2 کورنتھین13
1مقدس کتابہٕ چھےٚ لیٚکھان: "کمس کم گژھن کُنہِ چیزس یا کٲنٛسہِ نفرس متعلق زٕ یا ترےٚ گواہ آسٕنؠ امہِ برونٛہہ زِ اتھ ییہِ پوٚز زٲنِتھ یقین کرنہٕ۔ "آگاہ روزیٚو آینٛدٕ ییٚلہِ بہٕ توٚہہِ سمکھنہِ یِمہٕ، سۅ آسہ تریٚیِم وِز۔ ییٚلہِ بہٕ تہنٛدِس کرنس کراونس گواہ بنہٕ۔2ییٚلہِ بہٕ توٚہہِ دوٚیمہِ پھرِ سمکھنہِ آیاس، مےٚ کٔرِو توٚہؠ خبردار زِ بہٕ دِمہٕ تِمن سارنےٕ سزا یِمہٕ کانٛہہ گناہ کران آسن۔ وۅنؠ چُھسو بہٕ بیٚیہِ توٚہؠ خبردار کران ییٚلہِ زن بہٕ وُنہِ توٚہہِ دوٗرےٕ چُھس۔ ییٚلہِ بہٕ یِمہٕ تریٚمہِ لٹہِ توٚہہِ سمکھنہِ، بہٕ دِمہٕ تِمن سارنےٕ سزا یِم گناہ کران آسن رودؠ مٕتؠ۔3بہٕ چُھسو توٚہہِ یہِ اوٕ کِنؠ ونان زِ توٚہہِ مونگُو زِ بہٕ دِمو توٚہہِ ثبوت زِ ییٚلہِ بہٕ کتھ کران چُھس یہِ چُھ پانہ مسیحؔ بولان آسان۔ توٚہؠ زٲنِو یہِ ییٚلہِ مسیحؔ توٚہہِ قٲعدس منٛز انہِ۔ سُہ روزِنہٕ توٚہہِ سٟتؠ تمہِ وِزِ نرم۔ بلکہِ روزِ توٚہہِ سٟتؠ تکرٕ۔4توٚہہِ وُچھو أکِس انسٲنؠ کایہِ منٛز رود مسیحؔ بڈٕ نرم تہٕ حلیم ییٚلہِ لوٗکو تس کِلؠ ٹھٲسؠ صلیبس پٮ۪ٹھ۔ وۅنؠ گو خدا چُھ قوت وول تہٕ تٔمؠ بخٕش تس بیٚیہِ زندگی۔ أسؠ تہِ چھِ لیٚژؠ انسٲن یتھٕ پٲٹھؠ سُہ اوس۔ وۅنؠ گو خدا چُھ اسہِ منٛز تہِ پننہِ قوت سان عمل کران۔ اسہِ نوو زُو دِنہٕ باپتھ یتھٕ پٲٹھؠ مسیحؔ ہس دِتُن۔ اوے روزو أسؠ توٚہہِ منٛز قوت سان عمل کران۔5توٚہہِ پزِ پرٮ۪تھ أکِس یہِ سوال پانس پرژھُن، "کیا بہٕ چُھسا مسیحؔ ہس پٮ۪ٹھ پژھ کران تہٕ تسٕنٛدِس ہدایتس پٮ۪ٹھ زُوان؟ "پرٮ۪تھ أکِس پزِ پانس آزمٲیش کرٕنؠ یِتھے پٲٹھؠ۔ تیلی زٲنِو توٚہؠ زِ توٚہؠ چُھو یسوع مسیحؔ ہس سٟتؠ پزی میلِتھ زُوان۔ یہِ چُھ پوٚز یوٚتام نہٕ توٚہؠ اتھ ازمٲیشہِ منٛز ناکام روزیٚو۔6یوٚتام سون سوال چُھ۔ مےٚ چُھ یٮقین زِ توٚہؠ چُھو زانان زِ أسؠ چھِ امہِ ازمٲیشہٕ تٔرؠ مٕتؠ۔7أسؠ چھِ خدایس منٛگان زِ توٚہؠ مہٕ ٲسِو کۅکار کران۔ أسؠ چھِنہٕ منٛگان یہِ اوٕ کِنؠ زِ لوٗکھ مازن اسہِ کامیاب توٚہؠ قٲعدس تحت اننہٕ باپتھ، بلکہِ اوٕ کِنؠ زِ توٚہؠ ٲسِو رٕتؠ کار کران۔ أسؠ چھِ یہِ یژھان توٚہہِ متعلق یوٚدوے امیُک مطلب یِتہِ نیرِ زِ لوٗکھ زانن اسہِ ناکام تکیازِ توٚہہِ چھنہٕ سٲنؠ ضرورت۔