Ruth3
1yelle as tenne nuεmiy y raεuwθ: «edj m-Hewme e yelli elHuwc d weryaz eθafeδ δiy-sen erraHeθ-em.2tay buwεez ensiyb-enne elli tkaneδ d tixeddamin-es δ yδerre timzin ugg ennar δeggiyδ,3essiyreδ elHelt-em tfewHeδ imen-em teHfleδ tegzeδ y wennar, emme et-tedj-ec em-yezer kan max e ykemmel eče d weswe.4εus meni δ yenεes, max e yenεes, eδef tεerr-iyδ ikreεan-es tettekk-iyδ. nette δ m-yen δmette δ θegeδ.»5ter fell-es raεuwθ: «elli tenn-it elkul δ θege.»6teggez raεuwθ y wennar teg emmax i s-θenne tewessarθ-es nuεmiy.7max i yeče buwεez yesw yerθaH yuseδ δ yenεes g eccafeθ n elkuδs n timzin, taδef fell-es raεuwθ txettel tεerra-yes ikreεan-es tettekke.8ugg ezyen niyD yeθHeyyer eryaz yebren, yaf temeTTuwθ tettekke yetwali ikreεan-es.9yenceδ-t: «δ wiyn cem?» ter fell-es: «texeddemt-ex raεuwθ, er eTTerf nedbec-ex felle εlexaTer cex δ ensiyb-iw elli eθgeddeδ ey-θewyeδ neč d elqeεεeθ-enne.»10yenne-s: «e ybarex δiy-m rebbi e yelli. elbhaweθe exθer n elli θegi-t y nuεmiy tewessarθ-em, εlexaTer el-tHewm-ec eryaz seg elεzerre, δ ifqiyren ziyγ δ imuγniyyen.11w ture eθ-ukδe-c e yelli, elli texseδ eθege. midden n temuwreθ-iw elkul essenen elli cem temeTTuwθ timeθrebbiθ.12neč mbelHeq eqreb-γem egget, emme yelle Hed eqerb-iw.13enεes iDe, w talji e nerqeb kan yeqqel e yelhe ess-im, kan yeqqel rahu δ elxiyr, w kan el-yeqqiyl-c tay neč emeθjulle s rebbi elli yedder δ elhiyγ ess-im. etekke el talji.»14tettekke yetwali ikreεan-es el talji, emme tekker qebl e yali as εlexaTer buwεez yenne-yes: «eθedjeδ Hette Hed eyessen elli temeTTuwθ tuseδ y wennar.»15yenne-s: «uwc-et timelHefθ-em, teTTef-t seg ecwafi-s.» teTTef-t, ykeyla-s sette δ elkiyleθ timzin, yqam fell-es, yaδef temuwreθ.16teseδ raεuwθ y tewessarθ-es, tenc-et: «δme eySar e yelli?» teHka-yes elli yegeya-s-θ eryaz elkul.17tenn-es: «yuca-iyδ setteye n elkiyleθ n timzin εlexaTer yenne-y-iyδ: eθ-eδwel-ec y tewessarθ-em ettelfareγθ.»18tenn-es tewessarθ-es: «edj enraje nerqeb max δ ykemmel elHkayeθe, εlexaTer eryaz el-yetterθaH kan eθ-ykemmel asse.»
Chutney Media Agency Limited