২ কোরোন্থি10
1নাবিকো নাগাইতা কা নম্র আসা সোজো নিও, আদো কা তানাং নিনুওয়া নাবিহিংপা সাহসি জিংরোওয়া তাওয়া নুওয়াং জিংদিংমি নিও। কা পাউলরাং খ্রীষ্টকো নম্রতাতা আসা লামতুওয়াতা জিংমসা নাবিহিং জাংচারোওয়া।2কা ওয়াংনুওয়া কাহিংয়া মোজোইম্যারাইপা জোনেওয়া মাবানাই। কাবিহা বাসিমতিকো তরিকাসো কাম জোরোওয়া তাওয়া দিংঙাবিহিংপা কাহা মোজোইম্যরাইওয়া জিংকো ছুরোওয়া,3হাংপাতানাহা য়াংবিহা বাসিমতিতা নিও, আদো বাসিমতিকো লুইসুওয়া সেই য়াংবিহা মালুইসুমগা।4য়োংকো লুইসুওয়াতা ঘ্যইওয়া হাতিয়ারবিহা বাসিমতিকো মোকো, আদো য়োংকো চালাইদিংওয়া হাতিয়ারবিহা সেংজাকো সে নিক্যইওয়া হাতিয়ারগা। ইবিসোহা কিল্লাবি য়্যাকো ছুমগা। ই হাতিয়ারবিসোহা য়াংবিহা গলত স্যাসু-তোইংসুওয়াবিহিংয়া দাংপারোওয়া।5সেংজাকো দুংজিকো নাগাইতা জাওয়া পুংটাসো মেইপুওয়া বাধাবিহিংয়া কাবিহা দাংপারোওয়া। কাবিহা তাংসা নোচেংহিংয়া য়োইমসা খ্রীষ্টকো আজ্ঞা মানেওয়া বানাইমগা।6নাবিহা পুরা আজ্ঞা মানেওয়া তিংপাপুনতেনুকো নোইতাহা কাবিহা তাংসা আজ্ঞা মামানেমবিহিংয়া দন্ড পিচাকো তৈয়ার জিংরোওয়া।7নাবিহা বাইরেতা তিংওয়া নুওয়াংবিহিং মেংচে ন্যইমগা। য়দি নাবিতাহা হাংসু কা খ্রীষ্টকোগা তামসা নোদানাহা, এপাজিংওয়া দিংঙাহা গেনেরোওয়া কি আকু ত্যাবাপারাং কাবিরে খ্রীষ্টকোরাংগা।8নাবিহিং বিগারেকো মোকো, আদো সুধার জোকো প্রভুহা কাবিহিংয়া অধিকার পিচামি নিও, ই অধিকারকো তোইতা সিওপারাং পুংটা জোনেদো কা মেলেফেরোওয়া।9কাহা নাবিহিংয়া চিঠি লামসা চুসুংওয়া তিংপাকো কেংওয়া মোকো।10লেরা-লেরা দিংঙাবিহা জাংসুকোদোওয়া, “পাউলকো চিঠিবিহা সিওপারাং কড়া নিও, আদো আবেইতা দোসুনুওয়া আকুহা কমজোর আসা বেক্কার নিমগা।”11এপা জিংওয়া দিংঙাহা কোইনেরোওয়া, কি কাবিহা তানাংসো লাওয়া নুওয়াং আসা আবেইতা নিনু জোনেওয়া নুওয়াংবিতাহা হাইরে ফরক মাজিংমগা।12টেবো নোমবিহিংপাহা কাবি আপনিহিং নোওমসা আসা দাদাপা জিংওয়া সাহস মোজোমগা। আবিকোহা দুংজিরাং মোতো, এনতাওয়া নুওয়াংকো নাপহা আবি আপনিবিরাং জোমগা আসা আকু নাপসোরাং আপনিহা আপনিরাং ন্যায় জোমগা।13আদো কাবিহা আপনিকো সীমা পেংমসা পুংটা মোজোমগা, সেংজাহা ই কামকো জায়গা কাবিহিং পিচামি নিও, ই জায়গাহা নাবিকোতারে দেকারোওয়া। ইকো সোতা মেংচে কাবিহা পুংটা জোমগা।14নাবিকোতা ওয়াংকোরে মোওয়াংমি ত্যাবাপা কাবিহা সিও-সিওপা পুংটারে মোজো, হাংপাতানাহা খ্রীষ্টকো এনতাওয়া দেরেং পুমসা নাবিকোতা নাগাই দেকাওয়াহা কাবিরাং নিমগা।15কাবিহা আপনিকো জায়গা হুইতেমসা দোসরাকো জোওয়া কামবিতাহা কাবিহা পুংটা মোজো। কাবিকো টেবো আশাহা নাবিকো দেংওয়া সিওপা জিংমসা হোকো আসা কাবিহিং পিচাওয়া কামকো জায়গারে বেইপুমসা হোকো তাওয়াগা।16এপারাং ডেপু-ডেপুমসা নাবিকোসো দোসরা লোইবিতারে কাবিহা এনতাওয়া দেরেং হিংপাকো ছুরোওয়া। এপামি জিংপুনাহা দোসরাবিকো কাম জোওয়া জায়গাতা কাম জোমসা কাবিহা পুংটা জোমঘ্যইরোওয়া।17তাংজিকো হিগাতারে জাংমি নিও, “পুংটা জোওয়াবিহা প্রভুকোতারাং পুংটা জোকো।”18হাংপাতানাহা হাংসু দিংঙা আপনিকো তারিফ আপনিরাং জো, আকুহা স্বীকার মাজিংরোওয়া, আদো প্রভুকো তারিফ জোওয়া দিংঙা মেংচে স্বীকার জিংরোওয়া।
The Seed Company