اِستِثنا24
1موسیٰؔ ہن ووٚن اسرائیل ین مزید، "مثال مانو زِ أکؠ نفرن کوٚر أکِس زنہِ سٟتؠ خاندر تہٕ پتہٕ کوٚرن فٲصلہٕ زِ بہٕ تراون سۅ تکیازِ تس چُھ کہتام ناگوار سپدان، تہٕ سُہ چُھ تس پننہِ گھرٕ منٛزٕ کٔڈِتھ ژٕھنان۔ مثال مانو زِ سُہ چُھ اکھ کاغذ لیٚکھان یتھ منٛز سُہ ونان چُھ زِ بہٕ چُھس أمِس طلاق دِوان، تہٕ سُہ کاغذ دِتھ چُھ تس پننہِ گھرٕ منٛزٕ روانہٕ کران۔ 2پتہٕ مانو زِ سۅ درایہ تتہِ۔ تمِس چُھ دویم خاندر کرنُک اجازت۔3مثال مانو زِ سُہ نفر تہِ چُھ پتہٕ یہ فٲصلہٕ نِوان زِ بہٕ چُھسن نہٕ یہ پسنٛد کران تہٕ پتہٕ چُھ سُتہ اکھ کاغذ لیٚکھان یتھ منٛز سُہ ونان چُھ زِ سُہ چُھ أمِس طلاق دِوان تہٕ چُھس پننہِ گھرٕ منٛزٕ کڈان۔ یا مثال مانو زِ دویِم خاندار چُھ مران4اگر یِمو منٛزٕ کینٛہہ تہِ سپدِ تہٕ تمسُنٛد گۅڈنیُک خاندار کرِنہٕ دوبارٕ تمِس سٟتؠ بیٚیہِ خاندر۔ سُہ گژھِ زانُن زِ سۅ سپٕز یہُوواہسؔ نزدیک ناقٲبلِ قبوٗل۔ یہُوواہسؔ سپدِ یہ ناگوار اگر سُہ دوبارٕ تس سٟتؠ خاندر کرِ۔ توٚہہ پزن نہٕ تتھ ملکس منٛز یُس سون خدا یہُوواہؔ توٚہہ دِوان چُھ یہ کٔرِتھ گناہ کرٕنؠ۔5ییٚلہ کٲنٛسہِ نفرس تازے خاندر آسہ سپُدمُت تہٕ تمِس چھنہٕ فوجس منٛز سِپاہ بننٕچ یا حکومتس منٛز کانٛہہ کٲم کرنٕچ ضرورت۔ تمِس پزِ خاندر کٔرِتھ أکِس ورؠ یس یژھو کامیٚو نِشہ مُچھِ روزُن۔ سُہ روزِ پننِس گھرس منٛز تہٕ تھاوِ پننہِ خاندارنہِ تتھ ورؠ یس دوران خوش۔6اگر کانٛہہ کٲنٛسہِ قرض دِوان چُھ تہٕ تمِس چُھ اجازت زِ منٛگہِ تمِس نفرس ضمانت رنٛگؠ کینٛہہ یُتھ سُہ تس سُہ رقم واپس دییہِ یُس سُہ وۅزُم نِوان چُھ۔ مگر تمِس چھنہٕ تس سۅ گرٮ۪ٹہٕ کٔنؠ نِنؠ یۅسہ تمسنٛدس گھرس منٛز ژۅچہ باپتھ اوٹ پیسنہٕ خٲطرٕ چھےٚ یمہِ سٟتؠ تِم زنٛدٕ روزن۔7اگر کانٛہہ پننِس اسرائیلی سٲتھیَس پنُن غلام بناونہٕ باپتھ یا کٲنٛسہِ دویمِس بحثیتِ غلام کٔننہٕ باپتھ اغوا کرِ تہٕ توٚہہ پزِ سُہ شخص قتل کرُن یُس تہِ کرِ۔ امہِ سٟتؠ کٔریٚو توٚہؠ پننِس سماجس منٛز یہ بُرایی دوٗر۔ 8اگر توٚہؠ مینٛدؠ بٮ۪مارِ منٛز مُبتلا ٲسِو تہٕ یہ کتھ بنٲے زیٚو یقینی زِ یۅسہ کٲم توٚہہِ لاوی قبیلٕکؠ کاہن ونن سۅ کٔرؠ زیٚو تہٕ تِمن احکامن پٮ۪ٹھ کٔرؠ زیٚو احتیاطہٕ سان عمل یِم مےٚ تِمن دِتؠ مٕتؠ چھِ۔ 9یہ مٔشراے زیٚو نہٕ زِ سٲنؠ خدا یہُوواہنؔ کیاہ کوٚر تمہِ وزِ مریمسؔ سٟتؠ ییٚلہ تس میونٛد لاریو تہٕ تُہنٛدؠ جدٕاجداد ٲسؠ مِصرٕ منٛزٕ نیران۔ 10ییٚلہِ توٚہؠ سٲتھی اسرائیل ین کینٛہہ وۅزُم دِیو تہٕ تمسُنٛد گھرٕ أژؠ زیٚو نہٕ سُہ چۅگہٕ نِنہِ یتھ تٔمؠ ونمُت آسہ تۅتام گِرو تھاوٕنؠ یۅتام سُہ قرض نکھٕ والہٕ۔