij.
Aye'ju' xmilq'ob'aj q'anpwaq lu intoq che okkyq'o'nju' xjal ajq'oj, qu'n najlqe' toj chq'ajlaj.²⁵Aye'tzu'n aj Israel kub' kyslik'u'n jun pinpa't twitz tx'otx', ex b'ajkub' kyq'o'n xmilq'ob'j tib'aj, xikyma'ntzuntz te Jedeon:
—Luqe' lu, chechij.

²⁶Qapelo kab'naq kab'e' (42) lib'r q'anpwaq jaw tu'n tkyaqilju' xmilq'ob'j, ex min e'okju' u'wj exqe' tal ab'j tb'anilqe' ex xb'alun sed chub'i'nkywitz toj tajlal, ju' oksa'nktoq kyu'n nimaqkawil toj Madyan, exqe' kyu kykamey.²⁷Tu'ntzu'n q'anpwaq lu kub' tb'incha'n Jedeon jun tilb'ilal ex kub' tq'o'n toj Opra ju' ninttanam, tu'ntzun tpaju' tilb'ilal lu min e'nimantl aj Israel te Qman Dyos, okju' lu te jun takpuje'n te Jedeon ex kyeju' toj tja.

²⁸Iktzu'n e'kyaja' aj Madyan tjaq' kykawb'il aj Israel ex mixti' jaw kyiq'i'ntlkyib'. Kab'naq (40) ab'q'i ten nak'b'il toju' tx'otx' tej itz'toq Jedeon. Kyim Jedeon

²⁹Xi'tzun Jedeon najal tojku'ju' tja, ex ten oxnaq lajoj (70) tk'wal, qu'n b'a'npuntoq t-xu'jil.³¹Ex ten jun tqya toj Sikyem, ex itz'ji jun tk'wal tuk'i'l, Ab'imelek tb'i oktq'o'n.

³²Matxitoq tijinxi'x Jedeon tej kyim, ex kux mqu'n toju' muqb'il te Joas ju' tman, toj Opra, ninkytanam k'loj tyajajil Ab'yeser.

³³Tkyimlenxi'tzun Jedeon, kyej kytzaqpi'n jumajtl aj Israel Qman Dyos, xi' e'k'uluna'tl kyeju' chukchaq tilb'ilal B'aal, ex jaw kysk'o'n B'aal-b'erit te kydyos.³⁴Ik'tna'l Qman Dyos kyu'n, ju' ojetoq klonkye toj kyq'ob' kykyaqilju' kyajq'oj kyi'jile,³⁵ex minti' kyaq' b'a'n tu'me'l t-xel kyeju' toj tja Jedeon, tu'n tkyaqilju' b'a'n tb'incha kye. Kawin Ab'imelek

¹Xi' Ab'imelek, tk'wal Jedeon, yolil kyuk'i'lju' twitze'l ttxu toj Sikyem. Ex xitma'n kye kjalu:

²—Kxe'l nkub'sa'ne' kyeye', qwitze'lku'qib', kymanxe' kye xjal aj Sikyem tu'n tkane toj kywitz qa a b'a'nju' tu'n tkawin naq jun xjal qib'aj ex mya kykyaqilu' oxnaq lajoj (70) tk'wal Jedeon, chij.

³Tu'ntzu'n kywitze'l kyib' tuk'i'l Ab'imelek, kymujb'a kyib' tuk'i'l, exi'tzuntz q'malte kyeju' xjal aj Sikyem tu'n kyxilpe ti'j.⁴Expe' tzaj kyiq'i'n oxnaq lajoj (70) saqpwaq toju' tja B'aal-b'erit, xikyq'o'ntzuntz te Ab'imelek. Tuk'i'ltzu'n pwaq lu, exi tchjo'n Ab'imelek jte' b'yolxjal tu'n kyxi' tuk'i'l. Exi'tzun tuk'i'l⁵toj tnam Opra, janajana' Jedeonju' tman, ti'jtzun junx ab'j ekub'a' kyb'yo'na'ju' oxnaq lajoj (70) ttzik ex titz'in Ab'imelek. Naq o'kx Jotam ju' kych'i'pil b'ant tewan ex klet.⁶Yajxi'tzuntel kykyaqilju' xjal aj Sikyem ex aj B'et-milo b'aj kyb'u'yi'n kyib' t-xeju' b'ansi ex tk'etzju' xjan ab'j toj Sikyem ex okkyq'o'n Ab'imelek te nimaqkawil.

⁷Tej tb'inte Jotam, jaxtzuntz twi'ju' witz Jerisim, tzaj t-ẍch'i'ntzuntz kuw tu'n kyb'inte tnam kjalu:
¡Chin kyb'intze' b'a'nxi'x, ichan aj Sikyem! ¡Che tzajel b'i'ntzuntze' tu'n Qman Dyos!

⁸Ati junmaj kyajb'iltoqju' tze jun nimaqkawil kyib'aj, ex xikyma'n teju' tze Olib'o tu'n tok te kynimaqkawil.⁹Atzunte' Olib'o min taj, qu'n qatoq matz'ok te nimaqkawil kyeju' tze, lay taq'tl aseyt, ju' in ajb'en tu'n kynimetju' ichan ex tu'n tnimet Qman Dyos.

¹⁰Aye'tzunju' tze xikyma'n teju' tqan lob'j iw tu'n tok te kynimaqkawil.¹¹Atzunte' tqan iw min taj, qu'n qatoq matz'ok te nimaqkawil kyeju' tze, lay taq'tl lob'j iw chi' ex k'ok'j.

¹²Aye'tzunju' tze xikyma'n te tqan ub'a tu'n tok te kynimaqkawil.¹³Atzunte tqan ub'a min taj, qu'n qatoq matz'ok te nimaqkawil kyeju' tze lay taq'tl b'in, ju' in ajb'en tzalajsalkye ichan ex te Qman Dyos.

¹⁴Te b'ajsb'iltzun xikyma'nju' tze te jun ch'i'x tu'n tok te nimaqkawil.¹⁵Atzunju' ch'i'x xitma'n kye qa ax qa kyajb'iltoq tu'n tok te nimaqkawil kye, kykyaqilx atitoq tu'n kyokx tjaq'ju' t-xlekumal; qatzun min kyajb'iltoq tu'n tok te nimaqkawil kye, che b'ajeltoqtzun tpati'n tzetz k'ute toj Lib'ano.

¹⁶Atzu'n ja'lo kxe'l nqani'ne' kyeye': ¿Ma b'a'ntzun xkyb'inchaye' ex ma tojxi'x tu'me'l sok kyq'o'ne' Ab'imelek te nimaqkawil? ¿ma b'a'nju' xkyb'inchaye' te Jedeon ex kyeju' tk'wal kse'nxju' b'a'n tb'incha kyeye'?¹⁷Qu'n taq'na' te nmane' tchwinqlal naq tu'n kpaje' tej tq'ojin tu'n kytzaqpete' toj kyq'ob' madyan;¹⁸aye'tzunkye' mache b'jo'k tzaqpaje' kyi'ju' toj tja nmane', ex matxi' che kub' kyb'yo'ne' oxnaq lajoj (70) tk'wal ti'j jun ab'j. Expe' naqch'i'n ja'lu toj kywitze', qu'n matxi' tz'ok kyq'o'ne' Ab'imelek te nimaqkawil, talju' tqya Jedeon, naq tu'nju' tal kywitze'le'.

¹⁹Atzu'n kxe'l nma'ne' kyeye' ja'lo: qa b'a'nju' xkyb'inchaye' exqa tu'me'l xkyb'inchaye' ti'j Jedeon ex kyi'ju' toj tja, b'a'nwt che'xa'ye' tuk'i'l Ab'imelek, ex b'a'nwt txa' Ab'imelek kyuk'i'le';²⁰qatzun min, ¡tz'etzxwit jumin jun q'aq' ti'j Ab'imelek tu'n kyb'aj kykyaqilju' xjal aj Sikyem ex aj B'et-milo, ex ikx tz'etzxwit jumin jun q'aq' toj Sikyem ex toj B'et-milo tu'ntzun tb'aj Ab'imelek! chi Jotam.

²¹Tb'ajlenxi'tzun tma'n Jotam ja'lu, xi' oq ex xi' najal B'eer, qu'n intoq xob' te Ab'imelek ju' ttzik.

²²Oxe' ab'q'i kawin Ab'imelek kyib'aj aj Israel,²³tzajtzun tq'o'n Qman Dyos jun pa'jtib'il kyxol Ab'imelek kyuk'i'lju' xjal aj Sikyem, tu'n tjaw kyiq'i'nkyib' ti'j.²⁴Iktzu'n tchoja' Ab'imelek kykamikju' oxnaq lajoj (70) tk'wal Jedeon, ex ikx kychoja' xjal aj Sikyem e'onin tuk'i'l.²⁵Exi' kychq'o'n aj Sikyem kyxjal kyoj k'ul tu'n kyalq'an kyi'ju' xjal intoq che ik' kyoju' b'e nqayin kyk'etz. Ex tb'i Ab'imelek ja'lu.

²⁶Jun q'ij ik'x Kaal, tk'wal Eb'ed, kyuk'i'lju' ttzik e'titz'in toj Sikyem ex kub' kywitzju' aj Sikyem tu'n,²⁷e'exju' xjal lu toj kojb'il b'uyil lob'j ub'a ex kub' kyb'incha'n b'in, ex kub'kyik'sa'n jun ninq'ij, intoq che wan extoq nku'x kyk'wa' toju' kyja kydyos, ex intoq che yasun ti'j Ab'imelek.²⁸Intoq tma'n Kaal kjalu: ¿Ti'xi'xtzu'n toklen Ab'imelek toj twitz? Naqna' jun tk'wal Jedeonte' ex a Seb'ul onilte. Yajtzunqe aj Sikyem qo', ¿titi'qo'tzunqe tu'n qten te majin k'a'yi'nqo' kye? Qa qajb'ilqe tu'n qok te majin k'a'yi'n te Amor ju' kub' q'onteju' tnam Sikyem, ex mya te tmajin Ab'imelek.²⁹¡Noqwit ayine' nejenel kyeye', jaku' tz'ex nxla'ja'ne' Ab'imelek, chij, expe' tmatl, Wixchaqa Ab'imelek, q'inqe'tzju'ya t-xjala ex qoq'ojin! chij.

³⁰Tetzunj tb'inte Seb'ul, kawil toju' nintnam, ti'toqu' ntma'n Kaal, tzaj ttx'u'jil³¹xitzun t-sma'n tqaniltz te Ab'imelek atitoq toj Aruma kjalu: lu te' Kaal tk'wal Eb'ed, matxi' tzul kyuk'i'lju' ttzik toj Sikyem, ex matxi' tz'okten oksalte kyk'u'ju' nintnam tu'n tjaw kyiq'i'nkyib' ti'ja.³²Qu'mtzun kuttzaja te qonik'an kyuk'i'l t-xjala te q'oj ex kyewinxkyib'e toj kojb'il.³³Atzun q'ojina ti'ju' nintnam ajtjawu'l q'ij te prim, ajtzun tetz Kaal kyuk'i'lju' t-xjal q'ojil ti'ja, b'inchama aju' tajb'ila ti'j, chij.

³⁴Etztzun Ab'imelektz kyuk'i'l kykyaqilu' t-xjal te qonik'an ex xikyaq'pu'nkyib' toj kyaje' tnej ti'jileju' tnam Sikyem ex eb'ajkub' jutze.³⁵Tetzunj tetz Kaal ttziju' nintnam, etz Ab'imelek kyuk'i'lju' t-xjal te q'oj jachaq jutzla' qe'toq.³⁶Tej kyxitka'yi'n Kaal, xitma'n te Seb'ul kjalu:
—¡Ka'yinxpe'ya tk'ujwitz, xi'kyku'tz txqan xjal q'ojil! chij.
—Mixti'te', tewin witzte' inxi' tka'yi'na, chi Seb'ul xittzaq'we'n te.

³⁷Atzunte Kaal xitma'ntl te:
—¡Ex xi'kyku'tz txqantl xjal q'ojil twi'tlu' witz tk'u'j tx'otx' tb'i! ¡Ex jun tnejtl tzul toju' b'e inik' t-xe b'ansi kye ajyo'ẍ! chij.

³⁸Xitzun tma'n Seb'ultz te: —¡Yolintzuna ja'lo la'j! ¡Ina' tma'na qa mixti' toklen Ab'imelek tu'n kyoke' te tmajin! luqe'tzu'n xjal te q'oj mixti'x che ela' teya. ¡Q'ojin tzuna kyuk'i'l ja'lo! chij.

³⁹Etztzun Kaaltz kyuk'i'lu' xjal aj Sikyem q'ojil ti'j Ab'imelek.⁴⁰Tetzunj t-xitka'yi'n Kaal Ab'imelek, kub' oq twitz, xi'tzun lpe Ab'imelektz ti'j tzmax ttziju' nintnam. Ex nim txqan xjal eb'aj Kub' tb'yo'n.⁴¹Kyajtentzun Ab'imelektz toj Aruma, atzunte Seb'ul e'ex t-xla'ja'n Kaal kyuk'i'lju' ttzik ex titz'in.

