ফিলিপ্পী2
1খ্রীষ্টকোতা নিওয়া নাবিকো সাদিসোহা নাবিহিংয়া হোসলা পিচাদিংগা? আকো জেজেংওয়াসোহা নাবিহিংয়া সাত্বনা পিচামি নিংগা? নাবিহা পবিত্র লাংবেকো সংঙ্গতি জোমগা? নাবিহা ইচোহা ইচোহিং জেজেংপা আসা লামতুপা জোমগা?2এপা বেনাহা কাহিং য়াংতাপাকো নাবিহা ইচো নোচেং জিংওয়া, ইচো জেজেংওয়াতা য়ুংওয়া আসা ইচো নোচেং জিং তামসা কা নাবিহিংয়া বিনতি জোচারোওয়া।3আপনিকো মেংচে ভলাই জিংওয়া আসা পুংটা জিংমসা হাইরে তিপাকো মাকেংঘ্যই, আদো নম্রতাসো ইচোহা ইচোহিং আপনিরোমা আসল তামসা নোকো জো।4নাবিহা আপনিকো ভলাই মেংচে মোকো, আদো দোসরাকো ভলাইরে কাংকো জো।5নাবিকোতা এপা জিংওয়া নোচেং নিকো, হানি খ্রীষ্ট ইশুকোতা নিমমে।6স্বরূপতা সেংজা জিংমসারে আকুহা সেংজাহিংপা দাদাপা জিংমসা য়ুংকো মেকেংতো,7আদো আকুহা ই তাংসা নুওয়াংহিং ল্যাতেমসা ডেইয়াকো রূপ ধারণ জোয়ে, অর্থাৎ দিংঙা জিংমসা কেহে।8আকুহা আপনিহিং নম্র বানাইয়ে। আসা অপরাধী ত্যাবাপা জিংমসা ক্রুসতা সিকো সোতারে আজ্ঞাকারি জিংয়ে।9আকো সোতা সেংজাহা আকুহিংয়া হাংসুরোমা তোইতা তোরোইয়ে, আসা আকুহিংয়া আকু মিং পিচায়ে, হানি মিং তাংসা মিংরোমা তোইতা নিমমে,10আকো সোতা লোডিংবাতা, বাসিমতিকো তোইতা আসা বাসিমতিকো লিতা নিওয়া তাংসা প্রাণীবিহা ইশুকো মিংতা তুরুই চুনুইনেরোওয়া,11আসা তাংসা লেবেসোহা সেংজা আপাকো মহিমাকো সোতা ইশু খ্রীষ্টহিং প্রভু তামসা স্বীকার জোনেরোওয়া।12আকো সোতা জেজেংওয়া ও ব্যারোবাই, হেপা কা নাবিহিংপা নিনু নাবিহা কুং আজ্ঞা পালন জোমমে, এপারাং কা তানাং নিনুরে নাবিহা চুসুংমসা পিপিং-দোদোউপা আপনিকো মুংক্তিকো কাম পুরা জোকো কোইচ্যাকো জো।13হাংপাতানাহা সেংজাহা নাবিকোতা কাম হাত্রংদো জিদিংমি নিও। আকুরাং নাবিহিংয়া আকো উদ্দেশ্য পুরা জোকো তুংসিং আসা সামর্থ পিচারোওয়া।14ন্যাক্যানুকুপা আসা স্যাসু-তোইংসুওয়া নুওয়াং মায়্যইপা তাংসা কাম জোপুমসা হোতু।15এপা জিংনুওয়া নাবিহা পাপি আসা মেংতাওয়া দিংঙাকো প্যাকোতা সেংজাকো দোষ মাতাওয়া চেংওয়া ত্যাবাপা নির্দোষ আসা শুদ্ধ জিংরোওয়া। নাবিহা ফুইমাহা ডিংবাহিং হাহাইপা জোমি ত্যাবাপা আবিকো প্যাকোতা হাহাইপা জিংনেরোওয়া।16সাদিকো য়্যইদিহিং সাডুংপা প্যইমসা এ্যহ, এপামি জোনাহা কা ব্যর্থতা মাঠুইতো, আসা ব্যর্থতা মোকোইচ্যাতো তামসা খ্রীষ্ট লেনুকো দিনতাহা কা গর্ব জোকো ছুরোওয়া।