Read Levítico 1

Levítico1

Chojb'il k'ok'sb'il

¹Txkonjtz Moyses tu'n Qman Dyos toju' Ja te Mujb'ab'ltib'il ex tzaj tma'n te:

²Yolina kyuk'i'l aj Israel, q'manxa kye qa ati jun matzaj tiq'i'n toyaj kyi'ju' alu'mj weye', ati tu'n ttzaj tiq'i'n kyi'ju' twakyix mujqa kyi'ju' trit.

³Qa kyi'ju' twakyix sela'ju' alu'mj kb'eltq'o'n te chojb'il k'ok'sb'il, jun tman wakx mixti' ttzakajil. Tu'ntzun tk'met te, ati tu'n tkub' tq'o'n nwitze' ttziju' Ja te Mujb'ab'ltib'il,⁴kb'el tq'o'nju' tq'ob' tib'aj twi'ju' alu'mj, iktzun kk'metela' alu'mju' tu'n tnajsetju' til.⁵Kb'el tb'yo'nju' tman wakx nwitze', aye'tzuntlju' pale tk'wal Aaron ajtkub' kyq'o'nju' chik' nwitze', kb'el kywitxk'a'n tib'aj ex ti'jileju' q'olb'eb'l ati ttziju' Ja te Mujb'ab'ltib'il.⁶Aju' kb'el q'onte alu'mj te chojb'il k'ok'sb'il, k'elel tiq'i'nju' ttz'umal, kb'ajel tpẍu'ntzuntz,⁷aye'tzunju' pale kb'el kynk'u'nju' si tib'aju' q'olb'eb'l ex k'okyil kyq'o'n tq'aq'al,⁸tu'ntzun tkub' kyq'o'nju' alu'mj pẍu'nl exju' twi' tib'aj, exju' unt kyi'ju' t-xqintxa.⁹Aju' kb'el q'onte chojb'il k'ok'sb'il, kche ttxja'ju' t-xqintxa exju' tkux alu'mj, atzunju' pale kb'el tz'e'ysante tkyaqil tib'aj q'olb'eb'l te jun oyaj tz'e'ysa'n tb'anil tk'ok'jal weye'.

¹⁰Qatzun kyi'ju' trit mujqa kyi'ju' tchib' sela'ju' alu'mj kb'eltq'o'n te chojb'il k'ok'sb'il, tmanju' ktzajel tiq'i'n mixti' ttzakajil,¹¹ex kb'el tb'yo'n toj tnayajkya'j teju' q'olb'eb'l nwitze'. Aye'tzunju' pale tk'wal Aaron kb'el kywitxk'a'n tchk'elju' alu'mj tib'aj ex ti'jeleju' q'olb'eb'l;¹²ex kb'el tpẍu'nju' alu'mj toj tx'naji'n, atzunju' pale kb'el nk'unteju' alu'mj pẍu'nl tib'aju' si ink'ant tib'aj q'olb'eb'l junx tuk'i'lju' twi' exju' unt kyi'ju' t-xqintxa.¹³Yajxi'tzuntel aju' kb'el q'onte chojb'il k'ok'sb'il kb'ajel ttxjo'nju' t-xqintxaju' alu'mj exqe'ju' tkux, atzunju' pale kb'el tz'e'ysante tkyaqil tib'aj q'olb'eb'l te jun oyaj k'ok'j weye'.

¹⁴Qatzun pich'ju' alu'mj kb'eltq'o'n te chojb'il k'ok'sb'il te ninb'ilweye', jun palomste' ktzajel tiq'i'n mujqa xlak'uk'.¹⁵Kb'eltq'o'n paleju' pich' tib'aju' q'olb'eb'l: k'elel tiq'i'nju' twi' ex k'elel tiq'i'nju' tchk'el toj jun plaj teju' q'olb'eb'l, yajxi'tzuntel kb'el ttz'e'ysa'n t-xmilalju' pich' tib'aj.¹⁶K'elel tiq'i'nju' twab'l exju' ati toj ex kb'eltq'o'n toju' plaj tjawetzq'ij teju' q'olb'eb'l ja inkub'a' q'eta'ju' tza'j;¹⁷kb'elex taq'pu'n ttzitk'u'ju' pich' tu'n t-xi' aq'puj toj kab'e', kb'el ttz'e'ysa'ntzuntz tib'aju' si tib'aj q'olb'eb'l te chojb'il k'ok'sb'il, te jun oyaj tz'e'ysa'n tb'anil tk'ok'jal weye', chiku'ya kye, chi Qman Dyos te Moyses. Oyaj twitz awal k'ok'e'kywitz

¹Qama tzul jun xjal tuk'i'l toyaj twitz awal nwitze', arin tb'anilxi'x tu'n ttzaj tiq'i'n ex kjawix tq'o'n aseyt ex sturak tib'aj;²kxel tiq'i'ntzuntz kyeju' pale tk'wal Aaron, juntzun kyxol kjawil q'inte jun jot arin tuk'i'l aseyt junx tuk'i'lju' sturak, kb'el ttz'e'ysa'ntzuntz tib'aj q'olb'eb'l te jun oyaj tz'e'ysa'n te nab'ab'l tb'anil tk'ok'jal weye'.³Atzunju' kjel tpa'ntib', qu'n xjan na' kyxolju' oyaj inkub' tz'e'yset te ninb'ilweye', kxe'l te Aaron kyuk'i'lju' tyajajil.

⁴Qama txi' kyq'o'n jun kyoyaje' twitz awal tzq'ajsa'n toj chuj, kyq'onxe' muqintl ti'j tb'anil arin xyuq'i'n tuk'i'l aseyt mixti' ttx'amal, mujqa xwok' muqin mixti' ttx'amal witxk'a'n aseyt kyi'j.

⁵Qatzun twitz awalju' kyoyaje' tzq'ajsa'n toj sarten, ati tu'n kyb'inchanteye' tu'n tb'anil arin xyuq'i'n tuk'i'l aseyt mixti' ttx'amal;⁶kb'ajel kypiẍu'ne' ex kb'ajel kywitxk'a'ne' tu'n aseyt, qu'n oyaj te twitz awal.

⁷Qatzun twitz awalju' kyoyaje' tzq'ajsa'n toj k'wil, ati tu'n tb'inchet tu'n tb'anil arin ex tuk'i'l aseyt.⁸Ajtzun tb'aj kyb'incha'nju'ye' oyaj kyuk'i'lju' junjunl ti'xti' lu, ktzajel kyiq'i'ntzuntze' nwitze' ex kxel kyq'o'ne' teju' pale, atzunte kxel iq'inte tk'etz q'olb'eb'l.⁹Atzuntzu' kjawitza' tiq'i'n pale ch'i'n tu'n tkub' ttz'e'ysa'n tib'aj q'olb'eb'l te jun oyaj tz'e'ysa'n te nab'ab'l tb'anil tk'ok'jal weye'.¹⁰Atzunju' kjel tpa'ntib' ti'ju' oyaj, aju' jun tnej xjan kyxolju' oyaj inche tz'e'yset te ninb'ilweye', kxel q'et te Aaron ex kyeju' tyajajil.

¹¹Mixti'xte jun ttx'amal oyaj twitz awal kb'elex kyq'o'ne' aju' intzaj kyq'o'ne' weye', expe' mixti'x jun ttx'amal ex myel kb'el tz'e'yset te oyaj te ninb'ilweye'.¹²B'a'nte' tu'n tkub' kyq'o'ne' ttx'amal ex myel nwitze' te jun oyaj tnejel twitz awal, naqtzun o'kx mya te jun oyaj tu'n tkub' tz'e'yset te jun tb'anil tk'ok'jal.

¹³Ilti'j kxel kyq'o'ne' atz'an kyoju' kyoyaje' twitz awal, ex lalun tzaj kyq'o'ne' kyoyaje' twitz awal mixwitti' atz'an toj teju' yol kyejni b'entti'j wu'ne' ayine' Dyos Manb'aj.

¹⁴Qama tzaj kyq'o'ne' kyoyaje' tnejel twitz awal weye', ate ktzajel kyq'o'nju'ye' aju' matxi' tijin twitz, wensi'n ex pa'n twi'.¹⁵Kb'el kyqo'ne' aseyt tib'aju' kyoyaje' ex kb'el kyq'o'ne' sturak tib'aj, qu'n oyaj twitz awal.¹⁶Kb'el kytz'e'ysa'ntzun paletz ch'i'n twitz awal pa'n twi' ex aseyt junx tuk'i'l tkyaqilju' sturak, k'okeltzuntz te jun oyaj te nab'ab'l tz'e'ysa'n te ninb'ilweye', chiku'ya kye, chi Qman Dyos te Moyses. Chojb'il te mujb'ab'ltib'il

¹Qa ati jun makub' tq'o'n chojb'il te mujb'ab'ltib'il nwitze', tman wakx mujqa ttxu wakx kyi'ju' talu'n, a kb'el tq'o'nju' mixti' ttzakajil.²Aju' kb'el q'onteju' oyaj kb'eltq'o'n tq'ob' tib'aj twi'ju' alu'mj, kb'el tb'yo'ntzuntz ttziju' Ja te Mujb'ab'ltib'il. Aye'tzuntlju' pale kxel kywitxk'a'nju' chik' tib'aj ex ti'jile q'olb'eb'l.

³Alkyete makub' tq'o'n toyaj alu'mj te jun chojb'il te mujb'ab'ltib'il, kb'el tq'o'nju' unt tok ti'j t-xqintxaju' alu'mj te jun oyaj tz'e'ysa'n nwitze',⁴exqe'ju' tchinaq', exju' unt twittze'lti'j, exju' unt tok kyi'ju' twab'l, ju' k'elel tiq'i'n junx kyuk'i'lju' tchinaq'.⁵Kb'el kytz'e'ysa'n pale tkyaqil ja'lu tib'aj q'olb'eb'l, junx tuk'i'lju' alu'mj ju' kb'el tz'e'yset tib'aju' si in k'ent te jun oyaj tz'e'ysa'n tb'anil tk'ok'jal weye'.

⁶Qa ati jun makub' tq'o'n jun talu'n kyi'ju' trit te jun chojb'il te mujb'ab'ltib'il nwitze', jun tman mujqa jun ttxu mixti' ttzakajil kb'eltq'o'n.⁷Qama kub' tq'o'n jun qpoj tman rit, ajtkub' tq'o'n nwitze'⁸kb'eltq'o'n tq'ob' tib'aju' twi', kb'el tb'yo'ntzuntz ttziju' Ja te Mujb'ab'ltib'il. Aye'tzunju' pale kb'el kywitxk'a'nju' chik' tib'aj ex ti'jileju' q'olb'eb'l.

⁹Alkye makub' tq'o'n alu'mj te jun chojb'il te mujb'ab'ltib'il, kb'eltq'o'n unt exju' tje elni joyet twitzxi'x tb'aqil, exju' unt tok kyi'ju' t-xqintxa te jun oyaj tz'e'ysa'n nwitze',¹⁰kyuk'i'lju' kab'e' tchinaq' exju' unt tok kyi'j exju' unt twittze'lti'j, exju' unt tok kyi'ju' twab'l, ju' k'elel tiq'i'n junx kyuk'ilju' tchinaq'.¹¹Kb'el ttz'e'ysa'ntzun paletz tkyaqil ja'lu tib'aj q'olb'eb'l te jun oyaj k'a'chb'il tz'e'ysa'n te ninb'ilweye'.

¹²Qatzun ttxu chib' kb'eltq'o'n nwitze',¹³kb'eltq'o'n tq'ob' toj twi', kb'el tb'yo'ntzuntz ttziju' Ja te Mujb'ab'ltib'il, aye'tzuntlju' pale kb'el kywitxk'a'nju' chik' tib'aj ex ti'jileju' q'olb'eb'l.

¹⁴Aju' kb'el q'onte alu'mj, ate kb'el tq'o'nju' ti'ju' oyaj tz'e'ysa'n te ninb'ilweye' aju' unt tok kyi'ju' t-xqintxa,¹⁵exju' kab'e' tchinaq', exju' unt tok kyi'j, exju' unt twittze'lti'j, exju' unt tok ti'ju' twab'l, ju' k'elel tiq'i'n junx tuk'i'lju' tchinaq'.¹⁶Tkyaqiltzun ja'lu kb'el ttz'e'ysa'nju' pale tib'aju' q'olb'eb'l te jun oyaj k'a'chb'il tz'e'ysa'n, tb'anil tk'ok'jal. Tkyaqilju' unt weye' ayine' Dyos Manb'aj.

¹⁷Jun kawb'ilte' lu kjelten tejumajx kyeye' ex kye kyk'wale' jaxjaku' mache'xa'ye': mixti' tu'n t-xi' kych'yo'ne' unt exju' chik', chiku'ya kye, chi Qman Dyos. Chojb'il tu'ntpaj il

¹Tzaj tma'n Qman Dyos te Moyses tu'n t-xitma'n kye aj Israel kjalu:

²Qa ati jun xb'inchan il ex mya xima'nju' tu'n, tu'n tik' tib'aju' nchaq'b'ile', a kb'inchetel ja'lu:

³Qa aju' kynejel pale xb'inchan il ex makub' tz'aqju' til tib'aju' tnam, ati tu'n tkub' tq'o'n jun tman wakx mixti' ttzakajil nwitze', te jun chojb'il tu'n tpaju' il xtb'incha.⁴Ktzajel tiq'i'n nwitze' ttziju' Ja te Mujb'ab'ltib'il, atzuntzu' kb'el tq'o'na' tq'ob' tib'aj twi'ju' wakx, kb'el tb'yo'ntzuntz nwitze'.⁵Yajxi'tzuntel axte ktzajel q'inte ch'i'n tchk'elju' wakx ex kxe'l tiq'i'n toju' Ja te Mujb'ab'ltib'il;⁶atzuntzu' kb'elixa' tq'o'nju' tq'ob' toju' chik', ex kb'el twitxk'a'n wuq maj nwitze' tu'me'lju' xb'alun teju' ja xjan.⁷Ex k'okel t-sun ch'i'nju' chik' kyi'ju' tuk'a q'olb'eb'l tz'e'ysb'il sturak, ju' ati nwitze' toju' Ja te Mujb'ab'ltib'il, atzunju' txqantl chik' kb'el tqo'n t-xeju' q'olb'eb'l tz'e'ysb'il chojb'il k'ok'sb'il, ju' ati ttziju' Ja te Mujb'ab'ltib'il.⁸Yajxi'tzuntel k'elel tiq'i'n tkyaqilju' unt kyi'j t-xqintxaju' tal tman wakx kb'eltq'o'n te chojb'il tu'n tpaj il,⁹ex kyi'ju' kab'e' tchinaq' exju' unt tok kyi'j, exju' ati twittze'lti'j, exju' unt ati kyi'ju' twab'l, ju' ati tu'n kyel tiq'i'n junx kyuk'i'lju' tchinaq',¹⁰kse'n in b'inchet ti'ju' tman wakx inkub' q'et te chojb'il te mujb'ab'ltib'il, kb'el ttz'e'ysa'ntzun paletz tib'aju' q'olb'eb'l tz'e'ysb'il chojb'il k'ok'sb'il.¹¹Atzu'n ttz'umalju' tal tman wakx ex tkyaqilju' tchib'jil, tuk'i'lju' twi', tkux, t-xqintxa exju' ttxa¹²—mujqa tkyaqilju' wakx—, k'elex tiq'i'n ti'jxi'ju' najb'il toj jun plaj ẍtilun jankub' q'eta' tza'j, tib'ajtzunju' txqan tza'j kb'el tb'incha'n si, k'okel tq'o'ntzun tq'aq'altz.

¹³Qatzun kykyaqil aj Israel makyb'incha jun il ex myate xima'nju' kyu'n, exqa mix-a'lo'x jun sel tnik' ti'ju' kyb'inchb'aj mya q'o'n tu'n kyb'inchante toju' nchaq'b'ile' ex iktzu'n sela' yal kyil,¹⁴ajtzun tb'injtzju' kyil xkyb'incha, ati tu'n tkub' tq'o'n teyle junjun jun qpoj tman wakx te chojb'il tu'n tpaj il. Kxe'l kyiq'i'n twitzju' Ja te Mujb'ab'ltib'il,¹⁵aye'tzunju' tijwnaq te tnam kb'el kyq'o'n kyq'ob' tib'aj twi'ju' qpoj tman wakx, nwitze', axtzuntzu' kb'ela' kyb'yo'n.¹⁶Atzuntlju' kynejel pale kxe'l tiq'i'n ch'i'n tchk'elju' qpoj tman wakx toju' Ja te Mujb'ab'ltib'il,¹⁷kb'elex tq'o'n twitq'ob' toju' chik' ex kxel twitxk'a'n wuq maj nwitze' twitzju' xb'alun te aq'pub'l.¹⁸Ex k'okel t-sun ch'i'nju' chik' kyi'j tuk'a q'olb'eb'l, ju' ati nwitze' toju' Ja te Mujb'ab'ltib'il. Atzunju' txqantl chik' kb'el tqo'n t-xeju' q'olb'eb'l tz'e'ysb'il chojb'il k'ok'sb'il, ju' ati ttziju' Ja te Mujb'ab'ltib'il.¹⁹Ex k'elel tiq'i'n t-untilju' qpoj tman wakx ex kb'el ttz'e'ysa'n tib'aju' q'olb'eb'l;²⁰axte kb'inchetilju' ti'ju' qpoj tman wakx lu kse'nx nb'inchet ti'j qpoj tman wakx nkub' q'et te chojb'il tu'n tpaj il; ikytzu'n kb'ela' nk'u'je' tu'nju' pale, kb'el nnajsa'ntzun kyiltze'.²¹K'elextzun tiq'i'n qpoj tman wakxtz ti'jxi' najb'il, kse'nxju' nb'inchet ti'ju' tnejel qpoj tman wakx, qu'n a chojb'ilju' tu'n tpaj kyilju' tnam.

²²Qa ati jun nejenel matb'incha jun il min q'o'n tu'n tb'inchet toj nchaq'b'ile', jun aj il te' maskye mixtoqti' xima'n tu'n, tu'n tb'inchante.²³Ajtzun teltnik' ti'ju' il xtb'incha, kxe'l tiq'i'n jun chib' mixti' ttzakajil te chojb'il tu'n tpaju' til.²⁴Kb'eltq'o'n tq'ob' tib'aj twi'ju' chib' ex kb'el tb'yo'n nwitze' ja inche kub'a' b'yeta'ju' alu'mj tu'n kykub' tz'e'yset, qu'n chojb'ilte' tu'n tpaj il.²⁵Atzunju' pale kjawil tiq'i'n ch'i'n tchk'elju' alu'mj xkub' q'et te chojb'il tu'n tpaj il tu'n twitq'ob', k'okel t-suntzuntz kyi'j tuk'a q'olb'eb'l tz'e'ysb'il chojb'il k'ok'sb'il, atzu'n txqantl chik' kb'el tqo'n t-xe q'olb'eb'l.²⁶Ex kb'el ttz'e'ysa'n tkyaqilju' unt tib'aj q'olb'eb'l, kse'nxju' in b'inchet ti'ju' unt teju' chojb'il te mujb'ab'ltib'il. Iktzu'n kb'ela' nk'u'je' tu'nju' pale, kb'el nnajsa'ntzun til nejeneltze'.

²⁷Qama b'inchan il jun xjal prow ex mya xima'nju' tu'n, tu'ntzunju' lu matz'elyal ati tpaj, qu'n min q'o'n toj nchaq'b'ile',²⁸ajtzun teltnik' ti'ju' il xtb'incha, kxe'l tiq'i'n jun ttxu chib' mixti' ttzakajil te chojb'il tu'n tpaju' il xtb'incha.²⁹Kb'el tq'o'nju' tq'ob' tib'aj twi'ju' alu'mj, ju' kb'eltq'o'n te chojb'il tu'n tpaj il, kb'el tb'yo'ntzuntz ja inkub' q'eta' chojb'il k'ok'sb'il.³⁰Atzunju' pale kjawil tiq'i'n ch'i'n chik' tu'n twitq'ob' ex k'okel t-sun kyi'j tuk'a q'olb'eb'l tz'e'ysb'il chojb'il k'ok'sb'il, atzunju' txqantl chik' kb'el tqo'n t-xeju' q'olb'eb'l.³¹Ex ikx k'elel tiq'i'n tkyaqilju' unt ti'j kse'n inel iq'et ti'ju' chojb'il te mujb'ab'ltib'il ex kb'el ttz'e'ysa'n unt lu tib'aju' q'olb'eb'l te jun tk'ok'jal tb'anilxi'x weye'. Iktzu'n kb'ela' nk'u'je' tu'nju' pale, ex kb'el nnajsa'ne' tilju' xjal lu.

³²Qatzun aju' xjal lu matzaj tiq'i'n jun rit te chojb'il tu'n tpaju' il, jun ttxu mixti' ttzakajil ktzajel tiq'i'n.³³Kb'el tq'o'nju' tq'ob' tib'aj twi'ju' rit, kb'el tb'yo'ntzuntz te jun chojb'il tu'n tpaj il ja inche kub'a' b'yeta'ju' alu'mj tu'n kytz'e'yset.³⁴Atzunju' pale kjawil tiq'i'n ch'i'n tchk'elju' alu'mj xkub' q'et te chojb'il tu'n tpaj il tu'n twitq'ob' ex k'okel t-sun kyi'j tuk'a q'olb'eb'l tz'e'ysb'il chojb'il k'ok'sb'il, atzunju' txqantl chik' kb'el tqo'n t-xeju' q'olb'eb'l.³⁵Ex k'elel tiq'i'n tkyaqilju' unt ti'j kse'n inel iq'et ti'ju' qpoj tman wakx nkub' q'et te chojb'il te mujb'ab'ltib'il, ex kb'el ttz'e'ysa'n unt tib'aj q'olb'eb'l junx kyuk'i'lju' oyaj tz'e'ysa'n te ninb'ilweye'. Ikytzu'n kb'ela' nk'u'je' tu'nju' pale, kb'el nnajsa'ne' tilju' xjal lu. Nuk'b'il ti'j chojb'il tu'ntpaj il

¹Qa ati jun xjal matxi txko'n tu'n t-xi' tziyal ti'j jun ti'xti' matil mujqa matb'i, extzunqa min xtaj tu'n ttziyante, ilju' intb'incha'n ex k'okel q'et te til.

²Qa ati jun xjal matxi ttzyu'n jun ti'xti' tz'il, jun kyimni txkup tz'il, tojk'ul txkup mujqa aluma'n, mujqa txkup in qittinje twitz tx'otx', kjel tz'ilix tu'n ex ati tpaj, maskyepe' min xtil.

³Qa ati jun xjal matxi ttzyu'n ttz'ilil xjal ex min xtil, exqa yajxi'tl sel tnik' ti'j, ati tpaj.

⁴Qa ati jun xjal matz'el tma'n jun tyol toj ojqelb'il tu'n tb'inchante jun b'a'n mujqa jun myab'a'n, extzunqa yajxi'tl sel tnik' ti'ju' xttziya ju' min xima'ntoq tu'n, ati tpaj.

⁵Aju' xjal matz'elyal toj alkyexku'ju' il lu, ilti'j tu'n tjatz tpa'n til⁶ex kb'eltq'o'n jun ttxu rit mujqa jun ttxu chib' te chojb'il nwitze' tu'n tpaju' il xtb'incha, tu'ntzunju' chojb'il lu kchjetel tilju' xjal tu'nju' pale, kb'el najsettzun tiltz.

⁷Qatzun mixti' tu'me'l tu'n tlq'onte jun qpoj tman rit, ktzajel tiq'i'n jun muj xlak'uk' mujqa jun muj tal paloms tu'n tpaju' il xtb'incha: jun te chojb'il tu'n tpaj il, atzu'n juntl te chojb'il k'ok'sb'il.⁸Che kxe'l tq'o'n teju' pale, atzunju' pale nejl kb'el tq'o'nju' chojb'il tu'n tpaj il, k'elel tiq'i'n twi';⁹ex kxel twitxk'a'n ch'i'n tchk'elju' alu'mj te chojb'il tu'n tpaj il toj jun plaj teju' q'olb'eb'l, atzunju' txqantl chik' k'elel tytz'o'n t-xeju' q'olb'eb'l, qu'n chojb'il tu'n tpaj il.¹⁰Atzunju' tkab' kb'eltq'o'n te chojb'il k'ok'sb'il, kse'nxju' nuk'b'il q'ma'ntl; iktzu'n kchjetela' tilju' xjal tu'nju' pale, knajseteltzun tiltz.

¹¹Qatzun mixti'x tu'me'l tu'n tlq'onte jun muj xlak'uk' mujqa jun muj tal paloms, ktzajel tiq'i'n kyaje' lib'r tk'i' nik'jan tb'anil arin te jun oyaj tu'n tpaju' til, mixti' tu'n tkux tq'o'n aseyt mujqa sturak tib'aj, qu'n jun oyajte' tu'n tpaj il.¹²Kxe'l tq'o'n teju' pale, atzunju' pale kjawil tiq'i'n jun jot te nab'ab'l ex kb'el ttz'e'ysa'n tib'aju' q'olb'eb'l junx kyuk'i'lju' oyaj inche tz'e'yset te ninb'ilweye'. Jun oyajte' tu'n tpaj il,¹³tu'ntzun tchjet alkyexku' il xtb'inchaju' xjal tu'nju' pale, kb'el najsettzun tiltz. Atzunju' minti' xb'aj ti'ju' oyaj twitz awal kxe'l teju' pale, chiku'ya kye, chi Qman Dyos te Moyses. Chojb'il tu'ntpaj kyil aj Israel

¹⁴Tzaj tma'n Qman Dyos te Moyses ikjalu:

¹⁵Alkyete naqx myanim xb'inchan il tu'n qa min xkub' tq'o'n tkyaqilju' oyaj tu'n tq'onte weye', ati tu'n ttzaj tiq'i'n jun tman rit mixti' ttzakajil kyi'ju' talu'n te jun chojb'il tu'n tten b'a'n nwitze'. Ati tu'n toktq'o'na twi'ju' tman rit kse'nxju' tajlal tu'n saqpwaq, kse'nxju' malb'il q'ma'n toju' ja xjan kyeju' oyaj tu'n kytene' b'a'n wuk'i'le'.¹⁶Aju' xjal lu ati tu'n tchjonte twi'ju' xkyej tiq'i'n ti'ju' oyaj xjansa'n nwitze', tuk'i'l jun tjwe'yi'n tnejtl tib'ajxi'ju' lu, aju' tajlal lu kxe'l tq'o'n teju' pale. Tu'ntzunju' tman rit kb'eltq'o'n te chojb'il tu'n tten b'a'n wuk'i'le', oktk'ma' najsb'il til tu'n pale, knajseteltzun tiltz.

