Isaíasi29
1Fugiabu Arieli, uburugu le meha ñein lubéi líchigoun urúei Dawidi likianpun! Hefeduha átiriraüya dan,2Níchugubei Arieli lidoun lénrengunga, ñeinbei ayahuni. Ítara luba uburugu nun kei Arieli le tímatimaati.3Nóunahabaña nisudaran lun hegeyedagun bau, lun hábürühan buagun luéigiñe sun oubaü.4Berederuba ǘnabuguñu, roun múarugu; ítara luba bumalali kei lumalali pantu; hámarubei laganbún bererun.5Gama lumoun sódinime, ábame labeichuniña Wabureme báganiñu lau wayuhuru, hárabaganali, ladürürühaniga, luriban dan, luma gudáü. Herederuba báganiñu ha gíbebaña kei kaliki, haduruuhóuba ha éibaahabalibu ha gíbebaña kei ubanaü sáühali.7Sun gürigia ha, ageindagubaña luma Arieli, ha íchubaña lidere dan lun, ítara haba kei aban uénedü o aban lan aritaguni áriebuna.8Ítara luba kei dan le gewenedü lan aban lamati léigiña lan, gama lumoun dan lagagudun, málati lurageirugu; o kei lan dan le gewenedü lan aban mágürabuti látuña lan, gama lumoun aba lagagudun lau mágürabu mábeiñu lagülerugu. Ítara luba lasuseredun houn gürigia ha ageindagubaña luma wübü Sión.9Ítarameme humá lau libidiounigan hau! Ítarameme humá marihinga, anhaün busén! Ítarameme humá atuituiha kei bacharuatiña, lau sun matun humá uniñein bacharuagüdati!10Óunahaali Wabureme aban idabagu huliliti huagun. Profetagu, hagía hágubaña lílana fulasu, gama lumoun daruguaali Wabureme hau tau aban belu.11Ítara liña sun uénedü hun kei katei le bürüwañuti tidan aban líburu to hóuburatu. Anhoun ichugúa lun aban le galiihaditi lun laliihanu, lariñaguba: «Siñá numutu, ladüga murugutiña».12Anhoun ichugúa lun aban le maliiraditi lun laliihanu, lariñaguba: «Maliiraditina».13Lariñahare Wabureme nun: «Gürigia ha, láurügüñein dimurei nínsiñeda houn, hayumárugiñe híchiga inebesei nun, ánhounti hanigi, dísetu nuéi, óundaruni le hadügübei nun, katei le hadüga wügüriña lira, lafurendeirun hachügü.14Ligía naweiridagüdayaboun lubéi hanigi lau seini luma milaguru. Lagumuchaguba lichú hau chu tau, gumugua ligíame hafurendei furendeitiña».15Fugiabugu ha aramudagubaña luéi Wabureme lun haramuduni haransehan, ha adaagubalin hariban lábugiñe luburiga, hariñaga: «Marihin lumutiwa ni aban, mefenti ni aban luagu le wadügübei!»16Ariha humá lun ligaburi hagadeiruni katei! Kamá hamuga ítara liña múa kei le nadagimeinbalin. Mariñagunbei aban katei lun le adügübalin: «Mama buguya adügübalina». Mariñagun ligíame aban katei lauti múa lun le adügübalin: «Ibidiñeti bun ka lan badügübei».
Füramasewa lan esefuruni lun Ísüraeli
17Málühali anhein eredera dabíara lun fulasume lánina ábunaguni, liábinmeti fulasu le lánina ábunaguni, ítara luba kei dabíara.18Lídanme weyu ligía, ha maganbunbaña, gayaraabei haganbun danme laliihóuniwa houn, gayaraame harihin marihintiña. Séfuaañame lídangiñe luburiga.19Ha ǘnabugubaña, hagundaarayaba luma Wabureme, gunda hagíame ha gudemetimabaña luma Lubungiute Ísüraeli le sándubei.20Hagumuchaguba ha mabuchahabaña, hagumuchaguba ha barüguabaña houngua, hama ha luágurügübei ladügǘn wuribani haritagua.21Ha ariñagubaña hawagu amu luagu áfaraha hamá ru hagía sádaragu lubá aguseragüdüti, míchugun haméi liricha le madurunbei lun.22Ligía lariñagunbei Wabureme le Lubungiute Ísüraeli, le esefurubalin Abüraámü: «Lúmagiñe guentó lun lubaruaguóun, masandihalime Hakobu busiganu, masansiragun ligíame ligibu.23Lugundun danme harihini ladügawagun le nadügübei hageira, hasubudirubei luagu au lan sándubei, inebe nuguyame houn, au le Lubungiute Ísüraeli.24Ha buga bulíeiguabaña, hafurendeiruba lun lachuurun hau, ha gagülülühadibaña hánharuba lun le arufudahóubei houn».Bible Society of Honduras