লুক11
1সাইয়ুহা ইচো জায়গাতা ইশুহা পাচাইদিংমি। পাচাইওয়া ত্যইনুওয়া আকো ইচো য়োংতোংহা ওয়াংমসা জাংয়ে, “প্রভু, য়হুন্নাহা আপনিকো য়োংতোংবিহিং পাচাইকো ঝিপামি ত্যাবাপা কাবিহিংনে ঝিপাপি।”2ইশুহা আবিহিংয়া জাংয়ে, “নাবিহা এপা পাচাই: ‘ও আপা, নাকো মিং পবিত্র জিংকো, নাকো রাজ্য লেকো।3সদাইদিংকো ঘ্যইওয়া চাওয়াবি কাবিহিং পিচা।4কাবিকো জোওয়া পাপবি ছমা পিচা, হাংপাতানাহা কাবিকো তোইতা পাপ জোমবিহিংয়া কাবিরে ছমা পিচামি নিও। আসা কাবিহিংয়া পরিকছাতা মোপুরাপি’।”5আকো নোইতা ইশুহা য়োংতোংবিহিংয়া জাংয়ে, “নাতিহা লিসুং ইচো ব্যারোকো সাতা হোমসা এপা জাংরোওয়া, ‘ও ব্যারো, কাহিংয়া সুংচো কোব্রেং খিচপা,6হাংপাতানাহা কুং সাতা ইচো ব্যারো তানাংসো ওয়াংমি নিনা, আদো কুংতাহা চাওয়া আংওয়া হাইরে মাতানা।’7আকু ব্যারোহা সাকো নাপোসো জাংরোওয়া, ‘কাহিং মোকোইচ্যাপাগে। লাপুংহা নেতেইসোরাং গিপুনতেনা, আসা চেংবিরে ন্যাগুতা জিংপুনতেনা। কা নেহা লোমসা নাতিহিংয়া হাইরে পিচামক্যইরো।’8কা নাবিহিংয়া জাংরোওয়া, আকুহা বাইরে নোমসা মিচাদো জামসা য়াওয়া য়াওয়া জোনাহা আকুহা লেরোওয়া আসা য়াওয়া সেই তাংসা আকুহিংয়া পিচারোওয়া।9“আকো সোতা কা নাবিহিংয়া জাংরোওয়া, য়াচা, আসা নাবিহা মুংচারোওয়া, মোচোই, আসা নাবিহা দোচারোওয়া, লাপুংবেচা, আসা নাবিকো সোতা ওয়েপিরোওয়া,10হাংপাতানাহা য়াচামবিহা মুংচারোওয়া, মোচোইমবিহা দোচারোওয়া, আসা বেচামবিহিংয়া লাপুং ওয়েপিরোওয়া।11“আপনিকো চেংওয়া নায়া য়ানুওয়া পুইয়া পিচাওয়া, আসা ক্যইতুই য়ানুওয়া বিচ্চি পিচাওয়া, নাবিকো প্যাকোতাহা হাংসু এপা জিংওয়া আপা নিংগা?13নাবিহা মেংতাপা জিংমসারে আপনিকো চেংওয়া চেমেবিহিং এনতাওয়া চাওয়া আংওয়াবি পিচাকো গেনাহা, নাবিকো লোডিংবাতা নিওয়া আপাহা আকোতা য়াচামবিহিংয়া হাসেকো সিওপা জোমসা পবিত্র লাংবে পিচাকোগা।”14ইচো দিংঙাহিংয়া সিংঙোহা লেংবা জোপুমি নিমি। ইশুহা আকো নাপোতা নিওয়া সিংঙোহিং নোপাপুমতেনুকো নোইতাহা আকু দিংঙাহা য়্যইয়ে, ই তিংমসা দিংঙাবিহা আআংপেপেচপা জিংপুয়ে,15আদো আবিকো প্যাকোতাহা লেরাহা জাংসুয়ে, “ইহা সিংঙোকো গিরি বালজিবুলকো সেসো সিংঙোবিহিং নোপাচাংমগা।”