Joshua23
1कुछ बारिस के बाद यहोवा इस्राएली लोग के ओखनी के चारो तरफ के दुश्मन से शांति देलन, आउर यहोशू उमरदार आउर बड़ी बूढ़ा हो गेलन।2तऽ यहोशू सभे इस्राएली लोग के, मतलब कि ओखनी के सभे पुरनिया, पुरखा, प्रधान, न्यायी, आउर हाकिम लोग के बुलईलन, आउर ऊ ओखनी से कहलन, हम उमरदार आउर बड़ी बूढ़ा हो गेली हे।3जे कुछ तोर परमेश्वर यहोवा तोहनी लागी ई सभे जाति में कईलन हे, ऊ सभे कुछ तोहनी देख लऽ हे, काहेकि तोर परमेश्वर यहोवा तोरा लागी लड़लन हे।4देखऽ! यरदन नदी से लेके सूर्यास्त के दन्ने महासागर ला जेतना राष्ट्र हम काट देली हे, ऊ सभे के हम विरासत के रूप में तोहनी के हाथ में दे देली हे5तोर परमेश्वर यहोवा ओखनी के तोहनी भीरी से निकाल देतन, आउर जईसन तोर परमेश्वर यहोवा तोहनी से कहलन हे, ओईसहीं तोहनी ओखनी के देश के अधिकारी बन जईबऽ।6येहिगुने जे कुछ मूसा के व्यवस्था के पुस्तक में लिखल हे, ओकरा पालन करे में बड़ी चौकसी रखिहऽ आउर हिम्मत बाँधिहऽ, अईसन नऽ होवे कि तूँ ओकरा से दाहिना चाहे बामा मुड़ जा।7अईसन नऽ होवे कि तूँ ई जाति के बीच में जा, जे तोहनी के बीच में रह गेल हे। तोहनी ओकर देऊता के नाम नऽ लेवे लगिहऽ, आउर नऽ ही ओखनी के किरिया खईहऽ, आउर नऽ ओखनी के उपासना करिहऽ, आउर नऽ ओखनी के दण्डवत करिहऽ।8एकर बदले, तोहनी के अपन परमेश्वर यहोवा से लिपटल रहे के चाही जईसन कि तोहनी आज के दिन ला कईलऽ हे।9काहेकि यहोवा तोहनी के सामने से बड़ा आउर शक्तिशाली जाति के दूर कर देलन हे। ऊ आज ला तोहनी के खिलाफ खड़ा नऽ होल हे। 10तोहनी में से एगो आदमी हजार के बराबर होत, काहेकि यहोवा तोहनी के परमेश्वर हथन। ऊ ओही हथन जे तोहनी लागी लड़ऽ हथन, जईसन कि ऊ तोहनी से कहलन हल।11येहिगुने अपन खुद से होशियार रहऽ, आउर अपन परमेश्वर यहोवा से प्रेम रखऽ।12बाकि सचमुच जदि तोहनी कईसहूँ यहोवा से पीछे मुड़ के ई जाति के जे बचल लोग हे, जे तोहनी के बीच में रह रहल हे, मिलवऽ आउर जदि तोहनी ओखनी से बियाह कर लेबऽ, आउर तोहनी ओखनी के बीच में चल जईबऽ, आउर ओखनी तोहनी के बीच में रहतन,13तऽ पक्का ई जान लिहऽ कि तोर परमेश्वर यहोवा ई जातियन के तोहनी के बीच में से फिनो नऽ हटईतन, बाकि ई तोहनी लागी फंदा, आउर तोहनी के आँख के लट्ठा हो जायेत, आउर तोहनी के आँख के काँटा ठहरत, आउर आखिरी में तोहनी ई देश में से जे तोर परमेश्वर यहोवा तोहनी के देलन हे, नाश हो जईबऽ। 14अखनी सुनऽ, आज हम सभे पृथ्वी के मार्ग होकर चलम, आउर तोहनी अपन अपन दिल आउर अपन अपन मन में जानऽ हऽ, कि जेतना भलाई के बात तोर परमेश्वर यहोवा तोहनी के बारे में कहलन हे, ओकरा में से एगो भी अईसन नऽ हे जे नऽ पूरा होवल हे। तोहनी सभे में सभे कुछ पूरा होवल हे ओकरा में से एगो भी वचन बेकार नऽ होल हे।15ई कारण से अईसन होत कि जेतना बढ़ियाँ बात तोर परमेश्वर यहोवा तोहनी के बीच में कहलन हल, ऊ सभे तोहनी पर पूरा होल हे, ओईसहीं यहोवा तोहनी पर सब बुरा बात भी पूरा करतन जब ला कि ऊ तोहनी के ई अच्छा देश से सत्यानाश नऽ कर देतन जे तोर परमेश्वर यहोवा तोहनी के देलन हे।16जखनी तोहनी अपन परमेश्वर के वाचा के उलंघन करबऽ जेकर वाचा ऊ तोहनी के देलन हे आउर जा के पराया देवता के उपासना करबऽ आउर ओखनी के दण्डवत करबऽ, तऽ यहोवा के क्रोध तोहनी पर भड़कत, आउर तोहनी ऊ कनान के बढ़ियाँ देश से जे तोर परमेश्वर यहोवा तोहनी के देलन हे, जल्दिये ही नाश हो जईबऽ।
Bridge Connectivity Solutions Pvt. Ltd.