ফিলিপ্পী1
1ফিলিপ্পীতা য়ুংওয়া খ্রীষ্ট ইশুকোতা নিওয়া সেংজাকো দিংঙাবি, মন্ডলিহিং কাং-য়োংওয়াবি আসা ডিকনবিহিং কাবি প্রভু ইশু খ্রীষ্টকো ডেইয়াবি পাউল আসা তিমোথীহা ই চিঠি লাদাংয়ো।2য়োংকো সেংজা আপা আসা প্রভু ইশু খ্রীষ্টহা নাবিহিংয়া অনুগ্রহ আসা তিমেওয়া পিচাকো।3হাত্রংদো কা নাবিহিং নোনুওয়া কা কুং সেংজাহিং গারানি তারোওয়া।4নাবি তাংসাকো সোতা হাত্রংদো কুং পাচাইওয়াতা কা গাগ্রুমসা পাচাইরোওয়া,5হাংপাতানাহা নাগাইকো দিনসোহা নেচোইপা এনতাওয়া দেরেংকো কামতা নাবিহা কাহিংয়া সহায়তা জোমসা ওয়াংমি নিও।6কাহা পুরা দেংরোওয়া, হানি কাম সেংজাহা নাবিকোতাহা ইচো আসল কাম শুরু জোমি নিমমে, আকু কামহা ইশু খ্রীষ্টকো দিন মেলেনু চোইপা আকুহা জোদিংরোওয়া।7নাবিহিংয়া হাত্রংদো কাহা আপনিকো তুংসিংতা এমি নিও। নাবিকো তোইতাহা এপা জিংওয়া নোচেং নোকোহা কাহিংয়া ঠিক জিংয়ে, হাংপাতানাহা নে কা জেলতা নিনু আসা বাইরে নিনুরে নাবিহা কাহিংয়া এনতাওয়া দেরেং বেইপাকো আসা ইহিং জোগায়কো সেংজাকো পিচাওয়া ই তাংসা অনুগ্রহতা নাবিহা কাহিংপা সহভাগী জিংমি নিও।8হাংপাতানাহা সেংজাহা কুং সাক্ছি নিও, কি হেপা খ্রীষ্ট ইশুকো জেজেংওয়াসো নাবি তাংসাকো সোতা কা তৃষ্না জোদিংমমে।9কুং পাচাইওয়াহা ইরাং নিও, নাবিকো জেজেংওয়াহা ডেপু-ডেপুমসা হোকো, জেজেংওয়াহা নিহদ্যাসাতারাং জ্ঞান আসা এনতাওয়াসো ধুইওয়াহিং ওয়েংপাকো ছুওয়া দুংজিতারে ডেপু-ডেপুমসা হোপুকো,10এপা জিংনু মেংচে নাবিহা হানিরোমা এনতাওয়া নুওয়াংহিং ওয়েংপাকো ছুরোওয়া, আসা খ্রীষ্ট লেনুকো দিনতা শুদ্ধ আসা নির্দোষ জিংকো ছুরোওয়া।11সেংজাকো মহিমা আসা প্রশংসাকো সোতা ইশু খ্রীষ্টকোসো লেওয়া তাংজিকো ফলসো নাবিহা ভরিপুর্ণ জিং।12ও ডুওয়া এবাই আসা হুম্রিবাই, নাবিহা ই নুওয়াং গেকো তাওয়া কুং ইচ্ছা নিও। কি কুং তোইতা জিংদিংওয়া নুওয়াংবিসোহা এনতাওয়া দেরেংহিং নাগাই গ্যইপাওয়া কামবি জিংমি নিও,13কাহা খ্রীষ্টকো খাতির জেলতা সুংচপুমগা তাওয়া তাংসা মহলকো সিপাইবি আসা দোসরা দিংঙাবিরে গেদিংয়ো।14সিওচে দেংওয়াবিহা কা জেলতা সুংচপুওয়াকো সোতা প্রভুকোতা সাহসী জিংপুমি নিও, আসা সেংজাকো য়্যইদি মাচ্ছুংপা য়্যইকো ঝান আঁট মুংমি নিও।15লেরা-লেরাহা মিচামসা কাহা দোসরারোমা সিওপা জোমি নিও তামসা তিংপাকো খ্রীষ্টকো নুওয়াং হিংপামগা, আদো লেরাহা এনতাওয়া নোচেংসোরাং এনতাওয়া দেরেং হিংপামগা।