16লেরাহা আকুহিং পরিক্ছা জোকো কেংমসা উইসুয়ে, “ই কামহা সেংজাকো সেসোবেনাহা কাবিহিং লোডিংবাসো ইচো চিহ্ন তিংপাপি।”17আদো আবিকো নোওয়া গেমসা ইশুহা আবিহিংয়া জাংয়ে, “হানি রাজ্যতা পিংচ্যাসু, আকু রাজ্যহা দাংপুমগা। হানি সাতা পিংচ্যাসু, আকু সারে দাংপুমগা।18এপা জোমসারাং শয়তানবিরে আপনি লারাই মাচাংসুনাহা আবিকো রাজ্যহা হেপা এনতাপা একো চুকোগা? নাবিহা কাহিংয়া সিংঙোকো জাইপু বালজিবুলকো সেসো সিংঙো নোপামকো জাংদিংয়ো।19এপা বেনাহা নাবিকো চেংওয়া চেমেবিহা হাংসুকো সেসো সিংঙো ঘিকোগা? নাবি আপনিবিকো য়োংতোংবিরাং নাবিহা মাতুপা জোদিংয়ো তামসা তিংপাপুরোওয়া।20আদো কামি সেংজাকো সেসো সিংঙোবি নোপানাহা, সেংজাকো রাজ্যহা নাবিকো প্যাকোতা লেপুনতেয়ো।21“পাতাং ওয়েমসা বুচুইওয়া দিংঙা সাহিং কাংনাহা সাকো সোংসাবিহা এনতাপা য়ুংমগা।22আদো আকুরোমা বুচুইওয়া দিংঙা ওয়াংনাহা আকুহিংয়া জিয়োরোওয়া আসা আকো দাতাচ্যইপা নিওয়া তাংসা পাতাংবি গিংচাপুরোওয়া আসা আকো সাকো সোংসাবিরে কুচাপুমসা পুচারোওয়া, আসা আকো ব্যারোবিহিং পোচ্রারোওয়া।23কাহিংপা মাতেইওয়া দিংঙাহা কাহিং মোসোংপা জোওয়াগা, আসা কাহিং মোয়োজ্রুমবিহা য়োপুমতেওয়ারে হিংচ্যাইবিরিপা গাচপাপুরোওয়া।24“সিংঙোহা দিংঙাসো নোপুমতেনুওয়া চিচ্চোওয়া জায়গাতা সাদু মোমসা তেইমগা। এপা জিংওয়া য়ুংদু মোমুংনুওয়া ‘কুং নাগাইকো যুংওয়া সাতারাং লাকাপুরো’ তামসারাং লায়োংমগা।25হাত্রং আকু লারেমসা লে, আকুহা আকু সাহিংয়া সাইমসা এনতাপা এওয়া তিংমগা।26ই তিংমসা আকুহা ন্যাসারাং দোসরা নীচো আপনিরোমা ডিয়োওয়া সিংঙোবিহিং মোউপামসা পারামগা, আসা আবি তাংসা নাপোতা হোমসা য়ুংমগা। আসা আকু দিংঙাকোহা নাগাইকোরোমা নোইতাহা চুসুংমাইসুংপা জিংপুমগা।”27ইশু য়্যইওয়া কোকোইত্তা উইসে দিংঙাকো প্যাকোসো ইচো মেমেহা সিদিংপা ঙামসা জাংয়ে, “নাতিহিং চেংপাওয়া আসা য়ো পেয়াংওয়া আয়ুহা আশিষিত নিও।”28ই হিংমসা ইশুহা জাংয়ে, “সেংজাকো ঝিপাওয়া হিংমসা হাংসু জো! আবিরাং আশিষিত নিও।”29দিংঙাবিহা ন্যাসারাং উইসে জিংপুয়ে। আত্রংরাং ইশুহা জাংয়ে, “নেকো সময়কো দিংঙাবিহা এসেপাকো মেংতাপা নিও! আবিহা সেকো আআংপেপেচপুওয়া কামবি কাংকো মেংচে কেংমগা। আদো অগমবক্তা য়োনাকো তোইতা তিংপাওয়ারোমা দোসরা আআংপেপেচপুওয়া চিহ্নহা ন্যইচা মোমুং।