Josua6
1Jeriko marowchakuüa dow Israeluüa kowi kram rakowi amatni kowh marow tapplawt mih asima büngta büah khai. Naiawng rakowi nami marow hownia dow miapaw nowng lawt dowi bowt, now kup paw miapaw uang nowng kup dowi bowt chekhai.2CHAKRAMANG tek pe Josua mih, “Sünta diah, Jeriko marow dow ang apta en mih chowbowt. Now nami marow kowi kowh mang hai aia kowh lang kiak mih siphai hawmh paw ang apla en mih chowbowt.3Ani kowi pakat chi taruk ni mowr marow tapat lut en kowh siphai hawmh hown krawi pat büa diah.4Enni krawi pat marow mih khin khe uamow ranit ia mih napawla baw ranit klüng hanow sangbowk laitawm tawkpla kawt mih uamowuüa pur kowi tumla baw se narik mang kown. Now ranit ni mih ni khe dow marow tapat lut ranit kat enni nakrawi patah kown.5Now ruapurla nang hown kowh thawpah mih baw aiatma uamowuüa tum mih che en ta khowk hanow maru maten kowi atünma en nape hekah kown. Nahanow Jeriko marow tap dow nahing chan bun kown towbowt. Now enni Israeluüa mih marow lak kowi nakowkup kown,” pakhai.6Naiawng rakowi Nun kowh chapa Josua dow uamowuüa kowi hawah hanow tek pe mih, “CHAKRAMANG kowh sangbowk laitawm tawkpla kawtla büa diah. Now ruapur nang hown kowh thawpah mih baw enni pungmadawng hownia pawla ranit klüng hanow sangbowk laitawm tawkpla kawt miuüa pur kowi rik mang büah ranit ia diah,” pakhai.7Nami kung kowi dow maru kawmuüa kowi Josua peah ana mih, “Marow tapat lut kowi kowkrawi pat büah akat diah. Now siphai hawmh dow CHAKRAMANG kowh sangbowk laitawm tawkpla pur kowi narik mang kown,” pakhai.8Naiawng rakowi Josua ana pek iawng ruapur nang hown kowh thawpah mih baw tumla mih uamow ranit ia pur kowi siphai hawmhuüa mih rik mang pathum khai. Nami tumla baw mih uamowuüa kung kowi dow kawtla sangbowk laitawm tawkpla mih uamowuüa krawi ta mang khai. Nami kung kowi paw siphai hawmh krawi ta mang pathum khai. Uamowuüa dow pat marow towng tumla baw büah khai.10Nachenganchepaw maru kawmuüa dow ririmma chekhai. Tawngplawng kowchow panow maru kawmuüa kowi Josua rik peah ana mih, “Ang tek enni dowi mowr mapaw hang hek büah. Ditchow paw hang lai büah. Ang tek enni khe chiang enni nahek kown,” pakhai.11Naiawng hai amatni dow Josua ana pek iawng CHAKRAMANG kowh sangbowk laitawm tawkpla mih marow tapat lut krawi patla akat khai. Now nami kung kowi dow amatni chowlowkkow tangbung khup rah kowi uang iak büah khai.12Auai rau murpa Josua dow awr rü khai. Now nami ni paw auown ni khe kowh iawng uamowuüa hai siphai hawmh mih marow kowi krawi pat khai iawk. Nami ni paw tumla baw mih uamow ranit ia pur kowi siphai hawmhuüa rik mang pathum khai. Nami tumla baw mih uamowuüa kung kowi dow kawtla sangbowk laitawm tawkpla mih uamowuüa krawi ta mang khai. Nami kung kowi paw siphai hawmh krawi ta mang pathum khai. Uamowuüa dow pat marow khe atungma hing tumla baw büa hüah khai.14Naiawng hai pre ni mih ni kowi paw amatni dow marow tapat lut krawi pat büah akat khai. Now nami kung kowi dow amatni chowlowkkow tangbung khup rah kowi uang iak büah khai. Amatni dow naiawng hai taruk ni mowr krawi pat büah khai.15Ranit ni mih ni khe dow rau-e murpa uarthowi pasum seng khe awr rü büah khai. Now nami ni paw amatni rik pat marow khe kowh changla iawng changla se marow tapat lut krawi pat büah khai. Nachenganchepaw nami ni khe dow krawi pat büah ranit kat khai.16Ranit kat pat büah mih khin khe dow uamowuüa mih aiatma tum baw khai bowt. Nakhowk khe Josua tek pe maru kawmuüa mih, “Atünma hek büah