লুক10
1আকো নোইতা প্রভু ইশুহা সুংকাইসো বার্চো দিংঙাবিহিং জেংয়ে। আসা আবিহিং নিহসো নিহসো জোমসা আপনিকো হোদাংওয়া লোই আসা শহরবিতা আপনিরোমা নাগাই নিংপুয়ে।2আকুহা আবিহিং জাংয়ে, “চ্যাকো মোইপ্যাবিহা উইসে নিও, আদো কাংপামবিহা লিওপা নিও। আকো সোতা মোইপ্যাকো গিরিওয়াহিং আপনিকো মোইপ্যাবি চ্যাকো লুকুইবিহিং নিংপিকো তামসা পাচাই।3নেহা নাবিহা হোতু। কাং, কা নাবিহিংয়া মাংশ্রিবিকো প্যাকোতা লুকাকো চেংবেবিহিং নিংপুমি ত্যাবাপা নাবিহিংয়া দিংঙাবিকো প্যাকোতা নিংপুরোওয়া।4নাবিহা ন্যাস্যাকো পেকুওয়া, চিদুং, কোরোং, হাইরে মোপুগে, আসা ন্যাতাতা হাংসুহিংপারে য়্যইসুমসা মোওইরোই।5“নাবিহা হানি সাতা হো, আকু সাহিং জাং, ‘ই সাহিংয়া তিমেপা জিংকো!’6আকু সাতামি তিমেওয়াহিং জেজেংওয়া দিংঙা নিনাহা নাবিকো তিমেওয়াহা আবিকোতা য়ুংরোওয়া, আদো এপাজিংওয়া দিংঙামি মাতানাহা নাবিকো তিমেওয়াহা নাবিকোতারাং লায়োংরোওয়া।7হানি সাতা নাবি য়ুং, আকু সাকো দিংঙাবি হাই চাকো পিচা, নাবিহা আকুরাং চা, হাংপাতানাহা কাংপামবিহা কামকো ন্যাস্যা মুংচানেরোওয়া। সা-সাতা মুনুইয়া।8“এপা জোমসারাং নাবিহা শহরবিতা হোনুওয়া আকো দিংঙাবি নাবিহিং লেই তামসা চাকো পিচাওয়াবিহা চা।9শহরতা নিওয়া হাইমবিহিং সাংপা, আসা ‘নেহা সেংজাকো রাজ্য দেয়োংকো তোংতেহে’ তামসা হিংপা।10আদো হাত্রং নাবি শহরতা হো, আত্রংহা আকো দিংঙাবিমি নাবিহিং লেই মাতানাহা আকু শহরসো নোমসা আবিহিং জাং,11‘কাবিহা নাবিকো শহরকো দুনারে নাবিকো তোইতা কাবিকো কোকোইকো তাংবাসো প্যাদাংয়ে, আদো নাবিহা গেকো, সেংজাকো রাজ্য দেয়োংকো তোংতেও’।12কা নাবিহিংয়া জাংরোওয়া, ন্যায়কো দিনতাহা আকু শহরকো কোইচ্যাওয়াহা সদোমকো দুঃখরোমা সিওপা জিংরোওয়া।13“নাবিকোতা টেবো কোইচ্যাওয়া ওয়াংরোওয়া, খোরাজিম! নাবিকোতা টেবো কোইচ্যাওয়া ওয়াংরোওয়া, বেথসেদা! নাবিকো প্যাকোতা আআংপেপেচপা জোওয়া কামবিহা তুরোস আসা সিদোন শহরতা জোনাহা আকো দিংঙাবিহা নাগাইসোরাং আপনি আপনিকো পাপহিং ছমা য়ামসা ল্যাকোগা, আসা পাপহিং ল্যাওয়া তিংপাকো সোতা বোরাকো আংদুং লুমসা চেকা নাইকোগা।14আদো ন্যায়কো দিনতাহা তুরোস আসা সিদোনকো দিংঙাবিকো কোইচ্যাওয়ারোমাহা নাবিকোহা সিওপা জিংরোওয়া।15ও কোর্ফরনহুমকো দিংঙাবাই, নাবিহা লোডিংবা দেকারো তামসা নোমগা? আদো নাবিহা নরকতারাং দেকারোওয়া।”16ইশুহা য়োংতোংবিহিংয়া জাংয়ে, “নাবিকো নুওয়াং হিংবিহা কুং নুওয়াং হিংওয়াগা। নাবিকো জাংওয়া নুওয়াং মোকোমি তাওয়াবিহা কুং নুওয়াংহিংনাং মোকোমি তাওয়াগা। আসা কুং নুওয়াং মোকোমি তাওয়াবিহা কাহিং নিংপুওয়া সেংজাকো নুওয়াংহিংনাং মোকোমি তাওয়াগা।”