২ কোরোন্থি12
1কাহা পুংটা জোনেরোওয়া, আদো ইসোহা হাইরে তোইংদ্যা মাজিংদো, প্রভুকোসো মুংওয়া দর্শনবি আসা প্রকাশকো নুওয়াং কা য়্যইদিংয়ো।2চৌদ্ধ বর্ষা নাগাইকো নুওয়াংগা, ইচো খ্রীষ্টকোতা দেংওয়া দিংঙাহিংয়া তিস্রো লোডিংবা চোইপা চুংপুমসা পুরাচায়ে। আকুহিংয়া কা নাইমগা। ইহা আজিপ্পারাং জিংমমে না দর্শন তিংমমে, কা মেগেতো, ই নুওয়াংহা সেংজারাং গেরোওয়া।3কা ন্যাসারাং জাংরোওয়া, কুং খুই চুংপুমসা সেংজাকো দুংরাই চোইপা পুরাওয়া আকু দিংঙাহিংয়া কা নাইমগা, আদো ইহা আজিপ্পা জিংমমে না দর্শনতা তিংমমে কা মেগেরোওয়া, ই নুওয়াংহা সেংজারাং গেরোওয়া।4আকুহা আউতাহা ল্যাকো মাতুওয়া নুওয়াংবি হিংয়ো, দিংঙাকো নামুসো ল্যাকো মাছুওয়া নুওয়াংবি আকুহা আউতা হিংয়ো,5কা আকু দিংঙাকো তোইতা পুংটা জোরোওয়া। আদো কা কুং আপনিকো তোইতাহা কমজোর ল্যামসা দোসরা নুওয়াংতা পুংটা জোমক্যই।6কাহা পুংটা জোকো ইচ্ছা জোদো কুংতাহা তোউজিহা মোতো, হাংপাতানাহা কা আজিপ্পা য়্যইদি য়্যইমগা। কাহিংয়া কুং জোওয়া আসা পিচাওয়ারোমা টেবো নোপিকো তাওয়া কুং ইচ্ছা মোতো।7কুংতা ই প্রকাশবিহা ওয়াংওয়াকো কারণ কুংতা পুংটা মোওয়োংকো তামসা কাহিংয়া জুপাতা সোসাসো বাচাওয়া ইচো দুঃখ পিচায়ে। ইহা শয়তানকো পোইং ত্যাবাপা জিংমসা হাম্তি-হাম্তিপা চিচপামসা কাহিংয়া পুংটা জোকোসো য়োইমগা।8কাহা প্রভুহিংপা সুংকোই চোইপা ইহিংয়া সাংপাপি তামসা জাংচায়ো।9আদো আকুহা কাহিংয়া জাংয়ে, “নাতিহিংয়া কুং অনুগ্রহ নিনাহা তেংরোওয়া। কুং সেহা কমজোরতা পুরা নিরোওয়া।” এপা জিংনুওয়া খ্রীষ্টকো সে কুংতা নিকো তামসা কমজোর নিওয়াতা ঝান সিওপারাং য়াংতামসা কা পুংটা জোদিংয়ো।10আকো সোতারাং খ্রীষ্টকোতা কা কমজোর জিংনু, ল্যইস্যইপানু, হোমরাইপা জিংনু, সতায়নু, আসা দুঃখ মুংনুওয়া গাগ্রুচাংমি, হাংপাতানাহা হাত্রং কা কমজোর জিং, আত্রংহা কুংতাহা সে ওয়াংচাংমি।11কাহা তোউজি জিংপুমি নিও। নাবিরাং কাহিংয়া এপা জিংকো সুউজায়ে, হাংপাতানাহা নাবিকোসোহা কাহা সন্মান মুংচানেকোগা, আদো কা হাইরে মোকোদো, আকু টেরবো টেরবো জেংওয়া পোইংবিরোমাহা কাহা লিওপা মাতাতো।12পুরা সহায়মসা, সে নিওয়া আসা আআংপেপেচপুওয়া কামবি আসা চিহ্নবি জোমসা নাবিকো প্যাকোতা, জেংওয়া পোইং জিংওয়া প্রমাণ পিচামি নিও।