⁴²Te juntl q'ij, e'exju' xjal aj Sikyem toj kojb'il. Tetzunj tb'inte Ab'imelek,⁴³eb'aj tnk'u'n t-xjal te q'oj toj oxe' tnej, e'kub' jutzetzuntz toj kojb'il; atzunj tka'yinte xi'toq kyetzju' xjal aj Sikyem ttziju' nintnam, e'etz jajutzla'qe'toq ex minab'en kyok tzaqpaj kyi'j.⁴⁴Oktzaqpaj kyuk'i'lju' jun tnej t-xjal te q'oj ex e'kub'ten ttziju' nintnam, aye'tzu'n kab'e' tnejtl intoq che q'ojin ex intoq che kub' kyb'yo'nju' ntoq che b'et toj kojb'il;⁴⁵ex b'aj q'ij q'ojin Ab'imelek ti'ju' nintnam Sikyem, tzmax tkub'ti'j tu'n. Kub' t-xitu'ntzun nintnam ex e'kub' tb'yo'n kykyaqilju' xjal najlqe' toj, ex kub' tchto'n atz'an toj tkyaqilju' nintnam.

⁴⁶Tetzunj kyb'inte xjal aj Majdal-sikem titi' matxitoq tb'incha Ab'imelek, exi' klolkyib' toju' ja kuwsa'n toj tja kydyos El-b'erit.⁴⁷Tetzunj tb'inte Ab'imelek qa kykyaqil b'u'yi'ntoq kyib' atzu',⁴⁸xi' kyuk'i'lju' t-xjal te q'oj twi' witz Salmon ex tzaj ttx'e'mu'n jun tq'ob' tze tu'n jun k'uxb'il; jax tq'o'ntzuntz ti'j tqul ex xitma'n kyeju' t-xjal tu'n kyb'inchante kse'nxte.⁴⁹Kykyaqilx tzaj kytx'e'mu'n tq'ob' tze ex e'oklpe ti'j Ab'imelek, tetzunj kypon tk'etzju' tja kydyos xjal nimin twe', b'jo'k kyb'u'yi'n tkyaqilju' tq'ob' tze ex okkyq'o'n tq'aq'al, iktzu'n eb'aj kub'a'kyb'yo'n aj Miwdal-sikyem, ichan ex qya, qapelo kab'k'al lajnaq (1,000) kyb'aj.

⁵⁰Xi'tzun Ab'imelektz kyuk'i'lju' t-xjal te q'oj ti'ju' nintnam Teb'es, b'aj kytxoli'n kyib' ti'jile ex tzyet kyu'n.⁵¹Atitoq jun ja nimin twe' te kolb'il toj nky'ajchaqju' nintnam lu, atzuntzu' e'okxa' kykyaqilju' xjal najlqe' toju' nintnam ewal toj, e'ichan ex qya. B'je'tz kyjpu'nju' ja b'a'nxi'x ex e'jax twi'xi' ja;⁵²aye'tzunkye Ab'imelek kyuk'i'lju' t-xjal e'pon tzmax ttziju' ja nimin twe' ex e'oktzaqpaj q'ojil ti'j. Kxi'toqtzun toktq'o'n Ab'imelek tq'aq'al,⁵³tej tku'tz t-xon jun qya jun ab'j te cheb'l tib'aj, tojkuxi'x twi' kub'a' tz'aq ex majx el k'ab'chaju' twi'.⁵⁴Lwiyxi'xtzun tzaj ttxko'n Ab'imelek jun tonil toju' q'oj ex xitma'n te: iq'i'nktza tk'uẍtx'e'nb'ila ex chin tb'yoku'ya, qu'n min wajb'ile' tu'n tq'manjtz qa jun qya xkub' b'yonweye', chij. Tzajtzunju' onilte aq'pon t-xyu'n tu'n k'uẍtx'e'nb'il, iktzu'n kyima'.⁵⁵Tetzunj kyka'yinte aj Israel matxitoq kyim Ab'imelek, ajnkyi'j kyja.

⁵⁶Ikytzu'n tchoja' Ab'imelekju' til tb'incha ti'j tman tu'n Dyos tej kykub' tb'yo'nju' oxnaq lajoj (70) ttzik ex titz'in.⁵⁷Ex tb'incha Dyos tu'n tkub' kychjo'n xjal aj Sikyemju' kyil. Iktzu'n japuna'ju' kyej tqani'n Jotam tk'wal Jedeon kyib'aj. Tkawb'il Tola

¹Tkyimlenxi'tzun Ab'imelek, juntl ichan klonkye aj Israel. Tola tb'i, tk'wal Puwa ex tchman Dodo, tyajajil Isakar. Najlitoq toj tnam Samir, kywi' witz te Eprayin,²junaq oxe' (23) ab'q'i kawin toj Israel, tzmaxi'j tkyim ex kux mqu'n toj Samir. Tkawb'il Jayir

³Yajxi'tzuntl, atl Jayir aj Kalaad, kawin junaq kab'e' (22) ab'q'i toj Israel.⁴Junaq lajoj (30) tk'wal Jayir ten, teyile junjun intoq chejin tib'aj jun b'ur ex teyle junjun atitoq ninttanam toju' tx'otx' Kalaad. Majx kyejten kyb'iju' nimaqtnam lu e'nimaq ttanam Jayir.

⁵Tej tkyim Jayir, ku'x mqu'n toj tnam Kamon. E'kub' yaju'n aj Israel kyu'n aj Amon

⁶Aye'tzunju' aj Israel e'aq'wi jumajtl b'inchal taq'wix twitz Qman Dyos, ex ek'ulun kywitz chukchaq tilb'ilal B'aal ex Astarte, ex kywitz kydyos aj Sirya, aj Sidon, aj Moab', aj Amon ex kydyos pilistey. Kyej kytzaqpi'n Qman Dyos ex min e' k'uluntl twitz.⁷Qu'mtzun tzaj ttx'u'jil Qman Dyos kyi'j ex e'xitq'o'n toj kyq'ob' pilistey ex aj Amon.⁸Atxi'xtzunj, wajxaqlajoj (18) ab'q'i ten yajb'il kuwxi'x kyu'n pilistey ex kyu'n aj Amon kyib'aj kykyaqilju' aj Israel najlqe'toq Kalaad, jlaj a' Jordan, toj kytx'otx' amorey.⁹Ex eb'jik'xju' aj Amon jlajxi' nin a' Jordan q'ojil kyi'ju' kyyajajil Juda, B'enjamin ex Eprayin, ex e'ok aj Israel toj tx'i'wb'il kuwxi'x kyu'n.¹⁰E' kub'santzuntz te Qman Dyos, ex xikyma'n te ikjalu: Taye, matxi' qo b'inchan ile' twitza, qu'n matxi' kyej qtzaqpi'na tu'nju' maqo k'ulune' kye junxi'tl dyos mya ax, chechij.

¹¹Atzunte Qman Dyos tzaj ttzaq'we'n ikjalu: E' tx'i'wunjtze' kyu'n aj Ejipt, amorey, aj Amon, pilistey,¹²aj Sidon, aj Amalek ex kyu'n aj Madyan; tetzunj kykub'sane' weye', in kolone' kyi'je'.¹³Tuk'i'lxi'petzunj, in kyej kytzaqpi'ntle' ex exi'ye' k'ulul kye junxi'tl dyos, qu'mtzun layx che nkoltle'.¹⁴¡Kyqaninx o'nb'ile' kyeju' dyos ẍe jawkysk'o'ne'! ¡Che kletxtzune' kyu'n toju' yajb'il! chi Dyos.

¹⁵Xitzun kytzaq'we'n aj Israel te Qman Dyos kjalu: Matxi' qo b'inchan ile'. B'inchama qi'je' aju' tajb'ila, naq o'kx ¡b'inchama xtalb'il qo tkloma ja'lo! chechij.¹⁶Eb'je'xtzun kyxon aj Israel txqantl dyos ex ek'ulun jumajtl te Qman Dyos, atzunte Qman Dyos tzaj laqjtl tk'u'j kyi'ju' aj Israel intoq che yajtitl.

¹⁷B'aj kyb'u'yi'n kyib'ju' aj Amon ex e'kub'ten toj Kalaad. Ikxkye aj Israel b'aj kyb'u'yi'n kyib' ex e'kub'ten Mispa.¹⁸Aye'tzun aj Israel najlqe'toq Kalaad, kyej b'entti'j kyu'n kyuk'i'lju' kynejel, qa alkyete makub'nej toju' q'oj kyi'ju' aj Amon, oktoq k'okyel te nejenel kye kykyaqilju' xjal najlqe' toj Kalaad. Ok Jepte te nejenel

¹Atzunte Jepte kuwtoq q'ojin, najlitoq toju' tx'otx' Kalaad. Tal jun qya ajpajil ex tk'wal jun ichan Kalaad tb'i,²tu'ntzunju' ate'toq jte'tl tk'wal Kalaad tuk'i'lju' t-xu'jil, tej kych'iy ex kyxla'ja'n Jepte ex xikyma'n te qa mixtoqti' toklen ti'ju' etzb'il tu'n tman, qu'n talna' juntl qya.³Kub'tzun oq Jepte kywitzju' ttzik ex titz'in, ex xi' najal toju' tx'otx' Tob', jaeb'aja' tb'u'yina' jun tnej xjal b'iyolqe', intoq che ex tuk'i'l b'inchal taq'wixil.

⁴Tetzunj tb'et q'ij e'q'ojin aj Amon kyi'ju' aj Israel,⁵kychaq'tzun nejenel te Kalaad ttxokli Jepte najlitoq toju' tx'otx' Tob',⁶ex xikyma'n te:
—Kutzaja quk'i'le', qajb'ile' tu'n toka te nejenel qeye' toj q'oj kyi'ju' aj Amon, chechij.

⁷Atzunte Jepte xittzaq'we'n kye:
Ik'u'nqinawe' kyu'ne', expena' inetz kyxla'ja'ne' toj tja nmane'. ¿Ma tzmaxitzun ẍe ule' jyolweye' ja'lo tej ẍe oke' toj tch'uẍal? chij.

⁸Aye'tzunkye xikytzaq'we'n ikjalu:
—Apena'tzu'n ato'qo'ye' toj jun tch'uẍal maqo tzaje' jyolteya, qajb'ile' tu'n ttzaja quk'i'le' q'ojil kyi'ju' aj Amon, ex tu'n toka nejenel qeye' qkyaqile' najlqo'ye' toj Kalaad, chechij.

⁹—Qatzun kyajb'ile' tu'n tanjwi'je' q'ojil kyi'j aj Amon, exqa machin kanb'ane' kyi'j tu'n Qman Dyos, chin kjeltzuntze' te kynejele', chi Jepte xittzaq'we'n kye.

¹⁰Aye'tzunju' nejenel xikytzaq'we'n kjalu:
—Lu Qman Dyos nka'yin, kqb'incha'qe' tkyaqilju' matxi' tmaya, chechij.

¹¹Xi'tzun Jepte kyuk'i'l, ex okq'o'n te nejenel kyu'n tnam. Xitma'n jumajtl Jepte toj Mispa twitz Qman Dyos kse'nxju' tqani tnejel.¹²Xit-sma'ntzun junjun sanjelaltz qanilte teju' nimaqkawil kye aj Amon kjalu: ¿Titi' tq'oja wi'je', tu'nju' xtzaja q'ojil ti'ju' ntaname'? chij.¹³Atzunju' nimaqkawil kye aj Amon tzaj ttzaq'we'n kyeju' t-sanjelal Jepte: Tej kyetze' aye'ye' aj Israel toj Ejipt, el kyalq'a'ne' qtx'otx'e', tzajx ttzi a' Arnon ex ponx kytzi nin a' Jab'ok ex Jordan. Ja'lotzun kyanjsanjtz ti'je' toj b'anil, chij.

