Deuteronomy5
1मूसा सभे इस्राएलियन के बोल के ओखनी से कहलन, हे इस्राएल सुनऽ, जौन-जौन विधि आउर नियम हम आज तोरा सुनावऽ ही ओकरा पर गौर करऽ, कि तूँ ओकरा सीख के ओकरा मानते रहवऽ।2हमर परमेश्वर यहोवा होरेब में हमरा से वाचा बांधलन हे। 3यहोवा ई वाचा हमर पुरखावन के साथे नऽ, बाकि हमनी सभे के साथे जौन आज हियाँ जिन्दा ही, बांधलन हे।4यहोवा आग के बीच में से पहाड़ पर तोरा से आमने-सामने बात कईलन; 5ओही घड़ी हम यहोवा आउर तोर बीच में खड़ा होली, कि तोरा उनकर वचन प्रकट करियई; काहेकि तूँ आग के चलते डर गेलऽ हल, आउर पहाड़ पर न चढ़लऽ। यहोवा कहलन,6हम तोर परमेश्वर यहोवा ही, जौन तोरा मिस्र देश से मतलब दासत्व के घर से निकाल लईली हे।7हमरा से पहिले तोरा भीर कोई दूसरा देऊता नऽ होत।8तूँ अपना ला कोई खोद के मूर्ति नऽ बनईहऽ, आउर नऽ कोई के प्रतिमा बनईहऽ, जौन उपरे आसमान में, चाहे नीचे धरती पर, चाहे नीचे जल में हे।9तूँ ओकरा दण्डवत नऽ करिहऽ, आउर नऽ ओकरा उपासना करिहऽ, काहेकि हम तोर परमेश्वर यहोवा जलन रखे वाला परमेश्वर ही। हम अपन पुरखा के बुराई के सजा उनकर लईकमन, मतलब कि तीसरका आउर चौथा पीढ़ी, जौन हमरा से बैर रखऽ हे, ओकरा दे ही।10आउर जौन हमरा से प्रेम रखऽ हे आउर हमर आज्ञा के मानऽ हे, ऊ हजारो पर करुणा आउर सच्चाई प्रगट करऽ ही।11तूँ अपन परमेश्वर यहोवा के नाम बे-मलतब में नऽ लिहऽ, काहेकि जे कोई बे-मतलब के उनकर नाम ले हे, यहोवा ओकरा निर्दोष नऽ ठहरईतन। 12विश्रामदिन के पवित्र मानिहऽ, जईसन तोर परमेश्वर यहोवा तोरा आज्ञा देलन हे। 13सप्ताह में छः दिन तक तूँ मेहनत कर के अपन सभे काम-काज करिहऽ; 14बाकि सप्ताह के सातवाँ दिन तोर परमेश्वर यहोवा ला विश्रामदिन हे। ऊ दिन तूँ कोई काम नऽ करिहऽ, नऽ तूँ, नऽ तोर बेटा, नऽ तोर बेटी, नऽ तोर दास, नऽ तोर दासी, नऽ तोर बैल, नऽ तोर गधा, नऽ तोर कोई जनावर, नऽ कोई परदेशी जौन फाटक के भीतरे हे। ई येहिसे कि तोर दास आउर दासी तोरे जईसन विश्राम करतन। 15आउर तूँ याद रखऽ कि मिस्र देश में तूँ दास हल, आउर तोर परमेश्वर यहोवा तोरा बलशाली हाथ आउर बढ़ावल गेल बाँह से उहाँ से निकास ले अईलन। एही चलते तोर परमेश्वर यहोवा तोरा विश्रामदिन मनावे के आज्ञा देलन हे।16अपन पिता आउर अपन माय के आदर करिहऽ, जईसन कि तोर परमेश्वर यहोवा तोरा आज्ञा देलन हे, जेकरा से जौन देश तोर परमेश्वर यहोवा तोरा दे हथिन ओकरा में तूँ बड़ी दिन तक बनल। रहवऽ, आउर तोर कल्याण होत। 17तूँ हत्या नऽ करिहऽ। 18तूँ व्यभिचार न करिहऽ। 19तूँ चोरी न करिहऽ।