Uown Lawt40
1Nami kung kowi CHAKRAMANG tek pe Mosi mih,2“Taklowp taklangra te dow ning sar la sar ni sar khe en nachangah kown.3Now sangbowk laitawm tawkpla dow nami taklowp taklangra te lak kowi en natowah hanow uaniang hown en natungah kown.4Chimsaima mih kawm towk rah pawitang paw taklowp taklangra te lak kowi en nauang towah hanow nami luk kowi kowh natowah kown mih uanh srui klangiungma en natowah kown. Nami kung kowi dow maibu towngh en nauang pawla hanow maibu maten en natow pe kown.5Now sangbowk laitawm tawkpla pur re-e uaniang uat kowi dow kuh hown kowh maikhük towk müa phuchuara en natowah kown, now taklowp taklangra te plawt kowi dow en naiang pe uaniang kown.6Tikah mih uanap chang müa phuchuara dow taklowp taklangra te plawt hownia alak sangrumchow re-e en natowah kown.7Nami phuchuara hai taklowp taklangra te takra kowi dow en natow pe biatum lowk hanow en natow pe tui kown.8Taklowp taklangra te viadawng dow uaniang hown tapat lut en nakrawi pingah kown. Now viadawng plawt kowi paw en naiang pe uaniang kown.9“Nami kung kowi dow en napaw pe nümnap müa sau hanow nami sau dow taklowp taklangra te kowi hai nakowi kowh uowi mih uanh maten kowi en nakrawi phawkah kown; naiawng hai naiawngün dow ang vüi kowi en nalang towah kown. Nahanow naiawngün uanh dow chimsaima naown kown towbowt.10Nami klen kowi puh bia aikam hailawm tikah mih uanap chang müa phuchuara kowi paw nümnap müa sau en nakrawi phawk pe hanow ang vüi kowi en nalang kraah kown. Nahanow naiawngün dow lang chim lang sai mih uanh naown kown towbowt.11Biatum hai biatum chowm müa kowi paw en naphawk pe nümnap müa sau hanow ang vüi kowi en nalang kraah kown.12“Nami kung kowi dow Arawn hai achapauüa kowi taklowp taklangra te plawt re-e en nauang pawla hanow tui hown en nape tasauah kown.13Now Arawn kowi dow chimsaima mih tawnguat en nakhup pe hanow en nanümnapah kown, now ang vüi kowi en nalang kraah kown. Nahanow aia dow naia chang uamow lup kown towbowt.14Arawn kowh chapauüa kowi paw uang pawla now uamow tawnguat en nakhup pe kown.15Amatni kowi paw a-pa Arawn kowi iawng en nanümnapah kown. Nahanow amatni paw naia chang uamow lup kown towbowt. Naiawng nümnapah mih hownia kowh kaah mih uamow rah dow chowngchowng saksakma amatni kowh krungchakuüa tut-e nauowi reng kown,” pakhai.16Now Mosi dow aia kowi kowh CHAKRAMANG peah ana mih powmpowm lup maten changah khai.17Aigupta pren hownia uang lawt büah mih paning chur kowh pre ning uang tauown mih ning sar la sar ni sar khe taklowp taklangra te thawp büah khai bowt. Naiawngün lup maten dow Mosi tek iawng thawpah büah khai.18Aia dow phen vüi rik tow pe akhawk rup rah khai. Nami kung kowi dow aping müa phen iu rup pe khai, now akep müa lawng sowr pe khai. Nami kung kowi dow uaniang iang müa achüng phük pe khai.19Nami kung kowi dow CHAKRAMANG ana pek iawng taklowp taklangra te mih uan powng hown aia lukah khai. Now nami luk kowi paw aia plan lukah sum lüp khai.20Mosi dow sangbowk laitawm huapher pre buk mih pawah hanow sangbowk laitawm tawkpla lak kowi towah khai. Nami kung kowi dow akawtlawng ün sowr pe khai, now angak khu müa aküm dow sangbowk laitawm tawkpla luk kowi towah khai.21Nami kung kowi dow CHAKRAMANG ana pek iawng sangbowk laitawm tawkpla mih taklowp taklangra te lak kowi kowtowah now uaniang hown tungah khai.22Now aia dow pawitang paw taklowp taklangra te lak kowi uang pawla now uaniang ria re-e tawngphak prakowi towah khai.23CHAKRAMANG ana pek iawng CHAKRAMANG pur kowi kowh pawitang kowi dow chimsaima mih kawm klangiungma tow pe khai.24Maibu towngh paw taklowp taklangra te lak kowi uang pawla now mrawkphak prakowi towah khai. Nami maibu towngh dow CHAKRAMANG ana pek iawng CHAKRAMANG pur kowi towkah khai.26Aia dow kuh hown kowh thawpah mih nam iungma mih maikhük towk müa phuchuara paw Lang Chimsai mih Arah kra müa uaniang uat hownia uaniang riachow kowi towah khai, now CHAKRAMANG ana pek iawng nami phuchuara luk kowi dow maikhük nam iungma mih towk pe khai.28Nami kung kowi dow taklowp taklangra te plawt kowi iang pe uaniang khai.29Now tikah mih uanap chang müa phuchuara dow taklowp taklangra te plawt re-e viadawng kowi towah khai. Nami phuchuara luk kowi dow CHAKRAMANG ana pek iawng tikah mih uanap hai kawmdi uanap uang ap pe khai.30Nami phuchuara hown taklowp taklangra te takra kowi dow tow pe biatum now nami biatum kowi nasaula rut khawk kownkow tow pe tui khai.31Nami biatum kowi kowh tui hown dow Mosi hai Arawn hown Arawn kowh chapauüa sau rut sau khawk reng chekhai.32CHAKRAMANG kowh ana pek iawng amatni dow taklowp taklangra te lak kowi kup kown khe hai phuchuara kowi kowkowi kown khe nami biatum kowi saula rut khawk reng chekhai.33Phuchuara hai taklowp taklangra te ria kowi dow tapat lut uaniang hown krawi pingah hanow thawp pe viadawng khai. Nami viadawng ping kowi paw thawp pe aplawt hanow iang pe uaniang khai. Naiawng hai Mosi dow aia kowh lup chang maten churta khai bowt.34Nami kung kowi dow uangnim uangah hanow taklowp taklangra te kowi uang tamum klum khai, now CHAKRAMANG kowh kraingra dow taklowp taklangra te kowi atekma uang uowi khai.35Naiawng rakowi taklowp taklangra te lak kowi Mosi kowia kup dowi chekhai.36Nami hownia bowt now taklowp taklangra te luk kowi kowh tamum mih uangnim prowng dowi mowr dow Israeluüa katpaw cham süt dowi chekhai.37Uangnim prowng dowi mowr dow cham süt büah dowi kowi uangnim naprowng kown mih kowi chawngah büah reng chekhai.38Tiama rawng kowi uowi mowr mih khin khe taklowp taklangra te luk kowi CHAKRAMANG kowh uangnim uang uowi mih ni-e khe Israeluüa khi reng chekhai. Iak-e paw nami uangnim dawng kowi maih uang uowi reng mih khi büah reng chekhai.
The Seed Company