¹⁴Atzunte Jepte exi' tchq'o'n junjuntl t-sanjelal q'malte teju' nimaqkawil kye aj Amon,¹⁵kjalu: Chitzun Jepte qa ayo'qe' aj Israelqo'ye', b'ajx tz'ela' qiq'i'nqe' kytx'otx' aj Moab' ex kytx'otx' aj Amon.¹⁶Tej qetze' Ejipt, xi' o'ik'a'ye' toj chq'ajlaj tu'n qpone' ttzi Kyaq Ninnjab', ex opon kanune' tzmax Kades.¹⁷Exi'tzun qchq'o'ne' junjun sanjelal qanilte teju' nimaqkawil te Edom, tu'n ttzaj tq'o'n anb'il tu'n qik'e' kyoju' ttx'otx', atzunte min taj. Ex xiqqani'ne' teju' nimaqkawil te Moab', ex ikxte min taj tu'n qik'e'. Qu'mtzun o'kyajtene' Kades.¹⁸Yajxi'tzuntel ob'ete' toj chq'ajlaj, okumane' ti'jile kytx'otx' aj Edom ex aj Moab', tzmax qpone' toj tjawetzq'ij te Moab', okub'tentzuntze' atzu', jlajxi' nin a' Arnon. Mixtzunti' o'ik'xe' toj, qu'n atoqtzu' ntzyeta' kytx'otx' aj Moab'.¹⁹Exi'tzun qchq'o'ne' junjun sanjelal qanilte te Seon, nimaqkawil kye amorey toj Esb'on, tu'n ttzaj tq'o'n anb'il tu'n qik'e' toju' ttx'otx', tu'n qpone' toju' qtx'otx'e'.²⁰Atzunte Seon min qe tk'u'j qi'je' ex min taj tu'n qik'e' toju' ttx'otx'; e'tzajpe' tb'u'yi'n kykyaqilju' t-xjal te q'oj, e'kub'ten Jaas, e'oktzaqpajtzuntz q'ojil qi'je'.²¹Atzunte Qman Dyos, taq' tu'n tkub'ti'j Seon kyuk'i'lxi' t-xjal te q'oj qu'ne', kub' qtzyu'ntzuntze' tkyaqilju' kytx'otx' amorey toju' najb'il lu:²²Tkyaqilju' kytx'otx' amorey qtzuye', tzajx ttzi nin a' Arnon ex ponx ttzi nin a' Jab'ok, ex tzajx jata'ju' chq'ajlaj ex ponx ttzi nin a' Jordan.²³¿Tzun ja'lo ma tajb'ila tu'n teltiq'i'na eltiq'i'n Qman Dyos kye amorey ex tzaj tq'o'n qeye'?²⁴Ximankupe'ya, qama txiq'o'n jun ti'xti' teya tu'n Kyemos, tdyosa, ¿ma laytzun tz'oktetza'na? Ikxtzun qeju'ye' nokqq'o'ne' te qeye' aju' ntzaj tq'o'n Qman Dyos qeye'.²⁵¿Ma kuwxi'xtltzunta kyetwitz B'alak tk'wal Sipor, nimaqkawil aj Moab'? Mixpenati' ul te B'alak q'ojil qi'je'.²⁶Matxi' b'ent o'lajnaq (300) ab'q'i najliqo'ye' toj Esb'on, Aroer ex kyoju' najb'il nqaku' kyk'etz, ex kyoj kykyaqilju' nimaqtnam ttziyile a' Arnon; ¿tiqu'ntzun b'ajx tzaj kyqani'ne' tx'otx' toj tkyaqilju' tq'ijlalil lu?²⁷B'ajx nb'incha junwe' taq'wix ti'ja. A pena'ta qu'n in tzaja q'ojil qi'je'. Ate Qman Dyos ajkawil, ex ate kq'malte qa aye' aj Israel ati kypaj mujqa aye' aj Amon, chij.²⁸Tuk'i'lxi'pentzunju', min xib'i'n tyol Jepte tu'n nimaqkawil kye aj Amon. Ttziya Jepte jun tyol tu'n tjapun tu'n

²⁹Tentzun tipumal Jepte tu'n t-xew Qman Dyos, b'ajtzun tb'eti'n Jepte Kalaad ex Manases, ik' toj Mispa te Kalaad, tu'n tkub'ti'ju' kytx'otx' aj Amon tu'n.³⁰Ttziyatzun Jepte jun yol te Qman Dyos tu'n tjapun tu'n ikjalu: Qama chin kanb'ane' tu'na kyi'j aj Amon,³¹aju' matz'etz nej k'molweye' toj njaye' ajtanjtz wi'je' toj q'oj, kxe'l nq'o'ne' te jun oyaj k'ok'sb'il teya, chij.

³²Pontzun Jepte toj kytx'otx' aj Amon q'ojin kyi'j, ex kanb'an tu'n Qman Dyos.³³Nim ajq'oj e'kub' tb'yo'n Jepte, ex kub'kyi'j winqi'n nimaqtnam tu'n kyxol Aroer, Minit ex Ab'el-kyeramim. Iktzu'n kub'a' kyi'j aj Amon kyu'n aj Israel.

³⁴Tetzunj tanjtzti'j Jepte tja toj Mispa, aju' jun tal tmyal etz k'lulte intoq b'ixin ex in tq'ajtza'n chilchil. O'kxtoq jun tal twitz tmyalju' ex mixti' juntl tk'wal.

³⁵Qu'mtzun tej t-xi' tka'yi'n, kub' tlaqu'nju' t-xb'alun qu'n majx exch'yon toj tk'u'j, ex xitma'n te ikjalu: —¡nmyal, matxi' chin tak'e' tu'na! ¡ex aku'ya matxi' tz'ok te jun k'ixk'oj weye', qu'n matxi ntziya'ne' jun nyole' te Qman Dyos ex ilti'j tu'n tjapun wu'ne'! chij.

³⁶Xi'tzun ttzaq'we'n tal tmyal:
—Ta, chin t-sema kse'n xitma'na te Qman Dyos, qu'n matxina' japunte' tu'n tu'nju' makanb'ana kyi'j aj Amon ju' tajq'oja.³⁷Naq o'kx b'inchama xtalb'il, q'ontza anb'il weye' tu'n nxi' kab'e' xjawe' b'etel kywi'witz kyuk'i'lju' wamiwe' t-xin, tu'n tkub' woq'je'ne' tu'n tpaj na'mxtoq nmjeye' ajnkyime', chij.

³⁸Xi'tzun tq'o'n Jepte kab'e' xjaw anb'il te, tojtzunju' tq'ijlalil lu xi'ju' t-xin b'etil kywi'witz kyuk'i'lju' tuk'i'l, intoq oq' qu'n oktoq kyimel na'mxtoq tmje.³⁹Tb'ajlenxi'tzunju' tq'ijlalil lu anjti'j tk'etzju' tman, atzunte Jepte japunju' tyol xittziya'n te Qman Dyos. Kyimu' tmyal Jepte na'mxtoq tkub' kẍe jun ichan tuk'i'l.⁴⁰Qu'mtzun majx kyejten kyxol aj Israel tu'n kyb'ajx kyaje' q'iju' t-xin oq'el ti'ju' tmyal Jepte tkyaqil ab'q'i. Jun b'aj kyxol Jepte kyuk'i'l tnej tyajajil Eprayin

¹B'aj kyb'u'yi'n kyib'ju' ichan tyajajil Eprayin, e'ik'x jlajin toju' nin a' Jordan tu'me'lju' najb'il Sapon, ex xikyma'n te Jepte kjalu:
—¿Tiqu'n min saj tma'na qeye' tu'n qxi'ye' tuk'i'la q'ojil kyi'ju' aj Amon? ¡Ja'lo k'okyel qq'o'n tq'aq'alju'ye' tjaya tk'i'xi' aya toj! chechij.

²Xitzun ttzaq'we'n Jepte kye kjalu:
—Tzaj jun qq'oje' exqe' nxjale' kyuk'i'l aj Amon, ex e'ntxoke', aye'tzunkye' mixti' e'ule' klol qeye'.³Qu'mtzun tej wlonteye' min e'ule' onilqeye', elju' nchwinqlale' ti'jnk'u'je', inxi'tzuntze' q'ojil kyi'j aj Amon, ex nkanb'ane' tu'n Qman Dyos. ¿Tiqu'ntzun ẍe' ula'ye' q'ojil wi'je' ja'lo? chij.

⁴E'tzajtzun tb'u'yi'n Jepte kykyaqilju' ichan aj Kalaad, ex q'ojin kyuk'i'lju' tyajajil Eprayin ex kub'kyi'j tu'n. Intoq kyma'n tyajajil Eprayin kye aj Kalaad: naqna' elni kypa'nkye'kyib' kyi'j tyajajil Eprayin, extzun najlqe'ye' toj kytx'otx' tyajajil Eprayin ex Manases, chechij.⁵Elkyiq'i'n aj Kalaadju' tx'otx' ttziyile nin a' Jordan jata' ch'i'n t-xe a' kye tyajajil Eprayin, qatzun mapon oq jun tyajajil Eprayin ex matxitqani'n kye tu'n tik'x toju' nin a', inxikyqani'n te qa tyajajil Eprayin. Qatzun matxi ttzaq'we'n qa mya,⁶inxikyma'n te tu'n tmanteju' yol ẍib'olet, qatzun matma Sib'olet, qu'n junxi'tltoq che yolin, intoq kytzyu'n ex axtzu' nkub'a'toq kyb'yo'n ttzi nin a' Jordan. Jo'mutx' jo'k'al (42,000) ichan tyajajil Eprayin eb'aj toju' tq'ijlalil lu.

⁷Qaq ab'q'i ten Jepte te nejenel kye aj Israel. Tetzunj tkyim, kux mqu'n toj Kalaad ja itz'ja'. Oxe'tl nejenel kye aj Israel

⁸Tkyimlenxi' Jepte, ok Ib'san aj B'elen te nejenel kye aj Israel,⁹e'ten junaq lajoj (30) tk'wal ex junaq lajoj (30) tmyal, ex eb'ajkub' tmojb'an kyuky'i'l xjalxi'. Wuq ab'q'i ten Ib'san te nejenel kye aj Israel,¹⁰Tetzunj tkyim ku'x mqu'n toj B'elen.

¹¹Tkyimlenxi' Ib'san, ok lajoj (10) ab'q'i Elon tyajajil Sab'ulon te nejenel kye aj Israel¹²tetzunj tkyim, ku'x mqu'n toj Ayalon, toj kytx'otx'ju' tyajajil.

¹³Tkyimlenxi' Elon, a Ab'don tk'wal Yel aj Piraton ok wajxaq ab'q'i te nejenel kye aj Israel. Kab'naq (40) tk'wal Ab'don e'ten ex junaq lajoj (30) tchman, teyile junjun atitoq tb'ur iqilte.¹⁵Tetzunj tkyim, ku'x mqu'n toj tnam Piraton, ju' ati toj kytx'otx' tyajajil Eprayin kywi'witz te Amalek. Titz'jlen Sanson

¹E'aq'wi jumajtl aj Israel b'inchal taq'wix twitz Qman Dyos, atzunte Qman Dyos exi' tq'o'n kab'naq (40) ab'q'i toj kyq'ob' pilistey.

²Atitoqtzun jun ichan Manoa tb'i toj tnam Sora, tyajajil Dan. B'ajxtoq tzula' talju' t-xu'jil, qu'n mixtoqti' nalan.³Kub'tzun tyek'u'ntib'ju' tanjl Qman Dyos twitzju' qya ex tzaj tma'n te ikjalu: Layxtoq tz'alana, atzu'n ja'lo kjel ta ch'onwi' ex k'itz'jel jun tala q'a.⁴Lantzun k'wan q'e'na mo jun tx'amsa'n k'wab'j, ex lay txi' twana jun ti'xti' tz'il kse'nx ntma'n chaq'b'il,⁵qu'n ktiqa' twi' jun tala ex k'itz'jel jun tala q'a, mixti' tu'n tel joyet twi', qu'n kxjansetelte' twitz Qman Dyos na'mxtoq titz'ji, tu'ntzun ttzyet kykletju' aj Israel tu'n toj kyq'ob' pilistey, chij.

⁶Xi'tzun qyatz q'malte te tchmil ikjalu: Matzul jun t-sanjel Qman Dyos jatoq ta'qine' ex machin jaw lab'tiye' ti'j, qu'n naku'j tanjl Qman Dyoste'. Mixti'we' xxinqani'n te jasaja', ex mixti'te saj tma'n alkye.⁷A saj tma'nju' weye' qa ktenb'il jun wale' q'a, ex mixti' tu'n t-xink'wa'ntl q'e'ne' mo juntl tx'amsa'n k'wab'j, ex mixti' tu'n t-xitnik'b'e'ntl jun ti'xti'ye' mya ẍnu'lxi'x kse'nx ntma'n chaq'b'il, qu'n kxjansetelte' k'wal lu twitz Qman Dyos na'mxtoq titz'ji ex tzmax ajtkyim, chij.

⁸Xitzun tma'n Manoa te Qman Dyos toj tna'j Dyos ikjalu: B'inchama xtalb'il Nman Dyos, smantz jumajtla ichan lu qk'etze' tu'n ttzaj tma'n qeye' titi' qb'incha'ye' tu'n tch'isetju' ne'ẍ k'itz'jel, chij.

⁹Ex tzaj ttzaq'we'n Qman Dyos tqanb'e'tz Manoa, ex kub' tyek'u'n jumajtltib'ju' tanjl twitzju' t-xu'jil tej atitoq toj kojb'il. Mixtoqtzun a'lo' Manoa atzu',¹⁰xi' ojqelanju' t-xu'jil q'malte te ikjalu:
—¡Ka'yintzpe'ya, matxi' kub' tyek'u'n jumajtltib'ju' ichan kub' tkyek'untib' nwitze' jumaj! chij.

¹¹Jawtzun we' Manoa ex xi' tuk'i'lju' t-xu'jil jata'ju' ichan, ex xitma'n te ikjalu:
—¿Ma aya yolin tuk'i'lju' nxu'jile' tzqeku'? chij.
Tzajtzun ttzaq'we'nju' ichan:
—Ayinatzune', chij.¹²Xi'tzun tma'n Manoa te:
—¿Se'ntzun tu'n qch'iysanteye' ne'ẍ ajtjapunju' saj tma'na qeye'? ¿Titi' kqb'incha'ye' ti'j? chij.

