Isaíasi30
Dimurei habügürü ha áluahabaña ídemuei luma Ehiptu
1Lariñahare Wabureme: «Fugiabugu isaanigu mabuchahatiña ha aransehabaña hadügün aban katei málügüdünga hamana, aranseha hagía hadügüni haritagun le uáguti mariñagun nan houn, rúguatiñati figóu ligibuagun figóu!2Ñǘdüntiña Ehiptu furesegueina, ani málügüdahantiña numa; áluahatiña ídemuei luma urúei Ehiptuna, aramudaguatiña lábugiñe lamuñadiri Ehiptu.3Gama lumoun leyeedubaña lídehan urúei Ehiptuna, wuribabei lanügün haramudagun lábugiñe lamuñadiri Ehiptu houn.4Lau sun hóunahan láutiña uganu uburugun Soán luma Anesi,5leyeedubadün néchani meseriwínti ligía, le manügünbei ídemuei, ni kata buiti hun luéidigia magundani luma lamiselu».6Anihán uganu habügürü animaalugu ha Negebübaña: «Luéigiñe fulasu le buin umuti lau denchaü, le ñein lumuti haganóua liñún, hewe hama düragón burí áhamahatiña, hanügei hirisin hanagawagu burigü hama kameyu Ehiptun, fulasu móuniti,7mabafuti, siñati lídehan. Ligía níchugunbalin iri le luagu: “Mónsturu le adürürühabei gama lumoun madügünti ni kata”. »8Lariñahare Wabureme nun: «Abürühabei lubeiti uénedü le guentó luagu aban fulansu, lun lerederun kei aban gefenti magumuchaditi lubá líteme.9Mabuchahatiña gürigia ha, magunfulintiña, máhatiña haganbuni larufudahan Wabureme.10Ariñagatiña houn aríaahatiña: Mewenedü humá. Ariñaga hagía houn profetagu: Mabahüdagua humá arufudúni inarüniti woun; hadimureha dimurei burí huáliti woun, magidara huméi waritagun wawéi.11Direi humá luéi üma, geyé humá luéi üma le surubei, míchiga humawa ligibugiñe Wabungiute le Sándubei, le Lubungiute Ísüraeli».12Ligía lariñagunbei Wabungiute le Sándubei le Lubungiute Ísüraeli: «Máhatün lun eweridihani le, hemenigitün luagu anarimeni luma wuribani, luagu burí katei le hárügüda;13Ligía gadurun hubéi. Ítara hiña kei aban baríeiru íñuti le fudufuduguhali le gayaraabei léiguadun sódini.14Ítara huba kei aban fudu le lauti múa, le dan lubéi labouchagun meredeti ni murusun life le gayaraati leseriwidun lun lasagahóun leñegura watu régigirugugiñe, o lun lan ladaburún duna fúsurugugiñe».15Lariñahare Wabureme le Sándubei le Lubungiute Ísüraeli: «Giribu humá, darangilu humá, ábame hesefurun. Lídanbei darangilaü luma emenigini here». Gama lumoun máhatün,16hariñagarüga: Uá, wanurahagubei gabayuagu. «Ítara luba lubeiti hanurahan». Ariñagatün giñe: «Wádinuba karü fureseburitu». Furese baña lubeiti ha lúnbaña héibaahanün.17Hanurahaba milu luéi ábanrügü wügüri, sun huguya hanurahaba hawéi séingürügü wügüriña darime herederun fiú kei lerederun aban wewe lábulugu aban wübü o aban lan seini le luáguti aban wübü.Füramasewa lan gudemehabu lun uburugu
18Gama lumoun lagurabuñadün Wabureme lau lugudemehabu hun; busenti larufuduni línsiñehabu hun, lugundun richati Wabureme le Wabungiute. Fuleseiwatiña sun ha hemenigibaña luagu!19Lílana Sión, ha aganóubaña Herusalén: Mayahundigiaadün. Gudemehabubei Wabureme hun danme laganbun hagúarahan amuriaha ídemuei, ani keime laganbunün, ítara luba lóunabunün.20Ani lau sun líchugun Wabureme fein lánina asufuriruni, luma duna lánina idiheri hun, ligía le humaisturun, maramudagundigiaali; harihubei lau hagu.21Ani anhaün adireira luagun hóunwenren o luagun lan hubaünan, haganbuba aban umalali hanagangiñe ariñaguti hun: «Anihán ǘmabei, ñéingiñela hidin».22Ábame hanügüniña higuariuan kei katei wíyeti, higuariuan ha láutiña pülata hama ha láutiña golu. Híchuguba mebereseni hau kei katei wíyeti, hanügübaña kei ifei.23Líchuguba Wabureme huya hun lun hábunaguni múa, ábame líchugun múa saragu türigu hilumati. Lídanme weyu ligía, ñeinbei saragu fulasu houn hilügüniña lun heigin sagadi.24Íbini bágasu wügüriña hama burigü ha nadagimeinbaña humúanrugu, héigibei lubuidun-agei heigin animaalugu.25Danme lachülürün weyu lánina lueirin áfarahani, danme léiguadunga erei, ñeinbei lanarime léibaagun duna lidan burí liñun áraabu luma luagu burí liñun wübü.26Lagaranihaba Wabureme lun burí biti le hawagubei lánigu, ábametima larunidun hati kei weyu, ani léreduba laruni weyu sedü wéiyaasu luéiñaha ligaburi, kei laruni sedü weyu lidan aban.Labeichúba Asiria
27Anitén Wabureme dísegiñe: Laduranguña ligañi lau gumuleli dereguati, buin liña liyumaaru lau igañi, ítara tiña liñeñe kei watu gemeti le gagünrinchaguati.28Ítara liña lawaragun kei aban duna le afuluduhati, dan le lawarirun chülüti luagun igiinaü; liábiña íchigei ihürügu hawagu gürigia lun lanügüniña lidoun günringuaü, íchiga furenu luagu hayuma lun layuridaguagüdüniña.29Ánheinti hun, ñeinbei uremu, kei lidan fedu sagüráuti; gúndaañu tuba hanigi, kei lanigi le éibuguti úara luma tamuri fidu lun lidin lidoun luwübüri Wabureme, lidoun laramudaguagüle Ísüraeli.30Laganbagüdübei Wabureme, luéirigun lumalali, larufudubei lubafu, le lunbei luadigimaridun lau lanarime igañi, lau watu gemeti le gagumuchaguagüdaditi, lau labirihaniga, lau guran huya luma lúbara huya dereguati.31Labuinchuba Asiria lau anufudei danme laganbuni lumalali Wabureme luma danme le labeichuni,32Ságüme lagayuahan Wabureme luagu, laganbúba garanwoun tuma árüpa. Líchuguba Wabureme aban lanarime wuribu luagu.33Lúmagiñe binarü aranseñu liña lan aban fulasu lánina asufuriruni lubá Asiria luma lubá lurúeite, le ñeinba lubéi lagudúa. Migifeti fulasu ligía ani huliliti giñe, aban bugan watu gemeti lau saragu watu. Lébedubei Wabureme lau lawaragun kei aban léibaagun duna lauti súfuru.Bible Society of Honduras