২ কোরোন্থি11
1কা আস্যইস্যই তোউজি জিংদো নাবিহা সহায়পি।2কা নাবিকো তোইতা সেংজাকো মিচাওয়াসো মেইপুমি নিও। ইচোচিংওয়া বিয়ৌলা খ্রীষ্টহিংপা নাবিকো বাংকুতোইপিয়ে আসা নাবিহিংয়া ছোসোওয়া কন্যাদান জোকো কুং ইচ্ছা নিও।3আদো পুইয়াকো রুপ লাংমসা শয়তানহা চলাক জোমসা হব্বাহিং ল্যহপামি ত্যাবাপা নাবিকো খ্রীষ্টকোতা নিওয়া নম্র আসা চোসোওয়া তুংসিংহিংরাং বিগারেপুকোদোওয়া তামসা কাহা চুসুংদিংয়ো।4কাবিকো ঝিপাওয়া ইশুরোমাহা দোসরা ইশুকো তোইতা দোসরামি ঝিপাপুনাহা নাবিহা য়াংতামসা গ্রহন জোর্গুং। নাবিকো নাগাইকো মুংওয়া লাংবে আসা এনতাওয়া দেরেংরোমা দোসরা লাংবে আসা দোসরা এনতাওয়া দেরেংরে নাবিহা গ্রহন জোর্গুং।5আবি আপনিবিরাং তোরোইচাপুমসা জেংওয়া পোইং জিংকো কেংওয়া দিংঙাবিরোমাহা কাহা হাই নুওয়াংতারে লিয়োপা মোতো।6কা টেকাচুইপা য়্যইকো মোছুকোদোওয়া, আদো কুংতাহা দুংজিহা লিয়োপা মোতোতো। কাবিহা নাবিহিংয়া ই নুওয়াংহা হেপা জোমসা জিংদো চোসোপা কোইপাপিমি নিয়ো।7নাবিহিং সেংজাকো পিচাওয়া এনতাওয়া দেরেং কাহা হাইরে মায়ুচাপা এপারাং হিংপায়ে। তাকি নাবিহা টেবো জিংকো তামসা কাহা আপেচাপা জিংপিয়ে। কুং এপা জোওয়াহা ভুল নিমগা?8কাহা নাবিকো সেওয়া জোনুওয়া দোসরা মন্ডলিসো সহায়তা মুংচায়ে। এপা জোনুওয়া নাবিহিং য়ুজ্রুকো কাহা দোসরা মন্ডলিবিহিং লুটেমি ত্যাবাপা জিংপুয়ে।9নাবিহিংপা য়ুংনুওয়া হাত্রং কাহিং দরকার পোরে, আত্রংহা কাহা হাংসুকোরে বোজ মাজিংতো, হাংপাতানাহা মাকেডোনিয়াসো লেওয়া এবিরাং কুং দরকারহা পুরা জোপিয়ে। আকো সোতা নাবিকো তোইতা বোজ জিংকোদোওয়া তামসা কাহা আপনিহিংনাং য়োইয়ে, আসা নোইতারে য়োইরোওয়া।10খ্রীষ্টকো আজিপ্পাহা কাহিংপা নিয়ো, আসা আকাইয়া জায়গাবিতারে কুং ই পুংটাহিংয়া হাংসুরে য়োইমক্যই।11কাহা হাংপা এপা জোমগা? কাহা নাবিহিং জেজেংপা মোজোওয়াকো সোতাগা? কা জেজেংপা জোমে না মোজোমে, সেংজারাং গেমি নিও।12কুং জোনেওয়া কামহা কা জোচাংরোওয়া, আকু আপনিরাং তোরোইচপুমসা জেংওয়া পোইং জিংওয়া দিংঙাবিহা কাবি ত্যাবাপা কাম জোয়ো তামসা পুংটা জোকোরে মৌকা মামুংরোওয়া।13জেংওয়া পোইংবি ত্যাবাপা তিংওয়া আবিহা প্যায়োংকো জেংওয়া পোইংবি আসা ল্যইপেবিগা।14ইহা হাইরে চুবে নুওয়াং মোকো, শয়তানরে হাহাইওয়া লোডিংবাকো পোইংবি ত্যাবাপা তিংরেকো ছুরোওয়া।15এপা জিংনুওয়া শয়তানকো পোইংবিরে তাংজিকো ডেইয়া ত্যাবাপা তিংরেকোহা আআংপেপেচপুওয়া নুওয়াং মোকো। নোইস্যাতাহা আবিহা আপনিকো কাম জোওয়া সেই দন্ডহা মুংরোওয়া।16কা ন্যাসারাং জাংরোওয়া, কাহিংয়া হাংসুরে তোউজি তামসা মোনোকো। তোউজিরাংগা তামসা নোদো তোউজি নোমসারাং গ্রহন জোপুই। এপামি জোনাহা কারে পুংটা জোকো মুংরোওয়া।