Leviuüa1
1Akat khe taklowp taklangra te lak hownia Mosi kowi CHAKRAMANG hawah khai. Now Israeluüa kowi natek pe kownkow tek pe mih, “Enni pungmadawng kowi CHAKRAMANG kowi ap uanh kown nau mih che uowi khai hanow uang pawla tawncher büa diah. Chia chepaw, ruapur chepaw, rua chepaw uang pawla büa diah.3“Lowra maru tikah mih uanap che chia hown chang kown nau khai hanow nami chia dow ala naown kown takla, now aser auowk paw naia uowi kown nadowi. Aia luk kowi ang CHAKRAMANG nasak-ihla kownkow nami chiala dow taklowp taklangra te plawt re-e aia nauang pawla kown.4Now tikah mih uanap nachangla kownkow uang pawla chiala mih maru mih nami chiala lu kowi aia kowh rut natangah kown. Nahanow aia kowh angak nalawtta pe kownkow nami uanap mih CHAKRAMANG napaw pe kown.5Now nami chiala dow taklowp taklangra te plawt re-e CHAKRAMANG pur kowi aia nangenah kown. Now uamowuüa dow nami chiala vi napawla hanow taklowp taklangra te plawt re-e kowh phuchuara kowi tavir lut nakrawi thetah kown.6Nami tikah mih uanap chang müa chiala dow aia nakleu pe apik hanow naleah kown.7Now uamowuüa mih phuchuara luk kowi nachang pe maih hanow nabawk pe sawp kown.8Nami kung kowi dow phuchuara luk kowi kowh lün pluplup mih sawp luk kowi nami chiala kowh alu, akhawk, akawlakchak, asau hai aleia nanawmah kown. Tawkche akhawk hai akawlakchak maten dow narik sauah kown takla. Naiawng hai chiala papum nga mih phuchuara kowi uamow natikta bowk kown. Nami dow chakkham uanap chekhai. Nami uanap nam hown dow CHAKRAMANG awmrawm reng chekhai.10“Ruapur hown chepaw, rua hown chepaw tikah mih uanap che enni chang kown nau khai hanow nami dow ala naown kown takla, now aser auowk paw naia uowi kown nadowi.11Tawncher maten dow phuchuara tawngphak prakowi napawla now CHAKRAMANG pur kowi aia nangenah kown. Nami tawncher vi dow uamowuüa napawla now phuchuara kowi tavir lut nakrawi thetah kown.12Tawncher maten dow aia naleah hanow uamowuüa kowi nauang peah kown. Now asau hai alu hown aleia dow phuchuara luk kowi kowh lün pluplup mih sawp luk kowi uamow nanawmah kown.13Akhawk hai akawlakchak maten dow uang ap miia nasauah hanow uamowuüa kowi nauang peah kown, now naiawngün hailawm tawncher papum mih nga dow phuchuara kowi uamowuüa natikta bowk kown. Nami dow chakkham uanap chekhai. Nami uanap nam hown dow CHAKRAMANG awmrawm reng chekhai.14“CHAKRAMANG vüi tikah mih uanap che uakling hown enni chang kown nau khai hanow kaurawng uatur chepaw, kimtawn uatur chepaw enni nauang pawla kown takla.15Naiawngün uatur dow uamow nahawt pawah hanow phuchuara kowi napawla kown. Nami uatur kowi dow naraita pe angawng hanow phuchuara ret kowi nachüng pe avi kown. Nami kung kowi dow nami uatur mih phuchuara kowi nanawmta bowk kown.16Nami uatur daw hai apawi maten dow phuchuara satlawt pra kowh plawi kuakra kowi uamow nacham kuakah kown.17Nami uatur dow alap pre buk kowi nadowkah hanow tapra kuak mowr tarai dowi krowngchow nathükah kown. Nami kung kowi dow nami uakling mih phuchuara luk kowi kowh lün pluplup mih maih kowi uamow nanawmah kown. Nami dow chakkham uanap chekhai. Nami uanap nam hown dow CHAKRAMANG awmrawm reng chekhai.
The Seed Company