Josua7
1Jeriko marow kowi kowh uanh napiakta kownkow aia khowm bowkta mih dow tawngpaw napaw dowi kown mih Israeluüa kowi Thurai tek pe khowk chowdiah. Nachenganchepaw Juda chen kowi kowh Akan pami dow aiamat vüi Jeriko marow kowi kowh uanh mih pawla ne khai. Akan dow Karmi kowh chapa chekhai. Karmi dow Zabdi kowh chapa, now Zabdi dow Zera kowh chapa chekhai. Naiawng Israeluüa pungmadawng hownia CHAKRAMANG kowh ana pek chün dowi lowk ia rakowi CHAKRAMANG mih Israel pachenma luk kowi lainowmma kunmarau khai.2Jeriko marow re-e Israeluüa uowi reng tak khe nakowku paw satang kownkow Ai marow kowi Josua kowchin dumiow sangrum khai. Ai marow uowi mih dow Bethel marow satlawt pra kowh Bet-Aven marow re-e chekhai. Aia kowchinah mih dumiowuüa kowi Josua krawi tek pe mih, “Ai marow kowi kowkowi büa diah, now nami marow krawi kumüla kaneu büa diah,” pakhai. Naiawng rakowi naiawngün dumiowuüa dow kowkowi hanow Ai marow lawnguan kowi kukpa krawi ku paw satang khai.3Now akung kowi dow uang plan hanow Josua kowi dumiowuüa uang tek pe büah mih, “Ai marow kowi dow maru iun e chowtaih. Naiawng rakowi nakowsen Ai marow kownkow maru maten tarü kla dowi. Maru maten kowi towkah kawm dowi paw. Maru iun 2,000 ia nadowi now 3,000 ia kowchin now na taih,” pakhai.4Naiawng rakowi maru iun hu prakowi 3,000 iachow taih Ai marow kowi kowsen kownkow tarü büah khai. Tawkche Ai marowchakuüa kowi nowng dowi kowh kowdowk tasen miuüa mih uang powt takla khai.5Ai marowchakuüa dow marow tapplawt hownia Sebarim pami arah mowr Israeluüa kowi kawikrawiah khai. Now Ai marowchakuüa dow arema mih arah kowi Israeluüa kowh siphai 36 ia kowi krawi saita khai. Naiawng rakowi Israeluüa kowh sakkraingra dow hing piak bowk khai.6Nakhowk khe Josua hai Israel lawngtang aluchowuüa dow sak kowi rau lai kowh amatni kowh tawnguat thekta büah khai, now lu kowi prui dinchow büah khai. Now sat kup dowi mowr CHAKRAMANG kowh sangbowk laitawm tawkpla re-e hing tabawk büah hüah khai7Josua tek mih, “Aw CHAKRAMANG Thurai, tawngplawng kowchow Jawrdan aw uang pe pown anging hanow nasaita anging kownkow Amawruüa rut kowi en tuk ap anging khai? Jawrdan aw paipra pown kowi phai anging uowi phülü panü lang iung tak diah.8Aw CHAKRAMANG, ransu-uüa tut-e sum kowh Israeluüa uang powt kung kowi tawng tak chow ang natek en kown?9Kananuüa hai mami pren kowi kowh akeng chenchapuüa mami laiklow ta hanow nauang umta anging lut kown towbowt. Now amatni dow lusa hownia namitta anging rim kown towbowt. Nakhowk khe tawng iawng chow en kowh ming iung nang iung mih en natownah bowt kown?” pakhai.10Nakhowk khe Josua kowi CHAKRAMANG tek pe mih, “Awr rü! Tawngplawng kowchow naiawng en tuk tabawk khai?11Israeluüa dow chang lup ngak khai. Amatni kowi dow ang kowh sangbowk laitawm laiklow nachün kownkow ang tek pe khowk chowdiah. Nachenganchepaw chün büah dowi. Napiakta kownkow ang khowm bowkta mih uanh maten hownia pawta büah ne khai. Amatni dow ku khai, now dai lai paw tek khai. Naiawngün uanh maten mih amatni kowh uanh hown katsang towah büah khai.12Ransu-uüa tut-e Israeluüa sum mih dow naiawng rakowi chekhai. Amatni dow kung prakowi powt khai. Tawngplawng kowchow panow amatni kowi dow napiakta kownkow khowm bowkta khowk chekhai. Napiakta kownkow Thurai khowm bowkta mih uanh enni tut-e uowi ne. Naiawngün uanh che enni piakta dowi hanow enni tut-e ang natawi uowi kown nadowi bowt.13“Awr rü! Kowkowi hanow maru kawmuüa kowi kowchimsaiah diah, now tharau khe ang pur kowi nauang kownkow pe kamrütah diah. Tawngplawng kowchow panow ang CHAKRAMANG enni Israeluüa kowh Thurai natek enni kown mih, ‘Aw Israeluüa, enni pungmadawng kowi napiakta kownkow Thurai khowm bowkta mih uanh uowi ne. Naiawngün uanh alakma kowi enni cham kuakta dowi mowr dow ransu-uüa kowi enni naia kown nadowi,’ napa kown.14Naiawng rakowi tharau rau-e khe pakrungchak pakrungchakchow ang pur kowi enni nauang iowng kown. Mia iawng mih krungchak kowi chow ang ka khüm mih nami krungchak hownia pamachak pamachak chow ang pur kowi nauang iowng kown. Now mia iawng mih machak kowi chow ang ka khüm mih nami machak hownia pakimchak pakimchakchow ang pur kowi