EFESO2
Nzambi kwe haananga luzingu mu Klisto
1Mu ntama, yeno luba bonso bantu bafwa mu dyambu di mambi meno na masumu meno,2lulanda nkadulu zinza beyiyi, luvumina mfumu yi zimpeve zimbi wuna yaala ha kati di yulu na butoto, mpeve beyoyo yina sala bwabu ku yobobo bakwe lembolo tumiminanga Nzambi.3Yeto mpe, tuba bonso yawu, twedi dyatila bonso bu nsatu zi nitu zeto. Twedi sadila luzolo lu nitu na mabanza meto, ni hahoho, yeto mpe tuba bantu bafweti sembo mu nganzi zi Nzambi bonso bahiika.4Kansi Nzambi wudi wufuluka mu nkenda, mu dyambu ti luzolo lwandi lulunene lu katutiila.5Yeto bu tuba bafwa mu dyambu di masumu meto, wutuhaana dyaka luzingu mu Klisto. Ni mu mulemvo wu Nzambi yeno lubakila mpulusu.6Mu kintwadi kyeto na Yesu-Klisto, Nzambi wutufulukisa nandi na wutuzakisa nandi ku yulu.7Wulonka bumbote bwandi ku yeto mu Yesu Klisto. Nzambi wusa bobo mwanki kalonka mu ntangu zina kwiza, bonso budi bunene bu mulemvo andi.8Mu dyambu ti ni mu mulemvo wu Nzambi lubakila mpulusu, mu nzila yi kiminu . Mpulusu beyoyo yifuma ku yeno bende ko, munkayulu wu Nzambi wudi.9Ka mu mavanga meno ko lubakila yo, mwanki kulembolo ba muntu wuna kitumpidika.10Nzambi wutuhidika. Wutuhidika mu Yesu-Klisto mu dyambu di misamu mimbote mi katukubikila tuka ntama, mwanki tusadila myo.Kanda dimosi mu Yesu-Klisto
11Ni hahoho bambukeno moyo, bwedi luba mu ntama, yeno luba Bayudayo bambutuka ko, balutumisina bantu balembolo zengoso bubakala ku yobobo ba kwe kitumisanga ti, bantu bazengoso bubakala mu dyambu ti basa bifu mu nitu zawu mu nzila zi moko ma bantu.12Mu ntangu beyoyo, luba na Klisto ko. Banzenza luba, yeno luba mu mukangu wusoola Nzambi ko, mpe luba mu kati di nsilulu zisiila Nzambi ku bantu bandi ko. Luba bantu balembolo ba na kivuvu mpe balembolo zaba Nzambi mu nza beyiyi.13Kansi mu kintwadi kyeno na Yesu-Klisto, yeno luba kitatu, lweka bwabu bafinama mu nzila yi menga ma Klisto.14Ninga, mu dyambu ti yandi wuu kiyenge kyeto, yandi wusidi ti Bayudayo na balembolo ba Bayudayo baba muntu wumosi. Mu bula kibaka ki kitantu kyedi bakabula, wuyekola nitu andi ha kulunsi,15katudi lulendo lu Misiku mi Bayudayo ha kimosi na ntumumunu mpe na nsikudukusu zawu, mwanki makanda mamamole makituka kanda dimosi dimoona mu yandi. Ni bwabobo kasiididi kiyenge.16Mu mfwilu andi ha kulunsi, Klisto wubundisa makanda bemomo mamamole mu nitu yimosi mpe wubawisisa na Nzambi. Mu mfwilu andi ha kulunsi wukatula kitantu ha kati dyawu.17Klisto wuyiza mu samuna kiyenge bonso musamu wumbote ku yeno luba kitatu, na ku yobobo baba bela-bela.18Mu dyambu dyandi, yeto bawonso Bayudayo na balembolo ba Bayudayo tulenda finama ha ntadisi yi Tata, mu Mpeve yimosi kaka.19Ni hahoho, yeno lusidi dyaka zinzenza hoti minyizila ko, kansi lweka bisi nsi, bantu balongo mpe luvwihulu mu kanda di Nzambi.20Yeno lweka nzo yitungu ha yulu lufulu lu zintumwa na mimbikudi, Yesu-Klisto yandi bende ni tadi di mfunu dikwe simbanga nzo.21Ni mu yandi ntungulu yimvimba yii yikangama ha kimosi, mpe yii yitelama mu ba mu Mfumu nzo yilongo.22Mu yandi, yeno mpe balutunga ha kimosi na yawu mu ba nzo yikwe zakalanga Nzambi mu Mpeve.Wycliffe Bible Translators, Inc.