2 Krungchakuüa24
1Juda pren kowi Joas chowm mang mih dow ranit ning khe chekhai. Now Joas dow 40 ning mowr Jerusalem marow kowi chowmla mang khai. A-u dow Ber-Seba marow hownia kowh Zibia chekhai.2Uamow Jehoiada sing uowi mowr dow Joas mih CHAKRAMANG mik kowi aiungma mih lup chang reng chekhai.3Jehoiada dow mang Joas kowi paw pe masi pre ma khai, now Joas dow ka chauüa khai.4Akung kowi Joas dow CHAKRAMANG kim naraw kown pahai saktuak anikma towah khai.5Naiawng rakowi aia dow uamowuüa hai Leviuüa kowi kuaah lawmah hanow tek pe mih, “Enni mih ning towng CHAKRAMANG kim kowi kowh lup chang müa vüi nakrawi kawk mangmu kownkow Juda pren kowi kowh kua hai marow maten kowi kowkrawi kowi büa diah. Nami lup dow alenma changah büa diah,” pakhai. Nachenganchepaw Leviuüa dow nami lup alenma chang pe dowi chekhai.6Naiawng rakowi uamow lang kri mih Jehoiada kowi hawah now mang Joas tek pe mih, “Taklowp taklangra te vüi nape mangmu kown mih Israeluüa maten luk kowi CHAKRAMANG kowh nar Mosi mih khowmta bowkta khowk chekhai. Nami mangmu mih Juda pren hownia hai Jerusalem marow hownia nakrawi paw kownkow Leviuüa kowi en kowchinah dowi mih tawng rakowi chow?” pakhai.7Athalia kowi tangila miuüa dow CHAKRAMANG kim kowi kowkup hanow nakowi kowh chimsaima mih uanh ün pawla khai, now naiawngün uanh dow Baal thuraiuüa vüi kowi tawngah büah khai. Athalia dow angakma mih masiuüa chekhai.8Leviuüa dow mang ana pek iawng thawp tawkpla lowk hanow CHAKRAMANG kimplawt uat kowi towah büah khai.9Now süngrüp süngkangma kowi kowh Israeluüa luk kowi Thurai kowh nar Mosi khowmta bowkta mih mangmu dow CHAKRAMANG tut-e maru kawmuüa nauang pawla kownkow Juda pren hai Jerusalem marow kowi krawi phuang büah khai.10Nami tata hanow aluchowuüa hai maru kawmuüa dow awmrawm khai, now amatni dow tawkpla tek dowi mowr amatni kowh mangmu mih uang pawla hanow nami tawkpla kowi uang towah khai.11Now Leviuüa dow nami tawkpla mih ni towng mang kowh maru iukuüa tut-e kowpawla reng chekhai. Now nami tawkpla kowi tangka tek mih khi khowk hanow mang kowh cha rui mih hai uamow lang kri mih kowh maru iuk dow uangah hanow uang klaita reng chekhai, now nami dow atowk rah kowi plan towla reng chekhai. Naiawng hai pani kowh pani tangka mih ahuma uang takrüm khai.12Now nami tangka dow CHAKRAMANG kim rawk miuüa rut kowi mang Joas hai Jehoiada iüah mih ap pe khai. Nahanow amatni dow CHAKRAMANG kim naplan raw kownkow hua bawp sarauüa hai singh ngen sarauüa kowi ngaah khai, now lawngha hai kri hown kowh lup chang sarauüa kowi paw ngaah büah khai.13CHAKRAMANG kim rawk miuüa dow lainowmma towsak khai. Naiawng rakowi amatni kowh lup chang dow chawn reng chekhai. Nami CHAKRAMANG kowh kim dow auown khe kowh iawng akhawtma thawpah büah khai.14Now lup chur kung kowi kowh ta marat mih tangka dow mang Joas hai Jehoiada iüah tut-e uang pawla büah khai. Now amatchi dow naiawngün tangka hown CHAKRAMANG kim kowi kowh vüi thawpla uanh khai: Tikah mih uanap chang müa uanh ün, kep ün, akeng mih kuh hai tai uanh ün chekhai. Jehoiada sing uowi mowr dow tikah mih uanap pawi CHAKRAMANG kim kowi chang reng chekhai.15Jehoiada dow alawngtangma mowr