¹⁷Qa ati jun xjal mab'inchan il tu'nju' matb'incha jun myab'a'n min tma'n toj nchaq'b'ile', maskye minti' sel tnik', ati tpaj ex kjelten myab'a'n tten wuk'i'le'.¹⁸Qu'mtzun ati tu'n ttzaj tiq'i'n jun tman rit mixti' ttzakajil kyi'ju' trit, ati tu'n tmanteya jte' twi', ex kxe'l tiq'i'n teju' pale te jun chojb'il tu'n tten b'a'n wuk'i'le', tu'ntzun tk'monteju' xjal lu najsb'ilteju' til, ju' min xima'ntoq tu'n, tu'n tb'inchante, knajseteltzun tiltz.¹⁹Jun chojb'ilte' tu'n tten b'a'n wuk'i'le', qu'n myab'a'n ttenju' xjal lu nwitze', chi Dyos. Chojb'il tu'ntpaj sb'ub'l

¹Tzaj tma'n Qman Dyos te Moyses kjalu:

²Qa ati jun xjal mab'inchan il nwitze' tu'nju' makub' t-sb'u'n twnaqil ti'j jun ti'xti' makyej oqxena'n te mujqa matxi majina'n te, mujqa matz'el telq'a'n jun ti'xti' te,³mujqa makub' tewa'n qama tz'el yal jun ti'xti' tu'n, ju' xini tz'aqi, mujqa tu'nju' mattziya jun yol mya ax, (kyu'n alchaqxkyeku' ti'xti' lu inqo b'inchana' il),⁴ati tpaj tu'nju' il lu. Qu'mtzun ati tu'n t-xi' tanjsa'n ti'ju' ti'xti' xkub' telq'a'n, mujqa naq sel t-xk'a'yu'n, mujqa aju' kyajni oqxeni'n te mujqa aju' naq sel yal tu'n,⁵mujqa naq alkyexku' ti'xti'ju' mattziya jun tyol ti'j mya ax. Ati tu'n t-xi' tanjsa'n ti'j tkyaqil teju' tajaw tuk'i'l jun tjwe'yi'n tnej, aj tq'onteju' chojb'il tu'n tten b'a'n wuk'i'le'.⁶Atzunju' chojb'il kb'eltq'o'n nwitze' jun tman rit mixti' ttzakajil, aya kq'malte jte' twi'ju' rit ktzajel tiq'i'n kyi'ju' trit, kxel tq'o'ntzuntz teju' pale te chojb'il tu'n tten b'a'n wuk'i'le'.⁷Iktzu'n kchjetela' tilju' xjal tu'nju' pale nwitze' ti'j alkyexku' ti'xti' lu ja xb'inchana' il, ex kb'el najsetju' til, chi Dyos. Chik'b'ab'l kyi'j chojb'il k'ok'sb'il

⁸Tzaj tma'n Qman Dyos te Moyses tu'n kyb'ajx tma'nju' nuk'b'il kyi'ju' chojb'il k'ok'sb'il, te Aaron ex kyeju' tk'wal ikjalu:
Kjel q'etju' alu'mj te chojb'il tib'aj ttxalq'aq' tib'aj q'olb'eb'l toj tkyaqil qonik'an tzmaxi'j ajtb'aj tu'n q'aq'.¹⁰K'okyel tq'o'n pale t-xb'alun ex tkalsonsiy sed, k'okyil tentzuntz jtolte ttza'jilju' alu'mj tib'aj q'olb'eb'l, ex kb'eltq'o'n ttx'u'k q'olb'eb'l.¹¹Yajxi'tzuntel k'elel tch'ixpu'n t-xb'alun, kxel tiq'i'nju' tza'j ex kb'eltq'o'n toj jun tkub'el ẍnu'l ti'jxi' kynajb'ile'.

¹²Aju' q'aq' ink'ant tib'aj q'olb'eb'l mixti' tu'n tyupj. Ati tu'n tokxtq'o'n pale t-siyilju' q'aq' tkyaqil prim ex tu'n tokx tb'incha'nju' alu'mj tib'a q'aq', ju' ktz'e'ysetel, ex kb'el tz'e'ysetju' t-until chojb'il te mujb'ab'ltib'il tib'aj q'olb'eb'l.¹³Ati tu'n tk'antju' q'aq' kukxju' tib'aj q'olb'eb'l. Mixti' tu'n tyupj, chi Dyos te Moyses. Chik'b'ab'l ti'j oyaj twitz awal k'ok'e'kywitz

¹⁴Aye'ju' xnaq'tzb'il lu nyolin kyi'ju' oyaj twitz awal: Kb'el kyq'o'n pale tib'aju' q'olb'eb'l nwitze'.¹⁵Juntzun kyxol kjawil tiq'i'n jun txab' arin, ju' kub'ni q'o'n te oyaj ex ch'i'n aseyt, tuk'i'ltzu'n tkyaqilju' sturak ati tmoj oyaj, che kb'el ttz'e'ysa'n tib'aju' q'olb'eb'l te jun oyaj tz'e'ysa'n te nab'ab'l tb'anil tk'ok'jal weye'.¹⁶Atzunju' lay b'aj ti'ju' oyaj kxel kywan Aaron kyuk'i'lju' tk'wal, mixti' ttx'amal ex toj jun najb'il xjansa'n twitpenju' Ja te Mujb'ab'ltib'il.¹⁷Mixti' tu'n kytzq'ajsante tuk'i'l ttx'amal. Qu'n a kyeju' oje txi' nq'o'ne' ti'ju' oyaj tz'e'ysa'n inkub' q'o'n nwitze', ex xjanxi'x kyoklen kse'n kyoklen chojb'il tu'n tpaj il ex tu'n kyten b'a'n wuk'i'le'.¹⁸Majx kjeltenju' lu toju' tq'ijlalil tzul, kykyaqilju' ichan tyajajil Aaron qe' che wal ti'ju' q'o'n kye kyi'ju' oyaj tz'e'ysa'n nwitze'. Ex alkyexku' jun ti'xti' mapon tiqli ti'j kjel xjan, chi Qman Dyos te Moyses. Kyoyaju' pale

¹⁹Tzaj tma'n Qman Dyos te Moyses kjalu:

²⁰A kyoyaj Aaron ja'lu kyuk'i'lju' tk'wal kb'el kyq'o'n nwitze' ajkyok te pale: kyaje' lib'r tk'i' nik'jan tb'anil arin te jun oyaj twitz awal k'ok'e'kywitz, nik'jan kb'el kyq'o'n te prim ex nik'jantl ajtok qale, mixti' jun q'ij laywit kub' kyq'o'n.²¹Ati tu'n kyb'inchanteju' oyaj toj jun sarten, smo'n twitz b'a'nxi'x tuk'i'l aseyt, kb'el kyq'o'ntzuntz aq'pu'nchaqtl te jun oyaj tk'ok'jal nwitze'.²²Ikytzu'n kb'ela' tb'incha'n kynejel pale tyajajil Aaron aju' xjansa'ntl te t-xel; wewe' oyaj lu kukxju', ex majx kb'ajel tu'n q'aq'.²³Tkyaqil kyoyaju' pale majx kb'ajel tu'n q'aq', ex mix-a'lote kxel wante, chi Dyos. Chik'b'ab'l Kyi'j chojb'il tu'ntpaj il

²⁴Tzaj tma'n Qman Dyos te Moyses tu'n kyb'ajx tma'nju' nuk'b'il kyib'aju' chojb'il tu'n tpaj il, kye Aaron kyuk'i'lju' tk'wal ikjalu:
Ati tu'n tkub' b'yetju' alu'mj nwitze' aju' kb'el q'et te chojb'il tu'n tpaj il, janche kub'b'yeta' alu'mj tu'n kykub' tz'e'yset, qu'n xjanxi'x toklen.²⁶Aju' pale kb'el q'onte chojb'il tu'n tpaj il, b'a'n tu'n twan ti'j, naq o'kx ati tu'n tkub'ten walte toj jun najb'il xjan twitpenju' Ja te Mujb'ab'ltib'il.²⁷Ex alkyexku' ti'xti' matz'ok tiqli ti'j tchib'jilju' alu'mj kjelten xjan, qatzun matz'ok witxli chik' ti'ju' t-xb'alun ati tu'n ttxjet toj jun najb'il xjan.²⁸Kb'el pa'yetju' tx'otx' k'wil ja xloqlona' chib'j oyaj, qatzun q'ank'uxb'ilju' k'wil ja xloqlona' naq kb'ajel jqet twitz ex kjawil txjet toj.

²⁹Xjanxi'x toklenju' chojb'il lu, oqe'kxju' pale b'a'n tu'n kywan ti'j.³⁰Atzunju' alu'mj xini q'et te chojb'il tu'n tpaj il, ju' xini iq'etju' tchk'el toju' Ja te Mujb'ab'ltib'il tu'n tnajsetju' il, mixti' tu'n t-xi' ch'yet. Ati tu'n tkub' tz'e'yset. Chik'b'ab'l kyi'ju' chojb'il tu'ntpaj kyil aj Israel

¹Xjanxi'x kyoklenju' chojb'il tu'n kytene' b'a'n wuk'i'le'. Aye' chik'b'ab'l ja'lu kyib'aj:²Xi' kb'ela' b'yeta' alu'mj kxel q'et te chojb'il tu'n kytene' b'a'n wuk'i'le' janche kub'a' b'yeta' alu'mj inche'x q'et tu'n kykub' tz'e'yset, atzunju' tchk'el ati tu'n t-xi' witxk'et tib'aj ex ti'jileju' q'olb'eb'l.³Ati tu'n tkub' q'et tkyaqil t-untilju' alu'mj: jni'ju' ati ti'j tje exju' tok ti'jileju' t-xqintxa,⁴exju' kab'e' tchinaq', exju' unt tok kyi'j exju' ati twittze'lti'j, exju' ati ti'ju' twab'l, aju' lu ati tu'n kyel iq'et junx kyuk'i'lju' tchinaq'.⁵Kb'eltzun ttz'e'ysa'n paletz tib'aju' q'olb'eb'l, te jun oyaj tz'e'ysa'n te ninb'ilweye'. Jun chojb'ilte' tu'n kytene' b'a'n wuk'i'le',⁶ex b'a'n tu'n kywan kykyaqilju' pale ti'j, naq o'kx ati tu'n kywante toj jun najb'il xjan, qu'n xjanxi'xte' toklen.

⁷Ikx chojb'ilju' tu'n kytene' b'a'n, kse'n jun chojb'il tu'n tpaj il, ex ax chik'b'ab'lju' kyi'j te kykab'il: teju' pale kb'inchalteju' chojb'il tu'n tk'metju' najsb'il il kxe'la'ju' alu'mj kb'el q'et.⁸Ex ikx kjelju' ttz'umal alu'mj teju' pale kb'inchalteju' alu'mj te chojb'il k'ok'sb'il makub'tq'o'n jun xjal.⁹Ex kykyaqilju' oyaj twitz awal k'ok'e'kywitz b'incha'n toj chuj ex b'incha'n toj k'wil b'o's t-xe ex toj sarten kxe'l teju' pale kb'el q'onteju' oyaj.¹⁰Ex ikx kb'inchetelju' kyi'j kykyaqilju' oyaj twitz awal k'ok'e'kywitz, xyuq'i'n tuk'i'l aseyt mujqa kukx ttenju', ati tu'n t-xi' kyeju' tyajajil Aaron, junelni kxe'l kye, chi Dyos. Chik'b'ab'l kyi'ju' chojb'il te b'inchjtib'il

¹¹Aye' chik'b'ab'l ja'lu kyib'aju' chojb'il te b'inchjtib'il, ju' inkub' q'et nwitze':¹²Qa te aq'b'il chjonteju' chojb'il, ktzajel kyq'o'ne' muqin mixti' ttx'amal xyuq'i'n tuk'i'l aseyt ex xwok' muqin mixti' ttx'amal witxk'a'n aseyt ti'j ex muqin tu'n tb'anil arin xyuq'i'n tuk'i'l aseyt;¹³ex ktzajel kyq'o'ne' wab'j muqin tuk'i'l ttx'amal junx tuk'i'lju' chojb'il te aq'b'il chjonte ex te mujb'ab'ltib'il.¹⁴K'elel pa'yet jun tnej weye' ti'j tkyaqilju' oyaj tu'n t-xi' q'et teju' pale kb'el witxk'ante tchk'elju' alu'mj te chojb'il te mujb'ab'ltib'il.

¹⁵Ati tu'n t-xi' ch'yet tchib'jilju' alu'mj makub' q'et te chojb'il te aq'b'il chjonte ex te mujb'ab'ltib'il tojxju' q'ij ajtkub' q'et; mixti' tu'n tkyaj klet jun tx'naj te juntl q'ij.¹⁶Qatzun tu'n tjapun jun yol xkub' q'eta'ju' alu'mj, mujqa matzaj anq'in kyk'u'je', ati tu'n t-xi' ch'yet tojxju' q'ij ajtkub' q'et, qatzun mixti' xb'aj, b'a'n tu'n t-xi' ch'yet toj juntl q'ij;¹⁷qatzun atix tchib'jilju' alu'mj toj toxi'n q'ij, ati tu'n tkub' tz'e'yset tkyaqil.¹⁸Qatzun ati jun matxi tch'yo'n tchib'jilju' alu'mj te chojb'il te mujb'ab'ltib'il toj toxi'n q'ij, lay nk'amju'ye' chojb'il lu ex lay tz'ok toj tajlal, k'elel ik'etju' chib'j lu. Alkyete mach'yon ti'j ati til tu'n tpaj.

¹⁹Qama tz'ok tiqli chib'j ti'j alkyexku' ti'xti' tz'il, kb'el tz'e'yset ex lay txi' ch'yet.
Kykyaqilju' ẍtilsa'n kyib' b'a'n tu'n kych'yonteju' chib'j.

²⁰Qama ch'yon jun xjal tz'ilsa'n tchwinqlal ti'ju' chojb'il te mujb'ab'ltib'il, ju' makub' q'o'n nwitze', ati tu'n tex xla'jetju' xjal lu ti'jxi'ju' ttanam.

²¹Alkyete xjal qama tz'ok ttzyu'n alkyexku' ti'xti' tz'il, qa kytz'ilil xjal mujqa kytz'ilil alu'mj, mujqa alkyexku' juntl ti'xti' tz'il, extzun matxi tch'yo'nju' tchib'jilju' chojb'il te mujb'ab'ltib'il makub' q'o'n nwitze', k'elex xla'jet ti'jxi'ju' ttanam, chi Qman Dyos. Chik'b'ab'l ti'ju' unt ex ti'ju' chik'

²²Tzaj tma'n Qman Dyos te Moyses tu'n t-xitma'n kye aj Israel kjalu:
Mixti' tu'n t-xi' kych'yo'ne' ky-until tman wakx, qpoj tman rit, mujqa chib'.²⁴Atzu'n ky-untilju' alu'mj kub'ni b'yo'nqe' mujqa kub'niqe' tzaqu'n kyu'n tojk'ul txkup, o'kx b'a'n tu'n tajb'ena' kyu'ne' te juntl ti'xti', mixti' tu'n t-xi' kych'yo'ne'.²⁵Alkyete matxi tch'yo'n ky-until alu'mj ju' inche kub' q'o'n nwitze' te jun oyaj tz'e'ysa'n, ati tu'n tex xla'jet toju' ttanam.²⁶Jachaqxjaku' mache anq'ina'ye', mixti' tu'n kych'yonteye' tchk'el pich' ex tchk'el txkup.²⁷Aju' xjal in ch'yon alkyexku' chik', ati tu'n tex xla'jet toju' ttanam, chi Qman Dyos. Aju' ati toklen pale ti'j

²⁸Tzaj tma'n Qman Dyos te Moyses tu'n t-xitma'n kye aj Israel kjalu:
Alkyete matzaj q'onte jun chojb'il te mujb'ab'ltib'il weye', ati tu'n ttzaj tiq'i'n nwitze'.³⁰Aku' ktzajel iq'inteju' oyaj tz'e'ysa'n nwitze', aju' ttzitk'u'j tuk'i'lxi' t-until tu'n ttzaj q'o'n weye'.³¹Kb'el ttz'e'ysa'n paleju' unt tib'aj q'olb'eb'l, atzunju' ttzitk'u'j kxe'l te Aaron ex kyeju' tyajajil.³²Kyeju' pale kxe'la' kykuxju' alu'mj te kyb'anq'ob', ju' inche kub' q'et te chojb'il te mujb'ab'ltib'il, te jun oyaj kye.³³Teju' pale kb'el q'onteju' unt ex tchk'elju' chojb'il te mujb'ab'ltib'il kxe'la' tkuxju' alu'mj te tb'anq'ob',³⁴qu'n matxi' tz'el npa'ne' ttzitk'u'ju' alu'mj intzaj kyq'o'n aj Israel weye' te chojb'il te mujb'ab'ltib'il, te jun oyaj tb'anilxi'x, exju' tkux te jun o'nb'il, che kxe'l teju' pale Aaron ex kyeju' tyajajil kukxju'.

³⁵Atzun kxe'lju' te Aaron ex kyeju' tyajajil kyi'ju' oyaj nche kub' tz'e'yset te ninb'ilweye', ati kyoklen ti'j atxi'x t-xi' nq'o'ne' kyoklen te pale nwitze'.³⁶Ayine' ẍin kyej q'onte chaq'b'il lu kyeye' tu'n t-xi' kyq'o'ne' kye', ktzyetelx toju' q'ij ajkyok nq'o'ne' toj kyoklen, ilti'j tu'n kyq'onteye' kukxju', tu'n kyb'inchanteye' exqe' kyk'wal, chi Qman Dyos.

³⁷Atzun chik'b'ab'l ja'lu tzaj tma'n Qman Dyos te Moyses twi' witz Sinayi kyi'ju' chojb'il k'ok'sb'il, oyaj twitz awal k'ok'e'kywitz, chojb'il tu'n tpaj il ex tu'n kyten b'a'n tuk'i'l Dyos, oyaj te xjanb'il exqe'ju' chojb'il te mujb'ab'ltib'il, tej tmante kye aj Israel toju' chq'ajlaj Sinayi tu'n tb'ajkub' kyq'o'n kyoyaj. Tej kyok Aaron kyuk'i'lju' tk'wal toj kyoklen (Ex 29.1-37)

¹Tzaj tma'n Qman Dyos te Moyses kjalu:

²Q'inqe'tza Aaron kyuk'i'lju' tk'wal, exju' kyxb'alun te pale, exju' aseyt te xjansb'il, exju' qpoj tman wakx kb'el q'et te chojb'il tu'n tpaj il, exqe' kab'e' rit exju' tal chi'l te wab'j mixti' ttx'amal,³ex b'uyinqe'tza tnam ttziju' Ja te Mujb'ab'ltib'il, chij.

⁴Xitb'incha'n Moyses tma Qman Dyos te, ex kykyaqilju' xjal b'aj kyb'u'yi'n kyib' ttziju' Ja te Mujb'ab'ltib'il.⁵Xi'tzun tma'n Moysestz kye kykyaqil aj Israel: A matxi' tchaq' Qman Dyos ja'lu tu'n tb'inchet, chij.

⁶E'tzajtzun tk'le'n Moyses Aaron kyuk'i'lju' tk'wal ex eb'aj tichi'n.⁷Kyb'ajlenxi'tzun ichin, oktq'o'n t-xb'alun Aaron ku'j ex oktq'o'n tk'alb'il, ex oktq'o'n pinpa't ti'jxi'; oktzun tq'o'n t-ẍa'ytz ex oktk'lo'n tu'njxju' taq'e'l.⁸Ex oktq'o'nju' tal xb'alun ttzitk'u'j, ex e'oktq'o'nju' ab'j Urim, ex Tumin ti'j.⁹Ex jax tq'o'nju' ẍipb'il twi' ex oktq'o'n plak q'anpwaq ti'j toju' plaj twitzxi' tu'n tok toklen te pale, kse'nxju' tchaq' Qman Dyos.¹⁰Tzajtzun tiq'i'n Moyses aseyt te xjanb'il ex jax tqo'n tib'aju' ja xjan ex kyib'aj kykyaqilju' ate' toj, iktzu'n kub'a' t-xjansa'na'.¹¹Tu'nxtzunju' aseyt lu b'aj twitxk'a'n wuq maj ti'jile q'olb'eb'l ex kub' tqo'n tib'aj ex kyib'aju' aq'unb'il inche ajb'en te, ex tib'aj tkb'elju' a' exju' tq'uqlil tu'n kxjanset.

¹²Jaxtzun tqo'n Moyses aseyt te xjansb'il toj twi' Aaron tu'n t-xjanset te pale.¹³Ex e'tzaj tiq'i'n tk'wal Aaron, ex oktq'o'nju' kyxb'alun ku'j, oktk'lo'nju' kyk'alb'il ex jax tq'o'nju' ẍipb'il kywi' kse'nxju' ojetoq tchaq' Qman Dyos.

¹⁴Xi'tzun tma'n Moysestz tu'n ttzaj q'i'nju' qpoj tman wakx nkub' q'et te chojb'il tu'n tpaj il, kub'tzun kyq'o'n Aaron kyq'ob' kyuk'i'lju' tk'wal tib'aj twi'ju' qpoj tman wakx.¹⁵Kub'tzun tb'yo'n Moyses qpoj tman wakx ex jawtiq'i'n chik' kyu'n twitq'ob' ex okt-sun kyi'j tuk'a q'olb'eb'l ti'jile tu'n t-xjanset, atzunju' chik' kyej sob'rin kub' tqo'n t-xe q'olb'eb'l. Iktzu'n xjanseta' q'olb'eb'l tu'n tk'metju' najsb'il il tib'aj.¹⁶Yajxi'tzuntl tzaj tiq'i'n Moyses tkyaqilju' unt tok kyi'ju' t-xqintxa, exju' unt tok kyi'ju' twab'l exqe'ju' kab'e' tchinaq' kyuk'i'lju' ky-until, kub' ttz'e'ysa'ntzuntz tkyaqil tib'aj q'olb'eb'l;¹⁷atzu'n jni'tlju' wakx, ttz'umal, tchib'jil ex ttxa, oktq'o'n kyq'aq'al ti'jxi'ju' najb'il, kse'nxju' tchaq' Qman Dyos te.

¹⁸Xitma'n Moyses tu'n ttzaj iq'i'n tman rit inkub' q'et te chojb'il k'ok'sb'il, ex kub' kyq'o'n Aaron kyq'ob' kyuk'i'lju' tk'wal tib'aj twi'.¹⁹Kub' tb'yo'ntzun Moysestz ex kub' tqo'nju' tchk'el tib'aj q'olb'eb'l ex ti'jile,²⁰kub' tpẍu'nju' rit toj tx'naji'n, ex kub' ttz'e'ysa'n tuk'i'lxi'ju' twi' exju' unt;²¹ex eb'aj ttxjo'nju' t-xqintxa exqe'ju' tkux, kub' ttz'e'ysa'ntzuntz tkyaqil tib'aj q'olb'eb'l te jun chojb'il k'ok'sb'il te jun oyaj tb'anil tk'ok'jal te Qman Dyos, kse'nxju' tchaq' Qman Dyos te.

²²Ex tchaq' Moyses tu'n ttzaj iq'i'nju' juntl rit, ju' tu'n tb'inchet te xjansb'il, ex kub' kyq'o'n Aaron kyq'ob' kyuk'i'lju' tk'wal tib'aj twi'.²³Kub' tb'yo'ntzun Moysestz, jawtiq'i'n ch'i'n tchk'elju' alu'mj ex okt-sun tjaq' t-ẍkyin Aaron toj tb'a'nq'ob', ex ti'ju' tman twitq'ob' teju' tb'anq'ob' ex ti'ju' tman twitqan toj tb'a'nq'ob'.²⁴Ex e'tzaj tlaq'b'a'n tk'wal Aaron, ex ikx okt-sun chik' tjaq' kyẍkyin toj kyb'anq'ob', ex ti'j tman twikyq'ob' toj kyb'anq'ob' ex ti'j tman twikyqan toj kyb'anq'ob'; atzunju' jni'l chik' kub' tqo'n tib'aj q'olb'eb'l ex ti'jile.

²⁵Ex e'tzaj tiq'i'n Moyses unt, tje, tkyaqil t-untilju' t-xqintxa, t-untilju' twab'l, exqe' kab'e' tchinaq' tuk'i'lju' ky-until, exju' tkux toj tb'a'nq'ob'.²⁶Jatztzun tiq'i'n Moyses jun muqin mixti' ttx'amal, jun muqin xyuq'i'n tuk'i'l aseyt ex jun tal xwok' muqin toju' tal chi'l jatku'xa' wab'j mixti' ttx'amal, ju' nkub' q'et twitz Qman Dyos, ex e'kub'tq'o'n tk'etzju' unt exju' tkux alu'mj te tb'anq'ob';²⁷kub' tq'o'ntzuntz tkyaqil toj tq'ob' Aaron ex toj kyq'ob'ju' tk'wal tu'n kyb'inchanteju' tu'me'l tu'n kyq'onte oyaj twitz Qman Dyos.²⁸Xi'tzun Moysestz k'molte tkyaqil ja'lu kye, ex kub' ttz'e'ysa'n tib'aj q'olb'eb'l junx tuk'i'l chojb'il k'ok'sb'il, te jun oyaj te xjansb'il tb'anil tk'ok'jal: jun oyaj tz'e'ysa'n te ninb'ilte Qman Dyos.

