Plan Rui2
Süngrüp süngkangma kowi Israeluüa
1Mosi plan tek mih, “CHAKRAMANG ana pek iawng kung prakowi a-i plan hanow sata Rik pra kowh mangla mih tiama iawng mangah now süngrüp süngkangma kowi a-i kowkowi khai. Seir hungma mawngma süng kowi a-i krawi mangla mih dow akhin krama chekhai.2“Akung kowi CHAKRAMANG tek ang mih,3‘Mami hungma mawngma süng kowi enni krawi mang mih akrama khowk chekhai. Naiawng rakowi kawmat dow tawngphak prakowi tarü büa diah,’ pakhai.4“Nami kung kowi dow natek enni kownkow aia tek ang mih, ‘Khaleng dow Seir hungma mawngma süng kowi kowh uowi mih enni kowh tainau Esau krungchakuüa kowh pren iawng enni namang kown takla. Amatni dow khi enni hanow nakram enni kown. Nachenganchepaw kaneuma uowiah büa diah.5Esau krungchakuüa kowi mih enni nahauah tasen kown nadowi. Tawngplawng kowchow panow amatni kowh pren dow ditchow paw ang nape enni kown nadowi; khawk chawpra krowngchow khowm padow ang nape enni kown nadowi. Mami Seir hungma mawngma süng dow nachangla pren kownkow Esau kowi ang peta mih chowbowt.6Chakkham hai tui khowm padow amatni hownia mih enni naranah kown takla.7CHAKRAMANG enni kowh Thurai mih enni kowh lup maten kowi pe enni prasi khai. Mami süngrüp süngkangma aiukma mih iawng enni uaimang mih khin khe paw aia dow mingkhet enni khai. Mami 40 ning mowr aia dow tawi uowila enni khai, now tawng chap paw khawr hown aia dow tow enni dowi chekhai,’ pakhai.8“Naiawng rakowi CHAKRAMANG ana pek iawng Seir hungma mawngma süng kowi kowh uowi mih a-i tainau Esau krungchakuüa kowh pren iawng a-i kowmang khai. Elat marow hai Eziawn-Geber marow hownia Araba lawngrawi pra kowh mangla mih tiama dow a-i towla hanow Moab pren kowi kowh süngrüp süngkangma prakowi a-i haimang khai.9“Akung kowi CHAKRAMANG tek ang mih, ‘Moabuüa kowi hangkow pusala büah, tasen paw hangkow haula büah. Tawngplawng kowchow panow amatni kowh pren dow ditchow paw ang nape enni kown nadowi chekhai. Nachangla dawngthawnguan kownkow Ar marow dow Lawt krungchakuüa kowi ang peta mih chowbowt,’ pah ang khai,” pakhai.10(Moabuüa dowi rawn Ar marow kowi uowi mih dow Emimuüa chekhai. Emimuüa dow maru iun akawmma hai akürma chekhai, now Anakuüa iawng akroma kangowh chekhai.11Anakuüa kowi iawng Emimuüa kowi paw Refaimuüa pahai maru tukah reng chowdiah. Nachenganchepaw Moabuüa dow amatni kowi Emimuüa pahai hawah khai.12Seir hungma mawngma süng kowi rik uowi mih dow Hawruüa chowdiah. Nachenganchepaw nami hownia amatni kowi dow akung kowi Esau krungchakuüa uang prütta khai. Amatni kowh pren dow Esau krungchakuüa uang khünta pe khai. Nachangla dawngthawnguan kownkow CHAKRAMANG peah mih Kanan pren kowi Israeluüa kowchang iawng Esau krungchakuüa paw Hawruüa kowi changah khai).13Now Mosi plan tek mih, “CHAKRAMANG tek ang mih, ‘Kawmat dow rü büah hanow Zared lawngrawi paipra kowi kowkowi büa diah,’ pakhai. Naiawng rakowi Zared lawngrawi paipra kowi a-i kowkowi khai.14Kades-Barnea hownia lawt kowh Zared lawngrawi mapra pown kowi a-i uang towm mowr kowi 38 ning a-i kowita khai. Nami chowng khe kowh siphaiuüa maten dow nami 38 ning takra kowi CHAKRAMANG kowh laikham iawng kowng bowk khai.15Tawngplawng kowchow panow amatni bowkbowk kowi tangbung khupra hownia nakowngta kownkow CHAKRAMANG kingküaah mih chekhai.16“Naiawngün siphai hawmuüa kowng bowk kung kowi CHAKRAMANG tek ang mih, ‘Ani dow Ar marow ria iawng kowmangah hanow Moabuüa kowh pren sünghi enni naklenla kown.19Tawkchedow Amawnuüa kowh pren ria kowi enni kowting mih khin khe Amawnuüa kowi enni napusaah kown nadowi, now tasen paw enni nahauah kown nadowi. Tawngplawng kowchow panow Amawnuüa kowh pren dow ditchow paw ang nape enni kown nadowi. Nami pren dow nachangla dawngthawnguan kownkow Lawt krungchakuüa kowi ang peta mih chowbowt,’ pah ang khai,” pakhai.20(Amawnuüa kowh