Deuteronomy6
1अब जौन आज्ञा, विधि आउर नियम तोर परमेश्वर यहोवा हमरा तोरा सिखावे ला देलन हे ऊ ई हे, जेकरा से जौन देश के अधिकारी होवे ला यरदन नदी के पार जाय वाला हऽ ओकरा में तूँ ओकरा मानिहऽ;2जेकरा से तूँ अपन परमेश्वर यहोवा के भय मानल करिहऽ, आउर ओकर सभे विधियन आउर आज्ञावन के जौन हम तोरा सुनावऽ ही ओकर पालन करते रहिहऽ, मतलब कि तोर बेटा-पोता, तूँ भी जिनगी भर जिन्दा रहवऽ, ताकि तोर दिन लम्बा होवे।3येहिगुने हे इस्राएल के लोग, उनकर सुनऽ, आउर उनकर रक्षा करऽ, जेकरा से तोर भलाई होवे, आउर जौन देश में दूध आउर मधु के धारा बहऽ हे ओकरा में तूँ बड़ी बढ़ जा, जईसन कि तोर पितरवन के परमेश्वर यहोवा तोरा से कहलन, तोरा ओईसहीं करे के चाही। 4हे इस्राएल सुनऽ, हमर परमेश्वर यहोवा एक्केगो ही।5तूँ अपन परमेश्वर यहोवा से अपन पूरा मन, अपन पूरा जी-जान, आउर पूरा शक्ति से प्रेम रखिहऽ।6जौन वचन हम आज तोरा सुनावऽ ही ऊ तोर मन में बसल रहत;7आउर तूँ ओकरा अपन लईकमन के मन लगा के सिखईहऽ; तूँ घर में बईठते, राह में चलते, सूतते, उठते, एकर चर्चा करते रहिहऽ। 8आउर तूँ ओकरा चिन्हासी ला अपन हाथ पर बाँध लिहऽ, आउर ऊ तोर अँखवन के बीच में टीका के काम करत।9तूँ एकरा अपन घर के चौखट के खम्भा आउर फाटक पर लिख लिहऽ।10जखनी तोर परमेश्वर यहोवा तोरा ऊ देश में पहुँचईतन जेकर बारे में ऊ अब्राहम, इसहाक, आउर याकूब, तोर पुरखावन से किरिया खईलन हल, कि ऊ तोरा बड़का आउर बड़ी बढ़िया नगर देतन, जौन तूँ नऽ बनईलऽ हे,11आउर सभे तरह के बढ़िया चीज से भरल घर जौन तूँ नऽ बनईलऽ हे, आउर हौद जौन तूँ नऽ खोदल हे, आउर दाख के बारी आउर जैतून के पेड़ जौन तूँ नऽ लगईल हे, ओकरा खा के अघा जईबऽ।12तऽ होशियार रहिहऽ, अईसन नऽ होवे कि तूँ यहोवा के भूल जा, जौन तोरा मिस्र देश, मतलब कि दासत्व के घर से निकास के ले अईलन हे।13तूँ अपन परमेश्वर यहोवा के भय मानल करिहऽ; तूँ उनके आराधना करिहऽ, आउर उनके किरिया खईहऽ।14तूँ दोसरा के देऊता मतलब कि अपन चारो दने के लोग के देऊता के पीछे नऽ चलिहऽ; 15काहेकि तोर परमेश्वर यहोवा तोर बीच में जलन रखे वाला परमेश्वर हथिन; जदि तूँ अईसन करवऽ, तऽ तोर परमेश्वर यहोवा के क्रोध तोरा पर भड़क उठत, आउर ऊ तोरा धरती पर से नाश कर देतन।16जईसन तूँ अपन परमेश्वर यहोवा के मस्सा नाम के जगह में परखलऽ हल, ओईसहीं तूँ नऽ परखिहऽ। 17तूँ अपन परमेश्वर यहोवा के जौन आज्ञा, विधि आउर नियम जे ऊ तोरा देलन हे ओकरा सावधानी से पालन करिहऽ।18आउर जौन काम यहोवा के नजर में सही आउर बढ़ियां हे ओही काम करिहऽ, जेकरा से तोर भला होवे, आउर जौन बढ़ियां देश के बारे में यहोवा तोर पूरखा से किरिया खईलन हल ओकरा में तूँ जा के ओकर अधिकारी हो जईवऽ।19यहोवा के वचन के मोताबिक अपन सभे दुश्मन के अपना सामने से निकास दिहऽ।20आउर आगे जब तोर बेटा तोरा से पूछतन, कि जौन वाचा आउर विधि आउर नियम हमर परमेश्वर यहोवा तोरा देलन हे ऊ सभे का हे?21तऽ तूँ अपन बेटा से कहिहऽ, हम तऽ मिस्र में फिरौन के दास हली; यहोवा हमरा बलवन्त हाथ से मिस्र से बाहर निकासलन,22आउर यहोवा हमरा देखते मिस्र के राजा आउर उनकर समूचे घराना पर बड़का-बड़का चिन्ह आउर चमत्कार देखईलन; 23आउर ऊ हमरा उहाँ से निकास के ले अईलन, कि ओकरा में पहुँच के जौन देश के बारे में ऊ हमर पुरखावन से किरिया खईलन हल ऊ हमरा दे देतन।24यहोवा हमरा ई सभे विधि के सदा माने के आज्ञा देलन हे, कि हम अपन भलाई लागी अपन परमेश्वर यहोवा के भय मानते रहम, जेकरा से ऊ हमरा आज के जईसन जिन्दा रखतन।25जदि हमनी अपन परमेश्वर यहोवा के सामने ई सभे आज्ञा के मानम, तऽ येही हमर धार्मिकता होत।
Bridge Connectivity Solutions Pvt. Ltd.