nauang iowng kown. Now mia iawng mih kimchak kowi chow ang ka khüm mih nami kimchak dow lowk ia lowk iachow ang pur kowi nauang kown.15Now napiakta kownkow Thurai khowm bowkta mih uanh mia iawng mih maru tut-e chow uowi mih ang ka khümta hanow nami maru kowi dow aia kowh uowi mih srui hailawm maih kowi nanawmah kown. Tawngplawng kowchow panow aia dow CHAKRAMANG kowh sangbowk laitawm chün dowi chekhai, now Israeluüa vüi rukrai pairaima mih lup chang khai,” pakhai.16Naiawng rakowi Josua mih auai rau murpa pachen pachenchow Israeluüa kowi CHAKRAMANG pur kowi kowpawla khai. Nakhowk khe kowh ka khümta mih dow Juda chen kowi chekhai.17Nami kung kowi dow Juda chen hownia pakrungchak pakrungchakchow uang iowng khai. Nakhowk khe kowh ka khümta mih dow Zera krungchak kowi chekhai. Nami kung kowi dow Zera krungchak hownia kowh aluchowuüa lowk iachow lowk iachow uang iowng khai. Nakhowk khe kowh ka khümta mih dow Zabdi kowi chekhai.18Nami kung kowi dow Zabdi kimchak hownia lowk iachow lowk iachow uang plan iowng khai. Nakhowk khe kowh ka khümta mih dow Karmi kowh chapa Akan kowi chekhai. Karmi dow Zabdi kowh chapa, now Zabdi dow Zera kowh chapa chekhai.19Nakhowk khe Akan kowi Josua tek pe mih, “Chapa ow, CHAKRAMANG Israeluüa kowh Thurai kowi rowsi kiowri diah. Now tawng chow en changta khai mih tek ang diah; hauang da ang diah,” pape khai.20Nakhowk khe Akan tek pe Josua mih, “CHAKRAMANG Israeluüa kowh Thurai kowi kingküala mih angak ang changta khai nowm. Ang changta mih angak dow maiawng:21Jeriko marow kowi a-i kowdowk tasen mih khin khe a-i nowngta kung kowi Babulawn pren hownia kowh uan klangiungma mih lowk, tai 200 iun hai adik 600 gram mih kuh klu ang khita khai. Now naiawngün uanh dow lainowmma ang ir khai. Naiawng rakowi naiawngün uanh ang pawla now ang kowh tangbung lak kowi krawng kowi ang dupah khai. Naiawngün uanh dow ang tangbung lak kowi krawng kowi uowi reng, now adak nowm nowm kowi uowi mih dow tai chekhai,” pakhai.22Nami laiklow tata now Josua mih Akan tangbung kowi kowchin maru khai. Nami maru-uüa dow kowiowmah now Akan tangbung lak kowi krawng dak kowi naiawngün uanh mih kowkhi khai, now adak nowm nowm kowi uowi mih dow tai chekhai.23Amatni dow naiawngün uanh maten tangbung lak hownia uang lawtla hanow Josua hai Israeluüa maten tut-e uang pawla khai, now CHAKRAMANG pur kowi towah büah khai.24Nami kung kowi Josua hai Israeluüa maten mih Zera krungchak Akan kowi pawla now Akhawr lawngrawi kowi kowpawla khai. Amatni dow Akan ku pawah mih kuh, tai, uan, Akan kowh masi chauüa, Akan kowh chia, ruapur, kawrngaramchük, tangbung hai aia kowh uowi mih maten paw pawla khai.25Nami kung kowi Josua tek pe Akan mih, “Tawngplawng kowchow a-i luk kowi naiawng mih phih en uang tuk pawla khai? Ani mih en luk kowi paw CHAKRAMANG nauang pawla en phih kown,” pape khai.
Nakhowk khe Israeluüa mih Akan kowi hua hown rik kuakah khai, now akung kowi aia kimchakuüa maten kowi paw hua hown kuakah now kowngta bowk khai. Nami kung kowi dow Akan kowh uanh uowi mih srui hailawm amatni kowi maih hown towkta bowk khai.26Nami kung kowi dow Israeluüa luk kowi CHAKRAMANG kowh kunmarau uowi mih prowng khai bowt. Akan kowh uak tik rah luk kowi dow Israeluüa cham paw pe hua hanow akrowngrowngma chun pe khai. Naiawng rakowi nami re-e kowh arah dow nami kung hownia bowt now Akhawr lawngrawi pahai chap pe ming khai. (Akhawr pami auan dow “phih” pami chekhai). Nami hua krowng dow kawmat pat nami re-e uowi reng chekhai.
Nakhowk khe Israeluüa mih Akan kowi hua hown rik kuakah khai, now akung kowi aia kimchakuüa maten kowi paw hua hown kuakah now kowngta bowk khai. Nami kung kowi dow Akan kowh uanh uowi mih srui hailawm amatni kowi maih hown towkta bowk khai.26Nami kung kowi dow Israeluüa luk kowi CHAKRAMANG kowh kunmarau uowi mih prowng khai bowt. Akan kowh uak tik rah luk kowi dow Israeluüa cham paw pe hua hanow akrowngrowngma chun pe khai. Naiawng rakowi nami re-e kowh arah dow nami kung hownia bowt now Akhawr lawngrawi pahai chap pe ming khai. (Akhawr pami auan dow “phih” pami chekhai). Nami hua krowng dow kawmat pat nami re-e uowi reng chekhai.
The Seed Company