প্রেরিত28
1এপারাং বাচেমসা আরিতা দেয়োংনুওয়া আকু বোইদাকো মিংহা মাল্টা গুং তাওয়া কাবিহা সিদা চ্যইয়ে।2আকো দিংঙাবিহা তাংসা এনতামুং। আত্রংহা ওয়্যাতি ওয়্যাদাংওয়া আসা চিকিংওয়াকো সোতা আবিহা মেহ লারাইপামসা কাবিহিং মেয়াংচাকো মোউয়ে।3পাউলহা ইব্যাই সেংগে য়োমসা মেতা ওয়্যানুওয়া ইপু পুইয়াহা মেকো লোউচাওয়াকো সোতা আকো খুইতা মেইরোইপুয়ে।4পাউলকো খুইতা এপা পুইয়া মেরোইওয়া তিংমসা আকো দিংঙাবিহা এপা জাংসুয়ে, “ই দিংঙাহা দিংঙাহিং স্যাওয়া চুইদো চুইরোওয়া। ঝাহাদিসো নোমসারে চোইসুংহা ইহিংয়া বাচেকো মিচারগুং।”5আদো পাউলহা আপনিকো খুই য়িনুওয়া পুইয়াহা মেতা হুইচায়ে। আকুহা পাউলহিংয়া হাইরে মোজোতো।6আকো দিংঙাবিহা পাউলহিংয়া আম্যই নোইতাহা ইহা পুইয়াকো লিংসো বুপুমসা সিপকোদোওয়া তামসা নোদিংমি। আদো নোইতা চোইপা আকুহিংয়া হাইরে মাজিংতো। ই তিংমসা আবিকো নোচেংহা দোসরা জিংপে আসা আআংপেপেপা জিংপুমসা জাংয়ে, “ইহা চোইসুং গুং।”7আকু জায়গাকো আবেইতাহা মাটা পেব্লিয়োসকো সা আসা মোংটো-কেটোবিহা তোংনাংরাং নিমি। পেব্লিয়োসহা কাবিহিংয়া আকো সাতা পুরায়ে, আসা কাবিহা সাসুংয়ুং চোইপা আকো সাতা আর্সিং জিংমসা য়ুংয়ে।8আত্রংহা পেব্লিয়োসকো আপাহিংয়া হাইমসা স্যান্যা হাদিংমি। এপা জিংনুওয়া পাউলহা পেব্লিয়োসকো আপাহিং এওয়া সিরিতা হোয়ে আসা পাচাইমসা আপনিকো খুইহা হাইওয়াকো তোইতা ওইনুওয়া আকো স্যান্যা হ্যাওয়াহা সাংচাপুয়ে।9এপা সাংচাপুওয়া সিদা চ্যইমসা আকু বোইদাতা নিওয়া তাংসা হাইমবিহা লেহে আসা পাউলহা আবিহিংয়া সাংপায়ে।10আবিহা কাবিহিং জেজেংপা জোমসা উইসে হাইক্রি পিচায়ে আসা হ্যাদাংনুওয়া ন্যাতাতা ঘ্যইওয়া সোংসাবিরে ওয়্যাপিয়ে।11কাবিহা তারি সুংরিকো নোইতা জুমলেহা চোইসুং তাওয়াতা তিকো জাহাজতা বাইমসা মাল্টা বোইদাহিংয়া হুইতেমসা হোপুয়ে। আকু জাহাজহা আলেক জান্দ্রিয়া শহরসো লেমসা সেইগু চিকিংদিংনুওয়া মাল্টা বোইদাতারাং খুইদিংমকো গুং।12কাবিহা সুরাকুসাই তাওয়া শহরতা দেকামসা আউতা সাসুংয়ুং চোইপা য়ুংয়ে।13আউসো হ্যাপুনতেনুওয়া কাবিহা রেগিয়োন শহরতা দেকায়ে। আকো জুকুংহা মাংসো বিংঙা হায়ে আসা ই ইহা কাবিহা পতিয়োলি তাওয়া শহরতা দেয়োংয়ে।14আউতা কাবিহা প্রভু ইশুকো তোইতা দেংওয়া আপু এবিহিং দোসুয়ে। আবিহা কাবিহিংয়া হাতি ইয়্যা চোইপা য়ুংপি তামসা জাংচায়ে। কাবিহা আবিহিংপা হাতি ইয়্যা চোইপা য়ুংপুনতেনুকো নোইতা রোম শহরতা হোওয়া ন্যাতাসো হোয়ে।15প্রভু ইশুকো তোইতা রোমতা দেংওয়াবিহা কাবি দেপাদাংয়ে তাওয়া সিদা চ্যইমসা ইচো নিহসো তিনপাতি তাওয়া হাতি চোইপা, আসা লেরাহা অপিয়োস তাওয়া হাতি চোইপা কাবিহিং দোসপাকো লেহে। আবিহিং তিংতানি পাউলহা য়াংতামসা সেংজাহিং গারানি তাহে।16রোমতা দেয়োংতেনুওয়া ইচো সিপাইহিং কাংকো এমসা পাউলহিংয়া আপনিকো য়ুংওয়াতা য়ুংকো পিচায়ে।