লুক6
1ইশুহা সানুকো দিনতাহা মোওংবিরিসো জিংমসা হ্যাদিংমি। আকো য়োংতোংবিহা মোওংকো মোইপ্যাবি য়্যমসা আকো অংসেবি খুইতা লেরইমসা নিচাদাংয়ে।2ই তিংমসা ফরিসিবিহা য়োংতোংবিহিং জাংয়ে, “পবিত্র সানুকো দিনতা লিংপাংতা জোমতুওয়া কাম নাবিহা হাংপা জোচাংমগা?”3ইশুহা আবিহিং জাংয়ে, “দাউদ জাইপুসো আকো ব্যারোবিহা আমা পাংপুনুওয়া হাং জোংগা? নাবিহা মোপড়াইয়াংগা?”4আকুহা সেংজাকো সাকো নাপোতা হোমসা সেংজাহিং পিচাওয়া কোব্রেংহা চাপুয়ে। লিংপাংতা জাংওয়া বেপাহা পাউবি মেংচে আকু কোব্রেং চাচামুংমগা। দোসরা হাংসুরে চাচামামুংমগা। আদো দাউদহা আপনি মেংচে মাচাপা দোসরা ব্যারোবিহিংনে চাকো পিচায়ে।5আসা ইশুহা ন্যাসারাং জাংয়ে, “কা দিংঙাকো চেংওয়াহা সানুকো দিনকোরে প্রভুগা।”6ন্যাসারাং দোসরা ইকোই সানুকো দিনতা ইশুহা জোংসুওয়া সাতা হোমসা ঝিপায়ে। আউতাহা দাংক্রেং খুই সেংপুওয়া দিংঙারে নিমি।7তাংজিকো উটকেওয়াবি আসা ফরিসিবিহা ইশুহিং হেপা দোষ লাগাইনেকোমে তামসা নোসুদিংমি। আবিহা সানুকো দিনতা আকু খুই সেংপুওয়া দিংঙাহিং না সাংপাকোমে তামসা কাংসুদিংমি।8আবিকো নোসুওয়া কোইমসা ইশুহা আকু খুই সেংপুওয়া দিংঙাহিং জাংয়ে, “নাতিহা লোমসা তাংসাকো নাগাইতা জা!” আকুহা লোমসা জায়ে।9আসা ইশুহা আবিহিং জাংয়ে, “কা নাবিহিংয়া ইচো নুওয়াং উইরোওয়া, লিংপাং অনুসারহা সানুকো দিনতাহা হানি কাম জোওয়া এনতাকোগা? মেংতাওয়া কাম জোকোগা, না এতাওয়া কাম জোকোগা? স্যাকোগা, না বাচাইকোগা?”10আসা আকুহা আবি তাংসাহিং ন্যইমসা আকু দিংঙাহিং জাংয়ে, “নাকো খুই লা” আকুহা খুই লানতানি আকো খুইহা সাংপুয়ে।11ই তিংমসা ফরিসি আসা তাংজিকো উটকেওয়াবিহা সিওপারাং সেদ্রাংপুয়ে, আসা “ইশুহিং হাং জোনেকোমে” তামসা তাইবিলারাই য়্যইসু জাংসুয়ে।12সাইয়ুহা ইশুহা য়্যাগ্যইতা হোমসা হিপপিরি সেংজাহিং পাচাইয়ে।13হাপকুং জেংপুনুওয়া আকুহা য়োংতোংবিহিং মোউয়ে আসা আবিকো প্যাকোসো বার্চোহিং জেংয়ে, আসা আবিহিংয়া জেংওয়া পোইং তামসা মিং এপিয়ে।14আবিহা ইবিরাংগা, সিমোন, ইশু হাংসুহিং পত্রস মিং এমে, সিমোনকো এ আনদ্রিয়াস, য়াকুব, য়হুন্না, ফিলিপ, বার্থোলোমাই,15মথি, থোমা, অল্ফাসকো চেংওয়া য়াকুব, সিমোন [হাংসু রোমি সরকারহিং মোসুংপা জোমে]16য়াকুবকো চেংওয়া য়হুদা, আসা য়হুদা ইস্করিয়োত [হাংসু নোইতা ইশুহিং ধোকা পিচামে]17ইশু য়োংতোংবিহিংপা য়্যাগ্যইসো উইপামসা লেহে আসা ওয়াংবোইতা জায়ে। আউতাহা উইসে আকো য়োংতোংবি আসা তাংসা য়হুদিয়া, য়রুশালেম, আসা দাব্রিকো আরিতা নিওয়া তুরোস আসা সিদোন তাওয়া শহরসো উইসে দিংঙাবি লেওয়া নিমি।18আবিহা আকো য়্যইদি হিংকো আসা আপনি আপনিকো হাইওয়া য়োংন্যাবি সাংকো লেওয়া নিমি। আউতাহা মেংতাওয়া লাংবে দ্যইংচাপুমসা মোচুওয়া দিংঙাবিরে নিমি।