2 کورنتھین12
1مےٚ چُھ پانس متعلق تھیٚکُنٕچ ضروٗرت۔ یوٚدوے یہِ کانٛہہ مدد کرِنہٕ، مگر بہٕ چُھس کتھ جٲری تھٲوِتھ زِ خداوند یسوعؔ کِتھہٕ پٲٹھؠ چُھ خصوصی طور مخصوس لوٗکن چیز ہاوان۔2ژۅداہ ؤری برونٛٹھ، خداین کھول اکھ مسیحیؔ تریمِس آسمانس پٮ۪ٹھ۔ مےٚ چُھنہٕ پوٗرٕ پوٗرٕ پے زِ خداین نِوا سُہ کایہِ سان کنہٕ خوابس منٛز کُنہِ روحٲنی طور۔ چھرا زانہِ خدا یہِ کِتھہٕ پٲٹھؠ سپُد۔3وۅنؠ ونہٕ بہٕ تس خاص مسیحؔ ہس متعلق دُبارٕ زیادٕ کتھہٕ وہرٲوِتھ۔ بہٕ ہیٚکہٕ نہٕ سٮ۪کہٕ پٲٹھؠ ؤنِتھ زِ خداین کھولا سُہ آسمان کِس تریمِس درجس پٮ۪ٹھ کایہِ سان کنہٕ خوابس منٛز یا روحٲنی طور۔ چھرا ہیٚکہِ خدایی یوت وثوقہٕ سان ؤنِتھ یہِ کِتھہٕ پٲٹھؠ سپُد۔4خداین واتنوو سُہ جنتس منٛز تتھ جایہِ یتٮ۪تھ مودؠ مٕتؠ ایماندار ٲسؠ۔ اتہِ بوزٕ أمؠ بڈٕ حٲران کروٕنہِ کتھہٕ یِمہٕ سُہ بیٚیہِ کٲنٛسہِ ؤنِتھ ہیٚکہِ ہے نہٕ۔5بہٕ ہیٚکہٕ تتھ متعلق واریاہ تھٮیکنل کتھہٕ ؤنِتھ اوٕ کِنؠ زِ یس متعلق بہٕ کتھ ونان اوسُس چُھس بہٕ پانہٕ۔ وۅنؠ گو، بہٕ تھٮ۪کہٕ چھرا یہِ زِ بہٕ کوتاہ لیٚوژ چُھس۔6پوٚز گو، فرض کٔرِو زِ بہٕ چُھس نہٕ یژھان پانس متعلق تھیٚکُن۔ چونکہِ بہٕ چُھس ونان پزر بہٕ آسنہٕ احمقٲزی کران۔ یوٚدوے بہٕ فٲصلہٕ کرٕ زِ بہٕ تھٮ۪کہٕ نہٕ پانس متعلق، تتھ پٮ۪ٹھ پرکھاون مےٚ لوٗکھ چھرا میون وتھُن بیہُن تہٕ ونُن کرُن نظرِ تل رٔٹِتھ۔7تہٕ اوے تہِ آو مےٚ خدایہِ سٕنٛدِ اِجازتہٕ پھرِ پھرِ بٔنِتھ تاکہِ بہٕ رٹنہٕ یِمو کتھو کِنؠ چاو زِ خداین کوٚر مےٚ پٮ۪ٹھ یِمن تھزن کتھن ہُنٛد اِظہار۔ خاص پٲٹھؠ اوٚن شیطان سنٛدِ طرفہٕ آمٕتؠ أکؠ بد روحن مےٚ بٔنِتھ تاکہِ یتھٕ پٲٹھؠ رٹنہٕ بہٕ چاو۔8مےٚ ووٚن خداوند یسوعس تریٚیہِ پھرِ مےٚ پٮ۪ٹھ مصیبت ٹالنہٕ باپتھ۔9تسُنٛد ونُن اوس اورٕ، "ییٚلہِ بہٕ ژےٚ سٟتؠ نرمی ورتاوٕ۔ ژےٚ روزی کیا امہِ علاوٕ حاجت۔ پزر گو بہٕ چُھس لوٗکن قوت بخشان ییٚلہِ تِم لیٚژؠ آسن۔ "اوے تہِ تھٮیٚکہٕ بہٕ ژوٚر ژوٚر زِ بہٕ کوتاہ لیٚوژ چُھس۔ یتھٕ پٲٹھؠ بناوِ مےٚ مسیحؔ ہر وِزِ طاقتہٕ سان عمل کرنس لایق۔10اوے تہِ چُھس بہٕ خوش گژھان ییٚلہِ مےٚ کینٛہہ بٔنِتھ یِوان چُھ۔ توٕ کِنؠ زِ بہٕ چُھس خدمت کران مسیحؔ سنٛز۔ اتھ خدمژ منٛز چُھ شٲمل میون لیٚوژ آسُن، لوٗکن ہنٛزٕ یِژھٕ تہٕ تِژھٕ کتھہٕ، لوٗکن ہُنٛد مےٚ عِذا دیُن تہٕ پتہٕ لگُن ییٚلہِ بہٕ جدوجہد کران چُھس، بہٕ چُھس خوش تکیازِ خدا چُھ مےٚ قوت بخشان ییٚلہِ بہٕ لیٚوژ آسان چُھس۔11بہٕ چُھس لگاتار احمقٲزی ونان۔ تہٕ یہٕ کرنووس بہٕ توٚہہِ۔ توٚہہِ اوٚنُو مےٚ ژٮ۪ل تاکہِ توٚہؠ روزیٚو مےٚ بھروسہٕ منٛد یا معتبر زانان وۅنؠ گو توٚہؠ چُھو نہٕ یہِ ونان مگر توٚہہِ پزِ یہِ ونُن توٕ کِنؠ زِ بہٕ تہِ چُھس تیوتاہ عظیم یوٗتاہ تِم لوٗکھ چھِ یِم پانس مسیحؔ سٕنٛدؠ بہترین نمایندٕ ونان چھِ۔ یہِ چُھ پزر یوٚدوے زن بہٕ ہرگِز شانہٕ بوٚڈ چُھس نہٕ۔12بہٕ رودُس پننہِ عملہِ منٛز دٔرِتھ۔ یُس یہِ ثٲبت کران چُھ تہنٛدِ باپتھ زِ بہٕ چُھس پزنہٕ پٲٹھؠ مسیحؔ سٕنٛدِ طرفہٕ سوزنہٕ آمُت تسُنٛد نمایندٕ۔ میانہِ دٔسؠ آے کٲتؠ جلالہٕ تہٕ حٲران کروٕنؠ چیز بارسس۔13مزید مےٚ کوٚر نہٕ توٚہہِ سٟتؠ تیُتھ ویوہار زنتہٕ توٚہؠ باقےٕ ایماندار جمٲژو کھۅتہٕ وسِتھ ٲسِو۔ اکہِ چیزٕ کِنؠ روز میٲنؠ عمل بیوٚن۔ سۅ گییہِ زِ مےٚ کٔرِو نہٕ پریشان یا تنگ پونٛسہٕ منٛگِتھ۔ یوٚدوے تہِ غلط اوس، مہربٲنی کٔرِتھ کٔرِو مےٚ معاف!14دھیان تھٲیو! بہٕ چُھس یمہِ پھرِ توٚہہِ سمکھنہِ یِنہٕ وول تہٕ بیٚیہِ تہِ کرنہٕ بہٕ توٚہہِ پریشان پونٛسہٕ منٛگِتھ۔ اوٕ کِنؠ زِ بہٕ چُھس یژھان زِ توٚہؠ کٔرِو مےٚ پٮ۪ٹھ تہٕ مسیحؔ ہس پٮ۪ٹھ پژھ۔ بہٕ چُھس نہٕ یژھان تِم چیز یِم توٚہہِ چُھو۔ اوٕ کِنؠ زِ بہٕ چُھس زنتہٕ تُہنٛد مول موج۔ مےٚ پزِ تہنٛدِ باپتھ پونٛسہٕ بچاوُن۔ مزید اوٕ کِنؠ زِ توٚہؠ چُو میٲنؠ شُرؠ ہیوؠ۔ توٚہہِ پزِنہٕ میانہِ باپتھ پونٛسہٕ بچاوُن۔15بہٕ ویٚتراوٕ کینٛہہ تہِ خوشی سان توٚہہِ مدد کرنہٕ باپتھ۔ ییٚلہِ بہٕ توٚہہِ برونٛٹھمہِ کھۅتہٕ ژوٚر لول برٕ، توٚہہِ تہِ پزِ برونٛٹھمہِ کھۅتہٕ ژوٚر لول مےٚ برُن۔