13দোসরা তাংসা মন্ডলিকো তুলনাতা নাবিহা হানি নুওয়াংতা লিয়োপা নিগাহ মুংগা? ওই, ইচো নুওয়াংতাহা নাবিহা কাহিংয়া ছমা জোনেরোওয়া, কা নাবিকো সোতাহা বোজ মাজিংতো।14কা ন্যাসারাং নাবিকোতা ওয়াংদাংয়ো। কামি ওয়াংনাহা নেহা ইসিংসোওয়া সুংকোই জিংরোওয়া, আদো নাবিহিংয়া হাইক্রি খর্চাকো সোতা মোকোইচ্যাপারোওয়া। কাহিংয়া নাবিরাং ঘ্যইরোওয়া, নাবিহিংপা নিওয়া সোংসাবি মোকো, হাংপাতানাহা চেংওয়া-চেমেসোহা আয়ু-আপা মোকো, আদো আয়ু-আপাসোগা চেংওয়া-চেমেহা নোমসা এওয়া ধন মুংচামগা।15নাবিকো সাদিকো সোতা কা তাংসা নুওয়াং য়াংতামসা পিচারোওয়া আসা আপনিকো সাদি দোরিপারাং পিচাপুরোওয়া। কামি নাবিহিংয়া সিওপারাং জেজেংপা জোনাহা নাবিহা কাহিংয়া লিওপা জেজেংপা জোকোগাসা?16কাবিকো খর্চাহা নাবিহা মোমঘ্যইতো, ইহা নাবিরাং গেমি নিও। কোকোহা লেরা-লেরাহা কাহিংয়া ল্যহপামসা ফসাইয়ে তামদোওয়া।17কুং নাবিকোতা নিংপুওয়াবিতাহা লেরা দিংঙাবিকোসো আসা নাবিকোসো কাহা ফাইদা লাংগাসা?18কাহা তিতোসহিংয়া নাবিকোতা হোকো তামসা জাংমগা। আকুহিংপাহা দোসরা ইচো এহিংনে নিংপুওয়া নিমগা। তিতোসহা নাবিহিংপাহা হাইক্রি ফাইদা লাংগা? আকু আসা কাহা ইচো লাংবেতা মেতেইংগা? আসা কাবিহা ইচো কোপেংতারাং মেতেইংগা?19এপাজিংওয়া নুওয়াংহা কাবিহা আপনিহিং বাচাইকো সোতা জাংমদোওয়া তামসা নাবিহা নোমদোওয়া। সেংজাকো নাগাইতা খ্রীষ্টকোতা জিংমসা কাবি জাংরোওয়া। কাবিকো জোওয়া তাংসা নুওয়াংবিহা নাবিকো লাভকো সোতারাংগা।20কা আউতা ওয়াংনুওয়া কুং নোওয়ারোমা নাবিহা দোসরা জিংপুওয়া আসা নাবিকো নোওয়ারোমা কা দোসরা জিংপুকোদোওয়া তাওয়াসো চুসুংদিংয়ো। নাবিকো প্যাকোতাহা স্যাসুওয়া, মিচাওয়া আসা সেদ্রাংওয়া, আপনিকো ত্যইংদ্যা মোওয়া, নিন্দা জোওয়া, দোসরাকো নুওয়াং ল্যাওয়া, পুংটা জোওয়া, পিংচ্যাসুওয়াবি নিও তাওয়া কাহিংয়া জিংদিংয়ো।21কাহা চুসুংচাংমি, কা ন্যাসারাং ওয়াংনুওয়া কুং সেংজাহা কাহিং নাবিকো নাগাইতা নিয়োপাপুরোওয়া, আসা উইসে দিংঙাকো সোতা কাহা শোক জোনেরোওয়া, হাংসু নাগাইসো পাপ জোমি নিমমে, আসা আপনিকো জোওয়া মোচোসোওয়া, নুংনাংসুওয়া আসা লাংচ্যা জোওয়াসো পশ্চতাপ জোওয়া মাতামদোওয়া।
The Seed Company