Éxodo1

E'yajti aj Israel toj Ejipt

1Aye'tzun aj Israel ja'lu e'pon Ejipt tuk'i'l Jakob' ju' kyman, teyile junjun kyuk'i'lju' toj kyja ex a kyb'i ja'lu:2Rub'en, Simeon, Leb'i, Juda,3Isakar, Sab'ulon, B'enjamin,4Dan, Neptali, Kad ex Aser.5Japun kyajlalju' tyajajil Jakob' toj oxnaq lajoj (70). Atzunte Jse atitltoq Ejipt.
6Yajxi'tzuntel kyim Jse kyuk'i'lxi' ttzik ex kykyaqilxju' ate'toq toju' tq'ijlalil lu.7Matxi'toqtzun che chmetju' kyk'wal, matxi'toq che kub' puqli, qu'mtzun nimtoq kyipumal ex matxi'toq kub' noju' tx'otx' Ejipt kyu'n.
8Yajxi'tzuntel ok jun ak'a'j nimaqkawil toj Ejipt, mixti' tojtzqi Jse,9xitma'ntzuntz kyeju' ttanam:
Luqe'ju' tnam aj Israel matxi'xi'x che chmet ex kuwqe'xi'x kyeqwitz.10In nojqelan tu'n qmqonte kywitz ja'lo tu'n lalun che chmet-xi'xtl, qu'n qaj minab'en ntzajku' jun q'oj, jaku' che muje kyuk'i'lju' qajq'oj tu'n kyq'ojin qi'j, jaku'tzun che ik'b'ettzu' toju' qtx'otx', chij.
11Eb'jo'ktzun kyq'o'n aj Ejipt nejenel kyib'aj aj Israel tu'n kykub' kyyaju'n toj aq'untl b'inchalkyeju' kab'e' nimaqtnam, aju' Piton, ex Ramses, e'ajb'en teju' nimaqkawil toj Ejipt k'ub'l twitz awal.12Tu'npetzu'n nxi'xtoq che yajlanjtz, xi'pe' e'kub'a' chmet-xi'xtl, qu'mtzun e'xob'u' aj Ejipt kye.
13E'yajunjtzu' aj Israel toj kuw aq'untl kyu'n aj Ejipt.14Yajb'ilxi'x e'oka' kyu'n, qu'n e'okkyq'o'n b'inchal loq' ex b'inchal tkyaqil aq'untl toj kojb'il. Majxtoq yaju'nqe' aj Israel.15Expe' xitma'ntlju' nimaqkawil aj Ejipt kye Sipra ex Puwa, b'etx'elalqe' kye aj Eb'rey, kjalu:
16—Ajkyb'anixju' qya aj Eb'rey lwiyxi'x tz'ok kyka'yi'nju'ye' ne'ẍ ajtitz'ji, qa txin tz'anq'inku'j, qatzun q'a kyb'yonku'ye', chij.
17Aye'tzunkye' b'etx'elal e'xob' twitz Qman Dyos, min xikynima'n tyolju' nimaqkawil aj Ejipt, qu'n mixti' e'kub' kyb'yo'nju' ne'ẍ q'aqe'.
18Atzunte' nimaqkawil aj Ejipt e'tzaj ttxko'nju' b'etx'elal ex xitma'n kye:
—¿Titiqu'n min nche kub' kyb'yo'nju'ye' ne'ẍ q'aqe'? chij.
19Aye'tzu'n b'etx'elal xikytzaq'we'n:
—Kxa'qena'kye qya aj Eb'rey kse'nqe' aj Ejipt. Kuwqe'xi'x na'kye', qu'n na'mxtoq qpone' nenulkye ajkyb'anix, chechij.
20Iktzu'n e'chmeta'xi'xtlju' aj Israel ex kuwqe'xi'xtltoq tu'nju' kyajlal ljo'ntoq tch'iyxi'xtl. Tu'ntzu'n e'xob'ju' b'etx'elal twitz Qman Dyos, qu'mtzun e'tzaj tky'i'wla'n Dyos ex e'chmet-xi'xtlju' kyal.22Atzunte nimaqkawil tchaq' kye ttanam: Kykyaqil kyal aj Eb'rey q'aqe' nche itz'ji che kyxonqe'xe' toj nin a', qatzun txinqe' che anq'inku'j, chij. Titz'jlen Moyses
1Ati jun ichan tyajajil Leb'i axtzu' mjeya' tuk'i'l jun qya ax tyajilju',2aju' qya lu oktiqa'n twi' jun tal, ex q'aju' tal itz'ji. Tetzunj tok tka'yi'n majxtoq tb'anilxi'x ka'yin, kub' tewa'n oxe' xjaw,3tetzunj minti' b'ent tewetl tu'n, tzaj tiq'i'n jun chi'l ch'e'mu'l ex b'jo'kx tnojsa'nju' tk'atxab' tuk'i'l q'ol ti'jile tu'n mi tz'okxa' a' toj, ku'xtzun tq'o'n neẍtzu' toj ex kyej tewa'n kxol ajlaj ttziju' nin a' Nilo;4juntzun txin tanab'xju' ne'ẍ kyejten najchaqinin tu'n tka'yinte titi' kb'ajel ti'j.
5Yajxi'tzuntel, ku'xju' tmyal nimaqkawil ichil ttziju' nin a', intoqtzun che b'etju' tmajen qya ttziyile a'. Atzu'n tmyal nimaqkawil o'kx t-xi' tka'yi'nju' chi'l atokx kxol ajlaj, xitma'ntzuntz te junju' tmajen tu'n ttzaj tiq'i'n.6Tetzunj tjaw tjqo'nju' chi'l, ku'x tka'yi'n tku'xtoq jun ne'ẍ toj, inxi'xtoq oq'. Tzajtzun q'aq'an tk'u'j ti'j ex tma:
—Kyk'wal aj Eb'reyte' ne'ẍ lu, chij.
7Xi'tzun tma'n tanab'ju' ne'ẍ te tmyal nimaqkawil:
—¿Ma jaku' kub' toj twitza tu'n ttzaj ntxko'ne' jun qya aj Eb'rey ch'isalteju' ne'ẍ lu ex tu'n t-xitq'o'n tch'u'? chij.
8—Txka'kna'ya, chiju' tmyal nimaqkawil te.
Xi'tzun txintz txkolte ttxuju' ne'ẍ,9xitzun tma'nju' tmyal nimaqkawil teju' ttxu ne'ẍ:
—Ka'yinxpech'i'nju'ya ne'ẍ lu ex q'onxa tch'u', kxe'l nchjo'nwe' teya, chij.
Xi'tzun q'i'n ne'ẍ tu'n ttxu ex xitq'o'n tch'u'.10Tetzunj tel ti'j tch'u', xi'tzuntz q'olte teju' tmyal nimaqkawil. Atzu'n tmyal nimaqkawil oktq'o'n te talku'xi'x ex oktq'o'n tb'i, Moyses, qu'n tma:
—Toj a' xjatza' wiq'ina'ye', chij. Etz oq Moyses Ejipt
11Tetzunj ichantltoq Moyses, jun q'ij ex b'etil kxolju' twnaqil ex oktka'yi'n kuwxi'xju' kyaq'un inkub' q'o'n. Ex til toktoq jun aj Ejipt b'yolte jun aj Eb'rey.12Xika'yintzuntz toj tkyaqil plaj, tetzunj tb'aj tka'yi'n b'a'nxi'x mix-a'lo' jun nka'yin, kub'tzun tb'yo'n aj Ejipttzu' ex ku'x tmqu'n toj tz'awun.13Tetzun juntl q'ij exb'et jumajtl Moyses, ex e'til kab'e' aj Eb'rey ntoq che q'ojin. Xitma'ntzuntz teju' nb'ujun:
—¿Titiqu'n toka b'yolteju' twnaqila? chij.
14Atzu'n aj Eb'rey xittzaq'we'n te:
—¿Alkye sok q'onteya te nejenel ex ajkawil qib'aje'? ¿Tzun ja'lo ma tajb'ila tu'n nkub' tb'yo'na kse'n tb'inchaya ti'ju' aj Ejipt? chij.
Tetzunj tb'inte Moyses ja'lu jawxob', qu'n eltnik' qa matxi'toq tz'el tqanilju' tkamik aj Ejipt.15Tetzunj tb'inte nimaqkawil qa ojetoq kub' tb'yo'n Moyses jun aj Ejipt, tchaq' tu'n tjyet Moyses tu'n tkub' tb'yo'n. Atzunte Moyses ex oq, xi'tzuntz najal toju' jun tnej tx'otx' Madyan. Tetzunj tpon atzu' kub' qe nqayin tk'etz jun xoch.
16Atitoqtzun jun ichan Jetro tb'i, pale toj Madyan, ate'toq wuq tmyal. Tojtzunju' q'ij lu e'ponju' tmyal iq'ilo'ktz a' toj xoch tu'n tku'x kynojsa'n kyk'wab'l rit, tu'n kyk'wanju' trit kyman.17Ate'tzun junjuntl k'ik'lel e'pon ex eb'je'l kyxla'ja'n txin ti'ju' xoch. Atzunte Moyses kolon kyi'ju' txin ex jatztiq'i'n a' toj xoch te kyk'wa'ju' rit.18Tetzunj kyponju' txin tk'etzu' kyman, xitqani'n kyman kye:
—¿Tiqu'ntzun lwiy ẍe' ule' ja'lo? chij.
19Aye'tzunkye xikytzaq'we'n:
—Ati jun ichan aj Ejipt maqo tkole' kyeju' txqantl k'ik'lel, ex majatztiq'i'n a' te kyk'wa'ju' qrit, chechij.
20Xitzun tma'n Jetro kyeju' tmyal: ¿Jatzunta'ju' ichan lu? ¿Tiqu'n min saj kyk'le'ne'? Kukyxi'ye' txkolte tu'n ttzaj wal quk'i'l, chij.
21Kub'tzun toj twitz Moyses tu'n tkyejten tja Jetro. Yajxi'tzuntel xitq'o'n Jetro jun tmyal te t-xu'jil Moyses, Sepora tb'i,22itz'ji jun tal q'a, tmatzun Moysestz:
Jajchaq xjal qine' toju' tx'otx' min ojtzqi'n wu'ne', qu'mtzun Kerson tb'iju' k'wal k'okyel, chij.
23Tetzunj tb'et ab'q'i kyimu' nimaqkawil toj Ejipt. Aye'tzunkye' aj Israel kukxtoq kyajtiju' ex majxtoq nex ch'yonju' yajb'ilkye toj kyk'u'j. Japunju' tq'ojq'ojel kywi' twitz Qman Dyos.24Tzajtzun tb'i'n Qman Dyos kykub'sb'il ex tzaj tna'nju' tyol kyej b'entti'j tuk'i'l Ab'raam, Isaak ex Jakob'.25Tzaj tka'yi'n Qman Dyos tu'me'l kse'ntoq inche anq'ina' ex tzaj laqj tk'u'j kyi'j. Txokli Moyses tu'n Dyos
1Intoqtzun k'ik'len Moyses kyi'j trit Jetro ju' tji, ju' pale toj Madyan. Jun q'ij e'xitiq'i'nju' rit toj chq'ajlaj, kanun tzmax tk'etzju' witz te Dyos, Oreb' tb'i.2Atzuntzu' kub'a' tyek'u'na' tib'ju' tanjl Qman Dyos toj jun tqan taq' q'aq' inxi'x k'enti toj junwi' ch'i'x. Atzunte Moyses intoq tx'ikyex ti'ju' ch'i'x intoq k'enti tu'n q'aq', ex mitoqjun inb'aj tz'e'y.3Kub'tzun t-xima'n Moyses:
¿Ti'tzunlo ti' ja'lu? Machinxe' ka'yilte titiqu'n mixti' in b'aju' ch'i'x tu'n q'aq' chij.
4Tetzunj tka'yinte Qman Dyos kxi'toq t-xi' lq'e Moyses ka'yilte, tzaj yolintzuntz te tzmaxtzu' toju' ch'i'x ex tma:
—¡Moyses, Moyses! chij.
—¡Luqine' lu taye! chi Moyses.
5Xitzun tma'n Dyostz te:
—Lalun tzaj lq'eya, iq'inqe'mil pe'ju'ya t-xajab'a qu'n xjante' tx'otx' ja wa'la'ya, chij.
6Ex tmatl Dyos te:
—Ayinweju'ye' Tdyos Ab'raam, Tdyos Isaak ex Tdyos Jakob', chij.
Atzunte Moyses oktjpu'n twitz, qu'n xob' tu'n t-xi' ka'yin te Qman Dyos.
7Atzunte Qman Dyos xitljo'n tyolin te:
—Matxi' nka'yiye' b'a'nxi'x jni'ju' yajb'il nik'x kyu'nju' ntaname' toj Ejipt. Matxi' nb'iju'ye' tq'ojq'ojel kwi' tu'nju' yaju'nqe'xi'x kyu'nju' kaporal, wojtzqi'nxi'xju'ye' yajb'ilkye.8Qu'mtzun machin tzaje' klol kye toj kyq'ob' aj Ejipt, che eletz wiq'i'ne' toju' tx'otx' lu, che kxe'l wiq'i'ntzuntze' toju' tb'anil tx'otx' ex nim twitz. A tx'otx' ja'lu ja najlqe' aj Kanaan, itit, amorey, aj Perisya, eb'ey, exqe' jeb'usey.9Matxi' nb'iye' nche oq' aj Israel, ex matxi' wilju'ye' yajb'ilkye nimxi'x kyu'n aj Ejipt.10Qu'mtzun matxi'ya twitzju' nimaqkawil toj Ejipt tu'n kyetztiq'i'na ntaname' aj Israel toju' tnam lu, chij.
11Atzunte Moyses xittzaq'we'n te Qman Dyos:
—¿Titi'tzunwe' woklen tu'n nxi'ye' twitzju' nimaqkawil lu ex tu'n kyetzwiq'i'ne' aj Israel toj Ejipt? chij.
12Xitzun tma'n Qman Dyos te:
—Okna' chin tenb'ilwe' tuk'i'la, ex a techlalju' k'ajb'el teya qa ayine' ẍinx chq'onteya: ajkyetz tiq'i'na ntaname' toj Ejipt, kykyaqile' che k'ulule' weye' twi' witz lu, chij.
13Atzunte Moyses xittzaq'we'n:
—Axi'xte' qama chinxe' kyxol aj Israel exqa matxinma'ne' kye: Ma chintzaj chq'o'ne' kyuk'i'le' tu'n Dyos jae'k'uluna' ojtxi' qyajilb'en. Qa nchije' kye, extzun qama tzajkxjelu'n weye': ¿Ti'tzun tb'i? qa chechi, ¿Ti'tzu'n kxe'l nma'ne' kye? chij.
14Atzunte Dyos xittzaq'we'n:
—AYINWEJU'YE' AYINE'. A q'manxju'ya kye aj Israel: a saj chq'on weju'ye' kyxole' aju' AYINE', chiku'ya kye, chij.
15Xitma'ntl Qman Dyos te Moyses:
—A q'manxju'ya kye aj Israel qa ayine' Dyos Manb'aj Kydyos ojtxi' kyyajilb'ene' Ab'raam, Isaak ex Jakob', ẍinx chq'onteya kyxol. Ate nb'iju'ye' tejumajx; ex a nb'iju'ye' toj tkyaqil tab'q'iyil.16Kutxi'ya, b'uyimqe'ju'ya tijwnaq kyxol aj Israel ex q'manxa kye qa ayine' Dyos Manb'aj Kydyos kyyajilb'ene', Tdyos Ab'raam, Isaak ex Jakob', makub' nyek'u'n wib'e' twitza ex matxi' tzaj q'aq'an nk'u'je' kyi'j ex matxi' tzaj nka'yi'ne' tkyaqilju' nb'inchanjtz kyi'j toj Ejipt.17Exqa che tzaqpetel wu'ne' toju' yajb'ilkye toj Ejipt, ex che kxe'l wiq'i'ne' toju' kytx'otx' aj Kanaan, itit, amorey, peresey, eb'ey ex jeb'usey, jun tx'otx' tb'anil, chiku'ya kye.18Kna' xe'lb'i'nta kyu'n tijwnaq kyxol aj Israel, che kxe'ltzuntze' kyuk'i'l twitzju' nimaqkawil toj Ejipt, kxe'l tma'ntzuntza te: Makub' tyek'u'ntib'ju' Dyos Manb'aj qwitze', janche k'uluna' aj Eb'rey. Qu'mtzun q'ontza anb'il tu'n qxi'ye' toj chq'ajlaj; te oxe' q'ij qb'eye' tu'n qpone' atzu' tu'n tkub' qq'o'ne' chojb'il te Dyos Manb'aj Qdyose', chiku'ya te.19B'i'n wu'ne', maskye matxitma'na ikju', lay che etz tzaqpi'ne' tu'n nimaqkawil toj Ejipt qa mya tuk'i'l wipumale'.20Qu'mtzun kxe'l nyek'u'ne' wipumale', ex che nk'ixb'sa'ye' aj Ejipt tu'n kamik kyu'n nb'inchb'aje' te lab'te'n kche nb'incha'ye' toju' kytx'otx'. Che elitz tzaqpi'ntzuntze' tu'n nimaqkawil.21Ex knb'incha'ye' tu'n kytzaj xtali'n aj Israel kyu'n aj Ejipt, tu'ntzun mya naqchle'n kyq'ob' ajkyetz Ejipt.22Teyile junjun qya che xe'ltqani'n ti'xti' saqpwaq ex q'anpwaq te tb'esin mujqa teju' qya tajawju' ja janajla', ex q'anpwaq, ex e'xb'alun tu'n kyajb'en te kyi'j kyk'wale' ex kmyale', tu'ntzun tetz kyb'ajsa'ne' jni'xju' ati kye aj Ejipt, chi Dyos te.
1—Atzunte Moyses xittzaq'we'n kjalu:
Lay chinx kyb'i'ne' ex lay txi' kyoksla'n aj t-xi' nma'ne' kye, a pe'lo ktzajel kma'nju' weye': Naq tak'a'nta', mixti' xkub' tyek'u'nte Qman Dyos tib' twitza, chechilo, chij.
2—¿Titi'tzunju' tzyu'n tu'na? chi Qman Dyos te.
—Jun ntzeye', chi Moyses.
3—Xonku'ya twitz tx'otx', chi Qman Dyos te.
Ku, chi Moyses kub' t-xon. Textzu'n kmuj lu jawb'entju' ttze te kan, ju'm tel oq Moyses tk'etz.4Atzunte Qman Dyos tzaj tma'n te:
—Tzyumju'ya tje ex iq'i'nktza, chij.
Xitzun tnuqpi'n Moyses tq'ob' tzyulte. Tetzunj tjaw ttzyu'n jawb'ent jumajtl te tze.
5Atzun techlal ja'lu tu'n t-xi' kyoksla'n qama kub' nyek'u'n wib'e' twitza, ayine' Dyos Manb'aj Kydyos ojtxi' tyajilb'ena Ab'raam, Isaak ex Jakob', chi Qman Dyos te.6Tzajtzun tma'ntl Qman Dyos te:
—Atzu'n ja'lo q'onkxa tq'ob'a ttzitk'u'ja, chij.
Okxtzun tq'o'n Moyses tq'ob' ttzitk'u'j, tetzunj tetztiq'i'ntl o'kx tok tka'yi'n txqan xlemtx'a'k ti'j, saq ka'yin naku'j txun che'w.7Tzajtzun tma'ntl Qman Dyos te:
—Q'onkx jumajtlju'ya tq'ob'a ttzitk'u'ja, chij.
Atzunte Moyses okxtq'o'ntl tq'ob' ttzitk'u'j. Tetzunj tetztiq'i'ntl matxi'toq b'anixju' tq'ob' kse'nxju' tten tnejel.8Tzajtzun tma'ntl Qman Dyos te:
—Qa min xxi'oksla'na kyu'n exqa min xib'i'na tu'nju' tnejel techlal, tu'ntzunju' tkab' techlal kxe'l kyoksla'n.9Qatzun qa mixti'x xxi' oksla'na exqa minti' xib'i'na kyu'nju' kab'e' techlal lu, iq'i'nktza a' toj nin a' ex qonku'ya twitz tx'otx'. Naqtzun nb'ent tkub' tqo'na kjawilb'ent te chik', chij.
10Atzunte Moyses xitma'n te Dyos.
—¡Taye!, min nb'ent nyoline' lwiy kse'nte jun xjal tx'o'le'tel tyol ex mya tzmawt ja'lo tej saj yolina teju' tmajina lu, qu'n ntzajlenxwe' inchin takpuje' ajnyoline', chij.
11Atzunte Qman Dyos tzaj tma'n te:
—¿Altzunkye kyej q'onte ttziju' xjal tu'n tyolin? ¿Altzunkye kyej q'onteju' me exju' chkyin, exju' xjal b'a'n twitz mujqa moẍ, qa myayine'?12Qu'mtzun kutxi'ya, okna' chin tenb'ilwe' tuk'i'la ajtyolina, ex ayine' chin kb'el q'onte yol toj tnab'la titi' kxe'l tma'na, chij.
13Atzunte Moyses xitma'ntl:
—¡Taye, ate b'a'n chq'onx juntla! chij.
14Atzunte Qman Dyos tzaj toj twitz ti'j Moyses ex tma:
—¡Lute' ttzika Aaron, ju' aj Leb'i, ati Ejipt! Ojtzqi'nxi'x wu'ne' nb'ent tyolin b'a'nxi'x. Expe' k'elitz k'lulteya toj b'e, kjawil tzalaj ajtok tka'yi'n twitza.15Yolintzuna tuk'i'l, q'manxa te tkyaqilju' matxi' b'ajx nma'ne' teya, ex kchin tenb'ilwe' kyuk'i'le' ajkyyoline', ex che kxe'l nxnaq'tza'ne' ti'ju' kb'incha'ye'.16Aya kxe'l q'mante te Aaron naku'xwitloj ayine' inchin yolin tuk'i'l. Atzuntlte Aaron kyolil te t-xela kyeju' tnam ti'ju' yol kxe'l nma'ne' teya.17Ex iq'inxju'ya ttzeya, qu'n atzun k'ajb'elju' tu'na tu'n kb'inchet ti'xti' te lab'te'n, chij. Anjti'j Moyses Ejipt
18Atzunte Moses anjti'j tja Jetro ju' tji, xitma'ntzuntz te:
—K'anjeltlwe'wi'j Ejipt ka'yilkye nwnaqile' qa itz'qe'x, chij.
—B'a'na'tzun, kutxi'ya ka'yinxtib'a, chiju' tji te.
19Atixtoqtzun Moyses toj tx'otx' Madyan, tzaj tma'ntl Qman Dyos te:
—Kutanjtl ti'ja Ejipt, qu'n oje che kyimkye' kyajb'iltoq tu'n tkub' b'yo'na kyu'n, chij.
20Atzunte Moyses xitiq'i'nju' t-xu'jil exju' tk'wal, ex e'jawx tq'o'n ti'j jun b'ur. Anjtzun ti'jtzu' Ejipt, iq'i'ntoqju' ttze Dyos tu'n toj tq'ob'.21Tzaj tma'ntl Qman Dyos te Moyses:
—Ajtzun tpona Ejipt, b'inchamqe'ju'ya e'techlal te lab'te'n twitzju' nimaqkawil, matxi' txinq'o'ne' toklena tu'n tb'inchanteya. Oktzun b'el nch'uẍsa'ne' tanmiju' nimaqkawil tu'n lalun che etz ttzaqpi'n aj Israel.22Kxel tma'ntzuntza teju' nimaqkawil: Tnejel nk'walwe' Israel, chi Dyos Manb'aj.23Matxi' txinma'ne' teya tu'n tetz ttzaqpi'na nk'wale' tu'n t-xi' k'ulul nwitze'; mina'jon tajb'ila tu'n tetz ttzaqpi'na, qu'mtzun kb'el nb'yo'ne' tnejel tk'wala, chitzun Dyos Manb'aj, chiku'ya te, chij.
24Tetzunj ljo'ntoq tb'e Moyses, pon toju' najb'il jatu'n tkyeja' wtan te qonik'an kyuk'i'lju' toj tja, kub' tyek'u'ntib' Qman Dyos twitz Moyses tu'n tkub' tb'yo'n.25Atzunte Sepora tzaj tiq'i'n jun ab'j ati twitzte ex eltjon ch'i'n ttxo'w twi' ttz'a'lb'il tal, ok tq'ontzuntz ti'j tqan Moyses ex tma: Axxi'x tu'n tpaja nchmil sela' chik' chij.
26Tma Sepora ikju' tu'nju' kyechel ti'j kychib'jil. Tu'ntzun ja'lu xitzaqpi'n Moyses tu'n Qman Dyos.
27Atzunte Dyos ojetoq tzaj tma'n te Aaron kjalu: Kutxi'ya k'lulte Moyses toj chq'ajlaj, chij. Xi'tzun Aarontz, ex knet Moyses tu'n t-xeju' witz te Dyos, ex oktma'tzi'n te jun q'olb'eb'lte.28Xitzun tma'n Moyses te Aaron tkyaqilju' ojetoq tma Dyos te tu'n tmante, exqe'ju' techlal tma Qman Dyos te tu'n tb'inchante.29E'xi'tzuntz kykab'il Ejipt, b'uyilkyeju' tijwnaq kyxol aj Israel,30Xitzun tma'n Aaron kye, tkyaqilju' matxi'toq tma Qman Dyos te Moyses; ex e'tb'incha techlal ojetoq tma Qman Dyos te tu'n tb'inchante, kywitzju' tnam.
31Aye'tzu'n aj Israel xikyoksla'n. Tetzunj kyb'inte qa matxi'toq che tzaj tb'i'n Qman Dyos, exqa matxi'toq tka'yiju' yajb'ilkye, e'kub' tzipetzuntz k'ulul te. E'yolin Moyses ex Aaron tuk'i'l nimaqkawil paraon
1Exi'tzun Moyses tuk'i'l Aaron q'malte teju' nimaqkawil toj Ejipt kjalu:
—Chi Dyos Manb'aj, Kydyos aj Israel kjalu. Q'ontza anb'il teju' ntaname' tu'n t-xi' ik'sal jun ninq'ij te ninb'ilweye' toj chq'ajlaj, chij. Chechij.
2Xitzun ttzaq'we'n nimaqkawil kye:
—¿Alkyetzu'n Dyos Manb'aj tu'n t-xinb'i'ne' tyol, ex tu'n kyxi' ntzaqpi'ne' aj Israel? Min wojtzqi'nwe' Kydyose' ex lay che'xkye' aj Israel, chij.
3Aye'tzunkye xikma'n:
—Makub' tyek'u'ntib'ju' Kydyos aj Eb'rey qwitze', qu'mtzun q'ontza anb'il qeye' tu'n qxi'ye' q'ol chojb'il twitz Dyos Manb'aj janqo k'uluna'ye', te oxe' q'ij qb'eye' tu'n qpone' atzu'. Tu'ntzun mitzaja' tq'o'n yab'il mujqa q'oj qib'aje' tu'n qkyime', chechij.
4Xi'tzun ttzaq'we'n nimaqkawil aj Ejipt kye:
—Aya Moyses ex Aaron ¿Tiqu'n in nela' kyiq'i'nju'ye' anb'il kye xjal toj kyaq'un? ¡Kukxi'kye' aq'unal! chij.
5Ex xitma'ntlju' nimaqkawil kye:
—Matxi' che chmetju' aj Israel toju' tx'otx' lu. ¡Aye'tltzunkye' kyajb'ile' tu'n tkyej kytzaqpi'n kyaq'un! chij.
6Textzu'n q'ij lu xitq'o'n nimaqkawil jun chaq'b'il kye kaporal ex kye nejenel kyxol aj Israel kjalu:
7—Lalun txikyq'o'ntle' ttxa triy kye aj Israel ajkyb'inchan loq' kse'n nb'inchet ja'lo, aye'x che kxe'l jyol ttxakytriy tu'n tajb'en kye.8Ex che kychq'onqe'kye' tu'n kyb'inchante loq' kse'nxju' tajlal nb'ent kyu'n. ¡Mixti' jun tu'n tel ti'j! Ky'ejqe'kye' xjal lu, qu'mtzun nkyma'n: ¡Qo'qe' q'ol chojb'il twitz Qman Dyos! chechij.9Kyxla'janqe'kye' xjal lu tu'n kyaq'unan kuw, tu'ntzun lalun ten anb'il kye tu'n kykub'ten b'il chajyolil, chij kye.
10Aye'tzu'n nejenel exqe' kaporal kyxol aj Israel eb'je'tz ex eb'ajx q'malte kyeju' xjal:
—Matzaj tq'o'n nimaqkawil jun chaq'b'il qeye' tu'n lalun txi' q'etl ttxa triy kyeye'.11Ja'lo aye'ku'ye' mache'xe' jyolte, jaxjaku' makneta' kyu'ne', ex mya tu'nwt ja'lu k'elil ti'ju' tajlal loq' nb'ent kyu'ne', chechij.
12Eb'je'xtzun paxju' aj Israel toj tkyaqil Ejipt jyol tqan triy te t-xel ttxa triy tu'n tajb'en kyu'n.13Aye'tzu'n tkaporal nimaqkawil e'okten xla'jalkye tu'n tb'entju' tajlal loq' tkyaqil q'ij, kse'nxju' intoq b'ent kyu'n tej intoq xiq'o'n ttxa triy kye, ex intoq che jumanjtzju' nejenel kxol, intoq xiq'ma'n kye:
—¿Tiqu'n ewi ex ja'lo mixti' xb'entju' kyaq'une' kse'nxju' intoq b'ent kyu'ne' nejtl? chechij.15Aye'tzu'n kaporal kyxol aj Israel exi' q'malte te nimaqkawil:
—¿Nimaqkawil, tiqu'ntzun ntb'incha'nju'ya lu qeye' ayo'ye' o'tmajena?
16Min ntzaj q'o'ntl ttxa triy qeye', ex nqo okxla'ja'ne' tu'n qb'inchanteye' kyinx tajlal loq'ju', expe' nqo okb'yo'ne'. ¡Extzun aye'xju' twnaqila ati kypaj! chechij.
17Atzunju' nimaqkawil xittzaq'we'n kye:
—¡Ky'ejqe'kye'! Qu'mtzun nkyma'ne' tu'n t-xiq'et anb'il kyeye' tu'n kyxi'ye' q'ol chojb'il twitzu' Dyos.18¡Kukyxi'ye' aq'unal! Maskye min nxiq'o'ntl ttxa triy kyeye', ilti'j tu'n tb'ent tajlalju' loq' kyu'ne' kse'nxju' tnejel, chij kye.
19Aye'tzu'n kaporal kxol aj Israel tzaj kyb'is tej t-xiq'ma'n kye qa axtajlal loq'ju' tu'n kyb'inchante atl junjun q'ij.20Tetzunj kyb'aj yolin tuk'i'l nimaqkawil; e'etztzuntz, intoq che ayontl Moyses ex Aaron kye,21xikyma'ntzuntz kye Moyses ex Aaron:
—Kub'xwit tz'e'ysa'n kywitze' tu'n Qman Dyos tu'nju' xkyb'inchaye', qu'n tu'n kpaje' xqo' ela' ik'u'ne' tu'n nimaqkawil ex kyu'n tkaporal. Makub' kyq'o'ne' k'uẍtx'e'nb'il toj kyq'ob' tu'n qkub'yo'ne', chechij. Tna'j Dyos Moyses
22Atzunte Moyses xitma'n te Qman Dyos toj na'j Dyos:
—Taye, ¿Tiqu'ntzun nche tyaju'na'ya tnam lu? ¿Ex tiqu'n ẍin tzaja' tchq'o'na?23Qu'n atxi'x tej wule' yolil toj tb'iya tuk'i'lju' nimaqkawil, matxi' che kub' tyaju'nxi'xtlju' ttanama ex mixti'xi'te tb'inchaya tu'n kyklet, chij.
1Atzunte Qman Dyos tzaj ttzaq'we'n te Moyses:
—Ktla'ya ja'lo titi' knb'incha'ye' ti'ju' nimaqkawil, tuk'i'l wipumale' che elixa' tzaqpina'kye', expe' axte kq'malte tu'n kyexe' ti'jxi' ttx'otx', chij. Txoklitl Moyses tu'n Dyos
2Tzaj yolin jumajtl Qman Dyos te Moyses ex tma:
—AYINWEJU'YE' DYOS MANB'AJ.
3Kub' nyek'u'n wib'e' twitz Ab'raam, Isaak, ex Jakob'. Xinma'ne' kye qa ayine' Dyos nimwipumale', atzunju' nb'iye' DYOS MANB'AJ, minti xinma'ne' kye.4Kyej b'entti'j wu'ne' kyuk'i'l tu'n t-xi' nq'o'ne' tx'otx' Kanaan kye, jae'najana' jte' q'ij tej ajb'etu'n xjal qe'toq.5Atzu'n ja'lo matxi' nb'iye' nxi'x che yajti aj Israel, ex nche okxla'ja'n ti'ju' kyaq'un kyu'n aj Ejipt, ex matzaj nna'ne' nyole' kyej b'entti'j kyuk'i'l.6Qu'mtzun kutxi'ya q'malte kye aj Israel qa ayine' Dyos Manb'aj, chin tzaqpil kyeye' toju' yajb'il ex toju' kyaq'une' nkub' q'o'n kyu'n aj Ejipt. Kche nkla'ye' tuk'i'l nim wipumale' ajttzaj nq'o'ne' k'ixb'sab'l kuwxi'x kyib'aj aj Ejipt;7che okyel nq'o'ne' te ntaname' ex che k'ulul weye'. K'eleltzun kyniky'tze' qa ayine' Dyos Manb'aj Kydyose', inetz q'inkyeye' toju' yajb'il nimxi'x kub' q'o'n kyib'aje' kyu'n aj Ejipt.8Che kxe'l wiq'i'ne' toju' tx'otx' xintziya'ne' te Ab'raam, Isaak ex Jakob', ex kxe'l nq'o'ne' te kytx'otx'e'. Ayine' Dyos Manb'aj, chij.
9Atzunte Moyses xitma'n tkyaqilju' yol lu kye aj Israel, aye'tzunkye' mixti' kub' kb'i'n, qu'n matxi'toq che jaw k'olin tu'n tpaj kuwxi'x yajb'ilkye.10Atzunte Qman Dyos tzaj tma'n te Moyses:
11—Kutxi'ya twitzju' nimaqkawil, ex q'manxa te tu'n kyetz ttzaqpi'n aj Israel Ejipt, chij.
12Atzunte Moyses xittzaq'we'n te:
—Mipena' jun nchinx kyb'i'ne' aj Israel, ¿se'n taq'witzun ajnxi' b'i'ne' tu'n nimaqkawil, extzun min nb'ent-xi'x nyoline'? Chij.
13Tchaq'tzun Qman Dyostz te Moyses ex Aaron tu'n t-xikyma'n kye aj Israel ex teju' nimaqkawil, qa ati oklenj kye tu'n kyetz iq'etju' aj Israel toj Ejipt. Kyb'i kyyajilb'en Moyses ex Aaron
14Aye'tzun nejenel ja'lu kyxol junjun k'loj kyyajajil.
Aye' tk'wal Rub'en ja'lu ju' tnejel tk'wal Israel: Anok, Palu, Esron ex Karmi. Aye'tzun k'loj tyajajil Rub'enju'.
15Aye'tzu'n tk'wal Simeon aye': Jemwel, Jamin, Oad, Jakyin, Soar ex Sawul, ju' tal jun qya aj Kanaan. Aye'tzun k'loj tyajajil Simeonju'.
16Aye'tzu'n tk'wal Leb'i, tzajx ti'j tzikb'aj tzmax ti'j b'o'sxi'x, aye': Werson, Kyeat ex Merari. Qaqnaq wuqlajoj (137) ab'q'i anq'in Leb'i.17Aye'tzu'n tk'wal Werson, txoli'n toj k'loji'n, aye': Lib'ni ex Simi.18Qaqnaq oxlajoj (133) ab'q'i anq'in Koat. Aye'tzun tk'wal aye' ja'lu: Amram, Isar, Eb'ron ex Usyel.19Aye'tzu'n tk'wal Merari aye': Mali ex Musi. Aye'tzun k'loj tyajajil Leb'iju', teyilex junjun tnej tzajniqe'x kyi'ju' kyyajilb'en.
20Ate Amram mje tuk'i'l Jokab'ed ju' ttiy, ex e'itz'ji kab'e' tk'wal tuk'i'l aye': Aaron ex Moyses. Qaqnaq wuqlajoj (137) ab'q'i anq'in Amram.