17সাসুংয়ুংকো নোইতা পাউলহা রোমতা য়ুংওয়া য়হুদি মাটাবিহিং মোউয়ে। আবিহা আউতা জোংসুনুওয়া পাউলহা জাংয়ে, “আপু এবাই, কাহা য়োংকো জ্যা আসা য়োংকো আটা আজাবিসো ওয়াংওয়া লোচ্যইপ্যচ্যইহিং হাইরে মোজোপারে আবিহা কাহিং য়রুশালেমতা প্যইমসা রোমিবিকো খুইতা স্যইপুয়ে।18রোমিকো মাটা দিংঙাবিহা কাহিং উইপুনতেনুওয়া ল্যাপিকো কেংয়ে, হাংপাতানাহা কাহিং স্যানেকো বেপাহা কুং তোইতাহা রোমি মাটাবিহা হাইরে দোষ মোদোতো।19আদো য়হুদি মাটাবিহা বিরোধ জোমসা কাহিং মাল্যাওয়াকো সোতা কাহা রোমি টেবো জাইপুকোতা মাজাংকোরে মোতুতো। আদো কুং য়হুদি আপু এবিকো তোইতা মেংতাপা দোষ তিংপানেওয়া হাইরে নুওয়াং মোতো।20ই নুওয়াং কোইপাকো আসা নাবিহিংপা দোসপাকো সোতা কাহা নাবিহিংয়া ইতা মোউমগা। কাবি ইস্রাইলবিকো আশা জোচাওয়া মুক্তি পিচাওয়া জাইপুকো সোতা কা এপা সাংগ্লিসো জিংচপুমগা।”21ই হিংমসা আবিহা জাংয়ে, “নাকো তোইতা কাবিহা য়হুদিয়া জায়গাকো হাইরে চিঠিবি মোমুংতো আসা লেরা আপু এবি ওয়াংমসা নাকো তোইতা মাতুপা মেংতাপা নুওয়াংবি য়্যইওয়া কাবিহিংয়া হিংপাকোরে মাহিংপায়াংতো।22আদো কাবিহা নাকো নোওয়া হাংমে, নাতিহিংপারাং হিংকো কেংরোওয়া, হাংপাতানাহা নাকো ইশুকো নুনুই হুইওয়া পারাকো নাগাইতাহা মোতুওয়া নুওয়াংবিহা ইতা উতা জিংদিংওয়া কাবি গেমি নিও।”23আকো নোইতা আবিহা পাউলকো নুওয়াং হিংকো দিনবি জেংয়ে। জেংওয়া দিনতাহা নাগাইকোরোমা উইসে য়হুদিবিহা জোংসুমসা পাউলকো য়ুংওয়াতা লেহে। আত্রংকো দিন পাউলহা হাপকোংসো জিরুং চোইপা সেংজাকো রাজ্যকো নুওয়াংবি ঝিপায়ে। লিংপাংকো হিগাতাহা মোসা আসা অগমবক্তাবিকো লাওয়া চুংমসা আকুহা ইশুকো তোইতা কোইপামসা আবিহিং দেংওয়াতা পারাকো কেংয়ে।24লেরাহা আকো নুওয়াং কোইমসা দেংসুয়ে। আদো লেরাহা মাদেংতো।25আপনি আপনিকো নুওয়াং মোতুসুমসা আবিহা আউসো হাপুদাংয়ে। আত্রং পাউলহা আবিহিংয়া জাংয়ে, “পবিত্র লাংবেহা নাবিকো আটা আজাবিহিং জাংওয়া নুওয়াংহা আজিপ্পারাং নিও, হাংপাতানাহা এশাইয়া অগমবক্তাহা এপা জাংমি নিও!26‘ই দিংঙাবিকোতা হোমসা জাং, হিংকোহা আবিহা হিংমগা, আদো মোকোইমগা, ন্যইকোহা ন্যইমগা, আদো আবিহা মাতিংমগা!27হাংপাতানাহা ই দিংঙাবিকো তুংসিংহা লুংটুই বেপা নিও, ইবিকো নানুংবিহা বান্ডাইপা জিংপুনতেয়ো আসা ইবিহা আপনিকো মিচো তুংমি নিও, মেনাহা ইবিহা তিংকোগা, হিংমসা তুংসিংসো কোইকোগা। আসা আবিহা আপনিকো তুংসিংহিংয়া কুংতা লাপোংকোগা। আসা কা আবিহিং সাংপাকোগা।’”28নোইস্যাতা পাউলহা জাংয়ে, “আকো সোতা নেহা কা নাবিহিংয়া জাংরোওয়া, সেংজাকো মুক্তিকো দেরেং আকুহা দোসরা জ্যাবিকোতা নিংপুমি নিও, আসা আবিহা হিংরোওয়া।”29[পাউল ই নুওয়াং জাংপুনতেনুকো নোইতাহা য়হুদিবিহা ইচোকো তোইতা ইচো স্যাসপুমসা আউসো হোপুয়ে।] 30পাউলহা ন্যাস্যা পিচামসা য়ুংওয়া আকু সাতারাং লো নিহনিং চোইপা য়ুংয়ে। আকুহা আপনিহিং দোসপাকো ওয়াংওয়া তাংসাহিং লেই তাচাংমি।31আকুহা মাচ্ছুংপা সেংজাকো রাজ্যকো দেরেং হিংপামসা প্রভু ইশু খ্রীষ্টকো নুওয়াংবি ঝিপাচাংমি। আসা হাংসুরে আকুহিংয়া মোয়্যইগে তামসা মোয়োইমি।
The Seed Company