1 BaKolinte11
1Ikwejejelani imi, sezwandilo kwekwejela Kristo.2Ndinomukuja nokuti mondikumbulukwa muzwinhu zwose akale mulondota indayijo sezwandakamulayija.3Ndoda kuti muwhisise kuti unsholo wonhulume wose ndiKristo, unsholo wonhukaji wose unhulume, nonsholo waKristo ndiMwali.4Unhulume upi azwe unonamata kana kupolofita ekafuka unsholo uwe unolelupisa unsholo uwe,5koga unhukaji upi azwe unonamata kana kupolofita nonsholo usilofukwa unolelupisa unsholo uwe, yezwi zwinokwelana sokuti unsholo uwe uloguswa.6Kana unhukaji esinosunga itaulu munsholo uwe, ngekele isusu lilye, koga kana zwipisa ishoni kuti unhukaji ekelwe kana eguswe, ngesunge itaulu.7Unhulume aatokwelela kufuka unsholo uwe, nokuti ndiye chitojaniso nolukujo lwaMwali, koga unhukaji lukujo lwonhulume.8Nokuti unhulume aajakabumbwa eva kunhukaji, koga unhukaji wakava kunhulume.9Unhulume aajakabumbilwa unhukaji, koga unhukaji wakabumbilwa unhulume.10Nechisoko yechi akale nokuda kwengilozi unhukaji ulokwelela kumbala itaulu munsholo uwe sechitondejelo chokuba pasi pamasimba.11Kojoba kwakadalo, kunaTezi unhukaji aajilosungunuka kunhulume kana unhulume kunhukaji,12sezwo unhukaji wakabumbwa eva kunhulume, feno unhulume unozwalwa nonhukaji, asi zwinhu zwose zwinova kuna Mwali.13Motini imwi nokwenu, zwilokwelela na kuti unhukaji enamate kunaMwali esilofuka unsholo uwe?14Lubumbo alutotilayija na kuti unhulume angoba namasusu malefu yezwi zwinoundeleja chimilo,15koga unhukaji kana elinesusu ilefu ishiyo lilye? Nokuti isusu lilye ilefu wakapilwa kuti chibe chifukiso chiche.16Kana unhu eli wokunyenyeja, isu kana namakubungano aMwali atitoziba umwe untilo.17Muzwilayijo zwinotobela anditomukuja, nokuti pamunoshangana amutota zwibuya koga zwinosheshemesa.18Nokuti chokutanga, pamunobungana segubungano, ndiwhile kuti pana kusowhanana pakati penu, yezwi ndozwidimbwa zwishomanana,19kunokwelela kuti kube notukapo mukati mwenu kuti kuzibikane yabo baimo muchokomende.20Pamunoshangana, achitoba chilyo chaTezi chamunolya.21Nokuti pakulya kwenu, umwe noumwe unolya madilo etangila bamwe pakulya kukwe, yezwi zwinota kuti bamwe bebenenzhala, nabamwe bekolwa.22Amuna jingumba na jokulyila nokunwila? Kana kuti molingila pasi igubungano lyaMwali akale nokuswabisa banoshayiwa? Nditini kwamuli? Ndimutunhumwije nezwi na? Pe anditozwita.23Nokuti zwandakatambula kuva kunaTezi zwilayijo zwandakamupa, kuti Tezi Kristo, nezhuba lyaakachetwa, wakatola chinkwa,24aboka, akachimedula akati, “Yoyu umbili wangu uchapilwa imwi. Itani yezwi mundikumbulukwa.”25Nenzila imwempela, pabakapeja chilayilo wakatola unkombe akati, “Yoyu unkombe, chivumilano chipya mulopa lyangu. Itani yezwi unshaji wose pamunonwa, mundikumbulukwe.”26Unshaji wose pamunolya chinkwa yechi nokunwa munkombe yoyu mopupula kufa kwaTezi ejine ebuye.27Nokudalo aani nani unolya chinkwa kana kunwa munkombe waTezi esilokwelela, unandandu wokuchinyila umbili nelopa lyaTezi.28Nokudalo, umwe noumwe ngetange kuzwishenengula, ndipo paachalya chinkwa nokunwa munkombe.29Nokuti aani nani unolya nokunwa, esinowhisisa zwombili waTezi unozwinwila untongo uwe.30Yezwi ndizwo zwimutisa kuti banji benu bebe balodemuka akale nokulwala, bamwe bakafa.31Koga ngana takazwishenengula nokwedu, atijalupiwa untongo.32Koga kana tikatongwa naTezi, tinolangwa kutila kuti tisilashwe pamwempela nenyika.33Nezwo banakwaina bangu, pamunoshangana pamwempela pakulya chilyo chaTezi, mililanani,34kana umwe wenu elinenzhala, ngeelye kunsha uwe, kutila kuti musipiwe untongo naMwali pamunoshangana. Jimwe inyaya, ndoojishinganya pandichezha.
The Word for the World International