21Aye'tzu'n tk'wal Isar aye': Kore, Nepej ex Sikri.
22Aye'tzu'n tk'wal Usyel aye': Misael Elsapan ex Sitri.
23Mje Aaron tuk'i'l Elisab'et tmyal Aminadab' ex tanab' Naason. Aye' tk'wal ja'lu e'itz'ji tuk'i'l: Nadab', Ab'yu, Eleasar ex Itamar.
24Aye'tzu'n tk'wal Kore aye': Asir, Elkana ex Ab'yasap. Aye'tzun tyajajil Koreju' toj tneji'n.
25Mje Eleasar tk'wal Aaron tuk'i'l junju' tmyal Putiel, itz'ji jun kyk'wal aju' Pinees. Aye'tzun nejenelju' kxol junjun k'loj aj Leb'i kse'nxju' kyyajajil.
26Aye'xtzun Aaron ja'lu tuk'i'l Moyses, ju' xitma'n Qman Dyos kye tu'n tetz kyiq'i'nju' tnam toj Ejipt, nk'u'mile kten toj k'loji'n.27Axtzun Moyses ja'lu ex Aaron exi' yolil tuk'i'l nimaqkawil toj Ejipt tu'n kyetz ttzaqpi'n aj Israel toj ttx'otx'. E'txokli Moyses ex Aaron tu'n Dyos
28Tej tyolin Qman Dyos te Moyses toj Ejipt,29tzaj tma'n te:
—Ayine' Dyos Manb'aj. Tkyaqilju' kxe'l nma'ne' teya, q'manxa te nimaqkawil toj Ejipt, chij.
30Atzunte Moyses xittzaq'we'n:
—Taye, min nb'ent-xi'xwe' nyolin: ¿se'n taq'witzun tu'n nxib'i'ne' tu'n nimaqkawil? Chij.
1Atzunte Qman Dyos tzaj tma'n te Moyses:
—Ka'yintzpe'ya, kxe'l nq'o'ne' toklena tu'n t-xi'ya twitzju' nimaqkawil naku'xwitloj ayinku'ye', atzu'n ttzika Aaron kyolil te t-xela twitzju' nimaqkawil.2Tkyaqiltzu'n kxe'l nma'ne' teya kxe'l tma'na te Aaron. Atzunte kyolil tuk'i'l nimaqkawil toj Ejipt tu'n kyetz ttzaqpi'n aj Israel toju' ttx'otx'.3Ayintzunwe' kb'el nch'uẍsa'ne' tanmiju' nimaqkawil, ex nim techlal kche nb'incha'ye' toju' tx'otx' Ejipt ex e'ti'xti' te lab'te'nxi'x.4Lay che'x b'i'ne' tu'n nimaqkawil. Ayintzunwe' knyek'u'ye' wipumale' toj Ejipt. Kb'el ntz'e'ysa'ne' kywitz aj Ejipt tu'n kyetz wiq'ine' ntaname' aj Israel k'loji'nchaq kyten.5Ajtzun nyek'unteye' wipumale' Ejipt, ex ajkyetz wiq'ine' aj Israel atzu'. K'elil kynik'u' aj Ejipt qa ayine' Dyos Manb'aj, chij te Moyses.
6Kyb'inchatzun Moysestz tuk'i'l Aaron kse'nx tzaj tma'n Qman Dyos kye.7Tetoq kyajnaq (80) ab'q'i Moyses, atzunte Aaron tetoq kyajnaq oxe' (83) ab'q'i tej kyyolin tuk'i'lju' nimaqkawil. Ttze Aaron
8Tzaj tma'n Qman Dyos kye Moyses ex Aaron:
9—Qa matmaju' nimaqkawil tu'n kb'inchanteye' jun techlal te oklenj twitz, kxel tma'ntzuntza te Aaron tu'n ttzaj tiq'i'nju' ttze ex tu'n tkub' t-xon twitz tx'otx' tu'n tjaw b'ent te kan, chij kye.
10E'xi'tzun Moysestz tuk'i'l Aaron twitzju' nimaqkawil, ex kyb'incha kse'nxju' tma Qman Dyos kye. Kub' t-xon Aaron ju' ttze twitz nimaqkawil ex kwitzju' inche kawin tuk'i'l, ex jawb'entju' ttze te kan.11Atzunte nimaqkawil tma tu'n kytzaj txkyetju' ajnab'lil exqe' ajpkab' kyxol aj Ejipt tu'ntzun kyb'inchante tu'n kyopis kse'nx tb'incha Aaron.12Teyile junjunkye kub'kyxonju' kytze twitz tx'otx', ex teyile junjun tze jawb'ent te kan. Atzunju' ttze Aaron xitb'ilq'u'n kytze ajnab'lil ex kytze ajpkab'.13Maskyepe' til nimaqkawil ja'lu, kub' tch'uẍsa'n tib', mixti' xitb'i'nju' kyol Moyses tuk'i'l Aaron, kse'nxju' tma Qman Dyos kye. Yajb'il tjaw b'entju' a' te chik'
14Yajxi'tzuntel tma Qman Dyos te Moyses:
—Matxi' kub' tch'uẍsa'n tib'ju' nimaqkawil, ex min tajb'il tu'n kyetz ttzaqpi'n aj Israel.15Kxe'la najchi'j te prim ayolteju' nimaqkawil aj tku'pun ttziju' nin a' Nilo, iq'inxa ttzeya ju' jawb'ent te kan.16Atzuntzu' q'manxa'ya te: Oje chin tzajxi' tchq'o'ne' Dyos Manb'aj Kydyos aj Israel q'malte teya tu'n kyxittzaqpi'nju'ya ttanam tu'n kyxi' k'ulul twitz toj chq'ajlaj, atzunta b'ajxa' txa'tb'i'nju'ya tyol.17Qu'mtzun matma Dyos Manb'aj qa k'elel tnik'a ja'lo qa ate Dyos Manb'aj, ajtkub' njuma'nju'ye' ntzeye' tib'aju' nin a' kjawilb'ent te chik'.18Che kyimelju' kyiẍ ate'qe' toj exju' a' kb'el tzuwix, kmolmol kyk'u'ju' aj Ejipt te, chiku'ya te, chi Dyos te Moyses.
19Ex tzaj tma'ntl Qman Dyos te Moyses:
—Q'manxa te Aaron tu'n t-xitiq'i'n ttze ex tu'n t-xi' tnuqpi'n tq'ob' kyib'aj nin a', tal a', t-xiklil a', njab' ex tank te a' toj tkyaqil Ejipt ex kyib'aj kykyaqil jata'ya'chaq a', tu'ntzun kyjawb'entu' a' kykyaqil te chik'. Ikytzu'n ktenb'ila' chik' kyoj chkontze ex kyoj kykb'el a' ab'jqe'. Chij.
20Atzunte Moyses ex Aaron kb'incha kse'nxju' tchaq' Qman Dyos kye. Jawtiq'i'n Aaron ttze ex kub' tjuma'n tib'aj nin a' kwitzku'ju' nimaqkawil ex kwitzju' inche kawin tuk'i'l. Tkyaqiltzunju' a' jawb'ent te chik'.21E'b'aj kyimju' kyiẍ ate'toq toj a', kub' tzuwixju' a' ex mixti' b'entl kyk'wan aj Ejipt ti'j. ¡Kub' chik'ix tkyaqilju' a' toj Ejipt!
22Exqe'ju' ajpkab' aj Ejipt b'ent kyu'n tu'n kyopis kse'nxju' b'ent tu'n Aaron. Atzunte nimaqkawil kub' tch'uẍsa'nxi'xtltib' ex min exitb'i'n Moyses ex Aaron kse'nxju' tma Qman Dyos.23Atzunte nimaqkawil anjti'j tja ex mixti'x xi' tojtwinqil.24Kykyaqil aj Ejipt ku'x kyb'incha'n kyxoch ttziyileju' nin a' tu'n tjatz kyk'wa' a' ẍtilun, qu'n mixti'x b'ent kyk'wanteju' a' toj nin a'. E'jawb'ent txqan cha'x xtx'o te yajb'il
25Tb'ajlenxi'tzun wuq q'ij tkyejlen k'ixb'sa'n nin a' tu'n Qman Dyos.
1Tzaj tma'n Qman Dyos te Moyses:
—Kutxi'ya twitzju' nimaqkawil, q'manxa qa inxi' nmane' te kjalu: tzaqpinqe'xju'ya ntaname' tu'n kxi' k'ulul nwitze'.2Qatzun min ẍe'x ttzaqpi'na, che ktzajel nq'o'ne' cha'x xtx'o te yajb'il toj tkyaqil Ejipt.3Kche q'uẍtel cha'x xtx'o toj nin a', che jawitztzuntz ex kche okyix toj tjaya ja inwtana'ya, tib'aj tkuẍb'ila, toj kyjaju' nche kawin tuk'i'la, toj kyja twnaqila, ex kche okyix kyoju' chuj te twaya, ex kyoju' ja inxyuq'ita'.
4Kche jawil t'ikpuj ti'ja, kyi'ju' inche kawin tuk'i'la ex kyi'j kykyaqilju' twnaqila, chitzun Dyos, chiku'ya te, chij te Moyses.
5Tzaj tma'ntl Qman Dyos te Moyses:
—Q'manxa te Aaron tu'n t-xi' tnuqpi'n tq'ob' tuk'i'lxi'ju' ttze kyib'aj nin a', tal a' ex njab', tu'ntzun kyjatz cha'x xtx'o kyoj ex tu'n tkub' noj tkyaqil Ejipt kyu'n, chij.
6Xitzun tnuqpi'n Aaron tq'ob' kyib'aj tkyaqil a' toj Ejipt, eb'jatztzun cha'x xtx'otzu' kyoj, ex majxkub' noj toj tkyaqil Ejipt kyu'n.7Ikxtlkye ajpkab'ju' kyxol aj Ejipt, b'jawb'ent txqantl cha'x xtx'o kyu'n toj tkyaqil Ejipt tu'nxju' kyopis.8Atzunte nimaqkawil' e'ttxoku' Moyses ex Aaron, ex xitma'n kye:
—Che kub'sanqe'ye' twitzju' Dyos Manb'aj tu'n kyel tiq'i'n cha'x xtx'o wi'je' ex kyi'ju' nwnaqile', kxe'l nq'o'nwe' anb'il kyeju' kywnaqile' tu'n kyxi' q'ol chojb'il twitzu' Dyos Manb'aj, chij.
9Atzunte Moyses xittzaq'we'n te:
—Q'mantzna'ya jtoj tu'n nkub'sane' twitz Dyos Manb'aj tu'n kyel tlaq'b'a'nju' xtx'o ti'ja, kyi'ju' nche kawin tuk'i'la, kyi'ju' twnaqila ex toju' tjaya, tu'n kykyajten o'kxtzu' toj a', chij.
10Atzunte nimaqkawil tma:
—Najchi'j, chij.
Atzunte Moyses xittzaq'we'n te:
—B'a'na'tzun, tu'ntzun teltnik'a qa mix-a'lo' juntl kse'n Dyos Manb'aj Qdyose'.11K'elil kypa'n kyib'ju' cha'x xtx'o ti'ju' tjaya ex o'kxtzu' che kjela'ten toj a'. Lay che yajuntl ti'ja, kyi'ju' inche kawin tuk'i'la ex kyi'ju' twnaqila, chij.
12Etztzun Moysestz tuk'i'l Aaron toju' tja nimaqkawil. Xitzun tqani'n Moyses te Qman Dyos tu'n tel kypa'n kyib'ju' cha'x xtx'o e'tzaj tq'o'n tib'aju' nimaqkawil.13Tb'inchatzun Qman Dyos kse'nx xitqani'n Moyses te. E'kyimju' cha'x xtx'o ate'toq kyoj kyja xjal ex twi'kypen, exqe ate'toq toj kojb'il.14Aye'tzunju' xjal b'aj kb'u'yi'nju' xtx'o kyimniqe'tl junx ex majx b'ajkub' tzuwix toj tkyaqil Ejipt.15Tetzunj tlonte nimaqkawil matxi'toq klet ti'j, kub' tch'uẍsa'n jumajtltib' ex min xitb'i'ntl kyyol Moyses ex Aaron kse'nx tma Qman Dyos. E'b'jawb'ent msaq te yajb'il
16Tzaj tma'n Qman Dyos te Moyses:
—Q'manxa te Aaron tu'n tkub' tjuma'nju' quq tu'nju' ttze, tu'ntzun kyjawb'ent msaq toj tkyaqil Ejipt, chij.
17Kyb'inchatzuntz ikju'. Kub' tjuma'n Aaron ju' quq twitz tx'otx' tu'nju' ttze, tkyaqiltzunju' quq toj Ejipt b'jawb'ent te msaq, eb'jo'k lak'pujtzuntz kyi'j xjal ex kyi'j alu'mj.18Ex ikxtlkye' ajpkab' xikb'incha'n tu'nxju' kyopis tu'n kyjawb'ent msaq, ex mixti' b'ent kyu'n. Inxi'xtoqtzun che yajti xjal ex alu'mj kyu'nju' msaq.
19Xitzun kyma'n ajpkab' teju' nimaqkawil:
—¡Tu'nku' Dyos Manb'aj te'lu! chechij.
Atzunte nimaqkawil kub' tch'uẍsa'ntltib', ex min xi'tojtwinqil kse'nxju' tma Qman Dyos. E'b'jawb'ent ta'jinchej te yajb'il
20Tzaj tma'n Qman Dyos te Moyses:
—Kxe'lte' nimaqkawil te prim najchi'j ttzi a'. Qu'mtzun we'ktza chi'j b'a'n prim ex kxe'la q'malteju' tqanil lu wu'ne' te: Tzaqpinqe'xa ntaname' tu'n kxi' k'ulul nwitze'.21Qatzun minti' ẍe'x ttzaqpi'na, kche tzajel nq'o'ne' ta'jinchej tib'aja, kyib'aju' inche kawin tuk'i'la, kyib'aju' twnaqila ex kyoju' tjaya. Kykyaqilju' kyja aj Ejipt kb'ajel noj kyu'n ta'jinchej, ex kb'ajel noju' twitz tx'otx' kyu'n.22Ajttzaj ja'lu k'elil npa'nju'ye' najb'il Kosen, ja najlqe' ntaname'. Lay jawb'ent jun ta'jinchej atzu', tu'ntzun teltnik'a qa ayine' Dyos Manb'aj, atinqine' Ejipt.23Lay nb'inchaye' kyi'ju ntaname' kse'n knb'incha'ye' kyi'ju' ttanama. Najchi'j nb'inchaju'ye' lu, chitzun Dyos, chiku'ya te, chij te Moyses.
24Iktzu'n tb'incha Qman Dyos: E' b'ju'l txqan ta'jinchej ex eb'jo'kx toju' tja nimaqkawil, toj kyjaju' nche kawin tuk'i'l. Ex kub' noj tkyaqilju' tx'otx' Ejipt kyu'n. Majxkub' yajtiju' tx'otx' Ejipt kyu'nju' ta'jinchej.
25Atzunte nimaqkawil xittxko'n Moyses ex Aaron, xitma'ntzuntz kye:
—Kuxna kyxi'ye' q'ol chojb'il teju' Kydyose', naq o'kx lalun che'xe' ti'jxi' tx'otx' Ejipt, chij.
26Atzunte Moyses xittzaq'we'n te:
—Myana' b'a'nte' ikju', qu'n aye' alu'mj nche kub' qq'o'ne' te chojb'il twitz Dyos Manb'aj Qdyose', xjanqe' toj kywitz aj Ejipt. Qama tz'ok kyka'yi'n aj Ejipt ajtkub' qb'yo'ne' jun alu'mj nche k'ulun te, oklo qo' b'el kyb'yo'ne' tu'n ab'j.27Ilti'j tu'n qxi'ye' toj chq'ajlaj oxe' q'ij qb'eye' tu'n qpone' atzu', tu'ntzun tkub' qq'o'ne' chojb'il twitz Dyos Manb'aj Qdyose' kse'nxju' ktma qeye', chij.
28Atzunte nimaqkawil tma:
—Okna' kxe'l nq'o'ne' anb'il kyeye' tu'n kyxi'ye' q'ol chojb'il te Dyos Manb'aj toj chq'ajlaj, naq o'kx lalun che'x lq'exi'xe' najchaq. Ex che na'nqe' Dyose' wi'je', chij.
29Atzunte Moyses xittzaq'we'n te:
—Naqa ẍin exe' twitza ja'lo, kxe'l nqanine' te Dyos Manb'aj tu'n kyel tpa'nju' ta'jinchej ti'ja najchi'j, kyi'ju' inche kawin tuk'i'la ex kyi'ju' twnaqila, naq o'kx lalun qo' kub' t-sb'u'ntla, ex lalun maquntla kye aj Israel tu'n kyxi' q'ol chojb'il te Dyos Manb'aj, chij.
30Naqxi'x nb'ent tetz Moyses toj tja nimaqkawil, kub'ten na'l Dyos,31tb'inchatzun Qman Dyos kse'nxju' xitqani'n Moyses te': b'je'l tpa'nju' ta'jinchej ti'ju' nimaqkawil, kyi'ju' inche kawin tuk'i'l ex kyi'ju' twnaqil.32Atzunte nimaqkawil kub' tch'uẍsa'n jumajtltib', ex min e'etz ttzaqpi'n aj Israel. Yajb'il kyi'j A'lumj
1Tzajtzun tma'n Qman Dyos te Moyses:
—Kutxi'ya twitzju' nimaqkawil ex q'manxa te: chi Dyos Manb'aj Kydyos aj Eb'rey kjalu: Tzaqpinqe'xju'ya ntaname' tu'n kyxi' k'ulul nwitze'.2Qatzun kukxu' tu'na mixjun inche'x ttzaqpi'na,3knyek'u' wipumale' kyib'aju' talu'na ate'qe' toj kojb'il, kche kyimel chej, b'ur, kamey, wakx e'rit.4Ex lay tzaj nq'o'ne' yajb'il lu kyib'aju' kyalu'n aj Israel tu'n lalun che kyim, chitzun Dyos, chiku'ya te, chij te Moyses.
5Expe' o'kxju' q'ij lu taq' Qman Dyos, qu'n tma:
—Najchi'j nb'inchaye' lu, chij.
6Tetzun juntl q'ij tb'incha Qman Dyos ikju'. Kykyaqil kyalu'n aj Ejipt eb'aj kyim, aye'tzu'n kyalu'n aj Israel mixti' jun kyim.7Atzunte nimaqkawil xitchq'o'n kynenji kyalu'n aj Israel, tejtzun tpon ka'yb'aj mixti'te jun alu'mj kyim. Tetzunj tb'inte ja'lu, kub' tch'uẍsa'nxi'xtltib' ex min e'etz xittzaqpi'n aj Israel. Yajb'il tu'n tx'a'k
8Atzunte Qman Dyos tzaj tma'n kye Moyses ex Aaron:
—Kyiq'imitze' tza'j toj chuj tu'n tjaw tchto'n Moyses twitz kya'j twitzku' nimaqkawil.9Kxe'ltzun sputj tza'jtz naku'j quq tib'aj tkyaqilju' tx'otx', che tx'a'kyiltzun xjaltz tu'n ex alu'mj toj Ejipt, chij.
10Etztzun kyiq'in Moyses ex Aaron tza'j toj jun chuj, b'ajxtzuntz twitzju' nimaqkawil. Tetzunj kpon jaw tchto'n Moyses tza'j twitz jawl, kykyaqiltzunju' xjal ex alu'mj kub' b'ent toj tx'a'k.11Aye'tzu'n ajpkab' mixti' b'ent tmqet twitz Moyses kyu'n, qu'n aye'xjunkye matxi'toq che kub' b'ent toj tx'a'k ikxu' kse'nqe' aj Ejipt.12Atzunte Qman Dyos kub' tch'uẍsa'n tanmiju' nimaqkawil tu'n mitxa' tb'i'n kyyol Moyses ex Aaron kse'nxju' tma kye. Yajb'il tu'n saqb'aqun
13Xitzun tma'n Qman Dyos te Moyses:
—We'k'tza b'a'n prim najchi'j. Kutxi'tzuntza q'malte teju' nimaqkawil kjalu: chi Dyos Manb'aj Kydyos aj Eb'rey: Q'ontza anb'il kyeju' ntaname' tu'n kyxi' k'ulul weye';14qu'n ktzajel nq'o'ne' tkyaqilju' yajb'il tib'aja ja'lo, kyib'aju' nche kawin tuk'i'la ex kyib'aju' twnaqila, tu'ntzun teltnik'a qa mixti' juntl Dyos kse'n ayine' toj tkyaqil twitz tx'otx'.15Ojepe'wtlo t-xinyek'u'ne' wipumale' teya tuk'i'l jun tz'e'ysb'il twitza ex tuk'i'l jun yajb'il tib'aju' ttanama, ex ojewtlo naja twitz tx'otx';16atzunte' itz'xa wu'ne' tu'n tka'yinteju'ya wipumale' ex tu'n t-xi' nq'a' ojtzqi' wib'e' toj tkyaqil twitz tx'otx'.17Atzunta mixti'x inkub' t-xima'na, kukx tkub' tch'uẍsa'n tib'ju'ya, ex minti' inche'x ttzaqpi'nju'ya ntaname'.18¡Qu'mtzun! Najchi'j axkmuj ja'lu ktzajil nq'o'ne' txqan nimaq saqb'aqun aju' b'ajx kub'a' atxi'x ttzajlen anq'in Ejipt.19Qu'mtzun q'manxa tu'n kyokxju' talu'na toj kyja ex tkyaqilju' ati teya toj kojb'il, qu'n ajttzaju' saqb'aqun che kb'el tb'yo'n kykyaqil xjal ex alu'mj ju' ate'qe' toj kojb'il qa min ẍeok toj kyja, chitzun Dyos, chiku'ya te, chij te Moyses.
20Ate'tzun junjunju' nche kawin tuk'i'lju' nimaqkawil xob' teju' tma Qman Dyos. B'aj tzaj kyb'u'yi'n kymajen exqe' kyalu'n, eb'jo'kx kyq'o'ntzuntz toj kyja.21Aye'tzu'n min xikyoksla'n, axtzu' ekyeja' kq'o'n toj kojb'il.22Atzunte Qman Dyos tzaj tma'n te Moyses:
—Iq'i'nktza tq'ob'a twitz kya'j, tu'ntzun ttzaj saqb'aqun toj tkyaqil Ejipt kyib'aj xjal, kyib'aj alu'mj ex kyib'aj awal toj kojb'il, chij.
23Jawtzun ti'n Moyses tq'ob' twitz kya'j. Atzunte Qman Dyos tzaj q'ajti jb'al tu'n, tzaj q'ankyaq ex saqb'aqun. Kub' saqb'aqun toj tkyaqil Ejipt,24mixtoqtzunti'x in q'jenju' saqb'aqun tuk'i'l q'ankyaq. B'ajxtoq kub'a' jumaj saqb'aqun kse'n ja'lu atxi'x ttzajlen Ejipt.25Tkyaqilju' atitoq Ejipt majx b'ajkub' yajti tu'n saqb'aqun: eb'aj kyim xjal, alu'mj, jni'xju' awal atitoq toj kojb'il ex eb'aj tzaj jachj tq'ob' tze toj tkyaqilju' tx'otx'.26Atzu'n toju' tx'otx' Kosen janajlqe'toq aj Israel mixti' jun twitz saqb'aqun kub'.
27Atzunte nimaqkawil e'ttxok Moyses ex Aaron ex xitma'n kye:
—Matxi' tz'el nnik'e' qa matxi' chin b'inchan ile'. Ayine' ati npaje' kyuk'i'lju' nwnaqile', mya tpajte Dyos Manb'aj.28Nimxi'xju' q'ankyaq ex saqb'aqun matxi' kub' qib'aje', qu'mtzun lay chin maquntle' kyeye'. Che kub'sanqe'ye' twitz Dyos Manb'aj qi'je', che kxe'l ntzaqpi'ntzuntze', chij.
29Atzunte Moyses xittzaq'we'n te:
—Naq nb'ent wexe' ti'jxi' nintnam kjawil wiq'i'ne' nq'ob'e' twitz kya'j tu'n t-xi' nqanine' te Dyos Manb'aj. Oktzun kweb'elte saqb'aquntz ex q'ankyaq, tu'n teltnik'a qa te Dyos Manb'aju' tx'otx'.30Matxi' tz'el nnik'e' ti'ja ex kyi'ju' inche kawin tuk'i'la, na'mx tten tchi Dyos Manb'aj kyeye', chij.
31Majx kub' yajju' awal lino ex seb'ad, majx b'aj yajti qu'n aju' seb'ad akxi'xtoq in spiyin exju' tqan q'in sed akxtoq in b'echin.32Atzunju' triy exju' xpenul triy mixti' b'aj yajti qu'n yaj injawu'l kywi'.
33Tetzunj tetz Moyses toju' nintnam tb'ajlenxi' yolin tuk'i'lju' nimaqkawil, jawtiq'i'n tq'ob' twitz kya'j ex kub'san te Qman Dyos. Textzunju' kmuj lu, we'ju' saqb'aqun tk'i' jb'al ex q'ankyaq.34Tetzunj tka'yinte nimaqkawil matxi'toq we'ju' jb'al tuk'i'l saqb'aqun ex mixtoqti' nkub'tl q'ankyaq, kub' tch'uẍsa'n jumajtltib' kyuk'i'lqe'xi' nche kawin tuk'i'l.
35Kub' tch'uẍsa'n tib'ju' nimaqkawil ex min e'etz ttzaqpi'n aj Israel kse'nx tma Qman Dyos te Moyses. Yajb'il kyu'n ẍt'ikt'u'l
1Tzaj tma'n Qman Dyos te Moyses:
—Kutxi'ya twitzju' nimaqkawil, qu'n matxi' kub' nch'uẍsa'ne' tanmi kyuk'i'lju' inche kawin tuk'i'l, tu'ntzun kxi nye'k'u'ne' nimaq techlal inche b'ent wu'ne' kye,2ex tu'n t-xi' ttx'olb'a'na kye tk'wala ex kyeju' tchmana aju' tu'me'l xkub'a' kyi'ju' aj Ejipt, exqe' techlal kub' nyek'u'ne' tuk'i'l ipumalj kxol. Tu'ntzun ja'lu k'elel kniky'e' qa ayine' Dyos Manb'aj, chij.
3Atzunte Moyses tuk'i'l Aaron e'xi' yolil twitz nimaqkawil ex xikyma'n te qa chi Qman Dyos janche k'uluna' aj Eb'rey kjalu: ¿Jtojtzun chinx tnima'na? Tzaqpinqe'xa ntaname' tu'n kyxi' k'ulul weye'.4Qatzun minti' ẍe'x ttzaqpi'na, najchi'j che tzaj nq'o'ne' ẍt'ikt'u'l toj tkyaqil Ejipt,5kb'el noju' twitz tx'otx' kyu'n ex lay q'ancha'lixtel. Kb'ajel kwanju' ch'i'naqtl awal xb'aj kyejten tkub'lenxi' saqb'aqun, ex tkyaqilju' tze ati toj kojb'il.6Kb'ajil noj kyoju' tjaya kyu'n, toj kyja nche kawin tuk'i'la ex toj kyja twnaqila. ¡Aju' kb'ajel lu b'ajx kyila' tmana exqe' ojtxi' tchmana ẍe anq'in ojtxi'! chi Dyos Manb'aj, chechij te.
Tb'ajlenxi'tzun yolin Moyses, etztzuntz toj tja nimaqkawil.7Aye'tzu'n nche kawin tuk'i'l nimaqkawil xikyma'n te:
—¿Ma kukx tyajun xjalju' qi'j? Najsam Dyos tchwinqlala nimaqkawil, tzaqpinqe'xju'ya xjal lu tu'n kyxi' k'ulul te Dyos Manb'aj Kydyos. ¿Ma na'mx teltnik'a ti'j Ejipt matxi' kub' b'o'lj? chechij te.
8Atzunte nimaqkawil e'tzaj ttxko'n jumajtlju' Moyses tuk'i'l Aaron ex xitma'n kye:
—Kukyxi'ye' k'ulul te Dyos Manb'aj Kydyose', naq o'kx kymantze' weye' alkyeqe' che kxe'l, chij.
9Atzunte Moyses xittzaq'we'n:
—Qo xe'le' kyuk'i'lxi' k'wal ex tijwnaq, e'qk'wale' ex e'qmyale' ex kyuk'i'lju' qrite' ex qwakyixe', qu'n jun ninq'ijte' lu te Dyos Manb'aj, chij.
10Atzunte nimaqkawil xittzaq'we'n:
—¡Matxi' tz'el nniky'e' ti'ju' kyxime' myab'a'n! ¿Ma oktzun xe'lju' Dyos Manb'aj kyuk'i'le'? chechiloye' qa che elex ntzaqpi'ne' kyuk'i'lxi' kyk'wale'.11Se'nxi'xwitlo taq'wi. Oqe'kxkye' ichanqe'ye' che kxe'le' k'ulul te Dyos Manb'aj, qu'n ana'lo kyajb'ilju'ye', chij.
Tchaq'tzun nimaqkawil tu'n kyetz iq'i'n twitz.12Atzunte Dyos tzaj tma'n te Moyses:
—Nuqpinxa tq'ob'a tib'aj Ejipt tu'n kyb'ju'l txqan ẍt'ikt'u'l ex tu'n tb'aj kywan tkyaqil awal toj Ejipt ex tkyaqilju' kyejniten tkub'lenxi' saqb'aqun, chij.
13Xi'tzun tnuqpi'n Moyses tq'ob' tib'aj Ejipt, ex tzaj jun nin kyq'iq' toj tjawetzq'ij tu'n Qman Dyos, b'aj jun q'ij tu'n ex jun qonik'an. Tetzunj qsqix te juntl q'ij, matxi'toq che b'ju'l txqan ẍt'ikt'u'l tu'n kyq'iq' ntzaj tjawetzq'ij,14kub' noj tkyaqil Ejipt kyu'n, qu'n nimxi'xtoq kyajlal. B'ajxtoq tzik'a' ja'lu ojtxi' ex lay tzik' jumajtl ikyju'.15Majxkub' noj twitz tx'otx' kyu'n, expe' mixti'x q'ancha'lixju' tx'otx', qu'n nimxi'xtoq kyajlal. B'aj kwan tkyaqil awal ex tkyaqil twitz tzeju' kyejten tkub'lenxi' saqb'aqun. Mixti'tlte cha'x tze ex cha'x k'ul kyejten toj kojb'il toj tkyaqil Ejipt.
16Ch'intqantzun tchaq'ju' nimaqkawil tu'n kytzajtxko'n Moyses tuk'i'l Aaron, ex xitma'n kye:
—Matxi' chin b'inchan ile' twitz Dyos Manb'aj Kydyose',17atzu'n ja'lo nchin kub'sane' kyeye' tu'n tkub' kynajsa'ne' wile' teju' maj lu, che kub'sanqe'ye' wi'je' twitz Dyos Manb'aj tu'n telju' yajb'il nb'iyon lu, chij.
18Naqtzun nb'ent tetz Moyses twitzju' nimaqkawil, kub'ten na'l Dyos.19Atzunte Qman Dyos tzajxi'x txqantl tipumal kyq'iq' tu'n, xitanjsa'ntlti'j tjawetzq'ij, eb'ajxtzun tiqa'ntl kyq'iq'ju' ẍt'ikt'u'l, e'pon tq'o'n toju' ninnjab' tok tb'i Kyeq Twitz. Mixti' juntl ẍt'ikt'u'l kyej toj Ejipt.20Atzunte Qman Dyos kub' tch'uẍsa'n tanmi nimaqkawil tu'n lalun che etz ttzaqpi'n aj Israel. Tzaj ninqlolj te yajb'il
21Atzunte Qman Dyos tzaj tma'n te Moyses:
—Nuqpinxa tq'ob'a twitz kya'j tu'ntzun tkub' qloljix b'a'nxi'x toj tkyaqil Ejipt, expe' majx che kjel takyeju' xjal tu'nju' qxopin, chij.
22Xi'tzun tnuqpi'n Moyses tq'ob' twitz kya'j ex majxkub' qloljix b'a'nxi'x toj tkyaqil Ejipt,23oxe' q'ij mix-a'lo' jun xjal b'ent tka'yinte tb'esin, ex axtzu' e'kyaja' takye tu'n tpaju' qlolj. Atzu'n toj kyja aj Israel atitoq q'ij.
24Tchaq'tzun nimaqkawil tu'n ttxkonjtz Moyses ex xitma'n te:
—Kukyxi'ye' k'ulul teju' Dyos Manb'aj, kyiq'inqe'xe' kyk'wale', naqtzun o'kx lay che'x kyiq'i'nju'ye' krite' ex kwakyixe', chij te.
25Atzunte Moyses xittzaq'we'n:
—Lay, qu'n a pena'ta ktzajel q'onkye alu'mj tu'n kykub' qq'o'ne' te chojb'il tz'e'ysa'n te ninb'ilte Dyos Manb'aj Qdyose'.26Ex che kxe'l qiq'i'ne' qalune', mixti' tu'n tkyaj jun alu'mj, qu'n kyxol kjawila' qsk'o'ne' tu'n kyajb'en te ninb'ilte Dyos Manb'aj, qu'n mixti' b'i'n qu'ne' ja'lo titi' nojqelan qeye' ajqpone' tu'n tjaw qnimsa'ne' tb'i Dyos Manb'aj. Chij te.
27Atzunte Qman Dyos kub' tch'uẍsa'n tanmi nimaqkawil tu'n lalun che etz ttzaqpi'n.28Xitzun tma'n nimaqkawil te Moyses:
—Kutexa tza'lu. Lalun tzul jumajtla nk'etze' qu'n qama tzul jumajtla, atzun q'iju' kjapumel tib'aja, chij.
29Atzunte Moyses xittzaq'we'n:
—Ax tyola, lay wil jumajtl twitza, chij. Tqanil tu'n kykyimu' tnejel k'wal
1Tzaj tma'ntl Qman Dyos te Moyses:
—Atix juntl yajb'il wu'ne' tib'aju' nimaqkawil ex kyib'aj aj Ejipt. Tib'ajxi'tzun ja'lu, myanoq o'kx che xe'ltzaqpi'ne' tu'n nimaqkawil. Qu'n aku'pe' k'eletz xla'jankyeye'.2Atzun ja'lo q'manxa kye aj Israel, e'ichan ex qya, tu'n t-xikyqani'n ti'xti' q'anpwaq ex saqpwaq kye kyb'esin. Chi Dyos.
3Ojetoqtzun che ok aj Ejipt b'a'nwnaq tu'n Qman Dyos kye aj Israel. Kykyaqil aj Ejipt exqe' nche kawin tuk'i'l nimaqkawil, kyma qa ate Moyses jun xjal nim toklen.
4Atzunte Moyses xitma'n teju' nimaqkawil:
—Chi Dyos Manb'aj kjalu: Chin elixe' tk'u'j aq'b'il kyxol kykyaqil aj Ejipt,5che kyimelju' tnejel k'wa'lb'aj tojile kyja aj Ejipt, ktzajelx nej wu'ne' ti'j tnejel tk'wal nimaqkawil ju' nkawin, ex kpomil b'aj ti'j tnejel talju' qya majin naq'unan ti'j ab'j cheb'l triy. Ex ikx che kyimelju' tnejel kyal alu'mj.6Kb'ajel oq'e'n ex sich' toj tkyaqil Ejipt tu'n k'ixk'oj, aj b'ajx tzik'a' junmaj ex lay b'aj jumajtl ikju', chi Dyos.7Tu'ntzun telkynik'e' qa mya junx kyilwi aj Ejipt kyuk'i'l aj Israel wu'ne' ayine' Dyos Manb'aj, qu'n laype' chiyon jun tx'yan ti'j jun xjal mujqa ti'j jun alu'mj kyxol aj Israel. Chi Dyos.8Kykyaqiltzu'n nche kawin tuk'i'la lu che b'ju'l nk'etze', che kb'el meje nwitze' majx kku'pumelju' kplaj twitz tx'otx' ex ktzajel kma'n weye': Kutexa kyuk'i'lxi'ju' xjal inche lepenje ti'ja, chiqe'lo weye'. Tb'ajlenxi'tzun ja'lu chin elextzuntze'. Chi Moyses teju' nimaqkawil.
Etztzun Moyses twitzju' nimaqkawil, inxi'x tx'u'jin.
9Tzaj tma'ntl Qman Dyos te Moyses:
—Che kxe'lxi' b'i'nkye' tu'n nimaqkawil tzmaxi'j ajkyb'inchet txqantl techlal wu'ne' toj Ejipt, chij.
