Koreeg nà moog‑e 47 पढ़ें

Koreeg nà moog‑e47

¹Yusifə e waj é Firuun iiŋ e bii'ĩnə: “Ä baawan èg dä awleege èg jega iyəgin kay nà bilə̌níigǐ tog èg miəgi wə̀y é Kanaana. Bare egan é Jasaan.”²E god awleege asaman ẽ əddə̂ní dega é Firuun‑muu.³Firuun e tisiigə: “Ɲiin ug ɲil é kazaamg‑e?” Eg pəd kor Firuunən: “Ag, dhəmg unugu, kasag é lewdaga ar äg baawaad‑e.”⁴Aneenda eg bee: “Ag lii'ǎ adda te é yaag é kora kun nəəmǐ əndəg é Kanaan‑e. Wag man təzí tu ná dhəmg unugu ẽ nəəmdigí lewdage wa‑e. Bare joo bii aga dhəmg unugu ã adda é Jasaan.”

⁵Firuun e bee Yusifən: “Ö baawan èg dö awleege əzzǐ ũnu.⁶Aldan ná é Məsir‑i een dö aas. 'Əwdə ö baawan èg dö awleeg é aldan gara weed‑e. Əwdiigə é Jasaan. Ö awleeg nà biig egan tu nà ɲel miəg ẽ 'nəəmdəgî‑i û təliigə ẽ 'nəəmdə lewdag ənəgə.”⁷Aneenda Yusif e baga faan Firuunən. Yagob e əild Firuun iiŋ.⁸Firuun e tisə Yagob: “U bil duugu isi?”⁹Yagob e bee: “Duug ənəg nà assé wəəndi taa 130. Taǎn faraj andasa é dhusu, war caggsa nà dä baawaad nà əssíigǐ wəngi wa.”¹⁰Yagob e əild Firuun iiŋ e wəjí tui dë muu.

¹¹Aneenda Yusif e əwd faan èg awleegene e gəfĩgən aldan é gara weeda é gaam Ramsiis ar ná Firuun kursǐ ĩnə'ii‑ni.¹²Yusif e gaf namsa faan èg awleegene èg jag é maag é faa iinini kay ar ná təzíigǐ man èg jaalge inəgini.

¹³Jag nà é aldan é Kanaan èg jag nà é aldan é Məsiri e dàfê kuniigə eg koofar é kora jeem təzǐ tu wa‑e.¹⁴Yusif e mud jirsəg kay nà é Məsir‑i èg nà é Kanaan‑e nà mərə̌nǐ jerg jagan‑e, e ədə̌ní dega é wee é Firuunu ná məlǐ kursug‑i.¹⁵É gara jirsəg é jag nà é Məsir‑i o é Kanaan‑e cissíigǐ‑i, Məsiriig kay e àdaga é Yusif iiŋ eg bii'ĩnə: “Gəfə̃gən namas, ɲiin u diní aga ag ɲamǎ ã tirdǎ‑e? Jirsəg əyəgə cessaga daga.”¹⁶Gəl Yusif e bii'ĩgən: “Jirsəg uyugu e cessê‑e bəgdú lewdag uyugu. Â misũguniigə é namees.”¹⁷Aneenda e kàjaga lewdag iyəgin Yusifən mosoreeg, əəriig, miəg, tog èg cooleeg. Yusif e middí ĩgən é namees. É duud na Yusifə e mag ẽ middí ĩgən namees é lewdag iyəgin.

¹⁸É gara duud na kuyjǐ‑i, duud ná leeŋ deeɲ‑e e bèe: “Kor man tu ná ag dərə̂n tad seen əyən‑i wa, jirsəg əyəg ceessa. Kaaŋa əyən ná ag belân‑e een dö aas. Jeem een tu ná farsa ag gawda seen əyən‑i wa, äg ŋəlgə jo farsé èg gafag əyəg.¹⁹Ɲii agâ tirá dö muu, gafag əyəg ẽ nadda fuul? Maaraaga èg gafag əyəgi û gəfə̃gən namees ã adda dhəmgi Firuunən èg gafag əyəg ẽ adda Firuunən. Gəfə̃gən foydag ã tumdu tad gar ã dedda wag ã tirdá wa, ar gafag e nəgí é tay wa.”

²⁰Aneenda Yusif e maar gafag nà é Məsir‑i kay Firuunən. Məsiriigə e mə̀rd gafag iyəgin é kora kun nəəmsǐ ega əndəg‑i. Aldan e ad ná é Firuun‑i.²¹Yusif e 'əd jag kay dhəmgi é wageeg kay nà é Məsirə.²²Gəl maarsé gafag é seenaag nà jisə hayg‑e wa, é kora Firuun gəfə̌nǐ ĩgən namees‑e, enna 'mərsíigǐ gafag iyəgi wa‑e.

²³Yusif e bee jagan: “Bare a maarsa ogo èg alda uyuni Firuunən, wərdə foydag nee ũ tumdiigə tad.²⁴Gəl ug sugsû jeg‑e ug lədə iilgə garg asaman ug wərdə fand ná taman‑e ug gəwdi Firuunən, ug wərdə fəndəg nà yəəs‑i. Ug guddú biig foydage ũ tumdu tad biig ũ nəəmdə èg jaalge uyugi.”²⁵Eg bee: “U 'bənsaaga! É kora u rəgsǐ èg dage, aga aa dhəmgi Firuunən.”

²⁶Koren Yusifə e ədi gəzimdi é aldan ná buînə é Məsir‑i, koren bur kaamân ləŋ bare, fand ná taman é nà asaman‑e gafâná Firuunən. Gafag é seenaaga nà jisə hayg‑en jo gafǎná wa‑e.

²⁷Isrəiliigə assé é Məsir é gaam Jasaan. Eg jis kaaŋa eg koo eg ad eg talg.²⁸Yagob assé é Məsirə duugu 17. Duug é Yagob nà əssǐ taǎn 147.²⁹É gara lijjǐ teerma ẽ tirrǐ‑i, e tarb é jaa iini Yusifə e bii'ĩnə: “A naa gəmsəgə cuwəd gar uun‑i billə ö aas tad ar û durí aan é Məsir wa.³⁰A tirsî‑i u wər aan é Məsirə u dur aan èg dä baawaade.” Yusif e bee: “Â jis ar ná u kursə̌nǐ‑i.”³¹Yagob e bii'ĩnə: “Billə ö aas tad.” Gəl Yusifə e billĩnə ë aas tad. Isrəil e maa Tela e tal ë muun tad aŋar ool dë maade.

Pioneer Bible Translators

https://app.library.bible/content/a230cccfbf4362be