¹³Tzaj ttzaq'we'n tanjl Qman Dyos te kjalu:
—Tu'n tb'inchante t-xu'jila tkyaqilju' matxi' b'ajxnma'ne' te:¹⁴mixti'x tu'n tk'wan q'e'n mo juntl tx'amsa'n k'wab'j mujqa jun tjaq' twa, o'kx tu'n twanteju' ti'xti' ẍnu'l kse'n ntma'n chaq'b'il. O'kxte tu'n tb'inchanteju' matxi' nchaq'e' te', chij.

¹⁵Mixtoqtzunti' b'i'n tu'n Manoa qa atoq tanjl Qman Dyosu' ichan lu, xitma'n te:
—B'inchama xtalb'il kutkyaja tu'n twana quk'i'le' ti'j jun qpoj tman chib' kb'el qb'incha'ne', chij.
Atzunju' anjl tzaj ttzaq'we'n te:
—Maskye machin kyajtene', lay b'ent nwane' ti'ju' kywaye'. Ate b'a'n q'onku'ya qpoj tman chib' te chojb'il k'ok'sb'il te Qman Dyos, chij.

¹⁷Xitzun tma'ntl Manoa teju' anjl kjalu:
—Naqna' o'kxju' tb'iya q'mantza tu'n tjaw qnima'na ajtjapunju' matxi' tmaya qeye', chij.

¹⁸Atzunju' anjl tzaj ttzaq'we'n te:
—¿Tiqu'n ntzaj tqani'na'ya nb'iye'? Xjan na'we' nb'i, chij.

¹⁹Tzajtzun tiq'i'n Manoa tal chib' exju' oyaj twitz awal k'ok'e'kywitz, e'kub' tq'o'n tib'aj jun pik te chojb'il k'ok'sb'il te Qman Dyos. Atzunte Qman Dyos tb'incha jun ti'xti' tb'anilxi'x kywitz:²⁰tej tjaw k'antju' q'aq' tib'aj q'olb'eb'l, jawu' tanjl Qman Dyos toju' tqan taq' q'aq' ex xi' toj kya'j. Tej kyka'yinte julu, ekub' mejetzuntz majx ekub' joqe twitz tx'otx'.²¹Eltnik' Manoa qa atoq tanjl Qman Dyosu' ichan lu, qu'n min kub' tyek'u'ntltib' kywitz;²²xitma'ntzuntz te' t-xu'jil:
—Qo b'ajelte' ja'lo, qu'n matxi' qil Dyos, chij.

²³Atzunte' t-xu'jil xittzaq'we'n:
—Naqwit tajb'il Qman Dyos tu'n qkub'tb'yo'n, Miwtlo jun xitk'mo'nju' chojb'il k'ok'sb'il exju' qoyaj xkub' qq'o'n, exwitlo min xtaj tu'n qlonteju' lu. Exwitlo min saj tma'n tkyaqilju' ti'xti' lu qe, chij.

²⁴Tetzunj tpon tq'ijlalil, itz'ji talju' qya, Sanson tb'i oktq'o'n. Intoq ch'iyju' k'wal, ex intoq k'i'wlantz tu'n Qman Dyos.²⁵Pon jun q'ij atitoq Sanson toj kynajb'il tyajajil Dan, kyxol Sora tuk'i'l Estaol, ten tipumal tu'n t-xew Qman Dyos. Tmjeb'le'n Sanson

¹Jun q'ij ku'pun Sanson toju' tnam Timnat ex oklaqj ti'j jun txin pilistey,²tetzunj tjawu'ltl tja, xitma'n kye tman ikjalu:
—Kyb'incham xtalb'ile', wajb'ile' tu'n kyxi'ye' qanilte jun txin pilistey oje wile' Timnat tu'n nmjeye' tuk'i'l, chij.

³Aye'tzu'n tman xikyma'n te:
—¿Titiqu'n xi'kxe'la'ya jyol t-xu'jila kyxol ma' pilistey? ¿ma mixtzunti'qe'tl txin kyxolju' qwitze'l, mujqa kyxol kykyaqilju' qxjalilx? chechij.
Atzunte Sanson xittzaq'we'n:
—Awe' txin lu nkub' toj nwitz, kyiq'i'ntze' te nxu'jile', chij.

⁴Mixtoqti' b'i'n kyu'n tman qa a tajb'il Qman Dyos tu'n tb'aj ikju', qu'n intoq tjyo'n tu'me'l tu'n tq'ojin kyi'j pilistey, ju' ntoq che kawin kyib'aj aj Israel toju' tq'ijlalil lu.⁵Eku'xtzun Sansontz kyuk'i'lju' tman ex ttxu toju' nintnam Timnat. Tetzunj kyik' t-xol tqan ub'a teju' nintnam, oktzaqpaj jun qpoj b'alun ti'j Sanson nxi'x tzanun.⁶Kb'u'l t-xew Qman Dyos tib'aj, ex b'aj t-ẍilu'nju' qpoj b'alun naq tu'n tq'ob', naku'tej jun tal chib' te; ex mixti'te xitma'n kye tman ti'ju' b'aj lu.⁷Xi'tzuntz ex yolin tuk'i'lju' txin kub' toj twitz.

⁸Tik'lenxi'tzun jte' q'ij, tej t-xi' jumajtl Sanson tu'n tmje tuk'i'lju' txin, eltpa'n tib' ex xi' ka'yilteju' b'alun kyimnitl, o'kx t-xi' tka'yi'n nchi k'amin txqan onin ex jun aq toj t-xmilalju' b'alun.⁹Jatz tlot'i'n ta'lkab' toj, xi'tzuntz nlo'n ti'j. Tetzunj tkub'kyi'ju' tman tu'n, xitq'o'n ta'lkab' kye ex xikylo'n, ex mixti' xitma'n kye qa toj t-xmilalju' kyimni b'alun etza' tu'n.

¹⁰Ku'pun tman Sanson ka'yilteju' txin; atzunte Sanson kub' ttzalajsa'n kse'nx nkyb'incha'n q'a aj kymje.¹¹Tzajtzun kyk'le'n pilistey junaqlajojtl (30) kamiw tu'n kyten tuk'i'l Sanson, qu'n matxitoq tz'ok kyka'yi'n ex intoq che xob' te.¹²Xitzun tma'n Sanson kyeju' junaq lajoj (30) xjal lu ikjalu:
—Kxe'l nma'n jun yole' kyeye' tu'n tpon kynab'le' ti'j. Qa mapoq'et kyu'ne' toju' wuq q'ij nkub' qtzalajsa'n, kxe'l nq'o'n jun oyaje' kyeye': jun xb'alun tz'umin sed ex jun ch'ix kyi'je' teyile junjunkye'.¹³Qatzun min xpon kynab'le' ti'j, teyile junjunkye' ktzajel tq'o'n jun pinpa't tz'umin sed ex i'jb'aj weye', chij.
Xi'tzun kytzaq'we'n te:
—Q'mantzna'ya titi' tu'n tpon qnab'le' ti'j. Luqo'ye' qob'ile' ti'j, chechij.

¹⁴Xitzun tma'n Sanson jun tyol tu'n tpon kynab'l ti'j ikjalu:
Matz'etz wab'j toju' intoq wan; ex chi' setz toju' tx'u'jtoq, chij.
Matxitoqtzun b'aj oxe' q'ij, mixti'x npoq'et kyu'n;¹⁵xikyma'ntzuntz toj twinqi'n q'ij teju' t-xu'jil Sanson:
—Jyom tu'me'la tu'n ttzaj tq'o'n tchmila tzaq'web'l teju' tyol saj tma'n tu'n qpoq'inteye', qatzun min kb'el qtz'e'ysa'na kyuk'i'lju' toj tjaya. ¡Ma qatzun naqxqo kytxoke' tu'n telkyiq'i'nju'ye' ati qeye'! chechij.

¹⁶Xi'tzun txintz tk'etz Sanson, in oq' tej t-xitma'n te ikjalu:
—¡Min nchin tk'u'jla'nta! ¡Inchin eltik'o'na! matxi tma'na jun tyola tu'n tpjet kyu'n nxjalile', atzu'n weye' b'ajx tzaj tma'na titi' tzaq'web'l te, chij.
Atzunte Sanson xittzaq'we'n te:
—Na'mxpena' t-xinma'nwe' te nmane' ex te ntxuye', mitzunloyate' tu'n t-xinma'ne' teya, chij.

¹⁷Atzunte' txin mixti'x qen tu'n toq' twitz Sanson toju' wuq q'ij kub' ttzalajsa'n, ilxi'xtoqti'j tu'n, xi'xtzun tma'n Sanson tzaq'web'l te yol toj twuqi'n q'ij te. Xi'tzun txintz q'malte kyeju' twnaqil.¹⁸Tojtzu'n twuqi'n q'ij, na'mxtoq tex q'ij, xikyma'n aj Timnat tzaq'web'l te Sanson ikjalu:
¿Ti'xi'xtzun juntl ti'xti' chi'xi'x twitz ta'lkab', ex alkyexi'x juntl majx tx'u'j kyetwitz b'alun?, chechij.
Atzunte Sanson xittzaq'we'n kye:
Naqwit min xkyjoy tu'me'l tuk'i'lju' tal nmsate' mixwitloti' xpon toj kynab'le', chij.

¹⁹Yajxi'tzuntel kb'u'l t-xew Qman Dyos tib'aj Sanson; xi'tzun Sansontz toj nintnam Askalon ex e'kub' tb'yo'n junaq lajoj (30) ichan atzu', kyu'ntzunju' kyxb'alun b'je'l tiq'i'n, xitchjo'nju' xittziya'n kye' epjunteju' yol xitma'n kye. Anjtzuntz tja inxi'x tx'u'jin,²⁰atzu'n t-xu'jil xiq'o'n te jun q'a kyxolu' junaq lajoj ten tuk'i'l Sanson.

¹Tb'ajlenxi'tzun jte' q'ij, toj tq'ijlalil tu'n tjoyet triy, xi' Sanson ka'yilte t-xu'jil, xitiq'i'n jun qpoj tman chib' te. Tej tpon xitma'n ikjalu:
—Chin okxch'i'nwe' ka'yilte nxu'jile' tuja, chij.
Atzunju' tji min taj tu'n tokx tuja,²ape' xitma'nju' te:
—Nchina'we' qa min tajb'iltla, qu'mtzun matxinq'o'nwe' te jun tamiwa. Atitzun juntl titz'in tb'anilxi'x ka'yin kyetwitz: q'inxa te t-xelju' ttzik, chij.

³Atzunte Sanson xittzaq'we'n te:
—¡Myatzun npaje' ja'lo qa ti' xnb'inchaye' kyi'j pilistey! chij.

⁴Xi'tzun Sanson tzyul o'lajnaq (300) saqb'in, b'jo'k tk'lo'n kyje kakab' kyten, ex oktk'lo'n tzaj ttxa'nile kyje junjun muj;⁵b'jo'ktzun ttxqo'n kytxa'n tzajtz ex exi' ttzaqpi'nju' saqb'in kyoj kyawal pilistey. Iktzu'n kub'a' ttz'e'ysa'n kytriy matxitoq jaw b'u'yi'n, exju' atixtoq toj tqan, ex ikqe'xju' tqan ub'a ex tqan olib'o.⁶Kyjoytzun pilistey tqanil alkye b'inchante ja'lu, kyb'i qa a Sanson tji jun ichan aj Timnat, qu'n elq'i'n t-xu'jil tu'n tji ex xiq'o'n te jun q'a ten tuk'i'l toju' tmjeb'le'n, exi'tzuntz tz'e'ysalte txin tuk'i'lxi' tman.⁷Xi'tzun tma'n Sanson kye ikjalu:
—Tu'ntzunte' xkyb'inchaye' lu, ¡Lay chin ojlanwe' qa min soknq'o'n tu'me'l t-xele' kyeye'! chij.

⁸Oktzaqpajtzuntz kyi'j tuk'i'l ttx'u'jil ex nim xjal e'kub' tb'yo'n. Xi'tzuntz najal toju' jyom toju' pik te Etam. Jun tb'incha Sanson tu'n tb'aqil txpetx b'ur

⁹E'tzaju' pilistey, e'kub'ten Juda ex e'ponx Leyi,¹⁰xi'tzun kyqani'n aj Juda kye:
—¿Tiqu'n ẍe ula'ye' q'ojil qi'je'? chechij.
Aye'tzunkye xikytzaq'we'n:
—Maqo tzaje' tzyulte Sanson tu'n tchjonteju' matxi' b'aj tb'incha'n qeye', chechij.

¹¹Tetzunj kyb'inte ja'lu, exi' wuqk'al lajnaq (3,000) ichan tyajajil Juda tk'etzju' jyom toj pik te Etam ex xikyma'n te Sanson ikjalu:
—¿Ma min b'i'n tu'na qa aye' pilistey nche kawin qib'aj? ¿Tiqu'ntzun saja' tiq'i'nju'ya lu qi'j? chechij te.
Xitzun ttzaq'we'n Sanson kye:
—O'kxnawe' xnb'incha tu'n toknq'o'n t-xelju'ye' taq'wix xkyb'incha weye', chij.

¹²Xi'tzun kyma'ntz te:
—Maqo tzaje' tzyulteya tu'n t-xi' qq'o'na toj kyq'ob' pilistey, chechij.
Xitzun ttzaq'we'n Sanson kye:
—Kymantzna'ye' axxi'x qa myaye'xe' kche b'el b'yonweye', chij.