10Tkyaqilju' techal lu eb'ent tu'n Moyses ex Aaron twitzju' nimaqkawil, atzunte Qman Dyos matxi'toq kub' tch'uẍsa'n tanmi nimaqkawil, qu'mtzun mixti' eb'je'tz ttzaqpi'n aj Israel toj Ejipt. Q'ij te Tzaqpib'l
1Yolin Qman Dyos kye Moyses ex Aaron toj Ejipt, tzaj tma'n kye:
2Nim toklenju' xjaw lu kyeye', qu'n a tnejel xjawju' te junjun ab'q'i.3Kymanxju'ye' lu kye kykyaqil aj Israel: Toj tlajoji'n q'ij teju' xjaw lu, teyile junjunkye' ktzajel tiqi'n jun qpoj tman rit mujqa jun qpoj tman chib' te junjun ja xjal.4Qatzun naqjte'x kyb'aju' xjal toj kyja, exqa lay che xkye tu'n tch'yetju' alu'mj, kche walju' tajaw ja junx kyuk'i'lju' tb'esin nqaku' tk'etz ti'j. Kb'ajil kysipa'n kyxol kse'nxju' kyajlal, ex kse'nxju' kb'ajel tu'n junjun.5Aju' rit mujqa chib' te jun ab'q'iqe', tman ex mixti' ttzakajil,6teyiletzun junjun aj Israel kb'el tjyo'npun tu'ntzun tkub' kyb'yo'n ajtok qale toj kyajlaljuj (14) tajlalju' xjaw lu.7Atzu'n tchk'el alu'mj k'okyil kysun ti'j tqul tjpel kyja, ja che wala' ti'ju' alu'mj.
8Atzun qonik'anju' kche wal ti'ju' chib'j k'a'sa'n twitz q'aq' tuk'i'l itzaj k'a ex wab'j mixti' ttx'amal.9Mixti' jun piẍ chib'j kxel kych'yo'ne' cha'xwit mujqa tzq'ajsa'n toj ta'l. Tkyaqilju' tchib'jil exqe'ju' toj tk'u'j, tqan ex twi', ilti'j tu'n tk'a'sit twitz q'aq',10ex mixti' tu'n tkyej kyk'u'ne' te juntl q'ij. Qatzun atix min xb'aj kyu'ne', ati tu'n tkub' ktz'e'ysa'ne' toj q'aq'.11Matxitoqtzun b'jo'k kyoksa'ne' kyxb'alune', e'kyxajab'e' ex tuk'i'lju' kytzeye' toj kyq'ob'e', che wanqe'tzuntze' ojqel ti'ju' alu'mj, qu'n a Q'iju' Te Tzaqpib'l kyeye' wu'ne' ayine' ju' Dyos Manb'aj.
12Chin ik'ele' toju' qonik'an lu toj tkyaqil Ejipt, che kb'el nb'yo'ne' tnejel k'wa'lb'aj toj junjun ja, e'tnejel kyal alu'mj, ex ktzajel nq'o'ne' tz'e'ysb'il kywitz kydyos aj Ejipt, ayine' Dyos Manb'aj nchin q'mante.
13Aju' chik' a tajb'enju' tu'n tyek'u'nteju' kyjaye' ja tu'me'l ta'qeye'. Ajtzun wik'e' b'yolkye aj Ejipt, mix-a'lo' junkye' kkyimel, qu'n lwiy kxel nka'yi'nju'ye' chik' tok ti'j tqul tjpel kyjaye' ex majx tqanku' chin ik'ele' tk'etz.14Atzunju' q'ij lu ktzajel kna'ne' kukxju' ex kb'el kyik'sa'ne' tuk'i'l jun ninq'ij te ninb'ilweye'. Jun kawb'ilte' lu tu'n kyik'santeye' kukxju', ex tu'n kb'inchanteju' kyyajajile' che ul.15Wuq q'ij kche wal wab'je' mixti' ttx'amal, qu'mtzun toj tnejel q'ij mixti' tu'n tten ttx'amal wab'j toj kyjaye'. Alkyetzunte mawan wab'j tuk'i'l ttx'amal toju' wuq q'ij lu, mixti' tu'n toktl tajlalju' tnam Israel.16Toju' tnejel q'ij exju' twuqi'n q'ij kyb'u'yi' kyib'e' toj k'u'lb'il xjan. Mixti' tu'n kyaq'unane' kyoju' q'ij lu, naq o'kx tu'n tb'inchet kwaye' teyile junjun.17Aju' tq'ij wab'j mixti' ttx'amal, ajun q'iju' tu'n tkub' kyik'sa'ne', qu'n a q'ij ja'lu ẍeb'je'tz wi'ne' toj Ejipt kykyaqile'. Jun kawb'ilte' tu'n kyik'santeye' kukxju', exqe' kyyajajile' che ul yajxi'tel.18Kche wal wab'je' mixti' ttx'amal te qale toju' q'ij kyajlajoj (14) tajlal tnejel xjaw tu'n tpon b'aj te qale teju' q'ij junaq jun (21) tajlalju' xjaw lu.19Wuq q'ij mixti' tu'n tten ttx'amal wab'j kyjaye'. Alkyetzunte mawan wab'j tuk'i'l ttx'amal, mixti' tu'n ttentl kyxol aj Israel, maskye jun najchaq xjal mujqa aj Israelx.20Qu'mtzun lalun txikywan wab'je' tuk'i'l ttx'amal. Jaxjaku' najlqe'ye', ati tu'n kywan wab'je' mixti' ttx'amal, chechiku'ye' kye, chi Dyos kye Moyses ex Aaron.
21Atzunte Moyses e'ttxokju' tijwnaq kyxol aj Israel ex tzaj tma'n kye:
Kukyxi'ye' ex kyiq'intze' jun qpoj tman rit mujqa jun tal chib' kxolju' ate' toj kyjaye', ex kb'yonku'ye' tu'ntzun tik'setju' Q'ij Te Tzaqpib'l.22Aju' chik' k'elel ti'j, kq'onku'xe' toj jun se'n tzma ex kb'inchantze' jun pchoj k'ul isopo. Kyak'sanku'xe' toju' chik' ex ksunktzuntze' ti'j tqul tjpel kyjaye'. Mix-a'lo' junkye' tu'n tetz toj tja na'mtoq qsqix.23Ajtzun tik' Qman Dyos k'ixb'salkye aj Ejipt tu'n kamik, k'okyil tka'yi'n chik' ti'j tjpel kyjaye', majxtzun tqanku' k'ik'eltz tk'etz kyjaye'. Lay taq'te Qman Dyos anb'il tu'n tokju' kamik kyjaye'.24Ilti'j tu'n t-xi' knima'nju'ye' chaq'b'il lu, exqe' kyyajajile' che ul yajxi'tel, qu'n kawb'ilte' tejumajx.25Ajtzun kyokxe' toju' tx'otx'ju' kxe'l tq'o'n Qman Dyos kyeye', kse'nxju' tzajni ttziya'n, kb'el kyik'sa'ne' ninq'ij lu kukxju'.26Ajtzun t-xi' qani'n kyeye' kyu'n kyk'wale': ¿Ti'tzun toklenju' ninq'ij lu?, Qa chechi.
27Aye'tzunkye' a kytzaq'wenxju'ye': Jun chojb'ilte' lu nb'inchet te ninb'ilte Qman Dyos toju' Tq'ij Tzaqpib'l, tej tik' k'ixb'salkye aj Ejipt tu'n kamik, ex majx tqanku' ik' ttziyile kyja aj Israel najlqe'toq toj Ejipt, ikytzu'n e'kleta' qwnaqilju'ye' chechiku'ye' kye, chi Moyses kye.
E'kub'tzu'n meje aj Israel k'ulul twitz Qman Dyos, majx ku'pun kyplaj twitz tx'otx',28kyb'inchatzuntz kse'nxju' tma Qman Dyos te Moyses ex Aaron. E'kyimu' tnejel k'wa'lb'aj
29Tetzun tk'u'j aq'b'il ik' Qman Dyos tuk'i'l kamik b'yolkye kykyaqil tnejel k'wa'lb'aj kyxol aj Ejipt. Tzaj qex ti'ju' tnejel tk'wal nimaqkawil ntoq kawin, ex kyi'j tnejel kyk'walju' presi'nqe'toq ex ponb'aj kyi'ju' tnejel kyal alu'mj.
30Atzunte nimaqkawil kyuk'i'lju' nche kawin tuk'i'l ex kykyaqil aj Ejipt e'jawe' teju' qonik'an lu, nim oq'e'n jaw toj tkyaqil Ejipt. Qu'n mixti' jun ja mixwitti' jun kyimni toj.31Textzu'n qonik'an lu tchaq'ju' nimaqkawil tu'n kyxi' txokb'aj Moyses ex Aaron, ex xitma'n kye:
—Kukyxi'ye' aj Israel, kypa'mil kyib'e' kyi'ju' nwnaqile'. Kukyxi'ye' k'ulul te Dyos Manb'aj kse'nx oje kymaye'.32Kyiq'inqe'xe' kyrite' ex kywakyixe' kse'nx kyqanb'etze'. Extzun che kub'sanqe'ye' wib'aje' twitz Dyos, chij.
33Aye'tzu'n aj Ejipt oktilil kyu'n tu'n kyb'je'tzu' aj Israel ti'jxi' kytx'otx', qu'n kyxima qa oktoq che b'ajel kykyaqil.34Kykyaqiltzu'n aj Israel xikyiq'i'n tq'otjil kywa, na'mxtoq tku'x ttx'amal tuk'i'lxi' ja nxyuq'ita', b'ajkub' kyb'altz'i'n toj kyxb'alun ex b'jaw kyq'o'ntzuntz ti'j kyqul.35Ex xikyqani'n ti'xti' q'anpwaq, saqpwaq ex kyxb'alun kye aj Ejipt kse'nx tma Moyses kye.36Axte Dyos b'inchante tu'n kyq'onte aj Ejipt tu'n tkyaqil kyk'u'j tkyaqilxju' intoq xikyqani'n aj Israel kye, iktzun tu'me'l ja'lu eb'je'la' ti'xti' kyu'n aj Israel kye aj Ejipt. E'b'je'tz aj Israel toj Ejipt
37E'b'je'tztzun aj Israeltz toj Ramses tu'n kypon toju' najb'il Sukot, qapelo oxnaq o'lajmutx' (600,000) kyb'aju' ichan, ex mixti' e'okju' qya ex k'wal toj tajlal.38Nim wakx ex rit eb'je'tz kyiq'i'n, ex nim xjal mya aj Israel eb'je'tz kyuk'i'l.39Tu'ntzunju' xla'ja'n eb'je'tza' kyu'n aj Ejipt, mixti' ten anb'il kye tu'n kyb'inchante kywa. Kub' kyb'incha'n kywa muqin tu'nju' tq'otjil wab'j mixti' ttx'amal etz kyiq'in toj Ejipt.
40Junk'al junaq lajoj (430) ab'q'i e'najan aj Israel toj Ejipt,41tojxtzu'n q'ij tej tjapun junk'al junaq lajoj (430) ab'q'i, kykyaqilju' ttanam Dyos eb'je'tz toju' tx'otx' lu.42Tojtzu'n qonik'an lu, kub'ten Qman Dyos xq'uqilkye ttanam tu'n kyetz tiq'i'n toj Ejipt. A qonik'an ja'lu te Qman Dyos, jun qonik'an tu'n tjaw kynimsa'n aj Israel tb'i, ex kyu'nju' kyyajajil toj wiqi'n yajxi'tl. Kawb'il tib'aju' Tq'ij Tzaqpib'l
43Tzaj tma'n Qman Dyos kye Moyses ex Aaron:
A kawb'il ja'lu ajtkub' kyik'sa'ne' Tq'ij Tzaqpib'l: Mix-a'lo' jun mya aj Israel tu'n tch'yon ti'ju' alu'mj te chojb'il,44atzu'n lq'o'n majen tu'n pwaq, qa okni techil ti'j tchib'jil, b'a'n tu'n tch'yon ti'j.
45Aye'tzu'n najchaq xjal, qa naq nche b'et mujqa majin, mixti' tu'n kywan ti'ju' alu'mj.46Noq toj junx ja che wala' ti'j. Mixti' tu'n tetz kyi'n jun piẍ tchib'jilju' alu'mj te chojb'il ti'jxi'ju' ja, ex mixti' tu'n ttoqet jun tb'aqil.47Kykyaqil aj Israel tu'n kyb'inchante ja'lu.
48Qatzun ati jun xjal mya aj Eb'rey najli kyxole' tajb'il tu'n tik'santeju' Tq'ij Tzaqpib'l te ninb'ilweye' ayine' Dyos Manb'aj, tnejil ati tu'n tok techil ti'j tchib'jil kyuk'i'l kykyaqilju' ichan ate' toj tja, b'a'ntzun tu'n tik'santetzu', k'okyiltzuntz kse'nqe' xjal nche itz'ji toju' tnam lu. Mix-a'lo' jun kch'yol ti'ju' alu'mj lu qa min tok techil ti'j tchib'jil.49Ax kawb'ilju' kb'inchetel kye xjal axtzu' itz'jna'qe' toju' tnam ex kye najchaq xjal najlqe' kyxole', chechiku'ye' kye, chi Dyos kye.
50Kyb'inchatzu'n aj Israel kse'nx tchaq' Qman Dyos kye Moyses, ex Aaron.51Textzu'n q'ij lu eb'je'tz tiq'i'n Qman Dyos aj Israel toj Ejipt, nk'u'n kyten toj tneji'n.
1Tzaj yolin Qman Dyos te Moyses ex tma:
2Xjansamqe'ju'ya tnejel k'wa'lb'aj, qu'n weqe'we' kykyaqil tnejel kyk'wal aj Israel, exqe' tnejel kyal alu'mj, chij.
3Xitzun tma'n Moysestz kye tnam: Kyna'ntze' q'ij lu tej kyb'je'tz iq'i'ne' toj Ejipt tu'n Qman Dyos tuk'i'l nimtipumal, tej najlqe'toqe' atzu' te k'a'yi'nmajin. Qu'mtzun mixti' tu'n t-xikywane' wab'j tuk'i'l ttx'amal.4Maqo etz ja'lo toju' xjaw Ab'ib'.5Axtzun xjawju' lu, kb'el qik'sa'n ninq'ij nimaq toklen ajqpon tiq'i'n Qman Dyos toju' jun tb'anil tx'otx', aju' kytx'otx' aj Kanaan, itit, amorey, eb'ey ex jeb'usey ju' oje kyej ttziya'n kye ojtxi' qchman qa ktzajel tq'o'n qe.
6Wuq q'ij qo wal wab'j mixti' ttx'amal, tojtzu'n twuqi'n q'ij kb'el qik'sa'n jun ninq'ij te ninb'ilte Qman Dyos.7Mixti' tu'n tten wab'j tuk'i'l ttx'amal toj tkyaqilju' qtanam toju' wuq q'ij te waj wab'j mixti' ttx'amal.8Tojtzu'n q'ij lu kxelqma'n kye qk'wal: Nb'inchet ja'lu tu'nju' tb'incha Qman Dyos qeye' tej qetztiq'i'ne' Ejipt.9Ex naku'j tok jun qechil ti'j qq'ob' mujqa ti'j qplaj, tu'n ttzaj qna'n qa ati tu'nt-xi qyoli'n tkawb'il Qman Dyos, qu'n ana'te etzq'inqe Ejipt tuk'i'l nimtipumal.10Qu'mtzun ati tu'n tkub' qik'sa'n ninq'ij nim toklen lu, atl junjun ab'q'i tojxu' tajlal xjaw q'ma'ntl, qochiku' kye.
11Ajqpon tiq'i'n Qman Dyos toj kytanam aj Kanaan, mujqa ajttzaj q'o'n tx'otx' qe kse'nx kyejni ttziya'n qe, ex kye ojtxi' qchman,12kykyaqilju' tnejel qk'wal q'a exqe' tnejel kal qalu'n tmanqe' ati tu'n t-xi' qq'o'n te Qman Dyos, qu'n te Dyos qe'.13Atzunju' tnejel tal b'ur ati tu'n t-xiq'et jun rit mujqa jun chib' te t-xel, qatzun minti' xxiq'et t-xel, ati tu'n tel qtoqi'n tqulju' b'ur. Ex ati tu'n t-xi' qq'o'n jun oyaj te t-xelju' tnejel qk'wal,14Qatzun matxi kyqani'n kyk'wale' kyeye' toju' tq'ijlalil tzul: ¿Ti'tzu'n toklen ja'lu?, qa chechi, kxel kytzaq'we'ne' kye kjalu: O'etz tiq'i'ne' Qman Dyos toj Ejipt tuk'i'l nimtipumal, janajlqo'toqe' toj yajb'il.15Tej tkub' tch'uẍsa'ntib'u' nimaqkawil tu'n miqo' etza' ttzaqpi'ne', e'kub'tb'yo'n Qman Dyos tnejel kyk'wal aj Ejipt, ex kykyaqil tnejel kyal alu'mj; qu'mtzun nche'x qq'o'ne' tnejel kyal alu'mj tmanqe' te Qman Dyos, ex inxiqq'o'ne' jun oyaj te t-xel tnejel qk'wale', chechiku'ye' kye.16Qu'mtzun kjelju' chaq'b'il lu naku'j kyechele' ti'j kyq'ob'e' mujqa ti'j kyplaje', tu'ntzun ttzaj kyna'ne' qa o'etz tiq'i'n Qman Dyos toj Ejipt tuk'i'l nim ipumalj, chi Moyses kye. Tnej muj ex tnej q'aq'
17Tej kyetz tzaqpi'n aj Israel tu'n nimaqkawil, mixti' e'xitiq'i'n Qman Dyos toju' b'e inik' toj kytx'otx' pilistey nqaku'toqch'i'ntl kye, qu'n kub' t-xima'n: tu'n lalun tz'anjtzti'j kyk'u'ju' tnam ajkyka'yinteju' q'oj ex tu'n mitz'anja'tl kyi'j Ejipt, chij.18Qu'mtzun e'xitiq'in Qman Dyos q'ol welt toju' b'e toj chq'ajlaj inpon ttzi Ninnjab' Kyeq tb'i.
Nk'u'mile kten aj Israel toj tneji'n tej kyb'je'tz.19Atzunte Moyses xitiq'i'n tb'aqil Jse, qu'n tb'incha Jse tu'n kytziyanteju' ttzik te tu'n tetz kyiq'i'n tb'aqil toj Ejipt. Ex kyejtma'n kye: Tzulte Qman Dyos onilkyeye', ajtzun tul a kyb'inchaye' xtalb'il tu'n t-xikyiq'i'ne' nb'aqile' ex lalun kyej kyq'o'ne' toj Ejipt, chij.
20Aye'tzu'n aj Israel e'ik'b'et toj Sukot, ex e'pon Etam, ja inxa' qeya' chq'ajlaj, ex e'kyajten jte' q'ij atzu'.21Intoq b'et Qman Dyos kyuk'i'l te q'ijtl toj jun tnej muj yek'ulte kyb'e; atzu'n te qonik'an toj jun tqan q'aq' nimin spik'b'alte toj kyb'e. Qu'mtzun eb'et q'ijtl ex qonik'an kyuk'i'l,22Nejlitoqju' muj kwitzte q'ijtl, atzunju' q'aq' te qonik'an. Eb'jik'x aj Israel toju' Ninnjab' Kyeq tb'i
1Yolin Qman Dyos tuk'i'l Moyses ex tma:
2Q'manxa kye aj Israel tu'n tanjtl kyi'j ex tu'n kpon tpen Pi-ayrot ju' ati kyxol Mikdol tuk'i'lju' ninnjab', twitz B'aal-sepon, atzuntzu' kche tenb'ela' jte' q'ij nqayin ttzi ninnjab',3tu'ntzun tkub' t-xima'nju' nimaqkawil toj Ejipt kjalu: Minkanekye' aj Israel toj kwitz jatu'n kyxa'. Matxi' che kyej maqli toj chq'ajlaj, chilo.4Ayintzunwe' kb'el nch'uẍsa'ne' tanmi nimaqkawil tu'ntzun t-xilpe knol kyeye', oktzun nyek'u' wipumaltzu'ye' ti'j ex kyi'j t-xjal te q'oj, tu'ntzun tel kniky' aj Ejipt qa ayine' Dyos Manb'aj, chij.
Aye'tzu'n aj Israel kyb'incha ikju'.5Pontzun tqanil te nimaqkawil toj Ejipt qa matxi'toq che b'aj oq aj Israel. Jawtzun ti'ntib'tz kyuk'i'lju' nche kawin tuk'i'l ex kyma kyxolx: ¿Se'n taq'wi ẍe ex qtzaqpi'n aj Israel ex lay che ajb'entl qe? chechij.
6Tchaq'tzun nimaqkawil tu'n kyb'aj b'incha'n kytenju' tkarwaj te q'oj, ex eb'ajx tiq'i'n t-xjal te q'oj.7E'b'ajx tiq'i'n tkyaqil karwaj ate'toq Ejipt, kyxoltzu'n ja'lu junk'al lajnaqaq (600) karwaj tb'anilqexi'x, ex junjun nejenel toj junjun karwaj.8Kub' tch'uẍsa'n Qman Dyos tanmiju' nimaqkawil tu'n kyxi' knolkye aj Israel maskyepe' matxi'toq kyilju' tipumal Qman Dyos tej kyetz.
9Kykyaqilju' xjal aj Ejipt te q'oj eb'ajxlpe knolkye aj Israel toj karwaj ex ti'j chej, kub'tzun kyi'j aj Israel kyu'n ttzi ninnjab' nqayin tk'etz Pi-ayrot twitzxi' B'aal-sepon ja e'kub'tena'.10Tetzunj kyka'yi'nte aj Israel kxi'toq tponju' nimaqkawil kyuk'i'lju' t-xjal q'ojil kyi'j, ojexi'x che b'ajxob' ex xikqani'n o'nb'il te Qman Dyos.11Xikma'ntzuntz te Moyses:
—¿Ma mixtoqtzunti' muqb'il Ejipt tu'nju' xqo etztiq'i'na ex tu'n kyej kyime' toj chq'ajlaj? Ma axi'xtzun xtb'inchaju'ya qeye' ¿Tiqu'n xqo etza' tiq'i'na toj tx'otx' Ejipt?
12Xina' qma'ne' teya Ejipt: Qo ttzaqpinkja tu'n qaq'unane' kye aj Ejipt ¡Ate b'a'n tu'n qkyeje' te tmajen nimaqkawil kyetwitz tu'n qkyej kyime' toj chq'ajlaj! Qo chije' teya, chechij.
13Atzunte Moyses xittzaq'we'n kye kjalu:
—Lalun che xob'e', qek kyk'u'je' ti'j Qman Dyos, kyla'tzuntze' titi' ktb'incha' tu'n qklet, qu'n o'kx ja'lo k'okyil qka'yi'n kywitz aj Ejipt, milo najchi'j tu'n kyok qka'yi'ntl.14Lalun b'ajx kyk'u'je' ti'j, qu'n ate Qman Dyos kq'ojil te kyxele', chij.
15Tzajtzun tma'n Qman Dyos te Moyses:
—¿Tiqu'n ntzaj tqani'na o'nb'ila weye'? ¡Q'manxa kye aj Israel tu'n t-xikyljo'n kyb'e!
16Atzunta iq'i'nktza ttzeya ex nuqpinxa tq'ob'a tib'aj ninnjab' ex aq'punku'ya a' toj kab'e' tu'ntzun kyb'jik'x aj Israel toj tzqij.17Kb'el nch'uẍsa'ne' kyanmi aj Ejipt tu'n kyb'jik'xlpe kyi'je'; atzuntzu' kxe'la nyek'u'na'ye' wipumale' ti'ju' nimaqkawil ex kyi'j t-xjal te q'oj, kyi'j tkarwaj ex kyi'j tchej.18Ajtzun t-xinyek'u'ne' wipumale' ti'ju' nimaqkawil ex kyi'j tkarwaj ex tchej, k'elil kynik' aj Ejipt qa ayine' Dyos Manb'aj, chi Dyos te.
19Tojtzu'n kmuj lu kych'ixpu kytenju' tanjl Dyos exju' muj nejlitoq kywitz aj Israel, xi'e'xa'tentl kytze'lkyi'j.20Qu'mtzun kyej tenju' tnej muj kxol aj Ejipt kyuk'i'l aj Israel; tojtzu'n jatoq ta'qe' aj Ejipt kub' qloljix muj, atzu'n toju' plaj kyu'mel aj Israel spik'untoq. Qu'mtzun min kub'kyi'j aj Israel kyu'n aj Ejipt toju' qonik'an lu.
21Xitzun tnuqpi'n Moyses tq'ob' tib'aj ninnjab' ex tzaj jun nin kyq'iq' tu'n Qman Dyos toj tjawetzq'ij, b'aj qonik'an tu'n, ex kub' tkab'sa'n ninnjab'. Ikytzu'n kyeja' jun tznij tx'otx' tzqij toj ninnjab' tu'n Qman Dyos,22toj tzqij eb'jik'xa' aj Israel kyxol kab'e' tnej a' naku'j tapi, jun toj knayaj ex juntl toj kyb'a'nq'ob'.
23Kykyaqilju' tchej ex tkarwaj nimaqkawil aj Ejipt eb'jo'kx lpe knolkye aj Israel ex eb'jo'kpun toj nky'ajchaq ninnjab';24tetzun b'a'n prim tzaj ka'yin Qman Dyos toju' jun tnej q'aq' ex muj kyib'aju' xjal q'ojil te Ejipt, ex tzaj tq'o'n jun xitb'il kxol;25kub' t-xitu'n ttulil kykarwaj tu'n lalun che b'et ojqel. Kymatzun aj Ejipttz:
—Qo'qe' oq kywitz aj Israel, qu'n nkolon Dyos Manb'aj kyi'j ex nq'ojin qi'j, chechij.
26Atzunte Qman Dyos tzaj tma'n te Moyses:
—Nuqpinxa tq'ob'a tib'aj ninnjab' tu'n tanjtzti'ju' a', tu'ntzun kykyej muqli aj Ejipt kyuk'i'lxi' kykarwaj ex kychej, chij.
27Xitzun tnuqpi'n Moyses tq'ob' tib'aj ninnjab', tetzunj qsqix anjtzti'ju' a' kse'nxtoqju' tten. Tetzunj kyoq toqu' aj Ejipt, axtzu' eb'jo'ka' takpuj ti'ju' a', e'kyaj mulq'ajtzuntz toj ninnjab' tu'n Qman Dyos.
28Tej tanjtztlti'ju' a' kse'nxju' tten, e'kyaj mulq'aju' karwaj, e'chej ex kykyaqilju' xjal te q'oj eb'ajxlpe knolkye aj Israel. Mix-a'lo' jun t-xjal nimaqkawil te q'oj kyej anq'in.29Aye'tzunkye' aj Israel eb'ji'kx toj ninnjab' tzqij kyb'e kyxol kab'e' tnej a' naku'j tapi, jun toj kyb'a'nq'ob' ex juntl toj kynayaj.
30Ikytzu'n e'tkola' Qman Dyos aj Israel toj kyq'ob' aj Ejipt toju' q'ij lu. Aye'tzu'n aj Israel e'kyilju' aj Ejipt kyimniqe'tl matxi'toq che etz xon ttziyile ninnjab'.31Tetzunj kyka'yi'nte aj Israel tipumal Qman Dyos matxi'toq tb'incha kyi'j aj Ejipt, e'nimantzuntz te Qman Dyos, okqe kyk'u'j ti'j ex ti'j Moyses ju' tmajen. Tb'itz Moyses
1Xitzun kyb'itza'n Moyses kyuk'i'l aj Israel jun b'itz te ninb'il tb'i Qman Dyos kjalu:
Kqo b'itzal te ninb'ilte Qman Dyos, tu'nju' jun kanb'ab'l tb'anilxi'x, tu'nju' mache kyej tmulq'i'n chej exqe' xjal te q'oj toj ninnjab'.2Ate Qman Dyos qipumal, kolb'ilqe ex Qdyos, qu'mtzun qo b'itzal te, kjawil qnimsa'n, qu'n nimte toklen ex ate Kydyos qman.3Ate Qman Dyos jun nimaq q'ojil ex a tb'iju', ¡Dyos Manb'aj!
4E'kyaj tmulq'i'n Qman Dyos karwaj exqe' t-xjal nimaqkawil te q'oj toj ninnjab'. ¡E b'aj kyej jaq'wiju' nimaq nejenel kye t-xjal te q'oj toj Ninnjab' Kyeq tb'i!5E'ku'pun tz'aq t-xe a' naku'j ab'jqe' majx e'kyaj mulq'aj toj ninnjab'.
6¡Qman Dyos!, tu'nju' tb'a'nq'ob'a nimtipumal ex nim toklen ẍe kub'a' t-xitu'nju'ya ajq'oj.7Tu'nju' tipumala mache kub' t-xitu'nju'ya xjaw kyiq'i'n kyib' ti'ja; tej saj ttx'u'jila kyib'aj, macheb'aj naku'j ttxa triy tu'n q'aq'.
8Tu'nju' tipumal t-xewa majx mab'jaw tb'u'yi'ntib'ju' a', b'jaw kb'u'yi'n kyib'ju' ttolob' ninnjab' naku'j tapi; ¡mixti' yukchitl ninnjab' nim t-xe toj nky'ajchaq!9Matxi'toq kub' kyxima'n ajq'oj kjalu: Qo xe'l lpe kyi'j tzmax ajtkub'kyi'j qu'n, ex kxe'l qsipa'nju' k'elil qi'q'i'n kye tzmaxi'j ajtqe qk'u'j. Kjawitz qi'n qk'uẍtx'e'nb'il qq'ob'ku' kb'el b'yo'nkye. Chechij.10Tetzunj saj tq'o'na kq'iq' majx ẍe kyej mulq'aj toj ninnjab'; mache ku'pun tz'aq naku'j ab'j plomqe' t-xeju' ninnjab' nim tipumal.
11¡Qman Dyos! ¡Mixti' juntl dyos kse'n aya! ¡Mixti' juntl xjan ex nim toklen kse'n aya! ¡Inche b'ent nim ti'xti' tu'na tb'anilqexi'x ex xob'ajilqe'! ¡Qu'mtzun o'kxta b'a'n tu'n tjaw nimeta!12¡Matyek'u'ya tipumala; ex majx ẍe'x tjaq' tx'otx'!13Tu'n tk'u'jlalila nejliya twitzju' tnam xtkola; ex tu'nju' tipumala xi' kxitiq'i'na toju' tjaya xjan.14Kche lu'lulju' nimaqtnam ajkyb'inte, kb'ajel kytoli'nkyib'ju' pilistey tu'n k'ixk'oj,15Che kb'el numju' nejenel toj Edom, exqe' nejenel toj Moab' che lu'lul tu'n kxob'il, kykyaqil aj Kanaan che b'elnumj tu'n kyxob'il.
16Qman Dyos, ¡tzajxwit txqan xob'ajil kyi'j! ¡che kyajxwit skanix tu'nju' tipumal tq'ob'a, tzmax ajtik'ju' ttanama jaw t-sk'o'na!17Qman Dyos, qo tiq'inxa najal twi'ju' witz xjan teya, toju' najb'il jawni t-sk'o'na jatu'n tnajana'ya, toju' ja xjan kub' tb'incha'na tu'n tq'ob'a.
18¡Ate Qman Dyos nkawin tejumajx! chechij toju' kb'itz. Tb'itz Mariy
19Tej kyb'jo'kx tkarwaj nimaqkawil aj Ejipt exqe' tchej toj ninnjab', tzaj ttzaqpi'n Qman Dyos a' kyib'aj, aye'tzunkye' aj Israel tzqiju' kyb'e tej kyb'jik'x toj ninnjab' ex e'jlajin.20Atzunte Mariy t-sanjelal Dyos, tanab' Aaron, tzaj tiq'i'n jun b'o's tanb'or, kykyaqiltzu'n qya eb'jo'k lpe ti'j, nche b'ixin ex nche chinb'anxi' ktanb'or.21Atzunte Mariy intoq xitb'itza'n kye:
Che b'itzan qe'ye' te ninb'ilte Qman Dyos, tu'nju' jun kanb'ab'l tb'anilxi'x tej kb'aj kyej tmulq'i'nju' chej exqe' xjal te q'oj toj ninnjab', chij. K'a a'
22Xitma'n Moyses kye aj Israel tu'n kyb'jik' b'et ttzi Ninnjab' Kyeq tb'i. Qu'mtzun xi' e'xa' toj chq'ajlaj Ẍur tb'i, oxe' q'ij eb'et toj, ex mixti' knet a' kyu'n.23Tetzunj kypon toju' tx'otx' Mara tb'i, min b'ent t-xi' kyk'wa'nju' a' atitoq atzu', qu'n majxtoq k'a. Qu'mtzun okkyq'o'n tb'iju' tx'otx' lu, Mara.
24Aye'tzu'n xjal e'aq'wi yolil ti'j Moyses, ex intoq kma'n: ¿Titi'tzu'n kxel qk'wa'n ja'lo? chechij.25Kub'santzun Moysestz twitz Qman Dyos, atzunte Qman Dyos tzaj tyek'u'n junwi' tze te. Ku'xtzun tq'o'n Moyses tze lu toj a', atzunju' a' kub' chi'yix.
Atzuntzu' e'kub'a' tq'o'n Qman Dyos toj joyb'ilkyi'j, ex e'tzaj q'o'n kawb'il ex nuk'b'il kye kse'n tu'me'l tu'n kyanq'ina'.26Ex tzaj tma'n kye: Qama kub' kyb'i'nju'ye' kxe'l nma'ne' kyeye', ayine' Dyos Manb'aj nche ajb'ene' weye', exqa makyb'inchaju'ye' nchin tzalaje' ti'j, tu'n kyxikyb'i'ne' nchaq'b'ile' ex tu'n kyjapun nkawb'ile' kyu'ne', lay tzaj nq'o'ne' yajb'il kyib'aje' kse'nqe' e'tzaj nq'o'ne' kyib'aj aj Ejipt, qu'n ayine' Dyos Manb'aj q'anal kyeye', chij.
27E'pontzuntz Elim ja ta'toq kab'lajoj (12) t-xiklil a' ex oxnaq lajoj (70) tqan tut, atzuntzu' e'kub'tena' jata'qe'ju' a' lu. Tzaj tq'o'n Dyos mana
1Kykyaqil aj Israel eb'je'tz toj Elim ex e'pon toj chq'ajlaj Sin, ju' ati kyxol Elim tuk'i'l Sinayi, toju' q'ij o'lajoj teju' tkab' xjaw kb'je'tzlenxi' Ejipt.2Kykyaqiltzunju' xjal e'jaw wulj ti'j Moyses ex ti'j Aaron toj chq'ajlaj.3Intoq kyma'n kye:
—¡Maswitlo b'a'n xqo' kyime' toj Ejipt tu'n Qman Dyos! Qu'n ate' chix intoq qokub' qeye' wal b'a'nxi'x ti'j junjun k'wil chib'j, aye'tzunkye' maqotzaj kyi'ne' toj chq'ajlaj naq tu'n qkyime' tu'n we'yaj qkyaqile', chechij.
4Tzajtzun tma'n Qman Dyos te Moyses:
—Ktzajel nq'o'ne' kywa twitz kya'j kse'n jb'al. Kykyaqiltzu'n xjal che elix b'uyilte atl junjun q'ij, o'kx kjawil kyb'u'yi'nju' kb'ajel kyu'n te junjun q'ij. Qu'n wajb'ile' tu'n nka'yinteye' alkye kxe'l nimanteju' nchaq'b'ile' ex alkye lay txitnima'n.5Tojtzu'n twaqaqi'n q'ij, naqa ẍe etz b'uyilteju' kwa kxe'l kyiq'i'n kyja, kjawil kb'u'yi'n kab'e' kyinju' kse'n injaw kb'u'yi'n atl junjun q'ij, chij te.
6Xitzun kyma'n Moyses ex Aaron kye aj Israel:
—K'elil kyniky'e' teju' qale ja'lo, qa a Qman Dyos setz q'inkyeye' toj Ejipt,7tetzun prim kkyla'ye' tipumal Qman Dyos, qu'n matxi' tb'i qa nche yoline' ti'j. Yajtzunqe', ¿alkyeqo'ye' toj kywitze' tu'nju' nche wuljneye' qi'je'? chechij.
8Xitma'ntl Moyses kye:
—Ktzajel q'o'n kychi'ye' teju' qale ja'lo tu'n Qman Dyos, ex ktzajel tq'o'n kywaye' nim te prim, qu'n matxi' tb'i Qman Dyos nche yoline' myab'a'n ti'j. ¿Alkyeqo'tzune' toj kywitze'? Mya qi'jqe' nche wulina'ye', ti'jku'te' Qman Dyos nche wulina'ye', chij.
