Plan Rui1
1Mami bowih kowi kowh arui uowi mih dow Israeluüa kowi Mosi tek pe mih laiklow chekhai. Maiawngün laiklow Israeluüa kowi Mosi tek pe mih khin khe amatni uowi mih dow Moab pren kowi kowh Suf marow re-e kowh süngrüp süngkangma kowi chekhai. Nami dow Jawrdan aw satlawt prakowi chekhai. Amatni uowi rah papra pra dow Paran marow chekhai, now akeng prakowi uowi mih dow Tofel, Laban, Hezerawt hai Dizahab marow chekhai.2(Sinai hungh hownia Seir hungma mawngma iawng mang hanow Kades-Barnea kowi kowtowm kown mih dow lailowk ni chowtaih lakke khai).3Israeluüa kowi natek pe kownkow aia kowi CHAKRAMANG peah mih ana maten dow Israeluüa kowi Mosi tek pe khai. Naiawngün laiklow Mosi tek pe mih dow Aigupta pren hownia amatni uang lawt kung kowi 40 ning khe kowh lailowk la kowi lacher pani khe chekhai.4Naiawngün laiklow aia tek pe mih dow Amawruüa kowh mang Sihun hai Basan pren mang Awk kowi saita kung kowi chekhai. Mang Sihun uowi mih dow Hesbawn marow kowi chekhai, now mang Awk uowi mih dow Edrei hai Astarawt marow kowi chekhai.5Maiawngün ari arow laiklow maten Mosi tek khe amatni uowi mih dow Jawrdan aw satlawt prakowi kowh Moab pren kowi chekhai.6Mosi tek pe mih, “Sinai hungh re-e a-i uowi reng tak khe CHAKRAMANG a-i kowh Thurai tek a-i mih, ‘Mami hungh re-e enni uowi mih akrama khowk chekhai.7Naiawng rakowi kawmat mih lutla tangbung büah hanow Amawruüa pren kowi kowh hungma mawngma kowi hai aria aret kowi kowh maru-uüa tut-e kowkowi büa diah. Amatni uowi mih dow Araba kowi, hungma mawngma süng kowi, laina kowi, Negeb hai sata pang kowi chekhai. Naiawngün süng dow Kananuüa kowh pren hailawm Lebanawn iawng panow Iufratis awma mowr chekhai.8Sünta, naiawngün süng maten dow ang peta enni mih chowbowt. Naiawngün süng dow enni kowh pipu Abraham, Isak, Jakawb hai amatni kung kowi kowh uang ta uowi mih krungchakuüa kowi napeah kownkow ang khamah mih chekhai. Naiawngün süng dow kowkowi hanow kowpowngta büah bowt,’ pakhai.9“Mosi plan tek pe mih, ‘Sinai hungh kowi a-i uowi khe ang tek enni mih maiawng: Ang malowkchow ang nowng khet enni dowi.10CHAKRAMANG enni kowh Thurai mih lainowmma pe prung enni khai. Naiawng rakowi kawmat dow enni mih mukuang kowi kowh krek nowng rüaah dowi mih iawng lainowmma kawm khai bowt.11CHAKRAMANG enni pipu-uüa kowh Thurai dow 1,000 phow pacham pe prung enni küng lah, now aia dow aia kowh laikham iawng pacham pe enni prasi lah.12Nachenganchepaw ang malowkchow tawng iawng chow enni kowh kurdik ang nowng kur kown chow? Enni takhowk taran mih srui kowi ang malowkchow tawng iawng chow ang nowng chet enni kown?13Naiawng rakowi enni chowlowkkow krungchak hownia chanlaima mih, prengia uowima mih hai atukma miuüa kowi ruiah sangrum chi büa diah; amatni kowi dow naming nakhet enni kown mih kurdik ang napeah kown,’ pakhai.14“Nakhowk khe enni klang ang mih, ‘En tek iawng chang mih naiung kown,’ pakhai.15Naiawng rakowi enni chowlowkkow krungchak kowi kowh chanlaima miuüa hai atukma miuüa kowi naming nakhet enni kown mih kurdik ang peah khai. Tawngbak mih kowi dow 1,000 ia luk kowi kowh siphai aluchow, tawngbak mih kowi dow 100 ia luk kowi kowh siphai aluchow, tawngbak mih kowi dow 50 ia luk kowi kowh siphai aluchow, now tawngbak mih kowi