17ইশুকো নিংপুওয়া আকু সুংকাইসো বার্চো য়োংতোংবি লারেয়ে, আসা য়াংতামসা ইশুহিং জাংয়ে, “প্রভু, নাকো মিংকো সেসো সিংঙোবিরে কাবিকো অধিকারতা ওয়াংয়ে।”18ইশুহা আবিহিংয়া জাংয়ে, “কাহা শয়তানহিংয়া তাত্রাইপামসা ডিংবাসো হুইপাওয়া তিংয়ে।19হিং, কা নাবিহিংয়া পুইয়া আসা বিচ্ছিবিহিংনে হুংদ্যামসা তেইওয়া সে আসা নাবিহিং মোসুংপা জোমবিকো সেহিং জিয়োওয়া অধিকার পিচামি নিও। হাংসুরে নাবিহিংয়া হাইরে জোমক্যই।20আদো সিংঙোবিহা নাবিকো অধিকারতা নিও তামসা নাবিহা মায়াংতাগে, আকুরোমা নাবিকো মিংহা লোডিংবাতা লামি নিও তামসা য়াংতা।”21আত্রংরাং ইশুহা পবিত্র লাংবেসো য়াংতামসা জাংয়ে, “ও আপা, লোডিংবা আসা বাসিমতিকো গিরি, কা নাতিহিংয়া গারানি তারোওয়া, হাংপাতানাহা দুংজি নিওয়া আসা গেমসুং জোমবিকোসো ম্যইমসা এমসা নাতিহা আপেবিবেপা জিংওয়া দিংঙাবিহিং কোইপাপিয়ে। ও আপা, এপা জোকোরাং নাতিহা কেংমগা।22“কুং আপাহা কাহিং তাংসা পিচামি নিও। আপা ল্যামসা কা চেংওয়াহিংয়া হাংসুরে মানাই। এপারাং চেংওয়া আসা আকো নাইপাওয়া দিংঙাবি ল্যামসা লেরা হাংসুরে আকুহিংয়া মানাইরোওয়া।”23আকো নোইতাহা ইশুহা য়োংতোংবিকোতা ন্যইমসা চেকেপা জাংয়ে, “ই তাংসা ন্যইচা মুংওয়াবিহা আশিষিত নিও!24হাংপাতানাহা কা নাবিহিং জাংরোওয়া, উইসে অগমবক্তাবি আসা জাইপুবিহা নাবিকো তিংওয়া আসা হিংওয়া ই নুওয়াংবি ন্যইকো আসা হিংকো কেংদিংমগা, আদো আবিহা ন্যইকো আসা হিংকোরে মোমুংতো।”25ইচো তাংজিকো উটকেওয়া লেমসা ইশুহিং মোতুপা জাংনাহা প্যইকো তামসা উইয়ে, “ও উটকেওয়া, হাত্রংরে মিসিওয়া সাদি মুংচাকোহা কা হাং জোনেকোগা?”26ইশুহা আকুহিংয়া জাংয়ে, “মোসাকো লিংপাংতা হাং লামি নিংগা? আউতা নাতিহা হাং পড়াইংগা?”27আকুহা জাংয়ে, “নাতিহা প্রভু আপনিকো সেংজাহিং আপনিকো তাংসা তুংসিংসো তাংসা সাদিসো তাংসা সেসো আসা তাংসা নোচেংসো জেজেংপা জো, আসা আপনিকো সাবেইবিহিং আপনিহিং ত্যাবাপা জেজেংপা জো।”28ইশুহা আকুহিংয়া জাংয়ে, “নাতিহা আজিপ্পারাং জাংয়ে। এপারাং জো, আসা নাতিহা হাত্রংরে মিসিওয়া সাদি মুংচারোওয়া।”29আদো আকু তাংজিকো উটকেওয়াহা আপনিহিং তাংজি তিংপাকো সোতা এপা জাংয়ে, “এপা বেনাহা কুং সাবেইবিহা হাংসুগাসা?”30ইশুহা আকুহিংয়া জাংয়ে, “সাইয়ুহা ইচো দিংঙাহা য়রুশালেমসোহা লেতা য়রিহো শহরতা লেপাদাংওয়া নিমি। ন্যাতাতা আকুহিংয়া কুইমবিহা প্যইমসা আংদুং লুমসা ডুপুইয়ে আসা সাদি হাপদাংক্যইপা জোতেমসা হোপুয়ে।31আম্যই নোইতাহা ইচো পাউ আকু ন্যাতাসো লেয়ে। আদো আকু সাদি হাপদাংতেওয়া দিংঙাহিং তিংমসা আকুহা তানাংসো হ্যাপুয়ে।