9Xitzun tma'ntl Moyses te Aaron:
—Q'manxa kye kykyaqil aj Israel tu'n kytzaj lq'e twitz Qman Dyos, qu'n matxi' tb'iju' kyyol myab'a'n ti'j.10Tojtzu'n kmuj intoq yolin Aaron kye aj Israel, kykyaqil eb'ajx ka'yin toj chq'ajlaj, ex kub' tyek'u'n Qman Dyos tajwalil toj jun muj.11Tzajtzun yolin Qman Dyos te Moyses ex tma:
12—Matxi' nb'iju'ye' nkywuljne'n aj Israel. Yolintzuna kyuk'i'l ex q'manxa kye: Che ch'yol chib'je' ajtok qale, atzu'n te prim che wal wab'je' ex che nojele' b'a'nxi'x. K'eleltzun kyniky'tze' qa ayine' Dyos Manb'aj Kydyose'.
13Textzu'n qale lu eb'ju'l txqan tz'chin, ex kub' noj ti'jile kyja aj Israel kyu'n, atzu'n te prim b'aj noj twitz tx'otx' tu'n ta'l che'w ti'jileju' kyja.14Tetzunj tkub' naju' ta'l che'w, kyej q'ancha'lix txqan tb'anilxi'x naku'j txun che'w toju' chq'ajlaj.15Aye'tzu'n aj Israel tej kylonte, mixtoqnati' kyojtzqi'n, kyma kyxolx: ¿Ti'tzunte' lu? chechij. Atzunte Moyses xitma'n kye:
—Kywa kye'ye' lu te k'a'chb'il kyeye' saj tq'o'n Qman Dyos.16Ex a nuk'b'il ja'lu saj tq'o'n Qman Dyos: Kyiq'inktze' teyile junjun axi'x jni' nojqelan tu'n twante ex kse'nx kb'aje' toj kyjaye', kyiq'inktze' kab'e' malb'il te junjun, chij.
17Kyb'inchatzu'n aj Israel ikju'. Ate' junjun nim jawkyiq'i'n, atzun junjuntl naq ch'i'naq,18kse'nxju' malb'il kyejni q'ma'n; mya miwtjun b'aj tu'nju' jawtiq'i'n nim, ex miwtjun kanun teju' naqch'i'n jawtiq'i'n. Teyile junjun jawtiq'i'n kse'nx inojqelan te tu'n twante.
19Xitzun tma'ntl Moyses kye:
—Lalun kyej kyklo'ne' te juntl q'ij, chij.
20Ate'tzun junjun mixti' xikb'i'nju' tyol Moyses, qu'n kyej kyklo'n te juntl q'ij; atzunju' kyej kyklo'n, jawb'ent ẍchuq' toj ex kub' tzuwix. Atzunte Moyses tzaj ttx'u'jil kyi'j.
21Tkyaqiltzun prim teyile junjun njaw tb'u'yi'n kse'nxju' kb'ajel tu'n, qu'n aj tmoq'ti q'ij tkyaqil ja'lu inkub' niwj.22Tojtzunju' twaqaqi'n q'ij jaw kb'u'yi'n kab'e' kyinju', mujqa kyaje' malb'il teyile junjun; aye'tzu'n nejenel toju' tnam eb'ajx q'malte te Moyses,23atzunte Moyses xitma'n kye:
—Anatzun oje tma Qman Dyosu'. Najchi'j q'ij te ojb'il te ninb'ilte Qman Dyos. Aju' ati tu'n kb'inchanteye' kb'inchame' ja'lo, exju' ati tu'n ktzq'ajsanteye' ktzq'ajsame', atzunju' lay b'aj kyu'ne' kyk'u'nxe' te nachi'j, chij.
24Iktzu'n kse'nxju' tma Moyses kye, aju' min b'aj kyu'n kyej kyk'u'n te juntl q'ij, min kub' tzuwix ex min jawb'ent ẍchuq' toj.25Xitzun tma'n Moyses kye:
—Kwanxtzune' ja'lo, qu'n a q'iju' te ojb'il te ninb'ilte Qman Dyos. Qu'n mixti'te wab'j k'okyil yal kyu'ne' toj kojb'il te q'ij ja'lo.26Waqaq q'ij b'a'n tu'n tjaw kb'u'yi'ne', tojtzunju' twuqi'n q'ij mixti'te k'okyil yal kyu'ne', qu'n a q'iju' te ojb'il, chij.
27Ate'tzun junjun eb'je'x b'uyilte toju' twuqi'n q'ij ex mixti'te knet kyu'n.28Atzunte Qman Dyos tzaj tma'n te Moyses:
—¿Jtoj japunju' nchaq'b'ile' kyu'ne' exqe' nxnaq'tzb'ile'?29Kyximankupe'ye', ayine' Dyos Manb'aj, nxinq'o'ne' jun q'ij te ojb'il kyeye', qu'mtzun nxinq'o'ne' kywaye' te kab'e' q'ij toju' tqaqi'n q'ij.
Qu'mtzun teyile junjun ati tu'n tkub'ten toj tja ex mixti' tu'n tetz toju' twuqi'n q'ij, chi Qman Dyos.
30Aye'tzu'n xjal e'ojlan toju' twuqi'n q'ij.
31Aju' intoq jaw kyb'u'yi'n aj Israel okkyq'o'n tb'i, mana. Saq ka'yi'n kse'n tijajil kulantr ex majxtoq chi' kse'n muqin ch'i'li'n tuk'i'l ta'lkab'.
32Xitzun tma'n Moyses kye:
—A chaq'b'il ja'lu tu'n Qman Dyos: Kynojsanku'ye' kab'e' malb'il tu'n mana, ex kyk'u'nxe' te yek'b'il kyeju' kyyajajile' che itz'jel yajxi'tel, tu'ntzun kyka'yinteju' wab'j xxinq'o'ne' kyeye' toj chq'ajlaj tej ẍe etz wiq'i'ne' toj Ejipt, chi Qman Dyos, chij.
33Ex xitma'n te Aaron:
—Q'intza jun k'wil, q'onku'xa kab'e' mlon mana toj, q'onku'tzuntza twitz Qman Dyos, tu'ntzun t-xik'u'yit kyeju' qyajajil che ul itz'ji yajxi'tel, chij te.
34Ikytzu'n kse'nxju' tchaq' Qman Dyos te Moyses, kub' tq'o'n Aaron ju' k'wil twitzju' kax k'ub'lteju' yol kyejni b'entti'j, tu'n t-xik'u'yit.35Kab'naq (40) ab'q'i e'wan aj Israel ti'ju' mana ex kyej tu'n kwante tzmaxi'j kypon toju' tx'otx' najlqe' xjal toj; mujqa ttziju' nqach te Kanaan.36(Aju' komer tlajoji'n tnej te jun epa.) Etz a' toj pik (Nm 20.1-13)
1Kykyaqil aj Israel eb'jik' b'et toj chq'ajlaj Sin, ex xikljo'n kb'e ch'i'naq kxi' kse'nxju' tma Qman Dyos kye. Atzu' e'kub'a' ten toj tx'otx' Repidim; mixtoqtzunti' a' te kyk'wa'ju' tnam.2Qu'mtzun e'aq'wi q'ojil ti'j Moyses ex kma:
—¡Q'ontza qk'wa'ye' a'! chechij. Atzunte Moyses xittzaq'we'n:
—¿Tiqu'n inche wulinaye' wi'je'? ¿Titiqu'n inkub' kq'o'ne' joyb'ilti'j Qman Dyos? chij kye.
3Aye'tzunju' tnam intoq che k'wajti ex intoq che wulink ti'j Moyses. Intoq kma'n:
—¿Tiqu'n xqo etza' ti'na Ejipt? ¿Manoqx tu'nqkub' tb'yo'na tu'n k'waj kyuk'i'l qk'wale' ex e'qalune'? chechij.
4Atzunte Moyses kub'san twitz Qman Dyos ex tma:
—¿Titi' knse'ye' kyuk'i'lju' xjal lu? ¡Noq ch'i'naqxtl min chin kub'a' kyb'yo'ne' tu'n ab'j! chij.
5Atzunte Qman Dyos tzaj ttzaq'we'n te:
—Nejku'ya kywitzju' tnam lu ex k'lenqe'xa jte' tijwnaq kyxol aj Israel tuk'i'la. Iq'inxa ttzeya ajb'en tu'na junb'ilte nin a', kutxi'tzuntza.6Chin ayole' teya tib'aju' pik Oreb'. Ajtzun toktjuma'na pik, k'elitz a' toj te kyk'wa'ju' tnam, chij.
Tb'inchatzun Moysestz ikyju' kywitzju' tijwnaq kyxol aj Israel.7Oktzun tq'o'n tb'iju' najb'il lu, Merib'a, qu'n matxi'toq che b'ajwulju' aj Israel ti'j ex oktq'o'n tb'i Masa, tu'nju' kyjoyti'j Qman Dyos tej kymante: ¿Ma atitzunlo Qman Dyos quk'i'l mujqa mix-a'lo'? chechij. E'q'ojin aj Israel kyuk'i'l aj Amalek
8E' b'ajx amalek toj Repidim q'ojil kyuk'i'l aj Israel.9Xitzun tma'n Moyses te Joswe:
—Sk'onqe'ktza ichan ex kutxi'ya q'ojil kyuk'i'l amalek. Ayintzunwe' kchin jawixe' twi' witz najchi'j tuk'i'lju' ttze Dyos toj nq'ob'e', chij.
10Atzunte Joswe tb'incha kse'nxju' tchaq' Moyses te, etztzuntz q'ojil kyuk'i'l amalek. Aye'tzunkye Moyses, Aaron ex Ur e' jawx twi' witz.11Ajtjaw tiq'i'n Moyses tq'ob' aye' aj Israel intoq che kanb'an; ajtzun tkub' tiq'i'n, aye' aj Amalek nche kanb'an.12Intoqtzun che sikti tq'ob' Moyses, qu'mtzun tzaj kyiq'i'n jun ab'j tu'n tkub' qe Moyses tib'aj; aye'tzunkye' Aaron tuk'i'l Ur e'okten tzyulkye tq'ob' Moyses, junjun toj junjun ttx'u'k. Ikytzu'n tena' tq'ob' Moyses jawl tzmaxi'j tex q'ij.13Ex kub'kyi'j amalek tu'n Joswe tu'n k'uẍtx'e'nb'il.
14Tzajtzun tma'n Qman Dyos te Moyses:
—Tz'ib'anku'xa xb'aji lu toj jun u'j tu'n tajb'en te nab'ab'l; ex q'manxa te Joswe qa tkyaqilju' nab'ab'lte Amalek majx kb'el nxitu'ne', chij.
15Jawtb'incha'n Moyses jun q'olb'eb'l ex oktq'o'n tb'i: Ate Qman Dyos wipumale',16ex tma:
¡Kq'ojilte Qman Dyos kukxju' kyi'j wiqi'nwiq tyajajil Amalek! ¡tu'nju' matzaq'pon tq'ob' Amalek ti'j tkawb'il Qman Dyos! chij. Pon Jetro xb'etzalte Moyses
1Atzunte Jetro, ju' pale toj Madyan ex tji Moyses, tb'i tkyaqilju' ojetoq tb'incha Dyos te Moyses ex kye aj Israel ttanam, ex tb'i qa a Qman Dyos etzq'inkye toj Ejipt.2Ojetoqtzun txi' tchq'o'n Moyses t-xu'jil tja tji, exju' tji ojetoq kyej tiq'i'nju' tmyal3kyuk'i'lju' kab'e' tal. Kyerson tb'iju' jun, qu'n tma Moyses: Najchaq xjal qine' toju' tx'otx' min ojtzqi'n wu'ne' chij.4Atzu'n juntl Elyeser tb'i oktq'o'n, qu'n tma: Aju' Tdyos nmane' sonin weye', qu'n machin tkole' te tk'uẍtx'e'nb'il nimaqkawil aj Ejipt, chij.
5Atzunte Moyses atoqtzu' ta' kyuk'i'lju' ttanam toj chq'ajlaj nqayin tk'etzju' witz te Dyos, atzuntzu' xa' Jetro tuk'i'lju' t-xu'jil Moyses exqe' kab'e' tal.6Xitma'npun Jetro tq'umli te Moyses ikjalu:
—Ayine' Jetro tjiya, maqo ule' kyuk'i'lju' t-xu'jila ex kab'e' tk'wala ka'yilteya, chij.
7Atzunte Moyses tzaj k'lulteju' tji, kub' meje twitz majx kub'joqe, ex tej tjawe' oktma'tzi'n. Tetzunj tb'aj kyq'olb'e'nkyib' eb'ajx toju' tpach xb'alun.
8Atzuntzu' oka' ten Moyses tx'olb'alte te tkyaqilju' matxi'toq tb'incha Qman Dyos ti'ju' nimaqkawil aj Ejipt ex kyi'ju' aj Ejipt naqx tu'n kyklet aj Israel, ex xitma'n tkyaqilju' matxi'toq che ik'a' toj b'e exju' tu'me'l kse'n e'kleta' tu'n Qman Dyos.
9Tzalajtzun Jetro tu'nju' t-xtalb'il Qman Dyos matxi'toq tb'incha kye aj Israel tu'nju' e'tkol toj kyq'ob' aj Ejipt,10ex tma:
—Ajwalilxwit tb'i Qman Dyos, tu'nju' mache tkole' aj Israel tjaq'ju' kawb'il nimaqkawil aj Ejipt, ex mache tkole' toju' yajb'il,11ex toju' taq'wixil intoq kyb'incha'n kyeye'. Ja'lotzun matxi' qe nk'u'je' qa ate Qman Dyos nimxi'x toklen kyib'aj kykyaqil kydyos xjal, chij.
12Tzaj ti'n Jetro jun alu'mj ex jte' oyaj tu'n tkub' tz'e'yset te ninb'ilte Qman Dyos. Atzunte Aaron kyuk'i'l kykyaqilju' tijwnaq kyxol aj Israel eb'ajx wal tk'etz tji Moyses twitz Qman Dyos. B'jaw t-sk'o'n Moyses jte'tl ajkawil (Dt 1.9-18)
13Tojtzun juntl q'ij kub' qe Moyses ex b'aj q'ij tu'n, tu'n kyokx xjal twitz tu'n kynk'etju' q'oj ntzaj kyxol.
14Tetzunj tka'yinte Jetro tkyaqilju' intoq b'ajte Moyses kyuk'i'l tnam, xitma'n te:
—¿Titi' ntb'incha'na kyuk'i'lju' xjal lu? ¿Tiqu'ntzun noq o'kxa inuk'un kyxol ale'xu' xjal nche ayon xb'aj q'ij? chij.
15Atzunte Moyses xittzaq'we'n:
—Aye'na' xjal nche ul nk'etze' twitz Dyos tu'n tnk'et ti'ju' xitb'il kyxol.16Kse'n qa ntzaj jun myab'a'n kyxol, inche ul nk'etze' tu'ntzun nmanteye' alkye ati toj tu'me'l ex inche'x nchik'b'a'ne' tkawb'il ex t-xnaq'tzb'il Dyos kye, chij.
17Atzunte Jetro ju' tji xitma'n te:
—Mya ttxolilju' ntb'incha'na,18qu'n insiktiya ex inche siktiju' xjal nche ul tuk'i'la. Nimxi'xju' aq'untl teya, ex lay b'ajb'ent tu'na tjunala.19Qu'mtzun kxe'l nma'n jun tnab'la, awttzun Dyos tz'oninteya. Kutoka yolil kyi'ju' tnam twitz Dyos, tu'ntzun kykub' tnk'u'nju' xitb'il ati kyxol.20Xnaq'tzanqe'xa kawb'il ex xnaq'tzb'il kye, ex chik'b'anxa kye kse'n tu'me'l tu'n kyanq'ina' ex titi' kxe'l kyb'incha'n.21Ex a b'inchamju'ya ja'lo, sk'onqe'ktza ichan kyxol tnam, aye' ati tchiylal Dyos kye ex ax che yolin, aye' ichan mya jamjonqe'. Teyiletzun junjun q'onxa kyoklen te nejenel kyib'aj junjun tnej xjal te kab'k'al lajnaqchaq (1,000), ex junjuntl kyib'aj jo'naq (100), ex junjuntl kyib'aj kab'naqlajoj (50), ex junjuntl kyib'aj lajoj.
22Aye'tzunkye che kawilju' tib'aju' tnam tkyaqil q'ij, o'kxtzunju' nimaq ilxi'x ktzajel kyiq'i'n twitza, aye'tzu'n myaxi'x nimaq aye'xkye che nk'ulte. Che oniltzuntz ti'ja toju' aq'untl.23Qama tb'inchaju'ya lu exqa iku' saj tma'n Dyos teya, laytzun siktitzu'ya, exqe' xjal che tzalajel ajtanjkyi'j kyja, chi Jetro te.
24Xi'tzun tb'i'n Moyses nab'l tu'n tji ex tb'incha tkyaqilju' b'ajx q'ma'n te.25Eb'jaw t-sk'o'n Moyses jte' ichan ati kynab'l kyxol aj Israel ex xitq'o'n kyoklen tu'n kynuk'un kyib'aj junjun tnej xjal te kab'k'al lajnaq (1,000), junjuntl kyib'aj jo'naq (100), junjuntl kyib'aj kab'naqlajoj (50) ex junjuntl kyib'aj lajoj.26Aye'toqtzunkye inche kawinju' tib'aju' tnam tkyaqil q'ij; tkyaqilju' ti'xti' ch'i'n kyoklen aye'xkye nche kub'nk'unkye, aye'tzu'n ch'uẍqe'xi'x inxikyiq'i'n twitz Moyses.27Yajxi'tzuntel kypa'kyib' Moyses tuk'i'lju' tji, ex anjti'ju' tji toj ttanam. E'pon aj Israel Sinayi
1E'pon aj Israel toju' chq'ajlaj Sinayi, toj toxi'n xjaw kyb'je'tzlen Ejipt.2Tej kyb'je'tz toj Repidim e'pon toj chq'ajlaj Sinayi, atzuntzu' e'kub'tena' nqayin tk'etzju' witz.3Jaxtzun Moyses twitz Dyos, tzaj txko'n tu'n Qman Dyos tzmaxtzu' twi' witz ex tzaj tma'n te:
—Q'manqe'xa yol lu kye tyajajil Jakob', aye' aj Israel:4kyilju'ye' nb'inchaye' kyi'j aj Ejipt, ex kse'n ẍe ula' wiq'ina'ye' nk'etze', mache tzaj wiq'i'ne' naku'j tib'aj t-xik' t'iw.5Qu'mtzun, qama chinx kyb'i'ne' toj tkyaqil exqa ma japunju' nyole' kyu'ne' kyej b'entti'j kyuk'i'le', che okyiltzuntze' te ntaname' sk'o'n kyxol txqantl tnam, qu'n weye' tkyaqilju' tx'otx'.6Che okyil nq'o'ne' te jun k'loj pale, jun tnam xjansa'n nwitze', chiku'ya kye aj Israel, chij.
7Tzajtzun Moyses e'tzaj ttxko'n tijwnaq kyxolju' tnam ex b'ajx tma'n kye tkyaqilju' tchaq' Qman Dyos te.8Kykyaqiltzu'n aj Israel xikytzaq'we'n junx:
—Kqb'incha'ye' tkyaqilju' xtchaq' Qman Dyos, chechij.
Xi'tzun Moyses q'malteju' kytzaq'web'l tnam te Qman Dyos,9atzunte Qman Dyos tzaj tma'n te:
—Chin ule' tk'etza toj jun tnej muj jupli tu'ntzun kyb'inte xjal ajnyoline' tuk'i'la ex tu'n tokqexi'x kyk'u'j ti'ja, chij.
Atzunte Moyses xitma'n jumajtlju' kytzaq'web'l tnam te Qman Dyos.10Atzunte Qman Dyos tzaj tma'n te:
—Kutxi'ya ex q'manxa kye tnam tu'n kyxjansantekyib' ja'lo ex najchi'j, ex tu'n kytx'jonte kyxb'alun,11ex tu'n kyb'inchante kyib' te kab'j, qu'n chin ku'pumele' ayine' Dyos Manb'aj kab'j twi' witz Sinayi kywitzku'ju' tnam.12Q'onku'ya nqach ti'jileju' witz tu'ntzun lalun che jatzju' xjal, ex q'manxa kye tu'n lalun che jatz twi' witz, ex tu'n lalun che oklq'e tk'etzju' tnaqachil, qu'n alkye matz'oklq'e kkyimel.13Ex mix-a'lo' jun k'aq'pomil tq'ob' ti'j, qu'n a kb'inchetilju', kb'ajel xoyit toj ab'j mujqa tuk'i'l talsmaj. Alkyexku' jun xjal mujqa jun alu'mj, ati tu'n tkub' b'yet. Tzmaxi'tzunj aj tq'ajtiju' tuk'a rit, b'a'ntzun kyjaxtzu'ye' twi' witz, chi Dyos.
14Ku'tztzun Moyses twi' witz q'malte kyeju' tnam tu'n kyxjansantekyib'. B'ajtzun kytx'jo'n kyib'ju' xjal,15ex xitma'n Moyses kye:
—Kyb'incham kyib'e' te kab'j, ex kyiqam ti'je', chij.
16Tetzunj qsqix toj toxi'n q'ij kub' jupe' jun tnej muj twi' witz, e'tzaj q'ankyaq inxi'xtoq che q'ajti. Ex jaw q'ajti tq'ojq'ojel chun kuw, kykyaqiltzu'n tnam eb'jaw lu'lun tu'n kyxob'el.17Atzunte Moyses eb'je'tz tiq'i'n tnam ti'jxi' kynajb'il tu'n kyxi' k'lulte Qman Dyos, e'kub'tentzuntz t-xeju' witz.18Tkyaqiltzu'n witz Sinayi intoq sb'en, qu'n matxi'toq kb'u'l Qman Dyos tib'aj naku'j q'aq'. Ikytoq sib'ju' njaw kse'n t-sb'el jun chuj, tkyaqiltzu'n witz inxi'xtoq lu'lun b'a'nxi'x.19Ljo'ntoq kyq'ajtixi'xtlju' kyq'ojq'ojel chun kuw, atzunte Moyses intoq yolin tuk'i'l Dyos ex intoq tzaj ttzaq'we'n Dyos toj q'ankyaq.
20Kb'u'l Qman Dyos tojxi'x twi'ju' witz Sinayi ex tzaj tma'n te Moyses tu'n tjawx tk'etz ja tu'me'l ta'toq. Jawxtzun Moysestzu',21ex tman Qman Dyos te:
—Kutku'xa ex q'manxa kye kykyaqil xjal tu'n lalun che b'ji'k'tz tib'aju' nqach ex tu'n lalun chin tzaj kyka'yine' qu'n jaku' myanim che kyim.22Exqepe' pale nche tzaj lq'e nk'etze', ilti'j tu'n kyxjansantekyib', tu'ntzun lalun che b'aj nk'ixb'sa'ne', chij.
23Xitzun tma'n Moyses te Qman Dyos:
—Lay che jatzkye' xjal twi' witz Sinayi, qu'n ojena' tzaj tma'na qeye' tu'n tkub' qq'o'ne' jun nqach ti'jile ex tu'n t-xiqma'ne' qa xjanju' witz, chij.
24Atzunte Qman Dyos tzaj tma'ntl te:
—Kutku'xa, atzun jatza tuk'i'l Aaron. Aye'tzunkye' pale exqe' xjal mixti' tu'n kyb'ji'k'tz tib'aju' nqach tu'n kyjatz jata' qine', tu'ntzun lalun che kub' nxitu'ne', chij.
25Ku'tztzun Moysestz twi' witz ex b'ajx tma'n ja'lu kye aj Israel. Lajoj chaq'b'il (Dt 5.1-21)
1Tzaj yolin Dyos ex tma tkyaqilju' yol lu:
2Ayinweju'ye' Dyos Manb'aj, inetz q'inkyeye' toj Ejipt jata'qe'toqe' te k'a'yi'nmajin.
3Mixti' tu'n tkub' kyq'o'n txqantl kydyose' nwitze'.
4Lalun che kub' kyb'incha'ne' witzleb', expe' kyilb'ilalju' ate' twitz kya'j ex kse'nqe' ate' twitz tx'otx', mujqa kyilb'ilalju' ate' toj a' tjaq'xi' tx'otx'.5Lalun che kub'mejeye' tu'n kykub' joqeye' kywitz ex lalun che nimane' kye, qu'n ayinweju'ye' Dyos Manb'aj kyib'aje' toknwitze' kyi'je', ex inq'o'ne' tz'e'ysb'il witzb'aj kyib'aju' manb'aj nche el ik'un weye', ex kpomel kanun kyi'j kyk'wal, kyi'j kychman ex kyk'wal kychman.6Aye'tzu'n nchin kyk'u'jla'ne' ex nkyb'incha'nju' nchaq'b'ile', inlaq nk'u'je' kyi'j ex kyi'ju' kyyajajil che ul itz'j yajxi'tel.
7Lalun tz'ajb'enju' nb'iye' kyu'ne' tib'aj mya ax, ayine' Dyos Manb'aj, qu'n kb'el tz'e'yset twitzju' xjal ntzaj tna'n nb'iye' tib'aj mya ax.
8Kyk'u'nku'ye' q'ij te ojb'il qu'n xjan toklen.9Qaq q'ij che aq'unale', ex kyb'inchame' tkyaqilju' ati tu'n kyb'inchanteye' kyoju' q'ij lu.10Atzu'n twuqi'n q'ij ojb'ilte' tu'n tok te ninb'ilweye' ayine' Dyos Manb'aj. Mixti' tu'n kyb'inchanteye' jun aq'untl toju' q'ij lu, exqe' kyk'wale', kymyale', kymajine' ichan ex qya lq'o'nqe' kyu'ne', e'kyalu'ne', ex ikxju' najchaq xjal najli toj kytaname'.11Qu'n toj waqaq q'ij b'aja' nb'incha'ne' kya'j, tx'otx', ninnjab' ex tkyaqilju' ati kyoj, ayine' Dyos Manb'aj, tojtzun twuqi'n q'ij inojlane'. Qu'mtzun ky'i'wla'nju' q'ij te ojb'il ex xjansa'n wu'ne'.
12Che nimanqe'ye' kye kymane' ex kytxuye', tu'ntzun kyanq'ine' nimtoj twitzju' tx'otx' kxe'l nq'o'ne' kyeye', ayine' Dyos Manb'aj.
13Lalun che b'yon xjale'.
14Lalun che ajpajine' tuk'i'l t-xu'jil juntl.
15Lalun che elq'ane'.
16Lalun che okye' tziyal tuk'i'l chajyolil ti'j kywnaqile'.
17Lalun pon kyk'u'je' ti'j tja xjal: lalun pon kyk'u'je' ti'j t-xu'jil, ti'j tmajen ichan ex qya, ti'j twakyix, ti'j tb'ur ex ti'j alkyexku' ti'xti' ati te, chi Qman Dyos. Ten tchiylal Dyos kye aj Israel (Dt 5.22-33)
18Kykyaqil aj Israel kyilju' witz inxi'xtoq sb'en exju' q'ankyaq inxi'xtoq tinun, ex kyb'iju' tq'ojq'ojel chun; eb'ajxob' b'a'nxi'x ex eb'je'l lq'e najchaq.19Qu'mtzun xikyma'n te Moyses ikjalu:
—Ate b'a'n aya ktzajel q'mante qeye', kxel qb'i'nqe', qu'n qa aku' Dyos saj yolin qeye' jaku' qokyime', chechij.
20Atzunte Moyses xittzaq'we'n kye:
—Lalun che xob'e', qu'n matzul te Dyos yek'ulte tipumal kyeye' tu'ntzun tten tchiylal kyi'je' ex tu'n lalun che b'inchantl ile', chij.
21Tetzunj b'je'lniqe' lq'eju' tnam ti'ju' witz, xi' lq'e Moyses tk'etzju' muj jupli jatoq ta' Dyos. Kawb'il ti'j q'olb'eb'l
22Atzunte Qman Dyos tma te Moyses:
Q'manxa kye aj Israel: Makyilku'ye' tej ẍin yoline' kyeye' tzmax toj kya'j.23Lalun che kub' kyb'incha'ne' witzileb' q'anpwaq mujqa saqpwaq tu'nwt kyk'ulune' kye kse'n nkyb'incha'ne' weye'.24Kyb'inchanku'ye' jun tx'otx' q'olb'eb'l, tib'ajtzun kb'ela' kytz'e'ysa'ne' rit ex wakx te chojb'il ex k'ok'sb'il, tu'n kyb'inchante kyib'e' wuk'i'le'. Chin ule' ex che b'el nky'i'wla'ne' toj junjun najb'il ja wajb'ila'ye' tu'n ttzaj na'nju' nb'iye'.25Qatzun makub' kyb'incha'ne' jun ab'j q'olb'eb'l weye', lalun b'aj kyjso'ne' twitzju' ab'j aj tajb'en kyu'ne', qu'n qama b'aj kyjso'ne' tu'n k'uxb'il, myab'a'ntzuntz tu'n tajb'en te q'olb'eb'l.26Ajtzun tkub' kyb'incha'ne' q'olb'eb'l weye' lay tz'ok tpeta'nil, kse'nku'tzun aj kyjaxe' lay q'ancha'lin kychib'jile' ktxu'n tu'n kyxb'alune', chiku'ya kye, chi Dyos. Kawb'il kyi'j lq'o'n majin (Dt 15.12-18)
1Aye' kawb'il ja'lu chexe'l tq'o'na kye:
2Qama tloq'a jun tmajina aj Eb'rey, waqaq ab'q'i k'aq'unal tuk'i'la, tojtzu'n twuqi'n ab'q'i kxe'l ttzaqpi'na ex mixti' tu'n tchjonte tzaqpib'lte.3Qa tjunal xpon, kxe'l tzaqpet tjunal; qatzun atitoq t-xu'jil, kykab'il che kxe'l tzaqpet.4Qatzun aju' xjal xlq'onte sokjyonte t-xu'jil exqa mache ul kyk'wal tuk'i'l, q'a mujqa txin, che kjelju' qya kyuk'i'lxi' tal tk'etzju' lq'olte, atzunte kxe'l tzaqpet tjunal.5Qatzun min xtaju' majin tu'n t-xitzaqpet noq tu'ntpaj ntk'u'jla'n t-xu'jil, e'tk'wal exju' lq'olte.6Kxelq'i'ntzuntz twitz Dyos tu'n xjal lq'olte, k'elex t-xopq'i'n t-ẍkyin tu'n jun b'aq ttzija. Kjeltzuntz te tmajin lq'o'n tejumajx, chiku'ya kye.
7Qa ati jun ichan matxi tk'a'yi'n tmyal te majin, aju' txin lu mixti' tzaqpib'l te kse'nkye majin q'aqe'.8Qatzun aju' xlq'onte min tajb'il tu'n tmje tuk'i'lju' txin, qu'n min nkub' toj twitz, ati tu'n tq'onte anb'il tu'n tkolpinjtz; maskye matz'el tik'u'n, lay b'ent t-xitk'a'yi'n te jun mya aj Eb'rey.9Qatzun matz'ok tq'o'n te t-xu'jil tk'wal, ati tu'n toktq'o'n naku'j tmyal toj tja.10Extzunqa a xmje tuk'i'l exqa matjoy juntl t-xu'jil, mixti' tu'n tel tik'u'nju' tnejel t-xu'jil, ati tu'n tk'a'chante ex tu'n tktxunte kse'nxju' toklen te xu'jilb'aj.11Qatzun min xtb'inchaju' oxe' tu'me'l lu, ati tu'n t-xitzaqpetju' txin, ex mixti' tu'n tchjonte tzaqpib'lte, chiku'ya kye. Kawb'il kyi'j b'inchb'en myab'a'n
12Alkyete mak'ixb'sante juntl exqa majx xkyim tu'n, kb'el b'yet.13Qatzun makub' tb'yo'n ex myate xima'n tu'n, exqa axtoq tajb'il Dyos tu'n tkyimu' xjal lu, kxe'l nma'ne' teya yajxi'tel ja kxe'la' kloltib'.14Qatzun tuk'i'l tq'oj xkub'a' tb'yo'n, ilti'j ktjya'ya tu'n tkub'yet maskye matz'okx tewa'ntib' ti'ju' q'olb'eb'l weye'.
15Alkye mab'ujun te tman mujqa te ttxu, kb'el b'yet.
16Alkyete matxi telq'a'n jun xjal, qa matxi'toq t-xitk'a'yi'n mujqa atix tk'etz, kb'el b'yet, chiku'ya kye.
17Alkyete matz'okten wulilte ttxu mujqa tman, kb'el b'yet.
18Qama che jawb'ujun kab'e' xjal, exqa mak'ixb'i jun tu'n ab'j, mujqa tu'n tq'ob'ju' juntl, exqa min xkyim, naq o'kx makub' twitz kuẍb'il tu'nju' k'ixb'len,19extzun qama jaw we'tlju' xjal maskye chab'a' saq' elitz ti'j ttze, lay kub'yetju' xjal xb'ujun, naq o'kx ati tu'n tchjonte q'a'nb'ilte ex te tq'iju' xjal xk'ixb'i.20Qa ati jun matz'okten jumalte tmajen ichan mujqa qya toj tze exqa majx makyim tu'n, ati tu'n tchjonteju' til.21Qatzun min xkyimu' majen ajtb'aj jun q'ij, mujqa kab'e' q'ij, lay kub' tz'e'yset twitzju' tajaw qu'n tloq'ojna', chiku'ya kye.22Qama che jawb'ujun kab'e' ichan exqa myanim xk'ixb'i jun qya ch'onwi' kyu'n, exqa majx matz'el talju' qya lu exqa o'kx xb'ajiju'. Aju' ati tpaj ati tu'n tchjonte til kse'nxju' matqani tchmilju' qya exqa tu'me'l toj kywitzju' ajkawil.23Qatzun makyimu' qya, ex ikxte kb'el b'yet.24K'eletz witzb'aj tu'ntpaj witzb'aj, witzteyj tu'ntpaj witzteyj, q'ob'aj tu'ntpaj q'ob'aj, qanb'aj tu'ntpaj qanb'aj,25tz'e'ysb'il tu'ntpaj tz'e'ysa'n, k'ixb'sab'l tu'ntpaj k'ixb'len, juma'n tu'ntpaj junb'en, chiku'ya kye.
26Qa ati jun xjal matz'oktjuma'n twitzju' tmajen ichan mujqa qya exqa makyej b'o'lju' twitz tu'n, ati tu'n txi' ttzaqpi'n te t-xelju' twitz.27Qatzun jun twitzte setz tu'n, ati tu'n txi' ttzaqpi'n te t-xelju' twitzte, chiku'ya kye. Kawb'il qati b'yonkamik
28Qa ati jun wakx matokon te jun ichan mujqa te jun qya, extzun qama kyim tu'n, ilti'j tu'n tkub' b'yetju' wakx toj ab'j ex mixti' tu'n tch'yetju' tchib'jil, ex lay kub' tz'e'yset twitzju' tajaw wakx.29Qatzun mya'l tokonju' wakx exqa makub' tb'yo'n jun xjal, aju' wakx lu ati tu'n tkub' b'yet toj ab'j tuk'i'lxi' tajaw, qu'n ojtzqi'n tu'n qa kuw tokonju' twakyix, extzun min nxitka'yi'n.30Qatzun matxi' qani'n chojb'il til tu'n tklet tchwinqlal, ati tu'n tchjonte tkyaqilju' kxe'l qani'n te.31Ax kawb'il ja'lu k'ajb'el qama tz'okttoko'n wakx jun q'a mo jun txin.32Qatzun jun majin ichan mujqa qya xb'aj toko'n tu'nju' wakx, ati tu'n tkub' b'yetju' wakx toj ab'j, extzun kxe'l chjet junaq lajoj (30) saqpwaq te twi'ju' majen teju' tajaw, chiku'ya kye.