²⁹Yajxi'tzuntl tzaj tiq'i'n Moyses ttzitk'u'ju' rit ex tb'inchaju' tu'me'l tu'n tq'onte twitz Qman Dyos. Atzun kyaju' te Moyses ti'ju' rit te xjansb'il, kse'nxju' ojetoq tchaq' Qman Dyos te.³⁰Ex tzaj tiq'i'n Moyses ch'i'n aseyt te xjansb'il ex ch'i'n chik' ju' ati tib'aj q'olb'eb'l, kub' twitxk'a'ntzuntz tib'aj Aaron, ex kyib'aju' tk'wal, ex kyib'aju' kyxb'alun te pale. Iktzu'n e txjansaya' Aaron kyuk'i'lju' tk'wal, exju' kyi'j te pale.³¹Xitma'ntzun Moysestz te Aaron ex kyeju' tk'wal: kytzq'ajsanku'xe' chib'j ttziju' Ja te Mujb'ab'ltib'il, ex axtzu' kych'yonxa'ye' tuk'i'lju' wab'j atku'x toju' tal chi'l te xjansb'il, kse'nxju' tzaj tma'n Qman Dyos weye' qa aye'ye' kyuk'i'lju' tk'wala che xe'lch'yonteju' chib'j lu.³²Qatzun min xb'aju' chib'j exu' wab'j, kypatinku'ye.³³Ex lalun che el lq'eye' ttziju' Ja te Mujb'ab'ltib'il toju' wuq q'ij, qu'n a tq'ijlalilju' te xjansb'ilkyeye'.³⁴Oje tchaq' Qman Dyos tu'me'l aj t-xi' q'etju' chojb'il tu'n tnajsetju' il makyb'inchaye'; ati tu'n tb'inchet kse'n xb'inchet ja'lo.³⁵Qu'mtzun ati tu'n kykyajtene' q'ijl ex qonik'an ttziju' Ja te Mujb'ab'ltib'il toju' wuq q'ij. Kynimanxju'ye' tchaq'b'il Qman Dyos, laytzun che kyimtze', qu'n a chaq'b'ilju' tzaj q'o'n weye', chij.

³⁶Kyb'inchatzu'n Aaron kyuk'i'lju' tk'wal tkyaqilju' tchaq' Qman Dyos te Moyses. Tzyet taq'unan Aaron te pale

¹Tojtzu'n twajxaqi'n q'ij e'tzaj ttxko'n Moyses Aaron kyuk'i'lju' tk'wal, exqe' tijwnaq kyxol aj Israel.²Ex xitma'n te Aaron: Q'intza jun qpoj tman wakx te chojb'il tu'n tpaj il, ex jun tman rit mixti' ttzakajil tu'n tkub' q'et te chojb'il k'ok'sb'il ex q'onku'ya twitz Qman Dyos.³Atzu'n kye' aj Israel q'manxa tu'n ttzaj kyiq'i'n jun tman chib' te chojb'il tu'n tpaj il, jun qpoj tman wakx ex jun qpoj tman rit te jun ab'q'i qe' ex mixti' kytzakajil, tu'n kykub' q'et te chojb'il k'ok'sb'il.⁴Ex jun tman wakx ex jun tman rit tu'n kykub' b'yet twitz Qman Dyos te jun chojb'il te mujb'ab'ltib'il. Ex tu'n ttzaj kyiq'i'n jun oyaj triy xyuq'i'n tuk'i'l aseyt, qu'n ktyek'u'tib' Qman Dyos kywitz ja'lo, chij te.

⁵Xi'tzun kyiq'i'n aj Israel tkyaqilju' tchaq' Moyses kyetwitzju' Ja te Mujb'ab'ltib'il, kykyaqiltzunju' tnam e'pon ex e'kub' we' twitz Qman Dyos.⁶Tmatzun Moysestz: a matxi' tchaq' Qman Dyos kyeye'. Kyb'inchame', atzunte Qman Dyos kb'el tyek'u'ntib' kywitze' toj nim tajwalil, chij kye.

⁷Ex xitma'ntl Moyses te Aaron: lq'exa tk'etz q'olb'eb'l, ex q'onku'ya chojb'il saj tiq'i'na tu'n tpaj tila exju' alu'mj kb'el tq'o'na te chojb'il k'ok'sb'il tu'n tnajset tila ex tu'n tnajset kyil aj Israel. Ex q'onku'ya kyoyaj aj Israel tu'n najset kyil, kse'nxju' oje tchaq' Qman Dyos, chij te.

⁸Xi'tzun lq'e Aaron tk'etz q'olb'eb'l ex kub' tb'yo'nju' tman wakx tu'n tkub' tq'o'n tu'n tpaj til.⁹Xi'tzun kylaq'b'a'n tk'wal Aaron ju' chik' tk'etz, atzunte Aaron, ku'x tak'sa'n twitq'ob' toj ex oktb'aku'n kyi'j tuk'a q'olb'eb'l, atzunju' jni'l kub' tqo'n t-xe tqan q'olb'eb'l.¹⁰Ex kub' ttz'e'ysa'n unt tib'aj q'olb'eb'l exqe'ju' tchinaq' exju' unt tok ti'j twab'lju' alu'mj kb'el q'et te chojb'il tu'n tpaj il kse'nxju' ojetoq tchaq' Qman Dyos te Moyses.¹¹Atzu'n tchib'jil exju' ttz'umal e'kub' ttz'e'ysa'n ti'jxi'ju' kynajb'il.

¹²Ex kub' tb'yo'n Aaron ju' alu'mj inkub' q'et te chojb'il k'ok'sb'il, aye'tzu'n tk'wal xi' kylaq'b'a'nju' chik' te, atzunte Aaron kub' tqo'n tib'aj ex ti'jileju' q'olb'eb'l.¹³Ex xikyiq'i'n twi' ex tchib'jilju' alu'mj toj tx'naji'n ju' inkub' q'et te chojb'il k'ok'sb'il, atzunte Aaron kub' ttz'e'ysa'n tib'aj q'olb'eb'l;¹⁴ex b'aj ttxjo'nju' t-xqintxa exqe' tkux, e'kub' ttz'e'ysa'ntzuntz tib'aj q'olb'eb'l, ex tkyaqil t-xmilalju' alu'mj.

¹⁵Ex kub' tq'o'n Aaron oyaj tu'nkypaj aj Israel. Tzaj tiq'i'n tman chib' te chojb'il tu'ntpaj kyilju' tnam ex kub' tb'yo'n, kub' tq'o'n tu'n tpaju' il kse'nxju' ojetoq tb'incha nejl.¹⁶Tej tkub' tq'o'nju' alu'mj ju' inkub' q'et te chojb'il k'ok'sb'il, tb'incha kse'nxju' q'ma'ntl.¹⁷Ex kub' tq'o'ntlju' oyaj twitz awal k'ok'e'kywitz, ex kub' ttz'e'ysa'n tib'aj q'olb'eb'l, kyib'ajxi'tlu' chojb'il k'ok'sb'il inche kub' q'et te prim.

¹⁸Ex e'kub' tb'yo'n Aaron tman wakx ex tman rit inxi' kyq'o'n aj Israel te b'inchjtib'il. Xilaq'b'a'n chik' te kyu'n tk'wal, atzunte kub' tqo'n tib'aj ex ti'jileju' q'olb'eb'l.¹⁹Ex xikyq'o'n ky-untilju' tman wakx ex tman rit te, exju' kyje ex ky-untilju' kyxqintxa exqe'ju' kychinaq', ex ky-untilju' kywab'l,²⁰ex kub' kyq'o'nju' unt junx kyuk'i'lju' ttzikyk'u'j. E kub'tzun ttz'e'ysa'n Aaron ju' unt tib'aj q'olb'eb'l,²¹aye'tzu'n ttzikyk'u'j exju' kykux te kyb'anq'ob', naq tb'incha tu'me'l tu'n tq'onte twitz Qman Dyos, kse'nxju' tchaq' Qman Dyos te Moyses.

²²Jawtiq'i'n Aaron tq'ob' ex e'kub' tky'i'wla'n aj Israel, tetzunj kyb'ajkub' tq'o'nju' chojb'il tu'n tpaj il, chojb'il k'ok'sb'il ex chojb'il te mujb'ab'ltib'il, el lq'e tk'etzju' q'olb'eb'l.²³E'okxtzun Moysestz tuk'i'l Aaron toju' Ja te Mujb'ab'ltib'il, atzunj kyetz e'kub' kyky'i'wla'n aj Israel. Kub'tzun tyek'u'ntib' Qman Dyostz nxi'x qoptz'aj kywitz kykyaqilju' tnam Israel:²⁴etz q'aq' twitz Qman Dyos ex b'aj patju' alu'mj tu'n, ju' atitoq tu'n tkub' tz'e'y exqe'ju' unt atitoq tib'aj q'olb'eb'l. Tetzunj kyka'yinte aj Israel ja'lu e'jaw ẍch'in kykyaqil tu'n kytzalajb'il ex e'kub' meje majx ku'pun kyplaj twitz tx'otx'. Kyil Nadab' ex Ab'yu

¹Aye'tzu'n Nadab' ex Ab'yu, tk'wal Aaron, teyile junjun jawtiq'i'n jun tkb'el tza'j, kuxkyq'o'n q'aq' toj ex sturak, kub' kyq'o'n jun q'aq' junxi'tl twitz Qman Dyos min tzajtma'n Dyos tu'n kyb'inchante.²Etztzun q'aq'tz twitz Qman Dyos ex majx eb'aj patj. Ikytzu'n e'kyima' twitz Qman Dyos.³Yajxi'tzuntl xitma'n Moyses te Aaron:
—Atoqtzun tajb'il Qman Dyos tu'n ttzaj tma'n tej tmante:
Kxel nyek'u'nju'ye' nxjanb'ile' kyeju' mache tzaj lq'e nk'etze',
Ex kxel nyek'u'ne' wajwalile' kye kykyaqil aj Israel, chij, chi Moyses.
Atzunte Aaron naqkyaj take, mixti'tl b'ent tyolin.

⁴E'ttxoktzun Moyses Misael ex Elsapan, tk'wal Usyel, ttiy Aaron, ex xitma'n kye:
—Kyiq'inqe'mitze' kywitze'le' toju' ja xjan, ex kyiq'inqe'mixe' ti'jxi' najb'il, chij kye.

⁵E'tzunkye exi'lq'e ex kyojxju' kyxb'alun ku'j e'exa' kyiq'i'n ti'jxi' najb'il, kse'nx tchaq' Moyses kye. Kyajb'eb'l ex kyaq'un pale tu'n kyb'inchante

⁶Xi'tzun tma'n Moysestz te Aaron ex kyeju' tk'wal, aye' Eleasar ex Itamar:
—Lalun tz'el kyiq'i'ne' toj kywi'ye' ex lalun kub' kylaqu'ne' kyxb'alune' tu'n tpaj b'is, qu'n jaku' che kyime' ex jaku' tzaj tq'o'n Dyos ttx'u'jil kyib'aju' tnam. O'qe'kxkye aj Israel b'a'n tu'n kyb'isun kyi'ju' ẍeb'aj tu'n q'aq' saj tq'o'n Qman Dyos.⁷Ex lalun che el lq'eye' ti'ju' Ja te Mujb'ab'ltib'il, tu'ntzun lalun che kyime', qu'n ojena' che xjansetkye' tu'n aseyt te Qman Dyos, chij kye.
Ex kyb'incha kse'nx tchaq' Moyses kye.⁸Expe' tzaj tma'ntl Qman Dyos te Aaron kjalu:

⁹Ajtokxa mujqa aj kyokxju' tk'wala toju' Ja te Mujb'ab'ltib'il, lalun txi' kyk'wa'ne' ta'l ub'a tx'amsa'n, ex q'e'n kuw tq'ob', qu'n jaku' che kyime'. Jun kawb'ilte' lu kjelten kukxju' kyeye' ex kye kyk'wale',¹⁰tu'ntzun telkynik'e' ti'ju' xjan exju' mya xjan, ex ti'ju' ẍtilun ex mya ẍtilun,¹¹ex tu'n t-xikyxnaq'tza'ne' tkyaqilju' kawb'il ẍexnq'o'ne' kyeye' tu'nel Moyses, chi Dyos.

¹²Yajxi'tzuntel xitma'n Moyses te Aaron ex kyeju' kab'e'tl tk'wal e'kyajten, aye' Eleasar ex Itamar:
—Kyiq'inxju'ye' oyaj twitz awal k'ok'e'kywitz xkyaj kyi'ju' oyaj tz'e'ysa'n twitz Qman Dyos, ex kywanxe' mixti' ttx'amal tk'etzu' q'olb'eb'l, qu'n xjanxi'xte'.¹³Kywanxe' toj jun najb'il xjan, qu'n atzun teju'ya ex kye tk'wala kyi'ju' oyaj nche tz'e'yset te ninb'ilte Qman Dyos. Atzun oje tzaj q'ma'nju' weye'.¹⁴Extzunju' ttzitk'u'j, aju' oyaj nim toklen, exju' tkux nkub' q'o'n, kxe'l kywane' kyuk'i'lju' tk'wala ex tmyala toj jun najb'il ẍtilun, qu'n a kyeju'ye' ti'ju' chojb'il te b'inchjtib'il nkub' kyq'o'n aj Israel.¹⁵Che xe'l iq'etju' tkux, aju' nkub' q'et, exju' ttzitk'u'j aju' oyaj nim toklen, tu'n kykub' q'et te jun oyaj nim toklen tk'etzju' unt, ju' nkub' tz'e'yset. Aju' lu kxe'l teya kukxju' ex kyeju' tk'wala, kse'nxju' oje tchaq' Qman Dyos, chi Moyses te.

¹⁶Xi'tzun tqani'n Moyses jatoq ta' tman chib' nkub' q'et te chojb'il tu'n tpaj il, ex tb'i qa matxitoq kub' kytz'e'ysa'n. Tzajtzun ttx'u'jiltz ti'j Eleasar ex ti'j Itamar, ju' kab'e'tl tk'wal Aaron itz'qe'xtoq ex xitma'n kye:

¹⁷—¿Tiqu'n minti' xxi' kych'yo'nju'ye' chojb'il tu'n tpaj il toju' najb'il xjan? Xjanxi'xnate', ex a Qman Dyos xiq'onte kyeye' tu'n kyiqanteye' kyilju' tnam tu'ntzun tkub' tnajsa'n Qman Dyos kyil.¹⁸Ex tu'nju' min xi' iq'etju' chik' toju' ja xjan, ilxi'xtoqti'j tu'n txi' kych'yo'nju'ye' chojb'il toju' najb'il xjan lu, kse'nxju' oje nchaq'e' kyeye', chi Moyses.

¹⁹Atzunte Aaron xittzaq'we'n te:
—Ka'yintzpe'ya, ma'pena' tzul kyiq'i'n chojb'il tu'ntpaj il exju' chojb'il k'ok'sb'il twitz Qman Dyos, extzun mache ik'ju' ti'xti' lu wi'je'. Noqwit machin wane' ja'lo ti'ju' chojb'il tu'n tpaj il ¿Ma b'a'nwtzulo sela' toj twitz Qman Dyos? chij.

²⁰Qetzun tk'u'j Moysestz tej tb'inte ja'lu. Ẍtilun txkup ex tz'il (Dt 14.3-21)

¹Tzaj tma'n Qman Dyos te Moyses ex te Aaron tu'n t-xi' kyma'n kye aj Israel ikjalu:
Aye' txkup ja'lu b'a'n tu'n kyxi' kych'yo'ne' kyxol kykyaqilju' ate' twitz tx'otx',³aye' inche kok'san ex pa'ch kyxky'eq;⁴naqtzun oqe'kx txkupju' mixti' tu'n kyxi' kych'yo'ne', maskye inche kok'san mujqa pa'ch kyxky'eq:
Aju' kamey, qu'n mya pa'ch t-xky'aq, maskye in kok'san. Ati tu'n tok kyu'ne' te tz'il txkup.

⁵Exju' ẍiky, qu'n mya pa'ch t-xky'aq, maskye nkok'san. Ati tu'n tok kyu'ne' te tz'il txkup.

⁶Exju' toj k'ul ẍiky, qu'n mya pa'ch t-xky'aq, maskye in kok'san, ati tu'n tok kyu'ne' te tz'il txkup.

⁷Aju' b'och, minti' in kok'san, maskye pa'ch t-xky'aq, ati tu'n tok kyu'ne' te tz'il txkup.

⁸Lalun txi' kych'yo'ne' kychib'jilju' txkup lu, expe' lalun txi' kytzyu'nju'ye' t-xmilal kyimnitl. Ati tu'n kyok kyu'ne' te tz'il txkup.

⁹O'qe'kxju' txkup ati tal kyxik' ex ati tal kyxk'owil kuw b'a'n tu'n txi' kych'yo'ne' kyxolju' txkup ate'qe' toj a', toj ninnjab' mujqa toj nimaq a'.¹⁰Aye'tzunju' mixti' tal kyxik' ex mixti' kyxk'owil kuw toj ninnjab' mujqa toj nimaq a', k'ok'e' mujqa nimaq, ati tu'n tok kyu'ne' te tz'il txkup.¹¹Mixti' tu'n txi' kych'yo'nju'ye' kychib'jil; ati tu'n kyel kyik'o'nju'ye' txkup lu, ex ati tu'n tel kyik'o'nju'ye' kyxmilal kyimniqe'tl.¹²Kykyaqilju' txkup mixti' tal kyxik' ex mixti' kyxk'owil kuw toj a', ati tu'n tel kyik'o'ne'.

¹³Aye' pich' ja'lu mixti' tu'n kych'yone', expe' kche elel kyik'o'ne': t'iw, toqil b'aq, t'iw tib'aj ninnjab',¹⁴milano ex tkyaqil kyyajil alkon,¹⁵tkyaqil kyyajil joj,¹⁶ab'estrus, xitx', kab'yota, ex tkyaqil kyyajajil q'anjel,¹⁷tukru, kormoran, ib'is,¹⁸sisne, pelikano, k'utz,¹⁹siwenya, tkyaqil tyajil gars, ab'ub'iya ex sotz'.

²⁰Ex kykyaqil tal txkup b'o'sqe' nche lipan ex nche b'et, ati tu'n tel kyik'o'ne',²¹aye'tzu'n b'a'n tu'n kyxi' kych'yo'ne', aye' mujli kykux tuk'i'l kyqan tu'n tb'ent kyxlik'pun twitz tx'otx', maskye inche lipan ex inche b'et.²²Kyxoltzu'n ja'lu b'a'n tu'n t-xi' kych'yo'ne' tkyaqil kyajajil ẍt'ikt'u'l, e'nimaq ẍt'ikt'u'l, ex txil.²³Aye'tzu'n txqantl tal txkup nche lipan ex nche b'et, ati tu'n tel kyik'o'ne'.

²⁴Aye' ti'xti' ja'lu che kjel tz'ilixe' tu'n: alkyete matxi ttzyu'n t-xmilal junju' txkup lu kyimnitl, kjelten tz'il tzmaxi'j ajqok yupj.

²⁵Alkyete majaw q'inte junju' txkup lu kyimnitl, kttx'ja'ju' ti'j ex kjelten tz'il tzmaxi'j ajqok yupj.

²⁶Kykyaqil txkup, mya pa'ch kyxky'eq ex mixti' inche kok'san, ati tu'n kyok kyu'ne' tz'il txkupqe', ex alkyete matz'ok tzyunkye, k'okyel tz'il.

²⁷Alkyexku' txkup kyaje' tqan ex ajtb'et xi'nkub'a' talal tib'aju' t-xky'aq, ati tu'n tok kyu'ne' te tz'il txkup; ex alkyexku' matz'ok mkonte t-xmilal junju' txkup lu kyimnitl, k'okyel tz'il tzmaxi'j ajqok yupj.²⁸Ex alkyexku' majaw q'inte t-xmilal junju' txkup lu kyimnitl, ati tu'n ttxjonteju' ti'j ex kyjelten tz'il tzmaxi'j ajqok yupj. Qu'n ati tu'n kyokju' txkup lu tz'ilqe' kyu'ne'.

²⁹Aye' txkup ja'lu nche qitinje twitz tx'otx', ati tu'n kyok kyu'ne' tz'ilqe': Saqb'in, ich' ex tkyaqil kyyajil txkup nche qititinje.³⁰Exqe'ju' salamankyesas, kokodrilo, lakart, xmatx, ex kamalyon.

³¹Ayetzun txkupju' che okyel kyu'ne' te tz'il kyxol kykyaqilju' txkup twitz tx'otx'. Alkyetzunte matz'ok ttzyu'n junju' txkup lu kyimnitl, kjel tz'il tzmaxi'j ajqok yupj.

³²Ex ikx qama tz'ok tiqli junju' txkup lu kyimnitl ti'j jun ti'xti', kjel tz'ilix tu'n. Qa jun ti'xti' tze mujqa xb'alun, mujqa jun ti'xti' tz'u'n, mujqa kostal, mujqa alkyexku' aq'unb'il, ati tu'n tku'x q'et toj a' ex kjel tz'il tzmaxi'j ajqok yupj; yajxi'tzuntel kjel ẍtilun.

³³Qatzun nab'en ma ku'x tz'aq junju' txkup lu toj jun tx'otx' k'wil, tkyaqilju' ati toju' k'wil kjel tz'ilix, ex kb'el pa'yetju' k'wil.³⁴Ex tkyaqilju' wab'j qama kub'ju' a' setz toju' k'wil lu tib'aj, kjel tz'ilix; ex tkyaqil k'wab'j ati toj, kjel tz'il.³⁵Tkyaqilju' ti'xti' qama kub' tz'aq junju' txkup lu kyimnitl tib'aj, kjel tz'il; jun chuj mujqa tkub'el q'aq', ati tu'n kykub' xitet. Ati tu'n tok kyu'ne' tz'il, qu'n tz'ilte'.

³⁶Atzun teju' t-xiklil a' mujqa xoch janjatza' a' te k'wab'j kjelten ẍtilun kukxju'; atzunju' matz'ok mkonkyeju' txkup kyimniqe'tl kjelten tz'il.

³⁷Qama kub' tz'aq junju' txkup lu kyimnitl tib'aj jun ij ju' kxel awet, lay kyej tz'ilixju' ij;³⁸qatzun makub' tz'aq junju' txkup lu kyimnitl tib'aj jun ij ak'sa'ntl, kjel tz'ilix.

³⁹Qatzun nab'en makyim jun alu'mj b'entnitlti'j tu'n t-xi' kych'yo'ne', alkyete matxi tzyunte kjelten tz'il;⁴⁰alkyetzunte matxi' ch'yonteju' alu'mj kyimnitl, ati tu'n ttxjonteju' ti'j ex kjelten tz'il tzmaxi'j ajqok yupj; ex ikxju' matz'ex q'inteju' alu'mj kyimnitl, ex ati tu'n ttxjonteju' ti'j ex kjelten tz'il tzmaxi'j ajqok yupj.

⁴¹Mixti' tu'n t-xi' kych'yo'ne' jun txkup nqititinje twitz tx'otx'; ati tu'n tel kyik'o'ne'.

⁴²Kykyaqilju' txkup nche qititinje twitz tx'otx', mixti' tu'n kyxi' ch'yet, b'a'ntzun ntjqu'n tk'u'j ajtb'et mujqa nb'et kyu'n kyaje' mujqa txqantl kyqan, qu'n tz'il txkupqe'.⁴³Qu'mtzun lalun kub' kytz'ilsa'n kyib'e' ex lalun che oke' kse'nqe'ju' txkup lu tz'ilqe'.⁴⁴Qu'n ayine' Dyos Manb'aj. Ati tu'n kyoke' ẍtilun ex xjan, qu'n xjan qinwe'. Lalun kytxa'jla kyib'e' tu'n junju' txkup nqititinje twitz tx'otx'.⁴⁵Ayine' Dyos Manb'aj, inetz q'inkyeye' toj Ejipt tu'n kyajb'ene' weye'. Qu'mtzun ati tu'n kyoke' xjan qu'n xjan qinwe', chi Qman Dyos kye Moyses ex Aaron.

⁴⁶Aye' nuk'b'il ja'lu kyi'ju' txkup, pich' ex kykyaqilju' najliqe' toj a', ex kykyaqilju' txkup nche qititinje twitz tx'otx',⁴⁷Tu'ntzun tel kynik'tzilju' ẍtilunqe' kyi'ju' tz'ilqe', ex tu'n tel kynik'tzilju' b'a'n tu'n kych'yet exqe' myab'a'n tu'n kych'yet. Chaq'b'il tu'n t-ẍtilsantetib'ju' qya mab'anix

¹Tzaj tma'n Qman Dyos te Moyses tu'n t-xitma'n kye aj Israel ikjalu:
Ajtok jun qya ch'onwi' ex q'aju' tal sitz'ji, kjel tz'ilix wuq q'ij, kse'nxju' aj tkb'u'lju' ttx'ajin.³Ati tu'n tok techelju' k'wal ti'j tchib'jil tb'ajlenxi' wajxaq q'ij titz'jlen.⁴Atzunju' txub'aj kxel tljo'n junaq oxlajoj (33) q'ijtl tu'n t-ẍtilsantetib' teju' chik'. Mixti' tu'n tokttzyu'n jun ti'xti' xjan mujqa tu'n tokx toju' ja xjan qa na'mxtoq tjapun tq'ijlalil tu'n t-ẍtilsantetib'.⁵Qatzun txinju' tal sitz'ji, kb'elten o'lajoj q'ij tz'il kse'nxju' tq'ijlalil ajtkb'u'l ttx'ajin, ex ati tu'n t-ẍtilsantetib' oxnaq qaq (66) q'ijtl.