singla khai, now aia dow 130 ning khe kowng khai.16Aia dow Israeluüa pungmadawng kowi Thurai hai aia kim vüi kowi lup iung changla khai. Naiawng rakowi aia kowh uak dow David marow kowi kowh manguüa tadupra kowi dupah khai.17Jehoiada kowng kung kowi Juda aluchowuüa dow mang Joas tut-e uangah hanow uang chupah khai. Now mang Joas kowi amatni kowh prengia pek laiklow pe süntaah khai.18Amatni dow CHAKRAMANG amatni pipu-uüa kowh Thurai kowi nuata hanow Asera limpu kowi hai arup aren kowi cham chupiia büah khai. Amatni kowh nami angak rakowi Thurai kowh kunmaraura dow Juda pren hai Jerusalem marow luk kowi uang ting khai.19Nachenganchepaw CHAKRAMANG dow aia prakowi amatni kowi nauang pawla kownkow risiuüa kowi uang chin pe khai, now nami risiuüa dow amatni Thurai prakowi nauang plan kownkow uang tek pe khai. Tawkche amatni dow nau sünta dowi chekhai.20Nakhowk khe Thurai lümla dow uamow Jehoiada kowh chapa Zekaria luk kowi uang ting khai. Now Zekaria dow maru kawmuüa pur kowi iowng se tek pe mih, “Thurai tek mih, ‘Tawngplawng kowchow CHAKRAMANG kowh ana pek enni chün dowi? Naiawng rakowi enni changah mih lup naphaw kown nadowi. CHAKRAMANG kowi enni nuata khai rakowi CHAKRAMANG paw nuata enni khai bowt,’ pakhai,” pape khai.21Nachenganchepaw maru kawmuüa dow Zekaria kowi nakowngta kown mih sangkrang khai, now aia kowi dow mang ana pek hown CHAKRAMANG kim viadawng kowi huaklu hown kowng pat kuakah khai.22Aia luk kowi kowh Jehoiada kaah sakowm iawng uowi mih tuakla dowi kowi mang Joas dow Jehoiada kowh chapa Zekaria kowi saita khai. Aia kowng mih khin khe Zekaria tekla mih, “CHAKRAMANG dow mami en kowh lup nakhi hanow narip en kown,” pakhai.23Auai ning khe dow Siria siphaiuüa mih mang Joas kowi uang kingküaah khai bowt. Amatni dow Juda pren hai Jerusalem marow kowi uang senah hanow aluchowuüa maten kowi kowngla bowk khai. Now amatni uang rupla mih uanh maten dow Damaska marow kowi kowh amatni kowh mang tut-e uang pawla büah khai.24Siria siphaiuüa uang mih dow a-echow taih chowdiah. Nachenganchepaw Juda siphaiuüa thum iukma mih kowi dow amatni rut kowi CHAKRAMANG ap-ah rakowi nowngta büah khai. Tawngplawng kowchow panow Judauüa dow CHAKRAMANG amatni pipu-uüa kowh Thurai kowi nuata büah khai. Naiawng hai mang Joas kowi dow Siriauüa hown CHAKRAMANG ripah khai.25Siriauüa dow Joas kowi bawpla nak hanow powtta pe khai. Uamow Jehoiada kowh chapa kowi kowngta khai rakowi Joas kowi dow aia kowh maru iukuüa nasaita kown mih sangkrang khai, now aia kowi dow mawk rah luk kowi aia kowh maru iukuüa saita hanow David marow kowi dupah khai. Nachenganchepaw aia kowi dow manguüa kowh tadupra kowi dupah dowi chekhai.26Mang Joas kowi nasaita kown sangkrang mih maru iukuüa dow Zabad hai Jehozabad iüah chekhai. Zabad dow Amawnuüa chenchap Simeat pami masiuüa kowh chapa, now Jehozabad dow Moabuüa chenchap Simrit pami masiuüa kowh chapa chekhai.27Joas kowh chapauüa lawnguan, aia luk kowi kowh nauang phaw kown mih lawnguan hai Thurai kim rawk lawnguan dow “Manguüa Lawnguan” pami bowih kowi arui uowi bowk chekhai. Aia takcha kowi dow achapa Amazia mih ta chowm mang khai.
The Seed Company