Exodus27
1बबूल के लकड़ी से एगो वेदी बनवईहऽ। एकरा चौकोर बनवईहऽ: हर एक तरप ढाई मीटर लम्बा आउर डेढ़ मीटर ऊँचा।2सभे ऊपर कोना पर एगो सींग जईसन दिखे वाला नक्शा बनावऽ। ओकरा वेदी जईसन लकड़ी के टुकड़ा से बनवईहऽ। पूरा वेदी के काँसा से ढँक दिहऽ।3ओकर सभे औजार पीतल के बनवईहऽ। चर्बी जलावे से वेदी के राख जमा करे लागी कड़ाही, वेदी के राख साफ करे लागी फावड़ा, बेसीन, मांस पकावे के घड़ी ओकरा पलटे लागी काँटा, आउर गरम कोयला ले जाय ला बाल्टी बनावऽ।4लकड़ी आउर जलल कोयला के पकड़े लागी पीतल के एगो जाली बनावऽ। जाली के चारो कोना में से सभे पर एगो काँसा के छल्ला बाँधऽ।5वेदी के चारो तरप के किनारी के नीचे झंझरी लगावऽ। एकरा ई तरह बनावऽ कि ई वेदी के भीतर, आधा नीचे रहत।6वेदी के उठावे लागी बबूल के लकड़ी के डंडा बनवईहऽ, आउर ओकरा पीतल से झाँपिहऽ।7वेदी के उठावे लागी डंडा के वेदी के दूनो तरप के कड़ा में डालिहऽ।8वेदी के पटरा से बनवईहऽ, आउर ओकरा बीच में खोखला बनवईहऽ। ओकरा ईहें निर्देश के जईसन बनावे के होत जे हम तोरा ईहाँ ई पहाड़ पर दे रहली हे।9आउर पवित्र तम्बू के चारो ओर सूक्ष्म सनी के कपड़ा के आउर परदा बनवईहऽ। दक्खिन के तरप, 50 मीटर परदा लगईहऽ।1020 काँसा खम्भा लटकईहऽ। खंभवन आउर उपर लगल हूक आउर चाँदी के पट्टियन लागी 20 काँसा के आधार बनवईहऽ।11आउर ई तरह आँगन के उत्तर लागी भी 20 खम्भा पर 50 मीटर के परदा लटकईहऽ, आउर ओकरा भी 20 पीतल के आधार, कुण्डियन, आउर चाँदी के जोड़ा लगईहऽ।12आँगन के पच्छिम के तरप 25 मीटर लम्बा परदा बनवईहऽ। सभे खम्भा के नीचे एगो आधार के साथे, दसगो खम्भा के साथे ओकरा सहयोग करिहऽ।13पूरुब के तरप के आँगन भी 25 मीटर चौड़ा होवे के चाही।14ढूकेवाला दुआरी के एगो तरप साढ़े सात मीटर लम्बा परदा बनावऽ। आउर ओकर तीन खम्भा आउर आधार रहे।15ढूकेवाला दुआरी के दूसरा तरप लागी साढ़े सात मीटर लम्बा एगो आउर परदा बनावऽ, आउर ओकर खम्भा आउर तीन आधार रहे।16आँगन में हेले वाला दुआरी लागी पतला बटल सनी के कपड़ा के दस मीटर चौड़ा परदा बनवईहऽ। एगो कुशल बुनकर के एकरा पर नीला, बैंगनी आउर लाल धागा से कढ़ाई करावे के चाही। एकर चारो खंभवन पर लटकावऽ, सभे के नीचे एगो आधार रहे।17आँगन के चारो तरप के खम्भा के सभे कोना के चाँदी से गोल बनवईहऽ। कुण्डी चाँदी के आउर आधार काँसा के बनवईहऽ।18पूरा आँगन के, पूरुब दुआरी से पच्छिम छोर तक, 50 मीटर लम्बा आउर 25 मीटर चौड़ा, आउर ओकर चारो ओर के परदा ढाई मीटर ऊँचा बनवईहऽ। सभे परदा मेहीन सनी के कपड़ा के, आउर खम्भा के नीचे के सभे कुर्सियन पीतल के बनवईहऽ।19पवित्र तम्बू के भीतर आउर आँगन में काम आवे वाला सभे जे सोना के नऽ बनल रहे, आउर पवित्र तम्बू के सम्भाले लागी तम्बू के सभे खूँटियन आउर आँगन के परदा भी पीतल के बनवईहऽ।20इस्राएलियन के आज्ञा दऽ, कि ऊ तोरा लागी जैतून के निचोड़ल शुद्ध करल गेल तेल ले अईतन, कि दीया सभे घड़ी जलते रहे।21पवित्र तम्बू के बाहर वाला भाग में, परदा के बाहर जहाँ पवित्र संदूक हे, हारून आउर ओकर बेटवन के यहोवा लागी सांझ से भोर तक दीपक जलावे के ध्यान रखे के चाही। इस्राएलियन के आवे वाला के सभे पीढ़ी तक ई नियम के पालन करे ला होत।
Bridge Connectivity Solutions Pvt. Ltd.