17নাবিকো দেংওয়াকো বলিদানকো তোইতা কুংরে য়ুতিকো বলিদান স্বরূপ আপনিহিং স্যইনেদো, কা গাগ্রুপা নিও আসা ই গাগ্রুওয়াতা নাবিরে তাংসা কাহিংপা সহভাগী জিং।18এপা জোমসারাং নাবিরে য়াংতানেরোওয়া আসা কাহিংপারাং গাগ্রুনেরোওয়া।19কা নাবিকোতা তিমোথীহিং সেন্নেপা নিংপুকো প্রভু ইশুকোতা আশা জোদিংয়ো, এপা জিংনুওয়া নাবিকো দেরেং মুংমসা কারে গ্রাগ্রুপা জিংরোওয়া।20আকু ত্যাবাপা আজিপ্পা তুংসিংসো নাবিহিং প্যারাপাওয়া দিংঙাহা কাহিংপাহা হাংসুরে মোতো।21লেরাহা তাংসা আপনিকো ধুনতা মেংচে নিও, ইশু খ্রীষ্টকো বিষয়তা প্যারাপাওয়াহা হাংসুরে মোতো।22আদো তিমোথীহা হেপা জিংওয়া দিংঙামে নাবিহা গেমিরাং নিও, হেপা চেংওয়াহা আপাকো সেওয়া জোমমে, এপারাং আকুহা কাহিংপা এনতাওয়া দেরেং বেইপাওয়া সেওয়া জোদিংয়ো।23কাংসি, কাহিংয়া হাং-হাং জিংকোমে! আকু নুওয়াংবি সিদা চ্যইনতানি কাহা তিমোথীহিংয়া নাবিকোতা নিংপুকো আশা এমি নিও।24কা আপনিরে নাবিকোতা সেন্নেপা ওয়াংকো ছুরোওয়া তামসা প্রভুকোতা ভরসা এমি নিও।25কাহা য়োংকো এ ইপাফ্রোডিটসহিং নাবিকোতা নিংপুনেকো বেপা তিংয়ে। কাবি নিহসোসারাং চিত্তা কাম জোয়ো আসা এনতাওয়া দেরেং হিংপাকো লুইসুওয়াতারে চিত্তা লুইসুয়ে। আকুহা নাবিকো পোইংরাংগা, হাংসুহিং কুং সহায়তাকো সোতা নাবি নিংপুমি নিমমে।26হাংপাতানাহা আকুরে নাবি তাংসাহিং দোসপাকো টেবো ইচ্ছা জোদিংয়ো। আকুহা হাইয়ে তাওয়া দেরেং নাবি সিদা চ্যইওয়াকো সোতা আকুহা সিওপারাং সিংদুদিংমি নিও।27আকুহা আজিপ্পারাং সিপুদাংক্যইপা হাইমগা, আদো সেংজাহা আকো তোইতা লামতুপা জোয়ে। আকো তোইতা মেংচে মোকো, আদো দুঃখকো তোইতা দুঃখ পুউমঘ্যইকো তামসা সেংজাহা কুং তোইতারে লামতুপা জোয়ে।28আকো সোতারাং কা আকুহিং নিংপুকো সিওপারাং টেবো ইচ্ছা নিও। এপামি জিংনাহা আকুহিংয়া ন্যাসারাং তিংমসা নাবিহা গ্রাগ্রুরোওয়া, আসা কুং তুংসিংকো সিংদুওয়ারে ফেলেংপা জিংরোওয়া।29আকো সোতা সিওপা গ্রাগ্রুমসা প্রভুকো জেজেংওয়াসো আকুহিং স্বাগত জো, আসা আকু বেপা জিংওয়া দিংঙাবিহিংয়া আদর জো।30হাংপাতানাহা খ্রীষ্টকো কামকো সোতা আকুহা সিদিংকো নামুতা চোইপা দেখায়ে। নাবিকো কুং সোতা পুরা জোকো মাছুওয়া সেওয়াহা আকুহা পুরা জোয়ে।
The Seed Company