bowt! Tawngplawng kowchow panow mami marow dow CHAKRAMANG peta enni mih chowbowt!17Marow hai marow lak kowi kowh uowi mih maten enni napiakta bowk kown. Now nakowi kowh uowi mih maru hai tawncher maten paw enni nasaita bowk kown. Naiawng enni chang mih dow CHAKRAMANG tut-e enni ap uanh mih iawng chekhai. Chawkkrawma Rahab hai aia kim kowi kowh tawi uowi mih maru ngetchow kowi taih natowah asing kown. Tawngplawng kowchow panow kowkumü pren kownkow a-i kowchinah mih maru-uüa kowi aia mih hawt petah khai.18Nachenganchepaw napiakta kown mih uanh maten dow mapaw enni naia pawla kown nadowi. Enni che chün lai dowi kowi pawla khai hanow enni Israeluüa kowh tangbung khup rah kowi phih nauang kla kown, now enni luk kowi piakra nauang ting kown.19Tawkche nami marow kowi kowh kuh uanh, tai uanh, kri uanh hai lawngha uanh maten dow CHAKRAMANG vüi kowi lang kraah mih chekhai. Naiawngün uanh maten dow CHAKRAMANG kowh dawngthawnguan towk rah kowi enni natowah kown,” pakhai.20Uamowuüa aiatma tum baw mih tün ta hown krowksang maru kawmuüa dow akawm srui atünma hek büah khai. Now Jeriko marow tap dow chan rum khai. Nahanow maru kawm maten dow marow lak kowi kowkup khai, now marow dow powngta büah khai.21Now amatni dow marow kowi kowh uowi mih maten — masiuüa kachakuüa, lawngtang ngeu-uüa, chia, ruapur hai kawrngaramchük ün — saita bowk khai.22Kowkumü pren kownkow kowchinah mih maru pre ia kowi Josua tek pe mih, “Chawkkrawma kowi enchi khamla pe laiklow iawng aia kim kowi kowkowi iüa diah. Now aia hai aia kim kowi kowh uowi miuüa kowi uang lawtla iüa diah,” pakhai.23Naiawng rakowi nami maru pre ia dow Rahab kim kowi kowkup khai. Now amatchi dow aia hai a-u a-pa kowi, atainau-uüa hai aia kim kowi kowh uowi mih maten kowi uang lawtla khai. Naiawng hai Josua mih Rahab hai aia kim kowi kowh uowi miuüa kowi lawngah khai. Rahab kowh maru-uüa kowi dow Israeluüa kowh tangbung khup rah uat kowi kowh thaulangma mih arah kowi pe uowiah büah khai. Tawngplawng kowchow panow nakowkumü Jeriko marow kownkow Josua kowchinah mih maru pre ia kowi Rahab dow hawt petah khai. Rahab krungchakuüa dow kawmat mowr pat Israeluüa pungmadawng kowi tawi uowi reng chekhai.
Kuh uanh, tai uanh, kri uanh hai lawngha uanh maten dow CHAKRAMANG kowh dawngthawnguan towk rah kowi Israeluüa kowtowah khai. Tawkche marow hai marow kowi kowh uowi mih akeng uanh maten dow towkta bowk khai.26Nami khin khe Josua dow kham sawi se tek mih, “Mami Jeriko marow ta plan thawp mih maru luk kowi dow mami CHAKRAMANG kowh piati pacham klaah.“Thawp marow tap mih maru kowh dow chapa ta pacham kowng lah,now thawp marow tapplawt mih maru kowh dow chapa sawi pacham kowng lah,” pakhai.27CHAKRAMANG dow Josua tut-e tawi uowi reng chekhai. Now Josua kowh ming iung nang iung dow Kanan pren paprenma kowi cham krawi tauet khai.
Kuh uanh, tai uanh, kri uanh hai lawngha uanh maten dow CHAKRAMANG kowh dawngthawnguan towk rah kowi Israeluüa kowtowah khai. Tawkche marow hai marow kowi kowh uowi mih akeng uanh maten dow towkta bowk khai.26Nami khin khe Josua dow kham sawi se tek mih, “Mami Jeriko marow ta plan thawp mih maru luk kowi dow mami CHAKRAMANG kowh piati pacham klaah.“Thawp marow tap mih maru kowh dow chapa ta pacham kowng lah,now thawp marow tapplawt mih maru kowh dow chapa sawi pacham kowng lah,” pakhai.27CHAKRAMANG dow Josua tut-e tawi uowi reng chekhai. Now Josua kowh ming iung nang iung dow Kanan pren paprenma kowi cham krawi tauet khai.
The Seed Company