Exodus28
1फिन तूँ इस्राएलियन में से अपन भाई हारून, आउर ओकर बेटवन नादाब, अबीहू, एलीआजर आउर ईतामार के अपना भीर लाके हमरा ला याजक ठहरावऽ जेकरा से कि ऊ याजक के काम करतन।2आउर तूँ अपन भाई हारून ला वैभव आउर शोभा ला पवित्र कपड़ा बनवईहऽ।3जेतना के दिल में बुद्धि हे, जिनका हम बुद्धि देवेवाला आत्मा से भरली हे, ओकरा तूँ हारून के कपड़ा बनावे के आज्ञा दऽ कि ऊ हमरा ला याजक के काम ला पवित्र होवे4जौन कपड़ा बनावे के होत ऊ ई हे, सीनाबंद; आउर एपोद, आउर बागा, चार खाना के अंगोछा, पुरोहित के टोप, आउर कमरबन्द; ई सभे कपड़ा तोर याजक भाई हारून आउर ओकर बेटवन ला बनावे के हे कि ऊ हमरा ला याजक के काम करतन।5आउर ऊ कारीगर सोना आउर नीला आउर बैंगनी आउर लाल रंग के पतला सनी के कपड़ा लेलनऽ।6ऊ एपोद के सोना, आउर नीला, बैंगनी आउर लाल रंग के कपड़ा के आउर बूटी होल पतला सनी के कपड़ा के बनावल जाय, जे कि कुशल कढ़ाई के काम करे वाला के हाथ से करावे के चाही। 7आउर ई ऊ तरह से जोड़ल जाय कि ओकर दूनो कंधवन के कोना आपस में जूटल रहत।8आउर एपोद पर जे काढ़ल पटुका होत ओकर बनावट ओकरे जईसन होत, आउर ऊ दूनो बिना जोड़ के होत, आउर सोना आउर नीला, बैंगनी आउर लाल रंग वाला आउर बटल पतला सनीवाला कपड़ा के होत।9फिन दूगो सुलैमानी मणि लेके ओकरा पर, इस्राएलियन के बेटवन के जनम के नाम खोदवावे के हे।10ओकर नाम में से छौगो तऽ एगो मणि पर, आउर बाकि छौगो नाम दूसरका मणि पर, इस्राएलियन के बेटवन के जनम के अनुसार खोदवावे के हे।11मणि खोदेवाला के काम के जईसन जईसे छापा खोदवावल जा हे, ओईसने ऊ दूगो मणियन पर इस्राएलियन के बेटवन के नाम खोदवावे के हे; आउर ओकरा खान के जगह में जड़ देवे के हे।12आउर दूनो मणियन के एपोद के कंधा पर लगावे के हे, ऊ इस्राएलियन के समान यादगारी दिलावे ला मणि ठहरत; माने कि हारून ओकर नाम यहोवा के आगे अपन दूनो बांधवा पर यादगारी ला लगइले रहतन।13फिन सोना के खाना बनवईहऽ।14आउर डोरियन के जईसन गूंथल दूगो जंजीर चोखा सोना के बनावे ला होत; आउर कुशल कारीगर के ऊ खनवन में जड़ेला ला होत।15फिन न्याय के सीनाबंद के भी कढ़ाई के काम बनावे ला होत; एपोद के जईसन सोना आउर नीला, बैंगनी आउर लाल रंग के आउर बांटल गेल पतला सनी के कपड़ा के ओकर बनवईहऽ।16ऊ चार खूँटा आउर दोहरा होत, आउर ओकर लम्बाई आउर चौड़ाई एक-एक बित्ता के होत17झोला पर कीमती पत्थरवन के चार धारी मणि बाँधिहऽ। पहिलका धारी में लाल माणिक्य, एगो पीला पोखराज आउर एगो हीरा पन्ना रखिहऽ।18दूसरका धारी में हरा फिरोजा, नीलमणि आउर हीरा रखिहऽ।19तिसरका धारी में लाल लशम, सफेद सुलैमानी पत्थल, आउर बैंगनी नीलम रखिहऽ।20आउर चौथा धारी में फिरोजा सुलैमानी मणि आउर गोमेद रखिहऽ; ई सभे सोना के खनवन में बैठावल जाय21आउर इस्राएलियन के बेटवन के जेतना नाम हे ओतना मणि होत, माने कि ओकर नाम के गिनती के अनुसार बारहो गोत्रवन में एक-एक के नाम एक-एक मणि पर अईसन खोदवावल जायेत जईसन छापे में खोदल जाय हे।22फिन सीनाबंद पर डोरियन के जईसन गूंथल चोखा सोना के जंजीर लगावल जायेत।23आउर सीनाबंद में सोना के दूगो कड़ियन लगावल जायेत, आउर कड़ियन के सीनाबंद के दूनो छोर पर लगावल जाय।24सोना के दूनो गूंथल जंजीर के ऊ दूनो कड़ियन में जे सीनाबंद के छोर पर होत ओकरे लगावल जायेत।