30য়োনা নিনেবে শহরকো দিংঙাবিকো নাগাইতা হেপা চিহ্ন জিংমমে, এপারাং নেকো সময়কো দিংঙাবিকো সোতারে কা দিংঙাকো চেংওয়ারে চিহ্ন জিংরোওয়া।31ন্যায়কো দিনতাহা মাংকো লোইকো সেওয়াকো জাইমুহা জামসা নেকো সময়কো দিংঙাবিহিংয়া দোষ তিংপারোওয়া, হাংপাতানাহা সোলোমন জাইপুকো দুংজিকো নুওয়াং হিংকো আকুহা তানাংসো লেহে। আদো কাং, সোলোমনরোমা ইচো ইতা মহান নিও।32ন্যায়কো দিনতাহা নিনেবে শহরকো দিংঙাবিহা জাসুমসা নেকো দিংঙাবিহিং দোষ তিংপারোওয়া, হাংপাতানাহা য়োনা সেংজাকো নুওয়াং হিংপানুওয়া আবিহা আপনি আপনিকো পাপহিংয়া পশ্চতাপ জোমসা পাপহিংয়া ল্যায়ে। আদো কাং, য়োনারোমা ইচো ইতা মহান নিও।”33“দিব্রি লারাইপামসা হাংসুরে য়োতিসো মাতুংমগা আসা মেইমসারে মেএমগা। আদো নাপোতা ওয়াংমবিহিং হাহাইপা জিংকো তামসা তোলোংওয়া তিরাতা এমগা।34নাকো জুপাকো দিব্রিহা নাকো মিচোগা। নাকো মিচোমি এনতাপা নিনাহা নাকো তাংসা জুপারাং হাহাইপা তিংমগা। আদো নাকো মিচোমি মেংতাপা নিনাহা নাকো তাংসা জুপারাং নাঘিপা জিংমগা।35আকো সোতারাং হোশিয়ার য়ুং, নাকোতা নিওয়া হাহাইওয়াহা নাটুংপা মাজিংকো।36নাকো তাংসা জুপাহা হাহাইওয়াসো মেইপুমি নিনাহা আসা নাটুংপা মোতোনাহা, দিব্রিকো হাহাইওয়া নাকো তোইতা হুইমি ত্যাবাপা নাকো তাংসা জুপারাং হাইহাইরোওয়া।”37ইশুহা ই নুওয়াং জাংপুনতেনুকো নোইতা ইচো ফরিসিহা আকুহিংয়া আপনিকো সাতা চাকো মোউয়ে। ইশুহা আকো সাতা হোমসা চাকো গায়ে।38আদো ইশুহা য়হুদিবিকো লিংপাংতা নিওয়া সেই খুই মাদুপা চাওয়া তিংমসা আকুহিং চাকো মোউওয়া ফরিসিহা আআংপেপেচপা জিংপুয়ে।39আদো প্রভুহা আকুহিংয়া জাংয়ে, “নাবি ফরিসিবিহা বারাংসো চোপোই বাইরেসো মাইঝিমগা, আদো নাপোসোহা নাবিহা বাংওয়া আসা মেংতাওয়াবিসো মেইমি নিমগা।40ও তোউজিবাই, হাংসু জুপাকো বাইরেহিং দিং, আকুরাং নাপোকোরে দিংমকোতা?41নাতিহিংপা নিওয়া ম্যইমসা এওয়া নুওয়াবিহা জোরোংবিহিং চোপি, আসা নাবিহিংয়া তাংসা এনতারোওয়া।42“আদো নাবি ফরিসিবিকোতাহা টেবো কোইচ্যাওয়া ওয়াংরোওয়া, হাংপাতানাহা নাবিহা পোদিনা, আরুদ আসা সামাই-সুতিসো লোওয়া দশাংশ সেংজাহিং পিচামগা, আদো দোসরাবিহিংয়া এনতাপা ন্যায়রে মোজো পিমগা আসা সেংজাহিংনে জেজেংপা মোজোমগা। আকু দোসরা নুওয়াংহিংপা চিত্তা নাবিহা ন্যায়সো জেজেংওয়ারে জোকো জো।