16এনতাওয়া দেরেংকো সুরক্ছাকো সোতা কা ইতা নিও তামসা গেমবিহা ই এনতাওয়া দেরেংহা জেজেংওয়াসো জোমগা,17আদো দোসরা মিচামবিহা কাহিং জেলতা দুঃখ সিওপা পিচাকো নোচেং এমসা, শুদ্ধ নোচেংসো মোকোপা আপনিকো তোইংদ্যাকো নোচেংসো খ্রীষ্টকো এনতাওয়া দেরেং হিংপামগা।18হেপা জিংদো মাটা নুওয়াংহা ইরাংগা-হেপা জোমসা চুইদো, চাহে বাহানা জিংদো, চাহে আজিপ্পাতা জিংদো খ্রীষ্টকো প্রচারমি জিংনাহা, কা ইতারাং গাগ্রুরোওয়া। ওই, কা গাগ্রুরোওয়া,19হাংপাতানাহা কা গেমি নিও, নাবিকো পাচাইওয়া আসা প্রভু ইশু খ্রীষ্টকো লাংবেসো পিচাওয়া সহায়তাসো কা ছুটকারা মুংচারোওয়া।20কুং জিম্মাবারিসো লিয়োপা মাজিংকো, আদো হাত্রং সময় জিংদো বিশেষ জোমসা নেহা কা সাডুংপ্পা জিংমসা সিপুদো আসা বাচেদো কুং তাংসা সাদিসোহা খ্রীষ্টকো আদর জিকো তাওয়া কুং টেবো ইচ্ছা আসা আশা নিও,21হাংপাতানাহা কুং সোতা বাচেকোহা খ্রীষ্টগা। আসা সিকোহা ত্যইংদ্যাগা।22য়দি কা ই জুপাতা বাচেনাহা খ্রীষ্টকো সোতা ফল সেওয়া কাম জোকো ছুরোওয়া। আদো কা আজিপ্পারাং মেগেমগা, কাহা হানি জেংনেকোমে আকুহা কা মেগেমগা।23কা নিহদ্যাতা পোরেমি নিও। বরু কা বাসিমতি হুইতেমসা খ্রীষ্টহিংপারাং চিত্তা য়ুংকো ইচ্ছা নিও, হানি সিওপারাং এনতাওয়া নুওয়াংমে।24আদো কা জুপাতা য়ুংকোহা নাবিকো সোতাহা ঝান দরকাররাং নিও।25ই নুওয়াংতা পক্কা জিংমসা কা গেমি নিও, কি দেংওয়াতা নাবিকো উন্নতি জোকো আসা নাবিকো গাগ্রুওয়াহিং ঝান সিওপাকো কা মাসিপারাং য়ুংরোওয়া আসা নাবি তাংসাহিংপা য়ুংরোওয়া,26হাংপাতানাহা কা ন্যাসারাং নাবিকোতা লেনুওয়া কুং কারণ নাবিহিং খ্রীষ্ট ইশুকোতা গর্ব জোকোহা উইসে কারণ নিকো।27মাটা নুওয়াংহা ইরাংগা, খ্রীষ্টকো এনতাওয়া দেরেংহিং সহায়ওয়া নাবিকো তেইওয়া য়ুংওয়া নিকো। আকো সোতা কাহা নাবিহিং দোসুদো, মাদোসুদো নাবিহা ইচো উদ্দেশ্যতা স্থির জিংমসা ইচো ইচ্ছাতা এনতাওয়া দেরেংকো দেংওয়াকো সোতা লুইসুদিংয়ো তাওয়া কা হিংচা মুংকো।28আসা বিরোধীবিসো হাই নুওয়াংতারে মাছুংগে। আবিকো সোতাহা ইহা দাংপুওয়াকো চিহ্নগা, আদো নাবিকো সোতাহা উদ্ধারকো চিহ্নগা, ই উদ্ধারহা সেংজাসোরাংগা,29হাংপাতানাহা খ্রীষ্টকো সোতা নাবিহিংয়া ই পিচামি নিও, কি নাবিহা আকো তোইতা দেংওয়া মেংচে মোকো, আদো আকো সোতাহা দুঃখরে পুউনেরোওয়া,30হ্যাপুনতেওয়া দিনবিতা হানিহিংপা কা লুইসুদিংওয়া নাবি তিংমি নিমমে, নাবিকো হিংমি ত্যাবাপা কা আকুহিংপারাং কা নেচোইপা লুইসুদিংয়ো আসা নেহা ই লুইসুওয়াতা নাবিহা কাহিংয়া য়ুজ্রুদিংমি নিও।
The Seed Company