১ কোরোন্থি1
1সেংজাহা আপনিকো ইচ্ছাসো খ্রীষ্ট ইশুকো জেংওয়া পোইং জিংকো মোউওয়া কা পাউল আসা কাবিকো এ সোস্তেনেসকোসো ই চিঠি লাদাংয়ো।2ই চিঠিহা কাহা কোরোন্থিতা নিওয়া সেংজাকো খ্রীষ্টিয় মন্ডলিহিং লাদাংয়ো, হাংসু খ্রীষ্ট ইশুতা আকো আপনিকো দিংঙা জিংকো মোউমি নিমমে। হেপা ইশু খ্রীষ্টকো মিং লাংবিহিং আকুহা পবিত্র বানাইমমে, এপারাং আকুহা নাবি তাংসাহিং ইশু খ্রীষ্টকোসো পবিত্র বানাইমি নিও। খ্রীষ্টহা আবিকো আসা কাবিকো প্রভুগা।3য়োংকো সেংজা আপা আসা প্রভু ইশু খ্রীষ্টকোসো নাবিহিংয়া অনুগ্রহ আসা তিমেপা জিংকো।4খ্রীষ্ট ইশুকোতা নাবিহিং সেংজাকো অনুগ্রহ পিচাওয়াকো সোতা কা পাউল সেংজাহিং হাত্রংদো গারানি তাদিংয়ো।5হাংপাতানাহা খ্রীষ্টকোতা নাবিহা তাংসা নুওয়াংতা পুপুউ জিংমি নিও। আকো সোতা নাবিকোতা য়্যইওয়া সে আসা তাংসা নুওয়াং জাংকো ছুওয়া দুংজি নিও।6এপারাং খ্রীষ্টকো বিষয়তা কাবিকো গাওয়াইহা নাবিকোতা প্রমাণ জিংমি নিও:7তাকি নাবিহা কাবিকো প্রভু ইশু খ্রীষ্টকো ন্যাতা খুইমসা য়ুংনুওয়া নাবিহিংয়া লাংবেকো ঙেরোংকোরে অভাব মাজিংকো।8কাবিকো প্রভু ইশু খ্রীষ্ট লেনুকো দিনতাহা নাবিহা দোষ মাতাকো তামসা আকুহা নাবিহিংয়া নোইস্যা চোইপা সাডুংপা জোরোওয়া।9কাং, সেংজাকো তোইতাহা দেংকো ছুরোওয়া। আকুরাং আপনিকো চেংওয়া কাবিকো প্রভু ইশু খ্রীষ্টহিংপা সংঙ্গতিতা য়ুংকো নাবিহিংয়া মোউমগা।10ও ডুওয়া এবাই আসা হুম্রিবাই, প্রভু ইশু খ্রীষ্টকো মিংতা কা নাবিহিংয়া জাংচারোওয়া, নাবিহা ইচো জিং, নাবিকো প্যাকোতা স্যাসুমঘ্যইকো, নাবিহা ইচো তুংসিং, ইচো নোচেং জিং।11হাংপাতানাহা কুং ডুওয়া এবাই আসা হুম্রিবাই, নাবিকো প্যাকোতা স্যাসুওয়া নিও তাওয়া নুওয়াংহা ক্লোয়েকো সাকো দিংঙাবিকোসো কাহিং দেরেং জাংমি নিও।12কুং হিংওয়া নুওয়াংহা ইরাংগা, নাবিকো প্যাকোতা লেরাহা “পাউলকোগা”, এপারাং লেরাহা “অপোলোসকোগা”, লেরাহা “পত্রসকোগা”, আসা লেরাহা “খ্রীষ্টকোগা” তামসা জাংচাংমত্যাহ্যা।13খ্রীষ্টহা চোচোনোনোপা জিংচপুমি নিংগা? মেনা পাউলহা নাবিকো সোতা ক্রুসতা সিংগা? আসা নাবিহা পাউলকো মিংতা বাপ্তিস্মা লাংগা? য়াংবিহা গেমি নিও এপাহা মাজিংতো।14কা সেংজাহিং গারানি তামসা জাংরোওয়া, হাংপাতানাহা কাহা নাবিকো প্যাকোতাহা ক্রিসফস আসা গায়সহিং ল্যামসা লেরা হাংসুহিংনে বাপ্তিস্মা মিচায়াংতো।15আকো সোতা কুং মিংতা বাপ্তিস্মা জিংমি নিও তাওয়া নাবিহা হাংসুরে জাংচা মামুংরোওয়া।16ওই, কাহা স্তিফানকো সাকো দিংঙাবিহিংনে বাপ্তিস্মা পিচামি নিও। ই ল্যামসা কাহা হাংসুহিংনে বাপ্তিস্মা পিচামবেপা মাজিংতো।