19তাংসা দিংঙাবিহা আকুহিং সুকো কেংদিমি, হাংপাতানা সাংওয়া সেহা আকোসো নোদিংমি, আসা আবি তাংসা সাংদিংমি।20আকো নোইতা ইশুহা আপনিকো য়োংতোংবিহিং ন্যইমসা জাংয়ে,“ও, জোরোংবাই! নাবিহা আশিষিত নিও,হাংপাতানাহা সেংজাকো রাজ্যহা নাবিকোরাংগা।21ও, নেকো হাপাংপুমবাই! নাবিহা আশিষিত নিও,হাংপাতানাহা নাবিহা গাইরোওয়া।ও, নেকো কাইমবাই! নাবিহা আশিষিত নিও,হাংপাতানাহা নাবিহা য়াংতারোওয়া।22নাবিহা আশিষিত জিংরোওয়া,হাংপাতানাহা দিংঙাকো চেংওয়াকো তোইতা দেংওয়াকো সোতা দিংঙাবিহা নাবিহিংমোসোংপা জোয়ে, মাংকো প্যাকোসো নোপায়ে, মিচিপা জোয়ে,আসা নাবিহিং লেফেপায়ে।23আত্রংহা গাগ্রু, আসা য়াংতামসা য়ৌই,হাংপাতানাহা লোডিংবাতা নাবিকো ইনামহা টেবো নিও।আবিকো আজা আটাবিরে নাগাইকো অগমবক্তাবিহিংয়া এপা জোমসারাং মেংতাপা জোমগা।24ও, নেকো পুপুউ জিংবাই!নাবিকোতাহা টেবো কোইচ্যাওয়া দেপাদাংয়ো,হাংপাতানাহা নাবিহা সুখ-শান্তি মুংচানতেও।”25ও, নেকো ফেমাতা গাইমবাই! নাবিকোতাহা টেবো কোইচ্যাওয়া দেপাদাংয়ো,হাংপাতানাহা নাবিহা হাপাংমসা য়ুংরোওয়া।ও, নেকো লেংওয়াবাই!নাবিকোতাহা টেবো কোইচ্যাওয়া দেপাদাংয়ো,হাংপাতানাহা নাবিহা কোইচ্যারোওয়া আসা কাইমসা তেইরোওয়া।26ও, নেকো দিংঙাবিকোসো প্রশংসা মুংওয়াবাই! নাবিকোতাহা টেবো কোইচ্যাওয়া দেপাদাংয়ো,হাংপাতানাহা এপারাং নাবিকো আটা আজাবিরে প্যায়োংকো অগমবক্তাবিহিংয়া তাচামগা।27“আদো কুং ঝিপাওয়া হিংবিহিংয়া কা জাংরোওয়া, আপনিহিং মোসুংপা জোমবিহিং জেজেংপা জো আসা আপনিহিং আচকাপা জোমবিহিংনে এনতাপা জোমসা তিংপা।28নাবিহিং সিপুকো উদ্যাইমবিহিংয়া আশিষ পিচা। হাংসু নাবিহিং মেংতাপা জো আবিহিংনে পাচাইপি।29হাংসু নাবিহিং ইচো য়ুওয়াইতা ত্যাচোং দোসরা য়ুওয়াইরে দোপি, আসা নাকো আংদুং গিংচাওয়াবিহিংয়া নাকো লুওয়া আংদুংরে পিচা।30য়াওয়া দিংঙাবিহিং পিচা, নাকোসো হাইক্রি পুচামবিকোসো মালাচা।31দোসরা দিংঙাবি নাবিহিং হাইক্রি জোপিমে তামসা আবি হেপা ইচ্ছা জো, এপারাং নাবিরে আবিহিংপা জোপি।”32“জেজেংপা জোমবিহিংপা মেংচে জেজেংপা জোনাহা নাবিহিংয়া হাং ত্যইংদা জিংকোগা? পাপিবিরে আবিহিং জেজেংপা জোমবিহিংপাহা এপারাং জোমগা।33এপারাং নাবিহা জেজেংপা জোমবিহিং মেংচে জেজেংপা জোনাহা নাবিহা হাং টেবো কাম জোংগা? এপারাংমা পাপিবিরে জোমি।34টাপিকো ছুমবিহিং মেংচে নাবিমি খিচপানাহা, নাবিহিংয়া হাং ত্যইংদা নিংগা? হাংপাতানাহা পাপিবিরে আউসেরাং মুংচারোওয়া তামসা পাপিবিহিং খিচপামগা।”35“এপা মোকোমি, আপনিহিং মোসোংপা জোমবিহিং জেজেংপা জো, আসা আবিকো সোতা এনতাপা কাম জো। মুংচারোওয়া তামসা মেংচে মিখিচপা, আসা নাবিহা লোডিংবাসো টেবো ইনাম মুংচারোওয়া। আসো মেংচে নাতিহা টেবো সেংজাকো চেংওয়া জিংরোওয়া, হাংপাতানাহা আকুহা মেংতাওয়া দিংঙাবি আসা দোষ জোওয়া দিংঙাবিহিংনে জেজেংপা জোমগা।