pren dow Refaimuüa kowh pren pahai maru tukah khai. Tawngplawng kowchow panow nami pren kowi rik uowi mih dow Refaimuüa chekhai. Amawnuüa dow amatni kowi Zamzumimuüa pahai hawah khai.21Refaimuüa dow akürma hai maru iun akawmma chekhai. Amatni dow Anakuüa iawng akroma kangowh chekhai. Nachenganchepaw amatni kowi dow Amawnuüa rut kowi CHAKRAMANG pe sumah khai. Naiawng rakowi amatni kowi prütta hanow amatni kowh pren dow Amawnuüa khünta pe khai.22Nami powm iawng dow CHAKRAMANG mih Esau krungchakuüa vüi kowi paw chang pe khai. Hawruüa kowi paw Esau krungchakuüa rut kowi CHAKRAMANG pe sumah khai. Naiawng rakowi Hawruüa kowi prütta hanow amatni kowh pren dow Esau krungchakuüa khünta pe khai. Kawmat pat paw Seir hungma mawngma süng kowi dow Esau krungchakuüa uowi reng tak chekhai.23Nami powm iawng dow Avimuüa kowi paw Filistinuüa uangah hanow uang khünta pe uowi rah khai. Avimuüa kowh kua maten Filistinuüa khünta pe mih dow Gaza marow mowr chekhai).24Now Mosi plan tek mih, “Akung kowi CHAKRAMANG tek ang mih maiawng, ‘Lawt büah hanow Arnawn aw paipra pown kowi kowkowi büa diah. Sünta, Hesbawn marow kowi kowh Amawruüa mang Sihun hai aia kowh pren mih ang peta enni mih chowbowt. Amatni kowi dow kowsenah büa diah, now amatni kowh pren dow powngta pe büa diah.25Ani hownia now palusama maru kowi enni lawnguan kowi kramra hai takrow takraira ang uown peah kown. Palusama maru mih enni lawnguan kowi ta hanow nachür bowt kown, now enni rakowi amatni kowh saktuak dow lainowmma napusa kown,’ pakhai.26“Nami kung kowi dow taking tasangra nauowila kownkow Kedemawt süngrüp süngkangma hownia Hesbawn marow mang Sihun tut-e ang kowchin pe satang phowng mih khai.27Ang krawi tek pe mih, ‘En kowh pren iawng pe mang anging diah. Hawmlawm pra hai lakuai pra krawi mangla dowi kowi tiama rowkrowk anging namang kown taih.28Anging chala kown mih chakkham hai tui asung ün anging pela en kown taih. Jawrdan aw haipown hanow CHAKRAMANG anging kowh Thurai nape anging kown mih pren kowi ting dowi mowr mih en pren iawng pe mang anging diah; khawk hown taih anging namang kown. Seir hungma mawngma süng kowi kowh Esau krungchakuüa hai Ar marow kowi kowh Moabuüa iawng dow en paw pe mang anging diah,’ pakhai.30Nachenganchepaw Hesbawn marow mang Sihun mih nauta dowi. Aia kowi dow enni rut kowi nape sumah kownkow CHAKRAMANG enni kowh Thurai mih aia kowh saktuak akhawtma hai laiüama changta pe khai. Aia kowh pren dow kawmat mowr a-i powngta pe khai.31“Akung kowi CHAKRAMANG tek ang mih, ‘Sünta, mang Sihun hai aia kowh pren dow en rut kowi ang apta en mih chowbowt. Naiawng rakowi kowkowiah hanow aia kowh pren mih kowpowngta kownkow hai kowuowi bowt kownkow tarowng büah bowt,’ pakhai.32“Nami kung kowi dow mang Sihun mih aia kowh siphai hawmuüa maten kowi uang pawla now uang sen a-i kownkow Jahaz marow kowi uang khai. Nakhowk khe aia kowi dow a-i rut kowi CHAKRAMANG a-i kowh Thurai mih pe sumah khai. Aiamat hailawm aia kowh chapauüa hai aia kowh siphai hawmh maten kowi a-i saita khai.34Nakhowk khe aia kowi dow a-i nowngta hanow aia kowh marow maten a-i piakta pe bowk khai. Nakowi kowh kachakuüa, masiuüa hai ngeuüa hawmh kowi asaima a-i saita khai; mia kowi paw a-i pe singah dowi chekhai.35Nachenganchepaw marow kowi kowh tawncher hai asung khakma mih uanh dow a-i matia vüi a-i uang lutla pe kria khai.36Arnawn lawngrawi ria kowi kowh Aroer marow hai nami lawngrawi kowi kowh marow hownia Gilead süng mowr a-i powngta pe bowk khai. A-i nowng powngla dowi mih marow dow lowkchow paw uowi dowi bowt chekhai. Naiawngün dow CHAKRAMANG a-i kowh Thurai mih a-i rut kowi apta a-i bowk khai.37Nachenganchepaw Amawnuüa süng kowi kowh Jabawk aw ria, hungma mawngma süng hai CHAKRAMANG pe kowi a-i dowi mih arah kowi dow a-i krawi kowila dowi chekhai.The Seed Company