¹³Aye'tzunkye xikyma'n te:
—Axxi'x, layna' kub' qb'yo'nta. Naq o'kx qajb'ile' tu'n ttzyeta qu'ne' ex tu'n t-xiqq'o'na toj kyq'ob' pilistey, chechij.
Kub' kyk'lo'ntzuntz tu'n kab'e' aqwil ak'a'j ex etzkyiq'i'n ja intoq ewana'.

¹⁴Tetzunj kypon toj Ley, e'etzju' pilistey k'lulte, inxi'xtoq che ẍch'in tu'n kytzalajb'il. Kb'u'ltzu'n t-xew Qman Dyos tib'aj Sanson, eb'je'l tlaqu'n aqwil k'alb'il kyeju' tq'ob', naku'j q'in tz'e'ynaqqe'tl ela' te;¹⁵jawtzun tiq'i'n jun tb'aqil txpetx b'ur atitoq atzu', na'mxtoq ttzqijxi'x, ex e'kub' tb'yo'n kab'k'al lajnaq (1,000) pilistey tu'n.¹⁶Tmatzuntz ikjalu:
Mab'aj jun mo kab'e' chquj xjal wu'ne' tu'n jun tb'aqil t-xpetx b'ur; mache kub' nb'yo'ne' kab'k'al lajnaq (1,000) ichan tu'n jun tb'aqil t-xpetx b'ur chij.

¹⁷Xi' t-xontzun tb'aqil t-xpetx b'urtz, ex oktq'o'n tb'i najb'il lu, Twi' Tb'aqil Ttzi B'ur.¹⁸Inxi'xtoqtzun k'wajti Sanson, kub'san twitz Qman Dyos ex xitma'n ikjalu: ¿Se'n taq'witzun tzaj tq'o'na wipumale' tu'n tkub'kyi'j txqan xjal wu'ne', atzu'n ja'lo nchin kyajtq'o'na' tu'n nkyime' tu'n k'waj ex toj kyq'ob' ma' xjal na'j min nche okslan teya? chij.

¹⁹Tjaqtzun Qman Dyos jun xoch ati Twi' Tb'aqil Ttzi B'ur, k'wantzun Sansontz ti'ju' a' in jatz toju' xoch, ex oktl tipumal. Qu'mtzun oktq'o'n tb'iju' t-xiklil a' Twi' Tb'aqil Ttzi B'ur te T-xiklil a' te Nkub'san. Ex majx kyej tenju' xoch lu.

²⁰Winqi'n ab'q'i ten Sanson nejenel kye aj Israel, toju' tq'ijlalil intoq che kawin pilistey toju' tx'otx' lu. Pon Sanson toj tnam Kasa

¹Jun q'ij xi' Sanson toju' nintnam Kasa. Oktka'yi'n jun qya naq eqch kyuk'i'l ichan atzu', ex okx toj tjaju' qya tu'n tkyejten tuk'i'l te qonik'an.²Tetzunj kyb'inteju' xjal aj Kasa qa atitoq Sanson toju' nintnam, b'jo'k kytxoli'n kyib' ti'jile; ex b'aj q'ij kyu'n xq'uqilte ttziju' nintnam. Exi'tzuntz wtal te qonik'an, toj kynab'l qatoq kb'el kyb'yo'n ajqsqix.³Atzunte Sanson naq nik'jan qonik'an wtan. Texi'x tk'u'j aq'b'il tjawe' ex b'jatz t-xb'oqi'n tjpelju' nintnam kyuk'i'lxi' tqul ex xtanb'ilte, eb'jax tq'o'n tkyaqil ti'j tqul, jax tiqa'ntzuntz twi'ju' witz ati tk'etz Eb'ron. Sanson tuk'i'l Dalila

⁴Yajxi'tzuntel oklaqj Sanson ti'j jun qya Dalila tb'i, najlitoq toju' b'ya' Sorek.⁵Aye'tzu'n kynejel pilistey exi' tk'etz Dalila ex xikyma'n te kjalu:
—Sb'unku'ya Sanson ex jyoma tu'me'l tu'n teltnik'a ja ntzaja' tipumal nimxi'x, ex se'n taq'wi tu'n tkub'ti'j qu'ne'; tu'n tb'ant tk'let ex tu'n ttzyet qu'ne'. Tu'ntzu'n tajb'eb'la lu, teyle junjunqe' kxe'l tq'o'n kab'k'al o'lajnaq 1,100 saqpwaq teya, chechij.

⁶Xitzun tqani'n Dalila te Sanson kjalu:
—Q'mantztzunta weye' ja tu'me'l ntzaja' tipumala nimxi'x. ¿Ma ati jun tu'me'l tu'n tkub'k'leta ex lay b'ent ttzaqpaja? chij.

⁷Xi'tzun ttzaq'we'n Sanson te:
—Qama chin kub'k'lo'ne' tu'n wuq tz'u'n aqwil cha'x, oktzun k'elel wipumaltze' ex chin okyele' kse'n alkyexku' xjal, chij.

⁸Xi'tzun kyiq'i'n kynejel pilistey wuq tz'u'n aqwil ak'a'jqe' te Dalila, kub'tzun tk'lo'n Dalila Sanson kyu'n aqwil lu.⁹Matxitoqtzun che okx tewa'n jte' ichan toju' tja, jawtzun ẍch'in:
—¡Sanson, luqe' pilistey che ul ti'ja! chij.
Atzunte Sanson b'je'l tlaqu'nju' aqwil, naku'j jun tal ky'jaj tz'e'ynaqtl te. Ex min nelkynik' pilistey ja ntzaja' tipumal.¹⁰Xitzun tma'n Dalila te:
—¡Machin kub' t-sb'u'na! ¡Naqpelo taky'i'na weye'! Q'mantz tzuna weye' axxi'x, titi' ati tu'n tb'inchet tu'n tb'ent tk'leta, chij.

¹¹Xitzun tma'n Sanson te:
—Qama chin kub'k'lo'ne' kyu'n nimaq aqwil ak'a'j b'ajx che ajb'ena', k'eleltzun wipumaltze' ex chin okyele' kse'n kykyaqil xjal, chij.¹²Tzajtzun tiq'i'n Dalila jte' nimaqkawil ak'a'j ex kub' tk'lo'n kyu'n, jaw ẍch'intzuntz:
¡Sanson, luqe' pilistey che ul ti'ja! chij.
Ex toju' maj lu matxitoq che okx tewa'n Dalila jte' ichan toju' tja; atzunte Sanson eltlaqu'nju' nimaq aqwil naku'j tal q'in ẍk'li'k te.¹³Xitzun tma'n Dalila te Sanson:
—¡Kukx nkub' t-sb'u'nju'ya! ¡Kukx tchan yolju'ya weye'! ¡Q'mantza weye' titi' tu'n tb'inchet tu'n tb'ent tk'leta! chij.
Xi'tzun ttzaq'we'n Sanson te:
—Xpatx'inxa wuq tneju' t-xya'mal nwi'ye' kyuk'i'l tq'inil chemuj ex awanku'xa stak kuw toj tx'otx'. K'eleltzun wipumaltze' ex chin okyele' kse'n alkyexku' xjal, chij.
Kub'tzun twat-sa'n Dalila Sanson, ex kut-xpatx'i'n wuq tneju' twi' Sanson kyuk'i'l tq'inil chemuj,¹⁴kux tpoji'ntzun staktz b'a'nxi'x toj tx'otx', jawtzun ẍch'intz:
¡Sanson luqe' pilistey che ul ti'ja! chij.
Atzunte Sanson jaw we' ex majx b'jatz xb'oqliju' stak toj tx'otx' exju' chmob'l xb'alun tu'n.¹⁵Xitzun tma'n Dalila te:
—¡Chalyol! ¿Tiqu'ntzun ntma'na qa nxi'x chin tk'u'jla'na? Matxi' b'ent oxmaj nchin kub' t-sb'u'na, ex na'mx ttzaj tma'na weye' ja ntzaja' txqan tipumala, chij.

¹⁶Tu'ntzunju' nxi'xtoq wulin Dalila, ax t-xjelju' tkyaqil maj, matxitoq sikti Sanson ex tajb'iltoq tu'n tkyim;¹⁷xi'xtzun tma'ntz te Dalila ja ntzaja' tipumal:
—Mix-a'lo'xi' jun tz'el jonte t-xya'mal nwi'ye', qu'n xjansa'n qintltoqe' twitz Qman Dyos na'mxtoq witz'jiye'. Qatzun matz'el jonju' t-xya'mal nwi'ye', knajelju' wipumale', chin okyeltzuntze' mixti' wipumale' kse'n kykyaqil xjal, chij.

¹⁸Tetzunj teltnik' Dalila qa xitma'n Sanson axxi'x te toju' maj lu ja ntzaja' tipumal, xitchq'o'n tq'umli kyeju' kynejel pilistey kjalu:
—¡Kutzun kytzaje' ja'lo, qu'n matxi' tzaj tma'nte Sanson weye' ja ntzaja' tipumal! chij.
Exi'tzu'n pilistey tk'etz Dalila ex xikyiq'i'n pwaq.

¹⁹Kub'tzun twat-sa'n Dalila Sanson, kub' tkuẍb'a'n twi'tqan, ex xitma'n te jun ichan tu'n tel tjonju' wuq xpatx'b'ente twi'. Aq'witzuntz ililte Sanson,²⁰ex xit-ẍch'i'n te:
—¡Sanson, luqe' pilistey che ul ti'ja! chij.
Tzajtzun tna'ntib' Sansontz, toj tnab'l qatoq kb'entel tklet kse'nxju' matxitoq tzajxi', qu'n mixtoqti' b'i'n tu'n qa matxitoq kyej tzaqpi'n tu'n Qman Dyos.²¹Tzyettzuntz kyu'n pilistey ex eb'je'tz kyiq'i'n tb'aq' twitz, xikyiq'i'ntzuntz toj tnam Kasa, jab'aja' kyk'lo'n tu'n xpatx'q'ank'uxb'il ex okkyq'o'n aq'unal ti'j jun cheb'l triy toj kars.²²O'kx taq' ch'iyel jumajtlju' t-xya'mal twi'. Tkyim Sanson

²³B'aj kyb'u'yi'n kyib' nejenel pilistey tu'n tkub' kytzalajsa'n tkub'lenti'j Sanson kyu'n, ex tu'n t-xi' kyq'o'n chojb'il te Dakon ju' kydyos. Intoq xikyb'itza'n kjalu:
Matxi' kub'tz'aq qajq'oj Sanson toj qq'ob' tu'n qdyos, chechij.

²⁴Tetzunj kyka'yinte xjalu' Sanson, ex ikxkye eb'itzan ex jaw kynima'n kydyos, inkyma'n ikjalu:
Matxi' kub' tz'aq Sanson qajq'oj toj qq'ob' tu'n qdyos, ju' toktoq yajlalte qawal toj kojb'il ex nche kub' tb'yo'n qxjalil, chechij.

²⁵Inxi'xtoq che tzalaj, xikyqani'n tu'n ttzaj iq'i'n Sanson kye tu'n kyxja'jayin ti'j. Etzkyiq'i'n toj kars, ojexi'x che b'aj saqchan ti'j Sanson, ex kub' kywab'a'n kyxol tqan ja.²⁶Xitzun tma'n Sansontz teju' ku'xun xkolte tq'ob':
—Chin tiq'inxa ja tu'me'l b'a'n kyoka' ntzyu'ne' tqan ja iqalteju' ja te k'u'lb'il, wajb'ile' tu'n wok qejeye' kyi'j, chij.

²⁷Ate'toqu' kynejel pilistey kykyaqil toju' ja te k'u'lb'il nojnitoq kyu'n txqan ichan ex qya. Ex ate'toqlo wuqk'al lajnaqtl (3,000) ichan ex qya twi'xi ja, intoq che ka'yin kyi'ju' txqantl intoq che xja'jayin ti'j Sanson.²⁸Kub'santzun Sansontz twitz Qman Dyos, xitma'n ikjalu: Nman Dyos, b'inchama xtalb'il, chin tna'tztla tk'i'x o'kx jumajtl, q'ontz jumajtla wipumale' tu'n tok tu'me'l t-xel tejumajx kye pilistey tu'ntpaj setz kyiq'i'n kab'e' tb'aq' nwitze', chij.²⁹Exi'tzun t-xmaka'n kab'e' tqan ja toj nky'ajchaq, aye' iqalxi'x teju' nin ja, exi' tlmo'ntzuntz kyu'n tq'ob', jun tu'n tb'anq'ob' atzun juntl tu'n tnayaj,³⁰jaw ẍch'intzuntz ex tma: Chin kyimxtzuntze' kyuk'i'l pilistey, chij.
Exi' tlmo'ntzuntz tu'n tkyaqil tipumal, kub'tzun niq'j jatz kyib'aju' nejenel kye pilistey, ex kyib'aj kykyaqilju' ate'toq atzu'. Nimxi'x kyb'aju' e'kub' tb'yo'n Sanson tej tkyim kyekywitzju' e'kub' tb'yo'n toj tkyaqilu' tchwinqlal.