36সেংজা আপা হেপা জেজেংপা জো, নাবিরে এপারাং জেজেংপা জোওয়া জিং।37“দিংঙাবিহিং দোষ মাতিংপা, এপারাং সেংজারে নাবিহিংয়া দোষ মাতিংপারোওয়া। দোসরাবিহিং ন্যায় মোজো, এপারাং নাবিহিংনে ন্যায় মোজোরোওয়া। দিংঙাবিহিং মাপ পিচা, আসা সেংজারে নাবিহিংয়া মাপ পিচারোওয়া।38দোসরাবিহিং পিচা, আসা সেংজারে নাবিহিংয়া পিচারোওয়া। আকুহা জিজিমসা সাডিংপা য়াপামসা ক্যাপক্যইপা নাবিহিংয়া পিচারোওয়া। হেপা নোওমসা নাবি দোসরাবিহিং পিচা, এপা নোওমসারাং নাবিহিংনে পিচারোওয়া।”39ইশুহা আবিহিংয়া থ্যাহপামসা জাংয়ে, “ইচো মিচো মিতিংওয়া দিংঙাহা দোসরা মিচো মিতিংওয়া দিংঙাহিং তোইংকো চুকোগা? এপামি তোইংনাহা আবিহা নিহসোসা হোক্রাতা মোহুইচাকোগা?40য়োংতোংহা হাত্রংরে উটকেওয়ারোমা টেবো মাজিংমগা, আদো আকুমি এনতাপা ঝিপুনতেনাহা আকুহা উটকেওয়া বেপারাং জিংমগা।”41“নাবিহা দোসরাকো মিচোকো সিংচা তিংমগা, আদো আপনিকো মিচোকো সিংদ্রাংহা হাংপাসা মাতিংমগা?42আপনিকো মিচোকো সিংদ্রাং মিতিংওয়াহা হেপা আপনিকো এবি ডুওয়াবিহিংয়া জাংকো চুকোগা, ‘কা নাকো মিচোকো সিংচা নোপাপিরো’ তামসা। ও তেপিবাই! নাগাইহা আপনিকো মিচোকো সিংদ্রাং নোপা, আসো মেংচে দোসরাকো মিচোকো সিংচা নোপাকো হাহাইপা তিংরোওয়া।”43“এনতাওয়া সিংতেংতা মেংতাওয়া ফল মেসেমগা, এপারাং মেংতাওয়া সিংতেংরে এনতাওয়া ফল সেমক্যইমগা।44তাংসা সিংতেংবিহা ফলসোরাং নাইমগা। সোসাকো সিংতেংসোহা মুইরাসে মাপিমগা, এপারাং কাতামসাইকো সিংতেংসোহা আংগুর মেসেমগা।45এনতাওয়া দিংঙাহা আপনিকো তুংসিং নাপোতা নিওয়া এনতাওয়া নুওয়াংবিসো এনতাওয়া কাম জোমগা। এপারাং মেংতাওয়া দিংঙারে আকো তুংসিং নাপোতা নিওয়া মেংতাওয়া নুওয়াংবিসো মেংতাওয়া কাম জোমগা, হাংপাতানাহা তুংসিংকো নাপোতা হাইনি দিংঙাবিহা আকুরাং য়্যইমগা।”46“কুং জাংওয়া নুওয়াংবিমি মাহিংনাহা নাবিহা কাহিংয়া হাংপাসা ‘প্রভু প্রভু’ তামসা জাংমগা?47কুংতা ওয়াংমসা কুং জাংওয়া নুওয়াং লেনুওয়া আকু সাহা উইদাং দাইমসা বানাইওয়াকো সোতা আকু সাহিংয়া হ্যাপামক্যইতো।48আকুহা ইচো সা বানাইওয়া দিংঙা ত্যাবাপা জিংরোওয়া, হাংসু মোংটোতা উইদাং দাইমসা আপনিকো সাহা পাত্যারুংতা বানাইমমে। ওয়্যাতি ওয়্যামসা তিসুই লেনুওয়া আকু সাহা উইদাং দাইমসা বানাইওয়াকো সোতা আকু সাহিংয়া হ্যাপামক্যইতো।49আদো হাংসু কুং নুওয়াং হিংমসারে কুং জাংওয়া সেই মেতেই, আকুহা এপা জিংওয়া দিংঙা বেপাগা, হাংসু বার্পুইকো তোইতা সা বানাইমমে, আসা হাত্রং ওয়্যাতি ওয়ামসা তুসু্ই লে, আত্রংহা আকু সাহা ইপুমসা হ্যাপুয়ে।”
The Seed Company