⁶Ajtzun tjapunju' tq'ijlalil te ẍtilsab'l, b'a'ntzun tu'n jun q'a mujqa tu'n txin, ktzajel tiq'i'n txub'aj jun qpoj tman rit te jun ab'q'i tu'n tkub' q'et te chojb'il k'ok'sb'il ttziju' Ja te Mujb'ab'ltib'il, ex ktzajel tiq'i'n jun tal paloms mujqa jun xlak'uk' te chojb'il tu'n tpaj il. Che kxe'l tq'o'n teju' pale,⁷atzunju' pale che kb'eltq'o'n nwitze' tu'n ttzaj tqani'n najsb'il weye' ti'ju' qya; kjel tentzun qyatz ẍtilun teju' chik' inel ti'j, chi Dyos te Moyses.
Aye'tzun chik'b'ab'l ja'lu ti'j titz'jlen jun q'a mujqa jun txin.⁸Qatzun mixti' xkanunju' txub'aj tu'n ttzaj tiq'i'n jun qpoj tman rit, b'a'n tu'n ttzaj tiq'i'n kab'e' tal xlak'uk' mujqa kab'e' tal paloms, jun tu'n tkub' q'et te chojb'il k'ok'sb'il, atzu'n juntl te chojb'il tu'n tpaj il; kxeltzun tqani'n pale najsb'il te Qman Dyos ti'ju' qya, kjel tentzun qyatz ẍtilun. Chik'b'ab'l ti'ju' xlemtx'a'k

¹Tzaj tma'n Qman Dyos kye Moyses ex Aaron ikjalu:

²Qa ati jun xjal matxi' b'jaw mal tchib'jil mujqa mab'jaw punq'ij, mujqa b'je'tzni ẍal ti'j, exqa majawb'ent te xlemtx'a'k, ati tu'n t-xi' iq'et tk'etzju' pale Aaron mujqa tk'etz jun pale tyajajilx.³Ati tu'n tok tka'yi'n paleju' tx'a'k ti'j tchib'jil xjal, qatzun matxi' saqax t-smalju' xjal toju' tx'a'k exqa matxi' ku'x lq'eju' tx'a'k toj tchib'jil, xlemtx'a'ktzuntz. Tb'ajlenxi'tzun tka'yi'n paleju' xjal lu, ktma'tzuntz qa tz'il.

⁴Qa saq ka'yinju' tchib'jil tu'n extzun mixti' kuxni lq'eju' tx'a'k toj tchib'jil, ex mya saq t-smal, k'okex tjpu'n pale wuq q'iju' yab'.⁵Tojtzun twuqi'n q'ij k'okel tka'yi'n jumajtel, qatzun kukx tten tx'a'kju' ex na'mx t-xi' mlen ti'ju' tchib'jil, k'okex tjpu'n wuq q'ijtel.⁶K'okel tka'yi'n jumajtl toj twuqi'n q'ijtel, qatzun kxi' tkub' naju' tx'a'k ex min xxi' mlentl, ktma'tzun paletz qa ẍtilun te' yab', qu'n naq jun yab'ilxi'te' ti'j tchib'jil. Atzunte yab' kb'ajel ttxjo'nju' ti'j ex kjelten ẍtilun.

⁷Qatzun matxi mlenju' tx'a'k ti'j tchib'jilju' yab' tb'ajlenxi' ka'yi'n tu'n pale ex ojetoq tma pale qa ẍtilun, ati tu'n t-xi' jumajtl twitz pale tu'n tok ka'yet.⁸Ajtzun tok tka'yi'n pale, qa matxi' txi' mlenju' tx'a'k ti'j tchib'jilju' yab', ktma'tzuntz qa tz'il, qu'n xlemtx'a'k ati ti'j.⁹Qa yab' jun xjal tu'n xlemtx'a'k, ati tu'n t-xi' iq'et twitz pale.¹⁰K'okel tka'yi'nju' pale, qatzun saq ka'yinju' malni ti'j tchib'jil ex matxi' txi' saqaxju' t-smal tu'n, exqa q'ancha'lju' tchib'jil toju' malni,¹¹xlemtx'a'ktzuntz matxi' lok'an ti'j. Oktma' pale qa tz'ilju' xjal lu, ex min in ojqelan tu'n tokx tjpu'ntl, qu'n tz'iltel.

¹²Qa lwiy xxi' mlenju' xlemtx'a'k lu ti'j, qama tzajx t-xe tqan ex majapunx toj twi' ja maka'yeta' tu'n pale,¹³Kb'ajel tka'yi'n pale b'a'nxi'x; qatzun matxi' b'aj noj ti'ju' xjal tu'n xlemtx'a'k, ktma' qa ẍtilun, qu'n matxi' kub' saqaxju' xlemtx'a'k ex matxi' kyej tenju' xjal ẍtilun.¹⁴Qatzun alkye q'ij maq'ancha'linju' tchib'jil yab' toju' xlemtx'a'k, kjel tentzuntz tz'il.¹⁵Oktzun k'okel tka'yi'n pale tchib'jil qa q'ancha'l toju' tx'a'k, ktma'tzuntz qa tz'il, qu'n tz'ilte' qa q'ancha'lju' tchib'jil, xlemtx'a'ktzuntz.

¹⁶Qatzun nab'en makub' saqaxlju' tchib'jil q'ancha'l toju' tx'a'k, kxe'lju' yab' twitz pale,¹⁷tu'n tok tka'yi'n, qatzun matilju' pale masaqaxju' tx'a'k, ktma'tzuntz qa ẍtilunju' yab', qu'n matxi' kyej ẍtilun.

¹⁸Qa ati jun ati tx'a'k ti'j, ex mab'anix,¹⁹exqa makyej ten jun malni saq ka'yin jata'toqju' tx'a'k, mujqa tik'len saqẍkyaqinin, ati tu'n t-xi' twitz pale.²⁰Qama tz'ok tka'yi'n pale matxitoq kux lq'eju' tx'a'k toj tchib'jil, ex matxi' saqaxju' t-smal, ktma'tzuntz qa tz'ilju' xjal lu, qu'n xlemtx'a'k te' ati ti'j.²¹Qatzun min xsaqaxju' tzmal ex min xku'x lq'eju' tx'a'k toj tchib'jil, kxi'pe' tkub' naj, k'okex tjpu'n wuq q'iju' xjal.²²Qatzun xi't-xi' mlenxi'xtlju' yab'il ti'j tchib'jil, ktma'tzun paletz qa tz'ilju' xjal lu, qu'n xlemtx'a'kju' ati ti'j.²³Qatzun kukx tten tx'a'kju' ti'j ex min inxi' mlen, naqtzun tik'lentz xkyajten, ex ktma'ju' pale qa ẍtilun.

²⁴Qa ati jun mab'aj tz'e'y, extzun qama q'ancha'linju' tchib'jil saq mujqa saqẍkyaqinin mujqa saq ka'yin tojku'ju' tchib'jil b'ajni tz'e'y,²⁵k'okel tka'yi'nju' pale. Qama txi' saqaxju' t-smal toju' tik'len, exqa makux lo'n toju' tchib'jil b'ajni tz'e'y, xlemtx'a'ktzuntz xjaw poq'li; ktma'tzun paletz qa tz'il tu'n tpaju' xlemtx'a'k ti'j.²⁶Qatzun ajtok tka'yi'n paleju' tx'a'k, qa mixti' jun t-smal saq ex min kuxni lo'nju' tchib'jil, kxi'pe' tkub' naj, k'okex tjpu'n wuq q'iju' xjal lu.²⁷K'okel tka'yi'n jumajtlju' pale toj twuqi'n q'ij, qatzun matxi mlenju' tx'a'k ti'j tchib'jil, ktma' qa tz'ilju' xjal lu, qu'n xlemtx'a'kju' ati ti'j.²⁸Qatzun min xxi' mlenju' tx'a'k ti'j tchib'jil ex kxi' tkub' naj, tzleq'intzun te tz'e'ynaqtz, ktma'tzun paletz qa ẍtilunju' yab', qu'n naqna' tik'len te tz'e'ynaqju'.

²⁹Qa ati jun ichan mujqa jun qya ati jun tx'a'k toj twi' mujqa toj t-xmatzi.³⁰K'okel tka'yi'n paleju' tx'a'k, qa kuxni lo'nju' tchib'jil tu'n exqa ẍq'anju' t-smal ex mya jupli, ktma'tzun paletz qa tz'ilju' xjal lu, qu'n xlemtx'a'k ati toj twi' ex toj ttxmatziy.³¹Qatzun min kuxni lo'n toj twi'ju' xjal tu'n tx'a'k ajtok tka'yi'n pale exqa mixti' t-xya'mal q'eq, k'okex tjpu'n wuq q'iju' xjal.³²Tojtzun twuqi'n q'ij k'okel tka'yi'n jumajtlju' pale, qatzun min xxi' mlenxi'xtlju' tx'a'k, qa min xku'x lo'nju' tchib'jil tu'n ex mixti' t-xya'mal ẍq'an,³³Ktma'tzun paletz tu'n tel joyet twi' mujqa t-xmatzi xjal yab', naq o'kx lay tz'el joyetju' jata' tx'a'k, ex k'okex tjpu'n wuq q'ijtel.³⁴Tb'ajlenxi'tzu'n wuq q'ijtl k'okel tka'yi'n paleju' tx'a'k, qatzun na'mx t-xi' mlen ex minti' xku'x lo'n toj tchib'jil, ktma'tzun paletz qa ẍtilunju' xjal, atzu'n xjal lu kttx'ja'ju' ti'j ex kjelten ẍtilun.³⁵Qatzun kxi' t-xi' mlenju' tx'a'k ti'j tchib'jil tb'ajlen q'met qa ẍtiluntl.³⁶Ati tu'n tok tka'yi'n jumajtl paleju' xjal yab'; qa matxi' txi' mlen jun majtlju' tx'a'k ti'j tchib'jil; mixti' in nojqelantl tu'n tok tka'yi'n t-smal qa ẍq'antl: tz'ilte' xjal lu.³⁷Qatzun ajtok tka'yi'n matxi' we'ju' tx'a'k ex mach'iy t-xya'mal q'eq, matxitzun b'anix te tx'a'ktzu' ex ẍtilunju' xjal. Ktma'tzun paletz qa ẍtilunju' xjal lu.

³⁸Qa ati jun ichan mujqa qya kxi' tjaw punq'ij tchib'jil,³⁹k'okel tka'yi'n paleju' tchib'jil, qa saq mujqa sjumj ka'yin, naq a' te' xjaw punq'ij ti'j; ẍtilun te' xjal.

⁴⁰Qa maku'tz q'ulj twi' jun ichan ex makejten ẍle'j, ẍtilun te' xjal lu.⁴¹Qa maku'tz q'ulj twi' tib'aju' tplaj ex makyej tenju' tplaj ẍle'j, ex ẍtilun te' xjal lu.⁴²Qatzun matz'etz jun tx'a'k saq ka'yin ex ẍkyeqinin toju' twi' ẍle'j, maskye ti'j twi' mujqa twitz, xlemtx'a'ktzuntz xi' tetz ti'j.⁴³K'okel tka'yi'ntzun paletz, qatzun saq ka'yinju' malni teju' tx'a'k ex ẍkyaqinin toju' kyajni ẍle'jix, kse'n ka'yin xlemtx'a'k ti'j tchib'jil,⁴⁴yab' te' ichan lu tu'n xlemtx'a'k, qu'n ati tx'a'k toj twi'. Tz'ilte' ichan lu, ex ktma'ju' pale qa tz'il.

⁴⁵Aju' ati ttx'a'kal xlemtx'a'k ti'j, ati tu'n toktq'o'n ti'j ẍla'q ex lay jawx toj twi', ktxu'ninin twitz ex in ẍch'inxi' qa tz'il.⁴⁶Ex k'okel q'et te ichan tz'il toju' tq'ijlalil ati tx'a'k ti'j; ex ati tu'n tnajan tjunalx ti'jxi'ju' najb'il.

⁴⁷Qa ati jun tz'il majx makyajten ti'j jun xb'alun lan mujqa sed chub'i'ntwitz,⁴⁸mujqa ti'j jun chemuj sed chub'i'ntwitz mujqa Lan, mujqa ti'j jun tz'u'n, mujqa ti'j alkyexku' ti'xti' b'incha'n tu'n tz'u'n,⁴⁹qatzun cha'xinin mujqa kyeqinin ka'yinju' tz'il kyi'ju' ti'xti' lu, tik'len xlemtx'a'k te', ati tu'n t-xi' yek'et te pale.⁵⁰K'okel tka'yi'n paleju' tz'il ex k'okex tjpu'n wuq q'iju' ti'xti' lu.⁵¹Tojtzun twuqi'n q'ij okb'ajel tka'yi'n paleju' tz'il, qa matxitoq txi' mlen ti'ju' xb'alun mujqa xb'alun chmo'n, ti'j tz'u'n mujqa ti'xti' tz'u'nqe', ttz'ilil tx'a'k taq'wixi'xte', aye'tzu'n ti'xti' che kjelten tz'il.⁵²Iktzu'n tkyaqil ti'xti' qa atiju' tz'il lu ti'j, ati tu'n kykub' tz'e'yset tejumajx, qu'n xlemtx'a'k taq'wixi'xte';⁵³qatzun matz'ok tka'yi'n pale exqa matz'elyal min xxi' mlenju' tz'il,⁵⁴ktma' tu'n tel txjetju' tz'il ex tu'n tokx jpet wuq q'ijtlu' ti'xti'.

⁵⁵Tb'ajlenxi' txjetju' tz'il, kb'ajel tka'yi'n pale. Qatzun matz'ok tka'yi'n qa na'mx tnaju' tz'il, taq'wix tz'iltzuntz, ilti'j tu'n tkub' tz'e'ysetju' ti'xti' lu, maskye na'mxtoq t-xi' mlenju' tz'il, qu'n ch'i'naq t-xi' tlo'n, tojxi' mujqa ti'jxi'.⁵⁶Aj tka'yintel paleju' tz'il qa matxitoq kub'naj tb'ajlenxi' txjet, k'eletz ttiq'i'n ti'ju' xb'alun, mujqa tz'u'n mujqa chemuj.⁵⁷Qatzun maq'ancha'lix junmajtl ex matxi mlentl ti'ju' xb'alun, ti'j chemuj mujqa ti'j ti'xti' tz'u'n, kb'el tz'e'ysetju' ti'xti' b'ajni txa'j.⁵⁸Atzu'n xb'alun chmo'n mujqa jun ti'xti' tz'u'n jatoka'toqju' tz'il ajtb'aj txjet, ktx'jetel jumajtl ex kjeltzuntz ẍtilun, chi Dyos.

⁵⁹Aye'tzun xnaq'tzb'il ja'lu ti'j jwe' ttz'ilil xlemtx'a'k, ti'j xb'alun lan, mujqa sed, mujqa ti'j xb'alun chmo'n, mujqa ti'xti' tz'u'n, tu'ntzun kq'met qa ẍtilun mujqa tz'il. Chik'b'ab'l tu'n kyẍtilsetju' yab'qe' tu'n xlemtx'a'k

¹Tzaj tma'n Qman Dyos te Moyses kjalu:

²Aye' chik'b'ab'l ja'lu tu'n t-ẍtilset jun yab' tu'n xlemtx'a'k: ati tu'n t-xi' iq'et twitz pale,³k'elexju' pale ti'jxi'ju' najb'il tu'n tok tka'yi'n. Qa matxitoq b'anixju' xlemtx'a'k ti'ju' yab',⁴kxe'l tma'n tu'n kytzaj iq'i'n kab'e' tal pich' ẍtilun ex itz'qe', tze k'ute, xb'alun kyeqka'yin ex k'ak'ul, teju' ati tu'n t-ẍtilset.⁵Kxe'l tma'n tu'n tkub' b'yet junju' tal pich' tib'aj jun tx'otx' k'wil atku'x a' toj tzajnix toj t-xiklil,⁶ex ktzajel tiq'i'n tal pich' itz', exju' tze k'ute, xb'alun kyeqka'yin exju' k'ak'ul, kche kb'el tak'sa'nju' ti'xti' lu exju' tal pich' itz' tu'n tchk'elju' pich' kyimnitl tib'aju' a' tzajni toj t-xiklil.⁷K'okeltzun twitxk'a'n wuq maju' chik' ti'ju' kẍtilsetel teju' xlemtx'a'k, ktma'tzuntz qa ẍtilun. Atzunju' tal pich' itz' kxel ttzaqpi'n.

⁸Ati tu'n ttxjonte t-xb'alunju' maẍtilset, ex kb'ajel ttxjo'ntib', k'elel tjso'n tkyaqilju' t-smal, tu'ntzun tkyejten ẍtilun. Yajxi'tzuntel b'a'n tu'n tokx toju' najb'il, ex ati tu'n tkyej ten wuq q'ijtl najal twipe'n.⁹Tojtzun twuqi'n q'ij k'elel t-sk'o'ji'nju' twi', kb'je'lel tjso'n t-xmatzi ex kyib'aj twitz, ex tkyaqilju' t-smal, kttx'ja' t-xb'alun ex ktxja'tib', kjeltzuntz ẍtilun.¹⁰Ktzajel tiq'i'n kab'e' qpoj tman rit mixti' kytzakajil toj twajxaqi'n q'ij, ex jun qpoj ttxu rit te jun ab'q'i mixti' ttzakajil; ex masch'i'n kyajlajoj (14.3) lib'r tb'anil arin te jun oyaj xyuq'i'n tuk'i'l aseyt, ex nik'jan litr aseyt.¹¹Kb'el q'o'nju' xjal kẍtilsetel exqe'ju' ti'xti', ttziju' Ja Te Mujb'ab'ltib'il nwitzku'ye' ayine' Dyos Manb'aj, tu'nju' pale kb'inchalteju' ẍtilsab'l.¹²Ktzajeltzun tiq'i'n junju' qpoj tman rit ex kb'eltq'o'n junx tuk'i'lju' nik'jan litr aseyt, te jun chojb'il tu'n tten b'a'n wuk'i'le', kxel t-se'nju' tu'me'l tu'n tkub' q'etju' chojb'il nwitze'.¹³Kb'el b'yetju' qpoj tman rit ja tu'me'l xjansa'n tu'n kykub' b'yetju' alu'mj te chojb'il tu'n tpaj il ex chojb'il k'oksb'il. Aju' chojb'il tu'n tten xjal b'a'n wuk'i'le' kxe'l teju' pale, ex ikxju' chojb'il tu'n tpaj il, qu'n xjanxi'xte'.

¹⁴Kjawiltzun tiq'i'n pale ch'i'n tchk'elju' chojb'il tu'n tten xjal b'a'n wuk'i'le', ex k'okyel t-sun ti'j t-ẍkyinju' xjal in ẍtilset toj tb'a'nq'ob', ti'j tman tq'ob' te tb'a'nq'ob' ex ti'j tman twitqan te tb'a'nq'ob'.¹⁵Ktzajeltzun tiq'i'n ch'i'n aseyt ex kb'eltq'o'n toju' tq'ob' te tnayaj;¹⁶kb'elex tak'sa'ntzun twitq'ob'tz te tb'anq'ob' toju' aseyt tkub' toj tq'ob' ex kxel twitxk'a'n wuq maju' aseyt tu'n twitq'ob' nwitze'.¹⁷Kjawiltzun tiq'i'n pale ch'i'n aseyt ti'ju' atix toj tq'ob' tu'n tokt-sun ti'j t-ẍkyinju' xjal in ẍtilset te tb'anq'ob', ti'ju' tman tq'ob' te tb'anq'ob' ex ti'ju' tman twitqan te tb'anq'ob', jaxju' b'jo'ka' t-suna' tchk'elju' chojb'il tu'n tten b'a'n wuk'i'le',¹⁸atzunju' aseyt min xb'aj kjawix t-sun toj twi'ju' in t-ẍtilsa'ntib'. Iktzu'n kknetela' najsb'il tilju' xjal lu nwitze' tu'n pale.¹⁹Kb'eltzun tq'o'n paleju' chojb'il tu'n tpaj il, iktzu'n ktb'incha'ya' ẍtilsab'l teju' mya ẍtilun; yajxi'tzuntel kb'el tq'o'nju' alu'mj te chojb'il k'ok'sb'il,²⁰kb'eltq'o'n tib'aj q'olb'eb'l junx tuk'i'lju' oyaj twitz awal k'ok'e'kwitz. Iktzu'n kknetela' najsb'il tilju' xjal lu tu'n pale, kyjeltzuntz ẍtilun.

²¹Qatzun prowju' xjal yab' ex mixti'xi'x tu'me'l tu'n, ktzajel tiq'i'n jun qpoj tman rit te chojb'il tu'n tten b'a'n wuk'i'le', kb'el tq'o'ntzuntz te jun oyaj tb'anilxi'x tu'n kynajsetju' til, tuk'i'l kyaje' lib'r tk'i' nik'jan arin tb'anilxi'x xyuq'i'n tuk'i'l aseyt, te jun oyaj ti'j twitz awal k'ok'e'kwitz, ex ch'intlmi nik'jan litr aseyt,²²ex kab'e' tal xlak'uk' mujqa kab'e' tal paloms kse'nxju' tipumal, jun tu'n t-xi' q'et te chojb'il tu'n tpaj il, atzu'n juntl te jun chojb'il k'ok'sb'il.²³Kxe'l tiq'i'n tkyaqilju' lu toj twajxaqi'n q'ij teju' pale, te ẍtilsb'ilte; ktzajel tq'o'n nwitze', ttziju' Ja te Mujb'ab'ltib'il.²⁴Ktzajel tiq'i'n paleju' qpoj tman rit te chojb'il tu'n tten b'a'n wuk'i'le' exu' ch'intlmi nik'jan litr aseyt, kb'el tq'o'ntzuntz nwitze' te jun oyaj tb'anilxi'x;²⁵kb'el tb'yo'nju' qpoj tman rit te chojb'il tu'n ten b'a'n wuk'i'le' ex kjawil tiq'i'n ch'i'n tchk'elu' qpoj tman rit, k'okyel tb'aku'n ti'j t-ẍkyinju' nt-ẍtilsa'ntib' te tb'anq'ob', ti'j tman tq'ob' te tb'anq'ob' ex ti'ju' tman twitqan te tb'anq'ob';²⁶ex kb'eltq'o'n ch'i'n aseyt toj tq'ob' te tnayaj,²⁷kxeltzun twitxk'a'n wuq maj ch'i'n aseyt nwitze' tu'n twitq'ob' te tb'anq'ob' ti'ju' aseyt ati toj tq'ob'.²⁸Ex ikx k'okyel tb'aku'n ch'i'n aseyt ti'j t-ẍkyinju' xjal in t-ẍtilsa'n te tb'anq'ob', ti'ju' tman tq'ob' te tb'anq'ob' ex ti'ju' tman twitqan te tb'anq'ob', jaxu' soka' tb'aku'n tchk'elju' chojb'il tu'n tten b'a'n wuk'i'le'.²⁹Atzunju' ch'i'ntl aseyt xkyaj kjawix tb'aku'n pale toj twi'ju' xjal in t-ẍtilsa'ntib', tu'ntzun tkub' nnajsa'ne' til, ayine' Dyos Manb'aj.³⁰Kb'eltzun tq'o'n pale jun tal xlak'uk' mujqa jun tal paloms, se'nxju' kb'entel tq'onteju' nt-ẍtilsa'ntib'.³¹Junju' tal pich' kb'el te chojb'il tu'n tpaj il, atzu'n juntl te chojb'il k'ok'sb'il, tib'ajxi'tlju' oyaj twitz awal k'ok'e'kwitz. Iktzu'n ktk'ma'ya' pale najsb'ilte tilju' xjal nt-ẍtilsa'ntib' nwitze', chi Qman Dyos te Moyses.

³²Aye'tzun xnaq'tzb'ilju' kyeju' yab' tu'n xlemtx'a'k, ju' mixti' tu'me'l tu'n kyq'onte jun oyaj nim tu'n kyẍtilsante kyib'. Chik'b'ab'l tu'n kyẍtilsetju' ja nche sb'akyix

³³Tzaj tma'n Qman Dyos kye Moyses ex Aaron kjalu:

³⁴Qama tzaj nq'o'ne' nim txqan sb'ak toj jun ja toj kytaname', kse'n ate'qe'tle' toju' tx'otx' Kanaan, ju' kxe'l nq'o'ne' kyeye' te kyetzb'ile',³⁵kxe'lju' tajaw ja nelteju' pale ex kxe'l tma'n te: Naku'j matxi' sb'akyixju' njaye', chiku'.

³⁶Nejl kxel tma'nju' pale tu'n kyb'je'tz iq'i'nju' ati toj, tu'ntzun lalun che b'ajtz'ilix tkyaqilju' ati toj. K'okyextzuntz ka'yilteju' sb'ak.

³⁷Ajtzun tok tka'yi'n paleju' sb'ak, qa atiyile twitzju' ttapiyil ja cha'xinin mujqa kyeqinin ka'yin, exqa in che'x yeq'li toju' tapi,³⁸k'eletz toju' ja ex ktma' tu'n tkyaj jpet wuq q'iju' ja.³⁹Tojtzun twuqi'n q'ij k'okel tka'yi'n jumajtlju' pale, qatzun matxi mlenju' sb'ak ti'ju' ttapiyil ja,⁴⁰kxel tma'ntzuntz tu'n kyel iq'etju' ab'j ati sb'ak kyi'j ex tu'n kyxi' xoyit jata' txqan tz'il ti'jxi' nintnam;⁴¹Ex kxe'l tma'n tu'n tb'aj jset tkyaqilu' tojxi' ja ex tu'n tex xoyet ti'jxi' nintnam tkyaqilju' quq mab'je'l jset, jata' txqan tz'il.⁴²Kche tzajel iq'ettzun txqantl ab'jtz tu'n tok kyxelju' ẍe el iq'et, ex ak'a'j b'a'ntx'otx' tu'n tktxetl toju' ja.

⁴³Qatzun masb'akyix jumajtlju' ja tb'je'lenxi' iq'etju' ab'j ex tb'ajlen jset twitz ttapiyilju' ja ex tb'ajlenxi' ktxet jumajtl,⁴⁴k'okyex jumajtlju' pale ka'yilte. Qama txi' mlenju' sb'ak toju' ja, taq'wixi'x sb'aktzuntz ex tz'iltlju' ja.⁴⁵Qu'mtzun ati tu'n tkub' xitetju' ja, ex tkyaqilx kxel xoyit jata' txqan tz'il ti'jxi' nintnam.⁴⁶Alkyexku' matz'okx toju' ja toju' tq'ijlalil kyejtma'n pale tu'n tjpet, kjelten tz'il tzmaxi'j ajqok yupj.⁴⁷Alkyexku' mawan mujqa mawtan toju' ja, ati tu'n ttxjonte t-xb'alun tu'n t-ẍtilset.

