Tarüa36
Zelofehad chamauüa kowh krawng bawn
1Gilead dow Makir kowh chapa chekhai. Makir kowh pa dow Manase, Manase kowh pa dow Josef chekhai. Gilead krungchak kowi kowh aluchowuüa dow Mosi hai akeng mih Israel krungchak aluchowuüa tut-e nakowtalawp kownkow kowkowi khai.2Now amatni tek pe Mosi mih, “Kuak pe plang hanow Israeluüa kowi nabak pe krawng bawn kown mih CHAKRAMANG pe en ana khai. Now anging kowh tainau Zelofehad kowh krawng bawn dow achamauüa kowi napeah kown mih ana paw CHAKRAMANG pe en khai.3Nachenganchepaw naiawngün Zelofehad kowh chamauüa dow Israel pungmadawng kowi kowh akeng mih krungchakuüa tut-e cham mang mih paw nauowi kown. Now anging pipu-uüa hownia amatni kaah mih krawng bawn dow amatni huauüa kowh krungchak vüi nachowng kown towbowt. Naiawng hai anging krungchakuüa kowh krawng bawn dow na-e kown towbowt.4Now amatni cham sumta krawng bawn khai hanow Jubili ning uang ting chepaw nami krawng bawn mih anging krungchakuüa naka kown nadowi bowt. Nami dow amatni huauüa kowh krungchakuüa napowngta pe kown. Naiawng hai anging pipu-uüa hownia kowh anging kaah mih krawng bawn dow napraita anging kown,” pakhai.5Nakhowk khe CHAKRAMANG kowh ana pek iawng Mosi tek pe Israeluüa mih, “Josef krungchakuüa tekah mih na nowm chekhai.6Naiawng rakowi Zelofehad kowh chamauüa lawnguan kowi CHAKRAMANG pe ana mih, ‘Enni nauah mih tut-e enni cham ia mang kown taih. Tawkchedow enni matia krungchakuüa tut-e enni nacham mang ngengche kown takla,’ pakhai.7Israel pungmadawng kowi chowlowkkow krungchakuüa kowh krawng bawn dow akeng mih Israel krungchakuüa kowi naia pe kown nadowi. Amatni chowlowkkow pipu-uüa hownia kowh kaah mih krawng bawn dow amatni natownah reng kown takla.8Israeluüa pungmadawng kowi plungrak uowi dowi kowh dawngthawnguan powng takla mih masiuüa dow amatni chowlowkkow krungchakuüa tut-e nacham mang kown takla. Nahanow amatni chowlowkkow pipu-uüa hownia kowh kaah mih krawng bawn dow amatni krungchakuüa tut-e nauowi reng kown towbowt.9Israel pungmadawng kowi kowh chowlowkkow krungchakuüa kowh krawng bawn dow akeng mih Israel krungchakuüa kowi naia pe kown nadowi. Amatni chowlowkkow krungchakuüa kowh krawng bawn dow amatni natownah reng kown takla,” pakhai.10Nahanow Zelofehad kowh chama Mala, Tirza, Hawgla, Milka hai Noa büah dow Mosi kowi kowh CHAKRAMANG peah mih ana iawng rowprowp chang büah khai. Amatni dow amatni krungchak kowi kowh pahi pamauüa kowh chapauüa tut-e cham mang khai.12Amatni dow Josef kowh chapa Manase krungchakuüa tut-e cham mang büah khai. Naiawng rakowi amatni krungchakuüa kowh krawng bawn dow amatni krungchakuüa tut-e uowi reng chekhai.13Maiawngün ana pek hai ari arow dow Israeluüa kowi nakowtek pe kownkow Mosi kowi CHAKRAMANG peah mih chekhai. Nakhowk khe amatni uowi mih dow Moab pren dowm nai kowi chekhai. Nami dowm nai dow Jawrdan aw paipra pown kowi kowh Jeriko marow hown tatang klowk chekhai.The Seed Company