Oseasi7
1Dan le nabusenrun nagaranihan houn numutuniña Éfürain luma Samaria ligía lafurangudun hafigoun luma hariban. Lugundun sun hagía eyeehatiña; belutiña hábiñoun mutu keisi híwerutiña, íweruha hagía hawéi gürigia ǘmadarugu.2Meberesegúntiña luagu haritagua nani sun hariban. Guentoti geyegua lumutiña hóuserun guánarügü le ligibugiñebei nagu súnwandan».
Luriban hóuserun arúeihatiña
3«Éheragüda hamuti numutuniña urúei hama ábutigu lau hariban luma hayeeni.4Sun hagía agabaraha hamutiña hámarigu; ítara haña kei régigi, gemeeli ligía, aba máfuhanhaali lan ásürahati lau sun anuha lan fulúaru eresira.5Weyu le ladaürǘnbei liridin warúeite luagu, sándigüda hamuti ábutigu tau diwéin. Ani tulé lumuti lúhabu houn ha adaagubaña bula!6Aranse hamutu hanigi lun wuribani, kéigubeirügü hamuga lebedún aban régigi; arumugati ásürahati sun áriebu, gama lumoun larugan binaafin gemeñugili régigi buidu.7Sun hagía buintiña lau lisü igañi keisi aban régigi ani aba hagumuchaguagüdüniña aguseragüdütiña. Ítara liña hábürühan sun harúeitegu úati ni aban hádangiñe afurieiduti nun».Ageiraü le adireirubei luéi Lubungiute
8«Dáguaali Éfürain lungua hamoun amu gürigia. Ítara liña Éfürain kei aban durudia to ábanrügüti touba éfeda.9Gumú hamá gürigia terencha lere ibidiñoun lun. Íbini lídiburi haruha ibidiñoun lun!10Lupantan guánarügü Ísüraeli arufudubalin gadurun lan. Lau sun lira magararagúntiña lun háluahani Aburemei le Habungiute.11Ítara liña Éfürain kei aban unhun ibidiougaali tau, lamuriaha ídemuei luma Ehiptu, lárigiñe aba lidin lumoun Asiria.12Gama lumoun danme houdin ñein, náguruboun nisenin hau, ábame nanügüniña kei dunuru, nábürügüdübaña ladüga hariban».13«Fugiabugu hagía ladüga hadireirun nuéi! Lárügüdübaña günringuaü lugundun iñuraguaaña houngua nuagun. Busentina nesefuruniña gama lumoun eyeehatiña nuagu.14Lau sun hagúarahan dan le gabanarugu hamá, magúahan hamutina tau hanigi. Bíguatiña houngua lun hamuriahan türigu tuma diwéin; iñuraguaaña houngua nuagun!15Arufudahaadina yebe houn, ru au erei lun harüna, gama lumoun aransehatiña lun hadügün wuribani nun.16Falaya hamaaña guáriuagu; Ítara haña kei gimara segetu to madagatu luagun le uágunbei tachürǘwa. Háfarawaguba hábutigu tau eféin ladüga hadimurehan lau éregu, ladügǘba bula hau Ehiptu».Bible Society of Honduras