Josua5
1Israeluüa uaipown Jawrdan aw khe tawng iawng chow Israeluüa pur kowi Jawrdan aw tui CHAKRAMANG pe kangah mih satang dow Jawrdan aw satkup pra kowh Amawruüa mang maten hai sata pang kowi kowh Kananuüa mang maten tawi ta khai. Nami satang tata hanow naiawngün manguüa mih lainowmma takrow khai bowt, now amatni kowh sakowmra maten paw uowi dowi bowt chekhai. Amatni dow Israeluüa hown tadowk tasen kown khowm padow uam büah dowi bowt chekhai.2Gilgal pami arah kowi Israeluüa uowi reng tak khe CHAKRAMANG tek pe Josua mih, “Josua, cham paw pe huaran sangrum hanow saichow iawng thawpah diah, now nami huaran hown alai kowh iawng Israeluüa kowi hiah pe khampha uanpik diah,” pakhai.3Nami laiklow tata hanow Josua dow huaran hown thawp saichow sangrum khai. Now Gibeat-Haralawt hungh kowi nami huaran hown Israeluüa kowi Josua hiah pe khampha uanpik khai. Gibeat-Haralawt pami dow “Khampha uanpik hiah rah hungh” pami chekhai.4Israeluüa kowi naiawng Josua hiah pe khampha uanpik mih auan dow maiawng: Aigupta pren hownia uang lawt khe kowh tasen uang khowk mih kachakuüa maten hiah khampha uanpik khowk chowdiah. Nachenganchepaw naiawngünuüa dow süngrüp süngkangma kowi uowi khe CHAKRAMANG kowh ana pek chün dowi chekhai. Naiawng rakowi nakhowk khe naiawngünuüa kowi dow iawn tui hai kuai tui atekma mih pren natawi khi dowi kownkow CHAKRAMANG khamah khai. Nami pren mih napeah kownkow amatni pipu-uüa kowi CHAKRAMANG khamah khowk chowdiah. Nachenganchepaw naiawngün maru-uüa kowi dow aia kowh laiklow chün dowi rakowi kowng bowk dowi mowr süngrüp süngkangma kowi CHAKRAMANG pe krawi lenah panglang khai. Naiawngün maru-uüa kowng bowk kung kowi dow naiawngün maru-uüa kowh chauüa kowi amatni takcha CHAKRAMANG ta peah pren khai. Nachenganchepaw amatni kowh chauüa dow Aigupta pren hownia uang lawt kung kowi tiama rawng kowi süngrüp süngkangma kowi kowh dia mih chekhai. Tiama rawng kowi kowh dia miuüa kowi dow hiah pe khampha uanpik dowi tak rakowi Josua hiah pe khampha uanpik mih chekhai.8Naiawng hai kachakuüa maten kowi dow hiata pe khampha uanpik bowk khai. Now khampha uanpik hiah lawi lep dowi mowr dow amatni kowh tangbung khup rah kowi uowi büah khai.9Nami kung kowi CHAKRAMANG tek pe Josua mih, “Aigupta pren kowi kowh enni uowi nar mih rukraira maten ani hownia now ang henta enni mih chowbowt,” pape khai. Naiawng rakowi nami re-e kowh arah ming dow Gilgal pahai Israeluüa chap pe khai. (Gilgal pami auan dow “Henta” pami chekhai). Nami arah ming dow kawmat pat Gilgal pahai maru tukah reng tak chekhai.10Nami la kowi kowh laitali ni mih ni khe dow sat kup hownia now Israeluüa mih sun Takat Pawi khai. Nami Takat Pawi Israeluüa sun mih dow Jeriko marow re-e kowh Gilgal pami dowm nai kowi khup tangbung büah khe chekhai.11Auai ni hownia now Kanan pren kowi kowh luprak hown kowh thawpah mih kawm ngai hai the pe tuah dowi mih kawm Israeluüa cha khai bowt.12Kanan pren kowi kowh luprak Israeluüa uown cha mih auai ni hownia bowt now manna kawm mih katpaw uang dowh dowi bowt. Nami ni hownia bowt now Israeluüa mih katpaw ka cha manna kawm dowi bowt chekhai. Nami ning hownia Israeluüa dow Kanan pren kowi kowh luprak towbowt cha khai.13Jeriko marow re-e Israeluüa kowting mih khin khe saidawng howkma mih maru Josua pur kowi uang iowng mih aia khi lowk ia khai. Nami maru kowi Josua lüntaah mih, “Mia pra kowh tangi mih maru chow en? Anging pra kowh tangi mih bow, dowdow anging kowh ransu-uüa pra kowh tangi mih maru bow?” pakhai.14Nakhowk khe nami maru tek pe Josua mih, “Ang dow mia pra paw tangi mih maru nadowi. Ang dow CHAKRAMANG kowh siphai aluchow chekhai. Kawmat mih en tut-e ang uang mih chekhai,” pape khai. Nami laiklow tata now Josua dow tabawkah krawm se nami maru kowi chupah khai. Now Josua lüntaah mih, “Chakramang, ang dow en kowh nar chowtaih. Tawng chow en tek ang kown nau mih tek diah,” pakhai.15Nakhowk khe CHAKRAMANG kowh siphai aluchow tek pe Josua mih, “Kawmat kowh en iowngah mih arah dow chimsaima chekhai. Naiawng rakowi en kowh phanaikhawk klüpta diah,” pape khai. Josua dow nami maru tek iawng chang khai.
The Seed Company