⁴⁸Qatzun ajtokxju' pale ka'yilteju' ja, qama til min xxi' mlentlju' sb'ak tb'ajlenxi' ktxet jumajtl toj, ktma'tzuntz qa ẍtiluntlju' ja, qu'n matxi' kub' naju' sb'ak.⁴⁹Tu'ntzun t-ẍtilsetju' ja, ktzajel tiq'i'n kab'e' tal pich', tze k'ute, xb'alun kyeqka'yin ex k'ak'ul.⁵⁰Kb'el tb'yo'n junju' tal pich' tib'aj jun tx'otx' k'wil nojni tu'n a' tzajnix toj t-xiklil.⁵¹Ktzajel tiq'i'ntzun k'utetz, k'ak'ul, xb'alun kyeq, exju' tal pich' itz', che kb'elex tak'sa'ntzuntz toj tchk'elju' tal pich' kyimnitl ex toju' a' tzajni toj t-xiklil, kxel twitxk'a'ntzun wuq majtz ti'ju' ja.⁵²Iktzu'n kẍtilsetela'ju' jatu'n tchk'elju' tal pich' tuk'i'lju' a' tzajnix toj t-xiklil, ex tal pich' itz', ex k'ute, ex k'ak'ul exju' xb'alun kyeq.⁵³Yajxi'tzuntl kxel ttzaqpi'n tal pich' itz' ti'jxi' nintnam, ikytzun ktb'incha'ju' tu'n t-ẍtilsetju' ja, chi Dyos.

⁵⁴Aye'tzun xnaq'tzb'ilju' ti'j alkyexku' yab'il tu'n xlemtx'a'k, ẍal, tx'a'k,⁵⁵psuq' ti'j xb'alun ex sb'ak ti'j ja,⁵⁶malni ex b'je'tzni poq'li, ex tz'il majx inkyajten,⁵⁷tu'ntzun tel kynik'tzilju' ẍtilun exju' mya ẍtilun. Iktzun xnaq'tzb'ilju' tib'aju' xlemtx'a'k. Xnaq'tzb'il tib'aj ttz'ilil ichan

¹Tzaj tma'n Qman Dyos kye Moyses ex Aaron tu'n t-xi' kyma'n kye aj Israel kjalu:
Qama tzaj yab'il toj ttz'a'lb'il jun ichan, kjelten tz'il.³Aju' tz'il tu'n tpaju' ij yab'tl inel qojl kukxju' toj twi'ju' ttz'a'lb'il mujqa mamqet toj twi' ttz'a'lb'il tu'nxju' yab'il, tu'nju' lu in kyejten xjal tz'il.

⁴Jaxjaku' makub'a' kẍeju' ichan lu ex ja makyaja' qojl txqantl tu'n, kjel tz'il.
Alkyexku' ti'xti' jamakub'a' qe, kjel tz'il.

⁵Alkyexku' matxi tzyunteju' jamakub'a' kẍeju' ichan lu, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

⁶Alkyexku' makub' qe tib'aj tq'uqb'lenju' ichan lu, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

⁷Alkyexku' matxi tzyunteju' inel qojl ij ti'j, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

⁸Qama tz'ok ttzub'a'nju' yab' ti'j jun xjal b'a'n, aju' xjal lu ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

⁹Alkyexku' iqb'il xjal ti'j chej matz'ajb'en tu'nju' inel qojl ij toj twi' ttz'a'lb'il, kjelten tz'il.

¹⁰Alkyexku' matxi tzyunte jun ti'xti' jamakub' qeya'ju' yab' lu, kjelten tz'il tzmaxi'j ajqok yupj.
Alkyexku' matxi iq'inte junju' ti'xti' lu, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

¹¹Alkyexku' matz'ok tzyunteju' in qojl ij ti'j exqa mixti' xtx'jon tq'ob', ati tu'n ttxjonte t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

¹²Ati tu'n tkub' pa'yetju' tx'otx' k'wil qama txi' ttzyu'nju' inel qojl ij ti'j; aye'tzu'n ti'xti' tzeqe' ati tu'n kytx'jet.

¹³Qatzun mab'anixju' ichan lu teju' tyab'il tu'n ij, ati tu'n t-ẍtilsantetib' toj wuq q'ij; kttxja'ju' t-xb'alun ex kttxja'tib' tu'n a' tzajnix toj t-xiklil, kjeltzuntz ẍtilun.¹⁴Tojtzun twajxaqi'n q'ij ktzajel tiq'i'n kab'e' xlak'uk' mujqa kab'e' tal paloms, kxe'ltzuntz ttziju' Ja te Mujb'ab'ltib'il tu'n t-xi' tq'o'n teju' pale nwitze'.¹⁵Atzu'n pale kb'eltq'o'n jun te chojb'il tu'n tpaj il, atzu'n juntl te chojb'il k'ok'sb'il, iktzu'n ktb'incha'ju' ẍtilsab'l teju' ichan yab' tu'n ij nwitze' ayine' Dyos Manb'aj.

¹⁶Qa ati jun ichan matz'el qojlju' ij toj twi' ttz'a'lb'il, kttxja'tib' tkyaqilju' t-xmilal toj a' ex kjelten tz'il tzmaxi'j ajqok yupj.

¹⁷Alkyexku' xb'alun mujqa tz'u'n makub' qojlju' ij tib'aj, ati tu'n txjet tu'n a' ex kjelten tz'il tzmaxi'j ajqok yupj.

¹⁸Qama kub' kẍe jun ichan tuk'i'l jun qya, kykab'ilx ati tu'n kytx'jonte kyib' tu'n a' ex che kjelten tz'il tzmaxi'j ajqok yupj. Xnaq'tzb'il tib'aj kytz'ilil qya

¹⁹Ajtkb'u'l ttx'ajin jun qya, kjelten wuq q'ij tz'il.
Alkyexku' matxi tzyunte, kjelten tz'il tzmaxi'j ajqok yupj.

²⁰Alkyexku' ti'xti' jamakub'a' kẍeju' qya lu toju' tq'ijlalil aj tkb'u'lju' ttx'ajin, kjelten tz'il.
Alkyexku' ti'xti' jamakub'a' qe, kjelten tz'il.

²¹Alkyexku' matxi tzyunteju' tkuẍb'len, ati tu'n txjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

²²Alkyexku' matxi tzyunte jun ti'xti' jamakub'a' qeju' qya lu, ati tu'n ttxjonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.²³Qama txi' ttzyu'nju' tkuẍb'len mujqa tq'uqb'lenju' qya lu, kjelten tz'il tzmaxi'j ajqok yupj.

²⁴Qama kub' kẍe jun ichan tuk'i'lju' qya lu, matxi' tz'el tiqa'nju' ttz'ilil, kjel tentzun wuq q'ijtz tz'il, ex ikxju' jamakub'a' kẍe.

²⁵Qa nab'en ati jun qya matz'el qojl chik' ti'j na'mxtoq tjapun tq'ijlalil tu'n tkb'u'lju' ttx'ajin, exqa maqojl b'a'npun q'ij, mujqa matenxi'xtl tq'ijlalilju' ttx'ajin, kjelten tz'il tzmaxi'j aj tqjenju' chik' ti'j, naku'xwitloj kse'n aj tkb'u'lju' ttx'ajin.

²⁶Jaxjaku' mawtana'ju' qya lu ex alkyexku' ti'xti' jamakub'a' qe akxku' in qojlu' chik' ti'j, kjelten tz'il, ikxju' kse'n ati toj tq'ijlalil aj tkb'u'lju' ttx'ajin.

²⁷Alkyexku' matxi tzyunkyeju' ti'xti' lu, kjelten tz'il. Ati tu'n ttxjonte t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj.

²⁸Ajtzun tqjenju' chik' ti'j, b'a'n tu'n t-xi' tajla'n wuq q'ij, tb'ajlenxi'tzu'n wuq q'ij kjel ẍtilun.²⁹Tojtzun twajxaqi'n q'ij ktzajel tiq'i'n kab'e' tal xlak'uk' mujqa kab'e' tal paloms, che kxel tiq'i'ntzuntz teju' pale ttziju' Ja te Mujb'ab'ltib'il.³⁰Kb'eltq'o'n pale jun te chojb'il tu'n tpaj il, atzu'n juntl te chojb'il k'ok'sb'il. Iktzun ktb'incha' paleju' nwitze' ayine' Dyos Manb'aj tu'n t-ẍtilsetju' qya teju' chik' sel qojl ti'j,³¹ikytzu'n che elela' kylaq'b'a'ne' aj Israel ti'ju' kytz'ilil, tu'n lalun che kyim tu'ntpaj qama b'aj kytz'ilsa'n najb'il ja najla' qine' kyxole', chi Dyos.

³²Aye'tzun xnaq'tzb'il ja'lu kyi'ju' ichan inel qojl ij toj twi' kytz'a'lb'il ex kyi'ju' inel qojl junjun maj kyi'j, ju' inche kyejten tz'il tu'nju' yab'il lu;³³ex kyi'ju' qya inkb'u'l kytx'ajin toj xjawi'n ex kyi'ju' naqx in kb'u'l qojl chik' kye na'mtoq tkb'u'lju' kytx'ajin. Aye'tzun xnaq'tzb'ilju' tu'n tb'inchet kyeju' ichan mujqa kyeju' qya, ex kyeju' ichan inche kub'kẍe tuk'i'l jun qya ati toj tq'ijlalil ttx'ajin. Tq'ij najsb'il

¹Yolin Qman Dyos tuk'i'l Moyses kykyimlenxi' kab'e' tk'wal Aaron, ju' e'kyim tu'n tpaj exi'lq'exi'x twitz Qman Dyos.²Tzaj tma'n Qman Dyos te Moyses tu'n t-xitma'n te Aaron, ju' ttzik:
Mixti' tu'n tokx alkyexku' kmoj toju' ja xjan ati ti'jxi'ju' xb'alun te aq'pub'l ex twitz tjpelju' kax k'ub'lteju' yol kyejni b'entti'j, tu'ntzun lalun Kyim; qu'n knyek'u' wib'e' toj muj tib'aju' tjpel kax.³Ati tu'n tokx Aaron toju' ja xjan tuk'i'l jun qpoj tman wakx te chojb'il tu'n tpaj il ex jun tman rit tu'n tkub' tq'o'n te chojb'il k'ok'sb'il.⁴Ati tu'n tok toksa'nkju' t-xb'alun ku'j sed xjansa'n, ktxu'nju' t-xmilal tu'n kalsonsiy sed, ex tokju' k'alb'il tk'u'j ex ẍipb'il twi' sed. Xjansa'nqe'ju' xb'alun lu, qu'mtzun ati tu'n ttxjontetib' tu'n a' na'mtoq kyok toksa'n.

⁵Atzu'n kye' aj Israel ktzajel kyq'o'n kab'e' chib' te Aaron te chojb'il tu'ntpaj il, ex jun tman rit tu'n tkub' q'et te chojb'il k'ok'sb'il.⁶Kb'el tq'o'ntzun tman wakxtz te chojb'il tu'n tpaju' til, tu'ntzun tkub'najsetju' til ex kyilju' toj tja.⁷Yajxi'tzuntl kche tzajel tiq'i'nju' kab'e' chib' ex che kb'eltq'o'n nwitze' ttziju' Ja te Mujb'ab'ltib'il;⁸kxel t-se'ntzuntz tu'n teltnik' kyi'ju' kab'e' tman chib' lu alkyeju' weye' ex alkye kxel tzaqpet tu'n t-xi' tiqa'n kyil xjal.⁹Aju' chib' xkub' tz'aq weye', kb'eltq'o'n Aaron te chojb'il tu'n tpaj il;¹⁰atzunju' chib' xkub' tz'aq tu'n t-xi' tzaqpet, kb'eltq'o'n itz' nwitze' ayine' Dyos Manb'aj tu'ntzun tnajset kyilju' tnam, okxe'l tzaqpettzuntz ex kxel q'et toj chq'ajlaj.

¹¹Kb'eltq'o'n Aaron ju' qpoj tman wakx te chojb'il teku' tu'n tpaj il, tu'n tnajsetju' til ex kyilju' toj tja.¹²Ktzajel tiq'i'ntzun jun xq'aq'b'iltz nojni tu'n ttxalq'aq' tzajni tib'aju' q'olb'eb'l ati nwitze', ex kab'e' txab' sturak k'ok'sb'il chen, ex kxe'l tiq'i'n ti'jxi'ju' xb'alun te aq'pub'l;¹³k'okyex tq'o'nju' sturak tib'aju' q'aq' nwitze', ex kb'el noj ti'ju' tjpel kax k'ub'lteju' yol kyejni b'entti'j tu'n t-sb'elju' sturak. Laytzun kyim Aarontz ikju'.¹⁴Ex kjawil tiq'i'n ch'i'n tchk'elju' qpoj tman wakx, kxel twitxk'a'ntzuntz tu'n twitq'ob' tib'aju' tjpel kax tu'me'l tjawetzq'ij. Ex kxel twitxk'a'n wuq maju' chik' tu'n twitq'ob' twitz tjpelju' kax,¹⁵yajxi'tzuntl kb'el tb'yo'nju' chib' te chojb'il tu'n tpaj kyilju' tnam ex k'okex tiq'i'nju' chik' ti'jxi'ju' xb'alun te aq'pub'l; atzuntzu' kb'el twitxk'a'n tib'aj ex twitzju' tjpel kax, kse'nxju' tb'incha tu'nju' tchk'el qpoj tman wakx.¹⁶Iktzu'n kt-ẍtilsa'ju' ja xjan te tkyaqilju' kytz'ilil, kypi'sal ex kyil aj Israel. Ex ikx tu'n tb'inchanteju' ti'ju' Ja te Mujb'ab'ltib'il, ju' ati kyxol tuk'i'lju' kytz'ilil.

¹⁷Akxku' ati Aaron toju' ja xjan tu'n tk'monteju' najsb'il il tzmaxi'j ajtetz, mix-a'lo' te ktenb'el toju' Ja te Mujb'ab'ltib'il. Ajtzun tk'monteju' najsb'il til, kyilju' toj tja ex kyil tkyaqilju' tnam Israel,¹⁸k'eletztzuntz tu'n t-xi' ẍtilsalteju' q'olb'eb'l ati nwitze'. Ktzajel tiq'i'n ch'i'n kychk'elju' qpoj tman wakx ex tman chib', ex k'okel t-sun kyi'j tuk'a ex ti'jile q'olb'eb'l,¹⁹ex kxel twitxk'a'n wuq maju' chik' tu'n twitq'ob' tib'aju' q'olb'eb'l. Iktzu'n kẍtilsetela'ju' tu'n teju' kytz'ilil aj Israel, ex kt-xjansa'.

²⁰Ajtzun kyb'aj t-ẍtilsa'n Aaron ju' ja xjan, Ja te Mujb'ab'ltib'il exju' q'olb'eb'l, kxe'l tma'n tu'n ttzaj iq'i'n chib' itz'x²¹ex kb'eltq'o'n tq'ob' tib'aj twi'ju' alu'mj, kxel tpa'ntzuntz tkyaqil kyil aj Israeltz tib'aj, tkyaqilju' kyb'inchb'aj taq'wix ex tu'nju' njaw kyi'nkyib' wi'je'. Iktzu'n che kb'ela' tq'o'nju' il tib'aj twi'ju' tman chib'. Ex jun xjal kxel q'inte tu'n t-xi' ttzaqpi'n toj chq'ajlaj.²²Iktzu'n aj t-xi' tzpetju' tman chib' toj chq'ajlaj, kxe'l tiq'i'n tkyaqilju' kyil jamixti'qe' xjal najla'qe'.²³Oktzun k'okyex Aarontz toju' Ja te Mujb'ab'ltib'il ex k'elel tiq'i'nju' t-xb'alun sed, ju' oktq'o'n tej tokx toju' ja xjan, kjel tq'o'ntzuntz atzu'.²⁴Axtzuntzu' kttxja'tib' tu'n a' toju' ja xjan, toklenxi'tzun tq'o'nju' t-xb'alun, k'eletz tu'n tkub' tq'o'nju' toyaj k'ok'sb'il, extzunju' kb'eltq'o'n tu'nelju' tnam, iktzu'n ktk'ma' najsb'il til ex kyilju' tman.²⁵Kb'el ttz'e'ysa'n t-untilju' chojb'il tu'n tpaj il tib'aj q'olb'eb'l;²⁶atzunju' xxi' q'inteju' chib' tu'n t-xi' tzaqpet toj chq'ajlaj kttx'ja' t-xb'alun ex kttxja'tib' tu'n a', b'a'ntzun tu'n tokxtzuntz toju' najb'il.

²⁷Aye'tzu'n qpoj tman wakx ex tman chib' e'kub' q'et te chojb'il tu'ntpaj il, ju' xi' iq'etu' kychk'el toju' ja xjan tu'n tk'metju' najsb'il il, che kxe'l iq'et ti'jxi' najb'il, aye'tzu'n kytz'umal, kychib'jil ex kytxa, che b'eltz'e'yset.²⁸Ati tu'n ttxjonte t-xb'alunju' xjal kb'el tz'e'ysankye ex tu'n ttxjontetib' tu'n a', b'a'ntzun tu'n tokxtz toju' najb'il.

²⁹Majx kjeltenju' kawb'il lu kyeye': ati tu'n kmewayine' toj tlajoji'n q'ij tajlalju' twuqi'n xjaw ex mixti' jun aq'untl tu'n kyb'inchanteye', kykyaqilx aj Israel exqe' najchaq xjal najliqe' kyxole',³⁰qu'n kyk'ma'ju'ye' najsb'il kyile' nwitze' ayine' Dyos Manb'aj toju' q'ij lu, che kjele' ẍtilun te tkyaqilju' kyile'.³¹Jun kawb'ilte' majx kjelten: k'okelju' q'ij lu nim toklen kyeye' te ojlab'l ex te mewayi'n.³²Aju' pale jawni sk'o'n ex matxi' txiq'o'n toklen tu'n tok te t-xelju' tman te pale kb'inchalteju' tu'me'l tu'n tknetju' najsb'il il; k'okyel tq'o'nju' t-xb'alun sed xjansa'n³³ex ktb'incha'ju' ẍtilsab'l teju' ja xjanxi'x, exju' Ja te Mujb'ab'ltib'il, ex teju' q'olb'eb'l, ex ktk'ma' najsb'ilte kyilju' pale ex najsb'ilte kyil kykyaqilju' tnam.

³⁴Jun kawb'ilte' lu majx kjelten kyeye': kb'el ik'set jumaju' tu'me'l tu'n tnajset kyil aj Israel nkyb'incha'n toj ab'q'i, chi Qman Dyos.
Ex b'inchet kse'nxju' ojetoq tman Qman Dyos te Moyses. O'kxku' jun ja xjan

¹Tzaj tma'n Qman Dyos te Moyses²tu'n t-xitma'n kye Aaron kyuk'i'lju' tk'wal ex kye kykyaqil aj Israel qa matxitoq che tzaj tq'o'nju' chaq'b'il ikjalu:

³Alkyexku' jun aj Israel makub' tb'yo'n jun tman wakx, jun tman rit mujqa jun ttxu chib' toju' najb'il mujqa ti'jxi',⁴exqa min saj tiq'i'n ttziju' Ja te Mujb'ab'ltib'il tu'n tkub' tq'o'n te jun oyaj weye' twitzju' njaye' xjan, atitzun tiltz tu'nju' matz'el chik' tu'n, qu'mtzun k'elex iq'et kyxolju' twnaqil.⁵K'ajb'elju' lu kyu'ne' aj Israel tu'n kytzaj kyiq'i'ne' alu'mj inche kub' kyb'yo'ne' toj kojb'il nwitze', ex tu'n t-xi' kyiqi'ne' teju' pale ttziju' Ja te Mujb'ab'ltib'il, tu'ntzun tkub' tq'o'n pale te chojb'il kyu'nele' te b'inchjtib'il.⁶Kxel twitxk'a'n paleju' chik' tib'aju' q'olb'eb'l weye' ttziju' Ja te Mujb'ab'ltib'il, ex kttz'e'ysa'ju' unt te k'ok'sb'il tb'anil nwitze'.⁷Ex mixti'tl tu'n tkub' kyq'o'ne' chojb'il kyeju' tajaw il lu, ju' e k'ulune' kye ex e'txalpuje' kyu'n. Jun kawb'ilte' lu majx kjelten kyeye', k'ajb'el kyeye' ex kye kyk'wale' toj wiqi'n.

⁸Ex alkyexku' aj Israel mujqa najchaq xjal najli kyxole' qama kub' tq'o'n jun chojb'il k'ok'sb'il mujqa alkyexku' juntl chojb'il,⁹exqa min xxi' tiq'i'n ttziju' Ja te Mujb'ab'ltib'il tu'n tkub' tq'o'n nwitze', ati tu'n tex iq'et kyxolju' ttanam. Min q'o'n tu'n t-xi' ch'yetju' chik'

¹⁰Kchin q'ojile' kyi'j kykyaqil aj Israel mujqa najchaq xjal najli kyxole' qama ch'yon chik', alkyexku' tu'me'l matxa' tch'yo'n, k'elex wiq'i'ne' toj ttanam.¹¹Qu'n kykyaqilju' txkup' itz'qe' tu'nju' kychk'el ati, ex oje txi' nq'o'ne' kyeye' tu'n tpon kyiq'i'ne' tib'aj q'olb'eb'l te chojb'il tu'n tklet kychwinqlale', qu'n tu'nju' chik' in kolpeta' tchwinqlal xjal.

¹²Qu'mtzun inma'ne' kyeye' aj Israel, mix-a'lo' junkye' ex mix-a'lo' jun najchaq xjal najli kyxole' tu'n tch'yon chik'.¹³Alkyexku' jun aj Israel mujqa najchaq xjal najli kyxole' matzyet jun txkup tu'n mujqa pich'ju' b'a'n tu'n kych'yet, ati tu'n tel tqo'n tchk'elju' xtzyet tu'n ex tu'n tmqunte toj tx'otx',¹⁴qu'n tu'nju' chik' inche anq'ina' kykyaqilju' itz'qe'. Qu'mtzun in xa' nma'ne' kyeye' tu'n lalun txi' kych'yo'nju'ye' chik', qu'n a chwinqlalju' kye kykyaqilju' itz'qe', alkyexku' matxi ch'yonte k'elex xla'jet kyxolju' ttanam.

¹⁵Alkyexku' jun aj Israel mujqa najchaq xjal matxi ch'yonte tchib'jil jun txkup kyimnitl mujqa b'ajni tzaqu'n tu'n jun tojk'ul txkup, ati tu'n ttx'jonteju' t-xb'alun ex tu'n ttxjontetib' tu'n a', ex kjelten tz'il tzmaxi'j ajqok yupj. Yajxi'tzuntel kjelten ẍtilun.¹⁶Qatzun min xttx'aju' t-xb'alun ex min xb'aj ttxjo'ntib', kjelten toj il, chi Dyos. Mya kyuk'i'l alkyexku' qya tu'n kykub' kẍe ichan

¹Tzaj tma'n Qman Dyos te Moyses tu'n t-xitma'n kye aj Israel kjalu:
Ayinwe' Dyos Manb'aj.

³Lalun txikyb'incha'nju'ye' nkyb'incha'n aj Ejipt jaẍe najana'ye'.
Lalun che'x lpeye' ti'ju' nkyb'incha'n aj Kanaan toju' tx'otx' ja che kxe'la' wiq'i'ne', lalun che oklpeye' kyi'ju' kykawb'il.

⁴Che japunxju' nnuk'b'ile' kyu'ne'; kyb'inchanqe'xe' nkawb'ile'; che anq'ine' kse'nxju' nkyma'n. Ayine' Dyos Manb'aj.

⁵Kyb'inchanqe'xe' nkawb'ile' ex nnuk'b'ile'. K'anq'ilte' xjal mache japun tu'n. Qu'n ayine' Dyos Manb'aj.

⁶Mixti' tu'n tkub' kẍe jun ichan tuk'i'l jun qya twitze'lx. Qu'n ayine' Dyos Manb'aj inchin q'mante.

⁷Lalun tz'el kyiq'i'n tch'ixaw kymane' tu'nwt kykub'kẍeye' tuk'i'l kytxuye'; lalun kyb'inchaye' tuk'i'l qu'n kytxuna'ye'.

⁸Ex lalun tz'el kyiq'i'n tch'ixaw kymane' tu'nwt kykub'kẍeye' tuk'i'l junju' juntl t-xu'jil.

⁹Lalun che kub' kẍeye' tuk'i'l kyanab'e', qa o'kx kymane' junx tuk'i'l mujqa o'kx kytxuye'; qa itz'ji tuja mujqa ttzija k'wal, lalun che kub' kẍeye' tuk'i'l.

¹⁰Lalun che elsan ch'xawe' tuk'i'l kychmane' txin, tmyal kyk'wale' mujqa tal kymyale', lalun che kub' kẍeye' tuk'i'l.

¹¹Lalun che kub' kẍeye' tuk'i'l talju' t-xu'jil kymane', qu'n kyanab'e'. Lalun kub' kyajine'.

¹²Lalun che kub' kẍeye' tuk'i'l tanab' kymane', qu'n ax tchk'el kymanju'ye'.

¹³Lalun che kub' kẍeye' tuk'i'l titz'in kytxuye', qu'n ax tchk'el kytxuju'ye'.

¹⁴Lalun tz'el kyiq'i'n tch'ixaw kytiye' tu'nwt kykub'kẍeye' tuk'i'l t-xu'jil, qu'n kytiyxe' t-xu'jil.

¹⁵Lalun che kub' kẍeye' tuk'i'l kylib'e', qu'n t-xu'jilna' kyk'wale'.

¹⁶Lalun tz'el kyiq'i'ne' tch'ixaw kytzikye' tu'nwt kykub'kẍeye' tuk'i'lju' t-xu'jil.

