Uown Lawt11
Chapa ta kowng lawnguan Thurai rik phuang pe mih
1Nami khin khe CHAKRAMANG tek pe Mosi mih, “Faraw hai Aigupta prenchak kowi akatchow towbowt ang natowkah ngare kown. Nami kung kowi dow mami pren hownia Faraw nalawt enni kown towbowt. Mami pren hownia aia dow hing prütta enni kown towbowt.2Naiawng rakowi amatni kowh klowkchakuüa hownia kuh hai tai uanh nakrawi lüla kownkow Israeluüa maten kowi tek pe diah,” pakhai.3Now Israeluüa kowi nasaksing sanaah kownkow CHAKRAMANG dow Aiguptauüa kowi peah saktuak khai. Nami klen kowi Mosi kowi dow akri akraingma mih maru pahai Faraw kowh maru iukuüa hown Aigupta maru-uüa nüla khai bowt.4Faraw kowi Mosi tek pe mih, “CHAKRAMANG tek uar dawng khe Aigupta pren iawng aia nauang mang kown pe.5Aigupta pren paprenma kowi chah ta maten nakowng kown. Faraw kowh chapa ta hownia nakowng hanow mi tung mih narma kowh chapa ta pat nakowng kown; mia kimchak paw nata lat kown nadowi. Nami klen kowi tawncher rik pen mih kowi kowh ala maten paw nakowng bowk kown.6Naiawng rakowi Aigupta pren paprenma kowi dow kar klow nachai ngawnglawng kown. Naiawng khowt mih kar klow dow nami dowi rawn katpaw uowi dowi tak chekhai, now nami kung kowi paw katpaw nauowi kown nadowi bowt tham.7Nachenganchepaw Israeluüa pungmadawng kowi dow rarimma naown kown; maru kowi lah, tawncher kowi lah kui khowm padow na-uh kown nadowi tham. Naiawngün hownia dow Aigupta maru-uüa hown Israeluüa kowi CHAKRAMANG lang kraah pami enni natuk kown.8En kowh maru iukuüa dow ang pur kowi uang tua kung hanow uang tek kown mih, ‘En kowh maru-uüa kowi pawla hanow lawt towbowt!’ napah ang kown. Nami kung kowi dow ang namang bowt kown pe,” pakhai. Naiawngün lai ki tek pe now Mosi dow atawm kunmarau Faraw pur hownia powt khai bowt.9CHAKRAMANG rik tek pe Mosi mih, “Aigupta pren kowi awdara lup ahuma ang nowng tüngla kownkow Faraw mih nasünta en lai kown nadowi,” pakhai.10Naiawngün awdara lup dow Faraw pur kowi Mosi hai Arawn iüah chang khowk chowdiah. Nachenganchepaw CHAKRAMANG mih Faraw kowh saktuak akhawtma changta pe khai rakowi Faraw mih aia pren hownia Israeluüa kowi lawtah dowi chekhai.The Seed Company