Kalati6
1Pakanam ti káyinan, niŋ an ti aluu acokee ti kaamuuyen, aluu keetaake ka Kunuu ka keenape ka níñahaniyoo ti pítin pa ti pamon. Pale nitah kunuu aluu lompo timpi ninow ti kaamuuyen.2Niyankananool, an óo an atiyo kúnuul ka kiti áwiyoo. Niŋ níhinaa fiyuu, éfinituul hilim ha heesiiŋanee ha hiti Eenucee ya.3Kaatuko niŋ akee ti aluu ámiiloolaa ti hikawoo nii ahaŋa hitaaku nafaa, apan aneetaat likee, kincaakool faŋoo naayaake.4Pale an óo an áwasum pawenaloo. Niŋ acukaa ti faŋoo waah uti hímulu, acuk wo lamayoo kóŋ, timpi aŋes kaakufumool wo niŋ akee.5Kaatuko fo an óo an atiyo pitiyo pa piteyoo.6Aŋa eekalaŋanee hilim ha hiti Pútuun pa, añaŋaa káapaacinool waah óo waah weenape niŋ eeyem a ti kakalaŋan.7An óo an ti aluu timpi acaamoolo: Pútuun pa piyinaatee káapalahool. Kaatuko an óo an afaamaañ aŋa naasuke ya.8Kaatuko niŋ an asukaa hak pálafi kunuuwoo keenaput ka lamma, afaamaañ épucaloolo. Pale niŋ an asukaa héesuume ha Kunuu ka keenape ka, afaamaañ eloŋ ya eepayantoo ya.9Timpi úwusenaa ti íhinu heenape, kaatuko niŋ úwusenutaa, efuumaañaa niŋ caanak ca cícoliyoo.10Ooto niŋ utaakaa káasiiŋuma keenape, úhinaa heenape pakan paka púlooŋ, picaahaŋ ti miin ma miti kéeyinane ka.11Nisincan fa pakiicalam mpufome fa: inci kiice po niŋ epeesam.12Keeyem ka aluu fiye ti hítunku, ti hisoku nii niñaŋee kanakan, payenkuu kálafilafi kati kacukee ti pakan paka. Hoonool eeha nkálafiye ha hiyem, an timpi akallanii, ekina ewune kakalaŋanantoo nii kuluwaa ya eti Eenucee ya lamma eyina kafakan.13Háati keenakanee ka faŋii, kaneetaat ti hítuulu hilim ha heesiiŋanee ha hiti Móyiis púlooŋ. Pale nkálafi nipinakanee ancuk kati kámakiyanoolo ti hisoku nii poko kawune inninakanee14Pale inci, álimaati timpi mákiyanoolo fo niŋ neetaat lamma ti kuluwaa ya eti Ateeteyo Yéesu Krista ati unaa. Eket ya eteyoo ti kuluwaa ya ewune incok waah wa uti púlunta pe nii weekete, ukina lompo nuucokam nii eekete.15Pinako niŋ fotom káanakiyaati ataakut nafaa; heetaake ha hikaw hiyem, Pútuun pa píhinaahin unaa pakan kéeyeeni.16Alímaati Pútuun pa puwufan kásuumaay niŋ paket hikaw an óo an eeyem ti kanapan eehuu, poko kayem Israyel ya eti Pútuun pa.17Písik fiye, an timpi awasam nene kúnuul, kaatuko háakum ha heeyem ha ti eniinam, híyisanaayisan nii inci ati Yéesu.18Pakanam ti káyinan, Alímaati Ateeteyo ati unaa Yéesu Krista asampan kunuu aluu púlooŋ! Amíini.
Wycliffe Bible Translators, Inc.