اِستِثنا23
1موسیٰؔ ہن ووٚن ہٮ۪تھےٕ اسرائیل ین، "کانٛہہ تہِ فرد یس مردان گی ہنٛدؠ اعضا ختم آسن گمٕتؠ ہیٚکہِ نہٕ یہُوواہؔ سنٛدین نفرن منٛز شٲمل سپدِتھ۔ 2کانٛہہ تہِ ناجایز فرد یا ناجایز فردٕ سُنٛد اولاد، یُس دہِم پُوؠ تہِ آسہ، گژھِ نہٕ یہُوواہؔ سنٛدین نفرن منٛز شٲمل سپدُن۔3عمونؔ تہٕ موآبؔ قبیلہٕ منٛزٕ ییہِ نہٕ کانٛہہ تہِ دہَن پُین تام یہُوواہؔ سنٛدین لوٗکن منٛز شٲمل کرنہٕ۔ 4امیُک اکھ وجہ چُھ یہ زِ تِہنٛدیٚو زِٹھیٚو کوٚر تُہنٛدین جدٕاجدادن مِصرٕ پٮ۪ٹھٕ کنعان گژھنہٕ وزِ کھیٚن چیٚن دنہٕ نشہٕ انکار۔ بیاکھ وجہ چُھ یہ زِ تِمو اوٚن مسوپتامیہؔ کہ شہر فتور پٮ۪ٹھٕ بعورؔ سُنٛد نیٚچو بلعام ناد دِتھ تاکہِ سُہ کرِ توٚہہ اسرائیل ین پٮ۪ٹھ لعنت۔ 5مگر سٲنؠ خدا یہُوواہنؔ دیُت نہٕ بلعامسؔ کُن توجہ بلکہِ بنووُن بلعام سُنٛد منٛگن تُہنٛدین جدٕاجدادن باپتھ برکٔژ ہُنٛد بٲعث، تکیازِ یہُوواہؔ اوس تِمن سٟتؠ محبت کران۔ 6یۅتام اسرائیل اکھ قوم چُھ، توٚہہ چُھنہٕ تۅتام کِہین کرُن یۅتام نہٕ تِمن دوٚن جمٲژن ہنٛدِ باپتھ حالت ٹھیک سپدن یُتھ تِم ترقی کرن۔7مگر ادومؔ قبیلہٕ منٛزٕ زٲنؠ زیون نہٕ کانٛہہ تہِ حقیر تکیازِ تِم چھِ تُہنٛدِس جَد اضحاقؔ سنٛدیو اولادو منٛزٕ یتھٕ کِنؠ توٚہؠ چُھو۔ تہٕ مِصرٕکؠ لوٗکھ تہِ زٲنؠ زیوکھ نہٕ حقیر تکیازِ ییٚلہ تِم گۅڈٕ مِصرس منٛز روزان ٲسؠ تِم ٲسؠ تُہنٛدین جدٕاجدادن سٟتؠ رُت سلوٗک کران۔ 8اودومؔ تہٕ مِصرٕ کیٚن لوٗکن ہنٛدؠ زُرؠ یِم وۅنؠ توٚہہِ سٟتؠ روزان چھِ ہیٚکن یہُوواہؔ سنٛدین لوٗکن منٛز شٲمل سپدِتھ۔9ییٚلہ تُہنٛدؠ سِپاہ جنٛگس دوران خٕمس منٛز روزان آسن تہٕ تِمن پزِ تِمو کامیٚو نشہٕ پتھ روزُن یمہٕ تِمن خدایس نشہٕ ناقٲبلِ قبول بناون۔10اگر کانٛہہ نفر خدایس برُونٛہہ کنہِ نا قٲبلِ قبول سپُد یمہِ کِنؠ زِ راتھ کیُت سپُد سُہ احتلامہٕ کِنؠ ناپاک تہٕ تمِس پزِ صُبحٲے خٟمہ گاہ منٛزٕ نیٚبر نیرُن تہٕ تمہ دوٚہہ تٔتی بِہُن۔ 11مگر تمہِ دوٚہہ شامس کرِ سُہ سران تہٕ آفتاب لوسنہٕ وزِ گژھِ تس خٟمہٕ گاہس منٛز واپس اژنہٕ دیُن۔12تُہنٛدین سِپہن گژھِ کیمپس نیٚبرٕ کنہِ بیت الخُلا آسُن یُس تمہٕ ضرورتہٕ وزِ استعمال کرن۔13ییٚلہ توٚہؠ پننٮ۪ن دشمنن سٟتؠ جنٛگس نیریٚو تہٕ پننٮ۪ن ہتھیارن سٟتؠ تُلزیٚو اکھ لور تہِ سٟتؠ یُتھ زن نیٚبر نیرنہٕ وزِ توٚہؠ اکھ دۅب کٔھنِتھ ہکیٚو تہٕ پتہٕ سُہ حاجتِ بشری مۅکلٲوِتھ بیٚیہِ پُروان ٲسیٚو۔