³¹Eku'puntzun junjun twnaqil Sansontz ex kykyaqilju' twitze'l, jawx kyiq'i'n xikyiq'i'n t-xmilal ex ku'x kymqu'n t-xol Sora tuk'i'l Estaol, toju' muqb'il te Manoa ju' tman. Winqi'n (20) ab'q'i ten Sanson te nejenel kye aj Israel. Ja te k'u'lb'il tja Mikayiy

¹Atitoq jun ichan Mikayiy tb'i, najlitoq kywi'witz te Eprayin,²jawtz tma'n til te ttxu ikjalu:
—Ate' kab'k'al o'lajnaq (1,100) t-saqpwaqa xi' elq'a'n, ex xitqani'na taq'wix tib'aju' eleq' tu'n tpaj, lu te' ati wuk'i'le'. Ayinwe' nxi' elq'ante; ja'lo kxel wanjsa'n ti'je' teya, qu'n nb'iye' teya qa ojetoq txitq'o'na toj tq'ob' Qman Dyos tu'n t-xitq'a' b'incha'ya jun tilb'ilal ktxu'nti'j tu'n saqpwaq, chij.
Xitanjsa'n ti'ju' saqpwaq. Xitzun tma'n ttxu te:
—¡Awt Qman Dyos k'i'wlanteya wal! chij.

⁴T-xilenxi'tzun tanjsa'n Mikayiy pwaq te ttxu, xitq'o'n ttxu lajnaq (200) saqpwaq te jun b'inchal tilb'ilal tu'n tkub' tb'incha'n jun tilb'ilal tx'no'n ex ktxu'n tu'n saqpwaq, xitiq'i'ntzuntz tja Mikayiy.

⁵Atitoq jun ja te k'u'lb'il tja Mikayiy. Ex kub' tb'incha'n jun ẍa'y ex e'twitzleb' toj tja, ex oktq'o'n jun tk'wal te pale.⁶Mixtoqna'ti' nimaqkawil toj Israel toju' tq'ijlalil lu, teyile junjun intoq tb'incha'n aju' b'a'n toj twitz.

⁷Atitoq jun ku'xun toj B'elen tyajajil Juda, aj Leb'i, mixti' tja.⁸Etzju' ku'xun lu toj B'elen jyol juntl najb'il jatu'n tkub'a najan, intoqtzun b'et kywi'witz te Eprayin, kanun tja Mikayiy.

⁹Xitzun tqani'n Mikayiy te: —¿Jasaja'ya? chij.
Xittzaq'we'n ku'xun te: —Xi' ẍin tzaja'ye' B'elen, aj Leb'i qine' ex nchin jyone' jatu'n nnajana'ye', chij.

¹⁰Xi'tzun tma'n Mikayiy te ikjalu:
—Tenkja wuk'i'le' tu'n toka te npaleye' ex naku'j nmane'. Kxel nchjo'na tu'n lajoj (10) saqpwaq toj jun ab'q'i tib'ajxi' t-xb'aluna ex ti'ja, chij.

¹¹Kub'tzun toj twitz aj Leb'i tu'n tkyejten najal tuk'i'l Mikayiy ex ok naku'j jun tk'wal.¹²Oktzun tq'o'n Mikayiy te tpale, kyejtzun ten aj Leb'i najal atzu'.¹³Kub'tzun t-xima'n Mikayiy qa atixi'xtoq tk'i'wb'il Qman Dyos tib'aj, qu'n aj Leb'i toqna' ati te tpale. Jun b'ajkye tyajajil Dan ti'j Mikayiy

¹B'ajxtoq tz'oka' jun nimaqkawil toj Israel toju' tq'ijlalil lu. Ex na'mxtoq tten kytx'otx'ju' tyajajil Dan kyeku', qu'mtzun intoq che jyon ti'j jatu'n kykub'a' ten.²Qu'mtzun exi' kychq'o'n tyajajil Dan jwe' ichan min nche xob', te nenul toj ewaj ex ka'yilteju' tx'otx', e'tzajx toj tnam Sora ex Estaol. Exi'ju' jwe' nenul toj ewaj lu kywi'witz te Eprayin ex e'pon tja Mikayiy, jae'kyaja'ten te qonik'an.³Tej kypon tk'etz tja Mikayiy elkynik' teju' yolin ku'xun aj Leb'i, ex exi' qanilte te:
—¿Alkye tzaj q'inteya tza'lu? ¿Tiqu'n atiya tzalu? ¿Titi' in tjyo'na tzalu? chechij.

⁴Xitma'n aj Leb'i ojetoq kyej b'entti'j tu'n Mikayiy tuk'i'l kye, ex se'n oka' te tpale.⁵Aye'tzunkye xikyma'n te:
—Qaninxa te Qman Dyos tu'n qb'inteye' qa b'a'n k'elela' qb'eye' ljo'n, chechij.

⁶Xitzun ttzaq'we'n pale aj Leb'i kye:
—Lalun che b'isune', che xq'uqinjtzelkye' tu'n Qman Dyos jaxjaku' mache'xa'ye', chij kye.

⁷Exi'tzu'n jwe' nenultz toj ewaj toju' nintnam Lays. Aye'tzu'n xjal najlqe'toq toju' nintnam lu, intoq che anq'in toj nak'b'il ex q'uq'li kyk'u'j, kse'nxtoq nche anq'ina' aj Sidon; nak'b'iltoq ta'qe' ex mixti' xitb'il kyxol, mix-a'lo' yekulkye ex tkyaqil ati kye. Najchaqtoq ta'qe' kyk'etzju' aj Sidon, ex mix-a'lo' quk'i'l ta' kymojb'ab'l.⁸Anjtzun kyi'ju' jwe' nenul toj ewaj lu Sora ex Estaol, jatoq ta'qe'ju' kyuk'i'l, ju' exi qaninte kye ikjalu:
—¿Se'n ẍe oka'ye'? chechij.
Aye'tzunkye xikytzaq'we'n:

⁹Matxi' b'aj qb'eti'nqe' tx'otx' lu, majx tb'anilte' ¡Lwiyqe'xe'! ¡Qo'qe'ye' q'ojil kyi'j! ¡Lalun naq che kyej qeye'! ¡Ati tu'n qxi' kub'salteti'ju' tx'otx' lu!¹⁰Okpe' kyla'ye' ajqpon atzu', q'uqlixi'x kyk'u'ju' xjal ex nim kytx'otx' ati, ex tkyaqil ati kye. Ktzajel tq'o'nte Qman Dyos tx'otx' lu qe, chechij.

¹¹Junk'al lajnaq (600) ichan tyajajil Dan e'etz Sora ex Estaol iq'i'mile kyq'ojb'il,¹²e'pontzuntz Juda ex e'kub'ten atzu', toj tkub'exq'ij te Kyiryat-jearim, toju' najb'il majx ok tb'i kyxmuj tyajajil Dan.¹³Exi'tzuntz twi' witz te Eprayin, ex e'pon tja Mikayiy.¹⁴Aye'tzu'n jwe' nenul toj ewaj ju' ojetoq kyka'yiju' tx'otx' Lays, xikyma'n kyeju' kyuk'i'l:
—Kyb'intzpekye', ati jun ẍa'y ex e'dyos kyaju' xjal najlqe' tzalu, ex ati jun tilb'ilal b'incha'n ktxu'nkti'j tu'n saqpwaq, ¿Titi' nkyxima'ne' tu'n qb'inchante ti'j? chechij.¹⁵Eltzun kypa'n kyib'ju' nenul toj ewaj kyi'ju' txqantl kyuk'i'l ex exi' tk'etzju' ku'xun aj Leb'i tja Mikayiy, ex xikyq'olb'e'n.¹⁶Aye'tzu'n Junk'al lajnaq (600) xjal te q'oj tyajajil Dan iq'i'mile kyq'ojb'il intoq che ayon ttzija.¹⁷Nejtl kyb'jo'kxju' jwe' nenul toj ewaj tuja ex etzkyiq'i'n witzleb' ktxu'nti'j tu'n saqpwaq, exju' ẍa'y exqe' dyos toj kyjaju' xjal, atzu'n pale atoqtzu' ta' ttzija kyuk'i'lju' junk'al lajnaq (600) xjal te q'oj.

¹⁸Tetzunj tka'yinteju' pale intoq che okxju' jwe' toj tja Mikayiy ex intoq etzkyiq'i'n witzleb', ex ẍa'y exqe' dyos toj kyja xjal, xitma'n kye:
—¿Ti'tzu'n nb'ajkyeye'? chij.

¹⁹Xitzun kytzaq'we'n te:
—¡K'ultziya ex kuttzaja quk'i'le'! ¡Qajb'ile' tu'n tajb'ena qeye' te qpaleye' ex tu'n toka te manb'aj qeye'! ¿ma myatzun b'a'n toj twitza tu'n toka te pale te jun tnej tyajajil Israel, kyetwitz naq te jun ja xjal? chechij.

²⁰B'a'n ela'ju' lu toj twitzju' pale, xi'tzuntz kyuk'i'l tyajajil Dan tuk'i'lju' tilb'ilal ex ẍa'y exqe' tilb'ilal toj kyja xjal,²¹xikyljo'ntzun jumajtl kyb'etz kyuk'i'lju' kyk'wal, kyalu'n ex tkyaqilju' ati kye nejliqe' kywitz.²²Nimtoqtzun matxitoq txi' kyb'eti'n tej tb'aj kyb'u'yi'n kyib' Mikayiy kyuk'i'lju' tb'esin ex exi' knolkye.²³Tetzunj kyb'inte tyajajil Dan inxi'xtoq che ẍch'in lepchiqe'x knolkye, anjtz miltz'uj kyi'j ex xikyqani'n te Mikayiy:
—¿Titi' nb'ajteya? ¿titiqu'n inxi'x ẍch'ina qi'je'? chechij.

²⁴Xitzun ttzaq'we'n Mikayiy kye:
—Mache tzaj kyiq'i'nju'ye' ndyose' b'incha'nqe' wu'ne', ex matzaj kyiq'i'ne' npaleye' ex mixti'tl xkyaj kyq'o'ne' weye', ¿extzun inx tzaj kyqani'ne' titi' xb'ajweye'? chij.

²⁵Xitzun kytzaq'we'n tyajajil Dan te:
—Lalun jaw toj twi'ya kuw qi'je', qu'n jaku' tzaj toj kywitz junjun qxole', jakutzun che oktzaqpajtz q'ojil kyi'je' tu'n tb'aja exqe' toj tjaya, chechij.

²⁶Atzunj tka'yinte Mikayiy nimtoq txqan kyb'aj, anjti'j tja; aye'tzu'n tyajajil Dan xikyljo'n kyb'e²⁷kyuk'i'lju' ti'xti' e'kub' tb'incha'n Mikayiy, exju' tpale, e'pontuntz tzmax toj Lays. Eb'ajkub' kyb'yo'n tyajajil Dan kykyaqilju' xjal atzu' tu'n k'uẍtx'e'nb'il ex okkyq'o'n tq'aq'alju' nintnam, qu'n tojtoq nak'b'il ta'qe' xjal lu ex mixtoqti' inb'ajx kyk'u'j,²⁸Mix-a'lo'te klonteju' nintnam lu qu'n najchaqtoq ta' tk'etz Sidon, mixtoq jalojaxta' tmujb'ab'l. Xi'toqta' toju' b'ya' te B'et-reob'. Yajxi'tzuntel jawkyb'incha'ntl tyajajil Dan nintnam ex e'kyajten najal atzu'.²⁹Lays tb'iju' tnam lu tnejel, aye'tzunkye okkyq'o'n tb'i Dan, te ninb'ilte tb'i ojtxi' kyyajilb'en, ju' tk'wal Israel.³⁰Atzuntzu' kub'a' kyq'o'n tyajajil Dan, witzileb' b'incha'n, tu'n kyk'ulun te, ex a Jonatan okkyq'o'n te pale, tk'wal Kerson ex tchman Moyses. Yajxi'tzuntl aye' tyajajil Jonatan e'ok te kypale tyajajil Dan, tzmaxi'j kyxi' iq'i'n toj juntl tnam.³¹Kyxol tena'ju' witzleb' kub' tb'incha'n Mikayiy toj tkyaqilju' tq'ijlalil tej ttenju' ja xjan te Qman Dyos toj Silo. Jun b'aj ti'j aj Leb'i tuk'i'l tqya

¹Toju' tq'ijlalil mixtoqti' nimaqkawil toj Israel, najlitoq jun aj Leb'i najchaq kywi'witz te Eprayin tzaj tiq'i'n jun qya aj B'elen toj Juda te tqya.²Atzunte' qya lu jaw q'ojin tuk'i'l ex anjti'j tja tman toj B'elen. Tb'ajlenxi'tzun kyaje' xjaw tpomlen tja.³Xi' aj Leb'i jyolte ex kub'sal twitz tu'n tanjtzti'j tuk'i'l. Xitiq'i'n jun tmajin ex kab'e' tb'ur, atzunj tpon, k'monjtz tu'nju' qya toj tja tman.⁴Ex ikx k'monjtz toj tzalajb'il tu'n tmanju' qya, ex xitma'n tu'n tkyaj kyuk'i'l. E'kyaj oxe' q'ij aj Leb'i tuk'i'lju' tmajin tja tmanju' qya, e'wan, e'k'wan ex e'wtan,⁵Tojtzun tkyaji'n q'ij b'a'nprim kyjawe' tu'n kyanj. Tetzunj ikytoqu' kyxi', xitma'n tman qya te tji:
—Wana nej, maskye naq jun piẍ twaya tu'ntzun atiku' tipumala toj b'e, chij.