dow 10 ia luk kowi kowh siphai aluchow ang thawpah khai. Nami klen kowi tawngbak miuüa kowi dow tara chet mih hai maru iuk ang thawpah khai.16Now tara chet miuüa kowi ang tek pe mih, ‘Israeluüa lala chepaw, Israeluüa hown akeng chenchap chepaw takhowk taran hanow pre powchak kowh laiklow enni nasünta pe kown. Now amatni kowi dow tara nowm enni nachet pe kown.17Enni chet tara mih khin khe mia pra paw enni natawi ia tangila kown nadowi. Aiuk asowm bowkbowk kowh laiklow enni nasünta pe kown takla. Tara chet dow Thurai kowh lup chekhai. Naiawng rakowi mia iawng mih maru kowi paw hangkow kram büa diah. Now enni tut-e achet krat lai mih tara dow ang tut-e uang pawla büa taih, now naiawngün dow ang chet sow,’ pah manow.18Nami klen kowi tawng chow enni achang takla mih paw nami khin khe ang tek enni khowk.19“Nami kung kowi dow CHAKRAMANG a-i kowh Thurai ana pek iawng Sinai hungh hownia lawt hanow Amawruüa pren kowi kowh hungma mawngma süng prakowi a-i tarowng mang khai. Nakhowk khe mün khowt chow iuk hai kramra uowi mih süngrüp süngkangma iawng a-i mang takla mih enni khi khowk chekhai. Naiawng hai Kades-Barnea kowi dow a-i kowting khai.20Nami kung kowi ang tek enni mih, ‘Amawruüa kowh hungma mawngma süng kowi enni uang ting khowk; mami pren mih CHAKRAMANG a-i kowh Thurai pe a-i kown chowbowt.21Mü madiah, CHAKRAMANG enni kowh Thurai pe enni mih pren enni pur kowi chowbowt. CHAKRAMANG enni pipu-uüa kowh Thurai laiklow iawng kowkowiah hanow pren mih kowpowng büa diah. Hangkow kram büa diah, sak paw hangkow nenah büa diah,’ pakhai.22“Nakhowk khe enni bowkbowk uangah now uang tek ang mih, ‘Kowrik chin maru ne diah. Amatni dow tawng mih tiama iawng chow mang e iung kown mih hai tawng marow ngai chow a-i nakrumla kown mih pakowrik mü lah,’ pakhai.23“Enni kowh nami laiklow dow ang nauta khai. Naiawng rakowi enni chowlowkkow krungchak hownia lowk ia chi bowkbowk kowi 12 ia maru ang ruiah khai.24Now amatni dow paimi hungma mawngma süng kowi kowpün khai, now Iskawl lawngrawi kowi kowkowi büah hanow tawng ngai chow uowi mih kowkrawi müla büah khai.25Amatni dow paimi pren hownia kowh uih-ak paw uang pawla ne khai. Now uang tek büah mih, ‘CHAKRAMANG a-i kowh Thurai pe a-i mih pren lainowmma klangiung!’ pakhai.26“Nachenganchepaw paimi pren kowi kowkowi kown mih enni nau dowi. CHAKRAMANG enni kowh Thurai kowh ana pek kowi enni kingküa khai.27Enni dow enni matia tangbung lak kowi Thurai kowi kingküa mih laiklow enni tek khai. Enni tek mih, ‘CHAKRAMANG sui a-i khai. Naiawng rakowi Amawruüa rut kowi apta a-i now piakta a-i kownkow Aigupta pren hownia aia uang lawtla a-i mih chekhai.28Tawngplawng kowchow pai kowi a-i kowkowi kown? A-i kowchinah miuüa piakta a-i sak nak khowk. Paimi prenchakuüa dow a-i lak-e lang kür hai lang kro pe. Amatni kowh marow paw aiukma kangowh pe, now marow tap paw akro kuang dawnglang mowr chi pe. Nami klen kowi Anakuüa kowi paw khila büah pe pami ta dowi bow?’ enni pakhai.29“Naiawng enni tek mih ang ta hanow ang tek enni mih, ‘Hangkow kram büah. Paimi prenchakuüa kowi kaah kram dowi.30CHAKRAMANG enni kowh Thurai dow enni pur kowi rik mang reng chekhai. Aigupta pren kowi hai süngrüp süngkangma kowi enni vüi aia dowk tasen mih enni khi khowk