14توٚہؠ گٔژھیٚو خٟمہٕ گاہ سٲنِس خدا یہُوواہسؔ قٲبلِ قبوٗل بناوٕنؠ تکیازِ سُہ چُھ تُہنٛز حفاظت کرنہٕ باپتھ توٚہہِ سٟتؠ تہٕ توٚہہ دشمنن شِکس دِنس قٲبل بناوان۔ کانٛہہ ذلالت واجِنؠ کٲم مہٕ کٔریٚو یمہِ کنؠ یہُوواہؔ توٚہہ پنٕنؠ لوٗکھ بناونہٕ نشہٕ پتھ رٹہِ۔15اگر تِم غلام پننٮ۪ن آغن نِش ژٔلِتھ ین تہٕ توٚہہ کرن عرضی زِ اسہِ بچٲیو تہٕ تِم سوزؠ زیوکھ نہٕ پننٮ۪ن آغن نِش واپس۔16تِمن دیزیٚو پانس سٟتؠ روزنہٕ، یتھ شہرس منٛز تِم یژھن، تِمن سٟتؠ کٔرؠ زیٚو نہٕ بدسلوٗکی۔17کٲنٛسہِ تہِ اسرائیلی مردس یا زنہِ دیزیٚو نہٕ مندرس منٛز گٲنؠ بننہٕ۔ 18بیٚیہِ دیزیٚو نہٕ تِمن لوٗکن ہُنٛد کانٛہہ تہِ پونٛسہٕ یمہٕ فحش کامٮ۪ن پٮ۪ٹھ کماون آسن سٲنِس خدا یہُوواہؔ سنٛدِس گھرس منٛز اننُک اجازت یوٚدوے تِمو یہ رقم دِنُک مکمل وعدہ کوٚرمُت آسہ۔ یہُوواہسؔ چھےٚ طوائفن سٟتؠ نفرت۔19ییٚلہِ توٚہؠ کانٛسہ اسرائیلی سٲتھیس پونٛسہٕ کھیٚن یا بیٚیہِ کانٛہہ چیز وۅزُم دِیو تہٕ تمِس مہٕ ہیٚیِو سوٗد۔20ییٚلہِ توٚہؠ پننِس ملکس منٛز روزن والٮ۪ن غٲر ملکی ین قرض دِوان ٲسِو تیٚلہِ چُھ توٚہہ سوٗد ہیٚنُک اجازت مگر تمہِ ساعتہٕ نہٕ ییٚلہِ توٚہؠ اسرائیل کیٚن قرض دِیو۔ یہ کٔرؠ زیٚو یُتھ زن سون خدا یہُوواہؔ توٚہہ پرٮ۪تھ تتھ کامہِ منٛز برکت کریٚو یۅسہ توٚہؠ تتھ ملکس منٛز کران ٲسیٚو یتھ منٛز أژتھ توٚہؠ قبضہٕ کرن وٲلؠ چُھو۔21ییٚلہ توٚہؠ پننِس خدا یہُوواہسؔ کینٛہہ دِنُک یا تمِس باپتھ کینٛہہ کرنُک عہد کٔریٚو تہٕ پوٗرٕ کرنس منٛز مہٕ کٔریٚو دیٖری۔ یہُوواہسؔ چھِ توٚہہ سٟتؠ توقع زِ توٚہؠ یُس وعدہ کٔریٚو سُہ نبٲیو تہِ، اگر توٚہؠ تہِ کٔریٚو نہٕ تہٕ توٚہؠ سپدیٚو گُنہن ہنٛدؠ سزاوار۔ 22وۅنؠ اگر توٚہؠ کُنہِ کامہِ ہُنٛد پۅختہٕ وعدہ کٔریٚو نہٕ تیٚلہِ چُھنہٕ یہ گناہ۔23اگر توٚہؠ پننہِ مرضی کینٛہہ کرنُک وعدہ کران چُھو تہٕ سُہ پزِ توٚہہ نباوُن۔24ییٚلہِ توٚہؠ کٲنٛسہِ ہنٛدِ دچھِ باغہٕ منٛزؠ پکان ٲسیٚو تہٕ توٚہہِ چُھ ییژاہ یژھِو تہٕ تیژ دچھ وٲلِتھ کھیٚنُک اجازت مگر توٚہہ چُھنہٕ سۅ کُنہِ بانس بٔرِتھ نِنُک اجازت۔25ییٚلہ توٚہؠ فصلہٕ دار کھہہ منٛزؠ وتہِ پکان ٲسیٚو تہٕ توٚہہِ چُھ اجازت زِ توٚہؠ ہکیٚو کینٛہہ پھسٕل ژٔٹِتھ کھیٚتھ مگر توٚہہِ پزِنہٕ دراتہِ سٟتؠ کانٛہہ دانہٕ پانس سٟتؠ لُنِتھ نیٚون۔
Bridge Connectivity Solutions Pvt. Ltd.