⁶Ekub'tzun qe kykab'ilx wal ex k'wal, xi'tzun tma'n tmanju' txin te tu'n tkyaj jun qonik'antl toj tzalajb'il.⁷B'a'ntzunqa tajb'ilte aj Leb'i tu'n tanj tej tjawe', okye'ju' tji ti'j tu'n tkyejten, ex kyejten.

⁸B'a'nprim tjawe' aj Leb'i toj tjwe'yi'n q'ij tu'n tanj, kub'san jumajtl tmanju' txin te tu'n t-xitwan jun twa nej, tu'ntzun atiku' tipumal; e'wantzuntz junx, o'kx tjaw q'ij.⁹Tetzunj tjawe' aj Leb'i tu'n tanj tuk'i'lju' tqya exju' tmajin, xitma'nju' tji qa matxitoq jaw q'ij ex matxitoq qo'qex, ex xitma'n te tu'n tkyejten jun qonik'antl toj tzalajb'il ex tu'n tanj te prim toj jun q'ijtl.¹⁰Atzunte' aj Leb'i min taj tu'n tkyejten jun qonik'antl, anj tuk'i'lju' tqya ex tmajin exju' kab'e' tb'ur tokx q'uqb'il kyi'j. Atzunj kykanun tk'etz Jeb'us, ju' Jerusalen,¹¹xitma'nju' majin te aj Leb'i:
—¿Ma b'a'n toj twitza tu'n qkyaj teju' qonik'an toju' ninkytanam jeb'usey? chij.

¹²Xitzun ttzaq'we'n aj Leb'i te:
—Lay qo'x toj jun nintnam qa mya kytanam aj Israel, qo'ya tzmax Kib'ea,¹³qo'qe'ye' tu'n qkyaj wtan Kib'ea mujqa Rama, chij.

¹⁴Xikyljo'ntzun kyb'etz, tetzunj xi'toq tex q'ij e'pon Kib'ea, ninkytanam tyajajil B'enjamin.¹⁵Ewe'tzuntz ex e'okx toj Kib'ea tu'n kykyaj te qonik'an atzu', ex kub' qe aj Leb'i toj k'wik, qu'n mix-a'lo' xiq'onte kykub'el tu'n kykyaj wtan.

¹⁶O'kx tik' jun tijwnaq tzajnix aq'unal toj kojb'il matxitoq qo ok yupj. Tetoq juntl tnam kywi'witz te Eprayin, naq te jte' q'ij atitoq atzu', qu'n tyajajil B'enjamin qekye' najlqe'toq toju' tnam Kib'ea.¹⁷Tetzunj t-xi' tka'yi'n tijwnaqju' ajb'etu'n toj k'wik, xitqani'n te:
—¿Jasaja'ya, ex jamatxa'ya? chij.¹⁸Xitzun ttzaq'we'n aj Leb'i te:
—Xi' xqo tzaja'ye' B'elen toj Juda ex maqo'xe' tzmax kywi'witz te Eprayin ja najla'qine'. Machin tene' B'elen, atzu'n ja'lo matz'anj wi'je' njaye', naqtzun a' mix-a'lo' ntzaj q'onte anb'il jatu'n qkyaja' wtane'.¹⁹Atite k'ul ex ttxa triy te kywa nb'ure', ex atite qwaye' ex qk'wa'ye' te qoxile'. Mixti'te nojqelan qeye', chij.

²⁰Atzunte' tijwnaq xittzaq'we'n te:
—Lalun b'isuna. Knb'incha'we' tkyaqilju' nojqelan teya. Myab'a'n toj nwitze' tu'n tex qonik'an tu'na toj k'wik, chij.

²¹Exitiq'i'ntzuntz tja, tetzunj tb'je'l kytxjo'n ajb'etu'n ti'j kyqan, e'wan ex ek'wan, ex xitq'o'n tijwnaq kywaju' b'ur.²²Tojtzu'n kmoj inxi'xtoq che tzalaj, b'aj kytxoli'n kyib' junjun ichan ti'ju' ja, ju' ate'toq toju' nintnam q'o'nkyib' b'inchal taq'wixil ex e'okten pojilteju' tjpel ja, intoq okx kyma'n teju' tijwnaq tajaw ja kjalu:
—¡Q'omitzju'ya ichan sul tuk'i'la! ¡Qajb'ile' tu'n qkub' kẍeye' tuk'i'l! chechij.

²³Atzu'n tajaw ja kub'san kye:
—¡Lay witz'in, kyb'inchame' xtalb'il! ¡Lalun kyb'inchaye' taq'wix lu, qu'n mank'amwe' ichan lu tu'n tkyaj wtal njaye'!²⁴Qatzun kyajb'ile', ati na'ju' nmyale', na'mx t-xitzyu'nti'j tu'n ichan. Ex ati tqyaju' ichan. Che elex nq'o'ne' tu'n kykub' kyyaju'ne' ex tu'n kyb'inchanteye' kyuk'i'l titi' kyajb'ile'. Naq o'kx lan kyb'incha jun ti'xti'ye' taq'wix ti'ju' ichan lu, chij.

²⁵Aye'tzunkye mixti' xikyb'i'n tyolju' tijwnaq, tzajtzu'n aj Leb'i etztq'o'n tqya toj b'e, e'oktzun ten ichan lu jwolte ex b'aj kyyajla'n tb'aj qonik'an, tzmax qsqix. Kyej kytzaqpi'ntzuntz.²⁶Intoqtzun qo elspik'e' tej tpon jumajtlu' qya tja tijwnaq, jatoq ta' tchmil, kub' tz'aq ttzija ex majx kyim.²⁷Tetzunj tjawe' tchmil, tjaqju' jatu'n t-xitljo'n tb'e, o'kx t-xitka'yi'n tqya woqli ttzija, tkub'qe' tq'ob' t-xeju' tjpel ja.²⁸Xitma'ntzuntz te:
—We'ktza qo'ya, chij.
Atzunte' qya mixti' tzaq'wi. Jawxtzun tq'o'nju' qya kyimnitl tib'aj jun b'ur, xi'tzun tljo'n tb'etz tu'n tpon tja.²⁹Tetzunj tpon tja, tzaj tiq'i'n jun qesb'il ex b'ajkub' tjonju' qtzan tqya toj kab'lajoj (12) piẍ, xit-sma'ntzuntz kyxol kykyaqilju' aj Israel.³⁰Kykyaqiltzunju' e'okka'yinte intoq kyma'n ikjalu:
—B'ajx qila' jun ti'xti' kse'n ja'lu kyetzlenju' aj Israel toj Ejipt. Ati tu'n qximan ti'ju' lu ex tu'n tkyejb'ent ti'j titi' kqb'incha' ti'j, chechij. Jawkyiq'i'nkyib' aj Israel tu'n tpaju' b'yonkamik b'aj Kib'ea

¹Kykyaqilxtzunju' aj Israel, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j ex Kalaad, b'aj kyb'u'yi'n kyib' twitz Qman Dyos toj Mispa.²Kykyaqilju' nejenel kye junjun tnej tyajajil Israel ate'toq, ex b'aj kyb'u'yi'n kyib' kab'naq lajmutx' (400,000) xjal te q'oj ttanam Qman Dyos qe'.³Kyb'iju' tyajajil B'enjamin qa matxitoq b'aj kyb'u'yi'n kyib'ju' txqantl tnej tyajajil Israel toj Mispa. Ex xikyqani'n aj Israel te' aj Leb'i se'ntaq'wi tb'ajiju' il lu.⁴Xitma'n aj Leb'i tchmilju' qya b'aj yaju'n ex kyim kjalu:
—In pone' tuk'i'lju' nqyaye' toju' nintnam Kib'ea, kytanam tyajajil B'enjamin, tu'n nkyajtene' te qonik'an atzu'.⁵Aye'tzu'n xjal toju' nintnam lu b'aj pon kyb'u'yi'n kyib' ti'ju' ja jatoq ta'qo'ye' teju' qonik'an lu, tu'ntoq nkub' kyb'yo'ne', ex eb'jo'k tzaqpaj jwolte nqyaye' ex majx kyim kyu'n.⁶Tzaj wiq'i'ntzuntze' kyimnitl, b'ajkub' waq'pu'ne', ex xi' nsma'ne' jun piẍ toj kytx'otx' junjun tnej tyajajil Israel, tu'ntzun kyb'inte kykyaqil aj Israel il lu taq'wixi'x.⁷Tojtzun kyq'ob'e' tyajajil Israel ta' ja'lo tu'n kymanteye' titi' tu'n tb'inchet, chij.

⁸Kykyaqilxtzunju' tnam xjal junx kyxim, e'kub' we' ex kyma:
—Mix-a'lo' junqe tu'n tanj tja.⁹A kqb'incha'ju' kxelqse'n tu'me'l tu'n tel tnik'tzil alkyeqe' tu'n kyq'ojin ti'j Wib'ea.¹⁰Junjun ti'j lajoj (10) xjal te kykyaqilju' tnej qyajajil, kxe'l jyol kywaju' xjal te q'oj; aye'tzu'n txqantl che kxe'l q'olte tu'me'l t-xel kye aj Wib'ea tu'nju' il taq'wixi'x xkyb'incha kyxol aj Israel, chechij.

¹¹Kykyaqilju' aj Israel e'muje, junx kyxim tu'n kyq'ojin ti'ju' nintnam.¹²Exi' kychq'o'n sanjelal toj tkyaqilju' tx'otx' kye tyajajil B'enjamin q'malte kye ikjalu: ¿Tiqu'n xb'aja'ju' il lu taq'wixi'x kyxole'?¹³Kyq'onqe'tze' xjal tx'yanqe' ate' toj tnam Wib'ea tu'n kykub' qb'yo'ne', tu'ntzun tnajsetju' il lu qxol, chechij.
Aye'tzunkye' tyajajil B'enjamin mixti' exi kyb'i'n txqantl aj Israel kytzik,¹⁴ape' kyb'inchaju' b'aj kyb'u'yi'n kyib' te kykyaqilju' nimaqtnam toj Wib'ea, tu'n kyxi' q'ojil kyi'ju' jte'tl aj Israel.¹⁵Oxmutx' jo'k'al (26,000) kyb'aju' xjal te q'oj e'tzaj kyoj kykyaqil nimaqkytanam tyajajil B'enjamin, myaqe'tzuntlu' junk'al o'lajnaq (700) ichan sk'o'nqe' aj Wib'ea.¹⁶Kyxoltzu'n kykyaqilju' ichan lu ate'toq junk'al o'lajnaq (700) b'a'ntoq che xon tu'n kynayaj, majx in yab'o'k jun xya'n kyu'n ex mixti' jumaj inwt txalpuj kyu'n.¹⁷Ikxkye' txqantl aj Israel b'aj kyb'u'yi'n kab'naq lajmutx' (400,000) xjal q'ojil ik'ni kywitzlalil b'a'nxi'x. Q'oj kyi'ju' tnej tyajajil B'enjamin

¹⁸Exi' aj Israel B'etel, xi' kyqani'ntzuntz te Qman Dyos tu'n kyb'inte alkye tnej kyyajajil kq'ojil nejtl kyi'ju' tyajajil B'enjamin. Tzaj ttzaq'we'n Qman Dyos kye qa a Juda kq'ojil nejtl.¹⁹Primtzun kyb'jaw we' aj Israel ex e'kub'ten twitzju' tnam Wib'ea.²⁰E' b'aj pon lq'e kyk'etzju' tyajajil B'enjamin, ex e'kub'ten twitz Wib'ea, txoli'nkyib' tu'n kyq'ojin.²¹Aye'tzunkye' tyajajil B'enjamin e'etz toju' nintnam, ex e'kyim kab'mutx' o'lajk'al (22,000) aj Israel kyu'n toju' q'ij lu.²²Qu'mtzun exi' aj Israel toj B'etel oq'el twitz Qman Dyos tzmaxi'j qok yupj, ex xikyqani'n qa ati tu'n tanj jumajtlkyi'j q'ojil kyi'ju' kyitz'in tyajajil B'enjamin. Tu'ntzunju' tchaq' Qman Dyos tu'n kyq'ojin jumajtl, tentl kyipumal, exi' jumajtl q'ojil te juntl q'ij kyi'ju' tyajajil B'enjamin jaxju' epona' nejtl.²⁵Aye'tzunju' tyajajil B'enjamin eb'je'tz jumajtl toj Wib'ea q'ojil kyi'j, ex e'kyim kab'mutx' jo'k'atl (18,000) aj Israel te q'oj kyu'n.²⁶Kykyaqiltzunju' xjal aj Israel te q'oj ex kykyaqilju' tnam exi' jumajtl B'etel oq'el twitz Qman Dyos. Mixti' e'wan tb'aj q'ij, ex kub' kyq'o'n chojb'il k'ok'sb'il ex chojb'il te mujb'ab'l twitz Qman Dyos.