43“নাবি ফরিসিকোতাহা টেবো কোইচ্যাওয়া ওয়াংরোওয়া, হাংপাতানাহা নাবিহা জোংসুওয়া সাতা এনতাওয়া গাদিংতা গাকো কেংমগা আসা হাতিবিতা দোসরাবি নোংপিকো তামসা নোমগা।44নাবি ফরিসিবিকোতাহা টেবো কোইচ্যাওয়া ওয়াংরোওয়া, হাংপাতানাহা নাবিহা আকু নাইমক্যইওয়া তোম্যই ত্যাবাপাগা, আসা দিংঙাবিহা সিদা মোচ্যইমসা আকো তোইসো তেইমগা।”45ইচো তাংজিকো উটকেওয়াহা ইশুহিং জাংয়ে, “উটকেওয়া এপা জাংমসা নাতিহা কাবিহিংনে লেপেপাদিংয়ো।”46ইশুহা আবিহিংনে জাংয়ে, “নাবি তাংজিকো উটকেওয়াবিকোতারে টেবো কোইচ্যাওয়া ওয়াংরোওয়া, হাংপাতানাহা নাবিহা দিংঙাবিহিংয়া লিংপাংকো মুটুইক্যইওয়া ব্যাবি পুপামগা, আদো নাবিহা আকু ব্যাহা নাবিকো ক্র্যইসো সুকোরে মোসুমগা।”47“নাবিকোতাহা টেবো কোইচ্যাওয়া ওয়াংরোওয়া, হাংপাতানাহা নাবিহা আপনিকো আজা-আটাবিকো স্যাপুওয়া অগমবক্তাবিকো সোতা এনতাওয়া এনতাওয়া তোম্যইবি বানাইমগা।48এপারাং নাবিহা নাবিকো আটা-আজাবিকো জোওয়া কামহা আজিপ্পাগা তামসা তিংপামগা। আবিহা অগমবক্তাবিহিংয়া স্যাপুয়ে, আসা নাবিহা আবিকো তোম্যইবি বানাইমগা।49আকো সোতারাং তাংসা নুওয়াং কোইওয়া সেংজাহা নাগাইসোরাং জাংমি নিও, ‘কা অগমবক্তাবি আসা জেংওয়া পোইংবিহিং নিংপুরোওয়া, আদো আবিহা লেরাহিংয়া ঘিহপুরোওয়া আসা লেরাহিংয়া স্যাপুরোওয়া।’50“আকো সোতা বাসিমতি দিংনুসো নেচোইপা হাসে ইচো অগমবক্তাবিহিং স্যাপুমি নি! আকু তাংসাকো দোষহা নেকো দিংঙাবিকোসোরাং লাংরোওয়া।51আজিপ্পারাং কা জাংরোওয়া, হাবিলকো সিওয়াসোহা, য়হুদিবিকো দেমসা আসা মোজোংকো প্যাকোতা সিপুওয়া জোকোরিয়া অগমবক্তাকো দোষহা ই তাংসা নেকো দিংঙাবিকো তোইতা হুইরোওয়া।52“নাবি তাংজিকো উটকেওয়াবিকোতাহা টেবো কোইচ্যাওয়া ওয়াংরোওয়া, নাবিহিংপা দুংজিসো নোচেং ওয়েকো চুওয়া গোইচো নিও, আদো নাবি আপনিবিরে নাপোতা মোহোতো আসা দোসরাহিংনে নাপোতা হোকো য়োইদিংয়ো।”53ইশুহা আউসো নোপাদাংনুওয়া তাংজিকো উটকেওয়াবি আসা ফরিসিবিহা ইশুহিংয়া ন্যাসারাং বিরোধ জাংসুয়ে, আসা আকুহিংপা দোসরা উইসে নুওয়াংবিরে উইয়ে।54আবিহা আকুমি মাতুপা য়্যইনাহা প্যইকো তামসা মৌকা মোদিংমি।
The Seed Company