20तूँ अपन पड़ोसी के खिलाफ झूठा गवाही नऽ दिहऽ। 21तूँ अपन पड़ोसी के मेहरारू के लालच नऽ करिहऽ, नऽ अपन पड़ोसी के घर के लालच न करिहऽ, नऽ ओकर खेत के, नऽ ओकर दास के, नऽ ओकर दास के, नऽ ओकर बैल के, नऽ गदहा के, नऽ कोई चीज के जौन तोर पड़ोसी के हे।22ई सभे वचन यहोवा सीनै पहाड़ पर आग आउर बादल, आउर घोर अँधार के बीच में से तोर समूचे मण्डली से तेज आवाज से कहलन; ऊ आउर कोई शब्द नऽ जोड़लन ऊ ओकरा पत्थर के दूगो तख्तियन पर लिखके हमरा दे देलन। 23आउर जखनी पहाड़ जल रहल हल, तब अँधार के बीच में से तूँ कोई के आवाज सुनलऽ, आउर तोर सभे पुरनियन आउर गोत्रवन के मुख्य मरद हमरा भी अईलन। 24तूँ कहलऽ, देख, हमर परमेश्वर यहोवा हमरा अपन तेज आउर बड़ाई देखईलन हे, आउर हम आग के बीच में से उनकर शब्द सुनली हे; हम आज देखली हे कि जखनी परमेश्वर लोगवन से बात करऽ हथिन, तऽ ऊ जिन्दा रह सकलन हे। 25बाकि हम काहेला मरम? काहेकि ई बड़का आग हमरा जला के भस्म कर देत; यदि हम अखनी अपन परमेश्वर यहोवा के शब्द सुनम, तऽ मर जायेम। 26काहेकि हमरा छोड़ के सभे लोगवन में से कौन हे जौन आग के बीच में से जिन्दा परमेश्वर के बोलल गेल शब्द सुन के हमरा जईसन जिन्दा बचलन हे? 27आउर तोरा जा के हमर यहोवा परमेश्वर यहोवा जौन कुछ कहऽ हथिन ऊ सभे सुने के चाही; जे कुछ हमर परमेश्वर यहोवा तोरा से कहऽ हथिन ऊ सभे हमरा दोहरईहऽ; हमनी एकरा सुनम आउर एकरा पालन करम।28जखनी तूँ हमरा से बात कर हलऽ, तखनी यहोवा तोर बात सुनलन। ऊ हमरा से कहलन, हम ई सभे लोगवन के बतियन सुनली हे, कि ओखनी तोरा से का कहलन। ओखनी जौन कहलन ऊ बढ़िया हल।29अच्छा होत हल कि ओखनी के मन अईसन होत हल, कि ऊ सभे हमर भय मानतन हल, आउर हमर सभे आज्ञावन के सदा मानते रहतन हल, जेकरा से उनकर आउर उनकर वंश के सदा भलाई होते रहत!30जा के उनका से कहऽ, अपन डेरा में लौट जइतन।31बाकि जहाँ ला तोर बात हे, हियाँ हमरा भीर खड़ा रहऽ, आउर जौन-जौन आज्ञा आउर विधि आउर नियम तूँ ओखनी के सिखईवऽ हम तोरा सभे बतईबो, जेकरा से जौन देश हम उनका अधिकार करे ला देम ओकरा में ऊ सभे ओकरा पालन करतन। 32येहिसे जौन आज्ञा तोर परमेश्वर यहोवा तोरा देलन हे ओकरा तूँ मानिहऽ; तूँ नऽ तऽ दहिना दने मुड़िहऽ आउर नऽ बामाँ दने। 33जौन सभे राह के आज्ञा तोर परमेश्वर यहोवा तोरा देलन हे ऊ सभे पर चलिहऽ, जेकरा से तूँ जिन्दा रहव, आउर तोर भला होत आउर जौन देश के तूँ अपन अधिकारी होवऽ ओकरा में बड़ी दिन तक जिन्दा रहवऽ।
Bridge Connectivity Solutions Pvt. Ltd.