33Qa ati jun xjal ati t-xoch mujqa ma ku'x tb'incha'n jun xoch, extzun minti' xkyej tq'o'n tjpel, exqa ma ku'x tz'aq jun wakx mujqa jun b'ur toj,34aju' tajaw xoch ati tu'n t-xitchjo'n twi'ju' alu'mj teju' tajaw. Atzunju' alu'mj xku'x tz'aq kjel teju' tajaw xoch, chiku'ya kye.35Qama jaw tokon twakyix jun xjal tuk'i'l twakyix juntl, exqa makyim tu'n, ati tu'n t-xik'ayitju' wakx xb'iyun. Atzunju' twi' kb'el kyaq'pu'n kyxol kykab'il, ex kb'el kyaq'pu'n tchib'jilju' wakx xkyim.36Qatzun ojtzqi'ntlju' wakx qa mya'l tokon, extzun min nxi'tk'u'ju' tajaw ti'j, ati tu'n t-xitq'o'n juntl wakx te t-xelju' xkyim, atzu'n wakx xkyim kjel te, chiku'ya kye. Kawb'il tu'n tchjetu' mab'o'lj kye xjal
1Qa ati jun xjal matxi telq'an jun wakx mujqa jun rit, ex kxe'l tk'a'yi'n mujqa kb'el tb'yo'n, ati tu'n t-xi' tq'o'n jwe' wakx te t-xel jun wakx ex kyaje' rit te t-xel jun rit.
2Qa matz'elyal jun xjal in nelq'an toj qonik'an, exqa mab'aj juma'n ex majx makyim, aja'lu mya b'yojwnaqi'n.3Qatzun q'ijl xkub' b'yo'nju' eleq', b'yojwnaqi'ntzuntz.
Alkyete matz'elq'an, ati tu'n t-xi' tchjo'n jni'ju' setz telq'a'n, extzunqa mixti' tmedi tu'n t-xi' tchjo'n, aku'te kxel k'ayit tu'n tchjetju' teleq', chiku'ya kye.
4Qatzun matz'elyalju' alu'mj ti'j qa itz'x, ati tu'n tchjonte twi' kab'e', maskye jun rit, jun wakx, mujqa jun b'ur.
5Qa ati jun xjal mache okx ttzaqpi'nju' talu'n tu'n kwan toj ttx'otx' mujqa tawal juntl xjal, ati tu'n t-xi' tchjo'nju' xb'aj yajti tu'nju' tb'anil tawal awa'n tu'n.
6Qa ati jun xjal makub' tq'o'n tq'aq' exju' q'aq' matxi' lik'puj toj ttx'otx' ex mab'aju' awal b'u'yi'ntl mujqa aju' na'mx tb'uyit tu'n, aju' xjal lu ati tu'n tchjonteju' awal mujqa k'ul xb'aj patj tu'n q'aq', chiku'ya kye.
7Qa ati jun xjal matxi' oqxenil tmedi mujqa juntl ti'xti' nim toklen tja juntl xjal, extzun qama tz'etz elq'a'n tjaju' xjal lu, aju' eleq' ati tu'n tchjonte kab'e' kyinju' qama tz'el yal ti'j.8Qatzun minti' sel yalju' eleq', aju' tajaw ja ati tu'n ttzaj iq'et tu'n ttziyante nwitze' qa mixti' xkub' ttzyu'nju' oqxenj kyejni q'o'n tk'etz.
9Qa ati jun xjal matz'oktetza'n jun wakx mujqa jun b'ur, mujqa jun rit, mujqa jun xb'alun, mujqa juntl ti'xti' xini tz'aq, exqa ati jun xq'mante: wewe'lu qa chij, che kxe'l q'et kab'e' xjal lu twitz Dyos. Atzunju' k'elilyal toj til ati tu'n tchjonte kab'e' kyinju' teju' juntl, chiku'ya kye.
10Qa ati jun xjal matxi toqxena'n jun twakyix mujqa jun tb'ur, mujqa jun trit te juntl xjal, mujqa alkyexku' juntl alu'mj, extzun aju' alu'mj lu makyim mujqa mak'ixb'i, mujqa matxi' elq'a'n, extzunqa mix-a'lo' xka'yinte,11aju' xjal lu ati tu'n ttziyante nwitze' ayine' Dyos Manb'aj teju' tajaw alu'mj qa myate xkub' tzyunteju' alu'mj kyejni oqxeni'n tja. Atzu'n tajaw alu'mj kxe'l toksla'nju' tyol, laytzun tchojtzu'.12Qatzun matil tej sex elq'a'nju' alu'mj, ati tu'n t-xi' tchjo'n teju' tajaw.13Qatzun mab'aju' alu'mj tu'n jun txkup, aju' tajaw ja ati tu'n ttzaj tiq'i'n txkyejb'le'nju' tchib'en txkup qa ax tu'ntzun lalun tchoj.
14Qa ati jun xjal mamajinan jun alu'mj, qatzun makyimju' alu'mj lu mujqa mak'ixb'i ex min xtilju' tajaw, aju' xxi' majinante ati tu'n tchjonte.15Qatzun matz'ilwiju' alu'mj tu'n tajaw, aju' majenalte lay tchoj, noq o'kxju' majinb'ilte ktq'a', chiku'ya kye. Kawb'il ti'j tu'me'l chwinqlal ex ti'j okslab'l
16Qa ati jun ichan matz'ok t-xmoxi'n jun txin tuk'i'l sb'ub'l, ex aju' txin lu b'ajxa' txa' tzyu'na'ti'j tu'n ichan ex mixti' b'entniti'j tmjeb'le'n, extzun aju' ichan makub' tyaju'nju' txin, ati tu'n tmje tuk'i'l ex tu'n tq'onteju' oyaj kse'nxju' nb'inchet tu'n jun ichan ajtmje.17Qatzun minti' xtaju' manb'aj tu'n t-xi' tq'o'nju' tmyal te t-xu'jil, aju' ichan ilti'j tu'n t-xi' tq'o'nju' oyaj kse'nxju' in b'inchet ti'j tmjeb'le'n jun txin b'ajxa' txa' tzyu'nti'j tu'n ichan.
18Mixti' tu'n tkyaj anq'in jun qya ajpkab'.
19Qa ati jun xjal ma ajpajin tuk'i'l jun alu'mj ati tu'n tkub' b'yet.
20Qa ati jun xjalxi' nxa' tq'o'na' chojb'il kywitz txqantl dyos ex myatzu' nwitze' ayine' Dyos Manb'aj, ati tu'n tkub' b'yet.
21Lalun che oktene' yajulkyeju' xjal te junxi'tl tx'otx', b'a'nku' kyilwi kyu'ne', qu'n ex e'okkye' te najchaq xjal tej ẍetene' Ejipt, chiku'ya kye.
22Ex b'a'nku' kyilwiju' qya kyimni kychmil exqe' meb'a kyu'ne',23qu'n qa lab' kyilwi kyu'ne' exqa mache kub'san nwitze', ayinku'ye' chin onilkye,24ex tuk'i'l ntx'u'jile' kche b'ajele' tu'n k'uẍtx'e'nb'il wu'ne'. Che kjeltzun kxu'jiltze' kyimni kychmil ex kyk'wale' te meb'a.
25Qa ati jun xjal prow toj ntaname' najli tuk'i'la exqa maq'on mediya ch'ex te, lalun tz'oka kuw te kse'n jun xjal q'ol medi ch'ex, ex lalun tqaniya tub'chil te.26Exqa aju' xjal lu makyej tq'o'nju' t-xb'alun prent ti'ju' tmediya, anjsanxa te ajtex q'ij,27qu'n o'kx t-xb'alunju' ati tu'n tktxuntetib' te che'w. Qu'n qatzun minti', ¿titi' k'ajb'el te aj t-xi' wtal? Qatzun matqani o'nb'il weye', kwoniye', qu'n inq'aq'anwe' nk'u'j, chiku'ya kye.
28Lalun tz'ok tq'o'na ntx'u'jile' ayine' Dyos Manb'aj ex lalun kub' tili'nju'ya inkawin toj ttanama.
29Ktzajel ti'na lwiy tkyaqilju' tnejel twitz tawala weye', exju' tnejel ta'l ub'a.
Ktzajel tq'o'nju'ya tnejel tk'wala weye',30ex ikxju' tnejel tal twakyixa ex tnejel kyal trita. Naq wuq q'ij tu'n kten tk'etz ktxu kyitz'jlenxi', tojtzunju' twajxaqi'n q'ij che ktzajel tq'o'na weye'.
31Ati tu'n kyoke' xjansa'n kyib'e' nwitze', lalun txi' kych'yo'ne' tchib'jilju' alu'mj b'ajni tzaqu'n kyu'n tojk'ul txkup toj kojb'il; kq'onxe' te kychi' tx'yan, chiku'ya kye. Kawb'il tu'n tb'inchet tnik'alilti'j
1Lalun tma jun ti'xti'ya mya ax, ex lalun muje ttziya tuk'i'lju' b'inchal myab'a'n tu'n toka tziyal ti'j jun ti'xti' mya ax.
2Lalun tb'inchaya taq'wix kse'n nkyb'incha'n kykyaqil xjal.
Qa matz'oka toj xjel twitz ley, lalun taq'tib'a kyuk'i'lju' nim txqan kb'aj inche q'mante mya ax.3Ex mixti' tu'n tkolona ti'ju' prow qa ati til.
4Qa matz'elyal twakyixju' tajq'oja tu'na mujqa tb'ur xini tz'aq, q'a'ka te.5Oninxju'ya xjal inel ik'unteya; qama txi' tka'yina makub' tz'aqju' tchej tjaq' tiqatz, o'ni'ka tu'n tel poq'itju' tiqatz, chiku'ya kye.
6Lalun kub' tewa'nju'ya ley tib'aj toklenju' prow.
7Pa'mil tib'a ti'ju' chajyolil ex lalun tchaq'a tu'n tkub' b'yetju' xjal mixti' til, qu'n lay chin kolonwe' ti'ju' xjal ati til.
8Lalun tk'ama medi tib'aj jun ti'xti' mya ax, qu'n tu'nju' medi lu inche txalpuj xjal exqe'ju' mixti' kyil inche b'o'lj tu'n.
9Lalun che kub' tyaju'na najchaq xjal, qu'n ex mache tenkye' te najchaq xjal toj Ejipt, ex matxi' tzik' kywitze' ti'j kse'n nqo ten toj junxi'tl tnam, chiku'ya kye. Ojb'il ilxi'xti'j
10K'awal waqaq ab'q'iya toju' ttx'otx'a ex kjawil tb'u'yi'na tawala twitz,11tojtzunju' twuqi'n ab'q'i lay tz'awana twitz: q'onkja tu'n tojlanju' tx'otx', tu'ntzun kwanju' prow twitz, extzunju' lay jaw b'aj kyu'n, tu'n kwanju' tojk'ul txkup ti'j. Ex ikx b'inchamju'ya kyi'ju' ttx'otx'a ja awa'nqe'ya' tqan lob'j ub'a ex olib'o.
12B'inchama toj waqaq q'ij tkyaqilju' ati tu'n tb'inchanteya, tojtzunju' twuqi'n q'ij k'ojlala tu'ntzun kyojlanju' tcheja ex twakyixa, ex tu'n tokjumajtl kyipumalju' tmajena lq'o'nqe' tu'na exqe'ju' xjal te junxi'tl tx'otx'.
13Japunxtzun kyu'ne' tkyaqilju' xb'aj nma'ne' kyeye', lalun che k'ulune' kye txqantl dyos, ex mixti' tu'n ttzaj kna'ne' kb'i, chiku'ya kye. Oxe' ninq'ij nimaq kyoklen (Ex 34.18-26; Dt 16.1-17)
14Ik'sanku'ya ninq'ij te ninb'ilweye' oxmaj toj jun ab'q'i.15Ik'sama tq'ij wab'j mixti' ttx'amal kse'nx oje nchaq'e' teya, wuq q'ij kwal wab'ja mixti' ttx'amal. Aju' tajlal xjaw q'ma'ntl aju' t-xjawil Ab'ib', qu'n a xjawju' tej kyb'je'tze' Ejipt. Ex mix-a'lo' tu'n tul nk'etze' mixwitti' iq'i'n tu'n.
16Ex ik'sanku'ya tq'ij twitz awal, aju' tnejel twitz tawala soktawa'na toj kojb'il, ex ik'sanku'ya tq'ij twitz awal ajtjapun ab'q'i, ajtjaw tb'u'yi'na twitz tawala tkyaqilju' xini tawa'na.
17Kykyaqil ichan ati tu'n kyul oxmaj toj ab'q'i nwitze' ayine' Dyos Manb'aj.
18Ajttzaj tq'o'na alu'mj te chojb'il weye', lalun tzaj tq'o'na tchk'el junx tuk'i'lju' wab'j mixti' ttx'amal, ex lalun kyej tk'u'nju'ya t-seb'il te juntl q'ij.
19Ati tu'n t-xiti'na tnejel twitz tawala tb'anilxi'x toj njaye' ayine' Dyos Manb'aj.
Mixti' tu'n tku'x ttzq'ajsa'na tchib'jil tal chib' toju' ta'l timi'ẍ ttxu, chiku'ya kye. Tanjl Qman Dyos
20Kxe'l nchq'o'ne' wanjle' twitza xq'uqilteya toj b'e, tu'ntzun t-xi' iq'i'na tu'n toju' najb'il b'incha'ntl wu'ne' teya.21Lalun tz'el tpa'ntib'a ti'j; b'inxju'ya kxe'l tma'n teya ex lalun kub' tpi'ssa'n tib'a, qu'n tkyaqil intb'incha'n toj nb'iye', ex lay kub' tnajsa'n kyile'.22Qatzun matxi tb'i'na tuk'i'l tkyaqil tk'u'ja exqa matb'inchaju'ya xnchaq'e', chin okyeltzuntze' te tajq'oju' tajq'oja, ex kjawil wi'q'i'n wib'e' kyi'ju' injaw kyiq'i'n kyib' ti'ja.23Kb'el neju' wanjle' twitza ex kxe'l q'i'na tu'n toj kytx'otx' amorey, itit, peresey, aj Kanaan, eb'ey, ex jeb'usey, qu'n majx che kb'el nnajsa'ne'.24Lalun tb'inchaju'ya taq'wixil kse'n in kb'incha'nju' tnam lu. Lalun kub' mejeya kywitzju' kydyos, ex lalun k'uluna kwitz; ape' b'inchamju'ya, xitu'nqe'ku'ya kykyaqilju' kwitzleb', ex jni'ju' kyab'aj xjansa'n kyu'n.25K'ulunta nwitze' ayine' Dyos Manb'aj Tdyosa, ex kb'el nky'iwla'nwe' twaya ex tk'wa'ya.
K'elil nlaq'b'a'ne' yab'il ti'ja,26lay waje' tu'n tkyimnaja qa na'mxtoq tjapun tq'ijlalil. Mixti' jun qya laywit tkan tq'ij tal mujqa miwtjun in alan toj ttanama, chiku'ya kye.
27Kb'el nnejb'a'ne' jun xob'el twitza, ex kche ẍch'il xjal tu'n k'ixk'oj kyoj nimaqtnam jaxjaku' matzik'a'ya ex che oqelju' tajq'oja twitza wu'ne'.28Kb'el nnejb'a'ne' jun nin xob'el twitza tu'ntzun kb'je'l oqju' eb'ey, itit exqe' aj Kanaan twitza.29Lay che b'aj wu'ne' twitza toj jun ab'q'ix, tu'ntzun lalun kub' yajtiju' tx'otx' ex tu'n miche chmeta'ju' tojk'ul txkup, qu'n jaku' che okten yajulteya.30Ch'i'naq kb'aj wu'ne' twitza tzmaxi'j aj kychmetju' tk'wala, tu'ntzun ttzyunteju'ya tx'otx' tkyaqil.31Exju' tnaqacha a techal ja'lu wu'ne': tzajx ttzi ninnjab' Kyeq tb'i ex ponx ttzi ninnjab' kye pilistey, ex tzajx toj chq'ajlaj, ponx ttziju' nin a' Ewprates. Matxi' che kyej nq'o'nju'ye' xjal ate'qe' toju' tx'otx' lu toj tq'ob'a, tu'ntzun kyb'je'l tiq'i'na twitza.
32Lalun kyej b'entti'j tyola kyuk'i'l ex kyuk'i'lju' kydyos,33ex lalun taja tu'n kykyejten toj ttanama, tu'ntzun lalun tz'ok q'o'na b'inchal il nwitze' kyu'n. Qu'n jaku' k'uluna kyeju' kydyos, atzuntzu' jaku' tzpeta'ya, chiku'ya kye, chi Dyos te Moyses. Kyejb'ent-xi'x ti'ju' tyol Dyos kyuk'i'l aj Israel
1Tzaj tma'n Qman Dyos te Moyses:
—Kutjatza kyuk'i'l Aaron, Nadab' ex Ab'yu, ex kyuk'i'l oxnaq lajoj (70) tijwnaq kxol aj Israel jata'qinaye'; che tenkje' najchaqinin, che mejeku'tzuntze' k'ulul weye'.2Noq o'kxa kjawitz lq'eya nk'etze'; aye'tzu'n txqantl mixti' tu'n ktzaj lq'e ex lay che jatzju' xjal tuk'i'la, chij.
3Xi'tzun Moysestzu' q'malte kye tnam tkyaqilju' tma Qman Dyos te, kykyaqiltzu'n xjal xikytzaq'we'n junx ex kma:
—¡Kqb'incha'qe' tkyaqilju' xtchaq' Qman Dyos! chechij.
4Atzunte Moyses b'ajkub' ttz'ib'a'n tkyaqilju' tma Qman Dyos, tojtzun juntl q'ij jawe' b'a'n prim, kub' tb'incha'n jun q'olb'eb'l t-xeju' witz ex e'kub'tq'o'n kab'lajoj (12) ab'j xjanqe', junjun ab'j te junjun tnej tyajajil aj Israel.5Exi'tzun tchq'o'n Moyses jte' ku'xun aj Israelqe' tu'n tkub' kb'yo'n jte' tman wakx, tu'n tkub' kq'o'ntzuntz te chojb'il ex k'ok'sb'il twitz Qman Dyos te jun b'inchjtib'il.6Atzunte Moyses jawtiq'i'n nik'janju' tchk'el wakx ex ku'x tq'o'n toj jte' nimaqlaq, atzu'n nik'jantel kub' twitxk'a'n tib'aju' q'olb'eb'l.7Tzajtzun tiq'i'nju' u'j jatz'ib'a'na'ju' yol kyejni b'entti'j tu'n Qman Dyos kyuk'i'lju' ttanam ex jawt-ẍch'i'n kwitz tnam, aye'tzunkye tnam kma:
—K'okyeltilil qu'ne' tu'n tb'inchet tkyaqilju' matxi' tma Qman Dyos, chechij.
8Atzunte Moyses tzaj ti'nju' chik' ex xitwitxk'a'n kyib'aju' tnam ex tma:
—Tu'nju' chik' lu makyej b'ent-xi'x ti'ju' yol tu'n Qman Dyos kyuk'i'le', tib'aj tkyaqilju' chaq'b'il xtaq' kyeye', chij.
9Jaxtzun Moysestz twi' witz kyuk'i'l Aaron, Nadab' ex Ab'yu ex kyuk'i'lju' oxnaq lajoj (70) tijwnaq kxol aj Israel.10Atzuntzu' kyila' Dyos Kydyos aj Israel: kyilju' tjaq' tqan naku'j ab'j inxi'x tilk'aj ex ẍtilun kse'n kya'j.11Mixti' jun taq'wix tb'incha Dyos kyeju' xjal lu ati kyoklen kyxol aj Israel, okkyka'yi'n Dyos, e'wan ex e'k'wan twitz. Jax Moyses twi' witz Sinayi
12Tzaj tma'n Qman Dyos te Moyses:
—Kutjatza twi' witz jata' qine', axtzuntzu' chin tyoku'ya, qu'n che kxe'lnq'o'ne' jte' tz'len ab'j teya ja matxi' che kub'ntz'ib'a'ne' kawb'il ex chaq'b'il tu'n t-xi' xnaq'tzet kye aj Israel, chij.
13Jaxtzun Moysestz twi' witz te Dyos tuk'i'l Joswe ju' onilte.14Ex kyejtma'n kyeju' tijwnaq:
—Qo kyoye' tza'lu, tzmaxi'j ajtanjtz qi'je'. Axtzu' che kjela' tena'kye' Aaron ex Ur kyuk'i'le', qatzun nab'en ati xb'aj kxole' kmanxe' kye, chij.
15Tb'ajlenxi'tzun tma'n ja'lu, jaxtzuntz twi' witz ex lwiyxi'x kub' jupe' muj twi'ju' witz.16Kub' tenju' tajwalil Qman Dyos twi' witz Sinayi, waqaq q'ij tenju' muj twi' witz. Tojtzunju' twuqi'n q'ij tzaj txko'n Moyses tu'n Qman Dyos tzmaxtzu' toj muj.17Kyil aj Israel tajwalil Qman Dyos kse'n q'aq' nxi'x jamun tojxi'x twi' witz.18Atzunte Moyses jax twi' witz ex okx toj muj, kab'naq (40) q'ij ex kab'naq (40) qonik'an ten atzu'. Oyaj tu'n tb'inchetu' ja xjan (Ex 35.4-9)
1Tzaj yolin Qman Dyos te Moyses ex tma:
2Q'manxa kye aj Israel tu'n tjaw kb'u'yi'n jun oyaj weye' tu'n tjaw kb'u'yi'n kxolju' ati tb'is kyk'u'j tu'n kq'onte tu'n tkyaqil kyk'u'j.3A kjawil kb'u'yi'nju'ye' lu: q'anpwaq, saqpwaq, q'ank'uxb'il,4xb'alun morad, xb'alun kyeq smo'n tk'i' cha'x, xb'alun kyeq, tz'umin sed, t-smal chib',5ttz'umal rit uk'tza'n tu'n kyeq, tb'anil tz'u'n, tze akasya,6aseyt te kandil, k'ok'sb'il in puk'chaj teju' aseyt te xjansb'il ex teju' sturak,7ab'j kornalina ex junjuntl ab'j tb'anil tu'n kyokq'et ti'j t-xb'alunju' knejel pale.8Ex kb'incha'nktz jun jaye' xjan tu'ntzun ntene' kxole'.9Atzu'n ja lu ja chin tenb'ela'ye', ex kyuk'i'lxi'ju' kche ajb'el toj, ati tu'n tkub' kyb'incha'ne' ikxi'xju' kse'n kyxe'l nyek'u'ne' teya, chij te Moyses. Kax k'ub'lteju' yol kyejni b'entti'j (Ex 37.1-9)
10Kb'el kb'incha'ne' jun kax akasya ttzeyil, jun metr tuk'i'l lajoj sentimetro tnuqub', atzun oxnaq jwe' (65) sentimetro twitz, ex oxnaq jwe' (65) sentimetro twe'.11Kyktxunkye' tu'n q'anpwaqxi'x tojxi' ex ti'jxi', ex kq'onkye' jun tznij tilb'ilal q'anpwaq ttxa'nile.12Ex kb'el kb'incha'ne' kyaje' t-ẍkyin q'anpwaqqe' ex kq'onqe'kye' kyi'ju' kyaje' tqan, kakab' junjun plaj.13Ex kb'el kb'incha'ne' jte' tqul akasya ttzeyil, kyktxunqe'kye' tu'n q'anpwaq,14kq'onqe'mixtzuntze' kyoju' t-ẍkyin ate'qe'k ttx'u'kju' kax, tu'ntzun tb'ent tiq'et.15Lantzun che etz kyiq'i'ntle', axtzu' che kyq'onkja'ye' kyoj t-ẍkyinju' kax.16Tojtzu'n kax lu kb'elexa' tq'o'na kawb'il kxe'l nq'o'ne' teya, chij.
17Kb'el kyb'incha'ne' tjpel q'anpwaqile, jun metr tuk'i'l lajoj sentimetro tnuqub', atzun oxnaq jwe' (65) sentimetro twitz,18kyuk'i'l kab'e' tilb'ilal kyerb'in q'anpwaqqe' b'incha'n tuk'i'l martiy, kyq'onqeku'ye' junjun ttxa'n.19Aju' tjpel kyuk'i'lju' tilb'ilal kyerb'in ati tu'n tel te jun tnejx; jun kyerb'in toj jun ttxa'n ex juntl toju' juntl ttxa'n,20mujli kywitz tziplqe' nche ka'yin tib'aju' tjpel. Atzunju' kyxik' lik'u'n tib'aju' tjpel te kutxb'ilte.21Yajxi'tzuntel kb'el tq'o'na tjpelju' kax ex kb'elex tq'o'na kawb'il kxe'l nq'o'ne' teya toj.22Atzuntzu' chin yolilaye' tuk'i'la kxolju' kab'e' tilb'ilal kyerb'in ate'qe'kx tib'aj tjpelju' kax k'ub'lteju' yol kyejni b'entti'j wu'ne' kyuk'i'le', tu'n t-xi' nq'o'nju'ye' nchaq'b'ile' teya, aju' k'ajb'el kye aj Israel, chij te Moyses. Mes tkb'el wab'j twitz Qman Dyos (Ex 37.10-16)
23Kb'el kyb'incha'ne' jun mes akasya ttzeyil, kyajnaq lajoj (90) sentimetro tnuqub', kab'naq jwe' (45) sentimetro twitz; atzun oxnaq jwe' (65) sentimetro twe'.24Kyktxunkye' ti'jile tu'n q'anpwaqxi'x ex kq'onkye' jun qnij q'anpwaq te tilb'ilal ttxa'nile.25Tib'ajxi'tzuntlju' tilb'ilal lu kyb'incha'nktze' jun tznij ttxa'nile te wuq sentimetro tal twe'; ti'jtzun kyq'onkye' jun tal qnijtl tilb'ilal q'anpwaqile.26Ex kb'inchanqe'kye' kyaje' t-ẍkyin q'anpwaqqe' kyi'ju' kyaje' tqan,27tjaq'ju' tal tilb'ilal ttxa'nile tu'ntzun kyexju' tqul kyoj ex tu'n tb'ent tiq'etju' mes.28Che kb'el kb'incha'ne' tqul akasyax ktzeyil ex kyktxunqe'kye' tu'n q'anpwaq, tu'ntzun tb'ent tiq'etju' mes,29ex che kb'el tb'incha'na tplatil q'anpwaqqe'xi'x, e' pak'b'il, e'xar ex e'kop te kykb'elju' oyaj a' kwitz.30Kb'el kq'o'ne' wab'j twi' mes kukxju' tu'n t-xjanset nwitze'. Kykb'el kandil q'anpwaq (Ex 37.17-24)
31Ex kb'el kyb'incha'ne' jun kykb'el kandil q'anpwaq tx'no'n tu'n pojb'il. Kb'el kb'incha'ne' tq'uqlil, tqan, tk'o'ẍil, t-xaq ex tb'echil, iqi'mile tib',32ex che elel qaq tq'ob' ti'ju' tqan, oxox junjun plaj.33Teyiletzun junjun tq'ob' nche el ti'ju' tqan kykb'el kandil ati tu'n tten oxe' tb'echil xwakyi'n kyten, kse'n tb'echil almendro,34ex ti'ju' tqan ati tu'n kten kyaje' tb'echil xwakyi'n kten, kse'n tb'echil almendro.35Tjaq'iletzu'n ja inche ela' kakab' tq'ob' ti'ju' tqan, ati tu'n tten junjun tb'echil xwakyi'n kten.36Ati tu'n kykyaju' tb'echil kyuk'i'lju' tq'ob' jun tnejx tuk'i'lju' tqan, ex q'anpwaqile tx'no'n tu'n pojb'il.37Ex che b'el kyb'incha'ne' wuq tkantilil ex kyq'onqe'ku'ye' tojile kwi' tu'n kyk'ant tal kyq'aq'al twitz,38exqe'tzunju' tkb'el tza'j exju' pitxb'il kantil q'anpwaqileqe'x.39Kb'ajel oxnaq kab'lajoj tk'i' nik'jan (72.6) lib'r q'anpwaq kyu'ne' ti'ju' kykb'el kandil ex kyi'j kykyaqilju' che ajb'el te.40Atzun kyka'yinxe' aj kyaq'wiye' b'inchalte, qu'n che kb'el kb'incha'ne' ikxi'xju' kse'n xinyek'u'ne' teya twi' witz, chij te Moyses. Ja xjan (Ex 36.8-38)
1Kb'el kb'incha'ne' ja xjan tu'n lajoj plaj xb'alun a kq'imalju': sed chub'i'ntwitz, morad, kyeq smo'n tk'i' cha'x, kyeq ex ktz'sonku'xe' kab'e' tilb'ilal kyerb'in kyoj.2Kykyaqilju' xb'alun lu ati tu'n kyel junile echb'enkye: kab'lajoj metr tk'i' nik'janju' kqan, atzun kab'e' metrju' kwitz.3Ktz'sonqe'kye' jwe' plaj xb'alun junx mujb'a'n kten, ex ikx kyse'ju'ye' kyi'ju' jwe'tl,4ex kq'onkye' jte' kyẍkyin tu'n q'in morad ttxa'nju' tnejel xb'alun kyeju' jwe' mujb'a'nqe' ex ttxa'nju' b'ajsb'il xb'alun kyeju' jwe'tl.5Kb'el kb'incha'ne' kab'naqlajoj (50) t-ẍkyinju' b'ajsb'il xb'alun teju' jun tnej ex kab'naqlajoj teju' tnejel xb'alun teju' jun tnejtl, tu'ntzun kykyej muje junx.6Ex che kb'el kb'incha'ne' kab'naqlajoj (50) tzuyb'ilkye q'anpwaq, tu'n kmujb'etju' kab'e' tnej xb'alun, tu'ntzun tb'entju' ja xjan te junx tnej xb'alun.
7Ex kb'el kyb'incha'ne' junlajoj plaj xb'alun t-smal chib', te jun ja xb'alun kutxb'ilteju' ja xjan.8Kykyaqilju' xb'alun lu ati tu'n kyel junile echb'enkye: oxlajoj tk'i' nik'jan (13.50) metr kwe', atzun kab'e' metr kwitz.9Ktz'sonqe'kye' jwe' plaj xb'alun junx mujb'a'n kten, ex ikx kb'inchamju'ye' kyi'ju' waqaqtel, ex kpaqtz'u'nktze' twaqaqi'n xb'alun toju' plaj twitzxi' teju' ja xb'alun.10Che kb'el tb'incha'na kab'naqlajoj (50) t-ẍkyin ttxa'nileju' b'ajsb'il xb'alun teju' tnejel tnej, ex kab'naq lajojtel ttxa'nileju' xb'alun teju' tkab' tnej.11Ex che b'el kyb'incha'ne' kab'naqlajoj (50) tzuyb'ilkye q'anpwaqqe' ex che kyq'onqe'kye' ti'j kyẍkyinju' kab'e' tnej xb'alun, tu'ntzun telju' ja xb'alun te jun tnejx.12Aye'na' xb'alun teju' ja xb'alun nimaqkyqan, qu'mtzun nik'jan teju' in kyej sob'rin kjel xtunin ttze'lxi'ti'ju' ja xjan.13Tu'ntzun tktxetju' ja xjan ttze'lti'j ex twitzxi' tu'nju' nkyej sob'rin, ch'inxmi nik'jan metr kjel xtunin toj junjun plaj.
14Kb'el kb'incha'ne' jun xb'alun ttz'umal rit tu'n tajb'en te twi'ju' ja xb'alun ex uk'tzanka tu'n kyeq, ex juntl tz'umin tz'u'n tu'n tjax loqb'et tib'ajxi'tlju' twi'.
15Che b'el kb'incha'ne' jte' tz'len ti'j tze akasya tu'n kyajb'en teju' ja xjan wa'l kten che okyel tq'o'na.16Teyile junjun tz'len, te kyejkyej metr tk'i' nik'janchaq kwe', atzun oxnaq jwe' (65) sentimetrochaq kwitz,17che b'el kyb'incha'ne' kakab' kyjuch'ub' junjun tz'len tu'ntzun kytzyuntekyib' ajkyb'jo'k mujb'et, kykyaqilxtzunju' tz'len teju' ja xjan kyb'inchankye' kakab'ile kyjuch'ub'.18Ajtzun kb'inchanteye', winqi'n tz'len k'okyel kq'o'ne' toj tb'a'nq'ob'kya'j,19ex kyq'onku'ye' kab'naq (40) kyq'uqlil saqpwaqqe', teyile junjun tz'len kakab' tq'uqlil kb'el, jun te junjun tjuch'ub'.
20Ex toju' plaj te tnayaju' ja xjan, winqi'n tz'len k'okyel kq'o'ne'.21Kyuk'i'l kab'naq (40) kyq'uqlil saqpwaqqe', tu'ntzun kyten kakab' kq'uqlil junjun tz'len.22Tojtzunju' plaj te tkub'exq'ij teju' ja xjan, waqaq tz'len k'okyel kq'o'ne',23ex kab'e'tl kyeju' kab'e' t-skyiniyil teju' plaj ti'jxi'ju' ja xjan.24Aye'ju' tz'len lu ati tu'n kykyej muje junx twi'xi' jata'ju' tnejil kyẍkyin. Iktzun kb'inchetilju' kyi'j kab'e' tz'len kyeju' kab'e' t-skyiniyil.25Wajxaq tz'len tu'n tkyaqil kyuk'i'lju' qaqlajoj kq'uqlil saqpwaqqe', kakab' kq'uqlil junjun tz'len.
26Kb'el kb'incha'ne' jwe' kqul te tzuyb'ilkyeju' tz'len toju' plaj te tb'a'nq'ob'ju' ja xjan, akasya ktzeyil,27ex jwe'tl teju' jun plajtl, ex jwe'tel kye'ju' tz'len te ttze'lti'j.28Ati tu'n telpun jlajinju' tqul toj tnky'ajchaqilju' tz'lan te kykab'il plaj.29Che okyel kyktxu'nju'ye' tz'len tu'n q'anpwaq, ex che okyel kb'incha'ne' kyẍkyin q'anpwaqqe'x, tu'ntzun kyexju' tqul kyoj, ju' ktxu'nqe'tl tu'n q'anpwaq.
30Qu'mtzun kb'el kb'incha'nju'ye' ja xjan kse'nxju' xinyek'u'ne' teya twi' witz.
31Kb'el tb'incha'na xb'alun te aq'pub'l chmo'n kyuk'i'l q'in morad, kyeq smo'n tk'i' cha'x, kyeq, ex sed chub'i'ntwitz ex tz'sonku'xa kab'e' tilb'ilal kyerb'in toj.32Kyuk'i'l jte' tzuyb'ilte q'anpwaqqe', kjawil kyob'i'ntzuntze' kyi'j kyaje' tqan akasya ktxu'n kyi'j tu'n q'anpwaq, kyib'aj kyaje' kq'uqlil saqpwaqqe'.33Kjawil kyob'i'ne' xb'alun kyi'ju' tzuyb'ilte. Ti'jxi'tzunju' xb'alun kq'onku'ju'ye' kax k'ub'lteju' yol kyejni b'entti'j wu'ne' kyuk'i'le'. Qu'n aju' xb'alun lu k'ajb'el kyu'ne' te aq'pub'l kxolju' najb'il xjan tuk'i'lju' najb'il xjanxi'x.34Kb'el kq'o'ntzuntze' tjpelju' kax k'ub'lteju' nyole' kyejni b'entti'j kyuk'i'le' toju' najb'il xjanxi'x.35Kb'el kq'o'nju'ye' mes ti'jxi'ju' xb'alun toju' plaj te tnayaju' ja xjan, atzu'n kykb'el kandil atzu' kb'el kq'o'na'ye' toj tb'a'nq'ob' twitzxi'ju' mes.
