Kalati4
1Eeha inci iyyem ha ti hisoku uuhe: aŋa eeñaŋe hitoonu hisaanumate ha hiti paapaa ateyoo, apan naaloŋ añii, ákatinoolut niŋ amiikan. Háati fa naakaakaay fa hitoonu hisaanumate ha púlooŋ,2fo átuul keeyemoo ka ti kaamankool niŋ keeyem ka ti kaasincan hisaanumate ha hiteyoo, fo ta sitiil ensa paapaa ateyoo naasoke sa éfisicolii ta.3Unaa lompo fo nuuyemaa: ta nuuyeniyaa ta samat nii epuuk, uyeniyaayeno pimiikan ti kísaalumant ka kiti púlunta empe.4Pale ta hinoom eeha Pútuun pa mpucoke ha níhicolii ta, mpúpoñii añii etempo, aŋa aal naapuke. Náakulee ti hilim ha heesiiŋanee ha hiti Móyiis,5kati afakan keeyem ka ti hilim ha heesiiŋanee ha, ancuk úyenooniyaa epuuk Pútuun pa.6Apan kamma nuuyemaa epuuk Pútuun pa, mpúpoñii Kunuu ka kiti Añii etempo ti saan unaa. Kunuu enkuu nkíhin unaa upuceekaa ti hisoku: “Apa, Paapaa!”7Fiye uneetaataa nene pimiikan, pale epuuk etempo, apan niŋ uyeniyaa epuuk etempo, ooto efipuwufan unaa eeha mpíyinanane ha.8Pale ti púcook pa, le niŋ éfinimeyi Pútuun pa, niyenaayeno pimiikan pakati ñútuun ñeeneetaat tooñaa.9Páawoo fiye nímeyimeyi Pútuun pa, niŋ fotom insok, Pútuun pa pímeyimeyi aluu, puume conko inniyem ti puñoho ti hítuulu kísaalumant keetaakut sempe niŋ nafaa? Fo efi nene nílafi piyeno pimiikan pakati kísaalumant enkuu?10Aluu unka ti hiŋesu pásuum pa piti Pútuun pa ti pahaaño ñahaaño ña púlooŋ ñiti Pusuwif pa, samat nii hinoom ha hiti kayeno ka, pahaaño pa piti hiim ha héeyeeni ha, niŋ ñikee ñahaaño ña.11Inci feyaafe nii páhin empa púlooŋ inci ínhine pa ti aluu, páhin piti kenseŋ.12Pakanam ti káyinan, inci fúliyooful ti hilim ha heesiiŋanee ha hiti Móyiis píyenoonii samat nii aluu keeneetaat ka Pusuwif. Fiye inci oopa ti kaluum aluu, nicuk samat nii inci. Níhinutam heenaput.13Samat nii fa innimeya fa, ti káakuuñu inci íyyaañe túunan aluu ekooŋan ya éesuume ya,14ántuŋ níyiniyaamyini hínum hinatu, niŋ fotom innipookam kamma káakuuñu ka kutoom, pale inniwananam pinap samat nii maleekoo eti Pútuun pa, niŋ fotom samat nii Yéesu Eenucee ya faŋoo.15Oom waati innimeeŋ niŋ pásuuma ti inci! Ooto eeheyme hitaakiye aluu fiye? Kaatuko híiniyaamhiini nii, niŋ híyiniyini hínum pitaako, anti nílokit ñíkin aluu nipiwufanam ño!16Ooto fo inci yénooniyoo-yeno fiye akamool aluu kamma inci insoke aluu tooñaa ya?17Pikalaŋana pa payenkuu, keeneetaat ka pakati páni ya, kataakaataak hame eti hikolu aluu, pale pámiiloolalii peenaput. Eeha nkayem ha ti hiŋesu hiyem, inci niŋ aluu úpukatinoolaa, ancuk ninanfii.18Napaanap pakan paka kati kataak hame eti hilohu aluu, pale yeno lamma niŋ pámiiloolalii pinapaa, neetaat niŋ inci yeniyaa niŋ aluu lamma.19Aluu epuukam, la inci iyyem la le oopa ti hicuku nene ñíseeña ñenfakat kamma aluu, samat nii aal eeyem ti hipuku. Apan ñíseeña eññuu efiñitowo ti inci fo ta efinicuk samat nii Eenucee ya.20Pásuumayam hínum píyemi niŋ aluu fiye, tempo anti kúpaati niŋ aluu nii fiye, kaatuko níyolinaamyolin!21Aluu kéelafiye ka hítuulu hilim ha heesiiŋanee ha hiti Móyiis, nisokam man nísiyaasi eeha nihisoke ha.22Kaatuko kiiceekiic ti hilim ha hiti Pútuun pa nii, Abraham epuuk pákasupak naataake: akee ti aal a amiikan a aŋa nkasok a Hakal, akee ya ti aal a eeneetaat a amiikan, aŋa nkasok a Sara.23Añii aŋa naataake ya niŋ amiikan a, naapukee samat nii fa an napukee fa. Pale aŋa naataake ya niŋ aal a eeneetaat a amiikan, naapukee samat nii fa Pútuun pa mpíyinanane fa.24Eehuu púlooŋ waah níhiyisane unaa: kaatuko pakaal paka pákasupak paka payenkuu kacukaacuk nii písiyool púsupak. Aal a áyaañ a, Hakal, áyisane písiyool empa Pútuun pa mpiliile pa niŋ Móyiis ti tíntiŋ ya eti Sinayi. Epuuk ya keepukee ka ti písiyool empuu, kapukeepuk ti himiikanate.25Hakal ayem tíntiŋ ya eti Sinayi eyyuu eeyem ya Arabiya, acukaacuk nii Jerusalem eti fiye, eeyem ya ti himiikanate niŋ epuuk eteyyo púlooŋ.26Pale akee aal a, Sara, ayem Jerusalem eeyem ya alacana. Akina ayem íññaa ati unaa, apan aneetaat amiikan.27Kaatuko kiiceekiic ti hilim ha hiti Pútuun pa nii:“Taak pásuuma, awe aal a eeyem a caakonta.Séepin hilimi inceek niŋ pásuuma,awe éemiit a ñíseeña ñiti hipuku!Kaatuko epuuk ya pakati aal a éefulanee ya ti pinimo pa piteyoo,efikahaŋ pameeŋ pakati aal a eeyem a ti áyiinoo.”28Fiye aluu pakanam ti káyinan, aluu epuuk keepukee samat nii fa Pútuun pa mpíyinanane fa, samat nii Isaak.29Ti oom caanak, añii ya eepukee ya samat nii fa an napukee fa, akallanaa-kallan añii ya eepukee ya ti sempe sa siti Kunuu ka keenape ka. Fiyuu lompo iyyem ti pitaako fiye.30Pale eeheyme hilim ha hiti Pútuun pa nihisoke? Hisok: “Yaan amiikan a aŋuu niŋ añiinoo! Añiinoo átayini pípaacinool hisaanumate ha hiti paapaa ateyoo niŋ añii ya ati aal a eeneetaat a amiikan.”31Ooto pakanam ti káyinan, unaa uneetaataa epuuk pakati aal a amiikan a, pale unaa epuuk pakati aal a eeneetaat a amiikan.
Wycliffe Bible Translators, Inc.