32এপা জোমসারাং দেমসাতা কাম জোওয়া লেবিরে আউসোরাং লেহে, আসা আকুরে সাদি হাপদাংতেওয়া দিংঙাহিং তিংমসা ইদ্যাসো হ্যাপুয়ে।33আদো ইচো সামরি জ্যাকো দিংঙারে আকু ন্যাতাসো লেহে। আত্রংহা আকু সাদি হাপদাংতেওয়া দিংঙাহিং তিংমসা আকো তুংসিংতা লামতুপুয়ে।34আকু সামরিহা আকোতা হ্যায়ে। আকুহা আকো মাকাহিং সাংপাকো চুইতি আসা আংগুরকো য়ুসো প্যামসা আংদুংসো জিংপিয়ে। আকো নোইতা আকুহা আকু দিংঙাহিংয়া আপনিকো ওইংঙাতা বাইপাপুমসা মেং পিইচাওয়া সাতা পুরায়ে আসা আত্রংকো লিসুংহা আকুহিংয়া এনতাপা য়্যারাপায়ে।35আকো জুকুং সামরিহা সাতা লাকাদাংনুওয়া আকু সাকো দিংঙাহিংয়া জাতাংকো নিহসে টাংকা পিচামসা জাংয়ে, ‘ইহিংয়া এনতাপা কাংপি। ইকো সোতা ন্যাসারাং ন্যাস্যা সিওপা ঘ্যইনাহা কা লারেমসা লেপানু পিচারোওয়া’।”36ই মিংচি ল্যাপুনতেনুকো নোইতাহা ইশুহা তাংজিকো উটকেওয়াহিংয়া উইয়ে, “ই সুংচোতাহা কুইমবি স্যাপুদাংওয়া দিংঙাকোহা এনতাওয়া সাবেইহা হাংসুগা?”37আকুহা জাংয়ে, “আকু দিংঙাহিং লামতুপা জোওয়া দিংঙা!”
ইশুহা জাংয়ে, “হোতু, নাতিরে এপারাং জো।”38ইশুসো আকো য়োংতোংবি হোদিংনুওয়া আবিহা ইচো লোইতা দেকায়ে। আউতাহা ইচো মার্থা মিংকো মেমেহা আবিহিং আপনিকো সাতা লেই তামসা মোউয়ে।39আকো ইচো মরিয়োম মিং নিওয়া য়েমে নিমি। আকুহা প্রভু ইশুকো কোকোই কাটুতা গামসা ইশুকো ঝিপাওয়া হিংদিংমি।40আদো মার্থাহা সাকো কামতা তুরুই-মুরুইদিংমি। আপনি মেংচে তাংসা কাম জোনেমকো সোতা আকুহা ইশুকোতা লেমসা জাংয়ে, “ও প্রভু, সাকো কামবিহা তাংসা কারাং জোনেকোগা। নাতিহা মাতিংগা? মরিয়োমহিং জাংপি, ওয়াংমসা কাহিং গুইজ্রুকো।”41প্রভুহা আকুহিংয়া জাংয়ে, “ও মার্থা, নাতিহা উইসে নুওয়াংবি নোমসা সেংদুচাংমগা।42আদো ঘ্যইওয়াহা ইচো মেংচে নিও। আকুহা মরিয়োম জেংমি নিও, ইহা হাংসুরে আকোসো গিংচামক্যইরোওয়া।”
ইশুহা জাংয়ে, “হোতু, নাতিরে এপারাং জো।”38ইশুসো আকো য়োংতোংবি হোদিংনুওয়া আবিহা ইচো লোইতা দেকায়ে। আউতাহা ইচো মার্থা মিংকো মেমেহা আবিহিং আপনিকো সাতা লেই তামসা মোউয়ে।39আকো ইচো মরিয়োম মিং নিওয়া য়েমে নিমি। আকুহা প্রভু ইশুকো কোকোই কাটুতা গামসা ইশুকো ঝিপাওয়া হিংদিংমি।40আদো মার্থাহা সাকো কামতা তুরুই-মুরুইদিংমি। আপনি মেংচে তাংসা কাম জোনেমকো সোতা আকুহা ইশুকোতা লেমসা জাংয়ে, “ও প্রভু, সাকো কামবিহা তাংসা কারাং জোনেকোগা। নাতিহা মাতিংগা? মরিয়োমহিং জাংপি, ওয়াংমসা কাহিং গুইজ্রুকো।”41প্রভুহা আকুহিংয়া জাংয়ে, “ও মার্থা, নাতিহা উইসে নুওয়াংবি নোমসা সেংদুচাংমগা।42আদো ঘ্যইওয়াহা ইচো মেংচে নিও। আকুহা মরিয়োম জেংমি নিও, ইহা হাংসুরে আকোসো গিংচামক্যইরোওয়া।”
The Seed Company