16توٚہہِ ہیٚکو اتفاق کٔرِتھ زِ بہٕ چُھس نہٕ توٚہہِ ذٲتی طور پریشان کران توٚہہِ پونٛسہٕ منٛگِتھ۔ وۅنؠ گو شاید ما چُھس بہٕ چالاک۔ خبر آسن ما مےٚ توٚہہِ تارن گٔری کٔرِتھ پونٛسہٕ ہیٚتؠ مٕتؠ۔17وۅنؠ گو مےٚ چُھنہٕ کانٛہہ تہِ توٚہہِ بدلہٕ پنُن نمایندٕ بنٲوِتھ سوزمُت توٚہہِ تارنہٕ باپتھ۔18مثالہِ پٲٹھؠ مےٚ ووٚن طِطُسس توٚہہِ سمکھنہٕ باپتھ۔ تہٕ مےٚ تھوو تمِس سٟتؠ پنُن اکھ ایماندار سٲتھی تہِ۔ توٚہؠ چُھو زانان زِ طِطُسن کٔر نہٕ توٚہہِ سٟتؠ تارن گٔری۔ سُہ تہٕ بہٕ چھِ اکے ژۅلہِ ۅوتھان، زُوان تہٕ اکے آیہِ کار کران۔19توٚہہِ پزِ یہِ زانُن زِ توٚہہِ یِمہٕ کتھہٕ وننُک مطلب چُھنہٕ یہِ وٮ۪ژھناون زِ بہٕ تہٕ باقےٕ تمام یِم تہنٛز خدمت کران چھِ، کیا چھِ معتبر۔ بلکہِ تِمن لوٗکن ہنٛدؠ پٲٹھؠ یِم خداین ملنٲوؠ مسیحؔ ہس سٟتؠ، چھِ أسؠ تی ونان یہِ خدایس خوش کرِ۔ میانیو ایماندار سٲتھیو، یِمن أسؠ لول بران چھِ سون غرض چُھ پرٮ۪تھ کینٛہہ یہِ أسؠ ونان چھِ تہٕ توٚہہِ وۅتھہٕ واشر دِنہٕ باپتھ مدد کران چھِ۔20مےٚ ونہِ یِمہٕ کتھہٕ توٕ کِنؠ زِ مےٚ چھےٚ ژیٚپھ زِ سپدِ کیا ییٚلہِ بہٕ توٚہہِ سمکھٕ۔ مےٚ چُھ ژٮ۪پہِ زِ بہٕ ما وُچھہٕ توٚہہِ پننہِ یژھنہٕ مطٲبق عمل نہ کران۔ تہٕ توٚہؠ ما لٔبیٚو سُہ پننہِ یژھنہٕ مطٲبق عمل نہ کرن وول۔ مےٚ چُھ ژٮ۪پہِ زِ توٚہؠ ما ٲسِو پانہٕ وٲنؠ ژُوان، توٚہہِ ما آسہ پانہٕ وٲنؠ حسد۔ توٚہؠ ما ٲسِو اکھ أکِس سٟتؠ ژکھہِ سان اکھ أکِس تلفس تل اننچہِ کوششہِ منٛز بدکلٲمی کران۔ پانہٕ وٲنؠ غلط بیٲنی کران۔ پانس متعلق تھیٚکان تہٕ لوٗکن اکھ أکِس خلاف اُکساوان۔21مےٚ چُھ ژٮ۪پہِ زِ سپدِ کیا ییٚلہِ بہٕ توٚہہِ تریٚمہِ لٹہِ سمکھٕ۔ خدا ما کرِ مےٚ تہنٛدِ باپتھ شرمنٛدٕ۔ مزید بہٕ ما سپدٕ دۅکھٕ دٲوؠ واریہن لوٗکن ہنٛدِ باپتھ یِمو برونٛہہ کالہِ تہِ آسہ کوٚرمُت یہِ غلط چُھ تہٕ آسیٚکھ تہٕ غٲر اخلٲقی جنسی حرکت بند کٔرمٕژ۔
Bridge Connectivity Solutions Pvt. Ltd.