¹⁷Lalun che kub' kẍeye' tuk'i'l jun qya tojx kyjakyib'e' tuk'i'l, ex tuk'i'l jun tal, mujqa jun tchman, qa tmyal tal mujqa tal tal. Qu'n taq'wixi'xte' tu'n kyb'inchanteye' lu.

¹⁸Lalun kub'kyxu'jila'ne' titz'in kyxu'jile', ex lalun che kub' kẍeye' tuk'i'l itz'ku'xju' kyxu'jile', tu'ntzun lalun tzaj q'oj kyxol.

¹⁹Lalun che kub' kẍeye' tuk'i'l jun qya toju' tq'ijlalil ajtkb'u'l ttx'ajin.

²⁰Lalun che kub' kẍeye' tuk'i'l t-xu'jil kywnaqile' tu'n lalun che tz'ilixe' tu'n tpaj.

²¹Lalun txikyq'o'n junju'ye' kyk'wale' te oyaj teju' dyos Molok. Lalun kyb'inchaye' taq'wix lu ti'ju' nb'iye'. Qu'n ayine' Dyos Manb'aj.

²²Lalun che kub' kẍeye' tuk'i'l jun ichan kse'n tuk'i'l jun qya. Qu'n mixyab'a'nte' lu qama b'inchet.

²³Lalun che kub' kẍeye' tuk'i'l jun txkup, tu'n lalun che kyaje' tz'il tu'n tpaj. Ex ikxqe' qya lalun txikyq'o'nkyib' te jun txkup. Qu'n mixyab'a'nte' lu.

²⁴Lalun kytz'ilsa kyib'e' tu'n junju' ti'xti' lu, qu'n kyu'nju' lu matxi' kytz'ilsa kyib'ju' tnam che eletz wu'ne' toju' kytanam kywitze',²⁵ex kyej tz'ilixju' kytx'otx'; xi'tzun nxjelu'ne' kye ti'ju' kyb'inchb'aj, ex eb'je'tz xon tu'nju' tx'otx' janajlqe'toq.²⁶Aye'tzunkye' aj Israel, exqe' najchaq xjal najliqe' kyxole', kyb'inchanqe'xe' nkawb'ile' exqe' nnuk'b'ile', lalun kyb'incha junju'ye' ti'xti' taq'wixi'x lu,²⁷qu'n kykyaqilju' taq'wix lu makyb'inchaju' ẍenajanteju' tx'otx' nejl kywitze', ex makyej tz'ilixju' tx'otx' kyu'n.²⁸¡Laywit che etz xla'ja'ne' tu'nju' tx'otx' tu'n kpaju' tz'il lu, kse'n eb'je'tza' t-xla'ja'nju' xjal e'najan atzu' nejl kywitze'.!²⁹Alkyexku' mab'inchanteju' ti'xti' taq'wixi'x lu, k'elex iq'et kyxolju' ttanam.³⁰Qu'mtzun kyb'inchanxju'ye' nchaq'b'ile' ex lalun che kub' tz'aqe' kyoju' taq'wixi'x intoq che eb'inchanjtz na'mxtoq kypone', ex lalun kytz'ilsa kyib'e' toj. Qu'n ayine' Dyos Manb'aj, chi Dyos. Kawb'il tib'aj xjanb'il ex tnik'alilti'j

¹Tzaj tma'n Qman Dyos te Moyses tu'n t-xitma'n kye aj Israel kjalu:
Kyxjansam kyib'e', qu'n xjan qinwe', ayine' Dyos Manb'aj.

³Teyle junjunkye' che nimane' te kymane' ex te kytxuye'.
Ex kynimanku'ye' q'ij te ojlab'l. Qu'n ayine' Dyos Manb'aj nchin q'mante.

⁴Lalun che'xe' k'ulul te witzleb', ex lalun kub' kyb'incha'n kydyose' k'uxb'il ttx'otx'al, qu'n ayinwe' Dyos Manb'aj.

⁵Ajtkub' kyq'o'ne' chojb'il te b'inchjtib'il nwitze' ayine' Dyos Manb'aj, kyb'inchame' b'a'nxi'x tu'n nk'monteye'.⁶Ati tu'n t-xi' ch'yetju' alu'mj ax q'iju' ajtkub' kyq'o'ne', ex b'a'n t-xi' ch'yet toj tkab' q'ij, qatzun makyej ch'i'ntl te toxi'n q'ij, ati tu'n tkub' tz'e'yset.⁷Qatzun matxi kych'yo'ne' oyaj toj toxi'n q'ij, k'elel wik'o'ne' ex lay nk'ame';⁸alkye matxi ch'yonte, kjelten il tib'aj ex k'elex iq'et kyxolju' ttanam tu'nju' makub' ttxa'ju'nju' xjansa'ntl nwitze'.

⁹Ajtpon tq'ijlalil tu'n tjaw twitz awal, lalun majx tek' b'jawju' twitz kyawale' toj kytx'otx'e' ex lalun che'xe' sakwilteju' triy xkyaj tz'aqi.¹⁰Ex lalun che'xe' sakwilteju' ub'a toj tqanb'en ex lalun jawkysk'o'ne' naq inche kub' tz'aq; kyq'onkje' kyeju' prow ex kye najchaq xjal. Ayine' Dyos Manb'aj nchin q'mante.

¹¹Lalun che elq'ane'. Lalun che chanyole' ex lalun b'ajkub' kysb'u'n kyib'e'.

¹²Lalun tz'ajb'enju' nb'iye' kyu'ne' tu'n ttziyet jun kyole' lay japun, qu'n naq ate'kye' txa'julteju' nb'iye'. Ayine' Dyos Manb'aj.

¹³Lalun che jaw tzaqpaje' ti'j kywnaqile' ex lalun tz'el kyiq'i'ne' ati te. Lalun txi' kychjo'ne' twitk'u'j aq'unal tojxi' juntl q'ij.

¹⁴Lalun che yoline' taq'wix ti'ju' xjal chkyin.
Lalun kub' kyq'o'n xpatxab'e' toj tb'eju' moẍ. Kyyek'ume' ninb'ilweye', qu'n ayine' Dyos Manb'aj.

¹⁵Lalun kub' kyq'o'ne' tz'e'ysb'il witzb'aj mya toj tnik'alilti'j: mya tu'nwtu' prow lay tz'e'yset twitz, ex mya tu'nwtu' nim toklen lay tz'e'yset twitz. Che lpekye' ti'ju' tnik'alilti'j ajtkub' tz'e'ysb'il kywitz xjal.

¹⁶Lalun che jk'un yole' kyxol kyxjalile'.
Lalun kyaq'kyib'e' tu'n tkub' b'yetju' kywnaqile'. Ayine' Dyos Manb'aj nchin q'mante.

¹⁷Lalun majx kux kyawa'n kyq'oje kyi'j kytzikye' toj kyanmiye'.
Kytzak'unxe' kywnaqile' qa ati til, tu'ntzun lalun che ele' junx tuk'i'l toju' til.

¹⁸Lalun kyaq' tu'me'l t-xele' ex lalun ku'x kyk'u'n kyq'oje kyi'j kywnaqile', kyk'u'jlame' kywnaqile' kse'nx aye'ye'. Ayine' Dyos Manb'aj nchin q'mante.

¹⁹Kyb'inchanqe'xe' nkawb'ile'.
Lalun kyaje' tu'n kyẍchanju' kywakyixe' tuk'i'l alkyexku' juntl txkup.
Lalun tz'ok kyawa'n b'a'npun tyajajil kyijaje' toj kyawb'ile'.
Lalun tz'ok kyq'o'n jun kyxb'alune' b'incha'n tu'n chukchaq q'in.

²⁰Qa ati jun makub' kẍe tuk'i'l jun qya majin k'a'yi'n exqa tetoq juntl ichan, na'mxtoqtzun t-xi' lq'o'n ex na'mxtoq ttzaqpet, ati tu'n tchjonte te kykab'il, ex lay che kub' b'yet, qu'n mya tzaqpi'nju' qya lu.²¹Ati tu'n ttzaj tiq'i'n ichan jun tman rit nwitze' te chojb'il tu'n tten b'a'n wuk'i'le', ati tu'n t-xi' tiq'i'n ttziju' Ja te Mujb'ab'ltib'il.

²²Tu'ntzunju' tman rit lu te chojb'il tu'n tten b'a'n wuk'i'le', ktzajel tqani'n pale weye' tu'n tkub' najset tilu' ichan lu, ex kb'el nnajsa'ne' til xtb'incha.

²³Ajkyokxe' toju' tx'otx', qa makux kyawa'ne' tze tqan lob'j, lalun tz'el kyt'uxi'n oxe' ab'q'iye' twitz te kylo'ye'.²⁴Atzu'n toj tkyaji'n ab'q'i kykyaqilju' twitz lob'j kxjansetel nwitze' toj jun ninq'ij,²⁵tojtzu'n tjwe'yi'n ab'q'i b'a'n kylo'nteye' kywitz. Kkyq'a'tzun kye tzetz kywitz. Ayine' Dyos Manb'aj nchin q'mante.

²⁶Lalun txi' kych'yo'n chib'je' tuk'i'lxi' chik'.
Lalun che ajpkab'ine' ex lalun tz'ok kyq'o'n kyib'e' q'malte titi' tzul.

²⁷Lalun tz'el kyjon kywi'ye' sewun, ex lalun tz'el kyjone' ttxa'n kyxmatziye'.

²⁸Lalun tz'ok kyky'ixb'sa'n kyib'e' tu'n tpaj jun kyimni. Lalun tz'ok kyq'o'n tilb'ilale' ti'j kychib'jile'. Ayine' Dyos Manb'aj nchin q'mante.

²⁹Lalun che'x kyq'o'ne' kymyale' toj ajpaji'n. Lalun kub' tzuwixju' tx'otx' kyu'ne' tu'n txqan il taq'wixi'x.

³⁰Kynimanku'ye' q'ij te ojlab'l weye', tenx tchiylal njaye' xjan kyeye'. Ayine' Dyos Manb'aj.

³¹Lalun che'xe' jyol kyi'je' kyuk'i'l spritist ex ajpkab'. Lalun kytz'ilsa kyib'e' tu'nju' joyb'ilkyi'je'. Qu'n ayine' Dyos Manb'aj.

³²Che q'olb'enqe'ye' ex che nimane' kye tijwnaq. Tenx nchiylale' kyeye'. Qu'n ayine' Dyos Manb'aj.

³³Lalun kub' kyyaju'ne' najchaq xjal najli kyxole'.

³⁴Kyq'onke' kse'n jun kywnaqile'; kyk'u'jlame', qu'n ikxju' kse'n aye'ye'. Expena' ikxkye' e'okye' te najchaq xjal toj Ejipt. Ayine' Dyos Manb'aj nchin q'mante.

³⁵Lalun che sb'une' kyi'j echb'il tx'otx', peẍ ex juntl malb'il.³⁶Ati tu'n kyajb'en echb'il kyu'ne', e'peẍ ex juntl malb'il tz'aqliqe'. Qu'n Ayine' Dyos Manb'aj, inetz q'inkyeye' toj Ejipt.

³⁷Qu'mtzun kyb'inchanqe'xe' nkawb'ile' ex nnuk'b'ile'; che japunx kyu'ne'. Ayine' Dyos Manb'aj, chi Qman Dyos. Tz'e'ysb'il kywitz xjal tu'ntpaj min nche b'in

¹Tzaj tma'n Qman Dyos te Moyses tu'n t-xitma'n kye aj Israel kjalu:
Alkyexku' aj Israel mujqa najchaq xjal najli toj Israel, qama t-xi' tq'o'n jun tk'wal teju' dyos Molok, ati tu'n tkub' b'yet tu'n ab'j kyu'nju' xjal toju' tx'otx'.³Kchin okyel miltz'uje' ti'ju' xjal lu ex kb'el nnajsa'ne' kyxolju' ttanam, tu'n tpaj makub' ttz'ilsa'nju' njaye' xjan ex makub' ttxa'ju'n nb'iye' tu'nju' matxi tq'o'n jun tk'wal te Molok.⁴Qatzun makyẍkyinsa kyib'ju' xjal toju' tx'otx' teju' nb'aj lu exqa min xkub' kyb'yo'nju' xjal lu,⁵kchin okyel miltz'uje' ti'ju' xjal lu ex kyi'ju' toj tja, ex kb'el nnajsa'ne' kyxolju' ttanam junx kyuk'i'lxi'ju' ẍe'x lpe ti'j k'ulul te Molok.⁶Qatzun ati jun mattz'ilsatib' tu'ntpaj matxi' jyolti'j kyuk'i'l spritist ex kyuk'i'l ajpkab', kchin q'ojile' ti'ju' xjal lu ex kb'el nnajsa'ne' kyxolju' ttanam.

⁷Kyxjansanku'xi'x kyib'e' weye', che okxe' xjan, qu'n ayine' Dyos Manb'aj.⁸Kyb'inchanqe'xe' nkawb'ile'; che japunx kyu'ne'. Qu'n ayine' Dyos Manb'aj, nche nxjansa'ne' te weye'.

⁹Alkyexku' matz'ok tili'n tman mujqa ttxu, kb'el b'yet. Tib'ajxte ta'ju' tkamik, qu'n mana' tz'ok tili'n tman mujqa ttxu.

¹⁰Qa nab'en ati jun matb'incha ajpaji'n tuk'i'l t-xu'jil twnaqil, ati tu'n tkub' b'yetju' ichan exju' qya.

¹¹Qa ati jun makub' kẍe tuk'i'l t-xu'jil tman, in eltiq'i'n tch'ixaw tman. Qu'mtzun ati tu'n tkub' b'yetju' ichan exju' qya, ex kyib'ajx ta'ju' kykamik.

¹²Qa ati jun makub' kẍe tuk'i'l tlib', ati tu'n kykub' b'yet kykab'il ex kyib'ajx ta'ju' kykamik, qu'n taq'wixi'x ju'lu.

¹³Qa ati jun ichan makub' kẍe tuk'i'l juntl ichan nakuxwitloj tuk'i'l jun qya, ati tu'n kykub' b'yet kykab'il ex kyib'ajx ta'ju' kykamik, qu'n taq'wixi'xju' xkyb'incha.

¹⁴Qa ati jun ichan makub' t-xu'jila'n jun qya tuk'i'lxi' ttxu, aju' lu taq'wixi'x ex ati tu'n kykub' tz'e'yset itz'qe'. Laytzun ten iltz taq'wixi'x kyxole'.

¹⁵Qama tz'oktq'o'ntib' jun ichan ajpajil tuk'i'l jun txkup, ati tu'n tkub' b'yet. Ex ati tu'n tkub' b'yetju' txkup.

¹⁶Qama txi' tq'o'ntib' jun qya ajpajil tuk'i'l jun txkup, ati tu'n tkub' b'yetju' qya exju' txkup. Kyib'ajx ta'ju' kykamik.

¹⁷Qa ati jun makub' t-xu'jila'n tanab', qa tmyal tman mujqa tal ttxu, ex makub' kẍe tuk'i'l, kche elex xla'jet kyxolju' kywnaqil, qu'n ch'ixb'ilxi'xte' qama kub' kẍe jun ichan tuk'i'lx tanab', ex alkye mab'inchanteju' lu tib'ajx ta'ju' til.

¹⁸Qa ati jun makub' kẍe tuk'i'l jun qya toju' tq'ijlalil aj tkb'u'lju' ttx'ajin ex matxi ttzyu'n, kykab'ilx che elex xla'jet kyxolju' kytanam tu'n tpaj min xkynimaju' chaq'b'il tu'n lalun kub'kẍe jun ichan tuk'i'l jun qya toju' tq'ijlalil ajtkb'u'l ttx'ajin.

¹⁹Lalun che ajpajine' tuk'i'l titz'in kytxuye' ex tuk'i'l tanab' kymane', qu'n kywitze'lxe' ex kyib'ajxe' kjela'ten kyile' tuk'i'l.

²⁰Qa ati jun makub' kẍe tuk'i'l t-xu'jil ttiy, tch'ixaw ttiy in eltiq'i'n; kyib'ajx kyjela' tenju' kyil: mixti'xte jun kyk'wal tzul ajkykyim.

²¹Qa ati jun makub' t-xu'jila'n t-xu'jil ttziky, tch'ixaw ttziky sel tiq'i'n. Mixyab'a'n te lu, ex mixti'x jun kyk'wal tzul ajkykyim.

²²Kyb'inchanqe'xe' nkawb'ile'; che japunx kyu'ne'. Laytzun che ex xla'ja'ntze' tu'nju' tx'otx' ja che pomela' wiq'i'ne' tu'n kyanq'ine' twitz.²³Lalun che'x lpeye' ti'ju' nkyb'incha'n xjal che elex nq'o'ne' kywitze'; tkyaqilju' ti'xti' lu intoq kyb'incha'n, qu'mtzun lay che ik'xtl wu'ne'.²⁴Kxel ntziya'ne' kyeye' qa aye'ye' che okyel tajawju' kytx'otx'; ayinku'we' kchin xel q'onteju' tb'anil tx'otx' lu toj kyq'ob'e'.
Ayine' Dyos Manb'aj, ẍin el pa'nkyeye' kyi'ju' txqantl tnam.²⁵Qu'mtzun ikxkye' ati tu'n tel kynik'e' kyi'ju' txkup ẍtilunqe' exqe' tz'ilqe', ex kyi'ju' pich' ẍtilunqe' exqe' tz'ilqe'. Lalun b'aj kytz'ilsa'n kyib'e' tu'n kypaju' txkup, pich' exqe' inche qitinje twitz tx'otx', ju' matxi' txi' nma'ne' kyeye' qa tz'ilqe'.²⁶Che okxe' xjan nwitze', qu'n xjan qinwe', ayine' Dyos Manb'aj, ex matxi' che elnpa'ne' kyxolju' txqantl tnam tu'n kyoke' te ntaname'.

²⁷Qa ati jun ichan mujqa qya spritist, mujqa ajpkab', ati tu'n kykub' b'yet toj ab'j ex kyib'ajx ta'ju' kykamik, chi Qman Dyos. Nuk'b'il kye pale

¹Tzaj tma'n Qman Dyos te Moyses ikjalu:
Q'manxa kye pale tyjajil Aaron tu'n lalun kytz'ilsa kyib' tu'ntpaj jun kywitze'l kyimnitl,²o'kx tu'n tok kymko'n jun kyimniju' qa kytxu, kyman, kyk'wal, kymyal, kytzik³mujqa kyanab' na'mx tmje najlix kyuk'i'l, qu'n na'mxna' tmje; maskye makytz'ilsa kyib' tu'n kpaju' lu.⁴Atzu'n qa jun kyimni kywitze'l mjeb'nil, mixti' tu'n tok kymko'n.

⁵Mixti' tu'n tel kyjon kywi', tu'n tel kyjso'n kyxmatzi, ex mixti' tu'n kyk'ixb'sante kyib',⁶naq o'kx tu'n tb'aj kyxjansa'n kyib' nwitze' ayine' Dyos Manb'aj ex mixti' tu'n tkub' kytxa'ju'n nb'iye', qu'n aye' che kb'el q'onteju' oyaj tz'e'ysa'n exju' wab'j nwitze'; qu'mtzun ati tu'n kyten xjansa'nqe'.

⁷Ex mixti' tu'n kymje tuk'i'l jun qya ajpajil, tuk'i'l jun qya b'ajni yaju'n, mujqa tuk'i'l jun qya kub'ni tpa'ntib' tuk'i'l tchmil, qu'n xjansa'nqe' nwitze'.⁸Pa'nqemila ti'j tkyaqil, qu'n aye' che kb'el q'onte wab'j nwitze'. Ex che okyel xjan teya, qu'n ayine' Dyos Manb'aj, xjan qine' ex ayine' inchin xjansankye.

⁹Qama tz'el twi' ajpajil tmyal jun pale, tch'ixaw tman sel tiq'i'n ex ati tu'n tkub' tz'e'yset itz'x.

¹⁰Matxi' tk'amju' kynejel pale toklen tu'n tok toksa'nju' t-xb'alun xjansa'n, qu'n matxi' jax q'etju' aseyt te xjansb'il toj twi'. Qu'mtzun mixti' tu'n ttenju' twi' chitpu'n ex mixti' tu'n t-xi' tlaqu'n t-xb'alun tu'n tpaj b'is;¹¹ex mixti' tu'n tokx jata' jun kyimni: maskye tman mujqa ttxu, tu'n lalun ttz'ilsatib'.¹²Mixti' tu'n tetz toju' njaye' xjan ex mixti' tu'n ttz'ilsante, qu'n oje kub' q'et aseyt te xjansb'il toj twi' tu'n tajb'en weye', ayine' Dyos Manb'aj.

¹³A t-xu'jilju' ktzajel tiq'i'n aju' na'mx txi' tzyu'n tu'n jun ichan.¹⁴Mixti' tu'n tmje tuk'i'l jun qya kyimni tchmil, kub'ni tpa'ntib' tuk'i'l tchmil, kub'ni yaju'n tu'n ichan, mujqa twi' ajpajil; a te k'okyelju' te t-xu'jil jun txin twitze'lx b'ajx txa' tzyu'n tu'n jun ichan,¹⁵tu'ntzun lalun kub' b'aju' tyajajil kyxolju' twnaqil; qu'n oje nxjansaye', ayine' Dyos Manb'aj, chi Dyos. Maqb'il tu'n miche oka' te pale

¹⁶Tzaj tma'n Qman Dyos te Moyses ikjalu:
Q'manxa te Aaron qa okxe'l qex ja'lo, lay txi' q'et anb'il te junju' tyajajil ati ttzakajil tu'n tkub' tq'o'nju' oyaj wab'j nwitze'.¹⁸Qu'n axxi'x, mix a'lo' jun ati ttzakajil tu'nwt tkub' tq'o'nju' lu: qa moẍ, kox, tzkaj ttxa'n mujqa t-ẍkyin,¹⁹qa toqjni tqan mujqa tq'ob',²⁰qa k'o'lti'j, tal b'o's twe', muj kyi'j twitz, ati ẍal ti'j mujqa b'je'tzni poq'li ti'j, mujqa tzkajqe'ju' tb'aq'.²¹Mix a'lo' jun tyajajilju' pale Aaron, ati ttzakajil tu'nwt kykub' tq'o'nju' oyaj nwitze' ju' inche tz'e'yset; myab'a'n tu'n kykub' tq'o'nju' oyaj wab'j nwitze' ayine' Dyos Manb'aj.²²B'a'n tu'n twanteju' oyaj lu, ex kyi'ju' xjanqe' ex xjanqe'xi'x,²³atzu'n ti'jxi'ju' xb'alun te aq'pub'l mixti' tu'n tokx ex mixti' tu'n tpon lq'e tk'etzju' q'olb'eb'l, tu'n lalun ttz'ilsa toklenju' njaye' xjan tu'n ttzakajil. Ayine' Dyos Manb'aj nchin xjansante, chi Dyos.

²⁴Aye'xtzun yol ja'lu xitma'n Moyses te Aaron, kye tk'wal ex kye kykyaqil aj Israel. O'qe'kxju' b'a'n kywan kyi'ju' oyaj te Qman Dyos

¹Tzaj tma'n Qman Dyos te Moyses ikjalu:
Q'manxa te Aaron ex kyeju' tyajajil tu'n tten kyxob'il kyi'ju' ti'xti' xjan intzaj kyq'o'n aj Israel weye', tu'ntzun lalun kub' kyaju'nju' nb'iye' xjan. Ayine' Dyos Manb'aj.

³Kxe'l qex ja'lo, alkyexku' jun kyyajajil tz'ilsa'ntib' mache kub' tq'o'nju' ti'xti' xjanqe' nwitze' ju' intzaj kyiq'i'n aj Israel weye', ati tu'n tel toklen nwitze'. Ayine' Dyos Manb'aj.

⁴Qa ati jun tyajajil Aaron yab' tu'n xlemtx'a'k mujqa in qojl ij twi' ttz'a'lb'il, lalun txi' twanju' ti'xti' xjan tzmaxi'j aj t-ẍtilset.
Alkye matxi ttzyu'n jun ti'xti' tz'il tu'n jun kyimni mujqa matxi ttzyu'n jun yab' tu'n ij inel qojl twi' ttz'a'lb'il,⁵mujqa aju' matz'ilix tu'nju' xittzyu'n jun txkup nqititinje mujqa matz'oktmko'n jun ichan tz'il tu'n alkyexku' tz'il,⁶kjelten tz'il tzmaxi'j ajqok yupj, ex mixti' tu'n twanteju' ti'xti' xjanqe' qa na'mxtoq ttxjontetib' tu'n a'.⁷Kẍtilsetelxi' ajxi' tku'x q'ij, b'a'ntzun twantz kyi'ju' ti'xti' xjanqe', qu'n ana' twaju'.⁸Mixti' tu'n tch'yonte tchib'jil jun txkup kyimnitl mujqa jun alu'mj b'ajni tzaqu'n tu'n jun tojk'ul txkup, tu'ntzun lalun ttz'ilsatib' tu'n. Ayine' Dyos Manb'aj inchin q'mante.

⁹Q'manxa kye tu'n tjapunju' nchaq'b'ile' kyu'n tu'ntzun lalun kyejten il kyib'aj tu'n tpaj qa min xxi' kyb'incha'n, laytzun che kyimtz. Ayine' Dyos Manb'aj, ẍin xjansankye.

¹⁰Mixalokyex jun mya pale tu'n twanteju' xjansa'n.
Qa jun tulaju' pale mujqa jun tmajin, mixti' tu'n t-xi' twanju' xjansa'n.

¹¹Qama tloq'ju' pale jun tmajin tu'n tmedi, aju' tmajin lq'o'n b'a'n tu'n twanteju' wab'j xjansa'n. Ex b'a'n tu'n kywanju' itz'jniqe' toj tja pale ti'ju' twa.

¹²Qa mjeb'niju' tmyal pale tuk'i'l jun ichan mya pale, mixti'tl tu'n twan kyi'ju' oyaj inxi' kyeju' pale.¹³Qatzun kyimnitl tchmil mujqa kub'ni tpa'ntib' tuk'i'l tchmil, qa mixti' tal, ex matz'anjtzti'j toj tja tman kse'nx na'mxtoq tmje, b'a'n tu'n twan ti'ju' twa tman. Aye'tzu'n mya paleqe' mixti' tu'n kywante.