²⁷Atoqtzu' ta'ju' kax k'ub'lteju' yol kyejni b'entti'j tu'n Qman Dyos toj B'etel toju' tq'ijlalil lu, toj tq'ob'u' pale Pinees tk'wal Eleasar ex tchman Aaron ta'ya'toq. Xi'tzun kyqani'ntl aj Israel te Qman Dyos ikjalu: ¿Ma kqo q'ojil jumajtle' kyi'ju' qitz'ine' tyajajil B'enjamin, mujqa ẍe tenku'j? chechij. Tzajtzun tma'n Qman Dyos kye: Kukyxi'ye' q'ojil, qu'n che kanb'alkye' najchi'j wu'ne', chij Dyos.

²⁹Ekub'tzun jutze jte' xjal aj Israel te q'oj ti'jile Wib'ea,³⁰aye'tzu'n txqantl xi'toq kyxi' kyi'ju' tyajajil B'enjamin toju' toxi'n q'ij lu, ex b'aj kynk'u'nkyib' tu'n kyq'ojin twitz Wib'ea, kse'nx kyb'incha toju' kamaj nejtl.³¹E b'je'tztzun jumajtlju' tyajajil B'enjamin najchaq ti'ju' nintnam tu'n kyq'ojin kyi'ju' aj Israel. E'b'ajlo junaq lajoj (30) aj Israel kyu'n toj tb'eyil B'etel ex Kib'ea, ex kyoj kojb'il,³²Toj kynab'l qa intoq che oqu' aj Israel kywitz, exqa matxitoq kub'kyi'j kse'n toju' kab'e' maj nejtl. Wichiqa intoq che el lq'e aj Israel najchaq ti'ju' nintnam, tu'n kyxilpeju' ajq'oj kyi'j tzmax kyoju' b'e.³³E'etztzun aj Israeltz jatoq jutzla'qe' ex kub' kytxoli'n kyib' tu'n kyq'ojin toj B'aal-tamar; ex ikx eb'je'tzju' jutzlqe'toq toj k'ul ti'jile Wib'ea³⁴ex e'oktzaqpaj q'ojil ti'ju' nintnam. Junmutx' jo'k'al (10,000) kyb'aju' nimaq q'ojil aj Israel e'oktzaqpaj q'ojil ti'j Wib'ea. Kuwtoqju' q'oj, ex mixtoqti' b'i'n kyu'n tyajajil B'enjamin qa xi'toq tkub'kyi'j.³⁵E'kanb'an aj Israel tu'n Qman Dyos kyib'aj tyajajil B'enjamin, oxmutx' kab'k'al o'lajnaq (25,100) xjal te q'oj tyajajil B'enjamin e'kyim kyu'n aj Israel toju' q'ij lu.³⁶Eltzun kynik' tyajajil B'enjamintz qa matxitoq kub'kyi'j.
E b'je'x lq'eju' aj Israel najchaq nejlqe'toq kywitzju' tyajajil B'enjamin, qu'n q'uqlitoq kyk'u'j kyi'ju' ichan jutzlqe'toq tu'n kyq'ojin ti'j Wib'ea.³⁷Naqxi'x myanim kyok tzaqpaju' ichan lu q'ojil ti'j Wib'ea ex eb'aj kub' kyb'yo'n kykyaqilju' xjal toju' nintnam Wib'ea.³⁸B'entnitoqtzun ti'j kyu'nju' jutzlqe'toq tu'n kyok tzaqpaj q'ojil ti'ju' nintnam kyuk'i'lju' txqantl aj Israel tu'n kymante tqanil tu'n txqan sib' ajttzyetju' nintnam kyu'n.³⁹Tojwittzunloju' kmoj naku'j eb'aj kub' oqju' aj Israel aj t-xi' kyka'yi'nju' sib', tu'nwtlo tanjkyi'j q'ojil kyi'ju' tyajajil B'enjamin.
E' kyimx junaq lajoj (30) aj Israel kyu'n tyajajil B'enjamin, tu'ntzun ja'lu qe kyk'u'j, toj kynab'l qa matxitoq kub'kyi'j kyu'n, kse'n toj tnejel q'oj;⁴⁰o'kx tjaw sib' toju' nintnam, tetzunj kyanjtz ka'yinju' tyajajil B'enjamin kyi'jxi', nxi'x jaw tqan taq' q'aq', ex majxtoq in japun t-sb'elu' nintnam twitz kya'j.⁴¹Anjtzun jumajtlkyi'ju' aj Israel q'ojil kyi'j, aye'tzu'n tyajajil B'enjamin e'kub'numj tej kyka'yinte qa matxitoq tzaj tilj kyib'aj.⁴²E'kub' oqtzuntz kywitzu' aj Israel toju' b'e nxi' toj chq'ajlaj, mixtzunti' b'ent kyoq, qu'n e'mqet kyu'nju' eb'je'tz toj nintnam ex majxtoq nche kub' kyb'yo'n.⁴³B'aj kytxoli'n kyib'u' aj Israel kyi'ju' tyajajil B'enjamin, exilpe kyi'j ex e'kub' kyb'yo'n txi'x Menua ex ponx toj tjawetzq'ij te Wib'ea.

⁴⁴Iktzu'n ekyima' kab'mutx' jo'k'al (18,000) xjal te q'oj tyajajil B'enjamin.⁴⁵Aye'tzu'n txqantl anjtzkyi'j ex eb'ajx oq toj chq'ajlaj, tu'me'lju' pik Rimon, ex kab'lajk'al lajnaq (5,000) e'kyim kyoj b'e. Exilpe aj Israel kyi'j, ex eb'aj kytoqi'n, e'kub' kyb'yo'n jo'k'al (2,000) ichan.⁴⁶E'kyim oxmutx' kab'k'al lajnaq (25,000) xjal te q'oj kuwxi'x che q'ojin kyxol tyajajil B'enjamin toju' q'ij lu.⁴⁷Ate'tzun junk'al lajnaqtl (600) tyajajil B'enjamin anjtzkyi'j ex eb'ajx oq toj chq'ajlaj, ex e'kyajten kyaje' xjaw toju' pik Rimon.⁴⁸E'oktzaqpaju' aj Israel q'ojil kyi'ju' txqantl tyajajil B'enjamin ex eb'ajkub' kyb'yo'nju' ichan tu'n qesb'il tojile junjun nimaqtnam, eb'aj kub' kyb'yo'n alu'mj ex tkyaqilju' b'je'l yal kyu'n toj kyb'e, ex b'jo'k kyq'o'n kyq'aq'alju' nimaqtnam. Jawb'ent jumajtlu' tnej tyajajil B'enjamin

¹Ojetoqtzun kytziya aj Israel toj Mispa qa laytoq kyej tu'n kymjeju' kymyal kyuk'i'l jun tyajajil B'enjamin.²B'ajtzun kyb'u'yi'n kyib' toj B'etel ex e'ten twitz Qman Dyos tzmaxi'j qok yupj, intoq che oq' ex inche lab'ti:³¡Taye, Qman Dyos! ¿Tiqu'n sik'a'ju' lu qi'je'? ¿Se'n taq'wi mixti'tlju' juntl tnej tyajajil Israel ja'lo? chechij.

⁴Tetzun juntl q'ij b'a'nprim kyb'jaw we' aj Israel, kub' kyb'incha'n jun q'olb'eb'l ex kub' kyq'o'n chojb'il k'ok'sb'il twitz Qman Dyos ex chojb'il te b'inchb'il.⁵Ex intoq che xjelun kyxolx: ¿Alkyeqe'tzuntl qxol qkyaqil minti' e'ten toju' b'uyjtib'il toj Mispa? chechij, qu'n ojetoq kytziya tu'n kykub' kyb'yo'n alkyeqe' min ẍeten toju' b'uyjtib'il.

⁶Inxi'xtoqtzun che b'isun aj Israel tu'nju' matxitoq b'aj kyi'ju' kytzik e'kyitz'in ju' tyajajil B'enjamin, ex intoq kyma'n ikjalu: Matxi' jatz b'oqli junju' tyajajil Israel ja'lo.⁷¿Titi' kqb'incha' tu'n kyjyet kyxu'jilju' tyajajil B'enjamin itz'qe'x? Qu'n ojena' qtziya twitz Qman Dyos tu'n lalun che'x qq'o'n qmyal te kyxu'jil.⁸¿Ma ati jun aj Israel tzalu minti' pon twitz Qman Dyos toj Mispa? chechij.
Tzaj kyna'ntzuntz qa mix-a'lo' jun aj Jab'es toj Kalaad ten toju' b'uyjtib'il,⁹qu'n mix-a'lo' jun teju' najb'il lu tzaj tzaq'wente tej tjawju' kyajlal.¹⁰Kykyaqiltzunju' tnam exi' smankye junmutx' lajk'al (12,000) xjal te q'oj kuwxi'x che q'ojin tu'n kykub' kyb'yo'n kykyaqilju' aj Jab'es tu'n k'uẍtx'e'nb'il, e'k'wal exqe'ju' qya oje txi' tzyu'nkyi'j kyu'n ichan.¹²E' knet junk'al (400) txin kyu'n b'ajxtoq txa' tzyu'nkyi'j tu'n ichan kyxolju' najlqe'toq Jab'es ex e'tzaj kyiq'i'n toju' xmuj atitoq Silo toj Kanaan.¹³Kykyaqiltzunju' tnam xikychq'o'n kyjoyli tyajajil B'enjamin ate'toq toju' pik Rimon, ex xikyma'n kye tu'n tten nak'b'il kyxol.¹⁴Anjtztzun kyi'ju' tyajajil B'enjamin, ex exikyq'o'n aj Israel, ju' txin e'tzaj kyiq'i'n Jab'es te kyxu'jil. Mixtzunti' e'kanunju' qya te kyxu'jil kykyaqil.

¹⁵E'ex ch'yonju' tyajajil B'enjamin toj kyk'u'ju' aj Israel, qu'n matxitoq kub'naj jun tnej tyajajil Israel tu'n Qman Dyos.¹⁶Intoqtzun che xjelunju' nejenel kye tnam kyxolx ikjalu: ¿Jatzun che tzajela'tl qya qu'n te kyxu'jilju' txqantl, qu'n majxna' ẍekub'najsa'nkye' qya tyajajil B'enjamin?¹⁷Ati tu'n ttenkye' tyajajil B'enjamin kyoklen kyxolju' tnej qyajajil, kyu'nelju' min ẍe kyim, tu'ntzun kyten kykyaqilju' tnej tyajajil Israel.¹⁸Naqtzun aju' lay b'ent kyxi' qq'o'n qmyal kye tu'n kymje kyuk'i'l, qu'n qkyaqil aj Israelqo' oje qtziya tu'n ttzaj taq'wix tib'aju' matxi tq'o'n tmyal kye tyajajil B'enjamin.¹⁹Atipe'te ninq'ij atl junjun ab'q'i twitz Qman Dyos toj Silo, ju' ati toj tb'a'nq'ob'kya'j te B'etel, toj tjawetzq'ij teju' b'e intzajx B'etel ex in pon Sikyem, ex toj tnayajkya'j te Leb'ona, chechij.

²⁰Xitzun kysma'n nejenel kye aj Israel tqanil kyeju' tyajajil B'enjamin kjalu: Kukyxi'ye' ex che jutzeku'ye' toj tqan ub'a awa'n nqayin tk'etz Silo,²¹ex b'a'nx che ka'yine'. Ajtzun kyetzju' txin aj Silo b'ixil toj tneji'n, kukyetztzuntze' ja jutzla'qe'ye' ex teyle junjunkye' elq'anx jun txin te t-xu'jil, kukyxi'tzuntze' toj kytx'otx'e'.²²Qatzun ẍe ulju' kyman mujqa kyxib'en q'malte qeye', kxel qkub'sa'ne' kye tu'n kyb'inchante xtalb'il naku'xwitloj qeye' tu'n tkub' kynajsa'n, qu'n minti' xb'ant kyknet kyxu'jile' qu'ne' te kykyaqile' toju' q'oj kyi'j aj Jab'es. Exna' myaye' ẍe'x q'onkye kyeye', mixti'te kypaj ti'ju' yol tziya'n, chechij.

²³Kub'tzun toj kywitzju' tyajajil B'enjamin tu'n kyb'inchanteju' xiq'ma'n kye, qu'mtzun teyile junjun tzaj talq'a'n jun txin te t-xu'jil kyxolju' ntoq che b'ixin, ex xitiq'i'n. Anjtzun kyi'jtz toj kytx'otx', ex eb'jaw kyb'incha'n jumajtl nimaqkytanam ex e'najan kyoj.

²⁴Ikqe'xju' txqantl aj Israel e'anj, teyle junjun anjti'j toj ttx'otx', kyxolilex kywitze' kse'nxju' tnej kyyajajil.

²⁵B'ajxtoq tz'oka' jun nimaqkawil kyxol aj Israel toju' tq'ijlalil lu, teyile junjun intoq tb'incha'n axju' b'a'n toj twitz.

Bible Society in Guatemala

https://app.library.bible/content/aea9d9099feb3a24