36Kb'el kb'incha'ne' jun plaj xb'alun te ttziju' ja xb'alun chmo'n kyuk'i'l q'in morad, kyeq smo'n tk'i' cha'x, kyeq ex sed chub'i'ntwitz b'incha'n tb'anil tilb'ilal toj.37Ex kb'el kb'incha'ne' jwe' tqan akasya ttzeyil, ex che k'okyel kyktxu'ne' tu'n q'anpwaq, kyuk'i'lju' tzuyb'ilkye q'anpwaqqe' ex kb'el kb'incha'ne' jwe' tq'uqlil q'ank'uxb'il, chi Qman Dyos te Moyses. Q'ank'uxb'il q'olb'eb'l (Ex 28.1-7)
1Kb'el kyb'incha'ne' jun q'olb'eb'l akasya ttzeyil, kab'e' metr tk'i' junaqjo' sentimetrochaq (2.25 cm.) twitz toj junjun plaj, atzun jun metr tk'i' junaqjo' sentimetro (1.25 cm.) twe'.2Che kb'el kb'incha'ne' kyaje' tuk'a kyoju' kyaje' ttx'u'k, iqi'mile kyib' tuk'i'lju' q'olb'eb'l, ex k'okyel kyktxu'ne' q'olb'eb'l tu'n q'ank'uxb'il.3Kykyaqilju' che ajb'el teju' q'olb'eb'l, che kb'el kb'incha'ne' q'ank'uxb'ilile: e'tkb'el tza'j, e'jotb'il, e'nimaqlaq, e' xokb'il ex e'tkb'el ttxalq'aq'.4Ex kb'el kb'inchane' jun parriy q'ank'uxb'il ex k'okyel kq'o'ne' kyaje' t-ẍkyin q'ank'uxb'ilqe'x toju' kyaje' ttx'u'kju' parriy.5Kb'elex kq'o'ntzuntze' tjaq' ttziju' q'olb'eb'l tojxi', tu'ntzun tkyej ten toj nik'janju' twe'.6Ex kb'el kb'incha'ne' jte' tqulju' q'olb'eb'l akasya ttzeyil, ex che okyel kyktxu'ne' tu'n q'ank'uxb'il.7Ati tu'n kyexu' tqul kyoj t-ẍkyin q'olb'eb'l toj kykab'il plaj, tu'ntzun tb'ent tiq'et.8Kb'el kb'incha'ne' q'olb'eb'l jul toj ex tze, kse'n oktka'yina twi' witz. Tpenju' ja xjan (Ex 38.9-20)
9Kb'el kb'incha'ne' tpenju' ja xjan. K'okyil q'et kab'naqjo' (45) metr xb'alun sed chub'i'ntwitz toj tnuqub'ju' pe'n toj tb'anq'ob'.10Kb'el kb'incha'ne' winqi'n tqan ex winqi'n tq'uqlil q'ank'uxb'ilqe', aye'tzunju' tzuyb'ilkye ex kyẍkyin saqpwaqqe'.11Tojtzun tnayaj k'okyel q'et kab'naqjo' (45) metr tqanju' xb'alun tojile tnuqub' kyi'j winqi'n (20) tqan ex winqi'n tq'uqlil q'ank'uxb'ilqe', aye'tzunju' tzuyb'ilkye ex kyẍkyin saqpwaqqe'.12Atzu'n twitzju' pe'n te tkub'exq'ij, k'okyel q'et junaq kab'e' metr tk'i' nik'jan (22.50 m.) tqanju' xb'alun kyi'j lajoj tqan ex lajoj tq'uqlil.13Atzu'n toj tjawetzq'ij teju' pe'n k'okyil q'et junaq kab'e' metr tk'i' nik'jan tqanju' xb'alun.14K'okyel q'et wuq metr tqanju' xb'alun kyi'j oxe' tqan ex oxe' tq'uqlil toj jun plaj te ttziju' pe'n,15Ex toju' jun plajtel k'okyel q'et wuq metr tqanju' xb'alun kyi'j oxe' tqan ex oxe' tq'uqlil.16Atzu'n ttziju' pe'n k'okyel q'et b'eljoj metr xb'alun chmo'n kyuk'i'l q'in, morad, kyeq smo'n tk'i' cha'x, kyeq ex sed chub'i'ntwitz tz'so'nqe' tb'anil tilb'ilal kyoj, kyi'j kyaje' tqan ex kyaje' tq'uqlil.17Che kb'el kb'incha'ne' kyẍkyinju' tqan ti'jileju' pe'n, exju' tzuyb'ilkye saqpwaqqe', atzu'n kq'uqlil q'ank'uxb'il.18Kab'naqjo' (45) metr tnuqub'ju' pe'n, junaq kab'e' (22) metr tk'i' nik'jan (22.50 m.) twitz, atzun kab'e' metr tk'i' junaqjo' sentimetro (2.25 m.) twe'. Kykyaqilju' xb'alun che ajb'el sedqe' chub'i'nkywitz, aye'tzunju' kq'uqlil q'ank'uxb'ilqe'.19Kykyaqil t-stakyilju' ja xjan kyuk'i'lju' che ajb'el toj q'ank'uxb'ilqe' exqe' t-stakyilju' twi' pe'n, chi Dyos te Moyses. Aseyt kye kantil (Lv 24.1-4)
20Q'manxa kye aj Israel tu'n ttzaj kyiq'i'n aku' aseyt olib'a tu'n tajb'en kye kandil tu'ntzun kyk'enti kukxju'.21Aye' Aaron kyuk'i'lju' tk'wal che txqolkye kandil tu'n kyk'ent ajtb'aj qonik'an nwitze' ayine' Dyos Manb'aj toju' Ja te Mujb'ab'ltib'il wuk'i'le', ju' ati ti'jxi' xb'alun tok tk'etzju' kax k'ub'lteju' yol kyejni b'entti'j. Majx kjeltenju' kawb'il lu kye aj Israel ex kyeju' kyyajajil, chi Dyos. Kyxb'alun pale (Ex 39.1-31)
1Q'intzju'ya ttzika Aaron tk'etza kyuk'i'lju' tk'wal, aye': Nadab', Ab'yu, Eleasar ex Itamar, tu'ntzun kyok te pale nwitze' kyxol aj Israel.2Kb'el kb'incha'ne' t-xb'alun ttzika Aaron tb'anilxi'x tu'ntzun tjaw nima'n.3Q'manxa kyeju' atixi'x kynab'l aye'ju' oje txi' nq'o'ne' knab'l tu'n kb'inchante t-xb'alun Aaron, tu'ntzun toktzu' te pale xjansa'n nwitze'.4Aye' xb'alun ja'lu che b'inchetil: jun ẍa'y tuk'i'l jun tal xb'alun tb'anil b'inchb'ente k'okyel ttzitk'u'j, jun pinpa't, jun xb'alun ku'j ati tilb'ila tz'so'n, k'alb'il twi' ex k'alb'il tk'u'j sedqe'. Qu'mtzun kyb'inchanku'ye' t-xb'alun ttzika Aaron tb'anilxi'x ex kyeju' tk'wal, ju' che ajb'el te pale nwitze'.5K'ajb'el q'anpwaq kyu'nju' kche b'inchalte xb'alun lu, q'in morad, kyeq smo'n tk'i' cha'x ex sed chub'i'ntwitz.
6Kb'inchetilju' ẍa'y tuk'i'l q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz, b'incha'nqe' tb'anil tilb'ilal toj,7tuk'i'l kab'e' tal qnij xb'alun mujb'a'nqe'k jun junjun ttx'u'k.8Atzu'n k'alb'il k'ajb'el k'alb'ilteju' ẍa'y jun tnejx che elila', kb'inchetil tuk'i'l q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz.
9Ktzajel kyiq'i'ne' kab'e' ab'j kornalina ex k'okyel kytz'ib'a'ne' kyb'iju' tk'wal Israel kyi'j,10txoli'n kyu'ne', ktzajelx ti'ju' tnejel k'wa'lb'aj tu'n tpon b'aj ti'ju' ch'i'p, waqaq b'iyj ti'j junjun ab'j.11Jun xjal ax taq'unju' ktz'ib'alkye b'iyj lu, kse'n tu'me'l nb'incheta' jun sey. Che okyel kyq'o'ntzuntze' ab'j lu kyoj tal kykb'el q'anpwaqqe',12che kb'el kq'o'ntzuntze' tib'aj t-semu'lju' ẍa'y, jun junjun plaj, tu'ntzun kytzaj na'yitju' tk'wal Israel. Tu'ntzun kyiq'injeju' b'iyj lu tu'n Aaron tib'aj t-semu'l nwitze' ayine' Dyos Manb'aj, tu'ntzun ktzaj nna'ne'.13Che b'el kyb'incha'ne' tal kykb'elju' ab'j lu q'anpwaqqe'.14Ex kb'el kyb'incha'ne' kab'e' taq'e'l xpatx'q'anpwaqile kyten, che okyel kyob'a'ntzuntze' kyi'j tal kykb'elju' ab'j.
15Kb'el kyb'incha'ne' tal xb'alun k'okyel ttzitk'u'ju' ẍa'y kyuk'i'lju' aq'unb'il te xjelb'il, ikxtu'me'lju' kse'n ẍa'y, b'incha'n tb'anil tilb'ilal toj tuk'i'l q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz,16pin kb'el kyb'incha'ne' ex kwadrad, junaq kab'e' sentimetro (22 cm.) toj junjun plaj.
17Che okyel ktxoli'ne' tb'anil ab'j ti'j te kyaje' txol, k'okyel kq'o'ne' jun ab'j rub'i, jun krisolito ex jun esmeralda toju' tnejel txol.
18Toju' tkab' txol jun ab'j kranate, jun sapiro ex jun jade;19toju' toxi'n txol jun ab'j jasinto, jun akata ex jun amatista;20atzu'n toju' tkyaji'n txol jun topasyo, jun kornalina ex jun jaspe. Kykyaqilju' ab'j lu che okyel kyq'o'ne' toj tal kykb'el q'anpwaqqe',21kab'lajoj (12) che b'elb'inchet, qu'n kab'lajoj (12) kyb'aju' tk'wal Israel. Ti'jiletzun junjun ab'j k'okyila' tz'ib'et tb'i junjunju' kyyajajil Israel, kse'n b'inchb'ente jun sey.
22Kb'el kyb'incha'ne' jte' xpatx'q'anpwaqxi'x, tu'n tokq'et ti'ju' tal xb'alun ttzitk'u'ju' ẍa'y.23Ex k'okyel kyb'incha'ne' kab'e' t-ẍkyin q'anpwaqqe', che okyel kyq'o'ntzuntze' kyi'j kab'e' ttxa'nju' tal xb'alun tok ttzitk'u'ju' ẍa'y;24che okyel kyq'o'ntzuntze' tal kab'e' xpatx'q'anpwaq kyi'ju' kab'e' t-ẍkyinju' tal xb'alun ttzitk'u'ju' ẍa'y toju' plaj jawl,25aye'tzu'n kytxa'n xpatx'q'anpwaq che okyel kyq'o'ne' kyi'ju' kab'e' kykb'el ab'j kornalina ex che kjel kb'incha'ne' b'a'nxi'x kyib'aju' kab'e' tznij xb'alun twi' t-semu'lju' ẍa'y, twitzxi'.
26Kb'el kb'incha'ne' kab'e'tl t-ẍkyin q'anpwaqqe', che okyel kq'o'ntzuntze' kyjaq'ju' kab'e'tl ttxa'nju' tal xb'alun tok ttzitk'u'ju' ẍa'y toju' plaj kub'l.
27Ex kb'el kyb'incha'ne' kab'e'tl t-ẍkyin q'anpwaqqe'x, che okyel kyq'o'ntzuntze' toju' plaj twitzxi' kyi'ju' tznij xb'alun ttx'u'kju' ẍa'y ex toju' plaj kub'l tk'etzju' tz'isb'en, tib'aj ch'i'n k'alb'ilteju' ẍa'y.28Kche okyel muje t-ẍkyinju' tal xb'alun tok ttzitk'u'ju' ẍa'y kyuk'i'l t-ẍkyinju' ẍa'y tu'n jun taq'e'l morad, tu'ntzun tkyejtenju' tal xb'alun jate'qe'ka' kab'lajoj ab'j tib'ajxi' k'alb'ilte ẍa'y, tu'ntzun majx tu'n tkyejten ti'j.29Ajtzun tokx Aaron toju' ja xjan tokju' tal xb'alun ttzitk'u'j, jate'qeka' kab'lajoj (12) ab'j kyuk'i'lju' aq'unb'il te xjelb'il; ex kyb'iju' kab'lajoj (12) tk'wal Israel ttzitk'u'j ajtokpun nwitze' ayine' Dyos Manb'aj, tu'ntzun kytzaj nna'ne' kukxju'.30Che okyel kq'o'ne' kab'e' ab'j Urim ex Tumin ti'ju' tal xb'alun ttzitk'u'ju' ẍa'y, qu'n aye' aq'unb'ilju' te xjelb'il, tu'ntzun t-xi' tiq'i'n Aaron ttzitk'u'j kukxju' nwitze'.
31Kb'el kyb'incha'ne' pinpa't kxe'l tib'ajxi' xb'alun ku'j moradile tq'imal,32kjawil joyit tqul tu'n texju' twi' toj. Kxb'u'tz'itel ttziyileju' tqul, kse'n chalek tz'u'n, tu'n lalun txi' laqj.33Che okyel tb'incha'na tal kanpani q'anpwaqqe' ttxa'nileju' pinpa't lu, xulpi'n kyten kyuk'i'l tilb'ilal lob'j kranad b'incha'nqe' kyuk'i'l q'in morad, kyeq smo'n tk'i' cha'x ex kyeq;34kjalu: k'okyil jun tal kanpani q'anpwaq ex jun kranad, juntl kanpani q'anpwaq ex juntl kranad, ayiletzun kb'inchetelju' ttziyile pinpa't.35K'okyel tq'o'n Aaron pinpa't ajtb'inchante taq'un te pale, ex ajtokx toju' ja xjan nwitze' ayine' Dyos Manb'aj mujqa ajtetz, che q'ajtelju' kanpani ti'j tu'ntzun lalun kyim.
36Kb'el kyb'incha'ne' jun plak q'anpwaqxi'x ex k'okyel kytz'ib'a'ne' yol lu ti'j, ku'xwitloj jun sey: Xjansa'n Twitz Qman Dyos:37K'okyel kyk'lo'ne' plak tplaju' k'alb'il twi' tu'n jun taq'e'l morad, tu'ntzun tkyejten jun elx ti'j.38Ktenb'eltzuntz tplaj Aaron kukxju', ate k'iqalteju' kyil aj Israel kyi'ju' ti'xti' xjanqe', naqa ẍe'x xjansalte kyoyaj; tu'ntzunju' plak lu knk'ma'ye' oyaj, ayine' Dyos Manb'aj.
39K'okyel kychmo'nju'ye' xb'alun ku'j exju' k'alb'il twi', sed tq'imal. K'okyel kychmo'nju'ye' k'alb'il tk'u'j tb'anil tilb'ilal toj.40Atzu'n kye tk'wal Aaron kyb'inchanku'ye' kyxb'alun ku'j, kyk'alb'il ex k'alb'il kywi', tu'n kyjaw nima'n kyu'n xjal.
41Atzun kxb'alun ttzikju'ya Aaron kyuk'i'lju' tk'wal, k'okyel tq'o'na, ex kjawix tqo'na aseyt toj kwi' tu'ntzun t-xiq'et kyoklen ex tu'n kxjanset te pale nwitze'.42Ex kb'el kb'incha'ne' kykalsonsiy sed, xi'nix kyk'u'j, ku'pumnix tib'aj kych'ek,43k'okyel toksa'n Aaron kyuk'i'lju' tk'wal aj kyokx toju' Ja te Mujb'ab'ltib'il ex naqa ẍe'xlq'e tk'etzju' q'olb'eb'l nwitze', b'inchalte kyaq'un te pale toju' ja xjan, tu'ntzun lalun txikyb'incha'n jun ti'xti' myab'a'n, tu'n miche kyima'. Majx kjeltenju' kawb'il lu te Aaron ex kyeju' tyajajil. E'xjansetju' pale (Lv 8.1-36)
1A b'inchamju'ya lu aj kxjanset te pale tu'n kyajb'en weye': ktzajel tiq'i'na jun qpoj tman wakx ex kab'e' rit mixti' kytzakajil.2Kb'el tb'incha'na wab'j ex muqin mixti' ttx'amal tu'n tarinil triy tb'anilxi'x xyuq'i'n tuk'i'l aseyt, ex xwotz' muqin mixti' ttx'amal, kxe'l witxk'et aseyt tib'aj,3q'onqe'ku'xtzuntza toj jun tal chi'l tu'n kyxi' iq'et toju' ja xjan, junx tuk'i'lju' qpoj tman wakx ex kyuk'i'lju' kab'e' rit.4Ex kxe'l tiq'i'na Aaron kyuk'i'l tk'wal ttziju' Ja Te Mujb'ab'ltib'il tu'n kyichin;5ktzajeltzun tiq'i'na kyxb'alun te pale. K'okyel tq'o'na t-xb'alun Aaron ku'j exju' pinpa't k'okyel ti'jxi', exju' ẍa'y tuk'i'lju' tal xb'alun ttzitk'u'j. Kjel tb'incha'na k'alb'ilteju' ẍa'y b'a'nxi'x;6kjawix tq'o'na ẍipb'il twi', ti'jtzuntl ja'lu k'okyel tq'o'na plak, qu'n a kxjansalteju' te pale.7Ex ktzajel tiq'i'na aseyt te xjansb'il, kjawix tq'o'ntzuntza toj twi' Aaron tu'n t-xjanset te pale nwitze'.8Ex che tzajel ttxko'nju'ya tk'wal tu'n toktq'o'na kxb'alun ku'j.9Ikxju' kse'nte Aaron, kjel tb'incha'nju'ya kyk'alb'il b'a'nxi'x exju' ẍipb'il kwi'. Tu'ntzun ja'lu che okyil tq'o'na toj kyoklen, majx kjeltenju' kyaq'un lu te jun kawb'il.
10Kxeltzun tiq'i'na qpoj tman wakx toju' Ja te Mujb'ab'ltib'il, tu'ntzun tkub' tq'o'n Aaron tq'ob' kyuk'i'lju' tk'wal tib'aj twi'ju' alu'mj.11B'yonku'tzunju'ya qpoj tman wakx nwitze' ttziju' Ja te Mujb'ab'ltib'il.12K'okyel t-suna ch'i'n tchk'el kyi'ju' tuk'a q'olb'eb'l tu'n twitq'ob'a. Atzu'n jni'tl kb'el tqo'na t-xe tqan q'olb'eb'l.13K'elel tiq'i'na tkyaqil unt kyi'ju' toj tk'u'j ex ti'ju' t-xqintxa. Tz'e'ysanku'tzuntza tib'aju' q'olb'eb'l.14Atzunju' tchib'jil, ttz'umal, exju' ttxa, tz'e'ysanku'ya ti'jxi'ju' najb'il qu'n jun chojb'ilte' tu'n tpaj il.
15Ktzajel tiq'i'n junju'ya rit tu'n tkub' tq'o'n Aaron tq'ob' tib'aju' twi' kyuk'i'lju' tk'wal.16Kb'el tb'yo'ntzuntza ex kb'el twitxk'a'nju'ya tchk'el tib'aju' q'olb'eb'l ex ti'jile.17Kb'el tk'pu'nju'ya tchib'jil, ex che ttxja'ju'ya t-xqintxa exqe'ju' tqan, che kb'el tq'o'ntzuntza junx tuk'i'lju' tchib'jil exju' twi'.18Oktzun kb'el ttz'e'ysa'nju'ya rit tib'aj q'olb'eb'l te jun chojb'il k'ok'sb'il te ninb'ilweye' ayine' Dyos Manb'aj, te jun oyaj k'ok'j tb'anilxi'x nwitze'.
19Ktzajeltzun tiq'ina juntl rit tu'n tkub' kyq'o'n Aaron kyq'ob' tib'aju' twi' kyuk'i'lju' tk'wal.20Kb'el tb'yo'na ex k'okyel t-suna ch'i'n tchk'el ti'jxi' t-ẍkyin Aaron ex ti'jxi' kyẍkyinju' tk'wal toj kyb'a'nq'ob', ex ti'ju' tman twi' kq'ob' toj kyb'a'nq'ob', ex ti'j tman twi' kqan tojx kyb'a'nq'ob', atzunju' jni'tl chik' kjawix tqo'na tib'aju' q'olb'eb'l ex ti'jile.21Ti'jtzunju' chik' kjelten tib'aju' q'olb'eb'l ex ti'ju' aseyt te xjansb'il, kb'el twitxk'a'n ch'i'na tib'aj Aaron ex tib'aju' t-xb'alun, kyib'aju' tk'wal ex kyib'aju' kxb'alun. Ikytzu'n che xjansetela' Aaron kyuk'i'lju' tk'wal exju' kxb'alun.
22Ktzajeltzun tiq'i'nju'ya unt tok ti'j tjeju' rit, exju' tok kyi'ju' t-xqintxa exju' tok kyi'ju' toj tk'u'j, ex ktzajel tiq'i'na kab'e' tchinaq' exju' unt tok kyi'j, exju' tkux toj tb'a'nq'ob', qu'n a ritju' te xjansb'ilkye pale.23Kjawitz tiq'i'na jun wab'j sewun, jun wab'j xyuq'i'n tuk'i'l aseyt ex jun xwotz' muqin, kyi'ju' wab'j mixti' ktx'amal atku'x toj ju' tal chi'l nwitze' ayine' Dyos Manb'aj.24Tkyaqil ja'lu kb'el tq'o'na toj tq'ob' Aaron ex toj kyq'ob'ju' tk'wal, tu'nt-xi kyyukycha'n te yek'b'ilteju' oyaj nwitze'.25Ajtzun tb'aj kb'incha'n, k'elel tiq'i'na toj kq'ob', kb'el ttz'e'ysa'ntzuntza tib'aj q'olb'eb'l junx tuk'i'lju' chojb'il k'ok'sb'il nkub' toj nwitze'. Jun oyajte' tz'e'ysa'n te ninb'ilweye'.
26Ktzajel tiq'i'nju'ya ttzitk'u'ju' rit te xjansb'ilte Aaron, kxe'l tyukycha'ntzuntza te yek'b'ilte oyaj nwitze'. Teya kjela'ju' ttzitk'u'j lu.27Kyjel tpa'nju'ya ttzitk'u'j rit te oyaj nim toklen, exju' tkux. Qu'n aye' te xjansb'ilju' ti'ju' rit kxe'l te Aaron ex kye tk'wal.28Aju' lu te Aaron kyuk'i'lju' tk'wal. Majx kjelten te jun kawb'il kye aj Israel: aye' aj Israel che q'olte oyaj lu te jun chojb'il te mujb'ab'ltib'il wuk'i'le', chi Dyos.
29Kjeltenju' t-xb'alun Aaron xjansa'n kjel te kyetzb'ilju' tyajajil, naqa ẍe xjanset ex ajkyok toj kyoklen te pale.30Atzunju' pale tyajajil Aaron ju' kjel te t-xel, ex tu'n tokx toju' Ja te Mujb'ab'ltib'il b'inchalteju' taq'un toju' Ja xjan, ati tu'n tok toksa'n wuq q'iju' xb'alun lu.
31Ktzajeltzun tiq'i'na rit te xjansb'il ex kb'elex ttzq'ajsa'na tchib'jil toju' najb'il xjan.32Aye' Aaron kyuk'i'lju' tk'wal kche wal ti'ju' tchib'jil rit ex ti'ju' wab'j atku'x toj tal chi'l ttziju' Ja te Mujb'ab'ltib'il.33Kche wal ti'j, qu'n a kub' q'etju' qanb'ilte najsb'il kyil, tej kxjanset ex tej t-xi' q'et kyoklen te pale. Qu'mtzun mix-a'lo' juntl kwal ti'j, qu'n xjanqe'.34Qatzun atix chib'j ex wab'j xjansa'n xkyejten te juntl q'ij, kb'el ttz'e'ysa'na'; mix-a'lo' jun kxe'l wante qu'n xjansa'nqe'.
35B'inchama tkyaqil ja'lu kye Aaron kyuk'i'lju' tk'wal kse'nxju' xb'aj nma'ne' teya. Wuq q'ij kb'ajel tu'na tu'n kyok toj kyoklen,36kb'el tq'o'na jun qpoj tman wakx te chojb'il junjun q'ij te najsb'il il, ex kt-ẍtilsa'ju'ya q'olb'eb'l tuk'i'l jun chojb'il te najsb'il il, ex kb'el tq'o'na aseyt tib'aj tu'n t-xjanset.37Wuq q'ij kb'el tq'o'na chojb'il tib'aj q'olb'eb'l tu'n tpaj il, iktzu'n kxjansetela' nwitze', ayine' Dyos Manb'aj, kjel tentzun q'olb'eb'ltz xjanxi'x: tkyaqiltzunju' kb'el tq'o'na tib'aju' q'olb'eb'l kjelten xjan, chi Dyos. Oyaj te tkyaqil q'ij (Nm 28.1-8)
38Tkyaqil q'ij ilti'j kb'el tq'o'na kab'e' tal rit te jun ab'q'iqe' tib'aj q'olb'eb'l.39Jun kb'el tq'o'na te prim ex juntl te qale.40Kb'el tq'o'na kyaje' lib'r tk'i' nik'jan arin tb'anilxi'x tuk'i'lju' tnejel qpoj tman rit, smo'n tuk'i'l jun litr aseyt olib'a, ex kb'el tq'o'na jun litr b'in te oyaj.41Ex ax ktb'incha'ju'ya ti'ju' juntl rit ajtok qale, kyuk'i'lju' oyaj arin ex b'in te oyaj tz'e'ysa'n weye' tuk'i'l tk'ok'jal tb'anilxi'x.42Aye' oyaj tz'e'ysa'n lu te ninb'il weye, ktzajel kq'o'n manb'aj ex k'wa'lb'aj kukxju' weye' ttziju' Ja te Mujb'ab'ltib'il, ja tu'me'l kchin tenb'ela'ye' tu'n nyoline' tuk'i'la.43Atzuntzu' kchin tenb'ila'ye' kyuk'i'l aj Israel, ex kjel nxjansa'nju'ye' najb'il lu.44Knxjansa'ye' Ja te Mujb'ab'ltib'il exju' q'olb'eb'l, ex kche nxjansa'ye' Aaron kyuk'i'lju' tk'wal te pale nwitze'.45Chin najale' kyxol aj Israel ex che ajb'el weye'.46K'eleltzun kynik'tz qa ayine' Dyos Manb'aj, inetz iq'inkye Ejipt tu'n ntene' kyxol. Ayine' Dyos Manb'aj, chi Dyos. Q'olb'eb'l tz'e'ysb'il sturak (Ex 37.25-28)
1Ex kb'el tb'incha'na jun q'olb'eb'l akasya ttzeyil tu'n ttz'e'yset sturak tib'aj.2Kab'naqjo' sentimetrochaq (45 cm.) twitz toj tkyajel plaj, atzun kyajnaq lajoj sentimetro (90 cm.) twe', majx kkyiqa'kyib' tuk'a tuk'i'lju' q'olb'eb'l.3Kb'el tktxu'na tib'aj tu'n q'anpwaq ex ti'jile tkyajel plaj exqe'tzunju' tuk'a, ex k'okyel tq'o'na jun qnij q'anpwaq ttxa'nile te tilb'ilal.4Che okyel tq'o'na t-ẍkyin q'anpwaqqe' tjaq'ile tilb'ilalju' k'okyel tq'o'na, kab'e' toju' jun plaj ttx'u'kyile ex kab'e'tl toju' jun plajtl tu'n kyexju' tqul kyoj, tu'ntzun tb'ent tiq'etju' q'olb'eb'l.5Che kb'el tb'incha'na tqul akasya ttzeyil ex che okyel tktxu'na tu'n q'anpwaq.6Kb'eltzun tq'o'na q'olb'eb'l lu twitzju' xb'alun tok e'wb'ilteju' kax k'ub'lteju' nyole' kyejni b'entti'j kyuk'i'le', twitzju' tjpel jaknajsetila' il, ja tu'me'l kchin tenb'ila'ye' tuk'i'la.7Tkyaqil prim kb'el ttz'e'ysa'n Aaron sturak tib'aj q'olb'eb'l ajt-xi' b'inchalte kytenju' kandil.8Ex kb'el ttz'e'ysa'n ajtok qale aj kb'jo'k ttxqo'nju' kandil. Kb'inchetil ja'lu nwitze' toj tkyaqil tab'q'iyil.9Lalun kub' tq'o'na alkyexku' sturak, chojb'il tz'e'ysa'n te k'ok'sb'il, twitz awal ex b'in witxu'n tib'aju' q'olb'eb'l lu.10Kjeltenju' q'olb'eb'l lu xjansa'n nwitze', junmaj toj ab'q'i k'okyel tq'o'n Aaron tchk'elju' chojb'il te najsb'il il kyi'ju' tuk'a q'olb'eb'l. Junmaj toj ab'q'i ex tkyaqil ab'q'i, kb'el q'etju' chojb'il te najsb'il il tib'aju' q'olb'eb'l lu, chi Dyos te Moyses. Kolpib'l chwinqlal
11Tzaj yolin Qman Dyos te Moyses ex tma:
12Ajtjaw kyajlal aj Israel tu'na, teyile junjun ati tu'n tq'onte jun toyaj weye' te kolb'ilte tchwinqlal, tu'n lalun tzaj jun yajb'il kyib'aj tjawlenxi' kyajlal.13Kykyaqilju' kjawil kyajlal kyq'a' jun piẍ saqpwaq te oyaj weye', aju' lu nik'jan teju' malb'il toju' ja xjan.14Aye'ju' che q'olte oyaj weye' ayine' Dyos Manb'aj, ktzajilqe kyuk'i'lju' te winqi'n ab'q'iqe' aj tjawju' kyajlal,15teyiletzun junjun aj tq'onteju' toyaj te kolb'ilte tchwinqlal, q'inun ex prow junelniju' kyoyaj, axju' jun piẍ saqpwaq.16Qu'mtzun kjawil tb'u'yi'na saqpwaq kkyq'a' aj Israel te kolb'ilkye, ex atzu' k'ajb'ela' tu'na toju' Ja te Mujb'ab'ltib'il, tu'ntzun kytzaj nna'ne' aj Israel qa kyaq'ju' kolb'ilkye, chi Dyos te Moyses. Q'ank'uxb'il chkon (Ex 38.8)
17Tzaj yolin Qman Dyos te Moyses ex tma:
18Kb'el tb'incha'na jun tkb'el a' tuk'i'lxi' tq'uqlil q'ank'uxb'ilile tu'n tajb'en te tx'ajb'il; ex q'onku'ya kxolju' Ja te Mujb'ab'ltib'il tuk'i'lju' q'olb'eb'l, kb'elex tnojsa'ntzuntza tu'n a'.19Atzuntzu' kjawitza' kyiq'i'n Aaron kyuk'i'lju' tk'wal tx'ajb'il kqan ex kq'ob'.20Kche tx'ajul aj kyokx toju' Ja te Mujb'ab'ltib'il ex aj kyoklq'e tk'etzju' q'olb'eb'l, tu'n tkub' kq'o'nju' oyaj weye'. Laytzun che kyimtz.21K'elel ktx'jo'n kq'ob' ex kqan tu'n lalun che kyim. Majx kjelten ja'lu te jun kawb'il te Aaron ex kyeju' tyajajil toj tkyaqil tab'q'iyil, chi Dyos. Aseyt te xjansb'il (Ex 37.29)
22Tzaj yolin Qman Dyos te Moyses ex tma:
23Kjawil t-sk'o'na awal tb'anilxi'x tk'ok'jal: masch'i'n oxlajoj (13.2) lib'r mir, qaq lib'r tk'i' nik'jan kanel, qaq lib'r tk'i' nik'jan ptz'an tk'ok'jalxi'x,24masch'i'n oxlajoj (13.2) lib'r k'ok'sb'il kasya tb'i, mlo'n kse'nxju' malb'il toju' ja xjan ex oxe' tk'i' nik'jan litr aseyt olib'a.25Kyu'ntzun ja'lu kb'el tb'incha'na aseyt xjan te xjansb'il, kse'n b'inchb'ente tu'n jun xjal ax taq'unju'. Atzun aseyt ja'lu xjan k'ajb'el te xjansb'il,26ex kjawix tqo'na tib'aju' Ja te Mujb'ab'ltib'il, tib'aju' kax k'ub'lteju' nyole' kyejni b'entti'j kyuk'i'le',27tib'aju' mes kyuk'i'lxi' che ajb'el tmoj, tib'aju' kykb'el kandil kyuk'i'lxi' che ajb'el te, tib'aju' q'olb'eb'l te sturak,28tib'aju' q'olb'eb'l te chojb'il kyuk'i'lxi'ju' kche ajb'el te, tib'aju' tkb'el a' te tx'ajb'il tuk'i'lxi'ju' tq'uqlil.29Iktzu'n che xjansetila' tu'na, che kjeltetzuntz xjanxi'x. Tkyaqiltzunju' matz'ok tiqli kyi'j, kjel xjan.
30Ex kjawix tq'o'nju'ya aseyt lu toj twi' Aaron kyuk'i'lju' tk'wal tu'ntzun kxjanset te pale nwitze',31ex kxe'l tma'na lu kye aj Israel: A waseytju'ye' xjan lu te xjansb'il toj tkyaqil tab'q'iyil.32Lalun jawx kqo'ne' tib'aj alkyexku' xjal, ex lalun kub' kb'incha'ne' juntl aseyt ikxju' kse'n ja'lu. Jun aseyt te'lu xjan, qu'mtzun xjanxi'x toklen kyu'ne'.33Qatzun ati jun xjal makub' tb'incha'n juntl aseyt ikxi'xu' kse'n ja'lu, ex majawx tqo'n tib'aj jun xjalxi', aju' xjal lu ati tu'n tnaj kxolju' twnaqil, chi Dyos. Sturak (Ex 37.29)
34Tzaj tma'ntl Qman Dyos te Moyses:
Che ktzajel tiq'i'na k'ok'sb'il lu ex junelni malb'enkye: k'ok'sb'il q'ol, k'ok'sb'il xky'eq tb'i, k'ok'sb'il tb'anilxi'x ex k'ok'sb'il q'ol q'anka'yin,35kyu'ntzun ja'lu b'inchanku'ya sturak tb'anilxi'x ex xjan smo'n twitz b'a'nxi'x, kse'n b'inchb'ente tu'n jun xjal ax taq'unju'.36Kb'el tchena jni' ko'k'x twi' tu'na, kb'el tq'o'ntzuntza twitzju' kax k'ub'lteju' nyole' kyejni b'entti'j kyuk'i'le' toju' Ja Te Mujb'ab'ltib'il, jakchin yolila'ye' tuk'i'la. Aju' k'ok'sb'il lu majx xjanxi'x toklen kyeye',37ex lalun kub' kb'incha'ne' juntl sturak tu'n tajb'en kyexe' kse'nx ja'lu. Qu'n aja'lu weye' ex xjan toklen teya.38Alkyete makub' tb'incha'n jun sturak iku'xju' kse'n ja'lu naqx tu'n tna'nteju' tk'ok'jal tb'anilxi'x, ati tu'n tnaj kxolju' twnaqil, chi Dyos te Moyses. Aq'unal ti'ju' ja xjan (Ex 35.30; 36.1)
1Tzaj yolin Qman Dyos te Moyses ex tma:
2B'intzpe'ya, matxi' jawnsk'o'ne' B'esaleel, tk'wal Uri, ex tchman Ur, kxol tyajajil Juda,3ex matxi' nnojsaye' tu'n nxewe', matxi' txinq'o'ne' tnab'l, tojtzqib'l, tu'n tel k'atz ex tu'n tb'inchante tkyaqil aq'untl,4tu'n t-ximan kse'nchaq kyilb'ilalju' aq'untl kb'inchetil, ex tu'n taq'unan ti'j q'anpwaq, saqpwaq ex q'ank'uxb'il,5tu'n kykub' tb'incha'n tb'anil ab'j kyoj kykb'el, tu'n taq'unan kyi'j tze ex tu'n tb'inchante chukchaq aq'untl tb'anilxi'x.6Ex matxi' jawnsk'o'ne' Aolyab' te onilte, aju' tk'wal Aysamak, kyxol tyajajil Dan. Ex matxinq'o'nxi'xtle' kynab'lju' ati kynab'l tu'ntzun kb'inchante tkyaqilju' matxi' nchaq'e' teya:7aju' Ja te Mujb'ab'ltib'il exju' kax k'ub'lteju' nyole' kyejni b'entti'j kyuk'i'le' tuk'ilxi' tjpel ex tkyaqilju' kche ajb'el toju' Ja te Mujb'ab'ltib'il,8exju' mes kyuk'i'lju' che ajb'el tmoj, exju' kykb'el kandil q'anpwaqxi'x, kyuk'i'lju' che ajb'el te, exju' q'olb'eb'l tz'e'ysb'il sturak,9exju' q'olb'eb'l te chojb'il kyuk'i'lju' kche ajb'el te, exju' chkon te tx'ajb'il tuk'i'lxi' tq'uqlil,10exqe'ju' xb'alun chmo'n, t-xb'alunju' pale Aaron majx tb'anilxi'x ex kxb'alunju' tk'wal aj kb'inchante kyaq'un te pale,11exju' aseyt te xjansb'il, exju' sturak k'ok'j tu'n tajb'en toju' ja xjan. Aye' kche b'inchalte tkyaqil ja'lu ikxi'xju' kse'n xnchaq'e' teya, chi Dyos te Moyses. Q'ij te ojlab'l (Ex 35.1-3)
12Tzaj yolin Qman Dyos te Moyses ex tma:
13Aku'ya kyolil kyuk'i'lju' aj Israel ex kxel tmanju'ya lu kye: Ati tu'n knimane' kyoju' q'ij te ojlab'l, qu'n a techlalju' kxole' wuk'i'le' toj tkyaqil tab'q'iyil, tu'n tel tnik'tzil qa ayine' Dyos Manb'aj ẍin jaw sk'on kyeye'.14Xjante' q'ij te ojb'il kyeye', qu'mtzun ati tu'n knimanteye'. Alkyete mixti' xtk'u'ju' q'ij lu ati tu'n tkub' b'yet. Ex ikx qa ati jun xjal matz'aq'unan toju' q'ij lu ati tu'n tnaj kxolju' twnaqil.15Waqaq q'ij che aq'unal, atzunju' twuqi'n q'ij kche ojlale', qu'n a q'iju' te ninb'ilweye'. Alkyete matz'aq'unan toju' q'ij lu, kb'el b'yet.16Qu'mtzun kkynima' aj Israel q'ij te ojlab'l, qu'n jun yolte' b'entniti'j tejumajx toj tkyaqil tab'q'iyil.17Kjelten te jun techlal tejumajx kyxol aj Israel wuk'i'le', chij.
