Uown Lawt9
5. Tawncher kowng hawi hown Thurai towkah ngare mih
1Nami kung kowi CHAKRAMANG tek pe Mosi mih, “Faraw tut-e kowkowiah now kowtek pe diah, ‘Hebraiuüa kowh Thurai, CHAKRAMANG tek mih maiawng: Nauang chupiia ang kownkow ang maru-uüa kowi pe kowiah diah.2Amatni kowi che en pe kowiah dowi kowi en townah iawk hanow3dowm kowi kowh kawrnga, kawrngaramchük, ut, chia, ruapur, rua hai en kowh tawncher uowi mih maten luk kowi kramra uowima mih makowng hawi ang nauang pawla pe kown.4Nachenganchepaw Israeluüa kowh tawncher hawmh kowi dow Aigupta maru-uüa kowh tawncher hawmh kowi iawng ang nachangah kown nadowi. Israeluüa kowh tawncher hawmh dow lowkchow paw natawi kowng kown nadowi,’ pape diah,” pakhai.5Now makowng hawi nauang ting kown mih akhin paw CHAKRAMANG khowm bowkla pe khai. Aia tek mih, “Tharau khe naiawngün dow ang nape phawah kown,” pakhai.6Now nami powm iawng dow auai ni khe CHAKRAMANG chang khai bowt. Aiguptauüa kowh tawncher maten dow kowng khai. Nachenganchepaw Israeluüa kowh tawncher dow lowkchow paw tawi kowng dowi chekhai.7Faraw dow krawi paw satang kownkow krawi chin maru khai, now Israeluüa kowh tawncher dow lowk paw tawi kowng dowi pami ta khai. Nachenganchepaw Faraw kowh saktuak dow akhawtma uowi reng; aia dow Israeluüa kowi lawtah dowi iawk chekhai.8Nami kung kowi Mosi hai Arawn iüah kowi CHAKRAMANG tek pe mih, “Taping hownia kowchawm plawi iüah pre sum chawm diah. Nami plawi dow Faraw pur kowi kuang prakowi Mosi paawr uetah lah.9Naiawngün plawi dow dinchow iawng naphaw hanow Aigupta pren paprenma kowi nauang kla kown. Now Aigupta pren paprenma kowi maru hown tawncher buk kowi pawibau naphaw hanow nama kown towbowt,” pape khai.10Now Mosi hai Arawn iüah dow taping hownia kowchawmla plawi hanow Faraw pur kowi kowkowi khai. Now nami plawi dow kuang prakowi Mosi awr uetta hanow maru hai tawncher buk kowi pawibau phaw now awrma khai bowt.11Nami pawibau dow akeng miuüa kowi iawng maiaklese sarauüa buk kowi paw phaw khai. Naiawng rakowi maiaklese sarauüa dow Mosi pur kowi uang nowng uang dowi bowt chekhai.12Nachenganchepaw Faraw kowh saktuak dow akhawtma CHAKRAMANG changta pe khai iawk. Aia dow Mosi hai Arawn iüah kowh laiklow kowi pe ching dowi iawk chekhai. CHAKRAMANG rik tekta khowk iawng dow uang phaw khai.13Nami khin khe CHAKRAMANG tek pe Mosi mih, “Murpa rü hanow Faraw pur kowi kowkowi diah. Now Faraw kowi kowtek pe kown mih, ‘Hebraiuüa kowh CHAKRAMANG Thurai tek mih maiawng: Nauang chupiia ang kownkow ang maru-uüa kowi pe kowiah diah.14Naiawng nadowi now khaleng dow en kowh maru iukuüa hown en kowh maru-uüa luk kowi krowngchow nadowi kowi en luk kowi ngengche paw ngare towkra chap maten ang nauang pe tingah kown. Nami khin khe dow palusama kowi ang iawng mih miapaw uowi dowk pami en natuk bowt kown.15Ang nau panü dow ang kowh kür hown ang uang pawla enni makowng hawi hanow lusa hownia ang nowng mitta enni prang bowt diah.16Nachenganchepaw ang kowh kür ang nowng tüngla en kownkow hai palusama kowi ang kowh ming pacham tahowng lah pakowh ang pe sing en reng tak mih chekhai.17Kawmat mowr paw ang maru-uüa luk kowi en chang bawri reng tak, now amatni kowi mih en lawtah dowi tak chekhai.18Naiawng rakowi tharau kowh maiawng khin khe