Kalati5
1Eenucee ya afakanaafakan unaa ti himiikanate kati uyihaa pántoon. Ooto nicok piliit, timpi nicoon nipiyeno nene pimiikan.2Nísiitan, inci Póol pusok aluu nii: niŋ ninaŋaa kunuu aluu ti kanakan kati ewun Pútuun pa mpucok aluu keecoonoole, ooto Eenucee ya atataak nafaa ti aluu.3Inci pinene sok aluu: an óo an eecoone kati anakanee, añaŋaa hítuulu púlooŋ eeha hilim ha heesiiŋanee ha hiti Móyiis nihisoke ha.4Aluu keeyem ka ti hiŋesu Pútuun pa kati pucok aluu pakan keecoonoole, kamma ínnituule hilim ha heesiiŋanee ha hiti Móyiis, níkatinoolee-kátinool niŋ Eenucee ya; niyesanaayesan puson aluu panap pa piti Pútuun pa.5Pale unii, úhinaahin cíki nii Pútuun pa efipucok unaa pakan keecoonoole kamma núuyinanaa. Eehuu nuuyem ti hítuulu pínapii ti sempe sa siti Kunuu ka keenape ka.6Kaatuko niŋ uyemaa oonool niŋ Yéesu Eenucee ya, pinako niŋ fotom káanakiyaati ataakut ti unaa nafaa. Pale heetaake ha nafaa hiyem káyinan ka kiti aluu kéehine ka aluu nípilafi pakakee paka.7Niyenaayeno hínum katey pinap! Ayme áhine aluu nípiyekuno hítuulu tooñaa ya?8Héetunke ha aluu ti eehuu hífuliyoot ti Pútuun pa peeyonkale pa aluu.9Kásokumpe enke kusok: “Caahinkilis leweñoo nékuntan hímaaf púmpuluŋ.”10Pale Ateeteyo náahinam pihinto aluu nii etinitaak pikee pámiiloolal peekufut niŋ putoom pa. Ooto an óo an éepucaloole fiyuu pámiiloolal aluu, fan óo fan naayem, Pútuun pa efipisiiŋanoo ti pisiya.11Pakanam ti káyinan, niŋ pánipani inci loŋaa ti káatuunan nii pakan paka kañaŋee kanakan, ooto weyme uwune illoŋee ti kaakallan? Niŋ eehuu hiti tooñaa, ooto káatuunan ka kutoom kiti eket ya eti Eenucee ya ti kuluwaa ya étihicoopii páciite.12Inkéyyoo ti keeyem ka ti káapucalool fiyuu kunuu aluu, álimaati kahaŋ nkáhine ho fo kakeekoolo!13Pakanam ti káyinan, Pútuun pa piyonkalaa-yonkal aluu nipifakanee ti himiikanate. Ooto fa innineetaat fa fiye pimiikan, timpi ewun inniloŋ eloŋ eti pásuuma aluu pale niyankananool ti pálafi.14Kaatuko hilim ha heesiiŋanee ha hiti Móyiis púlooŋ, eehe lamma híwufaloole ho, hikina hiyem: “Láfi akinooli samat nii fa állafiye fa faŋi.”15Pale inniwenaa samat nii púlukuleen elampa, empa mpulumalool mpiliyool, nitah kunuu niŋ fotom éfinipucalool faŋ aluu.16Inci pusok aluu eehe: nikat Kunuu ka keenape ka kípitintiŋan eloŋ ya eti aluu. Inníhinaa fo, etininapan kunuu aluu keenaput ka.17Kaatuko eeha kunuu keenaput kiti an nkílafiye ha hikufut nii hiti Kunuu ka keenape ka, fo lompo incuke pálafi pa piti Kunuu ka keenape ka pukufut nii piti an. Kayinaat pinapool háati poonool, ekina ewune aayinaat íhinu eeha állafiye ha.18Pale iyyema Kunuu ka keenape ka kiyem ti kátintiŋan aluu, ooto nineetaat ti hilim ha heesiiŋanee ha hiti Móyiis.19Uméyiyaameyi eeha pawenal kunuu keenaput nácoopii ha ti pakan paka, samat nii eehe: casupoolat, káakuulaati, pacul,20kaawaaseen pínaati, kaasaay, kanat, pílaacinool, paheeka, káñiken, páhaŋool peenaput, píkatinool, píŋayinool,21kaasiiŋan níkin ti waah uti an, ékuman niŋ hili fo muus, niŋ hícump waah samat nii fiyuu. Inci púkupanan aluu, samat nii fa inci ínkupanane fa aluu hínum nii: payenka nkáhin ka eehuu etikataak himpaac ti cáwii ca citi Pútuun pa.22Pale eeha Kunuu ka keenape ka nkupuk ha ti eloŋ ya eti unaa eyem: pálafooli, pásuuma, kásuumaay, kamukut, panap, piyankananool, pucoonool,23paneene niŋ ecocokanoolo. Hilim heesiiŋanee hineetaat toko heepooke enkuu fiyuu!24Pakan paka pakati Yéesu Eenucee ya, kapempeŋaa-pempeŋ ti kuluwaa ya kunuuwii keenaput ka niŋ pálafi etenko.25Páawoo Kunuu ka keenape ka kuwufane unaa eloŋ, ukataa ko kípitintiŋan eloŋ ya eti unaa.26Timpi úseepinooliyaa, timpi útaakoolaa, timpi lompo utaakoolaa paheeka.
Wycliffe Bible Translators, Inc.