Qu'n waqaq q'ij b'enta'ju' kya'j ex tx'otx' wu'ne' ayine' Dyos Manb'aj, tojtzu'n twuqi'n q'ij wojlane', chi Dyos te Moyses. Q'anpwaq qpoj tman wakx (Dt 9.6-29)
18Tetzunj tb'aj yolin Qman Dyos tuk'i'l Moyses twi' witz Sinayi, tzaj tq'o'n kab'e' tz'len ab'j te, tz'ib'a'nkju' kawb'il kywitz tu'nku' twi'tq'ob' Qman Dyos.
1Tetzunj kyka'yinte aj Israel numin tu'n tkb'u'l Moyses twi' witz, b'jo'k kyb'u'yi'n kyib' ti'j Aaron, xikyma'ntzuntz te:
—Kuwxa b'inchanku'ya jun qdyos tu'n qok lpe ti'j, qu'n numinte Moyses setz q'inqe Ejipt, titi'lo xb'ajtelo, chechij.
2Atzunte Aaron xittzaq'we'n kye:
—Kyiq'imile' tojkẍkyin kyxu'jile' q'anpwaqqe' ex toj kẍkyin kyk'wale' ex kmyale', kyiq'intztzuntze' nk'etze', chij.
3Kykyaqilxtzun b'je'l kyiq'i'n toj kyẍkyin q'anpwaqqe', tzaj kyiq'i'ntzuntz te Aaron,4atzunte Aaron okxtq'o'n q'anpwaq toj q'aq' tu'n ttzaj b'u'nb'ix ex kub' tb'incha'n jun tilb'ilal qpoj tman wakx tu'n jun tzqub'. Kymatzun tnamtz:
—¡Aj Israel, luju' kydyose' setz q'inkyeye' Ejipt! chechij.
5Tetzunj tka'yinte Aaron ja'lu, jawtb'incha'n jun q'olb'eb'l twitzju' tilb'ilal wakx, jaw tma'ntzuntz kuw:
—¡Kb'el qik'sa'n jun ninq'ij te ninb'ilte qdyos nachi'j! chij.
6Tetzun juntl q'ij b'a'n prim eb'jaw we' ex kub' kq'o'n e'chojb'il, ex chojb'il k'ok'j tz'e'ysa'n te mujb'ab'ltib'il. E'kub' qetzuntz wal ex k'wal, ex eb'aj tx'ojti. E' b'jaw we'tzuntz b'ixil ex achul.7Atzunte Qman Dyos tma te Moyses:
—Lwix ku'xa, qu'n matxi' che kub' tzpetju' ttanama setz tiq'i'na Ejipt.8Lwiyxi'x sel kypa'n kyib' ti'ju' b'e xinyek'u'ne' kye. Matxi' kub' kyb'incha'n jun tilb'ilal qpoj tman wakx q'anpwaq nche k'ulun te ex nkub' kyq'o'n chojb'il twitz; ex nkyma'n: ¡Aj Israel, luju' qdyos setz q'inqe Ejipt! chechij, chi Dyos.
9Tzajtma'ntl Qman Dyos te Moyses:
—Matxi' tz'el nnik'e' kyi'ju' xjal lu, ex matxi' wile' qa majx pi'sqe'.10¡Yompe'ya nej, matxi' tzaj txqan ntx'u'jile' kyi'j, che b'el nnajsa'ne'! Ti'jtzuna k'elela' jun nin nintnam wu'ne', chij.
11Atzunte Moyses aq'wi kub'sal twitz Qman Dyos tu'n tkub' tk'u'j kyu'nju' yol lu:
—Taye, ¿tiqu'n ktzajela' ttx'u'jila kyi'ju' ttanama, extzun aku'ya setz q'inkye Ejipt tuk'i'l nimtipumala?12Lalun taja tu'n kymante aj Ejipt: Mache extiq'i'n Dyos naqx tu'n kykub' tb'yo'n toj k'ul tu'ntzun kykub'naj twitz tx'otx' Jaku' chechi. Lalun tx'u'jintla Nman Dyos, ex lalun t-ximaya tu'n tkub' t-xitu'nju'ya ttanama.13Na'nqe'tzju'ya tmajena Ab'raam, Isaak ex Israel, tej ttzaj ttziya'na kye toj tb'iya ex tmaya: Che nchmet-sa'ye' kyyajajile' kse'nqe' che'w twitz kya'j, tkyaqiltzunju' tx'otx' oje txintziyane' kyeye', kxe'l nq'o'ne' te kyetzb'ilju' kyyajajile' tejumajx, chija, chi Moyses.
14Atzunte Qman Dyos mixti' kub' t-xitu'ntlju' ttanam kse'nju' matxi'toq kub' t-xima'n.15Ku'tztzun Moyses twi' witz ex tzaj tiq'i'n kab'e' tz'len ab'j jatz'ib'anqe'ka' kawb'il toj kykab'il plaj.16Aku' Qman Dyos kub'inchankye tz'len ab'j lu, ex aku' tz'ib'ankyeju' kawb'il kywitz.
17Tetzunj t-xitb'i'n Joswe sich' kyu'n xjal, xitma'n te Moyses:
—Tq'ojq'ojel sich' te q'oj tb'inx kyxolju' tnam, chij.
18Atzunte Moyses xittzaq'we'n:
Mya sich'te' te kanb'ab'l ex mya sich' te b'is, junxi'tl b'itz te' nxinb'i'nwe', chij.
19Tetzunj kxi'toq tpon lq'e Moyses tk'etzju' xmuj, xitka'yi'n tilb'ilal wakx ex nche b'ixin xjal, tzaj txqan ttx'u'jil, ex e'xit-xonju' tz'len ab'j q'i'nqe'toq tu'n, majx e'kub' tb'uchi'n t-xeju' witz;20tzajtzun tiq'i'nju' qpoj tman wakx kub' kb'incha'n, okx t-xon toj q'aq', kub' tchen ex kub' quqix, atzunju' tquqil xitchto'n toj a', xitma'ntzuntz kye aj Israel tu'n t-xi' kyk'wa'n a' lu.21Xitma'ntzuntz te Aaron:
—¿Tiqu'n xkub'a' ti'ja tu'nju' tnam lu, tu'nju' mataja tu'n kyb'inchante jun nimaq il? chij.
22Atzunte Aaron xittzaq'we'n:
—Taye, lalun tzaj ttx'u'jila wi'je' qu'n kanli twitza, majx kganju' xjal lu tu'n kb'inchanteju' myab'a'n.23Tzaj kyma'n weye': B'inchanku'ya jun qdyos tu'n tkub'nej qwitz, qu'n min b'i'n qu'n titi' xb'ajte Moyses setz q'inqe Ejipt, chechij.24Ntzaje' xintzaq'we'ne' kye: Alkyete ati tq'anpwaq, b'a'n tu'n ttzaj ti'n, nchije' kye. Tzajtzun kyiq'i'n q'anpwaq, okx nq'o'ntzuntze' toj q'aq', ¡kub' qb'incha'ne' tilb'ilal qpoj tman wakx lu! chij.
25Eltnik' Moyses kyi'j aj Israel qa matxi'toq tzpet kynab'l, ex naqch'i'n te'qe'kxa'tl tu'n kyb'aj xmayi'n kyu'n kyajq'oj, tu'ntpaj naqkuyile tu'n Aaron.26Kub' we'tzuntz ttziju' najb'il ex tma:
—Alkyeqe' ate' tuk'i'l Qman Dyos, kyb'uyintz kyib'e' wuk'i'le', chij. Kykyaqilxtzu'n aj Leb'i b'jo'k kyb'u'yi'n kyib' tk'etz.
27Xitzun ma'n Moyses kye:
—Chi Qman Dyos Kydyos aj Israel kjalu: Teyile junjunkye' kyiq'intze' kyk'uẍtx'e'nb'ile', kukxi'ye' tojile junjun ja, teyiletzun junjunkye' kb'el tb'yo'nju' titz'in, twnaqil mujqa tb'esin, chij.
28Japuntzunju' tchaq'b'il Moyses kyu'n aj Leb'i, wuqk'al lajnaq (3,000) xjal eb'aj kyim toju' q'ij lu.29Xitma'ntzun Moysestz kye:
—Kyk'ma'ye' kyoklene' twitz Qman Dyos toju' q'ij ja'lo, qu'n makub' kyb'yo'ne' kyk'wale', atzun junjuntl titz'in, qu'mtzun mache ky'iwlanjtze' tu'n Qman Dyos teju' q'ij ja'lo.30Tetzu'n juntl q'ij xitma'n Moyses kye xjal:
—Jun nimaq il te' xkyb'inchaye' twitz Qman Dyos, qu'mtzun chin jawixe' twi' witz, jata' Qman Dyos, kub'sal qa makub'tnajsa'n kyile', chij.
31Anjtzun ti'j Moysestz tk'etz Qman Dyos, ex xitma'n te:
—Taye, axxi'x nimaq il te' xkyb'inchaju' ttanama, qu'n makub' kyb'incha'n jun kydyos q'anpwaq.32Inchin kub'sane' twitza tu'n tkub' tnajsa'na kyil; qatzun minti' xkub' tnajsa'na, ¡najsanku'xju'ya nb'iye' toju' u'j ja tz'ib'a'na' tu'na! chij.
33Atzunte Qman Dyos tzaj ttzaq'we'n ex tma:
—O'kxte kb'elex nnajsa'n tb'iju'ye' toju' wuje' aju' mab'inchan il nwitze'.34Qu'mtzun kutxi'ya ex q'inxju'ya tnam toju' najb'il xinma'ne' teya. Kxel ẍaqlu'na tu'n wanjle'. Tzmaxi'tzunj ajtpon tq'ijlalil tz'e'ysb'il witzb'aj, kb'el ntz'e'ysa'ne' kywitz tu'ntpaj kyil, chij.
35Tzajtzun tq'o'n Qman Dyos jun yajb'il tib'aju' tnam tu'n tpaj ek'ulun twitz tilb'ilal wakx kub' tb'incha'n Aaron. Tchaq' Qman Dyos tu'n t-xikyljo'n kyb'e
1Tzaj tma'n Qman Dyos te Moyses:
—Kutxi'ya kyuk'i'lju' tnam ẍe etztiq'i'na Ejipt, toju' tx'otx' xintziya'ne' kye Isaak ex Jakob' tu'n t-xi' nq'o'ne' kyeju' kyyajajil.2Kxel nchq'o'ne' wanjle' tu'n tkub'nej twitza, ex che elix nxla'ja'ne' aj Kanaan, amorey, itit, peresey, eb'ey ex jeb'usey toju' tx'otx'.3Kuxkyxi'ye' toju' jun tb'anil tx'otx'. Lay chinxe' kyuk'i'le' qu'n pi'sqe'kye', tu'ntzu'n kypi'sale' jaku' che b'aje' wu'ne' toj b'e, chi Dyos.
4Tzaj kyb'isju' tnam tej t-xikyb'i'n yol kuw, ex mix-a'lo'tlte oktq'o'n tachb'il,5qu'n ojetoq tma Qman Dyos te Moyses:
—Q'manxa kye aj Israel: aye'kye' majx pi'sqe'ye'. ¡Naqwit atinqine' kyxole' jaku' naq toj jun kmujx che naja'ye' wu'ne'! Kyiq'imile' kyachb'ile' kyi'je' texju' kmuj ja'lo, chin ximaltzuntze' titi' knb'incha'ye' kyuk'ile', chiku'ya kye, chij.
6Tetzunj kyb'jik' aj Israel t-xe witz Oreb', min e'okkyq'o'ntl kyachb'il. Ja te mujb'ab'ltib'il tuk'i'l Dyos
7Tzaj ti'n Moyses ja xb'alun ex kub' tq'o'n najchaqinin ti'ju' kynajb'il aj Israel, ex oktq'o'n tb'i Ja te Mujb'ab'ltib'il tuk'i'l Qman Dyos. Qu'n qa ati jun tajb'il tu'n t-xjelun te Qman Dyos, nxi' toju' Ja lu, ju' elni lq'e ti'jxi'ju' kyxmuj aj Israel.8Ajtzun t-xi' Moyses toju' ja xb'alun, kykyaqilju' xjal ntoq che b'aj kub' we' ttziju' kypach xb'alun, ex majxtoq nche kyej ka'yin ti'j Moyses tzmaxi'j ajtokx toju' ja xb'alun.9Ajtzun tokx Moyses toj nkb'u'lju' tnej muj ttziju' ja xb'alun ajtyolin Qman Dyos tuk'i'l Moyses.10Ajtzun t-xi' kyka'yi'n xjalju' tnej muj ttziju' ja xb'alun teyile junjun nkub' meje ttziju' tja k'ulul twitz Qman Dyos.
11Ajtyolin Dyos tuk'i'l Moyses, kse'n nyolin jun xjal tuk'i'l tamiw, ajtzun kb'aj yolin inanjtzti'j Moyses janajlqe'ya' xjal. Atzunju' ku'xun Joswe tk'wal Nun ju' onilte Moyses, majx ati xq'uqilteju' ja xb'alun. Tyek'u Qman Dyos tajwalil te Moyses
12Tzajtzun tma'n Moyses te Qman Dyos:
—Intzaj tma'na weye' tu'n t-xiwiq'i'nju'ye' tnam lu, extzun na'mx ttzaj tma'na alkye kxe'l tchq'o'na wuk'i'le'. Expe' intma'na qa q'uqli tk'u'ja wi'je' exqa matxi' nkanb'aju'ye' t-xtalb'ila.13Qatzun qa ikju', yek'untzju'ya tb'is tk'u'ja weye' tu'ntzun tqexi'x nk'u'je' ti'ja, ex tu'n nk'monteju'ye' t-xtalb'ila kukxju', qu'n aju' tnam lu ttanama, chij.
14Atzunte Qman Dyos tma te Moyses:
—Ayinku'we' kchin xe'l tuk'i'la, ex k'ojlala wu'ne', chij.
15Atzunte Moyses xittzaq'we'n:
—Qatzun min xxi'ya quk'i'le' lalun qo' ex ti'na tza'lu.16Qu'n qa min xtxi'ya quk'i'le', ¿Kse'n taq'witzun ajtb'injtz qa ink'mo'nju'ye' t-xtalb'ila kyuk'i'lju' ttanama? Qatzun matxi'ya quk'i'le' k'elil qnik'tzile' kyxol txqantl tnam toj tkyaqil twitz tx'otx', chij.
17—Atzunte Qman Dyos tzaj tma'n te: knb'incha'ye', qu'n matxi' qe nk'u'je' ti'ja ex matxi' tkanb'aju'ya nxtalb'ile', chij.
18—¡Q'ontz anb'ila weye' tu'n nka'yinteju'ye' tajwalila! chi Moyses xitkub'sa'n.
19Atzunte Qman Dyos tzaj ttzaq'we'n:
—Kxe'l nyek'u'nju'ye' wajwalile' twitza, ex twitza kjawila' nma'ne' nb'iye'. Kchin b'inchal xtalb'ile' ex ktzajel q'aq'an nk'u'je' kyi'ju' jawajb'ilaye'.20Ex majx kxe'l nma'ne' teya, mixti' tu'n toktka'yina nwitze'; qu'n alkyete matz'ok ka'yinte nwitze', lay tz'anq'intl, chij.
21Tzaj tma'ntl Qman Dyos te:
—Ka'yintzpe'ya, ati jun najb'il nk'etze' tza'lu, we'ku'ya tib'aj pik.22Ajtik'ju' wajwalile', kb'el nq'o'na toj jun jul teju' pik, ex k'okyel nktxu'na tu'n nq'ob'e' ajwik'e'.23Ajtzun tel wi'ne' nq'ob'e', b'a'ntzun tu'n toktka'yi'na ttze'lwi'je'. Atzunju' nwitze' mixti' tu'n toktka'yina, chi Dyos. Ak'a'j ab'j ttz'lanil kawb'il (Dt 10.1-5)
1Tzaj tma'n Qman Dyos te Moyses:
—B'inchanku'ya kab'e' tz'len ab'j ikqe'xju' kse'n tnejel, tu'ntzun kyok ntz'ib'a'ne' yol kwitz, aye'xju' tz'ib'a'nqe'ktoq kwitzju' kab'e' kub' tpa'na.2Ex b'inchamtib'a qu'n najchi'j b'a'n prim kjawixa twi' witz Sinayi tu'n ttena nwitze'.3Mix-a'lo' jun kjawix tuk'i'la, ex mix-a'lo' jun tu'n tten toju' k'ul tk'u'ju' witz, ex mixti' tu'n kpon lq'e rit ex wakx wal t-xeju' witz, chi Dyos.
4Kub'tzun tb'incha'n Moyses kab'e' tz'len ab'j ikqe'xju' kse'nqe' kab'e' tnejel, ex b'a'n prim te juntl q'ij e'xitiq'i'n kab'e' tz'len ab'j twi'ju' witz Sinayi, kse'nxju' ojetoq tchaq' Qman Dyos te.5Kb'u'ltzun Qman Dyostz toj jun tnej muj twi'ju' witz, ten tuk'i'l Moyses ex tmaju' tb'i.6Ik'tzuntz twitz Moyses ex tma tuk'i'l tq'ojq'ojel twi' kuw:
—¡Ayinweju'ye' Dyos Manb'aj! Ntzaj laqj nk'u'je', ex ati npasense', nim nk'u'jlalile' ex njapun nyole'.7Inlaqjnk'u'je' kyib'aj kykyaqil wiq kyyajajil xjal ex nkub' nnajsa'ne' taq'wix nkyb'incha'n, e'kypi'sil ex tkyaqilju' kyil; atzunju' ati til intz'e'ysa'ne' twitz, inq'o'ne' tz'e'ysb'il witzb'aj kyib'aju' manb'aj nche b'inchan myab'a'n ex npon kanun kyib'aju' chmanb'aj kye kychman, chi Dyos.
8Atzunte Moyses lwiyxi'x kub' meje, majx ku'punju' tplaj twitz tx'otx', k'ulun te Qman Dyos,9tmatzuntz:
—Nman Dyos, qa axxi'x matxi' nkanb'aju'ye' t-xtalb'ila, ati tu'n t-xi'ya quk'i'le'. Majx pi's qe'ju' xjal lu, b'inchama xtalb'il najsanku'ya qile' exju' qb'inchb'aje' myab'a'n, ex qo tk'moma te ttanama. Tzajx jumajtlju' chaq'b'il (Dt 7.1-5)
10Atzunte Qman Dyos tma:
¡Kyb'intze' b'a'nxi'x! Kjel b'entti'j jun yol wu'ne' kyuk'i'l tkyaqilju' ttanama Israel. Kche nb'incha'ye' ti'xti' te lab'te'n aju' b'ajxa' b'incheta' toj juntl nintnam toj tkyaqil twitz tx'otx'. Kykyaqiltzunju' tnam nqaku' ta'qe' kyk'etze' kyka'yi'ju' kb'entel wu'ne', qu'n xob'ajilxte' knb'incha'ye' kyuk'i'le'.
11Japunxtzun kyu'ne' jni'xju' matxi' b'ajx nma'ne' kyeye' ja'lo, kywitzku'tzuntze' che elitza' nxla'ja'ne' amorey, aj Kanaan, itit, peresey, eb'ey ex jeb'usey, chij.
12Lalun kyej b'entti'j jun kyyole' kyuk'i'lju' xjal najlqe' ja tu'me'l kche pomilaye' tu'ntzun lalun che kub' tz'aqe' toju' ksb'ub'l.
13Ape' kyb'inchamju'ye', kxitunqe'ku'ju'ye' kq'olb'eb'l, kpa'nqe'ku'ju'ye' kwitzleb' tze xjansa'nqe' kyu'n, chij.
14Lalun che k'ulune' twitz juntl dyos, qu'n ayine' Dyos Manb'aj, myab'a'n toj nwitze' tu'n kyk'ulune' te juntl dyos. Qu'n a nb'iju'ye' Dyos Xky'aqlil.
15Lalun kyej b'entti'j jun kyyole' kyuk'i'lju' xjal najlqe' toju' tx'otx' lu, qu'n jaku' ajkyxi' k'ulul kye kydyos ex ajtkub' kyq'o'n chojb'il kywitz, jaku'tzun che txoklitzu'ye' kyu'n, jaku' che wane' ti'ju' kyoyaj,16mujqa jaku' che kub' kymujb'a'n kymyal kyuk'i'lju' kyk'wale', ajtzun kyxi' k'ulul kye kydyos jaku' che'x q'i'n kyk'wale' kyu'n tu'n kyk'ulun kywitzju' kydyos.
17Lalun che kub' kyb'incha'n kydyose' k'uxb'il, chi Dyos. Ninq'ij atl junjun ab'q'i (Ex 23.14-19; Dt 16.1-17)
18Kyik'sanku'ye' tq'ij wab'j mixti' ttx'amal kse'nx oje nchaq'e' kyeye', wuq q'ij tu'n kywanteye' wab'j lu toju' t-xjawil ab'ib' q'ma'ntl, qu'n a xjawju' kyb'je'tze' Ejipt.
19Kykyaqilju' tnejel kyk'wale' weqe'ye', exqe' tnejel kyal kywakyixe', tnejel kyal kyrite' ex kychib'e' qa tmanqe'.20Tetzun t-xel tnejel tal b'ur ktzajel kyq'o'ne' jun qpoj tman rit mujqa jun qpoj tman chib' te t-xel. Qatzun min saj kyq'o'ne', kb'el kytoqi'ne' tqulju' tal b'ur. Ex ktzajel kyq'o'ne' jun oyaj te t-xelju' tnejel kyk'wale'. Mix-a'lo' jun tzul nwitze' qa mixti' iq'i'n tu'n.
21Qaq q'ij che aq'unale', tojtzu'n twuqi'n q'ij che ojlale', maskye toj tq'ijlalil awaj awal mujqa ajtjaw b'uyit.
22Kb'el kyik'sa'n ninq'ij te wuq sman, aju' tq'ij tnejel twitz awal triy, exju' tq'ij twitz awal ajtjapun ab'q'i.
23Kykyaqilju' ichan che ul oxmaj toj ab'q'i nwitze' ayine' Dyos Manb'aj nche ajb'en aj Israel weye'.24Kywitzku'ye' che elexa' nxla'ja'ne' txqantl nimaqtnam, kxe'l nnimsa'ne' kytx'otx'e'. Mix-a'lo' jun kb'el etzante kytx'otx'e' qama che ul oxmaje' toj ab'q'i nwitze' ayine' Dyos Manb'aj.
25Ajtkub' kyq'o'ne' alu'mj te chojb'il, lalun kub' kyq'o'ne' tchk'el junx tuk'i'lju' wab'j ati ttx'amal, ex lalun kyej kyk'u'ne' t-xkyejb'len chojb'il te Tq'ij Tzaqpib'l te juntl q'ij.
26Kxe'l kyiq'i'nju'ye' tnejel twitz awal tb'anilqexi'x kjawil toju' kytx'otx'e', toju' njaye' ayine' Dyos Manb'aj Tdyosa.
Lalun ku'x kytzq'ajsa'ne' tchib'jil tal chib' toju' ta'l timi'ẍ ttxu, chi Qman Dyos te Moyses. Kub' ttz'ib'a'n Moyses kawb'il
27Tma Qman Dyos te Moyses: Tz'ib'anqe'ku'ju'ya yol lu, qu'n aye' tq'uqlil nyolju'ye' knb'incha'ye' tuk'i'la ex kyuk'i'l aj Israel, chij.
28Kab'naq (40) q'ij ex kab'naq (40) qonik'an ten Moyses tuk'i'l Qman Dyos, mixti' wan ex mixti' k'wan. Atzuntzu' kub'a' ttz'ib'a'na'ju' yol kyejni b'entti'j, aye'ju' lajoj chaq'b'il kwitzju' tz'len ab'j.29Tb'ajlenxi'tzun ja'lu ku'tz Moyses twi' witz Sinayi kyuk'i'lju' kab'e' tz'len ab'j jatz'ib'a'nqe'ka' kawb'il. Tetzunj tkb'u'l mixti' b'i'n tu'n qa intoq qoptz'aju' twitz tu'nju' yolin tuk'i'l Qman Dyos.30Tetzunj kyka'yi'nte Aaron kyuk'i'l kykyaqil aj Israel intoq qoptz'aj twitz Moyses, tzaj tchi kyi'j ex min eb'jo'k lq'e tk'etz.31Atzunte Moyses e'tzaj ttxko'n, tetzunj tzaj lq'e Aaron ex kykyaqilju' nejenel kyxol aj Israel, yolin kyuk'i'l.32Yajxi'tzun ch'i'ntl eb'aj tzajlq'eju' aj Israel, xitzun ma'n Moyses tkyaqilju' chaq'b'il kye, aju' tzaj tq'o'n Qman Dyos te twi' witz Sinayi.33Tetzunj tb'aj yolin kyuk'i'l, oktktxu'n twitz tu'n jun su't.
34Ajtzun tokx Moyses yolil twitz Qman Dyos neltiq'i'n su't ti'j twitz, ajtzun tetz nnoktq'o'n jumajtl. Atzunju' chaq'b'il ntk'mo'n te Qman Dyos nb'ajx tma'n kye aj Israel.35Ajtzun kyka'yinte aj Israel twitz Moyses nqoptz'aj, nok tq'o'n Moyses jumajtl su't ti'j twitz, ex neltiq'i'n jumajtl ajtokx yolil tuk'i'l Qman Dyos. Nuk'b'il ti'ju' q'ij te ojlab'l (Ex 31.12-17)
1E'b'ajtzun tb'u'yi'n Moyses aj Israel ex xitma'n kye: Mache tzaj tq'o'n Qman Dyos chaq'b'il weye' tu'n tb'inchet ja'lu:2Waqaq q'ij kche aq'unale', tojtzunju' twuqi'n q'ij kche ojlale', jun q'ijte' te ojlab'l kyeye' tu'n knimane' te Qman Dyos. Qu'mtzun alkyete matz'aq'unan toju' q'ij lu kb'el b'yet.3Ex jaxjaku' najlqe'ye' mixpeti' tu'n tku'x kq'aq'e' toju' q'ij te ojb'il, chij kye. Oyaj tu'n tajb'en teju' ja xjan (Ex 25.1-9)
4Xitma'ntl Moyses kye kykyaqil aj Israel: Matchaq' Qman Dyos tu'n tb'inchet ja'lu:5Kyb'u'yi'nktze' jun oyaj kxole' te Qman Dyos. Kykyaqilju' kyajb'il tu'n kyq'onte kyoyaj te Qman Dyos, kyq'onku' tuk'i'l tkyaqil kyk'u'j, q'anpwaq, saqpwaq, q'ank'uxb'il,6q'in morad, kyeq smo'n tk'i' cha'x, kyeq, tz'umin sed, t-smal chib',7ttz'umal rit uk'tza'n tu'n kyeq, tb'anil tz'u'n, tze akasya,8aseyt kye kandil, k'ok'sb'il teju' aseyt te xjansb'il, k'ok'sb'il teju' sturak,9ab'j kornalina ex chukchaq ab'j tb'anilqe' tu'n kyokq'et ti'ju' ẍa'y ex ti'ju' tal xb'alun ttzitk'u'ju' knejel pale, chi Moyses kye. Ti'xti' tu'n kyajb'en toju' ja xjan (Ex 39.32-43)
10Kykyaqilju' nb'ent chukchaq tb'anil aq'untl kyu'n, kuktzaj b'inchalteju' matxi' tchaq' Qman Dyos, aye' ja'lu:11aju' ja xjan exju' ja xb'alun te kutxb'ilte tuk'i'lxi'ju' twi', exqe'ju' tzuyb'ilte, e' ttz'lamal, e' tqul, e'tqan exqe'ju' tq'uqlil;12aju' kax tuk'i'l tjpel exqe'ju' tqul, exju' xb'alun te aq'pub'l toju' ja xjan,13aju' mes kyuk'i'lju' tqul ex tkyaqilju' kche ajb'el te, exju' wab'j okb'el q'et twitz Qman Dyos;14aju' kykb'el kandil te spik'un kyuk'i'lju' kche ajb'el te, exqe'ju' kandil tuk'i'lxi' kyaseytil;15aju' q'olb'eb'l tz'e'ysb'il sturak kyuk'i'lju' tqul, exju' aseyt te xjansb'il, exju' sturak k'ok'j, exju' xb'alun te ttziju' ja xjan;16aju' q'olb'eb'l chojb'il tuk'i'lju' tpariyil q'ank'uxb'il exqe'ju' tqul ex kykyaqilju' kche ajb'el te, exju' tkb'el a' te tx'ajb'il tuk'i'lju' tq'uqlil,17exqe'ju xb'alun teju' pe'n kyuk'i'lju' tqan ex tq'uqlil, exju' xb'alun te ttziju' pe'n,18exqe'ju' stak teju' ja xjan ex teju' pe'n kyuk'i'lju' kyaqwilil,19exqe'ju' xb'alun chmo'nqe' tu'n kyajb'en toju' ja xjan, exju' xb'alun xjan te pale Aaron, ex kxb'alunju' tk'wal te pale, chi Moyses kye. Kub' oyaj kyu'n tnam
20Kykyaqiltzu'n aj Israel eb'aj anj, aye' ate'toq twitz Moyses.21Kykyaqiltzunju' tzaj anq'in toj kyanmi eb'ju'l q'ol kyoyaj te Qman Dyos tu'n tkyaqil kyk'u'j tu'n tb'inchetju' Ja te Mujb'ab'ltib'il ex te tkyaqilju' kche ajb'el toj, exqe'ju' xb'alun nim kyoklen.22E' b'ju'l ichan ex qya tuk'i'l kyoyaj tu'n tkyaqil kyk'u'j kse'nxju' kub' kq'o'n toj kyanmi, tzaj kyiq'i'n u'wj, xmilq'ob'j, tqulq'ob'j ex toj ẍkyinb'aj q'anpwaqqe', ex chukchaq ti'xti' q'anpwaqile. Teyile junjun tzaj ti'n toyaj q'anpwaq te Qman Dyos kse'nxju' kub' tq'o'n toj tanmi.23Aye' atitoq kq'in morad, kyeq smo'n tk'i' cha'x, kyeq, tz'umni sed, t-smal chib', ttz'umal rit uk'tza'n tu'n kyeq mujqa tb'anil tz'u'n, b'aj tzaj kyiq'i'n.24Aye'tzunju' atitoq ksaqpwaq ex kq'ank'uxb'il b'aj tzaj kyi'n te Qman Dyos, exqe'ju' atitoq ktze akasya b'aj tzaj kyiq'i'n tu'n tb'inchet tkyaqilju' inojqelan.25Exqe' qya b'a'n che chmon tu'n q'ob'aj intoq tzaj kyiq'i'n kychemuj: xb'alun morad, xb'alun kyeq smo'n tk'i' cha'x, xb'alun kyeq ex tz'umin sed.26Aye'tzunju' qya b'a'n che chqon eb'jo'kten chqol t-smal chib', qu'n tzaj anq'in toj kyanmi tu'n kyaq'unan.27Aye'tzu'n nejenel tzaj kyiq'i'n ab'j kornalina ex chukchaq ab'j tb'anilqe' tu'n kyokq'et ti'ju' t-ẍa'y knejel pale ex ti'ju' ttzitk'u'j,28k'ok'sb'il ex aseyt teju' spik'un, ex teju' aseyt te xjanb'il ex teju' sturak k'ok'j.
29Kykyaqilju' ichan ex qya aj Israel tzaj anq'in toj kyanmi tu'n kyonin tu'n tb'inchetju' tchaq' Qman Dyos te Moyses, tzaj kyiq'i'n kyoyaj te Qman Dyos kse'nxju' tzaj anq'in toj kyanmi. Aq'unal ti'ju' ja xjan (Ex 31.1-11)
30Xitma'n Moyses kye aj Israel: Kyb'intzpe'ye', matxi' jaw t-sk'o'n Qman Dyos B'esaleel tk'wal Uri ex tchman Ur kxol tyajajil Juda,31ex matxi' tnojsa tu'nju' t-xew, tu'n nab'l, tu'n t-ximan ex ojtzqib'l, tu'n tel k'atz ex tu'n tb'inchante chukchaq aq'untl,32ex tu'n tb'inchante kyilb'ilalju' aq'untl kb'inchetil, ex aq'untl ti'j q'anpwaq, saqpwaq ex q'ank'uxb'il,33ex tu'n kyb'aj tb'incha'na tb'anil ab'j ex tu'n kykub' tq'o'n tojile kykb'el, tu'n taq'unan ti'j tze ex tu'n kykub' tb'incha'n kyilb'ilal chukchaq aq'untl twitz u'j.34Ex matxi' txiq'o'n kynab'l kykab'ilx tuk'i'l Aoliab' tk'wal Aysamak kyxolu' tyajajil Dan tu'n kyxnaq'tzan.35Matzaj tq'o'n kynab'l tu'n Qman Dyos tu'n kyb'inchante chukchaq aq'untl tb'anilqe', ex tu'n kyb'inchante kyilb'ilal aq'untl twitz u'j ex tu'n tkub' kytz'so'n ti'j xb'alun morad, xb'alun kyeq smo'n tk'i' cha'x, xb'alun kyeq ex tz'umin sed, ex tu'n kyb'inchante chukchaq tilb'ilal toj chemuj.
1Qu'mtzun a B'esaleel tuk'i'l Aoliab' che b'inchalteju' oje tchaq' Qman Dyos kyuk'i'l kykyaqilju' b'a'n che aq'unan ti'j chukchaq aq'untl, aye' oje txi' tq'o'n Qman Dyos kynab'l ex kyk'atzil tu'n kyb'inchet b'a'nxi'x tkyaqilju' k'ajb'el toju' ja xjan te k'u'lb'il, chi Moyses kye. Nim oyaj kub' kyq'o'n aj Israel
2E'tzajtzun ttxko'n Moyses B'esaleel tuk'i'l Aoliab' ex kykyaqilju' b'a'n che aq'unan ti'j chukchaq aq'untl, aye' ojetoq tzaj tq'o'n Qman Dyos kynab'l, qu'n ojetoq kyaq'kyib' tu'n kyonin ti'ju' aq'untl lu.3Aye'tzu'n aq'unal lu kyk'amju' oyaj te Moyses, aju' matxi'toq tzul kyi'n aj Israel tu'n ttzyet kyaq'unan ti'ju' nojqelan toju' ja xjan.
Aye'tzu'n aj Israel kukxtoq ttzaj kyiq'i'n kyoyaju' atl junjun q'ij kse'nxju' nkub' kyq'o'n toj kyanmi.4Aye'tzu'n aq'unalju' intoq che aq'unan ti'ju' ja xjan kyej ktenb'a'nju' kyaq'un5e'xi'tzuntz q'malte te Moyses:
Nimxi'xte' oyaj matxi' tzul kyu'n xjal kyetwitzju' inojqelan teju' aq'untl oje tchaq' Qman Dyos, chechij.