kramra uowima mih ria ang nauang pe klaah kown. Naiawng mih ria dow Aigupta pren uown uowi hownia kawmat mowr katpaw uang kla dowi tak chekhai.19Naiawng rakowi dowm kowi kowh uowi mih en kowh tawncher hai maru maten kowi tatung tanimra kowi nauang pawla kownkow kowkrawi chin maru diah. Maru lah, tawncher lah, prang kowi kowh uowi mih maten dow ria kuakah rakowi nakowng bowk kown chekhai,’ pape diah,” pakhai.20Nakhowk khe CHAKRAMANG laiklow kowi kram mih Faraw kowh maru iukuüa dow amatni kowh naruüa hai tawncher hawmh kowi alenma kim kowi uang mangla khai.21Nachenganchepaw CHAKRAMANG laiklow kowi pe ching dowi miuüa dow amatni kowh naruüa hai tawncher hawmh kowi dowm kowi towta hüah khai.22Nami kung kowi CHAKRAMANG tek pe Mosi mih, “Kuang prakowi en kowh rut awr chawk diah. Nahanow Aigupta pren paprenma kowi maru hai tawncher hown singh kau luk kowi ria nauang kla kown towbowt,” pape khai.23Nakhowk khe Mosi dow aia kowh raitua kuang prakowi awr chawkah khai. Now lainowmma muk tün hai ria uang kla khai bowt, now kaikreng paw sawr khai bowt. Naiawng hai CHAKRAMANG dow Aigupta pren kowi uang chin pe ria khai.24Ria uang kla klen kowi pla paw nowi plaplap khai. Naiawng mih ria hai maih dow Aigupta pren uown phaw hownia kawmat mowr kowi katpaw uowi dowi tak chekhai.25Aigupta pren paprenma kowi dowm kowi kowh uowi mih maru hai tawncher maten dow ria hownia miapaw plai dowi chekhai. Ria kuakah rakowi üa hai laih kowi kowh uanh maten dow piak bowk chekhai; singh khowm padow tapiak bowk chekhai.26Nachenganchepaw Israeluüa uowi rah Gawsen süng kowi dow ria kla dowi chekhai.27Nakhowk khe Mosi hai Arawn iüah kowi hawah now Faraw tek pe mih, “Khaleng tarapdow ang changta angak khai nowm. CHAKRAMANG chang mih tawi dowi chekhai. Ang hai ang kowh maru-uüa tawi khai bowt.28Muk tün hai ria kla mih anging nowng kham dowi bowt chekhai; nataingta bowt kownkow CHAKRAMANG kowi kowtek pe diah. Khaleng dow ang lawt enni kown towbowt. Makowi enni uowi kla dowk tham,” pakhai.29Now Mosi tek pe mih, “Marow hownia lawt hown akrowksang chawk rut se CHAKRAMANG tut-e ang nakowlü kown. Now muk tün paw narim kown, now ria paw kla dowi bowt tham. Nahanow palusama dow CHAKRAMANG kowh chekhai pami en natuk bowt kown.30Tawkchedow en hai en kowh maru iukuüa mih CHAKRAMANG Thurai kowi kawmat paw kram dowi tak pami ang tuk chowh,” pape khai.31Nami khin khe Aigupta pren kowi dow iakmow lawt thüm chekhai, now la paw pau thüm chekhai. Naiawng rakowi nami ria hown iakmow hai la dow hing piak bowk khai.32Nachenganchepaw nami khin khe püm dow ru dowi tak rakowi tawngpaw tawi piak dowi chekhai.33Nami kung kowi Mosi dow Faraw kim hownia powt khai bowt. Aia dow marow hownia lawt hanow chawk rut se CHAKRAMANG tut-e kowlü khai. Nahanow muk tün hai ria kla mih dow rim khai bowt. Nami klen kowi uangchak mang kla iawmlawm mih paw taing khai bowt.34Nachenganchepaw naiawngün uangchak hai ria kla mih hown muk tün mih taing kung kowi dow Faraw hai aia kowh maru iukuüa mih plan chang ngak khai iawk. Amatni dow amatni kowh saktuak akhawtma changah büah khai iawk.35Mosi kowi CHAKRAMANG rik tek pe khowk iawng dow Faraw kowh saktuak mih akhawtma uowi reng; aia dow Israeluüa kowi lawtah dowi iawk chekhai.The Seed Company