8أسؠ چھِ یژھان زِ توٚہؠ کٔرِو رٕژٕ کامہِ۔ یوٚدوے زن یہِ نتہٕ ہیٚکو نہٕ أسؠ توٚہہِ قٲعدس تحت أنِتھ تہٕ توٚہؠ باسیو طاقتور تکیازِ اسہِ پزِ خدایہِ سنٛدِ پزِ پٲغامچ تابعدٲری کرٕنؠ۔ أسؠ ہیٚکو نہٕ کہین کٔرِتھ یہِ زن خدایہِ سٕنٛدِس پٔزِس پٲغامس متضاد آسہ۔9أسؠ چھِ خۅش ییٚلہِ لوٗکھ یہِ سونٛچن زِ أسؠ چھِ لیٚژؠ اوے کِنؠ زِ توٚہؠ چُھو بل دار خدایس مازنس منٛز سانہِ طرفہٕ کُنہِ قٲعدہٕ قانونہٕ ورٲے۔ یوٚہے چُھ سُہ چیز یمہِ خاطرٕ أسؠ دعا چھِ کران، تاکہ توٚہؠ ہیٚکو خدایس پٮ۪ٹھ پوٗرٕ پٲٹھؠ بھروسہٕ کرنُک تہٕ تابعدٲری کرنُک فٲصلہٕ کٔرتھ۔10یہِ چُھ اوٕ کِنؠ زِ بہٕ چُھس یژھان زِ توٚہؠ کٔرِو پژھ تہٕ فرمانبردٲری خدایہِ سنٛز سٲری یژھِ ایمان سان تہٕ توے کِنؠ چُھس لیٚکھان توٚہہِ ییٚتہِ دوٗرِ پٮ۪ٹھٕ یِمن سارنےٕ چیزن متعلق۔ پتہٕ ییٚلہِ بہٕ توٚہہِ نِش واتہٕ، مےٚ پیٚیِو نہٕ توٚہؠ بڈٕ سختی سان أکِس ظٲبطس منٛز انٕنؠ۔ خداوندن بخُش مےٚ پنُن نمایندٕ آسنُک درجہٕ۔ وۅنؠ گو تٔمؠ کوٚر یہِ اوٕ کِنؠ زِ بہٕ دِمہٕ توٚہہِ ہمت تہٕ حوصلہٕ تہٕ بیٚیہِ کرَو خدایس پٮ۪ٹھ پژھ کرنچہِ اتھ کامہِ منٛز اتھہٕ روٚٹ۔ نہ زِ بہٕ کرَو توٚہؠ پس ہمت خدایس پٮ۪ٹھ پژھِ نِش۔11یِم چھےٚ کینٛہہ ٲخری کتھہٕ یِم بہٕ توٚہہِ وننہِ چُھس یژھان، میانیٚو ایماندار سٲتھیو۔ خوش روزیٚو! خدایہِ سٕنٛدِ یژھنہٕ مطٲبق روزیٚو لسان بسان۔ یِم چیز مےٚ توٚہہِ ؤنیٚو تِم دِنو توٚہہِ حوصلہٕ خدایس پٮ۪ٹھ زیادٕ پژھ کرنہٕ باپتھ۔ اکھ أکِس سٟتؠ تھٲیِو اتفاق اہم چیزن پٮ۪ٹھ۔ اکھ أکِس سٟتؠ روزیٚو امنہٕ سان۔ یوٚدوے توٚہؠ یِم چیز کٔرِو، خدا روزِ توٚہہِ سٟتؠ سٟتؠ۔ سُہ چُھ توٚہہِ پانہٕ وٲنؠ ماے محبت تہٕ امن تھاونس لایق بناون وول۔12اکھ أکِس کٔرِو خوش آوے مایہِ تہٕ لولہٕ سان تِتھٕ پٲٹھؠ یُس خدا سنٛدؠ خاندان کٮ۪ن فردن شوٗبہِ۔13یتہِ چھِ خداوند یسوع مسیحؔ سٕنٛدؠ سٲری بنٛدٕ توٚہہِ نیک خواہشات سوزان۔14خداوند یسوع مسیحؔ روزِن توٚہہِ پٮ۪ٹھ مہربان۔ خدایہِ سُنٛد لول پوشؠ نو تہٕ پاک روح روزؠ نو سٟتؠ سٟتؠ تہٕ تھٲوؠ نو پانہٕ وٲنؠ سمُت۔
Bridge Connectivity Solutions Pvt. Ltd.