6Extzun tq'o'n Moyses tqanil kye ichan ex qya toj tkyaqilju' najb'il tu'n lalun tzaj kyiq'i'n txqantl oyaj teju' ja xjan. Ikytzun mqonjtza' tnamju' tu'n mitzaja' kyiq'i'ntlju' kyoyaj,7Qu'n nimxi'xtoqju' oyaj matxi'toq tzul tu'n tb'inchetju' aq'untl expe' laytoq b'aj. B'inchetju' ja xjan (Ex 26.1-37)
8Kykyaqiltzunju' nimxi'xtoq kyojtzqib'l ati kyekwitzju' txqantl aq'unal, kub' kyb'incha'nju' ja xjan. Kub' kb'incha'n tuk'i'l lajoj plaj xb'alun a kq'imalju': sed chub'i'ntwitz, q'in morad, q'in kyaq smo'n tk'i' cha'x ex q'in kyaq, ex ku'x ktz'so'n kab'e' tilb'ilal kyerb'in kyoj.9Teyile junjun plaj xb'alun kab'lajoj (12) metr tk'i' nik'janju' kwe', atzun kab'e' metrju' kwitz. Kykyaqilju' xb'alun junelni echb'enkye.10Ok ktz'so'n jwe' plaj xb'alun junx, ex ikx kb'incha kyi'ju' jwe'tl.11Ok kq'o'ntzun jte' kẍkyintz tu'n q'in morad ttxa'nju' tnejel xb'alun kyeju' jwe' mujb'a'n kten, ex ikx ttxa'nju' b'ajsb'il xb'alun kyeju' jwe'tl.12Kub' kyb'incha'n kab'naqlajoj (50) t-ẍkyinju' tnejel xb'alun kyeju' jwe' mujb'a'n kten, ex kab'naq lajojtl (50) ti'ju' b'ajsb'il xb'alun kyeju' jwe'tl tu'ntzun tb'ent kmujb'et.13Ex kub' kyb'incha'n kab'naqlajoj (50) tzuyb'ilkye q'anpwaqqe' tu'n kymujb'etju' kab'e' tnej xb'alun. Qu'mtzun jun tnejx e'ela'ju' xb'alun teju' ja xjan.
14Ex kub' tb'incha'n B'esaleel junlajoj (11) plaj xb'alun t-smal chib', tu'n tajb'en teju' ja xb'alun te kutxb'ilteju' ja xjan.15Teyile junjun plaj xb'alun oxlajoj metr tk'i' nik'jan (13.50) kynuqub', atzun kab'e' metr kywitz. Kykyaqil juniletoq echb'enkye.16Kub' ttz'so'n jwe' xb'alun te jun tnej ex waqaqtl te jun tnejtl.17Kub'tzun tb'incha'n kab'naqlajoj (50) t-ẍkyintz ttxa'nju' b'ajsb'il xb'alun teju' jun tnej, ex kab'naq lajojtl ti'ju' b'ajsb'il xb'alun teju' jun tnejtl.18Ex kub' tb'incha'n kab'naqlajoj (50) tzuyb'ilkye q'ank'uxb'ilqe' tu'n kmujb'etju' kab'e' tnej xb'alun teju' ja xb'alun.19Kub' tb'incha'n B'esaleel jun plaj ttz'umal rit uk'tza'n tu'n kyaq te twi'ju' ja xb'alun ex juntl tb'anil tz'u'n tu'n tjax tloqb'a'n tib'aj.20E kub'tzun tb'incha'n tz'lantz akasya teju' ja xjan ex e'kub' ttxoli'n wa'lile kten.21Te kyaje' tk'i' nik'jan metrchaq kwe'ju' tz'lan, atzun oxnaq jwe' (65) sentimetro kwitz.22Kykyaqilju' tz'lan e'kub' tb'incha'n kakab' kyjuch'ub' tu'n tb'ent ktzyunte kyib'. Kykyaqil ttz'lamalju' ja xjan e'kub' tb'incha'n ikju'.23Winqi'n tz'len e'kub' tb'incha'n teju' jun plaj toj tb'a'nq'ob',24ex e'kub'tq'o'n kab'naq (40) kyq'uqlil saqpwaq kyjaq'. Tjaq'iletzun junjun tz'lan atitoq kab'e' kyq'uqlil kyeju' kab'e' tjuch'ub'.25Ex winqi'n tz'lan e'kub' tb'incha'n teju' plaj toj tnayaju' ja xjan,26kyuk'i'lju' kab'naq (40) kyq'uqlil saqpwaqqe', teyiletzun junjun tz'len okxtq'o'n kakab' kyq'uqlil.27Atzu'n toj tkub'ex q'ij teju' ja xjan e'kub' tb'incha'n qaq tz'lan,28ex kab'e'tl tz'len teju' kab'e' ttx'u'k tojxju' plaj te tkub'ex q'ij.29Aye'ju' tz'lan lu e b'aj muje' twi'xi' jata'ju' tnejel kẍkyin. Ikxtzun tb'inchaju' kyuk'i'lju' kab'e' tz'lan kyeju' kab'e' ttx'u'k.30Qu'mtzun atitoq wajxaq tz'lan kyuk'i'l qaqlajoj kq'uqlil saqpwaqqe', kakab' tq'uqlil junjun tz'lan.
31Ex kub' tb'incha'n B'esaleel jwe' tqul akasyax kyeju' tz'lan toj jun plaj teju' ja xjan,32ex jwe' teju' jun plajtl, ex jwe'tl tqul kyeju' tz'len te ttze'lti'j toj tkub'exq'ij.33Atzunju' tqul toj nky'ajchaq kub' tb'incha'n tu'n tpon kanunx toj kykab'il plaj te tnuqub'ju' ja xjan toj kynky'ajchaqil kywe'ju' tz'lan.34E' b'aj tktxu'ntzun tz'lentz tu'n q'anpwaq, ex e'kub' tb'incha'n kẍkyin q'anpwaqqe'x tu'n kyexju' tqul kyoj ex oktktxu'nju' tqul tu'n q'anpwaq.35Ex kub' tb'incha'nju' xb'alun te aq'pub'l kyu'n q'in morad, kyaq smo'n tk'i' cha'x, kyeq ex sed chub'i'ntwitz, ex ku'x ttz'so'n kab'e' tilb'ilal kyerb'in toj.36Jaw tyob'a'ntzuntz kyu'n jte' tzuyb'ilte q'anpwaqqe' kyi'j kyaje' tqan akasya, ktxu'nqe' tu'n q'anpwaq a tkub'qe' kyib'aj kyaje' tq'uqlil saqpwaqqe'.
37Ex kub' tb'incha'n jun plaj xb'alun te ttziju' ja xb'alun tuk'i'l q'in morad, kyaq smo'n tk'i' cha'x, kyeq ex sed chub'i'ntwitz, b'incha'nqe' tb'anil tilb'ilal toj.38Ex kub' tb'incha'n jwe' tqan kyuk'i'l tzuyb'ilkye ex kyuk'i'l jwe' tq'uqlil q'ank'uxb'ilqe', eb'aj tktxu'nju' kyilb'ilalju' tqan toj kwi' kyuk'i'lju' kẍkyin tu'n q'anpwaq. B'inchet tkaxilju' yol kyejni b'entti'j (Ex 25.10-22)
1Kub' tb'incha'n B'esaleel kax akasya ttzeyil, te jun metr tk'i' lajoj sentimetro (1.10 m.) tnuqub', oxnaq jwe' (65) sentimetro twitz ex oxnaq jwe' (65) sentimetro twe'.2B'aj tktxu'n tojxi' ex ti'jxi' tu'n q'anpwaq ex oktq'o'n jun qnij tilb'ilal q'anpwaq ttxa'nile.3Ex kub' tb'incha'n kyaje' t-ẍkyin q'anpwaqqe' kyi'ju' kyaje' tqan, kakab' junjun plaj.4Ex kub' tb'incha'n jte' tqul akasyax, e'oktktxu'n tu'n q'anpwaq,5b'je'x tq'o'ntzuntz kyoju' t-ẍkyin ate'qe'k ttx'u'kju' kax, tu'n tb'ent tiq'et.
6Ex kub' tb'incha'nju' tjpel q'anpwaqxi'x, te jun metr tk'i' lajoj sentimetro (1.10 m.) tnuqub', atzun oxnaq jwe' (65) sentimetro twitz,7tuk'i'l kab'e' tilb'ilal kyerb'in q'anpwaqqe' b'incha'n tu'n pojb'il, jun junjun ttx'u'k tib'aju' tjpel.8Aju' tjpel kyuk'i'lju' kyerb'in jun tnejx e'ela' tu'n, kub' tq'o'n jun kyerb'in toj jun plaj, atzu'n juntl toju' jun plajtl.9Qu'mtzun kyej muje kywitz tziplqe' nche ka'yin tib'aj tjpelju' kax, atzu'n kyxik' kyejten lik'u'n tib'aju' tjpel. B'inchetju' mes tkb'elu' wab'j tu'n t-xjanset twitz Qman Dyos (Ex 25.23-30)
10Ex kub' tb'incha'n B'esaleel jun mes akasya ttzeyil, te kyajnaq lajoj (90) sentimetro tnuqub', kab'naqjo' (45) sentimetro twitz, atzun oxnaqjo' (65) sentimetro twe'.11B'aj tktxu'n tu'n q'anpwaq, ex oktq'o'n jun qnij q'anpwaq te tilb'ilal ttxa'nile.12Tjaq'xi'tzuntlju' tilb'ilal lu oktq'o'n jun qnijtl tilb'ilal q'anpwaqx, wuq sentimetro kxol.13Ex oktb'incha'n kyaje' t-ẍkyin q'anpwaqqe' kyi'ju' kyaje' tqan,14tjaq'ju' tal tilb'ilal tu'n kb'je'xju' tqul kyoj, tu'ntzun tb'ent tiq'etju' mes.15E'kub' tb'incha'n tqulju' mes akasyaqe' ex eb'jo'k tktxu'n tu'n q'anpwaq.16Ex e'kub' tb'incha'n kykyaqilju' che ajb'el tib'aju' mes q'anpwaqileqe' e'plat, e'pak', e'xar exqe' kop kykb'elju' oyaj a' kywitz. B'inchetju' q'anpwaq kykb'el kantil (Ex 25.31-40)
17Ex kub' tb'incha'n B'esaleel kykb'el kandil q'anpwaqile b'incha'n tu'n pojb'il: aju' tq'uqlil, tqan, e' tk'o'ẍil, e' tb'echil exju' t-xaq iqi'mile tib',18e'el waqaq tq'ob' ti'ju' tqan oxox junjun plaj.19B'incha'nk oxe' tb'echil xwakyi'n kten ti'jile junjun tq'ob'ju' inche el ti'ju' tqan, kse'n b'ech almendro, kyuk'i'lju' t-xaq ex tb'echil,20ex b'incha'nk kyaje' tb'echil xwakyi'n kten ti'ju' tqan, ikxju' kse'n b'ech almendro, kyuk'i'lju' t-xaq ex tb'echil.21Tjaq'iletzu'n ja inche ela' kakab' tq'ob' ti'ju' tqan, b'incha'nk junjun tb'echil xwakyi'n kten.22Jun tnejx e'ela'ju' tb'echil kyuk'i'lju' tq'ob' tuk'i'lju' tqan, q'anpwaqile b'incha'n tu'n pojb'il.23Ex e'kub' tb'incha'n wuq tkantilil ex pitxb'il kantil kyuk'i'lju' tkb'el tza'j, q'anpwaqqe'.24Oxnaq kab'lajoj tk'i' nik'jan (72.6) lib'r q'anpwaq b'aj tej tb'inchetju' kykb'el kantil kyuk'i'lju' che ajb'el te. B'inchetju' q'olb'eb'l tz'e'ysb'il sturak (Ex 30.1-5)
25Kub' tb'incha'n B'esaleel q'olb'eb'l te tz'e'ysb'il sturak, akasya ttzeyil. Te kab'naqjo' (45) sentimetrochaq twitz toj tkyajel plaj, atzun kyajnaq lajoj (90) sentimetro twe'. Majx xitiqa'n tib'ju' q'olb'eb'l kyuk'i'lxi' tuk'a.26Ex b'aj tktxu'nju' tib'aj tu'n q'anpwaq ex ti'jile tkyajel plaj exqe'tzunju' tuk'a, ex oktq'o'n jun qnij q'anpwaq ttxa'nile te tilb'ilal,27ex e'oktq'o'n t-ẍkyin q'anpwaqqe' tjaq'ileju' tilb'ilal, kab'e' toj jun plaj ex kab'e'tl toju' jun plajtl tu'n tb'ent tiq'et.28E' b'ajkub' tb'incha'nju' tqul akasyaqe' ex eb'jo'k tktxu'n tu'n q'anpwaq. B'inchet aseyt te xjansb'il ex sturak (Ex 30.22-38)
29Kub' tb'incha'n B'esaleel aseyt xjan te xjansb'il exju' sturak te k'ok'sb'il tb'anilxi'x, kse'n in kb'incha'nju' xjal ax kyaq'unju'. B'inchetju' q'ank'uxb'il q'olb'eb'l (Ex 27.1-8)
1Kub' tb'incha'n B'esaleel q'olb'eb'l te k'ok'sb'il akasya ttzeyil. Te kab'e' metr tuk'i'l junaqjo' sentimetrochaq (2.25 m.) twitz toj tkyajil plaj, atzun jun metr tuk'i'l junaqjo' sentimetro (1.25 m.) twe'.
2Kub' tb'incha'n kyaje' tuk'a kyoju' kyaje' ttx'u'k, majx kyiqa kyib' tuk'i'lju' q'olb'eb'l, e'oktktxu'ntzuntz tu'n q'ank'uxb'il.3Ex e'kub' tb'incha'n tkyaqilju' kche ajb'el teju' q'olb'eb'l q'ank'uxb'ilileqe', e'jotb'il, e'nimaqlaq, e' xokb'il ex e'tkb'el ttxalq'aq'.
4Ex kub' tb'incha'n jun parriy q'ank'uxb'il, ku'x tq'o'ntzuntz tjaq' ttziju' q'olb'eb'l tojxi' toj nik'janju' twe'.5Ex kub' tb'incha'n kyaje' t-ẍkyinju' parriy, e'oktq'o'n toju' kyaje' ttx'u'k, tu'n kyex q'etju' tqul kyoj.6Ex e'kub' tb'incha'n tqulju' q'olb'eb'l akasya ttzeyil ex eb'jo'k tktxu'n tu'n q'ank'uxb'il.7E' b'je'x tq'o'ntzuntz kyoju' t-ẍkyin ate'ktoq ttx'u'kju' q'olb'eb'l tu'n tb'ent tiq'et. Jul toju' q'olb'eb'l kub' tb'incha'n ex tze. B'inchetju' q'ank'uxb'il chkon (Ex 30.18)
8Kub' tb'incha'n B'esaleel tkb'el a' tuk'i'lju' tq'uqlil q'ank'uxb'ilile kyu'n klispej qya intoq che ajb'en ttziju' Ja te Mujb'ab'ltib'il. B'inchet tpenju' ja xjan (Ex 27.9-19)
9Kub' tb'incha'n B'esaleel tpenju' ja xjan: oktq'o'n kab'naqjo' (45) metr xb'alun sed chub'i'ntwitz toj tb'a'nq'ob'ju' pe'n,10kyi'j winqi'n tqan ex winqi'n tq'uqlil q'ank'uxb'ilqe', aye'tzu'n tzuyb'ilkye exju' kẍkyin saqpwaqqe'.11Tojtzu'n tnayaju' pe'n oktq'o'n kab'naq jwe' (45) metr xb'alun kyi'j winqi'n (20) tqan ex winqi'n tq'uqlil q'ank'uxb'ilqe', aye'tzu'n tzuyb'ilkye ex kẍkyin saqpwaqqe'.12Atzu'n toj tkub'exq'ij oktq'o'n junaq kab'e' (22) metr tk'i' nik'jan (22.50 m.) xb'alun kyi'j lajoj tqan ex lajoj tq'uqlil, saqpwaqqe' tzuyb'ilkye exju' kyẍkyin.13Ex oktq'o'n junaq kab'e' metr tk'i' nik'jan (22.50 m.) xb'alun tk'i' nik'jan toju' plaj te tjawetzq'ij.14Oktq'o'n wuq metr xb'alun toju' jun plaj te ttziju' pe'n kyi'j oxe' tqan ex oxe' tq'uqlil;15tojtzu'n jun plajtl oktq'o'n wuq metr xb'alun kyi'j oxe' tqan ex oxe' tq'uqlil.16Kykyaqilju' xb'alun ti'jileju' pe'n, sedile chub'i'ntwitz,17atzu'n kyq'uqlilju' tqan q'ank'uxb'ilqe', aye'tzu'n tzuyb'ilkye exju' kẍkyin saqpwaqqe', ktxu'nqe'toq kyilb'ilalju' tqan toj kwi' tu'n saqpwaq. Kykyaqilju' tqan atitoq kẍkyin saqpwaqqe'.
18Kub' tb'incha'n xb'alun te ttziju' pe'n kyuk'i'l q'in morad, kyeq smo'n tk'i' cha'x, kyeq ex sed chub'i'ntwitz, b'incha'nqe' tb'anil tilb'ilal toj. Te b'eljoj metr tqan, atzun kab'e' metr tk'i' junaqjo' sentimetro (2.25 m.) twe', ikxju' kse'nqe' xb'alun teju' pe'n.19Atitoq kyaje' tqan kyuk'i'l kyaje' tq'uqlil q'ank'uxb'ilqe'; aye'tzunju' tzuyb'ilkye kyuk'i'l kẍkyin saqpwaqqe', ktxu'nqe'toq kyilb'ilalju' tqan toj kwi' tu'n saqpwaq.20Kykyaqilju' stak teju' ja xjan ex teju' tpen q'ank'uxb'ilqe'. K'uxb'il e'ajb'en ti'ju' ja xjan
21Tkyaqilju' k'uxb'il b'aj tej tb'inchetju' ja xjan teju' yol kyej b'entti'j, jaw kyajlal kyu'n aj Leb'i tojtkwent Itamar tk'walju' pale Aaron kse'nxju' tchaq' Moyses.
22Tb'incha B'esaleel tk'wal Uri ex tchman Ur, kyxol tyajajil Juda, tkyaqilju' tchaq' Dyos te Moyses tu'n tb'inchet.23Onin Aolyab' ti'j, ju' tk'wal Aysamak kyxol tyajajil Dan, qu'n aq'unaltoq ti'j k'uxb'il, chmol ex tzol tilb'ilal kyuk'i'l q'in morad, kyeq smo'n tk'i' cha'x, kyeq ex tz'umin sed.
24Junaq jun kyintal tk'i' junaq oxe' lib'r (21.23) q'anpwaq b'aj ti'ju' ja xjan, mlo'n kse'nxju' malb'il toju' ja xjan. Aju' q'anpwaq lu oyaj kub' q'o'n te Qman Dyos.
25Atzu'n saqpwaq b'uyit tej tjaw kyajlalju' tnam japun toj oxnaq oxlajoj kyintal tk'i kab'e' lib'r (73.02), mlo'n kse'nxju' malb'il toju' ja xjan.26Kykyaqilju' matxi'toq che el winqi'n ab'q'i, japun kyajlal toj oxnaq o'lajmutx' wajxaqk'al wuqlajnaq lajoj (603,550), teyile junjun tzaj ti'n jun piẍ saqpwaq, kse'nxju' malb'il toju' ja xjan.27Ex atitoq oxnaq kab'lajoj kyintal tk'i' oxnaq lib'r (72.60) saqpwaq, tu'n tajb'en kye tq'uqlil tqanju' ja xjan ex kye tq'uqlil tqanju' xb'alun te aq'pub'l. Tkyaqilju' saqpwaq lu ajb'en tu'n kyb'inchet jo'naq (100) tq'uqlil, oxnaq kab'lajoj lib'r tk'i' nik'jan (72.6) saqpwaq xi' ti'j junjun tq'uqlil.28Tu'nju' saqpwaq jaw b'uyit kxol tnam, b'aj tktxu'n B'esaleel kyilb'ilalju' tqan toj kwi' ex e'kub' tb'incha'nju' tzuyb'ilkye ex kẍkyin.
29Japun tajlalu' q'ank'uxb'il tzaj q'i'n te oyaj te Qman Dyos toj kab'naq junlajoj kyintal tk'i' kab'naq lib'r (51.40),30tu'ntzunju' q'ank'uxb'il lu eb'aj b'inchet tq'uqlilju' tjpelu' Ja te Mujb'ab'ltib'il, exju' q'olb'eb'l q'ank'uxb'il tuk'i'lju' tpariyil q'ank'uxb'ilx ex kykyaqilju' kche ajb'el te,31ex ikxqe' t-stakyilju' ti'j pe'n kyuk'i'lju' tq'uqlil, ju' ati ti'jileju' ja xjan ex tq'uqlil ttziju' pe'n. B'inchet kyxb'alun pale (Ex 28.1-43)
1E' b'aj b'inchetju' xb'alun tu'n kyajb'en toju' ja xjan kyu'n q'in: morad, kyeq smo'n tk'i' cha'x ex kyeq. Ex ikx b'inchetju' t-xb'alun Aaron tb'anilxi'x kse'nxju' tchaq' Qman Dyos te Moyses.
2Ajb'en q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz tu'n tb'inchetju' ẍa'y.3Kub' slik'u'n jte' plaj q'anpwaq tx'no'n tu'n pojb'il, ex eb'ajkub' jon ayelechaqju' kse'n tlamal q'in tu'n tb'ent kychmet kyuk'i'l q'in morad, kyeq smo'n tk'i' cha'x, kyeq ex sed.4E' b'jo'k q'o'n kab'e' qnij xb'alun ti'j kab'e' ttx'u'kju' ẍa'y.5Exju' k'alb'ilte ẍa'y ax b'inchb'enteju': tuk'i'l q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz kse'nxju' tchaq' Qman Dyos te Moyses.
6E'kub' q'o'n kab'e' ab'j kornalina kyoju' kykb'el q'anpwaqqe', tz'ib'a'nk kyb'i tk'wal Israel kywitz, kse'n b'inchb'ente jun sey.7E'kub'tzun tq'o'n B'esaleel kyib'aju' kab'e' t-semu'l ẍa'y tu'n kytzaj na'n aj Israel, kse'nx tchaq' Qman Dyos te Moyses.
8Atzunju' tal xb'alun tok ttzitk'u'ju' ẍa'y b'incha'ntoq tuk'i'l q'anpwaq, q'in morad, kyeq smo'n tk'i' cha'x, kyeq ex sed chub'i'ntwitz, kse'nxju' ẍa'y.9Pintoq, te junaq kab'e' (22) sentimetro twitz toj tkyajel plaj.10Txoli'nk kyaje' txol tb'anil ab'j ti'j, toktoq jun ab'j rub'i, jun krisolito ex jun esmeralda toju' tnejel txol;11atzu'n toju' tkab' txol toktoq jun ab'j kranate, jun sapiro ex jun jade;12atzu'n toj toxi'n txol toktoq jun ab'j jasinto, jun akata ex jun amatista;13atzu'n toj tkyaji'n txol toktoq jun ab'j topasyo, jun kornalina ex jun jaspe. Kykyaqilju' ab'j lu atitoq kykb'el q'anpwaqqe',14kab'lajojtoq (12) kyb'aj, qu'n kab'lajoj (12) kyb'aju' tk'wal Israel; teyile junjun b'iyj b'incha'ntoq kse'n b'incha'na' jun sey.
15Kub' kyb'incha'n jte' xpatx'q'anpwaqxi'x te taq'e'lju' tal xb'alun ttzitk'u'ju' ẍa'y.16Ex kub' kb'incha'n kab'e' kykb'elju' ab'j kornalina q'anpwaqqe' ex kab'e' t-ẍkyinju' tal xb'alun ttzitk'u'j ẍa'y q'anpwaqx; ex okkyq'o'n kyi'ju' kab'e' ttxa'n jawl,17kyi'jtzunju' t-ẍkyin lu e'okkyq'o'n xpatx'q'anpwaq.18Aye'tzu'n kab'e' kytxa'n xpatx'q'anpwaq okkyq'o'n kyi'j kab'e' kykb'elju' ab'j ex kyej kyb'incha'n b'a'nxi'x kyib'aju' kab'e' qnij xb'alun twi' t-semu'lju' ẍa'y toju' plaj twitz.19Ex kub' kb'incha'n kab'e'tl t-ẍkyin q'anpwaqx ex okx kq'o'n kyjaq' kab'e' ttxa'nju' tal xb'alun ttzitk'u'ju' ẍa'y toju' plaj kub'l.20Kub' kb'incha'n kab'e'tl t-ẍkyin q'anpwaqqe' ex okkyq'o'n toju' plaj twitzxi' kyeju' tznij xb'alun ttx'u'kju' ẍa'y ex toju' plaj kub'l tk'etzju' tz'isb'en tib'aj ch'i'nju' k'alb'ilte ẍa'y.21Oktzun kmujb'a'n t-ẍkyinju' ẍa'y kyuk'i'l t-ẍkyinju' tal xb'alun tok ttzitk'u'j tuk'i'l jun taq'e'l morad, tu'ntzun tkyejtenju' tal xb'alun tib'aju' k'alb'ilte ẍa'y tu'n lalun tz'el tpa'ntib' ti'j, kse'nxju' tchaq' Qman Dyos te Moyses.
22Okx kychmo'n pinpa't nxi' tib'ajxi' xb'alun ku'j tuk'i'l tq'imal morad.23Kub'xb'u'tz'i'n ttziju' tqul toj nky'ajchaq kse'n chalek tz'u'n, tu'n lalun txi laqj.24Okkyq'o'n kyilb'ilal lob'j kranad kyuk'i'l q'in morad ttxa'nileju' pinpa't, kyeq smo'n tk'i' cha'x, kyeq ex sed chub'i'ntwitz.25Ex e'ok kyb'incha'n tal kanpani q'anpwaqile ex b'aj kyxulpi'n kyuk'i'lju' kranad ttziyileju' tpinpa't pale, jun tal kanpani ex jun kranad, juntl tal kanpani ex juntl kranad, se'nxju' tchaq' Qman Dyos te Moyses.
27E'kub' chmo'n xb'alun sed ku'jqe' te Aaron ex kyeju' tk'wal tu'n jun chmol,28ex ikxju' toj kwi' kyuk'i'lju' ẍipb'ilkye exju' kykalsonsiy sed chub'i'ntwitz;29ex kyk'alb'il b'incha'n tu'n sed chub'i'ntwitz, q'in morad, kyeq smo'n tk'i' cha'x ex kyeq, kyuk'i'l tb'anil tilb'ilal kyoj kse'nxju' tchaq' Qman Dyos te Moyses.
30Ex kub' kyb'incha'n plak q'anpwaq, techlalju' kyoklen te pale ex okkytz'ib'a'n yol lu twitz, kse'n jun sey: Xjansa'n twitz Qman Dyos.31Ok kyk'lo'ntzuntz tu'n jun taq'e'l morad tib'aju' ẍipb'il twi', kse'nxju' tchaq' Qman Dyos te Moyses. Japunb'aj tb'inchetju' ja xjan (Ex 35.10-19)
32E' japunb'aj aq'untl ti'ju' ja xjan exju' Ja te Mujb'ab'ltib'il tuk'i'l Dyos. B'aj kyb'incha'n aj Israel tkyaqilju' aq'untl kse'nx tchaq' Qman Dyos te Moyses,33xikq'o'ntzun ja xjantz te Moyses, exju' Ja te Mujb'ab'ltib'il kyuk'i'l kykyaqilju' kche ajb'el te: e' tzuyb'ilte e' ttz'lamal, e' tqul, e'tqan ex e'tq'uqlil,34exju' twi' ja xb'alun ttz'umal rit uk'tza'n tu'n kyeq, exju' tb'anil tz'u'n, exju' xb'alun te aq'pub'l toju' ja xjan,35exju' kax k'ub'lteju' yol kyejni b'entti'j kyuk'i'lju' tqul exju' tjpel,36exju' mes kyuk'i'lju' kche ajb'el te, exju' wab'j tu'n t-xjanset twitz Qman Dyos,37exju' kykb'el kandil q'anpwaq kyuk'i'lju' tkantilil nk'u'mileqe'tl kyuk'i'lju' che ajb'el te, exju' kyaseytil te kq'aq'al kandil,38exju' q'olb'eb'l q'anpwaq, exju' aseyt te xjansb'il, exju' sturak k'ok'j exju' xb'alun te ttziju' Ja te Mujb'ab'ltib'il,39exju' q'olb'eb'l q'ank'uxb'il tuk'i'lju' tpariyil q'ank'uxb'ilx, exqe'ju' tqul kyuk'i'l kykyaqilju' kche ajb'el te, exju' tkb'el a' te tx'ajb'il tuk'i'lju' tq'uqlil,40exqe'ju' xb'alun teju' pe'n kyuk'i'lju' tqan ex tq'uqlil, exju' xb'alun te ttziju' pe'n, exqe'ju' aqwil kyuk'i'lju' stak teju' pe'n, ex kykyaqilju' kche ajb'el toju' ja xjan exju' Ja te Mujb'alb'ltib'il,41exqe'ju' xb'alun chemuj tu'n kyajb'en toju' ja xjan exju' t-xb'alun Aaron tb'anilxi'x, ex kxb'alunju' tk'wal te pale.
42B'aj kyb'incha'n aj Israel tkyaqil, kse'nxju' tchaq' Qman Dyos te Moyses,43tetzunj tka'yinte Moyses matxi'toq b'ajb'ent kyu'n ikxi'xu', xitqani'n ky'i'wb'il kyib'aj. Xjansetju' ja xjan
1Tzaj yolin Qman Dyos te Moyses ex tma:
2Toj tnejel q'ij te tnejil xjaw, kjawil tb'incha'nju'ya ja xjan exju' Ja te Mujb'ab'ltib'il.3Ex q'onkxju'ya kax k'ub'lteju' yol kyejni b'entti'j toj, jpunka ti'j tu'nju' xb'alun te aq'pub'l.4Ex q'onkxju'ya mes toj tuk'i'lju' kykb'el kandil. B'inchanku'ya mes b'a'nxi'x ex q'onqe'ku'ya kandil tib'aju' kqan.5Ex q'onkxju'ya q'olb'eb'l q'anpwaq te tz'e'ysb'il sturak twitzju' kax k'ub'lteju' nyole' kyejni b'entti'j, ex q'onkju'ya xb'alun te ttziju' ja xjan.6Ex q'onku'ju'ya q'olb'eb'l te chojb'il ttziju' ja xjan, aju' Ja te Mujb'ab'ltib'il.7Ex q'onku'ju'ya tkb'el a' te tx'ajb'il kxolju' Ja te Mujb'ab'ltib'il tuk'i'lju' q'olb'eb'l, ex nojsanku'xa tu'n a'.8Ex q'onqe'kju'ya xb'alun ti'jileju' pe'n, ex q'onkju'ya xb'alun te ttziju' pe'n.
9Q'intztzu'na aseyt te xjansb'il ex qonjxa tib'aju' ja xjan, ex kyib'aj kykyaqilju' ate'qe' toj. Kb'el t-xjansa'ntzuntza ikju' kyuk'i'l kykyaqilju' kche ajb'el toj, kjel tentzuntz te jun najb'il xjan.10Ex qonku'ya aseyt te xjansb'il tib'aju' q'olb'eb'l te chojb'il ex kyib'aju' kche ajb'el te, tu'ntzun tok te jun q'olb'eb'l xjanxi'x.11Qonku'ya aseyt tib'aju' tkb'el a' te tx'ajb'il tuk'i'lju' tq'uqlil, tu'ntzun ja'lu kxjansetel tu'na.
12Iq'inqe'tztzuna Aaron kyuk'i'lju' tk'wal ttziju' Ja te Mujb'ab'ltib'il tu'n kyichin te xjanb'ilkye,13ex tu'n toktq'o'n Aaron ju' t-xb'alun nim toklen. Ex q'onjxa aseyt te xjansb'il toj twi' tu'ntzun t-xjanset te pale nwitze'.14Ex txkonqe'tzju'ya tk'wal ex q'onkju'ya kxb'alun ku'j.15Ex qonjxa aseyt toj kwi', kse'n aj tjax tq'o'na toj twi' Aaron tu'ntzun kyok te pale nwitze'. Ajtzun tjax qetju' aseyt toj kwi', kjeltzun kyoklentz te pale nwitze' tejumajx exqe' kyyajajil toj tkyaqil tab'q'iyil, chi Dyos te Moyses.
16Atzunte Moyses tb'incha tkyaqil kse'nxju' tchaq' Qman Dyos te.
17Iktzu'n jaw b'incha'na' ja xjan toju' tnejel q'ij teju' tnejil xjaw te tkab' ab'q'i kyb'jetzlenxi' aj Israel Ejipt.18Jawtb'incha'n Moyses ja xjan ex e'kub'tq'o'n tq'uqlil, eb'aj tnk'u'nju' tz'lan, e'oktq'o'n tqul, ex e'kub' twab'a'nju' tqan.19Ex jaw tb'incha'nju' ja xb'alun tuk'i'lju' twi' te kutxb'ilteju' ja xjan, kse'nxju' tchaq' Qman Dyos te.20Tzajtzun tiq'i'n Moyses kab'e' tz'len ab'j jatz'ib'a'nqe'ka' kawb'il, e'ku'x tq'o'ntzuntz toju' kax k'ub'lteju' yol kyeni b'entti'j; ex e'oktq'o'n kab'e' tqulju' kax ex kub' tq'o'n tjpel, xitiq'i'ntzuntz toju' ja xjan; oktq'o'nju' xb'alun te aq'pub'l e'wb'ilteju' kax kse'nxju' tchaq' Qman Dyos te.
22Okxtq'o'nju' mes toju' Ja te Mujb'ab'ltib'il, kub' tq'o'n toju' plaj te tnayaju' ja xjan, ti'jxi'ju' xb'alun te aq'pub'l.23Kub' tq'o'nju' wab'j tib'aju' mes tu'n t-xjanset twitz Qman Dyos, kse'nx tchaq' Qman Dyos te.
24Ex okxtq'o'n kykb'el kandil toju' Ja te Mujb'ab'ltib'il twitzju' mes, toju' plaj te tb'a'nq'ob'ju' ja xjan,25ex e'okttxqo'nju' kandil twitz Qman Dyos, kse'nxju' tchaq' Qman Dyos te.
26Okxtq'o'nju' q'olb'eb'l q'anpwaq toju' Ja te Mujb'ab'ltib'il twitzju' xb'alun te aq'pub'l,27ex kub' ttz'e'ysa'nju' sturak k'ok'j tib'aj, kse'nxju' tchaq' Qman Dyos te.
28Oktzun tq'o'n Moyses xb'alun ttziju' ja xjan;29ex kub' tq'o'nju' q'olb'eb'l te chojb'il nqayin ttziju' ja xjan, aju' Ja te Mujb'ab'ltib'il, e'kub' ttz'e'ysa'ntzun alu'mjtz ex oyaj twitz awal tib'aj, kse'nxju' tchaq' Qman Dyos te.
30Kub' tq'o'nju' tkb'el a' kxolju' Ja te Mujb'ab'ltib'il tuk'i'lju' q'olb'eb'l, ex ku'x tnojsa'ntzuntz tu'n a' te tx'ajb'il.31Atzuntzu' intoq jatza' kyiq'i'na' Moyses, Aaron exqe'ju' tk'wal a' te tx'ajb'il kq'ob' ex kqan.32Intoq che tx'ajun aj kyokx toju' Ja te Mujb'ab'ltib'il ex ajkyxi' lq'e tk'etzju' q'olb'eb'l, kse'nxju' tchaq' Qman Dyos te Moyses.
33Tetzun b'ajsb'il, jawtb'incha'n Moyses ti'jile pe'n ti'jileju' ja xjan exju' q'olb'eb'l, ex oktq'o'nju' xb'alun te ttziju' pe'n. Muj tib'aju' ja te mujb'ab'ltib'il (Nm 9.15-23)
Tetzunj tb'aj b'entju' aq'untl tu'n Moyses,34kub' jupeju' muj tib'aju' Ja te Mujb'ab'ltib'il ex kub' noj toju' ja xjan tu'n tajwalil Qman Dyos.35Mixtoqtzunti' tu'me'l tu'n tokx Moyses toju' Ja te Mujb'ab'ltib'il qu'n matxi'toq kub' jupeju' muj tib'aj ex matxi'toq kub' noju' ja xjan tu'n tajwalil Qman Dyos.36Ajtzun tjawju' muj tib'aju' ja xjan injaw kyiq'i'n aj Israel kynajb'il, ex intoq xikyljo'n kyb'e,37qatzun minti' in jawju' muj ex mixti' injaw kyiq'i'nju' kynajb'il, qu'n tzmaxi' inche ik'b'etju' aj tjawju' muj.38Te q'ijtl atitoqju' muj te Qman Dyos tib'aju' ja xjan, atzu'n qonik'an q'aq' atitoq tib'aj, kywitzku' aj Israel toj tkyaqilju' kyb'e.

Bible Society in Guatemala

https://app.library.bible/content/aea9d9099feb3a24

expand_more
chevron_leftBab Sebelumnya
chevron_rightBab Selanjutnya