nadowi bow? Nami iawng dow enni vüi aia nadowk tasen iawk kown taih. Chapa kowi khemla hanow a-pa cham pawla mih iawng makowi uang ting dowi mowr CHAKRAMANG enni kowh Thurai uang pawla enni mih enni tuk khowk nadowi bow?’ pakhai.32Naiawng khowt CHAKRAMANG chang enni khowk chepaw CHAKRAMANG enni kowh Thurai luk kowi enni neplawng nesak dowi chekhai.33Aia dow enni kowh tangbung khup rah natüng enni kownkow hai natüng enni tiama kownkow tawi uowila enni reng chekhai. Aia dow ni-e khe uangnim iowng chunglung mih dawng kowi hai iak-e khe maih lün iowng chunglung mih dawng kowi uowiah hanow enni pur kowi rik mang reng chekhai.34“Enni kowh laiklow tata now CHAKRAMANG kunmarau lai kowh kham sawi se tek mih, ‘Enni pipu-uüa kowi napeah kown pahai ang khamah mih pren klangiungma mih dow Jefune kowh chapa Kaleb lowk iachow taih nakhi kown. Kaleb klen kowi dow kawmat chowng kowi kowh maru ngakuüa miapaw natawi khi kown nadowi. Kaleb dow achi anawmma hai ang kowh laiklow chün khai. Naiawng rakowi aia chawpla mih krawng srui aia hai aia krungchakuüa kowi ang napeah kown,’ pakhai.37“Enni rakowi CHAKRAMANG dow ang luk kowi paw lainowmma kunmarau khai. Naiawng rakowi aia tek ang mih, ‘Paimi pren kowi en paw natawi ka kup kown nadowi.38Nachenganchepaw en kowh akhowng mih Nun kowh chapa Josua dow naka kup kown. Josua kowi phai peah sakkraingra diah. Tawngplawng kowchow panow paimi pren napowng kownkow Israeluüa kowi nakruitownah kown mih dow aia chekhai.39“A-i kowh chauüa kowi nakhümla bowk kown towbowt,” padow enni tek khai. Naiawng enni tek mih khin khe naiawngün ngeuüa hawmh dow aiung angak tawngpaw tuk dowi tak chekhai. Naiawngünuüa chowtaih paimi pren kowi naka kup kown. Pren mih dow amatni kowi ang napeah kown, now amatni dow paimi pren napowngta kown.40Nachenganchepaw enni dow kawmat kung pra plan büah hanow sata Rik pra kowh tiama iawng mangah now süngrüp süngkangma kowi kowkowi büa diah,’ pakhai.41“Nami laiklow tata hanow enni tek mih, ‘CHAKRAMANG kowi kingküala mih angak anging changta khai bowt. Kawmat dow CHAKRAMANG anging kowh Thurai ana pek iawng anging tarü tasen kown towbowt,’ pakhai. Naiawng enni tek hanow enni dowk tasen müa rutchün khawkleng bowk khai. Hungma mawngma süng kowi kowtasen kown mih aiachow padow enni ka tuak khai.42“Nachenganchepaw natek enni kownkow CHAKRAMANG tek ang mih, ‘Hang cham dowk tasen büa diah. Ransu-uüa tut-e enni nacham sum kown taih. Tawngplawng kowchow panow enni tut-e ang natawi uowi kown nadowi,’ pakhai.43“Nami laiklow ang tek enni khowk chowdiah. Nachenganchepaw enni chün dowi chekhai. CHAKRAMANG kowh ana pek kowi üala hanow owrowma hai hungma mawngma süng prakowi enni awr pün khai.44Naiawng enni kowpün mih khita hanow hungma mawngma süng kowi kowh uowi mih Amawruüa maten dow uang dowk enni tasen khai. Amatni dow kuai kunmarau khe kowh kawikrawi maru mih iawng uang talut hanow Seir hungma mawngma süng hownia Hawrma hungh mowr uang krawi sen enni khai.45Nakhowk khe dow enni uang plan hanow CHAKRAMANG tut-e enni uang nguk uang kar khai. Nachenganchepaw aia dow enni kowh kar klow sünta enni dowi chekhai; aia dow pitta param khai.46Naiawng rakowi Kades-Barnea kowi akrama enni uowila khai,” pakhai.
The Seed Company