Isaíasi31
Habügürü ha áluahabaña ídemuei luma Ehiptu
1Fugiabugu ha ñǘdünbaña Ehiptu áluga híderawagun, ha hemenigibaña hawagu gabayu, ha íchugubalin hemenigi luagu tibe hakarün luma luagu hibe hagabayun, madigiragúntiña luagun Wabungiute le Lubungiute Ísüraeli, máluahan hamuti Wabureme!2Gama lumoun chuti lau Wabureme ani adügati lun ñein lan lamiselu, ani dan le lariñagun aban katei, adüga lumuti. Liñuraguba hawagun gürigia salufuritiña ha íderagubaliña wuribatiña adüga wuribani.3Mama búngiugu wügüriña Ehiptuna; láutiña ǘgürügü hagabayun, mama sífirigu. Liñurubei Wabureme lúhabu lun labeichuniña, ani dandu le ágüdahabei, kei le ágüdahoubei, hábürühaba; hagumuchaguba sun hagía úara.4Lariñahare Wabureme nun: «Ítara kei mígirun lan aban liñún le áfaraali aban mudún lun halouchagüdüni hóuniri mudún, íbini hóundaragun sun hagía oucha halouchagüdüni lau hagúarahan, ítara luba liabin Wabureme Suntigabafu esefuraña lánigu luagu wübü Sión.5Kei dunuru to óunigirubalin tumasa áhamaha lóugiñe, ítara luba lóunigiruni Wabureme Suntigabafu Herusalén; lóunigirubei, líderagubei, lesefurubei».6Lirahüñü Ísüraeli, giribu humá lun le hanabagubei.7Lugundun wéyume hígiruniña sun guáriua láutiña golu luma pülata ha hadügübaña lau húhabu gafigounti,8lábürühaba Asiria tau eféin, gama lumoun mama lau lubafu wügüri. Lanuraagüdübaña wuribu lílana fulasu, ábame hanaawagun nibureintiña ha wuriburuguna idamunime;9láfuriduba lurúeite éibaagueina le lanufude, hanurahaba hábutigu súdara lídangiñe habara. Aburemei ariñagubalin le, luagu anihein lan aban bugan watu gemeti luma uburugu Herusalén lun labeichaguniña láganiñu.Bible Society of Honduras