Oseasi8
Lasiadirún Ísüraeli
1«Winboun bifidun ladüga anute aban ágila tuagun luban Aburemei. Lugundun dürügua humaali nidaradun luma nilurudun.2Hayabinti agúaraheina nun, hariñaga: “Subudi wamutibu keisi Lubungiute Ísüraeli!”3Gama lumoun máhati Ísüraeli lun le buídubei, ligía héibaahabei lubéi láganiñu».4«Rútiña ábutigu ibidiñoun nun, málügüdahanga hagía numa. Barǘ hamaali hani pülata luma hagolun lun hadaagun guáriuagu, lun hagünrinchagun houngua.5Samaria, mínsiñeti liyawa bágasu le unbei báhuduragua nun! Durunguaali nigañi luagun. Ídaba funa san harumada Ísüraelina?6Liyawa bágasu Samariana le, mama Bungiu! Adügǘwarügüti ani lagünrinchawaguba.7Hagía bunaguatiña garabali, halubahaba luriban dan, macharibaña lun hábunagun, masagabaña fulúaru lídangiñe lin türigu, ánhañadügü asagara, héigiboun terencha.8Hulúaali Ísüraeli! Ítara liña harihini ha híbiri néchanigu kei aban katei le mebegiti.9Ladüga láluahani lídemuei Asiria keisi aban burigü áraabuna le deré taganbun. Ruti Éfürain idewesei lun lagañeihan lubúaligu!10Gama lumoun íbini líchugun edewehani houn néchanigu, guentó nadisedaguagüdaaña hawariuagua, lerederuba hafalarun urúeigu hama ábutigu luagu fiu dan».11«Lugundun adaaguati Éfürain saragu latarü, le eseriwidubei lun, lun lafigouhan.12Lau sun abürühanani buga narufudahan le gíbebei lun, barǘ lumuti kei katei terenchati.13Hínsiñeti adagaragüdüni gudawarügüti houn ani adüga hamuti, ani hóutiña lídangiñe úi le lánina adagaragüdüni gudawarügüti; gama lumoun au le Aburemei magundantina hama luagu lira; naritagubei wuribani le hadügübei, ábame nabeichuniña luagu hafigoun lau nagiribudagüdüniña Ehiptun.14Bunaguati burí Ísüraeli palasiu, gama lumoun bulíeiguati luéi le adügübalin. Ráramagüdati Hudá saragu uburugu derebuguti, gama lumoun nágudubei burí lidan aban watu le lunbei lágudunu lani burí palasiu».Bible Society of Honduras