Uown Lawt10
1Nami kung kowi CHAKRAMANG tek pe Mosi mih, “Faraw tut-e kowkowi diah. Faraw hai aia maru iukuüa kowh saktuak akhawtma ang changta pe khowk. Ang kowh awdara lup ang nowng tüngla kownkow hai Aigupta maru-uüa luk kowi ang changah naklak mih hown awdara lup maten en chu en chauüa kowi en nowng lawpla pe kownkow naiawng ang chang mih chekhai. Nahanow ang chowtaih CHAKRAMANG pami enni natuk kown towbowt,” pakhai.3Now Mosi hai Arawn iüah mih Faraw tut-e kowkowiah now kowtek pe mih, “CHAKRAMANG, Hebraiuüa kowh Thurai tek mih, ‘Tawng nam khe chow ang tut-e en nakham sum kown? Nachup naiia ang kownkow ang maru-uüa kowi lawtta bowt diah.4En che ang maru-uüa kowi lawtah kown nauta dowi kowh chalow now tharau khe en pren kowi ang nauang pawla en plawng hawmh kown.5Nami plawng hawmh dow paprenma kowi nauang krawi uowi kown. Nami khin khe krawng khowm padow enni nakhi kown nadowi tham. Nami plawng hawmh dow ria kuak khe kowh tawi piak dowi mih ün nakrawi chata bowk kown. Dowm kowi kowh singh pawi awr awm mih ün paw nakrawi chata bowk kown.6Nami kung kowi en kowh kim, en kowh maru iukuüa kim hai Aigupta pren kowi kowh kim maten kowi nami plawng hawmh atekma nakrawi uowi kown. Naiawng mih plawng hawmh dow enni pipu-uüa khowm padow lusa kowi uang uowi hownia katpaw uanla dowi tak chekhai,’ pape diah” pakhai. Naiawng ki tekla kung kowi Mosi dow Faraw hownia powt khai bowt.7Nakhowk khe Faraw kowi aia kowh maru iukuüa tek pe mih, “Mün khowt tak chow nami maru natowk a-i kawm kown? Aigupta pren piak bowk khowk mih en tuk dowi tak bow? Nami maru-uüa kowi amatni kowh CHAKRAMANG Thurai kowi nakowchup kownkow lawtta bowt,” pabüah khai.8Now Mosi hai Arawn iüah kowi mih Faraw tut-e maru kowplan pawla khai iawk. Amatchi kowi Faraw tek pe mih, “Kowkowi now enni kowh CHAKRAMANG Thurai kowi kowchup büa diah. Tawkchedow amia ngai chow enni kowkowi kown mih tekla ang büah,” pakhai.9Now Mosi klangah mih, “Anging kowh ngeuüa hai lawngtanguüa, anging kowh chauüa hai tawncher hawmh maten kowi anging napawla bowk kown. Tawngplawng kowchow panow CHAKRAMANG vüi anging kowchang pawi lowk kown chekhai,” pakhai.10Now amatchi kowi Faraw tek pe mih, “Enni kowh chauüa kowi che enni pawla hanow CHAKRAMANG nakhowng enni kown takla. Enni kowh sangkrangra angakma chekhai.11Naiawng nadowi, CHAKRAMANG kowi enni kowchup kown chedow kachakuüa ngetchow kowkowi büah towbowt,” pakhai. Nami kung kowi dow Mosi hai Arawn iüah kowi Faraw pur hownia prütta khai bowt.12Nami kung kowi CHAKRAMANG tek pe Mosi mih, “En kowh rut mih Aigupta pren luk kowi parah diah. Now plawng hawmh nauang hanow Aigupta pren kowi ria kuak khe kowh tawi piak dowi mih pramna hai singh pawi maten dow nauang krawi chata bowk kown towbowt,” pape khai.13Nakhowk khe Mosi dow aia kowh raitua mih Aigupta pren luk kowi parah khai. Nahanow CHAKRAMANG dow satlawt li uang pe uangah khai. Nami satlawt li dow ni chut uar prowt Aigupta pren kowi hing uangta hüah chekhai. Now auai rau dow nami satlawt li hown plawng hawmh paw uang tawi rown khai bowt.14Now nami plawng hawmh dow Aigupta pren paprenma