25गूंथल दूनो जंजीर के दूनो बाकि सिर के दूनो खान में बईठा के एपोद के दूनो कंधा के बंधन पर ओकर सामने लगावल जायेत।26फिन सोना के दूगो आउर कड़ियन बनवा के सीनाबंद के दूगो छोर पर, ओकर ऊ कोर पर जे एपोद के भीतरे के तरप होत लगावल जायेत।27फिन ओकर अलावे सोना के दूगो आउर कड़ियन बनवा के एपोद के दूनो कंधा के बंधन पर, नीचे से ओकर सामने आउर ओकर जोड़ल के भीर एपोद के काटल पटुका के ऊपरे लगावे ला होत।28पवित्र झोलवन के कड़ियन के पवित्र अंगोछवन के कड़ा के साथ नीला डोरा से बाँधिहऽ, कि पवित्र झोला कमरबन्द के ऊपर रहे आउर पवित्र अंगोछा से अलग नऽ होवे के चाही।29आउर जखनी-जखनी हारून पवित्र जगह में जायेत रहे, तखनी-तखनी ऊ न्याय के सीनाबंद पर अपन दिल के उपरे इस्राएलियन के नामवन के लगइले रहत, जेकरा से यहोवा के सामने उनका याद रोज रहत।30ऊरीम आउर तुम्मीम नाम के चीज ऊ पवित्र झोला में रखिहऽ, जेकरा से ऊ जाने लागी हम न्याय करऽ ही। अईसे, जखनी-जखनी हारून यहोवा से बात करे ला अईतन तऽ ऊ उनकर छाती के करीब होत। जखनी हारून यहोवा से मिलतन तऽ उनका हमेशा अपन सीना पर ऊ चीज पहने के चाही जेकरा से ई प्रकट होत कि हम इस्राएलियन के न्याय कईसे करऽ ही।31फिन एपोद के बागा के समूचे नीला रंग के बनावे ला होत।32ओकर बनावट अईसन होत कि ओकर बीच में सिर डाले ला छेद होत, आउर ऊ छेद के चारो तरप बख्तर के छेद जईसन एगो बुनल कोर होत कि ऊ नऽ फटे।33ओकर नीचला घेरवन में चारो तरप नीला, बैंगनी आउर लाल रंग के कपड़ा के अनार बनवईहऽ, आउर ओकर बीच-बीच चारो तरप सोना के घंटियन लगवईहऽ।34ओकर नमूना होत एगो सोना के घंटी आउर एगो अनार, फिन एगो सोना के घंटी आउर एगो अनार, ई तरह से बागा के नीचला घेरवन में चारो तरप अईसन होत।35तौभी हारून ऊ बागा के सेवा टहल करते समय पहनते रहतन, कि जखनी-जखनी ऊ पवित्र जगह के भीतर यहोवा के सामने जईते बाहर निकलत, तखनी-तखनी उनका आवाज सुनाई पड़त, नऽ तऽ ऊ मर जईतन।36फिन पक्का सोना के एगो टीका बनवईहऽ, आउर जईसे छाप में होवऽ हे ओईसहीं ओकरा में अक्षर खोदल जाय, माने कि यहोवा ला पवित्र।"37आउर ओकर नीला फीता से बाँधेला होत, आउर ऊ पगड़ी के सामने के तरप रहत।38आउर हारून के माथा पर होत, काहेकि इस्राएलियन जे कुछ पवित्र ठहरईतन, माने कि जेतना पवित्र चीजवन भेंट में चढ़ईतन ऊ पवित्र चीजवन के दोष हारून उठईते रहतन, आउर ऊ रोज ओकर माथा पर रहत, जेकरा से यहोवा ओकरा से खुश रहतन।39अंगोछा के पतला सनी के चार खाना बनवईहऽ, आउर एगो पगड़ी भी कपड़ा के पतला सनी के कपड़ा के बनवईहऽ, आउर बूटी कि कढ़ाई के काम करल एगो कमरबन्द भी बनवईहऽ।40फिन हारून के बेटवन ला भी अंगोछा, आउर कमरबन्द आउर टोपियन बनवईहऽ, ई कपड़ा भी वैभव आउर शोभा ला बनत।41अपन भाई हारून आउर ओकर बेटवन के ई सभे कपड़ा पहिना के उनका अभिषेक आउर संस्कार करवईहऽ, आउर ओकर पवित्र करवईहऽ कि ऊ हमरा ला याजक के काम करत।42आउर ओकरा ला सनी के कपड़ा के जँघिया वनबईहऽ जेकरा से ओकरा देह झाँकल रहत; ऊ कमर से जाँघ तक होत।43आउर जखनी-जखनी हारून ईहाँ ओकर बेटा मिलापवाला तम्बू में जाल करतन, ईहाँ पवित्र जगह में सेवा टहल करे ला वेदी के भीर जईतन तब-तब ऊ जँघिया के पहनले रहत, अईसन नऽ होवे कि ऊ पापी ठहरतन आउर मर जईतन! ई हारून ला आउर ओकर बाद ओकर कुल वंश ला भी हमेशा ला विधि विधान ठहरत।
Bridge Connectivity Solutions Pvt. Ltd.