EFESO3
Kisalu ki Pawuli
1Ni hahoho, meno Pawuli, nidi nkole yi Yesu-Klisto mu dyambu di yeno lulembolo ba Bayudayo.2Yeno luyuwa bwedi Nzambi, mu mulemvo andi, kampanina kisalu mu dyambu dyeno.3Nzambi wunzabikisa mansweki ma mabanza mandi bonso buna tonini mu sonika mo, mu mwa ndambu mpova zifyoti,4mpe bu lwaatanga mo, mbo lubakula madyela ma mansweki maa naani matadidi Klisto.5Nzambi kazabikisa mansweki bemomo ku bantu ba mbandu zi ntama ko, kansi mu Mpeve andi, zabikisi mo bwabu ku zintumwa na ku mimbikudi myandi.6Mansweki bemomo ni ema: mu nzila yi Musamu Wumbote, yobobo balembolo ba Bayudayo baa kintwadi na Bayudayo mu bima bi kubikila Nzambi mukangu andi. Yawu beka binama bi nitu yimosi, mpe beka kintwadi mu nsilulu yi basila Nzambi mu Yesu-Klisto.7Meno nayikidi kisadi ki Musamu Wumbote mu dyambu di munkayulu wumpana Nzambi mu bumbote bwandi. Yandi wumpana wo mu nzila yi lulendo lwandi.8Ku meno, muntu wunsuka ha kati di balongo bamvimba, Nzambi kasiila mulemvo mu samuna ku yobobo balembolo ba Bayudayo kimvwama kilembolo nsukunu mu Klisto,9mpe mu lonka ku bantu bamvimba, tuka mu tuka, bwedi Nzambi kaswekila mansweki ma misamu bemyomyo mu yandi wuhidika bimvimba[Yesu-Klisto],10mwanki mu nzila yi dibundu, zimfumu na baa na lulendo ku Yulu, ba zaba bwabu ndwenga zizingi zi Nzambi.11Bonso budi mabanza ma Nzambi, mu mimvu ka mimvu, ma kalungisa mu Mfumu eto Yesu-Klisto.12Mu yandi, mpe mu kiminu kyeto mu yandi, tudi na kimpwanza kye finama ku Nzambi na kivuvu kimvimba.13Ni hahoho, nina lulomba mulembolo lebakana mu dyambu di zimpasi zi nina yena mu dyambu dyeno, kadi zidi nkembo eno.Luzolo lu Klisto
14Ni hahoho nafukimini ha ntadisi yi Nzambi, Tata,15ku yandi makanda mamvimba maa ku yulu na maa ha butoto matambula nkumbu awu.16Nina mulomba, bonso budi kimvwama ki nkembo andi, katoma lusyamisa mu kati di kimuntu kyeno, mu lulendo lu Mpeve andi,17mpe Klisto kazakala mu mitima myeno mu nzila yi kiminu, mwanki lumena myanzi na lukangama nakekete mu luzolo,18mwanki lu ba na lulendo lwe zabila, ha kimosi na balongo bamvimba, bunene, bula, kuzangama mpe sunda yi luzolo lu Klisto,19mpe mu zaba luzolo lu Klisto luhyokidi ndwenga zimvimba, mwanki bimvimba bii mu Nzambi biba bifuluka mu yeno.20Ku yondowo lenda hidika, mu lulendo luna sala mu yeto, misamu mimingi mi hyokidi kitezo mu myo mi tulenda lomba mpe mi tulenda yindula,21bika, mu Yesu-Klisto, kakemboso mu dibundu, mu mbandu zimvimba, mu mimvu ka mimvu. Ameni!Wycliffe Bible Translators, Inc.