11تمسنٛدس گھرس نیٚبرٕ کنہِ روزؠ زیٚو وۅدٕنؠ تہٕ یس نفرس توٚہہِ قرض دیُتمُت آسہ سُے انہِ توٚہہِ نِش چۅگہٕ۔12وۅنؠ اگر سُہ غریب آسہ تیٚلہِ رٔٹؠ زیٚو نہٕ راتس سۅ ژادر پانس نِش۔ 13ییٚلہ دوٚہہ لوسہِ تہٕ سۅ ژادر نیزیٚو تس واپس یُتھ سُہ راتس تتھ وُورٕنؠ تراوِ۔ اگر توٚہؠ تہِ کٔریٚو تہٕ سُہ منٛگہِ خدایس دُعا تُہنٛدِ برکٔژ باپتھ تہٕ سون خدا یہُوواہؔ سپدِ توٚہہ رٲضؠ۔14تِمن نوکرن سٟتؠ کٔرؠ زیٚو نہٕ بد سلوٗکی یمہِ توٚہؠ مُزورِ پٮ۪ٹھ رٔٹؠ ووکھ یِم غریب تہٕ محتاج آسن چاہے تِم اسرائیلی سٲتھی ٲسؠ تن یا تُہنٛدِس شہرس منٛز روزن وٲلؠ غٲر ملکی۔15توٚہہ پزِ پرٮ۪تھ دوٚہہ آفتاب لوسنہٕ برُونٛہہ تِمن پنٕنؠ مُزورؠ ادا کرٕنؠ۔ تِم چھِ غریب تہٕ تِمن چھےٚ پنٕنؠ مُزورؠ نِنٕچ ضرورت۔ اگر توٚہؠ تِمن جلدےٕ سۅ ادا کٔریٚو نہٕ تہٕ تِم کرن توٚہہ خلاف یہُوواہسؔ فریاد تہٕ سُہ دییہِ توٚہہ یمن گُنہن ہُنٛد سزا۔ 16مٲلِس ماجہِ پزِ نہٕ تِہنٛدین بچن ہنٛدین جُرمن پٮ۪ٹھ قتل کرنہٕ یِنہٕ تہٕ بچن گژھِ نہٕ تِہنٛدین والدینن ہنٛدِس خطہَس پٮ۪ٹھ پھٲسؠ دنہٕ یِنؠ۔ لوٗکن گژھِ صرف تِمن خطہَن پٮ۪ٹھ پھٲسؠ دنہٕ یِنؠ یمہٕ یمہٕ تِمن پانس سرِزد گمٕتؠ آسن۔17توٚہؠ کٔرؠ زیٚو غٲر ملکی ین یمہ توٚہہِ سٟتؠ روزان آسن تہٕ یتیمن باپتھ تمہٕ کامہِ یمہ شریعت ونان آسہ زِ تِمن باپتھ گژھن کرنہِ ینہِ۔ اگر توٚہؠ کانٛسہ مونٛڈِ کینٛہہ وۅزُم دِیو تہٕ تمِس رٔٹؠ زیٚو نہٕ پلو گِرو یُتھ سۅ قرض واپس انہِ۔18یہ مٔشرٲے زیٚو نہٕ زِ ییٚلہ توٚہؠ مِصرس منٛز غلام ٲسِو تہٕ توٚہہ پٮ۪ٹھ ٲسؠ بٔڈؠ مصیبت تہٕ سٲنؠ خدا یہُوواہنؔ بچٲوؠ نو تتہِ۔ اوٕ کِنؠ چُھسو بہٕ حکم دِوان زِ تِمن کٔریٚو مدد یمہٕ مصیبتس منٛز آسن۔19ییٚلہِ توٚہؠ پنُن فصٕل لُنیٚو، اگر توٚہہ یاد رود نہٕ زِ اسہِ گییہِ کھہَس منٛز اکھ گیٚڈ مٔشتھےٕ تہٕ سۅ اننہٕ باپتھ گٔژھؠ زیٚو نہٕ واپس۔ سۅ ترٲوؠ زیٚو پردیسؠ ین، یتیمن تہٕ مونڈن باپتھ تٔتی۔ اگر توٚہؠ تہِ کٔریٚو تہٕ یہُوواہؔ کریٚو توٚہہِ پرٮ۪تھ کامہِ منٛز برکت۔20تہٕ ییٚلہ توٚہؠ پنُن سورےٕ زیتون اکہ لٹہِ کُلیٚو پٮ۪ٹھٕ والیٚو تہٕ پتہٕ گٔژھؠ زیٚو نہٕ تہِ اننہٕ خٲطرٕ بیٚیہِ واپس یُس کینٛہہ کُلین پٮ۪ٹھ رودمُت آسہ۔21یتھے پٲٹھؠ ییٚلہ توٚہؠ پننٮ۪ن دچھِ باغن دچھ والیٚو تہٕ پتہٕ گٔژھؠ زیٚو نہٕ بیٚیہِ کُلٮ۪ن ژھٲنٛڈ دنہِ واپس۔ سۅ ترٲیو پردیسؠ ین، یتیمن تہٕ مونڈن باپتھ۔ 22یہ مٔشرٲے زیٚو نہٕ زِ ییٚلہ توٚہؠ مِصرس منٛز غلام ٲسیٚو تہٕ یہُوواہؔ سپُد توٚہہِ پٮ۪ٹھ مہربان۔ اوے چُھسو بہٕ توٚہہ حکم دِوان زِ ضرورت منٛدن کٔریٚو ہمدردی۔"
Bridge Connectivity Solutions Pvt. Ltd.