¹⁴Qa ati jun matxi twanju' wab'j xjan ex min b'in tu'n qa xjan, ati tu'n t-xi' tq'o'n t-xe'lju' xb'aj twanteju' pale tuk'i'l jun tjwe'yi'n tnejtl;¹⁵lalun kyaq'ju' pale anb'il tu'n tkub' kytxa'ju'n aj Israel ti'xti' xjan nche kub' q'o'n nwitze',¹⁶tu'ntzun lalun kyejten taq'wix kyib'aj tu'n tpaj qama txi' kywanju' wab'j xjan. Ayine' Dyos Manb'aj ẍin xjansankye, chi Dyos. Nuk'b'il kyi'j alu'mj che kxe'lq'et te Qman Dyos

¹⁷Tzaj tma'n Qman Dyos te Moyses tu'n t-xitma'n kye Aaron kyuky'i'lju' tk'wal ex kye kykyaqil aj Israel kjalu:
Qa ati jun aj Israel mujqa jun te najchaq xjal najliqe' kyxole', makub' tq'o'n jun alu'mj te chojb'il k'ok'sb'il nwitze', qa tu'n tjapun jun yol tziya'ntl mujqa jun oyaj tu'n tk'u'j,¹⁹ati tu'n tkub' tq'o'n jun tman mixti' ttzakajil tu'ntzun tk'met te. Qa jun tman wakx, jun qpoj tman rit mujqa jun tman chib',²⁰naq o'kx mya jun alu'mj ati ttzakajil, qu'n lay k'met te.

²¹Alkyexku' makub' tq'o'n jun chojb'il te b'inchjtib'il nwitze', qa tu'n tjapun jun yol tziya'ntl mujqa jun oyaj tu'n tk'u'j, ati tu'n kykub' tq'o'n tma wakx mujqa ttxu rit mixti' kytzakajil tu'ntzun kyk'met te.²²Lalun che tzaj kyq'o'ne' alu'mj weye' moẍqe', k'ixb'niqe', koxqe', tx'a'k kyi'j, ẍal kyi'j mujqa b'je'tzni poq'li kyi'j, ex lalun che tzaj kyq'o'ne' weye' te oyaj tz'e'ysa'n tib'aj q'olb'eb'l.²³Qa te jun oyaj tu'n kyk'u'je', b'a'n tu'n kyq'onteye' jun tman wakx mujqa jun tma rit mya junelniqe' tqan, qatzun tu'n tjapun jun yol tziya'ntl lay k'met kyeye'.²⁴Ex mixti' tu'n kytzaj kyq'o'ne' alu'mj weye' k'ixb'niqe' kyb'aq', b'ajni tx'no'n, etzni xb'oqi'n mujqa elni jon. Lalun kyb'incha'juye' lu toj kytx'otx'e'.²⁵Ex mixti' tu'n kyk'monteye' alu'mj ikju' te jun najchaq xjal tu'n ttzaj kyq'o'ne' weye', qu'n tzkaj alu'mjqe' ex lay che k'met kyeye', chi Dyos. Nuk'b'il tu'n kykub'yetju' alu'mj che kxe'lq'et te Dyos

²⁶Tzaj tma'n Qman Dyos te Moyses ikjalu:

²⁷Ajtitz'ji jun qpoj tman wakx, jun qpoj tman rit mujqa jun qpoj tman chib', ati tu'n tkyejten wuq q'ij tk'etzju' ttxu, tojtzunju' twajxaqi'n q'ij b'a'n tu'n tk'met tu'n tkub' tz'e'yset te oyaj weye'.

²⁸Lalun kub' kyb'yo'ne' jun ttxu wakx mujqa ttxu rit tuk'i'lxi' tal toj jun q'ijx.

²⁹Ajttzaj kyq'o'ne' jun oyaj te aq'b'il chjonte weye', kyb'inchame' toj tu'me'l tu'ntzun nk'monteye'.³⁰Expe' kych'yonxe' ax q'iju' ex lalun kyej kyq'o'ntle' te jun q'ijtl. Ayine' Dyos Manb'aj nchin q'mante.

³¹Kyb'inchanqe'xju'ye' nchaq'b'ile'; che japunx kyu'ne'. Ayine' Dyos Manb'aj.

³²Lalun kub' kytxa'ju'ne' nb'iye' xjan, tu'ntzun wokye' xjan kyeye'. Ayine' Dyos Manb'aj, matxi che nxjansaye'³³ex oje che etz wiq'i'ne' toj Ejipt tu'n kyk'ulune' weye'. Ayine' Dyos Manb'aj, chi Dyos. Ninq'ij toj kyokslab'l aj Israel (Nm 28.16-25)

¹Tzaj tma'n Qman Dyos te Moyses tu'n t-xitma'n kye aj Israel kjalu:
Aye' ninq'ij ja'lu nim kyoklen tu'n kyk'ulune' weye', ex a tb'iju' k'okyel kyq'o'ne' b'uyjtib'il xjan.

³Waqaq q'ij kche aq'unale', atzu'n toj twuqi'n q'ij mixti' tu'n kyb'inchante jun aq'untle'; jun q'ijte' te ojlab'l nim toklen ex tu'n tten jun b'uyjtib'il xjan. Jaxjaku' mache najane', te ojlab'l te' q'ij lu te ninb'ilweye'.

⁴Aye'tzun q'iju' nimaq kyoklen tu'n kykub' ik'setju' b'uyjtib'il xjan te ninb'ilweye', aye' q'iju' ati tu'n kyb'u'yinte kyib'e':

⁵Toj tkyajlajoji'n q'ij teju' tnejel xjaw, ajtok qale, kb'el kyik'sa'ne' Q'ij te Tzaqpib'l te ninb'ilweye'.

⁶Atzu'n toj tjwe'lajoji'n q'ij texju' xjaw lu, kb'el kyik'sa'ne' tq'ij wab'j mixti' ttx'amal te ninb'ilweye'. Wuq q'ij tu'n kywanteye' wab'j mixti' ttx'amal.⁷K'okyel jun b'uyjtib'il xjan kyu'ne' toju' tnejel q'ij. Mixti' tu'n kyb'inchante jun aq'untle'.⁸Wuq q'ij ati tu'n kytz'e'ysanteye' chojb'il nwitze', tojtzu'n twuqi'n q'ij k'okyel jun b'uyjtib'il xjan kyu'ne'. Mixti' tu'n kyb'inchante jun aq'untle', chi Dyos. Tq'ij tnejel twitz awal (Nm 28.26-31)

⁹Tzaj tma'n Qman Dyos te Moyses tu'n t-xitma'n kye aj Israel kjalu:
Ajkyokxe' toju' tx'otx' kxe'l nq'o'ne' kyeye', aj tjawju' twitz kytriye', ati tu'n tpon kyiq'i'ne' tnejel manoj teju' pale.¹¹Tetzun juntl q'ij tik'lenxi' q'ij te ojlab'l, kb'el tq'o'nju' pale nwitze' te jun oyaj tb'anilxi'x, tu'ntzun tk'met kyeye'.¹²Ax q'iju' ajttzaj kyq'o'ne' manoj triy, ktzajel kyq'o'ne' jun qpoj tman rit te jun ab'q'i mixti' ttzakajil, te jun chojb'il k'ok'sb'il te ninb'ilweye'.¹³Ex ktzajel kyiq'i'ne' ch'inxmi lajoj lib'r tb'anil arin xyuq'i'n tuk'i'l aseyt, tu'n tkub' kyq'o'ne' nwitze' te jun oyaj tz'e'ysa'n tb'anil tk'ok'jal. Ex ktzajel kyiq'i'ne' jun litr b'in te jun oyaj tu'n tkub' qet.¹⁴Lalun che wan wab'je', triy ch'i'li'n mujqa cha'x, tzmaxi'j ajttzaj kyiq'i'ne' kyoyaje' weye'. Jun kawb'ilte' lu majx kjelten, ex kjel kyma'ne' kye kyk'wale' jaxjaku' mache najane'.

¹⁵Textzunju' q'ij ajttzaj kyq'o'ne' jun manoj triy te jun oyaj tb'anilxi'x, tik'lenxi'ju' q'ij te ojlab'l, kxel kyajla'ne' wuq smanxi'x.¹⁶Ajtzun tjapunju' twuqi'n sman tuk'i'lxi' juntl q'ij tik'lenju' q'ij te ojlab'l, kjapumel b'aj kab'wnaq lajoj (50) q'ij. Kb'eltzun kyq'o'n kyoyajtze' ak'a'j twitz triy nwitze',¹⁷ex ktzajel kyiq'i'ne' kab'e' wab'j b'incha'n tu'n tb'anil arin tzq'ajsa'n tuk'i'l ttx'amal, ch'inxmi b'eljoj lib'r talal junjun, te jun oyaj weye' tb'anilxi'xte tnejel twitz awal.¹⁸Che ktzajel kyiq'i'ne' kab'e' wab'j junx kyuk'i'l wuq qpoj tman rit te jun ab'q'iqe' mixti' kytzakajil, jun tman wakx ex kab'e' tman rit, te chojb'il k'ok'sb'il te ninb'ilweye', te jun oyaj tz'e'ysa'n tb'anil tk'ok'jal, tib'ajxi'ju' kyoyaje' ti'j twitz awal k'ok'e'kywitz ex ti'j b'in.

¹⁹Ex ikx kb'el kyq'o'ne' jun chib' te chojb'il tu'n tpaj il, ex kab'e' qpoj tman rit te jun ab'q'iqe' te chojb'il te b'inchjtib'il.²⁰Che kb'eltq'o'n paleju' alu'mj te jun oyaj tb'anilxi'x nwitze', junx tuk'i'lju' wab'j te tnejel twitz awal ex kab'e' qpoj tman rit. Kche xjansetel nwitze' teju' pale.

²¹Ati tu'n tkub' kyq'o'ne' jun b'uyjtib'il xjan tojxju' q'ij lu, ex mixti' tu'n kyb'inchanteye' jun aq'untl. Jun kawb'ilte' lu majx kjelten kyeye' ex kye kyk'wale' toj wiqi'nwiq jaxjaku' mache najane'.

²²Ajtjaw twitz kyawale', lalun majx tek' jawju' twitz kyawale' twitzju' kytx'otx'e' ex lalun che oktene' sakwilteju' t-spiyil triy nkyaj tz'aqi. Kyq'onkje' kye prow ex kye najchaq xjal. Ayine' Dyos Manb'aj nchin q'mante, chi Dyos. Kyq'ij chun (Nm 29.1-6)

²³Tzaj tma'n Qman Dyos te Moyses tu'n t-xitma'n kye aj Israel kjalu:
Kb'el kyik'sa'ne' jun q'ij te ojlab'l ex jun b'uyjtib'il xjan te nab'ab'l tuk'i'l chun toj tnejel q'ij teju' twuqi'n xjaw.²⁵Ati tu'n tkub' kytz'e'ysa'ne' jun oyaj te ninb'ilweye', ex mixti' tu'n kyb'inchante jun aq'untle', chi Dyos. Tq'ij najsb'il (Nm 29.7-11)

²⁶Tzaj tma'n Qman Dyos te Moyses ikjalu:

²⁷Tq'ij Najsb'il toju' tlajoji'n q'ij texju' twuqi'n xjaw. Ati tu'n tkub' kyik'sa'ne' jun b'uyjtib'il xjan, ex tu'n kymewayine' teju' q'ij lu, ex tu'n tkub' kytz'e'ysa'ne' jun oyaj te ninb'ilweye'.²⁸Lalun kyb'incha jun aq'untle' toju' q'ij lu, qu'n Tq'ij Najsb'ilte', a q'iju' tu'n tknet najsb'il kyile' nwitze' ayine' Dyos Manb'aj.²⁹Alkyexku' jun min xmewayin teju' q'ij lu, ati tu'n tex xla'jet toj ttanam.³⁰Ex alkyexku' jun matzaq'unan teju' q'ij lu, knajel wu'ne' toj ttanam.

³¹Lalun kyb'incha jun aq'untle'. Jun kawb'ilte' lu majx kjelten kyeye', ex kjel kyma'ne' kye kyk'wale' toj wiqi'n jaxjaku' mache najane'.³²Ati tu'n tokju' q'ij lu kyu'ne' te ojlab'l ex te mewayi'n, kxel qe kyu'ne' ajtok qale teju' tb'eljoji'n q'ij teju' xjaw ex kb'ajelxi' ajtok qale te juntl q'ij, chi Dyos. Kyq'ij pach tq'ob' tze (Nm 29.12-40)

³³Tzaj tma'n Qman Dyos te Moyses tu'n t-xitma'n kye aj Israel kjalu:
Kxel qeju' ninq'ij kyeju' pach tq'ob' tze toju' t-o'lajoji'n q'ij texju' twuqi'n xjaw, wuq q'ij kb'el kyik'sa'ne' te ninb'ilweye',³⁵k'okyel jun b'uyjtib'il xjan kyu'ne' toju' tnejel q'ij. Lalun kyb'incha jun aq'untle'.³⁶Kb'el kytz'e'ysa'ne' oyaj te ninb'ilweye' toju' wuq q'ij lu, atzu'n toj twajxaqi'n q'ij kb'el kyik'sa'ne' jun b'uyjtib'il xjan ex kb'el kytz'e'ysa'ne' jun oyaj te ninb'ilweye'. Jun ninq'ijte', mixti' tu'n kyb'inchante jun aq'untle'.

³⁷Aye'tzun q'iju' nim kyoklen tu'n njaw kynima'ne' ayine' Dyos Manb'aj, ati tu'n tok b'uyjtib'il xjan kyu'ne' ex kb'el kyq'o'ne' oyaj tz'e'ysa'n weye' kyoju' q'ij lu, e'chojb'il k'ok'sb'il, oyaj kywitz awal k'ok'e'kywitz, chojb'il ex oyaj b'in, kse'nxju' q'ij in ik'set,³⁸kyib'ajxi'tlju' q'ij te ojlab'l te ninb'ilweye' ex kyi'jxi'tlju' q'ij tu'n kykub' q'etju' oyaj tziya'ntl kyu'ne' weye' mujqa tu'n kyk'u'je' tu'n kyq'onteye'.

³⁹Toj o'lajoj q'ij tajlalju' twuqi'n xjaw, tb'ajlenxi' kyb'u'yi'nju'ye' twitz kyawale', kb'el kyik'sa'ne' jun ninq'ij te wuq q'ij te ninb'ilweye', tuk'i'l ojlab'l te tnejel q'ij ex twajxaqi'n q'ij.⁴⁰Toju' tnejel q'ij ktzajel kyiq'i'ne' lob'j kywitz tb'anil tze, kyxaq tut ex tb'anil tze ex e'chjaj toj nin a', ex che tzalajel wuq q'ije' nwitze'.⁴¹Atl junjun ab'q'i toj twuqi'n xjaw, kb'el kyik'sa'ne' jun ninq'ij te wuq q'ij te ninb'ilweye'. Jun kawb'ilte' majx kjelten ex kjel kyma'ne' kye kyk'wale'.⁴²Tojtzu'n wuq q'ij lu kykyaqile', aj Israel qe'ye' kyitz'jlenxe', che tenb'ele' toj pach b'incha'n tu'n tq'ob' tze,⁴³Tu'ntzun kyb'inte kykyaqilju' kyyajajile' qa e'najanpun aj Israel wu'ne' toj pach tq'ob' tze tej kyetzwiq'i'ne' toj Ejipt. Ayine' Dyos Manb'aj, chi Dyos.

⁴⁴Iktzun xitma'n Moyses kye aj Israel alkyechaq tq'ijlalil nim kyoklen tu'n kyok teku' Qman Dyos. Aseyt tu'n tajb'en kyoj kantil (Ex 27.20-21)

¹Tzaj tma'n Qman Dyos te Moyses ikjalu:

²Q'manxa kye aj Israel tu'n ttzaj kyiq'i'n aku' aseyt olib'o, tu'n tajb'en kyeju' kandil tu'n kyk'ant kukxju'.

³A Aaron kb'inchalkye tu'ntzun kyk'ant nwitze' ajtb'aj qonik'an toju' Ja te Mujb'ab'ltib'il, ti'jxi'ju' xb'alun maqb'il teju' kax k'ub'lteju' yol kyejni b'entti'j. Jun kawb'ilte' lu majx kjelten kyeye' ex kjel kyma'ne' kye kyk'wale'.⁴Kb'elix tb'incha'n kytenju' kandil toju' kykb'el q'anpwaq ttx'otx'al tu'ntzun kyk'ant nwitze'. Wab'j nkub' q'et twitz Qman Dyos

⁵Q'intza tb'anil arin ex tzq'ajsama kab'lajoj (12) muqin, ch'inxmi lajoj lib'r talal junjun,⁶ex q'onqeku'ya tib'aju' mes q'anpwaqile tkub' nwitze', kab'e' txol te waqaqchaq wab'j junjun txol.⁷Ex q'onku'ya sturakxi'x tib'aj junjun txol, tu'n tajb'en teju' wab'j te jun oyaj te nab'ab'l tz'e'ysa'n te ninb'ilweye'.⁸Ati tu'n kykub' q'etju' lu nwitze' atl junjun q'ij te ojlab'l, te jun yol kyejni b'entti'j kyu'n aj Israel tejumajx.⁹Te Aaron che kxe'la' wab'j lu ex kye tyajajil, ati tu'n t-xikywan toj jun najb'il xjan, qu'n a xjanxi'xju' kyxolju' oyaj nche kub' tz'e'yset te ninb'ilweye', chi Dyos. Tz'e'ysb'il kywitzju' nche yolin myab'a'n ti'j Dyos

¹⁰Atitoq jun ichan kyxol aj Israel, aj Israel ttxu atzu'n tman aj Ejipt. Selomit tb'iju' ttxu, tmyal Dib'ri, tyajajil Dan. Jaw q'ojinju' ichan lu tuk'i'l jun aj Israelx toju' kypach, tojtzunju' lu tmaju' ichan talju' qya aj Israel jun yol taq'wix ti'j Qman Dyos. Xiq'i'ntzuntz twitz Moyses,¹²ex kub' kyxq'uqi'n akx intzaj tma'n Qman Dyos titi' tu'n kyb'inchante.¹³Atzunte Qman Dyos tzaj tma'n te Moyses ikjalu:

¹⁴Iq'imitza xq'mante taq'wix wi'je' ti'jxi'ju' najb'il; kykyaqilju' ẍe b'inteju' tyol kb'el kyq'o'n kyq'ob' tib'aj twi', ex kykyaqilju' tnam che kb'el b'yonte toj ab'j.¹⁵Ex q'manxa kye aj Israel qa alkyexku' mayolin taq'wix wi'je' ayine' Dyos Manb'aj, tib'ajx kjela' tenju' til ex ati tu'n tkyim toj ab'j kyu'n kykyaqilju' tnam. Qa jun najchaq xjal mujqa aj Israel, qama tma jun taq'wix ti'ju' nb'iye', ati tu'n tkyim.

¹⁷Alkye matz'el q'inte tchwinqlal juntl xjal, ati tu'n tkyim.

¹⁸Alkye makub' b'yonte talu'n juntl, ati tu'n t-xi' tq'o'n t-xelju' alu'mj.

¹⁹Alkye matz'oktb'incha'n taq'wix te jun twnaqil, ex ati tu'n tokb'inchet taq'wix te kse'nxju' xtb'incha:²⁰ktoqetel tu'n tpaj toqb'en, k'eletz iq'et twitz tu'n tpaj twitz juntl, k'eletz twitzte tu'n tpaj witzteyj, ati tu'n tb'inchet ti'jku' kse'nxju' matb'incha te juntl.

²¹Alkye makub' b'yonte talu'n juntl, ati tu'n t-xi' tq'o'n t-xel. Alkye makub' b'yonte jun xjal, ati tu'n tkub' b'yet.

²²Ax kawb'ilju' k'ajb'el kyeju' najchaq xjal ex kye aj Israel. Ayine' Dyos Manb'aj nchin q'mante, chi Dyos.

²³B'ajxtzun tma'n Moysestz kye aj Israel, aye'tzunkye etzkyiq'i'nju' q'mante taq'wix ti'j Dyos toju' najb'il jate'qe'toq, kub' kyb'yo'ntzuntz atzu' toj ab'j. Kyb'incha aj Israel kse'nxju' tchaq' Qman Dyos te Moyses. Ab'q'i te ojlab'l ex ab'q'i te tzaqpib'l

¹Tzaj tma'n Qman Dyos te Moyses twi' witz Sinayi tu'n t-xitma'n kye aj Israel kjalu:
Ajkyokxe' toju' tx'otx' kxe'l nq'o'ne' kyeye', ati tu'n tojlanju' tx'otx' te ninb'ilweye'.³B'a'n tu'n kyawan waqaq ab'q'iye' twitzju' kytx'otx'e'. Ikx waqaq ab'q'i tu'n kypodarinteju'ye' tqan kylob'aje' ub'a ex tu'n kyb'u'yinteye' twitz,⁴atzu'n twuqi'n ab'q'i ati tu'n tojlanju' tx'otx' te ninb'ilweye'; lalun che awane' twitzju' kytx'otx'e' toju' ab'q'i lu ex lalun kypodari kylob'aje' ub'a.⁵Ex lalun jaw kych'umi'ne' triy intzaj ch'iy tu'nxtib' tjawlenxi'ju' b'ajsb'il kyawale', ex lalun jaw kyb'u'yi'ne' twitz lob'j ub'a mya podari'n kyu'ne'; ati tu'n tojlanju' tx'otx' b'a'nxi'x.⁶Kkanunelte' tawalju' tx'otx' ktzajel ch'iy tu'nxtib' toju' tojlab'l te kywaye', kywaju' kymajine' ichan ex qya, kywa aq'unal ex kywaju' te najchaq xjal najliqe' kyuk'i'le',⁷kywaju' kyalu'ne' ex kywaju' tojk'ul txkup toju' tx'otx'. Tkyaqil tawalju' tx'otx' matzaj ch'iy k'ajb'el te kywaye'.

⁸Ati tu'n t-xi' kyajla'ne' wuq sman ab'q'i, mujqa wuq maj wuq ab'q'i, oktzun kjapumel tajlaltz toj kab'naq b'eljoj (49) ab'q'i,⁹Tojtzun tlajoji'n q'ij teju' twuqi'n xjaw, ju' Tq'ij Najsb'il, kxel kyq'ajtza'ne' tuk'a rit toj tkyaqilju' tx'otx'.¹⁰Atzunju' Tkab'naqlajoji'n (50) ab'q'i k'okyel kyu'ne' te xjan: k'okyel te ab'q'i te tzaqpib'l, ex ati tu'n tex kyma'ne' tqanilju' tzaqpib'l kye kykyaqilju' xjal najliqe' toju' tx'otx' toju' ab'q'i lu. Kykyaqilju' xjal k'anjelkyi'j kyk'etzju' kywitze'l ex che okyel jumajtl tajawju' kytx'otx'.¹¹K'okyelju' tkab'naqlajoji'n (50) ab'q'i kyu'ne' te ab'q'i te tzaqpib'l, ex lay che awane' toju' ab'q'i lu ex lalun jaw kychmo'ne' triy intzaj ch'iy tu'nxtib' ex lalun kypodariye' tqan ky-ub'aye' ex mixti' tu'n kychmonteju'ye' twitz,¹²Qu'n xjante' ab'q'i lu ex te tzaqpib'l kyeye'. O'kx kxel kywanju'ye' o'kxju' ktq'a'ju' tx'otx' tu'nxtib'.

¹³Tojtzunju' ab'q'i te tzaqpib'l lu kykyaqilxe' kb'el kytzyu'n jumajtlju'ye' kytx'otx'e'.¹⁴Qa ati jun mak'ayin mujqa malq'on ttx'otx' te juntl xjal, lalun kyb'incha jun sb'ujtib'il ti'j;¹⁵ati tu'n tchjonteju' kloq'ol kse'nxju' tab'q'iyil matxitoq tzik' tik'lenxi'ju' ab'q'i te tzaqpib'l, exju' kk'ayil ati tu'n tqaninte kse'nxju' jte'tl ab'q'i tu'n tjaw awal:¹⁶qa atix b'a'npun ab'q'itl tu'n tjaw twitz awal, wi'yilx ch'i'ntl twi'; qatzun naqjte'x ab'q'itl, ex naqjni'x ch'i'ntl twi', qu'n ate in k'ayetju' aju' jte' ab'q'i tu'n tjaw twitz awal twitz.

¹⁷Lalun kub' kysb'u'n kyib'e' jun te juntl, kyyek'ume' ninb'il nwitze', qu'n ayine' Dyos Manb'aj.¹⁸Che japunxju' nkawb'ile' kyu'ne', kyb'inchamqe'ye' nnuk'b'ile'. Che japunx kyu'ne', che anq'iltzuntze' toj nak'b'il toju' tx'otx';¹⁹ktq'a' te tx'otx' tawal, kche anq'ile' toj nak'b'il twitz ex che wale' ti'ju' tawal tzmaxi'j aj kynoje'.

²⁰Qajlo in kyxima'ne': ¿Ti'tzu'n kxel qwan toju' twuqi'n ab'q'i, qa lay qo awan ex lay qo b'uyin twitz qawal? qa chechiye'.²¹Ktzajel nq'o'nwe' nb'anq'ob'e' toju' twaqaqi'n ab'q'i, exju' twitz kyawale' kjawil kab'alx te oxe' ab'q'i;²²kche waltzuntze' ti'ju' twitz awal k'u'n akx inche awan jumajtle' toj twajxaqi'n ab'q'i, expe' kche wale' ti'j toju' tb'eljoji'n ab'q'i, akx inpon tq'ijlalil tu'n tjaw kyb'uyi'ne' twitz kyawale'.

²³Lay b'ent tk'ayetju' tx'otx' tejumajx: wewe' tx'otx', aye'tzunkye' naq ajb'etu'nqe'ye' twitz, naq ulaqe'ye' weye'.²⁴Tu'ntzunju', alkyexku' kytx'otx'e', ati tu'n kyq'onteye' anb'il kyeju' tnejel tajaw tu'n kylq'onte jumajtl.

