ফিলিপ্পী3
1নোইস্যাতাহা ও ডুওয়া এবাই আসা হুম্রিবাই, প্রভুকোতা গাগ্রু। নাবিহিংয়া আকু নুওয়াং ন্যাসা-ন্যাসা লাকোহা কাহা মোসোরোরোওয়া, আকুহা নাবিকো রক্ষাকো সোতাগা।2খিয়াবি বেপা জিংওয়া আজকা চিকাক্যইওয়া প্যায়োং ঝিপাওয়াবিসো, মেংতাপা কাম জোমবি আসা জুপাতা খতনা জোনেরোওয়া তামবিসো হোশিয়ার জিংমসা য়ুং,3হাংপাতানাহা সেংজাহিং লাংবেসো সেওয়া জোওয়া আসা খ্রীষ্ট ইশুকোতা গর্ব জোওয়া আসা জুপাতা ভরসা মেএওয়া আজিপ্পাকো খতনাহা কাবিরাংগা।4য়দি জুপাতামি ভরসা এনাহা কা আপনিহা জুপাকো সোতাহা ভরসা একো ছুকোগা। লেরা দিংঙামি জুপাতা ভরসা এওয়া কারণ নিও তামসামি জাংনাহা, কুংহা ঝান সিওপা নিও।5সা-য়্যায়ুতা কুংহা খতনা জিংমগা। কাহা ইস্রাইলি জ্যাকো বিন্জামিন জিরিকোগা, হিব্রুবিকোরে আজিপ্পা হিব্রুগা, লিংপাংকো বিষয়তা বেনাহা ইচো ফরিসিগা,6জোশকো বিষয়তা বেনাহা মন্ডলিবিহিং সতায়ওয়া, তাংজিকো বিষয়তা বেনাহা লিংপাংতা নিওয়া তাংজি ত্যাবাপারাং দোষ মাতাওয়া নিমগা।7আদো হাসে নুওয়াং কুং সোতাহা তোইংদ্যা নিমমে, আকুহা কাহা খ্রীষ্টকো সোতাহা ব্যর্থরাং তামসা নোরোওয়া।8আজিপ্পারাংমি জাংনাহা খ্রীষ্ট ইশু কুং প্রভুহিং নাইকো মুংওয়া পাংক্যইওয়া নুওয়াংকো তুলনাতাহা তাংসা নুওয়াংহিংয়া কাহা খতিরাং নোরোওয়া। খ্রীষ্টহিং মুংকো ছুকো তামসা আকো সোতা কাহা তাংসা নুওয়াংকো নুকসান পুউমি নিও, আসা আকু তাংসাহিং কাহা আজকা-চিকাক্যইওয়া জিতি ত্যাবাপা নোমগা,9আসা আকোতারাং পুর্নরূপতা নিওয়া কা ইচ্ছা জোরোওয়া। কা লিংপাং মানেমসা সেংজাকো নাগাইতা আপনি তাংজি জিংওয়া মোকো, আদো সেংজারাং কাহিংয়া খ্রীষ্টকোতা দেংওয়াকো সোতা তাংজি বানাইয়ে। ই তাংজিহা দেংওয়াতা কেমসা য়ুংমি নিও।10কাহা খ্রীষ্টহিং নাইকো আসা আকো ঙারোওয়াকো সেকো অনুভব জোকো আকো দুঃখকো সহভাগী জিংকো আসা আকো সিদিং চোইপা আকু ত্যাবাপারাং জিংকো কেংরোওয়া,11আসা জিংকো ছুনাহা কারে সিওয়াসোরে ঙারোকো ছুকো।12কাহা ই তাংসা নাগাইসোরাং মুংচানতেমি নিও, অথবা কাহা নাগাইসোরাং সিদ্ধ জিংপুনতেয়ো তামসাহা মোকো, আদো আকু নুওয়াংবিহিং প্যইকো সোতা কা নাগাই গ্যইদিংয়ো, হানি নুওয়াংকো সোতা খ্রীষ্টহা কাহিং প্যইমি নিমমে!13ডুওয়া এবাই আসা হুম্রিবাই, কাহা ই তাংসা প্যইপুনতেয়ো তামসাহা মোনো, আদো কাহা ইচো কাম মেংচে জোরোওয়া, হ্যাপুনতেওয়া নুওয়াংবি লারিংমসা আসা দেপাওয়া নুওয়াংবিতা সিওপারাং কোশিষ জোমসা14খ্রীষ্ট ইশুকোতা সেংজাকো লোডিংবাতা মোউওয়াতা মুংওয়া ইনামকো সোতা লক্ছতা কা সিওপারাং নাগাই গ্যইদিংয়ো।15য়াংবি লাংবেতা পক্কা জিংতেমবিহা তাংসা এপাজিংওয়া তুংসিংরাং জিং, আসা নাবিকোতা দোসরা হাইক্রি মোকোইওয়া নুওয়াং নিনাহা সেংজাহা নাবিহিংয়া আকুরে কোইপাপিরোওয়া।16আদো য়াংবিহা হাই মুংচামি নি, আউতারাং সাডুংপা জিংমসা য়ুংসি।17ও কুং ডুওয়া এবাই আসা হুম্রিবাই, নাবিরে কা বেপারাং জো। কাবিকোতা নাবিকো তিংওয়া উদারণ সেই য়ুংদিংবিহিং কাং।18কা নাবিহিংয়া জাংওয়া জাংওয়া জোপুনতেমগা, নেরে টেবো দুঃখ পুউমসা জাংরোওয়া, উইসে দিংঙাবিহা খ্রীষ্টকো ক্রুসকো দুসমনরাং জিংমসা তেইদিংয়ো।19দাংপুওয়াহা আবিকো অন্তগা, ফেমারাং আবিকো চোইসুংগা, আসা লেফেনেওয়া নুওয়াংবিতারাং আবিহা গর্ব জোমগা, আসা আবিকো তুংসিংহা ই বাসিমতিকো নুওয়াংবিতা মেংচে নিমগা।20য়াংবিহা লোডিংবাকো নাগরিকবিগা। মুক্তি পিচাওয়া য়োংকো প্রভু ইশু খ্রীষ্ট লোডিংবাসো লেরোওয়া তামসা য়াংবিহা ন্যাতা কাংদিংয়ো।21আকুহা, হানি সেসো তাংসা নুওয়াংহিং আকো আপনিকো অধীনতা পারাকো চুমমে, য়াংবিকো কমজোর সিপুওয়া জুপাহিংয়া আকো আপনিকো মহিমাকো জুপা ত্যাবাপা জিংকো পরিবর্তন জোপিরোওয়া।
The Seed Company