Oseasi9
Líchugun Oseasi ñunsu luagu labeichún Ísüraeli
1Magundaaraguabá Ísüraeli; machubahabá lau ugundani kei híbiri gürigia, ladüga ahoruhaadibu lau bígiruni Bubungiute. Hínsiñeti bun lun bafayeirúniwa luagu bahoruhan lidan fulasu le ñein lubéi léferehoua türigu.2Úabei türigu ni diwéin hama lánigu Ísüraeli; Memeniboun haniñe diwéin to iseri.3Lagiribuduba Éfürain Ehiptun, héigiba éigini wíyeti Asiria. Maganóundigiaañame lageira Aburemei.4Mátunbaña diwéin lidan liri Aburemei, míchugun hagíame adagaragüdüni lun ñein. Fein to héigiboun ítara tuba kei fein lánina lamiselu, ani ha éigitu fein tuguya, herederuba wíyeñu. Héigiboun fein tuguya, ánheinti lun hanügünu litenpulunrugu Aburemei siñabei.5Kaba san hadüga danme luéyuri fedu, le lufedun Aburemei?6Hagía anurahaaña luéi günringuaü; labudahabaña Ehiptu, habunúba uburugu Ménfisi. Labuinchuba harisin le pülata lau híduru, láhüchüba hiiyu hakianpun-ágeirugu.7Chülühali luéyuri abeichúni! Luéyuri labeichuni Bungiu lageira. Lasubudirubei Ísüraeli luagu chülühali lan dan ligía! Huguya, hariñahare: Aban deré taganbun profeta. Wügüri le hanichigubei, lǘlüti lau. Gama lumoun hariñagunbei ítara, ladüga buin hiña lan lau wuribani, lugundun weiri lan hiyereehabu.8Óunaha lumuti Bungiu lani profeta lun lawisaruni lageira, gama lumoun huguya, esetihatün sádara lubá; íbini tidan litenpulun Bungiu iyereeguti hun!9Gádeihadün sunsuinagubei, kei meha lidaaniwagu Gibeá. Gama lumoun laritaguba Aburemei luagu huriban ábame labeichunün luagu hifigoun.Le lanügübei lifigoun Ísüraeli
10Lariñahare Aburemei: «Dan le nadarirunbalin Ísüraeli aba nagundaaragun kei le adarirubei beibei lidan fulasu mageirawati. Ítara haña meha hagüchagu nun kei igu to agindutu furese. Gama lumoun dan le hachülürünbei Baali-peoru aba hederegeragun houngua houn hagübüri búngiugu, aba hǘnabudaguagüdün houngua kei guáriuagu ha meha hínsiñebaña houn.11Láhamahaba luéirigun Éfürain kei aban dunuru. Magaraüdǘnwaañame irahüñü. Úaañame würiña adageinadutiña, magaraüdǘnwaañame amu isaanigu.12Ánhañadügü hamuga aweinamuda hasaanigu, nagidaruñanu hamuga hawéi mígirunga ni aban houn. Fugiabugume gürigia ha danme le nadireirun hawéi!13Narihini lóuseruniña Éfürain lisaanigu kamá hamuga háliru agaliruhatiña; sagá lumutiña lun lederegeruniña lun háfarawagun hilagubei».14Aburemei, rubei le hadünabei houn! Ruba urageirugu maraüheiti houn luma aniguagu márati!Lagañidun Aburemei luma Éfürain
15Lariñahare Aburemei: «Adüga hamuti sun le wuribabei Gilügáli, ñein hagumesera eyereeguda nun. Nabugubaña núbiñegiñe ladüga luriban hóuserun; masigibadina lau nínsiñehabu houn, ladüga mabuchahatiña sun hábutigu.16Bíwaguañein Éfürain; ítara liña kei aban tídibu wewe to mábeihali tílagüle, to magindunhaaru. Íbini liabin lun garahüñü lan, náfaragubaña».17Máhatiña gürigia ha hadügün gasu lau Nubungiute; ligía lígirubaña lubéi Nubungiute houngua; herederuba éibudügü hadan néchanigu.Bible Society of Honduras