17খ্রীষ্টহা কাহিংয়া বাপ্তিস্মা পিচাকো মোকো, আদো এনতাওয়া দেরেং হিংপাকো নিংপুমগা। টেরবো টেরবো নুওয়াং য়্যইমসা মোকো, মোকোনাহা খ্রীষ্টকো ক্রুসকো সেহা হাইরে মোকোমবেপা জিংপুরোওয়া।18দাংপুমবিকো সোতাহা ক্রুসকো নুওয়াংহা তোউজি নুওয়াং বেপাগা, আদো য়াংবি উদ্ধার মুংওয়াবিকো সোতাহা ইসোহা সেংজাকো সেহিং তিংপামগা।19ইকো বিষয়তা তাংজিকো হিগারে এপা জাংমগা,“কা জ্ঞান নিওয়া দিংঙাবিকো জ্ঞানহিংয়া দাংপারোওয়া,আসা চালাক জোওয়া দিংঙাবিকো চালাকিহিংয়া হাইরে মাতুপা জোপুরোওয়া।”20দুংজি নিওয়া দিংঙাহা হাংতা নিংগা? তাংজিকো উটকেওয়াহা হাংতা নিংগা? ই সময়কো য়্যই-জাংসুওয়াবিহা হাংতা নিংগা? সেংজাহা ই বাসিমতিকো দুংজিহিংয়া তোউজি মাবানাইংগাসা?21হাংপাতানাহা দিংঙাবিহা বাসিমতিকো দুংজিসো সেংজাহিং মানাইকো, আদো দিংঙাবিকো ব্যর্থসো নোওয়া এনতাওয়া দেরেংসো সেংজাহিং নাইকো ছুকো তামসা আকুহা নির্ণয় জোমি নিও।22য়হুদিবিহা চিহ্ন য়াচাংমগা আসা দোসরা জ্যাকো দিংঙাবিহা দুংজি মোওয়াতা নিও।23আদো কাবিহা ক্রুসতা থ্যইচপুওয়া খ্রীষ্টকো দেরেং হিংপামগা, হানি য়হুদিবিকো সোতা বাধা আসা দোসরা জ্যাবিকো সোতাহা তোউজি নুওয়াং নিমমে,24আদো সেংজাকো মোউওয়াবিকো সোতাহা য়হুদিবি জিংদো, দোসরা জ্যাকো দিংঙাবি জিংদো, খ্রীষ্টরাং সেংজাকো সে আসা সেংজাকো দুংজিগা।25হাংপাতানাহা সেংজাকো তোউজিরাং দিংঙাবিকো দুংজিরোমা সিওপা নিও, আসা সেংজাকো কমজোররাং দিংঙাবিকো সেরোমা সাডুংপা নিও।26এপারাং ও ডুওয়া এবাই আসা হুম্রিবাই, সেংজাহা নাবিহিং মোউনুওয়া নাবিহা হেপা নিমগা? আকু এনতাপা নো। বাসিমতিহিংপা নোমসা কাংনুহা নাবিকো প্যাকোতাহা সিওপা দুংজি মাতামগা, সিওপা সে নিওয়া মাতামগা, সিওপা পুপুউ মাতামগা।27আদো সেংজাহা জ্ঞানী নিও তামসা পুংটা জোমবিহিং লেফেপাকো সোতা বাসিমতিকো দুংজি মাতামবিহিং জেংয়ে, আসা সে নিমবিহিং লেফেপাকো সোতা সেংজাহা বাসিমতিকো সে মাতাওয়া দিংঙাবিহিং জেংয়ে।28“কারাংগা” তামসা জাংমবিহিং লেফেপাকো সোতা বাসিমতিকো আপেচওয়া আসা হাইরে মোকো তাওয়াবিহিং আসা কাম মালাগেওয়াবিহিং সেংজাহা জেংয়ে।29ইহা আপনিকো নাগাইতা হাংসুরে পুংটা জোকো মোমুংকো তামসারাং সেংজাহা এপা জোমগা।30সেংজাহা নাবিহিংয়া ইশু খ্রীষ্টহিংপা ইচো বানাইমি নিও। আকো কামসোরাং খ্রীষ্টহা য়োংকো দুংজি জিংমি নিও। য়াংবিহা খ্রীষ্টকোসো সেংজাকো নাগাইতা এনতাপা জিংকো ছুরোওয়া। য়াংবিহা সেংজাকো পবিত্র আসা ছুটকারা মুংওয়া দিংঙা জিংমগা।31আকো সোতা তাংজিকো হিগাতা জাংমি নিও, “হাংসু পুংটা জো, আকুহা প্রভুকো জোওয়া কামবিতারাং পুংটা জোকো।”
The Seed Company