kowi uang krawi chawp khai. Naiawng khowt mih plawng hawmh hu dow nami dowi rawn khe katpaw khi dowi tak chekhai, now nami kung kowi paw nakhi kown nadowi bowt.15Nami plawng hawmh dow Aigupta pren paprenma kowi krawi uowi bowk chekhai. Naiawng rakowi Aigupta pren dow hing iiu mup khai. Now ria kuak khe kowh tawi piak dowi mih dowm kowi kowh pramna hai singh kowi kowh uih maten nami plawng hawmh krawi chata bowk khai. Naiawng rakowi Aigupta pren paprenma kowi dow singh hai pramna mih hing uowi dowi bowt chekhai.16Nami khin khe Faraw dow Mosi hai Arawn iüah kowi alenma uang hawla now tek pe mih, “Enni kowh CHAKRAMANG Thurai luk kowi hai enni luk kowi ang changta angak khai bowt.17Naiawng rakowi sakrauma hown khaleng dow ang kowh angak lawt ang iüah akatchow diah. Mami ang luk kowi kowh kramra uowima mih ripra nahenta ang kownkow enni kowh CHAKRAMANG Thurai tut-e lü ang iüa diah,” pakhai.18Nakhowk khe Mosi dow Faraw hownia powt hanow CHAKRAMANG tut-e kowlü khai bowt.19Nahanow CHAKRAMANG dow satkup li uang pe uangah khai. Nami satkup li dow plawng hawmh kowi rownla now sata Rik kowi kowkuakta khai. Nami hownia now Aigupta pren paprenma kowi lowkchow khowm padow plawng uowi dowi bowt chekhai.20Nachenganchepaw CHAKRAMANG dow Faraw kowh saktuak akhawtma changta pe khai. Naiawng rakowi Faraw dow Israeluüa kowi lawtah dowi iawk chekhai.21Nami kung kowi CHAKRAMANG tek pe Mosi mih, “Mukuang prakowi en kowh rut awr parah diah. Nahanow Aigupta pren mih naiiu kown towbowt. Nami iiu krang dow puh lak kowi kowh cham uowi iawng naown kown,” pakhai.22Now Mosi dow mukuang prakowi awr par rut khai bowt. Nahanow Aigupta pren paprenma kowi dow sum ni mowr lainowmma iiu khai.23Nami sum ni mowr mih lowkkowlowk miapaw takhi dowi chekhai. Kim hownia paw miapaw ia lawt dowi chekhai. Nachenganchepaw Israeluüa uowi rah kowi dow anowima chekhai.24Nakhowk khe Mosi kowi Faraw hawah now tek pe mih, “Kowkowiah now enni kowh CHAKRAMANG kowi kowchup büah towbowt. Enni kowh chauüa paw enni hown nowngia tawi kown taih. Tawkchedow enni kowh chia hai rua mih makowi enni nata towla kown takla,” pakhai.25Now Mosi klangah mih, “Anging kowh CHAKRAMANG Thurai vüi tikah mih uanap hai akeng mih uanap chang müa tawncher hawmh paw en nape pawla anging kown takla.26Anging kowh tawncher hawmh paw anging napawla bowk kown; lowkchow paw anging nata towla kown nadowi. Anging kowh CHAKRAMANG Thurai kowi nachup naiiala kownkow naiawngün tawncher hawmh dow anging nalakke kown chekhai. Arah kowi kowtowm dowi mowr dow CHAKRAMANG vüi tawng iawng mih tawncher chow nalakke kown mih anging tuk dowi,” pakhai.27Nachenganchepaw CHAKRAMANG dow Faraw kowh saktuak akhawtma changta pe khai. Naiawng rakowi Faraw dow Israeluüa kowi lawtah kown mih nauta pe dowi.28Faraw tek pe Mosi mih, “Ang hownia alakma kowi cham powt prang. Ang pur kowi katpaw hauang tham bowt. Ang pur kowi che en uang iawk now en uang mih ni khe en nakowng kown!” pakhai.29Nami khin khe Mosi tek pe mih, “Iung chowh! Ang matia low hown en pur kowi katpaw ang nauang kown nadowi bowt,” pakhai.
The Seed Company