²⁵Qa ati jun kywnaqile' makyej toj prowil ex makyej tk'a'yi'n ttx'otx' kyeye', aju' twitze'l atixi'x kylontekyib' tuk'i'l b'a'n tu'n tkolpilteju' ojetoq tk'ayiju' twitze'l.

²⁶Qatzun ati jun mixti' jun twitze'l tu'n tkolpinteju' ttx'otx' exqa mab'ent tu'nx tu'n tel tkolpi'n,²⁷kxel ximetju' tq'ijlalil matxi' tzik'xi' t-xilen tk'a'yi'n, k'anjel tanjsa'n ti'ju' twi' tx'otx' teju' lq'onte jte' kpomila' tajlal jte' ab'q'itl tu'n tulju' ab'q'i te tzaqpib'l, ex ktzyetel jumajtlju' ttx'otx'.²⁸Qatzun min xb'uyetju' medi tu'n, tu'n tkotpetju' ttx'otx', kjel tentzun tx'otx'tz teju' loq'ol tzmaxi'j ajtul kanunju' ab'q'i te tzaqpib'l, tzmaxitzun ktzaqpetel te tx'otx'tz, atzunju' k'ayinte kttzyu' jumajtlju' ttx'otx'.

²⁹Qa ati jun matk'ayi jun ja toj nintnam tok tapi ti'j, ati toklen tu'n tlq'onte jumajtl toj jun ab'q'i t-xilenxi' tk'a'yi'n.³⁰Qatzun min xb'ent tkolpetju' ja toj jun ab'q'i, kjeltzuntz tejumajx teju' lq'onte ex kye tk'wal. Lay b'ant ttzaqpet toju' ab'q'i te tzaqpib'l.³¹Aye'tzu'n ja toj tnam min tok tapi kyi'j ikx che okyela' kse'n tx'otx' toj kojb'il; b'a'n tu'n kykolpet ex tu'n kytzyet jumajtl toju' ab'q'i te tzaqpib'l.

³²Ati kyoklen aj Leb'i kukxju' tu'n kylq'onte jumajtlu' ja ate' kyoju' nimaqkytanam.³³Qa jun aj Leb'i kkolpilte, kjel ttzaqpi'n loq'olu' ja toju' ab'q'i te tzaqpib'l ex tu'n tpon aj Leb'i toju' tetzb'il toj nintnam, qu'n o'kxte kyetzb'il aj Leb'iju' kyxol aj Israel o'kxju' kyja ati toj ninkytanam.³⁴Mixti' tu'n kyk'ayetju' tx'otx' kyi'jile ninkytanam aj Leb'i, qu'n kyetzb'ilqe' tejumajx.

³⁵Qa ati jun kywnaqile' makyej toj prowil ex mapon kyuk'i'le', ati tu'n kyonine' ti'j kse'n jun te najchaq xjal toj b'e ex tu'n t-xi' kyiq'i'ne' kyjaye'.³⁶Lalun tz'el kyqani'n ti'xti'ye' te ex lalun kyqaniye' tub'chilju' tch'ex qama t-xi' kyq'o'ne'; che xob'pekye' nwitze' ex kyk'mome' kywnaqile' tu'n tten kyjaye'.³⁷Lalun kyqani tub'chilju'ye' ch'ex medi qama txi' kyq'o'ne', ex lalun jax kych'isa'ne' twi'ju' twa kxel kyq'o'ne'.³⁸Qu'n ayinwe' Dyos Manb'aj, inetz q'inkyeye' Ejipt tu'n t-xinq'o'ne' tx'otx' kanaan kyeye' ex tu'n kyk'ulune' weye'.

³⁹Qa ati jun kywnaqile' makyej toj prowil ex kyk'etze' ta', ex matk'ayitib' kyeye', lalun tz'aq'unan kyu'ne' te jun majin lq'o'n;⁴⁰kyq'onke' kse'n jun aq'unal mujqa jun ula. K'aq'unal kyuk'i'le' tzmaxi'j ajtul kanunju' ab'q'i te tzaqpib'l,⁴¹k'ik'el b'ettzuntz kyjaye' ex kxe'l kyuk'i'lxi'ju' tk'wal tu'n tpon jumajtl kyuk'i'lju' twitze'l toju' ttx'otx';⁴²qu'n nmajin qewe'; ayine' netz q'inkye Ejipt ex mixti' tu'n kyk'ayet te majin.⁴³Lalun che oktene' yajulkye; che xob'x pekye' nwitze'.

⁴⁴Qa kyajb'ile' tu'n kyten kymajine' ichan mujqa qya lq'o'nqe', kylq'onqe'tze' kyoju' txqantl nimaqtnam ate' kyi'jileye'.⁴⁵Ex b'a'n tu'n kylq'onteye' te najchaq xjal najliqe' kyxole', exqe'ju' kyk'wal mache itz'ji akx ate'qe' toj kytx'otx'e'; aye'tzun b'a'n tu'n kylq'onteju'ye'⁴⁶ex tu'n kykyaj kyq'o'ne' te kyetzb'il kyk'wale' aj kykyime'; kche ajb'el kye kukxju'. Atzunkye' aj Israel, mixti' junkye' tu'n tkawin ex tu'n tkub' kyyaju'n kytzike' mujqa kyitz'ine' kyyajajilxe'.

⁴⁷Qa ati jun najchaq xjal najli toj kytx'otx'e' majaw q'inumax, atzun jun kywnaqile' tb'esinju' najchaq xjal makub' prowix ex matxi tk'a'yi'ntib' teju' najchaq xjal lu, mujqa te juntl najchaq xjal,⁴⁸ati toklen tu'n tlq'etju' tzaqpib'l te maskye t-xilenxi' tk'a'yi'ntib'. Kb'antel tkolpetl tu'n jun ttzik,⁴⁹tu'n jun ttiy, tu'n jun tk'wal ttiy mujqa tu'n alkyexku' juntl twitze'l nqaku' ta'; ex ikx kb'antel tkolpintetib' tu'nxtib', qa ati tu'me'l tu'n,⁵⁰kxel t-xima'n junx tuk'i'lju' lq'onte, tzajx toju' ab'q'i tk'a'yintetib' kpomelx toju' ab'q'i te tzaqpib'l: ax twi'ju' kse'nxju' kyajlal ab'q'i, ex jte'xi' ab'q'i matxi tz'aq'unanxi' kxel ximet kse'nxju' twikyk'u'j aq'unal.⁵¹Qa atix b'a'npun ab'q'itl tu'n tjapun, axtzun kxel ximetju' jni' kxe'l tq'o'n te kotpib'lte ti'ju' pwaq tk'am tej t-xi' tk'a'yi'ntib';⁵²qatzun naq jni'xtl tu'n tul kanunju' ab'q'i te tzaqpib'l, a kxel tq'o'nju' te kolpib'lte o'kxju' te jte'tl tq'ijlalil tu'n tjapun.⁵³Ik k'okela'ju' kse'n jun aq'unal in b'entti'j tu'n taq'unan te jun ab'q'i; lalun kyaje' tu'n tyajunjtz.

⁵⁴Qatzun min xb'ent tkolpet toju' tq'ijlalil lu, ktzaqpetel toju' ab'q'i te tzaqpib'l junx kyuk'i'lju' tk'wal,⁵⁵qu'n nmajin qewe' aj Israel, nmajin qeku'xi'xe'; ayine' inetz q'inkyeye' Ejipt. Ayine' Dyos Manb'aj. Ky'i'wb'il kye b'a'n che b'in (Dt 7.12-24; 28.1-14)

¹Lalun che kub' kyb'incha'ne' witzleb' ex tilb'ilal; lalun che jaw kyb'incha'ne' ab'j toj kytx'otx'e' xjanqe'wt ex ab'j tz'ib'a'n twitz; lalun che nimane' kywitz, qu'n ayinwe' Dyos Manb'aj.²Kynimanku'ye' q'ij te ojlab'l; che nimanqe'ye' teju' njaye' xjan: ayinwe' Dyos Manb'aj.

³Qama che'x lpeye' kyi'ju' nkawb'ile' exqa mache japun nchaq'b'ile' kyu'ne', ex nche kyb'incha'ne',⁴ktzajel nq'o'ne' jb'al tojxi'x tq'ijlalil, atzunju' tx'otx' exqe'ju' tze kkyq'a' kywitz;⁵atitzun kytriytze' tzmaxi'j ajtul tq'ij lob'j ub'a, ex ati ub'a tzmaxi'j ajtul tq'ij awaj awal; kche wal wab'je' tzmaxi'j aj kynoje', ex kqeb'el kyk'u'je' toju' tx'otx'.⁶B'a'n kche najala'ye' toju' tx'otx', ex lay che jaw sak'puje' ajkywtane', knkla'ju'ye' tx'otx' kye txkup xob'ajilqe'x ex te q'oj.⁷Kche oqelju' kyajq'oje' kyeye', ex kche b'ajel kyu'ne' tu'n k'uẍtx'e'nb'il;⁸Naqpe' kye jwe'kye' kche oqela' jo'naq, ex naq kye jo'naqkye' kche oqela' junmutx' lajk'al (10,000); che b'elkyb'yo'ne' kyajq'oje' tu'n k'uẍtx'e'nb'il.⁹Kche ktzajel nka'yi'ne' tuk'i'l tzalajb'il, kchmetel kyb'aje' wu'ne', ex ktenb'elju' nyole' kyejni b'entti'j kyuk'i'le'.¹⁰Kche wale' ti'ju' triy k'u'n te jnab'txi', expe' k'eletz kyiq'i'ne' lay b'aj tu'ntzun tokx kyk'u'nju'ye' ak'a'j triy.

¹¹Kchin najalwe' kyxole', ex lay che elwik'o'ne';¹²chin b'etele' kukxju' kyxole', ayine' chin okyel te Kydyose', aye'tzunkye' che okyel te ntaname'.¹³Ayine' Dyos Manb'aj, inetz q'inkyeye' Ejipt tu'ntzun lalun che oktle' te majin k'a'yi'n kye aj Ejipt, ayine' ẍin toqinteju' yajb'il altoq kyib'aje', ex nche b'etle' mixti'tl kyxob'ele' wu'ne', chi Dyos. Ab'tzib'l kyeju' myab'a'n che b'in (Dt 28.15-68)

¹⁴Qatzun min ẍinx kyb'i'ne' exqa min xxikyb'incha'ne' tkyaqilju' nchaq'b'ile',¹⁵qama che el kyik'o'ne' nkawb'ile' ex nnuk'b'ile', qa min ẍe kyk'ame', ex min xjapun junju' nchaq'b'ile' kyu'ne', mache el txalpujtzuntze' ti'ju' nyole' kyej b'entti'j kyuk'i'le',¹⁶ex ikxwe' a knb'incha'ju'ye' kyi'je': ktzajel nq'o'ne' nxob'ele' kyib'aje' ex yab'il te kamik, kyaq, tyab' kywitze', ex che kb'el numje'; ex naqxgan kche awale' qu'n aye' kyajq'oje' kche walteju' twitz kyawale'.¹⁷Kchin okyel miltz'uje' kyi'je', ex kb'elkyi'je' kyu'nju' kyajq'oje'; kb'elkyi'je' kyu'nju' inche ik'unkyeye', ex kche oqele' maskye mix a'lo' xla'jalkyeye'.

¹⁸Qatzun mixti'x xkyb'iye' tu'nju' lu, kb'el ntz'e'ysa'n wuq majtl kywitze', tu'n tpaju' kyile'.¹⁹Kb'el nxitu'nju'ye' kypi'sale' toju' nimjtib'il, lay tzaj nq'o'ntle' jb'al kyib'aje' ex lay taq'tl tawalju' kytx'otx'e'.²⁰Naqxgan kche aq'unale', qu'n layx tzajte tx'otx' tawal, exqe'ju' tze lay kyaq'tl kywitz.

²¹Qatzun kukxju' kyu'ne' ex mixti'x inche b'ine' weye', kb'el ntz'e'ysa'n wuq majtl kywitze', kse'nxju' kyile'.²²Kche tzajel nq'o'ne' tojk'ul txkup xob'ajilqe'x kyib'aje' ex kche b'ajelju' kyk'wale' kyu'n, kche b'ajel kytzaqu'nju' kyalu'ne' ex kjel ko'pju' kyb'aje' ex lay che b'etl xjal toj kyb'eye'.

²³Qatzun mixti'x inok toj kywi'ye' tu'nju' lu, qa kukx kyq'ojinju'ye' wi'je',²⁴ex ikxwe' chin q'ojile' kyi'je' ex kb'el ntz'e'ysa'n wuq majtl kywitze' tu'n tpaju' kyile'.²⁵Ktzajel nq'o'n jun q'oje' kyib'aje' tu'n tpaju' yol kyejni b'entti'j kyuky'i'le'; che xe'l oqe' ewal kyoj nimaqkytaname', ayintzunwe' che kxe'lnsma'ne' yab'il kyi'je' ex kb'elkyi'je' kyu'n kyajq'oje'.

²⁶Ajtkub' nxitu'ne' kywaye' k'u'n kyu'ne', lajoj qya ktzq'ajsalte kywaye' toj jun chuj, kxel kysipa'n kyxole' ex lay che noje'.

²⁷Qatzun min ẍin kyb'iye' tu'n ja'lu ex kukx kyq'ojine' wi'je',²⁸ikxwe' kchin q'ojile' kyi'je', kb'el ntz'e'ysa'n wuq majtl kywitze' tuk'i'l ntx'u'jile' tu'n tpaju' kyile'.²⁹Oktzun che kxel kych'yo'n kyk'waltze' ex kymyale'.³⁰Che kb'el nxitu'ne' kyja kywitzleb'e' ex che kb'el npa'ne' kyq'olb'eb'le' te sturak; che kb'el nch'uqb'a'ne' kyimniqe'tle' kyib'aju' kydyose' kyimniqe', kche elel wik'o'ne';³¹che kb'el nxitu'ne' nimaqkytaname' ex che b'ajel nxitu'ne' kyja kywitzleb'e', lay chin tzalajtle' ti'ju' tk'ok'jal kyoyaje'.

³²Kb'el nxitu'nju'ye' tx'otx', aye'tzu'n kyajq'oje' che ulel najal toj, kche lab'tel tu'n.³³Aye'tzunkye' che kxel nsputi'ne' kyxol nimaqtnam ex chin okyel lpeye' b'yolkyeye' tu'n k'uẍtx'e'nb'il; kjel chq'ajlajixu' kytx'otx'e', ex che kjel xitju' nimaqkytaname'.³⁴Kyjeltentzun tx'otx'tz toj nak'b'il tkyaqilju' tq'ijlalil kjel kytzaqpi'ne' ex ajkytene' toj kytx'otx' kyajq'o'je'; iktzun k'ojlala'ju' tu'n tokt-xelju' min sojlan kyu'ne'.³⁵K'ojlalju' tx'otx' toj tkyaqilju' tq'ijlalil makyej ten, te t-xelju' min sojlan kyu'ne' najli qe'toqe' twitz.

³⁶Aye'tzunju' kywnaqile' mache kyej anq'in toj kytx'otx' kyajq'oje', k'okyel nq'o'ne' nin xob'el kyi'j, che kb'el oq naq tu'n tq'ojq'ojel jun t-xaq tze ajtkub' tz'aqi; che kb'el oq naku'xwitloj xla'ja'nqe' tu'n kyajq'oj tuk'i'l k'uẍtx'e'nb'il, kyjunalx che b'eltz'aqi ex mix a'lo'te xla'jalkye;³⁷kche jawil takpuj jun ti'j juntl naku'j inche oq toj q'oj, maskye mix a'lo' xla'jalkye; ¡mix-a'lo'x junkye' kweb'el kywitzju' kyajq'oje'!³⁸Che kb'el nb'yo'ne' kyxolu' nimaqtnam, ex che b'elb'ajsa'ne' kyu'n kyajq'oje' tojx kytx'otx'e';³⁹Aye'tzu'n mache kyej anq'in toj kytx'otx'u' kyajq'oje', che kyimel tu'ntpaj kyil; ¡che kyimel junx kyuky'i'lju' kyman tu'n tpajxju' kyil!

⁴⁰Maskyetzun matz'el kynik'e' ti'ju' kyile' ex kyilju' kymane', tu'n min njapun nyole' kyu'ne' ex inche q'ojine' wi'je',⁴¹ikxwe' kchin q'ojile' kyi'je' ex che kxel wiq'i'ne' toj kytx'otx'ju' kyajq'oje'; atzuntzu' kb'ela' me'sa'n kynab'le' tok kyi'j witzleb', kb'el kychjo'ntzun kyiltze'.⁴²Oktzun ktzajel nna'n nyoltze' kyej b'entti'j tuk'i'l Jakob', tuk'i'l Isaak, ex tuk'i'l Ab'raam, ex ktzajel nna'ne' tx'otx',⁴³ju' kjel kytzaqpi'ne' ex k'ojlal toju' tq'ijlalil lay che najane' twitz; kb'el kychjo'ntzun kyiltze', qu'n mache el kyik'o'ne' nnuk'b'ile' exqe' nkawb'ile'.

⁴⁴Tu'npetzunju', maskye ate'qe'ye' toj kytx'otx'ju' kyajq'oje', lay che elwik'o'ne' ex lay che el wi'jla'ne'; lay che kub' nb'yo'ne' ex kjapumelu' nyole' kyej b'entti'j wu'ne' kyuk'i'lju' ojtxi' kyyajilb'ene', qu'n ayinwe' Dyos Manb'aj.⁴⁵Kpena' tzajel nna'ne' nyole' kyej b'entti'j kyuk'i'l tej kyetzwiq'i'ne' Ejipt kywitzju' nimaqtnam tu'n kyajb'ene' weye'. Ayine' Dyos Manb'aj, chi Dyos.

⁴⁶Aye'tzun kawb'il ja'lu, e'nuk'b'il ex xnaq'tzb'il tzaj tq'o'n Qman Dyos te Moyses twi' witz Sinayi tu'n t-xitma'n kye aj Israel. Ti'xti' xjansa'nqe' te Dyos

¹Tzaj tma'n Qman Dyos te Moyses tu'n t-xitma'n kye aj Israel kjalu:
Qa ati jun tajb'il tu'n tjapun tyol tu'nju' oje tma weye' tu'n ttzaj tq'o'n kse'nxju' twi' jun xjal,³jun ichan te winqi'n (20) ab'q'i kpomelx te oxnaq (60) ab'q'i kxe'l tma'na te tu'n tq'onte jun o'nb'il te jun lib'r saqpwaq, kse'nxju' malb'il toju' ja xjan;⁴qatzun jun qya, aju' o'nb'il tu'n tq'onte masch'i'n nik'jan lib'r saqpwaq.⁵Atzu'n kyeju' xjal tzajx te jwe' ab'q'i tu'n tpon te winqi'n ab'q'i, ch'inxmi nik'jan lib'r saqpwaqju' o'nb'il tu'n tq'onte qa q'a, qatzun txin masch'i'n oxe' ons saqpwaq tu'n kyq'onte.⁶Atzu'n kye k'wal tzajx te jun xjaw tu'n tpon te jwe' ab'q'i, aju' o'nb'il kyu'n qa q'a, masch'i'n jun ons tk'i' nik'jan saqpwaq, qatzun txin te ch'intlmi jun ons saqpwaq.⁷Atzu'n kyeju' xjal matxi' chi ex tib'aj oxnaq (60) kyab'q'i, te ch'intlmi jwe' ons saqpwaqju' o'nb'il tu'n kyq'onte qa ichan, qatzun qya masch'i'n oxe' ons saqpwaq tu'n kyq'onte.⁸Qatzun prowxi'xju' xjal ex lay b'ant tchjet tu'n kse'nxju' q'ma'ntl, kxel iq'et twitzju' pale tu'ntzun tmante jte' tu'n tq'onte kse'nxju' tu'me'l tu'n.

⁹Aye'tzu'n alu'mj b'a'n tu'n kytzaj kyq'o'ne' weye', tkyaqil alu'mj che ktzajel kyq'o'ne' weye' kche xjansetel,¹⁰ex lay ch'exb'et tuk'i'l juntl alu'mj, maskye tb'anilxi'x mujqa taq'wix. Qatzun makych'exb'eye', kxjansetelju' alu'mj oje q'onjtz tuk'i'lxi'ju' alu'mj in q'onjtz te t-xel.

¹¹Qatzun jun alu'mj tz'il myab'a'n tu'n ttzaj kyq'o'ne' weye', ati tu'n t-xi' iq'etju' alu'mj te' pale¹²tu'n tmante jte' twi', kse'nx tka'yinkju' alu'mj qa tb'anil mujqa mya. Atzunju' tajlal matmaju' pale, atzun twi'ju',¹³qatzun kyajb'ile' tu'n tkolpetju' alu'mj, ati tu'n kyq'onteye' tjwe'yi'n tnejtlju' o'nb'il tib'aju' twi' maq'manjtz.

¹⁴Qa ati jun matzaj tq'o'n tja tu'n t-xjanset weye', aju' pale kq'malte jte' twi'ju' ja kse'nxju' b'inchb'ente. Aju' tajlal ktma' pale, atzun twi'ju'.¹⁵Qatzun tajb'ilju' saj q'onte tu'n tkolpetl tu'n, ati tu'n tq'onte jun tjwe'yi'n tnejtlju' o'nb'il tib'aju' twi' ojetoq q'manjtz, kyjeltzun jumajtltz te tja.

¹⁶Qa ati jun matzaj tq'o'n jun piẍ tx'otx' ti'ju' tetzb'il tu'n t-xjanset weye', kximetel twi'ju' tx'otx' kse'nxju' tawal intq'o'n, nik'jan lib'r saqpwaq tu'n junjun kyintal seb'ad njaw twitz.¹⁷Qama t-xjansaju' ttx'otx' weye' tojxju' ab'q'i te tzaqpib'l, ax twi'ju' kjelten kse'nxju' q'ma'ntl;¹⁸qatzun mat-xjansa tik'lenxi'ju' ab'q'i te tzaqpib'l, kxel t-xima'n pale tajlalju' saqpwaq tu'n tq'onte, k'elel iq'et ti'ju' twi' q'ma'ntl kse'nxju' jte' ab'q'itl tu'n tponju' ab'q'i te tzaqpib'l.

¹⁹Qatzun tajb'ilju' xxjansanteju' tx'otx' tu'n tkolpetl tu'n, ati tu'n tq'onte jun tjwe'yi'n tnejtl tib'aju' twi' xima'n, kyjeltzun tx'otx'tz te;²⁰qatzun min xkolpet tu'n, exqa matxi k'ayetju' tx'otx' te juntl xjal, laytzun b'ent tkolpetltz tu'n.²¹Ajtzun ttzaqpetju' tx'otx' toju' ab'q'i te tzaqpib'l, kjelten xjansa'n weye' ex kttzyu' pale te kyetzb'il.

²²Qa ati jun matzaj tq'o'n jun tx'otx' tu'n t-xjanset weye' loq'oj tu'n, mya ti'ju' tetzb'il kyxolju' toj tja,²³kxel t-xima'n pale twi' tuk'i'lju' xjal lu tzmajx ajtul kanunju' ab'q'i te tzaqpib'l, textzu'n q'ij lu ktchja' xjal lu kse'nx twi' tx'otx' xb'aj ximet, kt-xjansa'tzuntz weye'.²⁴Tojtzunju' ab'q'i te tzaqpib'l, k'anjelti'ju' tx'otx' lu teju' k'ayinte, aju' tajawku'xi'x.

²⁵Tkyaqilju' twi' kxel t-xima'na kse'nxju' pwaq in ajb'en toju' ja xjan, ch'inxmi tz'aqla' nik'jan ons talal.

²⁶Aye'tzu'n tnejel kyal alu'mj, weqe'ye' tu'n tpaju' tnejelqe', mix-a'lokye kxjansalkye. B'a'ntzun qpoj tman wakx mujqa qpoj tman rit, weqe'ye'.²⁷Qatzun jun alu'mj tz'il, b'a'n tu'n tkolpet kse'nxju' twi' kxel ximet tuk'i'l jun tjwe'yi'n tnejtl tib'aju' twi'. Qatzun min xkolpet, b'a'n tu'n t-xi' k'ayet kse'nxju' twi' xima'ntl.

²⁸Qa ati jun matzaj tq'o'n jni'ju' ati te tu'n t-xjanset weye', b'a'ntzun xjal, alu'mj mujqa tx'otx' ti'ju' tetzb'il kyxolju' toj tja, mixti'x jun tu'n tk'ayet ex tu'n tkolpet; tkyaqilju' ktzajel tq'o'n che kyjelten xjanxi'x tu'n kyajb'en weye'.²⁹Ex Lay b'ant tkolpet jun xjal b'entnitlti'j tu'n tkyim: ati tu'n tkyim.

³⁰Aju' tlajoji'n tnej kyeju' kwitz tawalju' tx'otx' injaw, triy ex kywitz tze, weye' ex xjansa'nqe' weye'.³¹Qa ati jun tajb'il tu'n tkolpinte jni' ti'ju' tlajoji'n tnej lu, ati tu'n tchjonte jte' twi' tuk'i'l jun tjwe'yi'n tnejtl.

³²Jun ti'j lajojchaq alu'mj, wakx mujqa rit, ktzajel kyq'o'ne' weye' te tlajoji'n tnej,³³mixti' tu'n kyjaw sk'etju' tb'anil exju' toq'wixqe', ex lay ch'exb'et jun tu'n juntl. Qatzun mab'aj jun ch'exb'eb'l, kykab'ilju' alu'mj kche kyjelten xjan, aju' tnejel exju' kyjel te t-xel, qu'mtzun lay tz'anjtl kyi'j teju' xkub' q'onkye, chi Qman Dyos.

³⁴Aye'tzun chaq'b'ilju' tzaj tma'n Qman Dyos te Moyses twi' witz Sinayi tu'n t-xitma'n kye aj Israel.

Bible Society in Guatemala

https://app.library.bible/content/aea9d9099feb3a24