17আজিপ্পারাং পুংটা জোওয়া নুওয়াং য়্যইনুওয়া কাহা তোউজি ত্যাবাপা য়্যইদিংয়ো। ইহা প্রভুকো য়্যইপাওয়া নুওয়াং মোকো।18হেপা বাসিমতিকো দিংঙাবিহা আপনিকো নোওয়া সেই পুংটা জোমমে, এপারাং কারে পুংটা জোদিংয়ো,19নাবিহা আপনিবিরাং এসেপাকো দুংজি নিওয়া জিংপুমি নিও, কি য়াংতামসা নাবিহা তোউজিবিহিং সহায়মগুং।20দোসরাবি নাবিহিংয়া ডেইয়া বানাইপুদো, নাবিহিংয়া আবিহা আপনিকো শিকার বানাইপুদো, নাবিকোসো লাভ উঠাইপুদো, অধিকার জোপুদো, আসা ত্যাচোংপুদো নাবিহা তাংসা সহায়রেপামগুং।21কা লেফেমসা স্বীকার জোরোওয়া, কি কাবিহা ই তাংসা সহায়মক্যইতো, আদো লেরামি হাইক্রি নুওয়াংতা পুংটা জোনাহা, কারে আকু নুওয়াংতা পুংটা জোরোওয়া। ওই কাহা তোউজি ত্যাবাপা য়্যইদিংয়ো।22আবিহা হিব্রুগা? কারে হিব্রুরাং। আবিহা য়হুদিবিগা? কারে য়হুদিরাং। আবিহা অব্রাহামকো চেংওয়াবিগা? কারে আকো চেংওয়ারাং।23আবিহা খ্রীষ্টকো ডেইয়াবিগা? কাহা চোইরুংবুপুমি ত্যাবাপা য়্যইদিংয়ো, আদো কাহা আবিরোমাহা এনতাওয়া ডেইয়াগা। আবিরোমাহা কাহা ঝান সিওপারাং কোইচ্যামি নিয়ো। কাহিংয়া উইসে দিন জেলতা এপুইয়ে, সিওপারাং সাটাসো ডুপুইয়ে, আসা সিওপারাং সিদিংকো নামুতা দেকায়ে।24ঙাকোই চোইপা য়হুদিবিকো খুইসো নিহকাই লাংকো ইপো লিয়োপা কাহা সাটাসো য়াচায়ে।25সুংকোই চোইপা রোমিবিহা কাহিংয়া দ্যইসো ডুপুয়ে। ইকোইহা দিংঙাবিহা কাহিংয়া লুংটুইসো টোপুইয়ে, সুংকোই চোইপা কুং বাইওয়া নোওয়াইহা ছুইপুয়ে। সাইয়ু জেইসুং আসা লিসুংহা কাহা ঝাহাদিতারাং য়ুংনেয়ো।26কা সিওপারাং তেইদিংনুওয়া কাহা জোরাবিতা চুসুং-মাইসুংক্যইপা জিংপুয়ে, কুইমবিকো খুইতারে পরেয়ে, আপনিকো জ্যা য়হুদি আসা দোসরা জ্যাকো দিংঙাবিকোসোরে চুসুং-মাইসুংক্যইপা জিংপুয়ে। শহরতা, চুংচাতা, ঝাহাদিতা, প্যায়োংকো ব্যারোবিকো প্যাকোতাহা হাংতা জিংদো চুসুংনেপা জিংপুয়ে।27কাহা কোইচ্যায়ো আসা সিয়োপারাং চেপা ক্যাপায়ে। লেচোংহা জিমি-য়ুমি মাতাপা য়ুংয়ে, আমা মায়াচাপা য়ুংনেয়ো, তি মায়ায়াংপারে য়ুংয়ে, আসা আংদুং মাতাপা চিকিংওয়াতারে ডোডোউপুক্যইপা য়ুংনেয়ো।28এসে মেংচে কোইচ্যাওয়া মোকো, আদো সেংজাকো মন্ডলিবিকো সোতা কুং তোইতা সদাইদিন বোজ নিও।29হাংসু কমজোর নিংগা আসা কাহা মোতোংগা? হাংসু পাপতা ফাসেনু কুং তুংসিং সেদ্রাংওয়াসো মোলোউচাংগাসা?30কামি পুংটা জোনেনাহা, কাহা আপনিকো কমজোর তিংপাওয়া নুওয়াংবিতা পুংটা জোরোওয়া।31কা মোল্যইপামি তামসাহা প্রভু ইশুকো আপা সেংজা, হাংসুহিং হাত্রংদো গারানি তানেমে, আকুরাং গেমগা।32কা দমস্কসতা নিনুওয়া আরিতস জাইপুকো টেবো কাইজিহা কাহিং প্যইপাকো য়োইপায়ে।33আদো ইচো পার্কাকো চ্যাবইসো স্যাতিতা এমসা কাহিংয়া লিতা ধুইপিওয়াকো সোতা কাহা আকো খুইসো বাচেয়ে।
The Seed Company